பாசிச டிரம்பின் தாக்குதலில் இந்தியப் பொருளாதாரம்!

உலக நாடுகளின் சந்தைகளை கைப்பற்றுவதற்காக பிற நாடுகளின் மீது அடாவடியாக வரி விதித்துவரும் அமெரிக்க அதிபர் பாசிஸ்ட் டிரம்ப், இந்திய ஏற்றுமதிப் பொருட்களுக்கு 50 சதவிகித வரி விதித்து இந்தியப் பொருளாதாரத்தின் மீது தாக்குதல் தொடுத்துள்ளார்.

இந்தியப் பொருட்களுக்கு டிரம்ப் விதித்த 25 சதவிகித பரஸ்பர வரி ஆகஸ்ட் ஏழு அன்று அமலான நிலையில், ரஷ்யாவிடமிருந்து கச்சா எண்ணெய், ஆயுதம் வாங்குவதை காரணம் காட்டி அபராதமாக விதித்த கூடுதல் 25 சதவிகித வரி ஆகஸ்ட் 27-ஆம் தேதி முதல் அமலானது.

இதனால், இறால், கடல் உணவு, ஜவுளி, ஆயத்த ஆடை, பின்னலாடை, ரத்தினக் கற்கள், நகைகள் ஆகியவற்றின் ஏற்றுமதி வரி 50 சதவிகிதத்திற்கும் அதிகமாக உயர்ந்து அதன் ஏற்றுமதி தடைப்பட்டுள்ளது. அமெரிக்காவிற்கு ஏற்றுமதி செய்யப்பட்ட இறால்கள் ஆகஸ்ட் மாத இறுதியில் பாதி வழியில் இந்தியாவிற்கு திருப்பி அனுப்பப்பட்டன.

இதனால் மேற்கண்ட துறைகளில் அமெரிக்காவை சார்ந்துள்ள தொழிற்சாலைகள் மூடப்படுவதும் அமெரிக்க வணிகர்கள் உடனான ஒப்பந்தங்கள் இரத்தாவதும் தொடர்கதையாகியுள்ளது. இது தொழிலாளர்கள் அதிகமுள்ள தொழில்களிலேயே அரங்கேறுவதால் இந்தியா முழுவதும் பல்லாயிரக்கணக்கானோரின் வேலையும் வாழ்வாதாரமும் பறிக்கப்பட்டு வருகிறது.

தமிழ்நாட்டில் திருப்பூரில், ஆம்பூரில் உள்ள 300-க்கும் மேற்பட்ட தோல் தொழிற்சாலைகளில் குறைந்தது 50 தொழிற்சாலைகள் மூடப்பட்டதால் அங்கு வேலை பார்த்த தொழிலாளர்களின் எதிர்காலம் கேள்விக்குறியாகியுள்ளது.

மேலும், அமெரிக்க வரி அமலான ஆகஸ்ட் மாதத்தில் மட்டுமின்றி அதற்கு முந்தைய மாதங்களிலிருந்தே அமெரிக்காவிற்கான இந்திய ஏற்றுமதி பெரும் சரிவை சந்தித்து வருகிறது. ஜூன் மாதத்தில் 5.7 சதவிகிதமும், ஜூலையில் 3.6 சதவிகிதமும், ஆகஸ்டில் 16.3 சதவிகிதமும் அமெரிக்க ஏற்றுமதி குறைந்துள்ளது. இதனால், மே மாதத்தில் 8.8 பில்லியன் டாலராக இருந்த அமெரிக்க ஏற்றுமதி மதிப்பு ஆகஸ்டில் 6.9 பில்லியன் டாலராக வீழ்ச்சியடைந்துள்ளது.

