காசா மீதான இஸ்ரேலின் இன அழிப்பு போரை நிறுத்துவதற்கான பேச்சுவார்த்தை ஹமாஸ் மற்றும் இஸ்ரேலுக்கிடையில் நடந்து வருகிறது. போர்நிறுத்த பேச்சுவார்த்தைக்கான மத்தியஸ்தத்தில் ஈடுபட்டுவரும் அமெரிக்காவின் சிறப்பு தூதுர் ஸ்டீவ் விட்காஃப் தலைமையிலான குழு தற்காலிக போர்நிறுத்தத்திற்கான வரைவறிக்கையை முன்வைத்துள்ளது.
60 நாட்கள் போர்நிறுத்தம் செய்வதற்கான இந்த ஒப்பந்தத்தில் பணயக் கைதிகளை விடுவிப்பது, காசாவிற்குள் மனிதாபிமான தேவைகளை அனுமதிப்பது, இஸ்ரேலின் இராணுவ நடவடிக்கைகளைத் தற்காலிகமாக நிறுத்தி வைப்பது உள்ளிட்ட அம்சங்கள் இடம்பெற்றுள்ளதாக தகவல்கள் வெளியாகியுள்ளன.
ஆனால், காசா மீது இன அழிப்பு போரை நடத்திவரும் அமெரிக்கா-இஸ்ரேல் போர்வெறி ஓநாய்களே அறிக்கையைத் தயாரித்திருப்பதால், முன்வைக்கப்பட்டிருக்கும் போர்நிறுத்த ஒப்பந்தமானது ஒருதலைபட்சமானதாகவும் தெளிவு-உத்தரவாதமற்றதாகவும் உள்ளது என விமர்சனங்கள் எழுந்துள்ளன. இத்தகைய தெளிவற்றத் தன்மையைப் பயன்படுத்திக்கொண்டுதான் இந்தாண்டு ஜனவரியில் காசா-இஸ்ரேல் இடையே கையெழுத்தான போர்நிறுத்த ஒப்பந்தத்தை இஸ்ரேல் தன்னிச்சையாக மீறியது.
மறுபுறம், காசாவிற்குள் மனிதாபிமான உதவிகளை அனுமதிப்பது, காசாவை மீண்டும் கட்டியெழுப்புவது, நிரந்தர போர்நிறுத்தத்தை ஏற்பது ஆகியவற்றுக்கு உத்தரவாதமளித்தால் அமெரிக்கா முன்வைத்துள்ள போர்நிறுத்த ஒப்பந்தத்தை ஏற்பதற்கு ஹமாஸ் அமைப்பு தயாராக உள்ளதாக செய்திகள் தெரிவிக்கின்றன. ஆனால், காசா மக்களையும் ஹமாஸையும் எப்போது வேண்டுமானாலும் ஒடுக்குவதற்கு சாதகமாகவே ஒப்பந்தமிடத் துடித்துக்கொண்டிருக்கும் இஸ்ரேல்-அமெரிக்கா கும்பல் இதற்கு எதிர்ப்பு தெரிவித்துள்ளது. மேலும், காசா மக்களின் நெருக்கடியைப் பயன்படுத்திக்கொண்டு ஹாமாஸை தங்களது நோக்கத்திற்குப் பணியவைக்க முயல்கிறது. இதன் காரணமாகப் போர்நிறுத்த ஒப்பந்த பேச்சுவார்த்தை இழுபறியான நிலையை எட்டியுள்ளது.
முன்னதாக, இந்தாண்டு ஜனவரி மாதத்தில் காசா-இஸ்ரேல் இடையில் மூன்று கட்ட போர்நிறுத்த ஒப்பந்தம் கையெழுத்தானபோது “காசா மீதான போர் நிறுத்தம்: காசா மீண்டது, பாலஸ்தீனமும் மீளும்” என்ற தலைப்பில் பிப்ரவரி மாத புதிய ஜனநாயகம் இதழில் கட்டுரை வெளியானது. இக்கட்டுரையில், உலகம் முழுக்க நடந்த மக்கள் போராட்டங்களாலும் காசா மக்கள் மற்றும் ஹமாஸின் உறுதியாலும் ஏற்பட்ட கடுமையான நெருக்கடி காரணமாகவே இஸ்ரேல் போர்நிறுத்தத்திற்கு பணிந்துவந்தது என்பது தெளிவுற எழுதப்பட்டிருந்தது. மேலும், காசா மீதான போர் என்ற இந்த இடைக்கட்டத்தில், பல இழப்புகளைச் சந்தித்திருந்தாலும் ஹமாஸூம் பாலஸ்தீன மக்களும் வெற்றி பெற்றுள்ளனர் என்றும் காசாவில் மறுகட்டமைப்பு பணிகள் தொடங்கும் என்றும் எழுதப்பட்டிருந்தது.
அதற்கேற்ப போர்நிறுத்தம் அமலான பிறகு காசாவை விட்டு வெளியேறிய மக்கள் காசாவிற்கு திரும்பியதுடன், காசாவை மீண்டும் கட்டியெழுப்புவதற்கான நடவடிக்கைகளும் தொடங்கின.
ஆனால், போர்நிறுத்தத்தின் முதற்கட்டம் அமலிலிருக்கும் போதே அமெரிக்க அதிபர் டொனால்ட் ட்ரம்ப் காசாவிலிருந்து பாலஸ்தீன மக்களை வெளியேற்றிவிட்டு அதனை கார்ப்பரேட்-கேளிக்கை நகரமாக மாற்றும் திட்டத்தை முன்வைத்தார். இனவெறி இஸ்ரேல் இத்திட்டத்திற்கு முழு ஆதரவு கொடுத்தது.
காசாவை ஏகாதிபத்தியங்களின் கெடுநோக்கத்திற்கேற்ப மறுகட்டமைப்பு செய்யும் இந்த சதித்திட்டம் குறித்து போர்நிறுத்த பேச்சுவார்த்தையின் போது வாய்திறக்காமல், தங்களுடைய நெருக்கடியைத் தற்காலிகமாக தீர்த்துகொள்வதற்காக இஸ்ரேலும் அமெரிக்காவும் போர்நிறுத்த ஒப்பந்தத்தை மேற்கொண்டுள்ளன என்பது தற்போது அம்பலமாகியுள்ளது.
ஏகாதிபத்தியங்களின் இந்த சதித்திட்டத்திற்கு ஹமாஸும் காசா மக்களும் அடிபணியாததால் இஸ்ரேலும் அமெரிக்காவும் ஒப்பந்தத்தை மீறி காசா மீதான போரை மீண்டும் தொடங்கின. மேலும், ட்ரம்பின் திட்டத்திற்கு பணியவைப்பதற்காகவே காசா மீதான போரை இஸ்ரேல் தீவிரப்படுத்தி வருகிறது.
“காசாவிலிருந்து பாலஸ்தீன மக்களை வெளியேற்றுவதே இஸ்ரேலின் போர் முயற்சியின் அதிகாரப்பூர்வ நோக்கம்” என்று பாசிஸ்ட் நெதன்யாகு கடந்த மாதத்தில் முதன்முறையாக பகிரங்கமாக அறிவித்தது, ட்ரம்ப்-நெதன்யாகு பாசிச கூட்டின் நோக்கத்தை வெட்டவெளிச்சமாக்குகிறது. இஸ்ரேல் ஆக்கிரமிப்பு படைகளும் காசாவை கொஞ்சம் கொஞ்சமாக ஆக்கிரமித்து வருகின்றன.
இத்தகைய சூழலில் உலகம் முழுவதும் பாலஸ்தீன மக்களுக்கு ஆதரவாக நடைபெறும் போராட்டங்கள்தான் காசாவை மேலாதிக்கம் செய்யத் துடிக்கும் ஏகாதிபத்திய ஓநாய்களின் சதியை முறியடித்து காசாவில் விரைவில் போர்நிறுத்தம் அமலாவதற்கு துணைநிற்கும். எனவே “காசா மீதான போரை நிரந்தமாக நிறுத்து”, “காசா பாலஸ்தீன மக்களுக்கே” என உலகம் முழுவதிலுமிருந்து முழங்க வேண்டியுள்ளது.
பானு
(புதிய ஜனநாயகம் – ஜூன் 2025 இதழ்)
சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube, Telegram, Instagram
