நூல் அறிமுகம் – செயற்கை நுண்ணறிவும் உழைப்பின் எதிர்காலமும்

செயற்கை நுண்ணறிவைப் பற்றி, பல அறிமுக நூல்கள் வந்தாலும், அதனை மார்க்சியக் கண்ணோட்டத்தில், உற்பத்தி முறையில் செயல்படுத்தும் தாக்கம் குறித்த ஒரு விரிவான ஆய்வு நூல் இதுவரை வரவில்லை. அந்தத் தேவையை ஈடு செய்யும் வகையில், ஈரோட்டைச் சேர்ந்த “இடது பதிப்பகம்”, “செயற்கை நுண்ணறிவும் உழைப்பின் எதிர்காலமும்” என்ற “இடது சிற்றிதழின்” சிறப்பிதழாக இந்நூலைக் கொண்டுவந்துள்ளது.

வினவு செய்திப் பிரிவு

November 30, 2025

அன்பார்ந்த வினவு வாசகர்களுக்கு,

நீண்ட இடைவெளிக்குப் பின்னர், நூல் அறிமுகம் செய்கிறோம். பல நெருக்கடியான சூழல்களையும் தாண்டி இந்த நூல் அறிமுகம் செய்வதற்குக் காரணம், இந்நூலின் உள்ளடக்கமும் அது இன்றைய அரசியல் சூழலில் விவாதிக்கப்பட வேண்டிய அவசியமும்தான்.

செயற்கை நுண்ணறிவு தொடர்பான விவாதங்கள் தொடங்கிய காலத்திலேயே, வினவு தளத்தில், அது தொடர்பாக தொடர் கட்டுரைகளைக் கொண்டுவந்துள்ளோம். பின்னர், 2017-ஆம் ஆண்டு ஜூலை, “செயற்கை நுண்ணறிவு: நவீன அடிமை யுகம்” என்று சிறு வெளியீடாகவும் கொண்டுவந்தோம்.

செயற்கை நுண்ணறிவின் அறிவியலை எளிமையான முறையில் அறிமுகம் செய்வதுடன், இது, சமூகத்தில் உருவாக்கப் போகும் மாற்றங்களைக் கோடிட்டுக் காட்டும் வகையில், அந்த சிறு வெளியீடு அமைந்தது.

இந்த எட்டாண்டுகளில், செயற்கை தொழில்நுட்பம் அனைத்துத் துறைகளிலும் பரவி வருகிறது. மேற்கத்திய நாடுகளில் இது பெரும் வேலைப் பறிப்பை மேற்கொண்டு வருகிறது. இதன் நெருக்கடியை உலகம் இப்போது சந்தித்து வருகிறது. எனினும், இது அனைத்துத் துறைகளிலும் ஆதிக்க நிலையை அடையவில்லை எனும் போது, இதனால் ஏற்படப் போகும் சமூக விளைவுகள் மிக பயங்கரமானவையாக இருக்கும் என்பதில் மாற்றுக் கருத்து இல்லை.

இன்றைய சூழலில், செயற்கை நுண்ணறிவைப் பற்றி, பல அறிமுக நூல்கள் வந்தாலும், அதனை மார்க்சியக் கண்ணோட்டத்தில், உற்பத்தி முறையில் செயல்படுத்தும் தாக்கம் குறித்த ஒரு விரிவான ஆய்வு நூல் இதுவரை வரவில்லை. அந்தத் தேவையை ஈடு செய்யும் வகையில், ஈரோட்டைச் சேர்ந்த “இடது பதிப்பகம்”, “செயற்கை நுண்ணறிவும் உழைப்பின் எதிர்காலமும்” என்ற “இடது சிற்றிதழின்” சிறப்பிதழாக இந்நூலைக் கொண்டுவந்துள்ளது.

இந்நூலைக் குறித்த மதிப்பீடாக இந்தக் கட்டுரை அமையவில்லை. அதற்கு காலம் தேவை. விரைவில் அதனை நிறைவேற்றுவோம். அதேவேளையில், உடனடியாக இந்நூலை வாசகர்களுக்கு அறிமுகம் செய்யும் பொருட்டு, இந்நூலின் பதிப்புரையில் இருந்து சில பகுதிகளை வாசகர்களுக்கு வழங்குகிறோம்.

***

… நவீன அறிவியலின் பெரும் பாய்ச்சலாக, செயற்கை நுண்ணறிவு பெரு வளர்ச்சியையும் செல்வாக்கையும் பெற்று வருவதும், அதன் ஆதிக்கம் எல்லாரையும் திகைக்க வைக்கிறது என்பதும் இடது இதழின் கவனத்திற்கு உரியதாக ஆயிற்று.

செயற்கை நுண்ணறிவை எப்படிப் புரிந்து கொள்வது என்பதைப் பற்றிப் போதுமான தெளிவு யாருக்கும் இல்லை. ஆங்கிலத்தில் வெளிவரும் ஃப்ரண்ட்லைன் ஏடு ஒரு சிறப்பிதழை வெளியிட்டது. செயற்கை நுண்ணறிவு என்னும் தொழில் நுட்பத்தைப் பற்றிய அறிமுகம் என்ற வகையில் சிலர் தமிழிலும் ஆங்கிலத்திலும் சில நூல்களைக் கொண்டு வந்தார்கள். ஆனால் எங்களுக்குக் கிடைத்த நூல்களில் எதுவும் செயற்கை நுண்ணறிவைத் தத்துவார்த்த நோக்கில் பார்க்கவில்லை. செயற்கை நுண்ணறிவால் உழைப்புக்கும் உழைக்கும் மக்களுக்கும் எதிர்காலத்தில் நேரப்போகும் விளைவுகளைப் பற்றியும் யாரும் கவனம் செலுத்தவில்லை.

இந்நிலையில், மார்க்சிய மூல நூல்களை வாசிப்பதிலும், நவீன கால மார்க்சியப் போக்குகள் குறித்த தத்துவார்த்தப் படைப்புகளை வாசிப்பதிலும் மட்டுமின்றி, அறிவியல் தொழில்நுட்பப் புரட்சியைப் பற்றிய ஆய்வு நூல்களை வாசிப்பதிலும் கல்லூரியில் பயிலும் காலத்திலிருந்தே தீவிர ஈடுபாடு கொண்டிருக்கும் தோழர் எஸ். பாலச்சந்திரன் செயற்கை நுண்ணறிவுத் தொழில்நுட்பம் குறித்து ஒரு மார்க்சியப் பார்வையை உருவாக்குகிறார். இதுகுறித்து எழுதுவதில் ஏறக்குறைய ஓராண்டுக் காலமாக அவர் ஈடுபட்டு வருகிறார். அதன் விளைச்சலாக உருவாகியுள்ள. “செயற்கை நுண்ணறிவும் உழைப்பின் எதிர்காலமும்” என்னும் இந்நூல் அவருடைய கடுமையான. அறிவார்ந்த உழைப்பின் வெளிப்பாடு. ஓராண்டுக்காலமாக இந்நூலை அதன் ஒவ்வொரு வளர்ச்சிக் கட்டத்திலும் தொடர்ந்து வாசித்து வந்திருக்கிறேன். இந்தக் காலம் முழுவதிலும் இதைப் பற்றித் தொடர்ந்து உரையாடி வந்திருக்கிறோம். எனக்குத் தெரிந்த வரையில் இந்நூலைத் தோழர் பாலச்சந்திரன் ஏழு அல்லது எட்டு முறை திருத்தித் திருத்தியெழுதி உருவாக்கியுள்ளார். கார்ல் மார்க்ஸ் மனித குல விடுதலைக்கான தனது தத்துவத்தின் அடித்தளமாக உழைப்பு பற்றிய கோட்பாட்டை வைத்து, மாபெரும் தத்துவக் கட்டமைப்பை உருவாக்குவார். அந்த உழைப்புக் கோட்பாட்டை அடித்தளமாகக் கொண்டு செயற்கை நுண்ணறிவு என்னும் புதிய தொழில் நுட்பத்தையும், இப்புதிய தொழில் நுட்பத்தின் வளர்ச்சியின் பின்னணியில் உழைப்பின் எதிர்காலத்தையும் தோழர் எஸ். பாலச்சந்திரன் இந்நூலில் ஆய்வு செய்துள்ளார்.

இதுவரை செயற்கை நுண்ணறிவு குறித்து எழுதிய யாரும் முதலாளித்துவச் சமுதாயத்தில் உழைப்புச் செயல்பாட்டில், உற்பத்தி சாதனங்களின் வளர்ச்சியில், உற்பத்தி உறவுகளில் அது என்ன விதமான பாதிப்பை ஏற்படுத்துகிறது என்பதைப் பற்றிச் சொல்லவில்லை. இது குறித்து ஆழமான ஆய்வை முன்வைக்கும் தோழர் எஸ்.பாலச்சந்திரன், கார்ல் மார்க்சின் 1844 பொருளாதார- தத்துவக் கையெழுத்துப்படிகள், அரசியல் பொருளாதார விமர்சனத்திற்கு ஒரு பங்களிப்பு, கிரண்ட்ரிஸ்ஸே, மூலதனம், முதலாளித்துவத்திற்கு முந்தைய உற்பத்தி முறைகள் போன்ற நூல்களின் சாரத்தை உள் வாங்கிக் கொண்டு, தனது அடர்த்தியும் செறிவும் மிக்க நடையில் எழுதி வழங்கியதன் மூலம் தற்கால மார்க்சியத்திற்கு ஒரு கொடையை அல்லது பங்களிப்பை நல்கியுள்ளார் எனில் அது மிகையில்லை.

முதலாளித்துவச் சமூகத்தில் செயற்கை நுண்ணறிவின் மூலம் அந்நியமாதலில் ஏற்படும் தாக்கம் பற்றியும், உழைப்புச் செயல்பாட்டின் மீதான இதன் தாக்கம் எவ்வாறு வர்க்கப் போராட்டத்திற்கு இட்டுச் செல்கிறது அல்லது அதனைத் தீவிரப்படுத்துகிறது என்பதைப் பற்றியும், பண்ட வழிபாடு, பொருளாக்கம், சமூகப் பொது அறிவு, தொழிலாளர் கையிருப்புப் படை, தொழில்நுட்ப நிர்ணய வாதம் போன்ற பல்வேறு மார்க்சியக் கருப்பொருள்களைப் பற்றியும் தோழர் பாலச்சந்திரன் விரிவாகப் பேசுகிறார். ஆழ்ந்த கவனத்துடன் கூடிய தொடர்ச்சியான, காத்திரமான வாசிப்புத்தான் இவற்றைப் புரிய வைக்கும்.

இந்நூலின் முக்கியத்துவம் கருதி, இதனைச் சிறு சிறு பகுதிகளாகப் பிரித்து அடுத்தடுத்த இதழ்களில் தொடராக வெளியிடுவதற்குப் பதிலாக, முழுமையான வடிவில் அப்படியே வெளியிடுவதே சிறந்த பயனைத் தரும் என்று முடிவு செய்து, இடது இந்நூலை ஓராண்டுச் சிறப்பிதழாக வெளியிடுகிறது.

இந்நூலின் இறுதி அத்தியாயமாக, மக்களுக்கான செயற்கை நுண்ணறிவுக் கொள்கை அறிக்கை என்ற தலைப்பில் தோழர் எஸ்.பாலச்சந்திரன் தயாரித்து அளித்துள்ள கொள்கை அறிக்கையை இடது தனது கொள்கை நிலைப்பாடாகவும் செயல்பாட்டிற்கான அழைப்பாகவும் முன் வைக்கிறது. மார்க்சியச் சிந்தனையாளர்கள். செயல்பாட்டாளர்கள். முன்னணி ஊழியர்கள், தொழிற்சங்கத்தினர், அறிவுத் துறையினர் ஆகிய அனைவரும் தத்துவார்த்த வழிகாட்டிக் கையேடு என்ற முறையிலும் அனைவருக்குமான செயல் திட்டம் என்ற முறையிலும் இக்கொள்கை அறிக்கையைக் கூடுதல் கவனத்துடன் வாசித்து விவாதிக்க வேண்டுகிறோம்.

இதுவே முடிவானதல்ல. இதில் உடன்படுபவர்கள் செழுமைப்படுத்தவும். முரண்படுபவர்கள் விவாதிக்கவும் உரையாடவும் நாங்கள் உறுதுணையாக இருப்போம்.

இந்நூலின் வாயிலாக, செயற்கை நுண்ணறிவு குறித்த ஒரு தெளிவான மார்க்சியப் பார்வையினை முன்வைக்கிறோம். திறந்த மனதுடன் தொடர்ந்து வாசிக்க வேண்டுகிறோம். இது நிச்சயமாக மார்க்சியக் கோட்பாட்டிற்குப் புதிய பரிமாணங்களைக் கொண்டு வரும் என்று எண்ணுகிறோம்.

இது “நடுக்கடலில் தனிக் கப்பல்தான்”. இருந்த போதிலும் கரை சேரும் என நிச்சயமாக நம்புகிறோம்.

***

அவசியம் இந்நூலை வாங்கிப் படிக்குமாறு அனைத்து வாசர்களையும் கேட்டுக்கொள்கிறோம்.

நூலின் பெயர்: செயற்கை நுண்ணறிவும் உழைப்பின் எதிர்காலமும்