மகாராஷ்டிர மாநில கால்நடை ஆணையம் ஜூன் 3 முதல் 8-ஆம் தேதி வரை ஒரு வாரத்திற்கு அம்மாநிலத்தில் கால்நடை சந்தைகள் செயல்படத் தடை விதித்துள்ளது. இஸ்லாமிய மக்களின் பக்ரீத் பண்டிகைக்கு ஒரு வாரத்திற்கு முன்னதாக இந்த உத்தரவை பிறப்பித்துள்ளது.
ஜூன் 7-ஆம் தேதி அன்று வரும் பக்ரீத் பண்டிகையை உலகம் முழுவதுமுள்ள இஸ்லாமிய மக்கள் புத்தாடை அணிந்தும் பரிசுகள் வழங்கியும் கொண்டாடுவர். அன்றைய தினம் அவர்களது உணவில் செம்மறி ஆட்டின் இறைச்சி முக்கிய இடத்தை பெறும். ஆனால் இஸ்லாமிய மக்களின் மீதான வெறுப்புணர்வினால் மகாராஷ்டிரா பா.ஜ.க. அரசு இந்த உத்தரவை பிறப்பித்துள்ளது. இதற்கான சுற்றறிக்கை கடந்த மே 27 அன்று வேளாண் உற்பத்தி சந்தைக் குழுக்களுக்கு (Agricultural Produce Market Committee) அனுப்பப்பட்டதையடுத்து வியாபாரிகளும் தொழிலாளர்களும் அதிர்ச்சியடைந்தனர்.
அவ்வறிக்கையில், மாநிலத்தில் அமல்படுத்தப்பட்டுள்ள பசு பாதுகாப்பு சட்டத்தை குறிப்பிட்டு “பக்ரீத் பண்டிகைக்கு முன்னதாக ஜூன் 3 முதல் 8-ஆம் தேதி வரை மாநிலத்தின் எந்த மாவட்டத்திலும் கால்நடை சந்தைகள் செயல்படக் கூடாது” என்றும் “இதன் மூலம் சட்டவிரோதமாக மாடுகள் கொல்லப்படுவதை உறுதிசெய்ய முடியும்” என்றும் தெரிவித்துள்ளது. பசுக்கள் கொல்லப்படுவதை குறைப்பதே தடை விதிக்கப்பட்டதன் நோக்கம் என்று தெரிவித்த கால்நடை ஆணையத் தலைவர் சேகர் முண்டாடா, “ஈத் பண்டிகைக்கு முந்தைய நாட்களில், விலங்குகளை பலியிடும் நோக்கத்துடன் உட்பட பல்வேறு வழிகளில் விலங்கு பரிவர்த்தனைகள் செய்யப்படுகின்றன. இது நிகழாமல் தடுப்பதற்கு மட்டுமே நாங்கள் விரும்புகிறோம்” என்று அப்பட்டமாக இஸ்லாமிய வெறுப்பை கக்கியுள்ளார். மகாராஷ்டிரா கால்நடை ஆணையத்தின் சுற்றறிக்கையும் அதன் தலைவரின் பேச்சும் காவி குண்டர்களின் நோக்கத்தைத் தெளிவாக எடுத்துக்காட்டுகிறது.
