வெயிலிலும் கொட்டும் மழையிலும் குழந்தைகள், இளம்பெண்கள், தாய்மார்கள், மாணவர்கள், இளைஞர்கள், பெரியவர்கள் என நூற்றுக்கணக்கில் “FREE PALESTINE” உள்ளிட்ட உணர்வுப்பூர்வமான முழக்கங்களோடு நேற்றைய தினம் (அக்டோபர் 29) மே 17 இயக்கத்தினரால் ஒருங்கிணைக்கப்பட்டு சென்னையில் நடைபெற்ற பேரணி, இஸ்ரேல் ஆதரவு நிலைப்பாட்டை எடுத்திருக்கும் பாசிச மோடிக்கு எதிரான மற்றும் தமிழ்நாட்டில் நடைபெற்ற பாலஸ்தீன மக்களுக்கு ஆதரவான நிகழ்வுகளில் மிக முக்கியமான ஒன்றாகும்.
முழக்கங்களை மக்களே உருவாக்கினார்கள், அவர்களே முழக்கமிட்டார்கள், அவர்களே மற்றவர்களுக்கு உதவினார்கள். அவர்கள் ஒவ்வொருவரிடத்திலும் உணர்ச்சி மழையாய் பொழிந்தது. அதன் முன் மழையெல்லாம் தூசாகிப் போனது. கொட்டும் மழையிலும் கூட உறுதியான முழக்கங்களை அவர்கள் தளர விடவில்லை.
கிட்டத்தட்ட இரண்டு கிலோ மீட்டர் தூரம் மக்கள் பேரணியாகச் சென்றனர். மக்கள் பங்கெடுப்புக்கு இப்பேரணி ஒரு எடுத்துக்காட்டு.
உழைக்கும் வர்க்கம், நடுத்தரவர்க்கம், மேல் தட்டு நடுத்தர வர்க்கம் என அனைவரும் ஒரே குரலில் முழங்கினார்கள் “SAVE PALESTINE” என்று. அப்பாவி குழந்தைகள், மக்கள் கொல்லப்படுகிறார்கள் என்ற இரக்கத்தின்பால் மட்டுமல்ல; பாலஸ்தீனத்தின் தேசிய இன உரிமைக்காகவும் இனப்படுகொலையாளி இஸ்ரேலுக்கு ஆதரவாக செயல்படும் ஏகாதிபத்திய நாடுகளுக்கு எதிராகவும் மோடிக்கு எதிராகவும் தங்களுடைய அரசியலை முன்வைத்த கூட்டம் அது. இதில் மக்கள் அதிகாரம் தோழர்களும் கலந்து கொண்டனர். மக்கள் அதிகாரம் மாநிலச் செயலாளர் தோழர் வெற்றிவேல் செழியன் உரையாற்றினார். கண்டன ஆர்ப்பாட்டத்தில் பேசிய ஒவ்வொருவரும் தங்களுடைய கருத்துகளை உணர்வுப்பூர்வமாக முன் வைத்தனர்.
மக்களைத் திரட்ட முடியாது, மக்கள் வர மாட்டார்கள் என்ற அவநம்பிக்கைக்கு மாற்றாக சரியான கோரிக்கைக்கு சரியான நேரத்தில் மக்களைத் திரட்ட முடியும் என்பதை அறிவிக்கும் கூட்டமாகவே அது இருந்தது.
இந்த பேரணியையும் கண்டன ஆர்ப்பாட்டத்தையும் ஏற்பாடு செய்திருந்த மே 17 இயக்கத் தோழர்களுக்கு வாழ்த்துக்கள்.
பாலஸ்தீனத்தை ஆதரித்துப் பாடிய ம.க.இ.க சிவப்பு அலை கலைக்குழு தோழர் தீரன்
பாலஸ்தீனத்திற்கு ஆதாரவாக முழக்கமிடும் மக்கள்
பேரணியின் முழு காணொளி
சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube
