நவ. 26 : பொது வேலைநிறுத்தப் போராட்டம் || பு.ஜ.தொ.மு – மக்கள் அதிகாரம் பங்கேற்பு

நவம்பர் 26 அன்று இந்தியா முழுவதும் தொழிலாளர்கள் மற்றும் விவசாயிகள் பொது வேலைநிறுத்தப் போராட்டத்தை அறிவித்தனர். அதன் அடிப்படையில் பல்வேறு புரட்சிகர தொழிற்சங்கங்களும், அமைப்புகளும் தமிழகத்தில் போராட்டங்களை நடத்தின.

2020 நவம்பர் 26, அகில இந்திய தொழிற்சங்கங்கள் வேலை நிறுத்த போராட்டத்தை புதிய  ஜனநாயகத் தொழிலாளர் முன்னணி முன்னெடுத்தது. இதன் ஒரு பகுதியாக திருவள்ளூர் மேற்கு மாவட்டத்தில் இயங்கி வரும் இணைப்பு சங்கமான டி.ஐ மெட்டல் ஃபார்மிங் தொழிலாளர்கள் சங்கத்தின் சார்பாக ஆலைவாயில் ஆர்ப்பாட்டம் நடைபெற்றது. இந்த ஆர்ப்பாட்டத்திற்கு சங்கத்தின் தலைவர் தோழர் ச.மகேஷ்குமார் தலைமை தாங்கினார். பு.ஜ.தொ.மு மாநில தலைமைக்குழு உறுப்பினரும், டி. ஐ மெட்டல் பார்மிங் தொழிலாளர்கள் சங்கத்தின் சிறப்பு தலைவருமான தோழர் பா. விஜயகுமார் கண்டன உரையாற்றினர். அடாத காற்று, விடாத மழையிலும்  திரளான தொழிலாளர்கள் கலந்து கொண்டு தங்களது, போராட்ட உணர்வை வெளிப்படுத்தினர். ஆர்ப்பாட்டத்தின் இறுதியில் சங்கத்தின் பொருளாளர் தோழர் மு. சரவணன் நன்றியுரை கூறினார்.

தகவல் : புதிய ஜனநாயத் தொழிலாளர் முன்னணி, திருவள்ளூர் மேற்கு மாவட்டம்.

இன்று (26.11.2020) நாடு தழுவிய பொது வேலை நிறுத்தத்தை ஆதரித்து ஏ ஐ கே எஸ் சி சி விவசாயிகள் கூட்டமைப்பு சார்பாக தர்மபுரி தலைமை தபால் நிலையம் அருகே ஆர்ப்பாட்டம் நடைபெற்றது. இந்த ஆர்ப்பாட்டத்தில் போராட்ட ஒருங்கிணைப்பாளர் தோழர்  அர்ஜுனன் தலைமை தாங்கினார். அரூர் சட்டமன்ற  தொகுதியின் முன்னாள் சட்டமன்ற உறுப்பினர் தோழர் டில்லிபாபு மற்றும் மக்கள் அதிகாரத்தின் தர்மபுரி மண்டல ஒருங்கிணைப்பாளர் தோழர் முத்துக்குமார் ஆகியோர் உரையாற்றினர்.