தூத்துக்குடி மாநகராட்சியில் தூய்மைப் பணியாளர்களுக்கு 3 வேளை உணவு வழங்குவதற்கான தீர்மானம் நிறைவேற்றப்பட்டது.
இதற்காக மூன்று ஆண்டுகளுக்கு 8 கோடியே 14 இலட்சம் நிதி ஒதுக்கீடு செய்யப்பட்டு அதுவும் ஒப்பந்த அடிப்படையில் தனியார் நிறுவனத்திற்குக் கையளிக்கப்பட இருக்கிறது.
டிசம்பர் 6 முதல் தூத்துக்குடி உள்ளிட்ட அனைத்து மாநகராட்சி, நகராட்சி, பேரூராட்சிகளில் இத்திட்டமானது நடைமுறைப்படுத்தப்பட இருக்கிறது.
ஏற்கெனவே தமிழ்நாடு அரசு, சென்னை மாநகராட்சி தூய்மைப் பணியாளர்களுக்கு தினசரி காலை, மதியம், இரவு என மூன்று வேளை ’இலவச’ உணவு வழங்கும் திட்டத்தை 2025 அக்டோபர் 22 அன்று அரசாணை மூலம் அறிவித்தது.
சென்னை மாநகராட்சி தூய்மை பணிகளை கார்ப்பரேட் வசம் வழங்குவதற்கு எதிர்ப்பு தெரிவித்து, ஜெனோவா, பாரதி, கீதா மற்றும் வசந்தி என்ற நான்கு பெண் தொழிலாளர்கள் அம்பத்தூரில் காலவரையற்ற உண்ணாநிலைப் போராட்டத்தில் ஈடுபட்டுள்ளனர். இந்த போராட்டம் 10 நாட்களுக்கு மேல் நீடித்து வருகிறது.
அவர்களின் கோரிக்கைகள், மற்றும் உரிமைகள் தொடர்பான பேச்சுவார்த்தைகளில் அரசு தரப்பிலிருந்து சுமூக முடிவுகள் எடுக்கப்படாததால் இந்த உண்ணாநிலைப் போராட்டம் நீடித்து வருகிறது.
இந்நிலையில், தூய்மைப் பணியாளர்களுக்கு 3 வேளை உணவு கொடுக்கப்படும் என்கிற தூத்துக்குடி மாநகராட்சியின் தற்போதைய அறிவிப்பு இப்போராட்டத்தைக் கொச்சைப்படுத்துவது மட்டுமின்றி, மனிதாபிமானமற்ற செயலுமாகும்.
மேலும் தூய்மைப் பணிகளை தனியாருக்குத் தாரை வார்க்கும் நடவடிக்கையை எதிர்த்தும், தமது உரிமைகளுக்காகவும் தூத்துக்குடி உள்ளிட்ட அனைத்து பகுதிகளிலும் தூய்மைப் பணியாளர்கள் தொடர்ச்சியாகப் போராடி வருகின்றனர். தொழிலாளர்களின் உரிமைகளைக் காலில் போட்டு மிதித்துக் கொண்டே வாயில் உணவு தருகிறேன் என்பது தி.மு.க அரசின் அருவருக்கத்தக்க செயலாகும்.
ஆகஸ்ட் மாதம் தூய்மைப் பணியாளர்கள் சென்னையில் நடத்திய போராட்டத்தை நீதிமன்றத்தின் மூலமாக முடிவுக்குக் கொண்டு வந்து, போலீசு மூலம் ஒடுக்கியது தி.மு.க அரசு. தனது கார்ப்பரேட்-தனியார்மயமாக்கல் நடவடிக்கையை மறைக்க சென்னையில் தூய்மைப் பணியாளர்களுக்கு உணவு வழங்கும் திட்டத்தை அறிமுகப்படுத்தியது. தற்போது இத்திட்டம் அனைத்து உள்ளாட்சி நிர்வாகங்களுக்கும் விரிவுபடுத்தப்பட இருக்கிறது. ’சமூகநீதி அரசு’ என்று கூறிக் கொள்ளும் தி.மு.க அரசு செய்யும் இச்செயலை ஜனநாயக சக்திகள் அனைவரும் கண்டிக்க வேண்டும்.
1990-களில் அமல்படுத்தப்பட்ட மறுகாலனியாக்கக் கொள்கைகளை கட்சி பேதமின்றி ஆட்சியில் அமரும் தி.மு.க, அ.தி.மு.க உள்ளிட்ட அனைத்து கட்சிகளும் அமல்படுத்துகின்றன.
பாசிச பா.ஜ.க கும்பல் அம்பானி, அதானி கார்ப்பரேட்டுகள் கொள்ளையடிக்க சட்டங்களைத் திருத்துகிறது. பொதுத்துறை நிறுவனங்களை கார்ப்பரேட்மயமாக்கத்திற்கு திறந்து விடுகிறது.
தி.மு.க தனியார்மயக் கொள்கைகளை அமல்படுத்திக் கொண்டே பாசிசத்தை வீழ்த்துவோம் என்று கூறுவதானது பகற்கனவாகும். இது மக்களை பாசிச படுகுழியில் வீழ்த்துவதற்கே வழிவகுக்கும்.
உழைக்கும் மக்கள் தங்களது ஜனநாயக உரிமைகளைப் பாதுகாக்க, ”வேண்டும் ஜனநாயகம்” என்ற கோரிக்கையோடு வீதியில் இறங்குவதும், அவர்களோடு ஜனநாயக சக்திகள் கரம் கோர்ப்பதும் அவசியமானதாகும். பாசிசத்தையும், கார்ப்பரேட் கொள்ளையையும் தடுக்கும் வகையிலான பாசிச எதிர்ப்பு ஜனநாயகக் குடியரசு அமைக்க அனைவரும் ஒன்றிணைந்து களமிறங்குவோம்.
பதிவு
மக்கள் அதிகாரக் கழகம்,
தூத்துக்குடி மாவட்டம்.
9385353605
சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube, Telegram, Instagram
