தில்லி முதல் குமரி வரை ஜி.எஸ்.டி வரியை எதிர்த்து தீவிரமாகும் போராட்டங்கள் !

கடந்த 2016 -ஆம் ஆண்டு நடந்த மோடியின் பணமதிப்பு நீக்க நடவடிக்கையின் தாக்கத்திலிருந்து பொதுமக்களும் வணிகர்களும் இன்னும் மீளவில்லை. இந்நிலையில் கடந்த ஜூலை 1, 2017  முதல் இந்தியா முழுமைக்கும் சரக்கு மற்றும் சேவை வரியை (ஜி.எஸ்.டி) தடாலடியாக அமல்படுத்தியுள்ளது மோடி அரசு.

ஜி.எஸ்.டி. வரிவிதிப்பை அமல்படுத்தப் போவதாகக் கூறி அதற்கான வரிவிகிதங்களையும், கட்டுப்பாடுகளையும் மத்திய அரசு அறிவித்த நாளிலிருந்து சிறு வணிகர்கள், வியாபாரிகள், நெசவு மற்றும் ஜவுளித்துறையைச் சேர்ந்தவர்கள் என பல்வேறு தரப்பினரும் ஜி.எஸ்.டி.க்கு எதிராக கடுமையாகப் போராடி வருகின்றனர்.

அதோடு ஏற்கனவே வரிவிலக்கு அளிக்கப்பட்ட சுமார் 500 பொருட்களுக்கும் இந்த ஜி.எஸ்.டி. முறையில் சுமார் 5% முதல் 18% வரை வரி விதித்துள்ளது மோடி அரசு. இதன் காரணமாக வரும் நாட்களில் கடுமையான விலைவாசி உயர்வு ஏற்படும். அதோடு ஜி.எஸ்.டி வரி விதிப்பு முறையின் கெடுபிடிகளாலும், சட்ட திட்டங்களாலும், சிறு நிறுவனங்கள் நடத்துபவர்களுக்கும், சிறு வியாபாரிகளும், குடிசைத் தொழில் செய்பவர்களும் வியாபர முடக்கம் ஏற்பட்டு கடுமையாகப் பாதிக்கப்படுவார்கள்.

இதன் காரணமாகவே, இந்தியா முழுவதும் ஜி.எஸ்.டி வரி முறைக்கு எதிரான போராட்டங்கள் கடந்த இரு வாரங்களாகவே தீவிரமடைந்து வருகின்றன. கடந்த 20.06.2017 அன்று, புதுடில்லியைச் சேர்ந்த சுமார் 75 சந்தைகளில் கடை வைத்திருக்கும் சிறுவணிகர்கள், முழு கடையடைப்பில் ஈடுபட்டனர். தலைநகரைச் சேர்ந்த மொத்த விற்பனையாளர்கள் மற்றும் முகவர்கள் அதற்கு 3 நாட்கள் முன்னதாகவே தொடர் போராட்டத்தில் ஈடுபட்டனர். டில்லியின் முக்கிய வியாபாரக் கூடங்களான சாந்தினி சவுக், சடார் பஜார், கரோல் பாக், சவ்ரி பஜார், கிர்த்தி பஜார், சரோஜினி நகர், லாஜ்பட் நகர், காந்தி நகர் மற்றும் கமலாநகர் ஆகிய பகுதிகளும் அன்றைய தினம் கடையடைப்புப் போராட்டத்தில் ஈடுபட்டன.

