இந்துத்துவ பயங்கரவாதிகளால் படுகொலை செய்யப்பட்ட கவுரி லங்கேஷ் கொலை வழக்கு விசாரணையில் சிறப்பு வழக்கறிஞராக, இந்துத்துவ கும்பலை எதிர்த்து போராடி வருபவர் வழக்கறிஞர் பாலன்.
குடியுரிமை திருத்த சட்டம் குறித்த அவரது ஆங்கில பேட்டியை தமிழாக்கம் செய்து இங்கே கொடுக்கிறோம். பாருங்கள்… பகிருங்கள்…
இந்திய மக்களாகிய நாங்கள் குடியுரிமை திருத்தச் சட்டம் மற்றும் தேசிய குடிமக்கள் பதிவேட்டை எதிர்க்கிறோம். ஏனெனில், இது ஆர்.எஸ்.எஸ்.-ன் அகண்ட பாரத திட்டத்தின் ஒரு பகுதி. அவர்கள் வகுப்புவாத அரசியலின் மூலம் மக்களைப் பிரிக்க நினைக்கிறார்கள்.
முதலில் அவர்கள் இஸ்லாமியர்களைக் குறிவைக்கிறார்கள். அதே சமயத்தில் அவர்கள் தலித்துகளையும் குறிவைக்கிறார்கள். பின்னர், கம்யூனிஸ்ட்டுகள், தொழிலாளர்கள், விவசாயிகள், பழங்குடியினரைக் குறிவைப்பார்கள்.
இந்த தேசிய குடிமக்கள் பதிவேடு என்பது முட்டாள்தனமான திட்டம். தற்போது கொண்டுவரப்பட்டுள்ள குடியுரிமை திருத்தச் சட்டம், 1935-ம் ஆண்டு ஜெர்மனியில் ஹிட்லர் கொண்டுவந்த நூரம்பர்க் சட்டங்களுக்கு நிகரானது. பொருளாதாரப் பிரச்சினைகளில் இருந்து மக்களின் கவனத்தைத் திருப்புவதே இதன் மொத்த நோக்கமாகும். தற்போது இந்தியாவின் மொத்த உள்நாட்டு உற்பத்தி 1.5% மட்டும்தான் இருக்கிறது. இந்தியாவின் ஒவ்வொரு தொழில்துறையும் முடங்கியுள்ளது. வேலைவாய்ப்பு எங்கும் இல்லை. ஆகவே இது மக்களை திசை திருப்பும் வேலை.
இந்தியா முழுவதும் தேசிய குடிமக்கள் பதிவேட்டை அமல்படுத்த வேண்டுமெனில் சுமார் ரூ. 6 இலட்சம் கோடி தேவைப்படும். அசாமில் மட்டும் தேசிய குடிமக்கள் பதிவேட்டை அமல்படுத்த அரசாங்கம் 1,500 கோடி ரூபாய் செலவிட்டுள்ளது. மொத்த மக்களும் 10,000 கோடி ரூபாய்க்கும் அதிகமான தொகையை செலவழித்துள்ளனர். இப்போது முதல் கேள்வி என்னவென்றால், இத்திட்டத்தை இந்தியா முழுவதும் 130 கோடி மக்களுக்கும் அமல்படுத்தினால் எவ்வளவு செலவாகும் ?
தற்போது கொண்டுவரப்பட்டுள்ள குடியுரிமை திருத்தச் சட்டம் அரசியல் சாசனத்துக்கு விரோதமானது. சட்டத்துக்கு முன்னர் அனைவரும் சமம் என்ற அடிப்படைக்கு எதிரானது. இச்சட்டம் முசுலீம்களை விலக்குகிறது. இந்தியாவைத் தவிர பிற நாடுகளைச் சேர்ந்த சிறுபான்மையினரை ஏற்றுக் கொள்வதாகக் கூறுகின்றனர். எனில் பர்மாவில் பவுத்தர்கள்கால் துன்புறுத்தப்படும் சிறுபான்மையின மக்களாகிய ரோகிங்கிய மக்களை ஏன் சேர்த்துக் கொள்ளமுடியாது என்கிறார்கள் ?
அனைத்து நாடுகளில் இருந்தும் இடம்பெயர்ந்து வருபவர்களுக்கு மத, சாதி, இன பாகுபாடு இல்லாமல் அனைவருக்கும் குடியுரிமை வழங்குங்கள் என்கிறோம்.
படிக்க :
♦ குடியுரிமை திருத்தச் சட்டம் : இந்துக்களின் உரிமையையும் பறிக்கும் சதி | காணொளி
♦ மோடியின் குடியுரிமை சட்டத்துக்கு இந்து தமிழ் திசையின் மானங்கெட்ட ஜிஞ்சக்கு ஜிஞ்சா !
அவர்கள் 6 மதங்களுக்கு மட்டும் அனுமதி அளிப்பதாகச் சொல்கிறார்கள். புத்த மதம், ஜைன மதம், பார்சி, சீக்கிய மதம், இந்து மதம், கிறுத்துவ மத மக்களை அனுமதிப்பதாகக் கூறுகிறார்கள். கிறுத்துவ மக்கள் வெகு குறைவானோரே.
மொத்தத்தில் அவர்கள் முசுலீம்களை மட்டும் ஒதுக்குகிறார்கள். இது பாஜக ஆர்.எஸ்.எஸ்.-ன் வகுப்புவாத நிகழ்ச்சி நிரலின் ஒரு பகுதியாகும்.
இது ஏற்றுக் கொள்ள முடியாதது. அரசின் மதசார்பற்ற தன்மையை பாதுகாக்க வேண்டியது நமது கடமை. நமது அரசியல்சாசனத்தைப் பாதுகாக்க வேண்டியது நமது கடமை. அரசியல் சாசனத்தைப் பாதுகாப்பதே தேசப்பற்று நடவடிக்கை. அரசியல் சாசனத்தை சிதைப்பது நம்பிக்கை துரோகிகளின் வேலை.
கேள்வி : “தேசிய குடிமக்கள் பதிவேடு” நடைமுறைப்படுத்தப்பட்டால் முசுலீம்கள் பயம்கொள்ள பல விசயங்கள் இருக்கின்றன. ஆனால் அது ஆவணங்கள் அற்ற அனைத்து இந்தியக் குடிமக்களையும் பாதிக்கும் அல்லவா ? இதைப் பற்றி என்ன கருதுகிறீர்கள் ? இது எவ்வாறு முசுலீம் அல்லாதவர்களைப் பாதிக்கும் ?
பதில் : எனது பிறப்புரிமையை இவர்கள் எப்படி ஆவணங்களோடு சம்பந்தப்படுத்த முடியும் ? இது கட்டிடத் தொழிலாளர்கள் உட்பட சுமார் 42 கோடி தொழிலாளர்களை நேரடியாகப் பாதிக்கும். அவர்களுக்கு வீடு கிடையாது. நிலையான இடத்தில் வேலை கிடையாது. அவர்கள் அலைந்து திரிந்து கொண்டிருக்கிறார்கள்.
மூன்று மாதம் கர்நாடகா, 3 மாதம் ஆந்திரா, 3 மாதம் மும்பை என ஒவ்வொருமுறையும் வேலை தேடி அலைந்து திரிந்து கொண்டிருக்கிறார்கள். அவர்களிடம் என்ன ஆவணங்கள் இருக்கும் ?
அர்ஜுன் சென் குப்தா கமிட்டி அறிக்கையின் படி 84 கோடி பேர் ஒரு இடத்தில் 28 நாட்களுக்கு மேல் இருப்பதில்லை. இவர்களிடம் எந்த ஆவணங்களும் இருக்காது. ஆகவே இந்த தேசிய குடிமக்கள் பதிவேடும், குடியுரிமை திருத்தச சட்டமும் இந்துக்களுக்கும் எதிரானது.
கேள்வி : சரி, இப்படி தங்களது ஓட்டுவங்கியான இந்துக்களுக்கே எதிரானதை பாஜக ஏன் நடைமுறைப்படுத்துகிறது ?
பதில் : அவர்கள் சோறில்லை என்று கேட்டால், இவர்கள் இராமஜென்ம பூமியில் இராமன் கோவில் கட்டுவதாகக் கூறுகிறார்கள். மக்கள் நேரடியாக சொர்க்கத்திற்குச் செல்வது குறித்துப் பேசுகிறார்கள்.
கேள்வி : இதை எப்படி எதிர்க்கப் போகிறீர்கள் ?
பதில் : மக்கள் போராடிக் கொண்டிருக்கிறார்கள். அமைதியான வழியில், அமைதியற்ற வழியில் என தொடர்ந்து போராடுகிறார்கள். பல்வேறு போராட்ட வடிவங்களை எடுத்துக் கொள்கிறார்கள். அவர்களது போராட்டங்கள் விரிவடைந்து செல்கின்றன. மொத்த நாடே பற்றி எரிகிறது. இது இன்னும் பரவும்.
ஆனால் அமித்ஷா இதற்கு இறங்கிவருவது போல் தெரியவில்லை. “நீ போராடு, நாங்கள் சட்டத்தை அமல்படுத்துவோம்” என்கிறார். இது அமித்ஷாவுக்கும் மக்களுக்கும் இடையிலான சவால்.
கேள்வி : உங்களது இறுதி கோரிக்கை என்ன ?
பதில் : தேசிய குடிமக்கள் பதிவேட்டை விரட்டியடிக்க வேண்டும். குடியுரிமை திருத்த மசோதாவையும் சட்டத்தையும் விரட்டியடிக்க வேண்டும்.
தமிழாக்கம் : நந்தன்
