காசா: தஞ்சமடைந்த பள்ளியில் தாக்குதல் நடத்திய கொலைகார இஸ்ரேல்! | படக்கட்டுரை

2.3 மில்லியன் மக்களில் பெரும்பாலானோர் கொல்லப்பட்டுள்ளனர். அவர்களில் உயிருடன் இருப்பவர்கள் மற்றும் அவர்களின் குடும்பங்களுக்குத் தங்குமிடமாக இப்பள்ளிகள் உருவாக்கப்பட்டுள்ளன. இப்பள்ளிகள் மீது தாக்குதல் நடத்தில் போர்க் குற்றங்களைத் தொடர்ந்து செய்து வருகிறது கொலைகார இஸ்ரேல்.

சந்துரு

September 29, 2024

காசாவில் இஸ்ரேல் இராணுவம் அப்பாவி பாலஸ்தீன மக்களை நரவேட்டையாடி வருகிறது. எஞ்சியிருக்கும் பாலஸ்தீன மக்கள் செய்வதறியாது இடம்பெயர்ந்து வருகிறார்கள். பாதுகாப்பான இடம் என்று கூறப்படும் பகுதிகளில் தஞ்சமடைந்துள்ளார்கள். அப்படி வடக்கு காசாவில் ஆயிரக்கணக்கான பாலஸ்தீன மக்கள் தஞ்சமடைந்திருந்த ஓர் பள்ளி மீது இஸ்ரேல் இராணுவம் செப்.26 அன்று வான்வழித் தாக்குதல் நடத்தியுள்ளது. இத்தாக்குதலில் 15 பேர் கொல்லப்பட்டுள்ளார்கள்.

ஹமாஸ் போராளிகள் இருக்கிறார்கள் என்ற சந்தேகத்தின் பெயரிலேயே ஜபாலியா அகதிகள் முகாமில் உள்ள பள்ளியைத் தாக்கினோம் என்று இஸ்ரேல் இராணுவம் திமிராகக் கூறியுள்ளது.

கடந்த 24 மணி நேரத்தில் உயிரிழந்தவர்களின் எண்ணிக்கை 36ஆக உயர்ந்துள்ளது. ஒரு காணொளி, ஹஃப்சா அல்-ஃபலுஜா பள்ளி இடிபாடுகள் மத்தியில் மீட்புப் பணியாளர்கள் உயிரிழந்தவர்களின் சடங்களை எடுத்துச்செல்வதைக் காட்டுகிறது. மற்றுமொரு காணொளி, சிதைந்த உடல்கள், துண்டிக்கப்பட்ட உடல் பாகங்கள் பிளாஸ்டிக் தாளில் போர்த்தி, உடல் பாகங்கள் குளிர்சாதனப் பெட்டியில் வைப்பதைக் காட்டுகிறது.

ஹமாஸ் படையின் “கட்டளை மையங்கள்” என்று கூறி பலமுறை பள்ளிகளைத் தாக்கியுள்ளது இஸ்ரேல் இராணுவம்.

காசா மீதான இஸ்ரேலின் போரில் குறைந்தது 41,534 பாலஸ்தீனியர்கள் கொல்லப்பட்டுள்ளனர். 96,092 பேர் காயமடைந்துள்ளனர் என்று சுகாதார அமைச்சகம் செப்.26 அன்று வெளியிட்ட புள்ளிவிவரங்கள் தெரிவிக்கின்றன. இறந்தவர்களில் பாதிக்கும் மேற்பட்டவர்கள் பெண்கள் மற்றும் குழந்தைகள், இதில் சுமார் 1,300 குழந்தைகள் கொல்லப்பட்டிருக்கிறார்கள்.

***

காசாவில் இடம்பெயர்ந்த பாலஸ்தீனியர்கள் வசிக்கும் பள்ளிக் கட்டிடங்கள் மீது இஸ்ரேல் நடத்திய தொடர்ச்சியான தாக்குதல்களில் சமீபத்திய தாக்குதல் இதுவாகும்.

முற்றுகையிடப்பட்ட என்கிளேவின் 2.3 மில்லியன் மக்களில் பெரும்பாலானோர் போரினால் பலமுறை இடம்பெயர்ந்துள்ளனர், பலர் பள்ளிக் கட்டிடங்களில் தஞ்சம் புகுந்துள்ளனர்.

காசாவில் உள்ள சிவில் பாதுகாப்பு அமைப்பின் செய்தித் தொடர்பாளர் மஹ்மூத் பஸ்சல், ஜபாலியாவில் உள்ள பள்ளியின் மீது இஸ்ரேலிய குண்டுவீச்சில் குழந்தைகள் மற்றும் பெண்கள் உட்பட 15 பேர் கொல்லப்பட்டனர். பலர் காயமடைந்துள்ளனர் என்று கூறினார்.

மத்திய காசாவில் உள்ள நுசிராத் அகதிகள் முகாமில் உள்ள ஐக்கிய நாடுகள் சபையால் நடத்தப்படும் அல்-ஜௌனி பள்ளி மீதான இஸ்ரேலில் வான்வெளி தாக்குதலால், செப்டம்பர் 11, 2024 அன்று பாலஸ்தீனிய அகதிகளுக்கான ஐ.நா அமைப்பின் (UNRWA) ஆறு ஊழியர்கள் உட்படக் குறைந்தது 18 பேர் கொல்லப்பட்டனர்.