படிக்க: இராம நவமி: பாசிஸ்டுகளின் நிகழ்ச்சி நிரலுக்குப் பலியான திரிணாமுல் காங்கிரசு
‘பசு வதை’, ‘பசு கடத்தல்’ என்ற பெயரில் இஸ்லாமிய மக்களை தாக்குவது, துன்புறுத்துவது, கும்பல் படுகொலை செய்வது போன்றவற்றை ஆர்.எஸ்.எஸ். குண்டர்கள் பசு-வளைய மாநிலங்களில் இயல்புநிலையாக்கியுள்ளனர். குறிப்பாக, பா.ஜ.க. ஆளும் மாநிலங்களில் பசு வதை தடைச் சட்டம், பசு பாதுகாவல் என்ற பெயரில் இப்படுகொலைகள் அரசு-அதிகார வர்க்கத்தின் துணையுடனேயே நிகழ்த்தப்படுகின்றன. தற்போது கால்நடை சந்தைகளை மூடினால் சட்டவிரோத பசு பரிவர்த்தனையைத் தடுக்க முடியும் என்று தெரிவித்திருப்பதன் மூலமாக மகாராஷ்டிரா முழுவதும் பசு வதை, பசு கடத்தல் என்ற பெயரில் இஸ்லாமிய மக்கள் மீதான தாக்குதல்களைத் தீவிரப்படுத்த காவி குண்டர் படை ஆயத்தமாகியுள்ளது. இதன் மூலம் இஸ்லாமிய மக்களின் பண்டிகையை அவர்களுக்கு அச்சுறுத்தல் மிகுந்ததாக மாற்றியிருகிறது. இந்தாண்டு ரம்ஜான் பண்டிகையின் போது பா.ஜ.க. ஆளும் மாநிலங்களில் இஸ்லாமிய மக்கள் அவர்களது மத வழிபாட்டு தலங்கள் மீது தீவிரமான தாக்குதல்கள் நடத்தப்பட்டதும், இந்து மக்களின் ஹோலி பண்டிகை இடையில் வந்ததை பயன்படுத்திக்கொண்டு இஸ்லாமியர்கள் வெள்ளிக்கிழமை தொழுகைக்கு மசூதிக்கு செல்வதை தடுத்ததும் இதனுடன் இணைத்து பார்க்க வேண்டியவை.
இதுகுறித்து வஞ்சித் பகுஜன் அகாடியின் (Vanchit Bahujan Aagadi) மாநிலத் துணை தலைவர் கஃபரூக் அகமது கூறுகையில், “சந்தைகள் செயல்படவில்லை என்றால் அரசால் தடைசெய்யப்படாத விலங்குகளான ஆடுகள், எருமைகள் மற்றும் செம்மறி ஆடுகளின் வர்த்தகமும் நிறுத்தப்படும். இதன் விளைவாக, விவசாயிகள், சுமை தூக்குபவர்கள், தரகர்கள், ஓட்டுநர்கள் மற்றும் தொழிலாளர்களுக்கான தினசரி கூலி வருமானம் நிறுத்தப்படும்” என்று தெரிவித்துள்ளார். இது ஆர்.எஸ்.எஸ்-பா.ஜ.க. பாசிச கும்பலின் இந்துத்துவ அரசியல் இஸ்லாமிய மக்களுக்கு மட்டுமின்றி பலதரப்பட்ட உழைக்கும் மக்களுக்கும் விரோதமானதாகவே உள்ளது என்பதை அம்பலப்படுத்துகிறது. மேலும், அவ்வமைப்பின் தலைவர் பிரகாஷ் அம்பேத்கர் பேசுகையில், “மகாராஷ்டிர கால்நடை ஆணையத்திற்கு பரிந்துரைப்பதற்கு மட்டுமே அதிகாரம் உள்ளது. ஆனால் சந்தை குழுக்களுக்கு நேரடியாக உத்தரவுகளை பிறப்பிப்பது அதன் அதிகாரத்தை மீறுவதாகும்” என்று தெரிவித்துள்ளார்.
பா.ஜ.க. ஆட்சி செய்யக்கூடிய உத்தரப்பிரதேசம், ராஜஸ்தான், குஜராத், ஹரியானா, மகாராஷ்டிரா உள்ளிட்ட மாநிலங்களில் இராம நவமி, விநாயகர் சதுர்த்தி போன்ற இந்து பண்டிகை நாட்களும் ரம்ஜான், பக்ரீத் போன்ற இஸ்லாமியப் பண்டிகை நாட்களும் இஸ்லாமிய மக்களுக்கு அச்சம் நிறைந்ததாகவும் பாதுகாப்பற்றதாகவும் மாற்றப்பட்டு வருகிறது. இதற்கு எதிராக குரல் கொடுக்க வேண்டியதும் உழைக்கும் மக்களுக்கு எதிரான ஆர்.எஸ்.எஸ். மற்றும் அதன் சங்கப் பரிவார குண்டர் படைகளை தடை செய்வதற்கு போராடுவதும் புரட்சிகர-ஜனநாயக சக்திகளின் கடமையாகும்.
இன்குலாப்
சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube, Telegram, Instagram