மறுபுறத்தில், யாரும் எதிர்பாராத வகையில் அமெரிக்காவில் வரி விலக்கு அளிக்கப்பட்ட பொருட்களின் ஏற்றுமதியும் மே மாதத்தை (3.37 பில்லியன் டாலர்) ஒப்பிடுகையில் ஆகஸ்டில் (1.96 பில்லியன் டாலர்)  41.9 சதவிகிதம் குறைந்திருக்கிறது. குறிப்பாக, ஸ்மார்ட்போன்களின் (Smartphone) ஏற்றுமதி மே மாதத்துடன் (2.29 பில்லியன் டாலர்) ஒப்பிடுகையில் ஆகஸ்டில் (964.8 மில்லியன் டாலர்) 58 சதவிகிதம் சரிந்துள்ளது. மருந்துகளின் ஏற்றுமதியும் மே மாதத்துடன் (745 மில்லியன் டாலர்) ஒப்பிடுகையில் ஆகஸ்டில் (646.6 மில்லியன் டாலர்) 13.3 சதவிகிதம் குறைந்துள்ளது.

இந்நிலையில், அமெரிக்காவிற்கான இந்திய ஏற்றுமதி மேலும் சரிவை சந்திக்கும் என்றும் 2026 நிதியாண்டின் இறுதிவரை 50 சதவிகித வரி தொடர்ந்தால் அமெரிக்க ஏற்றுமதியில் 30-35 பில்லியன் அமெரிக்க டாலர்கள் இழப்பு ஏற்படும் என்றும் “உலகளாவிய வர்த்தக ஆராய்ச்சி முன்முயற்சி”-இன் (GTRI) அறிக்கை எச்சரித்துள்ளது.

மேலும், இவ்வரி விதிப்பு 2025-26 நிதியாண்டில் இந்தியாவின் மொத்த உள்நாட்டு உற்பத்தி வளர்ச்சியை 0.5 முதல் 0.6 சதவிகிதம் வரை குறைக்கக்கூடும் என்றும் எதிர்பார்க்கப்படுகிறது. இவ்வரி விதிப்பால் இந்தியாவின் ரூபாய் மதிப்பு தொடர்ந்து வீழ்ச்சியடைந்து ஒரு அமெரிக்க டாலர் மதிப்பு 88.75 ரூபாயாக சரிந்துள்ளதும் குறிப்பிடத்தக்கது. தொடர்ந்து பலவீனமாக இருந்துவரும் இந்திய ரூபாய் மதிப்பு இந்தாண்டில் மட்டும் 3.5 சதவிகிதம் வரை சரிந்துள்ளது.

ஆனால், மோடி தலைமையிலான பா.ஜ.க. அரசோ, டிரம்பின் வரி விதிப்பிற்கு எதிராக இதுவரை எந்த நடவடிக்கையும் எடுக்காமல் டிரம்பின் அடிமையைப் போல செயல்பட்டு வருகிறது. டிரம்ப் இரண்டாவது முறை அமெரிக்க அதிபரானது முதலே அமெரிக்காவில் புலம்பெயர்ந்துள்ள இந்தியர்களை சங்கிலியால் கட்டி நாடு கடத்தியதிலிருந்து இந்தியாவிற்குத் தண்டத் தொகை (அபராதம்) விதித்தது வரை இந்தியர்களையும் இந்தியாவின் ‘இறையாண்மை’யையும் இழிவுப்படுத்தி வருகிறார். இவை எதற்கும் உறுதியான எதிர்வினையாற்றாமல் மக்களை திசைதிருப்புவதிலேயே முனைப்புக் காட்டிவரும் மோடி அரசு, தற்போதும் அதே உத்தியையே கையாண்டு வருகிறது.

2020-இல் கொரோனா பெருந்தொற்றின் போது மக்கள் இலட்சக்கணக்கில் செத்து மடிந்துக் கொண்டிருந்தபோது, மக்களை காப்பதற்கான நடவடிக்கை எடுக்காமல் விளக்கேற்றச் சொல்வது, கைத்தட்டச் சொல்வது என மக்களை முட்டாளாக்கிய மோடி அரசு, அதன் உச்சமாக தன்னிறைவு இந்தியாவை (ஆத்ம நிர்பார் பாரத்) உருவாக்குவோம் என்ற பிரச்சாரத்தை முன்னெடுத்தது. அவ்வக்கிரம் பிடித்த “ஆத்ம நிர்பார் பாரத்” பிரச்சாரத்தை இந்தாண்டு ‘சுதந்திர’ தின விழா உரையில் மோடி மீண்டும் தொடங்கி வைத்து மக்களை முட்டாளாக்க தயாராகியுள்ளார். இதனையடுத்து, “மேக் இன் இந்தியா” உள்ளிட்ட தோற்றுபோன திட்டங்களை சங்கி கும்பல் மக்களிடத்தில் தீவிரமாக பிரச்சாரம் செய்து வருகிறது.

