Wednesday, September 23, 2020
முகப்பு செய்தி ஒரு வரிச் செய்திகள் - 24/12/2012

ஒரு வரிச் செய்திகள் – 24/12/2012

-

செய்தி: குஜராத் தேர்தலில் அமோக வெற்றி பெற்றுள்ள நரேந்திர மோடிக்கு முதல்வர் ஜெயலலிதா தொலைபேசி மூலமாக வாழ்த்துத் தெரிவித்தார்.

நீதி: பாம்பின் வழித்தடம் பாம்பறியும். ஒரு பாசிஸ்ட்டின் வெற்றி இன்னொரு பாசிஸ்ட்டால்தான் கொண்டாடப்பட முடியும்.

______

செய்தி: இளைஞர்கள், அரசு ஊழியர்கள், மாணவர்கள் என அனைத்துத் தரப்பினருக்கும் முதலுதவி சிகிச்சையில் பயிற்சி அளிக்க வேண்டும் என்று ஆளுநர் கே.ரோசய்யா வலியுறுத்தினார்.

நீதி: தடுக்கி விழுந்தால் விபத்து நடக்குமிடமாக தமிழகம் மாறிவிட்டதை மறைமுகமாக விளக்குகிறாரோ ராஜ்பவனில் குடியிருக்கும் இந்த ஆந்திரத்து பண்ணையார்.

______

செய்தி: மத்திய-மாநில அரசு அலுவலகங்கள், நட்சத்திர விடுதிகள், மருத்துவமனைகள், பல்கலைக் கழகங்கள் என மக்கள் அதிகம் கூடும் இடங்களில் கண்காணிப்பு கேமராக்கள் அவசியம் என தமிழக அரசு உத்திரவிட்டுள்ளது.

நீதி: அமைச்சர்கள், அதிகாரிகள் அறையிலும் கேமராக்கள் அவசியம் என்று போட்டால் லஞ்சமாவது குறையுமே! அப்படியே போயஸ் தோட்டத்தில் வைத்தால் என்னென்ன சதி நடக்கிறது என்பதை நாடறியுமே!

______

செய்தி: அருந்ததியர்களுக்கு வழங்கப்பட்டுள்ள உள் ஒதுக்கீட்டை ரத்து செய்ய வலியுறுத்தி பிப்ரவரி 6-ம் தேதி போராட்டம் நடத்தப் போவதாக புதிய தமிழகம் கட்சியின் தலைவர் கிருஷ்ணசாமி அறிவித்துள்ளார்.

நீதி: அருந்ததி மக்களை விட பள்ளர்கள் -தேவேந்திர குல வேளாளர்கள் மேல் என்று ஆதிக்கம் செய்வதை ரத்து செய்யாத வரை உள் ஒதுக்கீட்டை எப்படி ரத்து செய்ய முடியும்?

______

செய்தி: 21.12.2012 அன்று காங்கிரஸ் தலைவர் ஈ.வி.கே.எஸ் இளங்கோவனது பிறந்தநாள்!

நீதி: அதனால்தான் மாயன் காலண்டர்படி அன்று உலகம் அழியும் என்று கூறினார்களோ!

______

செய்தி: குஜராத்தில் மீண்டும் வெற்றி பெற்றுள்ள நரேந்திர மோடியின் பதவியேற்பு விழாவில் பங்கேற்பதற்காக முதல்வர் ஜெயலலிதா டிசம்பர் 26-ம் தேதி குஜராத் செல்ல உள்ளதாக தமிழக அரசு அறிவித்துள்ளது.

நீதி: கரசேவைக்கு ஆளனுப்பியவர் கலவர நாயகன் பதவியேற்புக்கு செல்ல மாட்டாரா என்ன! ஆனாலும் ஜெயாவுக்கு பல்லக்கு தூக்கிய இசுலாமிய மத அமைப்புக்கள் தங்கள் முகங்களை எங்கு வைத்துக் கொள்ளும்?

______

செய்தி: ரயில் பயணக் கட்டணத்தை ஒரு கி.மீ.க்கு 5 முதல் 10 பைசா வரை உயர்த்த அரசு தீவிரமாக பரிசீலித்து வருகிறது.

நீதி: 50 ரூபாய், 100 ரூபாய் உயர்வு என்று சொன்னால்தானே அதிர்ச்சி வரும், அதையே கிலே மீட்டருக்கு பத்து காசு என்று சொன்னால்…. ஆடித்தள்ளுபடி ஆஃபர் தோற்றது போங்கள்!

______

செய்தி: இமாசலப் பிரதேச சட்டப் பேரவைக்குத் தேர்ந்தெடுக்கப்பட்டுள்ள உறுப்பினர்களில் 44 பேர் கோடீஸ்வரர்கள். இதில் 26 பேர் காங்கிரஸ் உறுப்பினர்கள்.

நீதி: இனி இமாசலப் பிரதேசத்தையும் முதலாளிகள் ஆள்கிறார்கள் என அழைக்கலாம். பண நாயகம்தான் ஜனநாயகம்!

______

செய்தி: மக்களவைத் தேர்தலில் தேமுதிக தன் பலத்தை நிரூபித்துக் காட்டும் என்று அக்கட்சியின் தலைவர் விஜயகாந்த் கூறினார்.

நீதி: சட்டசபைத் தேர்தலில் அதிமுக உதவியுடன் பலத்தை நிரூபித்தது போல மக்களவை தேர்தலில் திமுக உதவியுடன் நிரூபிப்பார்களோ? பல்லக்கின் சைடில் தொற்றிக் கொள்பவர்களெல்லாம் பலசாலிகளா?

______

செய்தி: விவசாயிகள், தொழிலாளர்கள் மற்றும் வியாபாரிகள் ஆகியோருக்கு எதிராக செயல்படும் காங்கிரஸ், பாஜகவுடன் மார்க்சிஸ்ட் கம்யூனிஸ்ட் கட்சி கூட்டணி வைத்துக் கொள்ளாது என அக்கட்சியின் மத்திய குழு உறுப்பினர் டி.ஏக.ரங்கராஜன் எம்.பி தெரிவித்தார்.

நீதி: இதையெல்லாம் சொல்லித்தான் உறுதி படுத்த வேண்டுமென்றால் எதிர்காலத்தில் ஏதும் கூட்டணி வைப்பார்களோ?

_____

செய்தி: விவசாயிகள் யாரும் தற்கொலை செய்துகொள்ள வேண்டாம் என்று திமுக தலைவர் கருணாநிதி வேண்டுகோள் விடுத்துள்ளார்.

நீதி: தற்கொலைக்கு காரணமான அரசை கண்டித்து போராட்டம் நடத்தி தீர்வு காணமுடியாத நிலையில்தான் இந்தக் கோரிக்கை. எனில் திமுகவும் அரசியல்ரீதியாக என்றோ தற்கொலை செய்து கொண்டதாக தெரிகிறது.

சந்தா செலுத்துங்கள்

இணையத்தில் உழைக்கும் மக்களின் குரலாக பதினோரு ஆண்டுகளாக போராடும் வினவுடன் கை கோருங்கள். ஆதரியுங்கள்

  1. ஒரு வரிச்செய்திகளை 24/12/2010 க்கு பிறகு வெளியிடவில்லையெ…நாங்கள் ஆவலுடன் காத்திருக்கின்றோம்.

  2. கருனாநிதி முன்னுக்கு பின் முரனாக பேசுவார் -ராமதாசு 5-1-2013 தினமனி
    யொகிய சிகாமனி வர்ராரார்ர்ர்ர்ர்ர்ர்ர்ர்ர்ர்ர் எல்லா பயகலும் காத பொத்து….,

விவாதியுங்கள்

உங்கள் மறுமொழியை பதிவு செய்க
உங்கள் பெயரைப் பதிவு செய்க