29.11.2025
லெப். சாமுவேல் கமலேசன் பணி நீக்கத்தை உறுதி செய்த உச்சநீதிமன்றம்!
இந்து இராஷ்டித்தை நிறுவும் ஆபத்தான தீர்ப்பு!
கண்டன அறிக்கை
இராணுவத்தில் லெப்டினன்ட் ஆகப் பணியாற்றும் கிறித்துவரான சாமுவேல் கமலேசன் குருத்துவாராவின் கருவறைக்குள் சென்று பூசை செய்ய மறுத்த காரணத்தால் இராணுவத்திலிருந்து வெளியேற்றப்பட்டார். அநீதியான உத்தரவை டெல்லி உயர்நீதிமன்றம் உறுதி செய்த நிலையில் சில நாட்களுக்கு முன்பு உச்சநீதிமன்றமும் கட்டாயப் பணி நீக்கத்தை ஏற்றுத் தீர்ப்பு வழங்கியுள்ளது.
இத்தீர்ப்பு தொடர்பாக ஊடகங்களில் மிக மேலோட்டமான கருத்துக்களே வந்துள்ளன அது மட்டும் இன்றி கிறித்துவரான சாமுவேல் கமலேசன் இராணுவ உத்தரவை (அதாவது குருத்துவாராவுக்குள் செல்ல மறுத்தார் என்ற வகையில்) மீறி உள்ளார் என்ற வகையில் மட்டுமே செய்திகள் வெளியாகி உள்ளன. இதன் மூலம் ஊடகங்களும் ஆளும் வர்க்கங்களும் தீர்ப்பை ஆதரித்து செய்திகள் வெளியிடுகின்றன.
சாமுவேல் கமலேசன் என்பவர் லெப்டினட் ஆக பொறுப்பேற்ற ராணுவ குழுவானது ராஜபுத்திரர் மற்றும் சீக்கியர்களைக் கொண்டதாகும். அந்த ராணுவ குழுவினர் மத வழிபாடு செய்யும்போது குருத்துவாராவில் உள்ள கருவறை அல்லது குறிப்பிட்ட அறைக்குள் சென்று பூசை செய்ய வேண்டும் என்று அவருடைய மேல் அதிகாரி அளித்த உத்தரவை மறுத்தார் என்று கூறி அவரை இராணுவ நிர்வாகம் பணி நீக்கம் செய்துள்ளது.
மற்ற வழிபாட்டுத்தலங்களுக்குள் செல்வது தனக்கு எவ்வித பிரச்சனையும் இல்லை என்றும் தான் பின்பற்றக் கூடிய கடவுளைத் தவிர வேறு ஒரு கடவுளுக்கு பூசை செய்ய வேண்டும் என்பதில்தான் தனக்கு மாற்று கருத்து உள்ளதாகவும் சாமுவேல் கமலேசன் உயர் மற்றும் உச்ச நீதிமன்றங்களில் தன்னுடைய கருத்தை தெரிவித்துள்ளார். அவருடைய கருத்தை மொத்தமாக புறம் தள்ளிய உச்சநீதிமன்றம் இராணுவ நிர்வாகத்தின் நடவடிக்கையை ஆதரித்துள்ளது.
இந்திய அரசியலமைப்புச் சட்டம் 25-ஆவது பிரிவானது, அனைத்து மக்களும் மனசாட்சியின் படி சுதந்திரமாகவும் மதத்தை சுதந்திரமாக பின்பற்றுவதற்கும் பரப்புவதற்கும் உரிமை அளிக்கிறது.
மேற்கண்ட அரசியலமைப்புப் பிரிவு 25 -ஐ மறுக்கும் வகையில் தான் சாமுவேல் கமலேசன் பூசை நடத்த வேண்டும் என்று இராணுவ மேலதிகாரியால் உத்தரவிடப்பட்டுள்ளார். இப்படிப்பட்ட கட்டாய உத்தரவளித்த மேலதிகாரியை பணிநீக்கம் செய்ய வேண்டிய இராணுவ நிர்வாகம், சாமுவேல் கமலேசனை பணிநீக்கம் செய்தது கண்டிக்கத்தக்கதாகும்.
சாமுவேல் கமலேசன் தொடர்பான தீர்ப்பில், ஆயுதப்படைகள், துணை இராணுவப்படைகள், காவல்துறை மற்றும் புலனாய்வு அமைப்புகளில் பணிபுரிவோரின் அடிப்படை உரிமைகளை ஒழுங்குபடுத்தும் அல்லது பறிக்கும் அரசமைப்புப் பிரிவு 33 – ஐ உயர் மற்றும் உச்ச நீதிமன்றங்கள் சுட்டிக்காட்டி உள்ளன.