புதுடில்லியில் ஆட்டோமொபைல் உதிரிப்பாகங்கள் விற்பனை செய்யும் தொழிலில் ஈடுபட்டுள்ளவர்கள் ஜி.எஸ்.டி. குறித்துக் கூறுகையில், இந்த வரி விதிப்பு முறை மிகவும் குழப்பம் தருவதாகவும், நிறைய வரைமுறைகளுக்கு உட்பட்டதாக இருப்பதாகவும் குறிப்பிட்டுள்ளனர். மேலும் ஏற்கனவே தங்களுக்கு விதிக்கப்பட்டிருந்த 12.5% வரி, தற்போது ஜி.எஸ்.டி மூலமாக 28% வரியாக அதிகரிக்கப்பட்டிருப்பதையும் சுட்டிக் காட்டி, இது தங்களது தொழிலில் மிகப்பெரும் பாதிப்பை ஏற்படுத்தும் என்றும் கூறியுள்ளனர். மேலும் ஜி.எஸ்.டி. வரிவிதிப்பு முறையில் அனைத்தையும் கணினி மயப்படுத்துவது அவசியமானதாக இருப்பதைக் குறிப்பிட்டு, இது சிறு – குறு வியாபாரிகளை ஒழித்துக்கட்டி விடும் என்றும் கூறியிருக்கின்றனர்.

அதே போல, சண்டிகர், உத்திரப்பிரதேச மாநிலங்களைச் சேர்ந்த வியாபாரிகள் சங்கத்தினரும் கடந்த வெள்ளிக்கிழமை (30.06.2017) முதல் போராட்டத்தில் ஈடுபட்டுள்ளனர். அதே நாளில் உ.பி. -யில் உள்ள காஸியாபாத் பகுதியில் நடத்தப்பட்ட கடையடைப்பில் பங்கேற்ற வியாபாரிகள் சங்கத்தினர், போராட்டம் குறித்துக் கூறுகையில், தற்போது விதிக்கப்பட்டிருக்கும் வரிமுறை முகவும் குழப்பமிக்கதாக இருப்பதாகவும், அதனை சுலபமானதாக்க வேண்டும் என்றும், அதிகபட்சமாக 15% தான் வரி விதிக்க வேண்டும் என்றும் கூறியுள்ளனர்.

மேலும் கிராமப்புறங்களில் இருக்கும் சிறு குறு வியாபாரிகளுக்கு இணையம் என்பது எட்டாக்கனியாக இருக்கும் போது, அவர்கள் மாதம் மூன்று முறை வரி கணக்கு இணையத்தில் செலுத்த வேண்டும் என்று கேட்பதும், வரிக்கணக்கு செலுத்துவதில் தவறு ஏதேனும் ஏற்பட்டால் சிறைத்தண்டனை என்று கூறுவதும் ஏற்றுக் கொள்ள முடியாதது என்று கூறியுள்ளனர். ஆக்ராவைச் சேர்ந்த சிறு வியாபாரிகளும், ஜவுளி வியாபாரிகளும் கடந்த சனிக்கிழமையன்று (ஜூலை 1, 2017) முழு கடையடைப்புப் போராட்டத்தில் ஈடுபட்டனர்.

தமிழகத்தைப் பொறுத்தவரையில், தென் தமிழகத்தில் பல இலட்சம் பேருக்கு வாழ்வாதாரமாக இருக்கும் தீப்பெட்டி மற்றும் பட்டாசுத் தொழிலுக்கு விதிக்கப்பட்டிருக்கும் கூடுதல் ஜி.எஸ்.டி வரி விதிப்பைக் கண்டித்து வியாபாரிகள் மற்றும் உற்பத்தியாளர்கள் தொடர் கடையடைப்புப் போராட்டத்தில் ஈடுபட்டுள்ளனர். கடந்த ஒரு வாரமாக எந்தத் தொழிற்சாலையும் உற்பத்தியில் ஈடுபடவில்லை. இதன் காரணமாக, சுமார் 8 இலட்சம் தொழிலாளர்கள் தங்கள் வருமானத்தை இழந்து அவதிக்கு உள்ளாகி இருக்கின்றனர்.

