காசாவில் பாலஸ்தீன மக்களைப் படுகொலை செய்யத் துவங்கியதிலிருந்து இஸ்ரேலின் இனப்படுகொலையை மறைத்து பாலஸ்தீனத்திற்கு எதிராக போலிச் செய்திகளை சமூக ஊடகத்தில் பரப்புவதற்கு சமூக ஊடக பிரபலங்களுக்கு இஸ்ரேலின் ‘டிஜிட்டல் ஆர்மி’ பணம் கொடுத்து வருவது அம்பலமாகியுள்ளது. இதற்காக சமூக ஊடகங்களில் செல்வாக்கு செலுத்தி வரும் கணக்குகளுக்கு (Media Influencers) இஸ்ரேல் அரசு சார்பில் அனுப்பப்பட்ட மின்னஞ்சல் மற்றும் மெசேஜ்களின் ஸ்கிரீன் ஷாட்கள் (screen shot) வெளியாகியுள்ளன.
காசா பகுதியை இஸ்ரேல் ராணுவம் முற்றுகையிட்டு பாலஸ்தீனர்களின் வீடுகள், அவர்கள் பாதுகாப்பு தேடி தஞ்சம் புகுந்த மருத்துவமனைகள், தேவாலயங்கள், மசூதிகள், ஆம்புலன்ஸ் என அனைத்து இடங்களிலும் குண்டுகளை வீசி அழித்து வருகிறது. மேலும் அங்கு வாழும் பாலஸ்தீனர்களுக்கு அத்தியாவசியமான உணவு, குடிநீர், மின்சாரம், எரிபொருள், மருத்துவப் பொருட்களைத் தடுத்து சர்வதேச விதிகளை மீறி, இனப்படுகொலையில் ஈடுபட்டு வருகிறது.
இஸ்ரேல் தனது போர் குற்றங்களையும் இனப்படுகொலையையும் மறைத்து உலக மக்களின் அனுதாபங்களைத் தனது பக்கம் திருப்ப வேண்டும் என்பதற்காகவும், தனது பயங்கரவாதத்தை நியாயப்படுத்திக் கொள்வதற்கும் போலி பிரச்சாரங்களை மேற்கொள்வதற்காக, உலகளவில் சமூக ஊடகத்தில் அதிக செல்வாக்கு செலுத்தி வரும் நபர்களை அணுகி அவர்கள் மூலம் பல போலி செய்திகளை பரப்பிவருகிறது. அப்படி போலிப் பிரச்சாரத்திற்காக அணுகும் நோக்குடன் அனுப்பப்பட்ட மின்னஞ்சல்களில் ஒன்று கசிந்துள்ளது.
இஸ்ரேலின் போலிப் பிரச்சாரக் குழு #HAMASisISIS மற்றும் #StandWithIsrael என்ற ஹேஷ்டேக்குகளுடன் எக்ஸ் உள்ளிட்ட சமூக வலைத்தளங்களில் வீடியோக்களை வெளியிட்டு வருகிறார்கள் என்பதும் கிம் கர்தாஷியன், மடோனா, கேல் கடோட், கேசி நீஸ்டாட் மற்றும் பல பிரபலங்கள் ஏற்கனவே இப்போலிப் பிரச்சாரத்தில் இணைந்துள்ளனர் என்பதும் அம்பலமாகியுள்ளது.
படிக்க: இஸ்ரேலால் இனப்படுகொலை செய்யப்படும் பாலஸ்தீன மக்கள்: இரட்டைவேடம் போடும் ஐநா சபை
ஹமாஸை பயங்கரவாதிகளாகவும், இஸ்ரேலில் 40 குழந்தைகளின் தலையை கொய்து ஹமாஸ் அமைப்பினர் கொலை செய்துள்ளனர் என்றும் போர் துவங்கிய போது பொய் பிரச்சாரத்தை பரப்பியது இவர்கள்தான்.
இந்நிலையில் சில சமூக ஊடகப் பிரபலங்கள், இஸ்ரேலை அம்பலப்படுத்தியும் உள்ளனர். சாரா வாட்சன் என்பவர் பாலஸ்தீனத்திற்கு ஆதரவாக தனது டிக் டாக் (TikTok) பக்கத்தில் வீடியோ வெளியிட்டு இருந்தார். அந்த ஆதரவை திரும்பப் பெற வேண்டும் என இஸ்ரேலிய அரசு தன்னை அணுகி வற்புறுத்தியதாகவும், அதற்காக லஞ்சம் கொடுக்க முன் வந்ததாகவும் தனது ட்விட்டர் பக்கத்தில் குற்றம் சாட்டியுள்ளார். மேலும், “நீங்கள் நினைப்பது நடக்காது, என் அறநெறியை உங்களால் விலைக்கு வாங்க முடியாது” என அவர் ஒரு வீடியோவில் தெரிவித்துள்ளார்.அதுமட்டுமல்லாமல் பாலஸ்தீன மக்களுக்கு ஆதரவாக அவர் இன்ஸ்டாகிராமில் பதிவிட்ட பதிவையும் நீக்குமாறு வலியுறுத்தப்பட்டுள்ளது. அதற்காகவும் ஒரு பெரிய தொகையை பேரம் பேசியதாகவும் அதையும் தான் மறுத்துவிட்டதாகவும் அவர் வீடியோவில் தெரிவித்துள்ளார்.
ISRAEL PAYING INFLUENCERS THOUSANDS OF DOLLARS TO POST ON SOCIAL MEDIA pic.twitter.com/CmvDoJRtPb
— Sulaiman Ahmed (@ShaykhSulaiman) October 20, 2023
சுலைமான் அகமது என்ற மற்றொரு சமூக ஊடக பிரபலம், இஸ்ரேல் அரசு சமூக ஊடகத்தில் செல்வாக்கு செலுத்துபவர்களுக்கு ஒவ்வொரு வீடியோவிற்கும் கிட்டத்தட்ட 1 லட்சம் ரூபாய் ($ 1,000) செலுத்துகிறது என்பதை வெளிப்படுத்தியுள்ளார். “இது தகவல்களை கட்டுப்படுத்தி உண்மைகளை திரிப்பதாகும்; அமெரிக்காவைப் போலவே உலகில் உள்ள மக்களுக்கு நீங்கள் (இஸ்ரேலிய அரசு) செய்யும் கொடூரமான விஷயங்களை நியாயப்படுத்துவது” என்று அவர் இஸ்ரேலின் செயல்பாட்டை கடுமையாக விமர்சித்துள்ளார்.
நன்றி: தீக்கதிர்
சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube
