கர்நாடகா : ஜனநாயகத்தைக் காப்பது சொகுசு விடுதிகளே !

ட்விட்டர் ஜோசியர் ஒருவரின் கணிப்புப்படி, பாஜக இன்று அரசமைக்கும் அல்லது பாஜக சில மாதங்களுக்கு பின்னர் அரசமைக்கும்.

நேற்றைய கர்நாடகத் தேர்தல் வாக்கு எண்ணிக்கை முடிவுகள், அரசியல்வாதிகளை சீட்டு நுனியில் அமரச் செய்திருந்த அதே அளவிற்கு சமூக வலைத்தள பயனர்களையும் பரபரப்பாக்கியிருந்தது. தொடக்கத்தில் பாஜக முன்னிலை வகித்து வந்ததில் தொடங்கி, இறுதியில் காங்கிரஸ் – மதசார்பற்ற ஜனதாதள கூட்டணி குறித்த செய்தி வந்த பின்பும் தொடர்ந்து இந்திய ஜனநாயகத்தின் இன்றைய நிலையையும், பாஜக மேற்கொள்ளவிருக்கும் அதிரடிகளையும் எள்ளி நகையாடியிருக்கின்றனர் ட்விட்டர்வாசிகள்.

அவற்றுள் சில உங்கள் பார்வைக்கு …

சுஜேஷ்:

தாயே மின்னணுவாக்கு இயந்திரமே, எல்லாமே உன் கையிலதாம்மா இருக்கு …… #KarnatakaVerdict

தமிழகத்தின் ‘மிக்சர்’ புகழ் துணை முதல்வர் ஓ.பன்னீர்செல்வம் மதியம் 1.30 மணியளவிலேயே தென்னிந்தியாவிற்குள் பாஜக காலடி வைத்ததற்கு அமித்ஷா ‘ஜி’ -க்கு வாழ்த்துகள் தெரிவித்துள்ளார்.

ஓ.பன்னீர்செல்வம்:

இந்த சந்தோசமான தருணத்தில், தென்னிந்தியாவினுள் பாஜகவின் பிரம்மாண்டமான நுழைவிற்கான முன்னோட்டமாக, கர்நாடகத் தேர்தலில் பாஜக பெற்றிருக்கும் குறிப்பிடத் தகுந்த வெற்றிக்கு எனது வாழ்த்துகளையும் பாராட்டுகளையும் தெரிவித்துக் கொள்கிறேன்.

*****

மெஹ்பூபா முஃப்தி:

கர்நாடகாவில் நட்சத்திர செயல்திறனைக் காட்டிய பாஜகவிற்கு எனது இதயங்கனிந்த வாழ்த்துக்கள்.

*****

இவ்வாறு பாஜக ஆதரவு பிரபலங்கள், சமூக வலைத்தளங்களில் பாஜகவிற்கு வாழ்த்து மழைகளைப் பொழிந்து கொண்டிருக்கையில், படிப்படியாக பாஜக முன்னணியில் இருந்த தொகுதிகளின் எண்ணிக்கை குறைந்தது. இடையே காங்கிரசு, மதசார்பற்ற ஜனதாதளத்திற்கு ஆதரவு தெரிவித்து, கூட்டணி ஆட்சிக்கும், குமாரசாமி முதல்வராகவும் ஆதரவு தெரிவித்தது. பாஜக 104 தொகுதிகள் வெற்றி பெற்றது. ஆட்சி அமைக்க 113 சீட்டுகள் தேவையான நிலையில் சமூக வலைதளங்களில் இந்திய ‘ஜனநாயகத்தின்’ உண்மையான சொரூபம் துகிலுறியப்பட்டு அம்பல மேடையில் ஏற்றப்பட்டது.

சுபாரிமேன்:

அமித்ஷா மதசார்பற்ற ஜனதாதள எம்.எல்.ஏ.-களை கூடையில் சேர்த்து வாங்கிக் கொண்டிருக்கிறார்.

*****

ஜிதேந்தர் சிங்:

அமித்ஷா இப்போது….

*****

சுனில் – தி கிரிகெட்டர்:

தற்போது (வெற்றி) பாஜக-விடமிருந்து தேவகவுடாவிற்கு.. #KarnatakaVerdict

*****

மனோகரன் கார்திக்:

மதசார்பற்ற ஜனதாதள எம்.எல்.ஏ.-க்களின் தற்போதைய மனநிலை
#KarnatakaVerdict #KarnatakaElections2018

*****

காங்கிரஸ் – ஜே.டி.எஸ். கூட்டணி அறிவிப்பைத் தொடர்ந்து வெற்றிக் களிப்பில் இருந்த பாஜகவினரை அவர்களது கொண்டாட்டங்களிலிருந்தே வாரியெடுத்தனர் டுவிட்டர்வாசிகள்.

மேக்நாத்:

பாஜகவினரே, கர்நாடக தேர்தல் முடிவுகள் உங்களுக்குச் சாதகமாக இன்று முடிவடையவில்லை என்றால் வெற்றிக் கொண்டாட்ட்த்திற்காக நீங்கள் வாங்கி வைத்திருந்த லட்டுக்களை வீசிவிடாதீர்கள்.
தயவுசெய்து பசித்தவர்களுக்கு அதைக் கொடுத்து, அவர்களுக்கு ஒரு நன்னாளைக் கொடுங்கள்.

*****

மஹேஷ்:

1 மணிக்கு முன்னால் …….             1 மணிக்குப் பின்னால் ……..

*****

மயுர் எஸ். குல்கர்னி :

இந்த முறை பாஜகவின் நிலை !! … #SayNoToBJP & never say #IamWithModi #KarnatakaVerdict #KarnatakaElections2018 #KarnatakaElectionResults2018 #KarnatakaElection #KarnatakaResults #KarnatakaPollResults

*****

கவுதம் பாஷின்:

அனைத்துக் கட்சிகளும் பட்டாசு வெடித்து, லட்டு  விநியோகித்த நாட்களில் இதுவும் ஒன்று. பாஜக மதிய வேளையில் செய்தது. காங்கிரசும், மதசார்பற்ற ஜனதாதளமும் இப்போது செய்கின்றனர். அருமையான காமடி!

*****

துர்கா சென்குப்தா:

கர்நாடகா தேர்தல் முடிவுகளை வாசிப்பது டென்னிஸ் போட்டியைப் பார்ப்பது போன்று உள்ளது.

*****

ட்விட்டர்வாசிகள் நடைபெறவிருக்கும் குதிரைபேரத்தை கணக்கில் கொண்டு கர்நாடகத் தேர்தலில் இறுதியில் வெல்லப்போகிறவர்கள் சொகுசு விடுதிகளின் உரிமையாளர்களே என ட்விட்டுகளைப் போடத் தொடங்கிவிட்டனர்.

ரமேஷ் ஸ்ரீவத்ஸ்:

சொகுசு விடுதி உரிமையாளர் தான் வெற்றியாளர் போலத் தெரிகிறது

*****

டேனியல் செய்ட்:

இன்று ஏதோ ஒரு சொகுசு விடுதிக்கு பெரிய வியாபாரம் காத்திருக்கிறது.

*****

ஓமர் அப்துல்லா:

இப்போது, பெங்களூரு சுற்று வட்டாரத்தில் நான் ஒரு சொகுசு விடுதிக்கு உரிமையாளராக இருந்திருக்க வேண்டும் என விரும்புகிறேன்

*****

நவோமி டட்டா:

”இறுதி நடவடிக்கை” என்ற வார்த்தைக்குப் பொருத்தமான “the last resort” (கடைசி சொகுசு விடுதி) என்ற சொற்றொடரை ஆங்கில மொழிக்கு வழங்கியது கர்நாடக அரசியல்தான்.

*****

ரோஹினிசிங்:

சொகுசு விடுதி உரிமையாளர்களுக்கு நன்னாள் !

பாஜக எப்படியெல்லாம் ஆட்சியைப் பிடிக்க குறுக்குவழிகளைத் தேடிப் பிடிக்கும் என்பதையும் ட்விட்டர்வாசிகள் தங்கள் அனுபவ அறிவிலிருந்து போட ஆரம்பித்தனர்.

ரோஹின் தர்மகுமார்:

1. காங்கிரஸ் + மதசார்பற்ற ஜனதாதளம் ஆட்சியமைக்க உரிமை கோரல்
2. கவர்னர் பாஜகவை அழைத்தல்
3. கவர்னர் பாஜகவிற்கு பெரும்பான்மையை நிரூபிக்க ஒரு வார கால அவகாசமளித்தல்
4. சொகுசு விடுதிகள் விடுமுறை
5. மதசார்பற்ற ஜனதாதளம் பிரிதல்
6. பதவியேற்றல்.
சரிதானே ?

*****

சாகர்:

கர்நாடகாவில் இரண்டு விசயங்கள் நடக்கும் வாய்ப்புகள் உள்ளன
1. பாஜக இன்று அரசமைக்கும்
2. பாஜக சில மாதங்களுக்கு பின்னர் அரசமைக்கும்

*****

ராஃப்ல் காந்தி:

அந்த குண்டு மனிதன் அலைபேசியில் பேசிக் கொண்டிருக்கும் வரை இது முடிவதில்லை

– வினவு செய்திப் பிரிவு

 

சந்தா