ஒரு மதத்தை பின்பற்றுவோர் அல்லது மத மறுப்பாளர்களை ஒரு மதத்தின் வழிபாட்டுத்தலத்தில் அல்லது வேறு ஒரு வழிபாட்டு தலத்தில் பூசை செய்ய வேண்டும் என்பது எப்படி நியாயமான இராணுவ உத்தரவாகும்?
மேலதிகாரி மாட்டு கோமியத்தை குடிக்க வேண்டும் என்று சொன்னாலும் அதை எவ்வித மறுப்பும் இன்றி ஒரு பணியாளர் மேற்கொள்ள தான் வேண்டுமா?
ஒரு மனிதனின் சுயமரியாதைக்கு எதிராக உயர் அதிகாரிகளால் வழங்கப்படும் உத்தரவுகளை ஏற்றுக்கொள்ள வேண்டும் என்பது எப்படி சரியானதாக இருக்க முடியும்?
மேற்கண்ட தீர்ப்பானது, இராணுவம் மட்டுமல்ல அரசின் அனைத்து உறுப்புகளையும் காவிமயமாக்கி இந்து இராஷ்டிரத்தை நிறுவுவதற்கான தீர்ப்பாகும்.
அரசமைப்புப் பிரிவு 51 ஆனது மத, மொழி மற்றும் பிராந்திய அல்லது பிரிவு, வேறுபாடுகளை களைந்து இந்திய நாட்டு மக்கள் அனைவரும் நல்லிணக்கத்துடன் வாழ வேண்டும் என்பதை வரையறுக்கிறது.
திட்டமிட்டு அரசமைப்புப் பிரிவுகளின் ஒரு பிரிவை இன்னொரு பிரிவுக்கு எதிராக நிறுத்தி தவறான விளக்கங்களுடன் (interpretations) அமைந்திருக்கிறது இத்தீர்ப்பு.
இதனை முன் தீர்ப்பாக கருத்தில் கொண்டு இனி ஆர்.எஸ்.எஸ் – பி.ஜே.பி பாசிஸ்டுகள் திட்டமிட்டு அரசு பணியில் உள்ள சிறுபான்மை மக்களையும் கடவுள் மறுப்பாளர்களையும் ஒழித்துக் கட்டுவதற்காக இந்து கோயில்களில் வழிபாடு செய் என்று மேலதிகாரிகள் மூலம் உத்தரவிடுவார்கள். அதை மறுக்கக் கூடியவர்களை அரசு பொறுப்புகளில் இருந்து விலக்கவும் வாய்ப்புகள் அதிகம் உள்ளன.
ஜெய் ஸ்ரீ ராம் என்று அழைக்காதவர்களை அடித்துக் கொன்று கும்பல் படுகொலைகளை நடத்தும் ஆர்.எஸ்.எஸ் – பி.ஜே.பி சங்கப் பரிவாரங்களுக்கும் இதற்கும் வேறுபாடு இல்லை.
ஆகவே மேற்கண்ட உச்சநீதிமன்ற தீர்ப்பை மக்கள் அதிகாரக் கழகம் வன்மையாக் கண்டிக்கிறது.
இந்துராஷ்டிர கனவை ஆர்.எஸ்.எஸ் – பி.ஜே.பி பாசிஸ்டுகள் தேர்தலின் மூலமாக மட்டுமல்ல அரசின் அனைத்து உறுப்புகளின் வழியாகவும் நடைமுறைப்படுத்துகிறார்கள் என்பது இன்றைக்கு எஸ்.ஐ.ஆர் முதலான அனைத்து பாசிச நடவடிக்கைகள் மூலமாக அறிய முடியும்.
ஆக இந்த பாசிச நடவடிக்கைகளுக்கு எதிராக மாற்று திட்டத்தை முன்வைத்து மக்களை அணி திரட்ட வேண்டியது ஜனநாயக மற்றும் புரட்சிகர சக்திகளின் முதன்மையான கடமையாக இருக்க வேண்டும் என்று மக்கள் அதிகாரக் கழகம் கேட்டுக்கொள்கிறது.
தோழமையுடன்
தோழர் சி. வெற்றிவேல் செழியன்,
மாநிலப் பொதுச் செயலாளர்,
மக்கள் அதிகாரக் கழகம்,
தமிழ்நாடு – புதுவை.
9962366321
சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube, Telegram, Instagram
