மோடியா நாமளா ரெண்டுல ஒண்ணு பாப்போம் ! மக்கள் கருத்து – படங்கள் !

0
26

காவிரி உரிமைக்காக நேற்று 05.04.2018 நடந்த வேலை நிறுத்தத்தை ஒட்டி சென்னை செனாய் நகர மக்கள் என்ன கருதுகிறார்கள்? வினவு செய்தியாளர்கள் நடத்திய நேர்காணல்!

ராஜேஸ்வரி, குப்பம்மாள் – பாதையோர வியாபாரிகள், சொந்த ஊர் செய்யாறு.
மெட்ராஸ் வந்து பல வருசமாயிருச்சு. காய்கறி மார்கெட்டிலிருந்து தள்ளு (கழிவு) காயி வாங்கி வந்து கூறுகட்டி விப்போம். ஒரு நாளைக்கு 100, 150 ரூபாய் கிடைப்பதே கஷ்டம். இன்னிக்கு அதுகூட இல்ல. எங்களுக்கு வியாபாரம் போனாலும் பரவாயில்லை. காவிரிக்காக போராட்டம் நடத்துறது சரிதானே. நமக்கெல்லாம் சோறு போடுறது அந்த விவசாயிங்கதானே?

அம்பிகா.
மோடி ஆட்சியில ஒவ்வொரு பிரச்சினையா வருது. பணம் செல்லாதுன்னு சொன்னப்போ, இருந்த வியாபாரமும் போச்சு. இப்ப தண்ணியும் இல்லங்கிறாய்ங்க. இனி, எங்கேதான் போறதுன்னே தெரியல.

கண்ணதாசன், லோடு ஆட்டோ உரிமையாளர், புல்லா அவென்யூ, செனாய் நகர், சென்னை.
மக்களுக்குத்தானே அரசு, கோர்ட், ஆட்சி. ஆனா, இப்ப எதுவுமே நமக்கு இல்லன்னு ஆச்சு. தமிழ்நாட்டுலதான் மருத்துவ படிப்புக்கான சீட்டு நிறைய. அதை “நீட்”ட காமிச்சி புடுங்கிக்கிட்டானுக. மோடி கட்சிக்காரனுங்க தமிழ்நாடு வேலைக்காகாதுன்னு தெரிஞ்சிக்குனானுங்க. அதனால, ஒவ்வொன்னா கைவச்சி, கடைசியில காவிரியையும் புடுங்கப் பாக்குறாணுக. நாம விடக்கூடாது. விவசாயி இல்லேன்னா சாப்பிட முடியுமா? அதனால போராட்டம்தான் ஒரே வழி. மோடியா நாமளா ரெண்டுல ஒண்ணு பாத்துடுவோம்.

பிரதீப், ஐ.டி துறை ஊழியர்.
யாருகிட்டயும் ஒற்றுமையில்ல சார். இப்பகூட தனித்தனியா போராடிக்கிட்டிருக்காங்க. இது வேஸ்டு. ஒரு நாளு ஆளும் கட்சி உண்ணாவிரதம், இன்னொரு நாளு எதிர்க்கட்சிங்க ரயில் மறியல் – கடையடைப்பு. தனித்தனியா போராடுறத விட்டுட்டு, கட்சி பாகுபாடு இல்லாம ஒற்றுமையா இருந்து போராடுனாதான் சார் சாதிக்க முடியும்.

பிரசாந்த், அரியலுர்
நாங்க 4 பேரு சென்னைய சுத்திப் பார்க்கலாமுன்னு வந்தோம். எனக்கு தெரிஞ்சே எங்க ஊருல 40 அடியில இருந்த தண்ணி இப்ப 400 அடியிலயும் காணல. அங்க பொழைக்க வழியுமில்ல. போராட்டம் தேவை. போராடுனாத்தான் விவசாயிங்க பொழைக்க முடியும்.

எப்போதும் மக்கள் நடமாட்டம் அதிகமாகக் காணப்படும் செனாய் நகர் புல்லா அவென்யூ மார்க்கெட் பகுதி.

நேர்காணல், படங்கள்: வினவு செய்தியாளர்கள்

சந்தா

விவாதியுங்கள்

உங்கள் மறுமொழியை பதிவு செய்க
உங்கள் பெயரைப் பதிவு செய்க