இலட்சக்கணக்கான மக்களின் வாழ்வாதாரமாக விளங்கும் ஜவுளித் தொழிலில் ஈடுபட்டுள்ள சிறு தறி உரிமையாளர்களுக்கும், கூலிக்காக, குடிசைத்தொழிலாக தறி ஓட்டுபவர்களுக்கும் இது மிகப்பெரிய பாதிப்பை ஏற்படுத்தியிருக்கிறது. பல பெரு நிறுவனங்கள், ஜி.எஸ்.டி. வரிவிதிப்புப் பிரச்சினை காரணமாக இவர்களுக்கு நூற்பதற்கு நூல் தராமல் நிறுத்தி வைத்துள்ளன. பல்வேறு நிறுவனங்கள் இத்தகைய வரி விதிப்பின் காரணமாக விலை கட்டுப்படியாகாமல் மூடப்பட்டுள்ளன.

இதற்கு எதிராக ஜவுளி உற்பத்தி மற்றும் வியாபாரிகள் சங்கத்தினர் கடந்த ஒருவாரகாலமாக வேலை நிறுத்தப் போராட்டத்தில் ஈடுபட்டனர். ஜவுளி வியாபாரிகள் சங்கம், தங்களுக்கு விதிக்கப்பட்டுள்ள 5% வரிவிதிப்பை இரத்து செய்யக் கோரி ஜூலை 5 வரை மத்திய அரசுக்கு கெடு விதித்துள்ளனர். வரியை இரத்து செய்யவில்லை எனில் காலவரையற்ற வேலைநிறுத்தப் போராட்டத்தில் ஈடுபடப் போவதாகவும் தெரிவித்துள்ளனர்.

கடந்த ஞாயிறன்று (02.07.2017) தமிழகம் முழுவதும் ஜி.எஸ்.டியில் காப்பீட்டுக்கு வரி 18%மாக உயர்த்தப்பட்டுள்ளதைக் கண்டித்து அனைத்து மாவட்டங்களின் எல்.ஐ.சி. முகவர்கள் சங்கங்களின் சார்பில் ஆர்ப்பாட்டம் நடத்தப்பட்டது. ஜி.எஸ்.டி. 28% -த்தோடு மாநில அரசின் கேளிக்கை வரி 30% -மும் சேர்ந்து மொத்தம் 58% வரி சினிமாத் தொழிலை முடக்கி விடும் என்று கூறி தமிழ்நாடு தியேட்டர் உரிமையாளர்கள் சங்கம் திங்கள்கிழமை (03.07.2017) முதல் காலவரையற்ற வேலைநிறுத்தத்தைத் துவங்கியுள்ளது.

இத்தனைப் போராட்டங்கள் இந்தியா முழுவதும் நடந்து கொண்டிருக்க, ஜி.எஸ்.டியால், விலை குறையும், ஜிஎஸ்.டியால் வேலை வாய்ப்பு பெருகும் என, ஒரே ரெக்கார்டையே திரும்பத் திரும்ப பாடிக் கொண்டிருக்கிறது மோடி கும்பல்.

பணமதிப்பு நீக்கம் எப்படி மக்களின் வாழ்வாதாரங்களை, சிறு குறு வியாபாரிகளை அழித்ததோ, அதற்குச் சற்றும் குறைவில்லாமல், ஜிஎஸ்டியில் மத்திய அரசு கைக்கொண்டிருக்கும் எதேச்சதிகாரப் போக்கும், சிறு தொழில் விரோதப் போக்கும், சாதாரண மக்களுக்கு விலைவாசி உயர்வையும், குடிசைத் தொழில், சிறு வணிகம் மற்றும் அதனைச் சார்ந்த தொழிலாளர்களுக்கு வாழ்வாதார இழப்பையும், கடும் பாதிப்பையும் ஏற்படுத்தியிருக்கிறது.

செய்தி ஆதாரம் :

• Textile traders protest against GST in Surat
• Erode textile merchants seek exemption from GST, threaten stir
• GST impact: Cinema halls across Tamil Nadu close to protest double taxation