அதேபோல், இந்தியாவின் உள்நாட்டு உற்பத்தி பாதிப்பைச் சந்திக்கும் என்று எச்சரிக்கப்பட்டுள்ள நிலையில், உள்நாட்டு நுகர்வை ஊக்குவித்து சந்தையை நகர்த்தும் நோக்கில் ஜி.எஸ்.டி. வரியில் சில திருத்தங்களை செய்து ஜி.எஸ்.டி. 2.0 என்ற பெயரில் மோடி அரசு நடைமுறைப்படுத்தி உள்ளது. ஆனால், இது கார்ப்பரேட்டுகளுக்கும்  மேட்டுக்குடிகளுக்குமே பயனளிக்கும் என்பதை பல்வேறு புள்ளிவிவரங்கள் அம்பலப்படுத்தியுள்ளன, மக்களும் தங்களது சொந்த அனுபவத்திலிருந்து உணர்ந்துள்ளனர்.

மறுபுறம், டிரம்பின் வரிவிதிப்பிற்கு எதிர்வினையாக நடந்துமுடிந்த ஷாங்காய் உச்சிமாநாட்டில் சீனா-ரஷ்யா அதிபர்களுடன் மோடி கொஞ்சி குலாவியது டிரம்பை ஆத்திரமூட்டியது. இதற்கு டிரம்ப் கண்டனம் தெரிவித்த நிலையில், நிறுத்தி வைக்கப்பட்டிருந்த அமெரிக்கா-இந்தியா இடையேயான வர்த்தகப் பேச்சுவார்த்தையை தொடர்வதற்கான அறிவிப்பு வெளியானது. இதனையெல்லாம் ஊதிப்பெருக்கிய சங்கி கூட்டம் மோடி டிரம்பை அடிபணிய வைத்துவிட்டதாக பிரச்சாரம் செய்தது.

ஆனால், செப்டம்பர் 19 அன்று, அமெரிக்காவில் சிறப்பு பணித் திறன் பணிகளில் வேலை செய்யும் புலம்பெயர் மக்களுக்கான ஹெச்1பி விசா கட்டணத்தை ரூ.1.32 இலட்சத்திலிருந்து ரூ.88 இலட்சமாக உயர்த்தி டிரம்ப் அறிவித்தார். இந்த விசாவை 70 சதவிகிதத்திற்கும் அதிகமாக இந்திய மக்களே (பெரும்பாலும் பார்ப்பனர்கள் உள்ளிட்ட ஆதிக்கச் சாதியைச் சேர்ந்தவர்கள்) வாங்கி ஐ.டி. துறைகளில் பணிபுரிந்துவரும் நிலையில் இது மோடி அரசிற்கு மேலும் நெருக்கடியாக அமைந்தது.

மேலும், இக்கட்டண உயர்வு செப்டம்பர் 21 முதலே நடைமுறையாகும் என்று டிரம்ப் அறிவித்தார். இதனையடுத்து, அமெரிக்க ஐ.டி. நிறுவனங்களின் அழைப்பின் பேரில், நவராத்திரிக்காக இந்தியாவிற்கு வந்திருந்த இந்தியர்கள், குறிப்பாக வட இந்தியர்கள் உடனடியாக அமெரிக்காவிற்கு திரும்பினர். பாசிச மோடி அரசு ஜி.எஸ்.டி. 2.0-வை  செப்டம்பர் 22 நவராத்திரி அன்று ஆரவாரமாக நடைமுறைப்படுத்த ஆயத்தமாகியிருந்த நிலையில்,  அதற்கு முன்னர் வட இந்தியர்கள் இவ்வாறு அலைக்கழிக்கப்பட்டது மோடிக் கும்பலுக்கு நெருக்கடியை ஏற்படுத்தியது.

