(சாதியக் கொடூரங்களால் பாதிப்புக்குள்ளான ஒரு மாணவனுக்கும் – ஒரு கம்யூனிஸ்ட் தோழருக்குமான உரையாடலே, இந்தக் கவிதை)
என்ன செய்ய? நான்! என்ன செய்ய?
என்ன செய்ய? நான்! என்ன செய்ய?
குடிக்கிற தண்ணித் தொட்டியில,
மலத்தக் கலக்குறான் – என்ன செய்ய?
படிக்கிற மாணவன் மூஞ்சியிலே,
மூத்திரத்த அடிக்குறான்–என்ன செய்ய?
சாதிப்பெருமையை பேசிக்கிட்டு மகளோட,
கழுத்தையே அறுக்கிறான் – என்ன செய்ய?
காட்டுசுள்ளிப் பொருக்கபோனா கம்பியில,
கரண்ட வைக்கிறான் – என்ன செய்ய?
என்ன செய்ய? நான்! என்ன செய்ய?
சொல்லுங்க, தோழரே! என்ன செய்ய?
படிக்கிற சகமாணவனின் ரத்தத்த,
படியில தெறிக்கவுடுறான் – என்ன செய்ய?
பட்டம் படிச்சு மேலபோனா!
கோட்டாவுல வந்தவங்குறான் – என்ன செய்ய?
பசிக்கொடுமையில வேலைக்கு அக்காபோனா!
படுக்கைக்கு அழைக்குறான் – என்ன செய்ய?
பெண்கள் மீது தினந்தோறும்,
பாலியல்வன்முறைய நடத்துறான் – என்ன செய்ய?
என்ன செய்ய? நான்! என்ன செய்ய? சொல்லுங்க, தோழரே! என்ன செய்ய?
குடிக்கிற டீ கிளாசுக்குள்ள!
பிரிவினைய பண்ணுறான் – என்ன செய்ய?
பொதுக்கிணத்துல குளிக்க நான்போனா!
பொரடியில்கல்லாள அடிக்கிறான் – என்ன செய்ய?
விசேஷத்துக்கு நாங்கபோனா தரையில, தனிபந்திப் போடுறான் – என்ன செய்ய?
கும்பிட கோயிலுக்கு நானும்போனா!
நுழைவாயில்லே நிறுத்துறான் – என்ன செய்ய?
என்ன செய்ய? நான்! என்ன செய்ய? சொல்லுங்க, தோழரே! என்ன செய்ய?
சாக்கடையத் தூர்வாரும் எங்கப்பனையும்,
சாக்கடையாப் பாக்குறான் – என்ன செய்ய?
ஊருக்குள்ள வாழ எங்களோட,
உரிமையப் பறிக்குறான் – என்ன செய்ய?
அடக்கம் பண்ண சுடுகாட்டுல,
நிலம்தர மறுக்குறான் – என்ன செய்ய?
இந்த வலியெல்லாம் மாறனும் – என்ன செய்ய?
எங்க கவலைகள் தீரனும் – என்ன செய்ய?
சொல்லுங்க, தோழரே! கேட்டுக்குறன்! பொதுச்சொத்தா எல்லாத்தையும் மாத்திக்கிறேன்!
கேளு தோழனே! நீ கேளு!
கேட்பத நல்லா உரக்கக்கேளு!
நம்முடைய ஆசான்கள் சொல்லி வச்ச! பொதுவுடமை சித்தாந்தக் கருத்துக் கேளு!
வறுமை ஒழியனும்!
வர்க்கம் அழியனும்!
சகோதரத்துவம் பிறக்கனும்!
சமத்துவம் வளரனும்!
பகையெல்லாம் மறையனும்!
பஞ்சம் தீரனும்!
பசியும் நிறையனும்!
எல்லோருக்கும் எல்லாம்,
பொதுவாய் இங்கே கிடைக்கனும்!
எப்போதுமே நமக்குப்
பொன்னுலகாய் அது அமையனும்!
ஒன்றே தான் தீர்வு உள்ளபடி – அது மார்க்சியம் தந்த கம்யூனிச வழி!
லட்சியம் நோக்கி செல்வோம்,
நாம் முன்னோடு!
லட்சம் பேர்கள் வருவார்கள்,
நாளை நம்மோடு!!
தென்றல்
சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube