காஷ்மீர்: புல்டோசர் பயங்கரவாதத்தை எதிர்த்து இஸ்லாமியருக்கு நிலம் கொடுத்த இந்து!

காஷ்மீர் புல்டோசர் பயங்கரவாதம்:
இசுலாமியர் வீடு இடிப்புக்கு எதிர்ப்பு தெரிவித்து நிலம் கொடுத்து ஆதரித்த இந்து!

காஷ்மீரின் ஜம்முவில் உள்ள நர்வால் பகுதியைச் சேர்ந்த பத்திரிகையாளர் அர்வாஷ் அகமது டாயின் (Arfaz Ahmad Daing) 40 ஆண்டுகளுக்கு முன்பு கட்டப்பட்ட வீட்டில் வசித்து வந்தார். போதை மருந்து கடத்தல்காரர்களின் செயல்பாடுகளை அவர் அம்பலப்படுத்தி வந்துள்ளார். சமீபத்தில், கடத்தல்காரர்களுக்கும் போலீசு அதிகாரி ஒருவருக்கும் உள்ள தொடர்பை அவர் அம்பலப்படுத்தியிருந்தார். இந்நிலையில், அவர் வீடு ஆக்கிரமிப்புப் பகுதியில் கட்டப்பட்டதாகக் கூறி, நவம்பர் 27-ஆம் தேதி, ஜம்மு மேம்பாட்டு ஆக்கிரமிப்பு அதிகாரிகள் இடித்தனர்.

முறைப்படி அறிவிப்புகள் வழங்காமல் நூற்றுக்கணக்கான போலீசாரைக் குவித்து அவரது வீடு இடிக்கப்பட்டது. தனக்கு நேர்ந்த இந்த அநீதியை அவரே, நேரலையில் செய்தியாகத் தெரிவித்தார். “நேர்மையான பத்திரிகையாளர்களுக்கு ஜம்மு-காஷ்மீரில் என்ன கதி நேர்கிறது என்பதற்கு இது ஒரு சான்று” என்றார்.

இது குறித்து கருத்து தெரிவித்த, அர்வாஷின் வழக்கறிஞர், ”ஜம்மு காஷ்மீரில் 20 இலட்சம் கால்வாய்கள் ஆக்கிரமிக்கப்பட்டுள்ளன. இவற்றை எதுவும் ஜம்மு மேம்பாட்டு ஆணையம் இடிக்கவில்லை. ஆக்கிரமிப்புகளை அகற்றுவதைப் பெரும் முதலாளிகளிடமிருந்து தொடங்க வேண்டுமென ஜம்மு-காஷ்மீர் உயர்நீதிமன்றம் வழங்கிய உத்தரவும் பின்பற்றப்படவில்லை” என்று குறிப்பிட்டார்.

ஜம்மு-காஷ்மீருக்கான சிறப்புரிமையை ரத்து செய்து, யூனியன் பிரதேசங்களாக மாற்றியமைத்த பின்னர், அங்கு துணைநிலை ஆளுநரை நியமித்து, சர்வாதிகார அடக்குமுறை ஆட்சியை நடத்தி வருகிறது, பாசிச மோடி அரசு. அந்தவகையில், துணைநிலை ஆளுநராக இருக்கும் மனோஜ் சின்ஹா தான் ஜம்மு-காஷ்மீருக்கு புல்டோசர் அடக்குமுறையைக் கொண்டுவந்தார்.

அப்போதிருந்து புல்டோசர் பீதி பரவத் தொடங்கியது. வாட்ஸ்-அப் வலைப்பின்னல் மூலம், பல இஸ்லாமியர்களின் வீடுகள் எல்லாம் ஆக்கிரமிப்பில் இருப்பவை என்று வதந்தி பரப்பப்பட்டது. தற்போது முதல்வராக இருக்கும் உமர் அப்துல்லா வீடு, அவரது கட்சி அலுவலகம் கூட ஆக்கிரமிப்பில் கட்டப்பட்டவை என்ற வதந்திகள் பரப்பப்பட்டன. அதன் பின்னர், தேர்தல் நடத்தப்பட்டு, பா.ஜ.க. எதிர்க்கட்சியான உமர் அப்துல்லா ஆட்சிக்கு வந்த பின்னரும் இந்த புல்டோசர் அடக்குமுறையை ஆளுநர் மேற்கொண்டு வருகிறார் என்பதுதான், அர்வாஷின் தற்போது வீடு இடிப்பு நடவடிக்கை வெளிப்படுத்தி உள்ளது.

படிக்க: சத்தீஸ்கர்: தொடர்கதையாகும் புல்டோசர் பயங்கரவாதம்

இந்நிலையில், அர்வாஷின் வீடு இடிக்கப்பட்டதற்கு பல்வேறு கட்சியினரும் மனித உரிமை அமைப்புகளும் கண்டங்களைத் தெரிவித்து வருகின்றனர். இது குறித்து கருத்து தெரிவித்த, ஜம்மு-காஷ்மீரின் உமர் அப்துல்லா, “மக்களால் தேர்ந்தெடுக்கப்பட்ட அரசுக்கு எந்தவித தகவலையும் தெரிவிக்காமல், அனுமதியும் கோராமல் இந்த நடவடிக்கை எடுக்கப்பட்டுள்ளது. அரசுக்கு அவப்பெயர் ஏற்படுத்தும் நோக்கத்தில் இது மேற்கொள்ளப்பட்டுள்ளது” என்று கடுமையான கண்டனங்களைத் தெரிவித்துள்ளார்.

ஆனால், புல்டோசர் நடவடிக்கைக்கு எதிராக, மக்கள் ஜனநாயகக் கட்சி கொண்டுவந்த மசோதாவை, உமர் அப்துல்லாவின் தேசிய மாநாட்டுக் கட்சி அரசு நிராகரித்தது என்பது குறிப்பிடத்தக்கது. ஒருபக்கம், சட்டமன்றத்தில் மசோதா இயற்றி, புல்டோசர் நடவடிக்கையைத் தடுப்பதற்கான பெயரளவிலான முயற்சியைக் கூட மேற்கொள்ளாமல், இன்னொரு பக்கம், இந்த வீடு இடிப்பை உமர் அப்துல்லா கண்டிப்பதாகக் கூறுவதைப் பலரும் கேள்வி எழுப்பி வருகின்றனர்.

இந்நிலையில், வீடு இடிக்கப்பட்டதால் நடுத்தெருவில் குடும்பத்தினருடன் செய்வதறியாமல் தவித்த அர்வாஷுக்கு அருகில் வசித்து வந்த குல்திப் சர்மா என்ற இந்து நிலம் கொடுத்து உதவியுள்ளார். “அர்வாஷின் 2,700 சதுர அடி வீடு இடிக்கப்பட்டால், நாங்கள் 5,400 சதுர அடி வீடு கட்டிக்கொடுப்போம். பாதிக்கப்பட்டவருக்கு ஆதரவாகவும் அநீதிக்கு எதிராகவும் உறுதியாகக் குரல் கொடுப்போம். சகோதரத்துவம் வளர வேண்டும். இந்து – இஸ்லாமியர் என்ற வெறுப்பு அரசியலை எத்தனை காலம்தான் நாம் சகித்துக் கொள்வது” என்று ஆதங்கத்துடன் கேள்வி எழுப்பினார்.

இந்த ஆளுநரால், ஜம்மு மேம்பாட்டு ஆணைய துணைத் தலைவராக நியமிக்கப்பட்ட ரூபேஷ் குமாரால் தான் அர்வாஷின் வீடு இடிக்கும் புல்டோசர் நடவடிக்கையை மேற்கொண்டவராவார். எனினும், பா.ஜ.க.வினரும் இந்த புல்டோசர் நடவடிக்கையை எதிர்ப்பதாகக் கூறுவதற்குக் காரணம், இந்துக்கள் மத்தியிலேயே இது கடும் எதிர்ப்பை உருவாகியிருப்பதுதான்.

புல்டோசர் ராஜ்ஜியம் என்ற பயங்கரவாத நடவடிக்கைக்கு எதிராக, காஷ்மீரில் மட்டுமல்ல, நாடு முழுவதும் இந்துக்கள், இசுலாமிய மக்களுக்கு ஆதரவைத் தெரிவிக்கும் சம்பவங்கள் தொடர்ந்து நடந்து கொண்டுதான் இருக்கிறது. பசு வளைய மாநிலங்களில் கூட, பா.ஜ.க.வின் கடுமையான மிரட்டல்களை மீறி, இசுலாமியர்களுக்காக இந்துக்கள் பலரும் குரல் கொடுத்து வருகின்றனர்.

மக்களிடம் இருக்கும் இந்த மத நல்லிணக்க உணர்வுதான், சங்கப் பரிவாரக் கும்பலுக்கு அச்சுறுத்தலை ஏற்படுத்துகிறது. தொடர்ந்து தனது ஆதிக்கத்தின் கீழ் அதிகாரத்தைக் குவித்து வந்தாலும், மக்களின் ஒற்றுமையை நிரந்தரமாக இந்த சங்கிக்கும்பலால் பிரித்துவிட முடியவில்லை. இந்த ஒற்றுமை உணர்வை நாளும் வளர்த்தெடுப்பதும், சங்கப் பரிவாரக் கும்பல்களின் காவி பயங்கரவாத நடவடிக்கைகளை எதிர்ப்பதன் முக்கியமான அம்சமாகும்.

ரஹ்மத்

சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube, Telegram, Instagram