மேலும், அமெரிக்காவில் உள்ள 5.4 மில்லியன் இந்தியர்கள் ஆண்டுதோறும் 33 பில்லியன் அமெரிக்க டாலர்களை இந்தியாவிற்கு அனுப்பிவரும் நிலையில், இந்த விசா கட்டண உயர்வால் இவ்வரவு கணிசமாக குறையும் என்று தெரிவிக்கப்பட்டுள்ளது.

இந்நிலையில், கடந்த செப்டம்பர் 26 அன்று அமெரிக்காவில் இறக்குமதி செய்யப்படும் பிராண்டட் (Branded) மற்றும் காப்புரிமை பெறப்பட்ட மருந்துகளுக்கு டிரம்ப் 100 சதவிகித வரி விதித்தார். இந்தியாவிலிருந்து பெரும்பாலும் ஜெனிரிக் மருந்துகளே அமெரிக்காவிற்கு ஏற்றுமதி செய்யப்படுகிறது என்றாலும், இந்த வரிவிதிப்பு ஏற்றுமதியில் குறிப்பிடத்தக்க அளவு பாதிப்பை ஏற்படுத்தும் என்றே கூறப்படுகிறது. அதுமட்டுமின்றி, இதுநாள்வரை நாடுகளின் மீது வரி விதித்து வந்த டிரம்ப் தற்போது பொருட்களின் மீது வரி விதிக்கத் தொடங்கியிருப்பது, வர்த்தகத்தில் ஏற்கெனவே இருந்துவரும் நிச்சயமற்ற தன்மையை அதிகரித்து ஏற்றுமதி சரிவை அதிகரிக்கக்கூடும்.

அமெரிக்கா – இந்தியா இடையேயான வர்த்தகப் பேச்சுவார்த்தை மீண்டும் தொடங்கியுள்ள நிலையில், இந்தியாவின் விவசாயம், பால் உற்பத்தித்துறை போன்றவற்றில் அமெரிக்க கார்ப்பரேட்டுகளை நுழைப்பதற்கும் மரபணு மாற்றப்பட்ட பொருட்களை இந்தியாவில் திணிப்பதற்கும் டிரம்ப் அரசு மேற்கண்ட அடக்குமுறைகளை இந்தியா மீது தொடுத்து வருகிறது. ஆனால், பாசிச மோடி அரசு அப்பட்டமாக அமெரிக்க அடிமையாக செயல்பட்டு வருகிறது.

இவ்வாறு, இந்தியா முற்றிலுமாக அமெரிக்க  காலனியாக மாற்றப்படும் அபாயம் நாளுக்கு நாள் தீவிரமடைந்து வருகிறது.  எனவே, மோடி அரசு நடவடிக்கை எடுக்கும் என்று எதிர்பார்ப்பதற்கு எந்த முகாந்திரமும் இல்லை. மாறாக, அமெரிக்க வல்லரசிற்கும் அதற்கு அடிமை சேவகம் செய்துவரும் பாசிச மோடி அரசிற்கும் எதிராக இந்திய உழைக்கும் மக்கள் போராட்டங்களைக் கட்டியமைக்க வேண்டும். பாசிசத்தை வீழ்த்தி, இந்தியா ஏகாதிபத்தியங்களின் வேட்டைக்காடாக மாற்றப்படுவதை தடுக்கும் வகையில் பாசிச எதிர்ப்பு ஜனநாயகக் குடியரசு எனும் மாற்று கட்டமைப்பிற்கான போராட்டங்களை முன்னெடுக்க வேண்டும்.

துலிபா

(புதிய ஜனநாயகம் – அக்டோபர் 2025 இதழ்)

சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube, Telegram, Instagram