மே தினத்தில் சூளுரைப்போம்!
தொழிலாளி வர்க்கம் ரத்தம் சிந்தி, உயிரைத் துறந்து நிலைநாட்டிய 8 மணி நேர வேலை உரிமை பறிக்கப்பட்டு வருகிறது. இந்திய தொழிலாளி வர்க்கம் போராடிப் பெற்ற 44 தொழிலாளர் சட்டங்களும் 4 தொகுப்பு விதிகள் என சுருக்கப்பட்டு காலாவதியாகி வருகின்றன.
பணி நிரந்தரம், வேலைக்கேற்ற ஊதியம், சம வேலைக்கு சமஊதியம் உள்ளிட்ட அனைத்து அடிப்படை உரிமைகள் பறிக்கப்பட்டு தொழிலாளர் வர்க்கமே நாடோடியாக்கப்பட்டு வருகிறது.
விலைவாசி உயர்வு வரலாறு காணாத வகையில் உயர்ந்து விட்டது, விலைவாசிக்கு இணையாக ஊதியம் மட்டும் உயரவில்லை. ஆனால் கல்வி, மருத்துவம், இருப்பிடம் குடிநீர் ஆகிய அனைத்து சேவைகளும் விலை பொருளாகிவிட்டது. தொழிலாளி வர்க்கம் மொத்த உரிமைகளையும், வாழ்வுரிமையையும் பறிகொடுத்து விட்டு நவீன கொத்தடிமைகளாக்கப்பட்டு வருகிறது.
வாழ்வாதாரம் இழந்த உழைக்கும் மக்கள் காண்டிராக்ட்- நீம் என்கிற அத்துக்கூலியாகவும், கட்டிடத் தொழிலாளி, தூய்மைப் பணியாளர், ஜிக் தொழிலாளர்கள், என பல்வேறு வகைப்பட்ட அமைப்பு சாரா தொழிலாளர்களாக எந்த உரிமைகளும் இல்லாமல் இருக்கிறார்கள்.
நாட்டின் முதுகெலும்பாக இருக்கும் விவசாயிகள் போண்டியாகி விவசாயத்தை விட்டு தலைதெறிக்க ஓடுகிறார்கள். விவசாயிகள் தற்கொலை என்பது சாதாரண ‘செய்தி’ யாகி விட்டது. சிறு தொழிலும், சிறுவணிகமும் நூலிழையில் பிழைப்பை நடத்திக் கொண்டிருக்கின்றன.
மறுபுறத்தில் கார்ப்பரேட்டுகள் தொழிற்சாலை கட்ட நிலமும், கடனும் வழங்கப்படுகிறது. இயற்கை வளத்தையும், மனிதவளத்தையும் இரக்கமின்றி சுரண்ட அனைத்து கதவுகளும் அகலமாகத் திறக்கப்பட்டுள்ளது.
படிக்க: வேலையில்லாத் திண்டாட்டம் – யார் காரணம்: வட மாநிலத் தொழிலாளியா? முதலாளித்துவ இலாபவெறியா?
நாட்டின் செல்வத்தை உருவாக்குகின்ற உழைக்கும் மக்கள் தனது உழைப்பின் பலனை நுகர்வது சொற்பமாகிவிட்டது.
கார்ப்பரேட் முதலாளிகள் நாட்டின் செல்வத்தை உறிஞ்சிக் கொள்வது தொடர்ந்து அதிகரித்து வருவதால் செல்வத்தை படைக்கும் உழைக்கும் மக்களுக்கும் அதனை சுரண்டி கொழுக்கும் கார்ப்பரேட்டுகளுக்கும் இடையிலான சமத்துவமின்மை அதிகரித்து வருகிறது.
75 ஆண்டு கால ‘ஜனநாயக’ ஆட்சியில் சட்ட உரிமைகள் பறிப்பு, இயற்கை வளக் கொள்ளை ஆகிய அட்டூழியங்களுக்கு ராஜபாட்டை போட்டுள்ள தனியார்மய- தாராளமய – உலகமயக் கொள்கை என்பது கார்ப்பரேட் கொள்ளையர்களுக்கானது என்பது இன்றைய நிதர்சனம். குறிப்பாக, கடந்த 10 ஆண்டுகளாக நடந்து வரும் ஆர்.எஸ்.எஸ். – பா. ஜ. க ஆட்சி அப்பட்டமான முறையில் கார்ப்பரேட்டுகளின் அடியாளாக செயல்பட்டு வருகிறது. இந்த அயோக்கியத்தனத்தை மூடிமறைத்து திசை திருப்புவதில் பார்ப்பன ( இந்து ) மதவெறியும், சாதிவெறியும் காவி – கார்ப்பரேட் பாசிஸ்டுகளின் முக்கிய ஆயுதமாக இருக்கின்றன.
நம்மை தலையெடுக்க விடாமல் நவீன கொத்தடிமைகளாக வைத்திருக்கும் இந்த அவலத்தை ஒழித்துக்கட்ட உழைக்கும் வர்க்கமாக ஒன்றிணைந்து வீதியில் இறங்கி போராடுவதை தவிர வேறு வழி இல்லை.
போர்வெறியும், பாசிச அடக்குமுறையும் ஏகாதிபத்திய முதலாளிகளின் சர்வதேச கொள்ளைக்கு வழிவகுக்கிறது. இந்த கேடுகெட்ட முதலாளித்துவத்தை வீழ்த்தும் வர்க்கப்போராட்டத்துக்கு தலைமையளிப்பது தொழிலாளி வர்க்கத்தின் சர்வதேச கடமையாகும். முதலாளித்துவத்துக்கு மாற்று சோசலிசம் தான் என்பதை இந்த 138 – வது மே தினம் நினைவூட்டுகிறது.
சோசலிசமே தீர்வு என்கிற உணர்வோடு இந்திய நாட்டில் புதிய ஜனநாயகப் புரட்சியை முன்னெடுக்க தொழிலாளி வர்க்கத்தை அறைகூவி அழைக்கிறோம்.
முதலாளித்துவம் கொல்லும்!
கம்யூனிசமே வெல்லும்!
இவண்,
புதிய ஜனநாயகத் தொழிலாளர் முன்னணி
(மாநில ஒருங்கிணைப்புக் குழு)
சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube
