ஸ்க்ரிப்டை மாற்றுங்கள் ஜி
உங்கள் தேசபக்தி நாடகத்தில்
ஏதேனும் புதிய சம்பவங்களையோ
வசனங்களையோ சேருங்கள்

நீங்கள் ஒவ்வொரு முறையும்
அதே நாடகத்தின்
அதே வசனத்தை பேசத் தொடங்கும்போது
குழந்தைகள் அடுத்த வசனத்தைச் சொல்லி
சிரிக்கிறார்கள்

ஸ்க்ரிப்டை மாற்றுங்கள் ஜி
நீங்கள் ஜெயிக்க விரும்பும்போதெல்லாம்
தேச பக்தி
ஒரு மந்திரக்கோல் போலாகிவிடுகிறது
எல்லையில் நம் வீரர்கள் இறக்கிறார்கள்
உங்கள் விபரீத முடிவுகள் அம்பலமாகும்போது
தேச விரோதிகள்
நாட்டை ஊடுருவுகிறார்கள்

பயங்கர வாதிகள்
கருப்புப் பணத்தை
பயன்படுத்தாதிருக்கவே
எல்லாப் பணத்தையும் ஒழிக்கிறீர்கள்
ஒரு மாற்றமும் இல்லாமல்
இந்த நாடகம் அரங்கேறுகிறது

தலை நகரம் விவசாயிகளால்
முற்றுகையிடப்பட்டிருக்கிறது
உங்கள் வழக்கமான தந்திரங்களால்
அதை உடைக்க முடியவில்லை
அவர்கள் காந்தியின் பிள்ளைகள்
திடீரென உங்கள் அடியாள் ஒருவன்
உள்ளே ஊடுருவுகிறான்
குழப்பங்களை உருவாக்குகிறான்
உடனே அன்னிய சதிகாரர்கள்
ஊடுருவிவிட்டார்கள் என்று கதறுகிறீர்கள்
அது ஒரு போலிக்கதறல் என
எல்லோருக்கும் தெரியும்
எனக்கு மிகவும் அலுத்துவிட்டது

‘இதைப்பற்றி நாம் பேசினால் என்ன?’
என ஏதோ ஒரு தேசத்துப் பாடகி கேட்கிறாள்
உடனே இங்கிருந்து
ஒரு கிரிக்கெட் ஆட்டக்காரன்
தேசத்தின் இறையான்மைக்கு
ஆபத்து எனக் கதறுகிறான்
அது ஒரு போலிக் கதறல் என
எல்லோருக்கும் தெரியும்

போராட்டம் இப்போது
டெல்லி தெருக்களில் அல்ல
ட்விட்டரில் நடக்கிறது
இலட்சணக்கான விவசாயிகள்
குளிரில் வெட்ட வெளியில் கிடக்கிறார்கள்
சிலர் சாகிறார்கள்
அவர்களுக்கு முன்
முள்வேலிகளை அமைக்கிறீர்கள்
அவர்களுக்கு குடிக்க தண்ணீர் தர மறுக்கிறீர்கள்
அதனால் எல்லாம் இந்தியாவின் இறையாண்மைக்கு
எந்தப் பாதிப்பும் இல்லை
நீங்கள் சாவிகொடுத்த பொம்மைகள்
உங்கள் வாக்கியங்களை கக்குகின்றன

நீங்கள் வெட்கப்பட வேண்டும்;
விவசாயிகளுக்கு எதிராக
நீங்கள் ஒரு நடிகனை பயன்படுத்துவதற்கு
ஒரு நடிகையை பயன்படுத்துவதற்கு
ஒரு கிரிக்கெட் ஆட்டக்காரனை பயன்படுத்துவதற்கு
உண்மையில் நீங்கள்
இந்த தேசத்தையே
ஒரு நாடக மேடையாக்கி விட்டீர்கள்
ஒரு விளையாட்டு மைதானம் ஆக்கிவிட்டீர்கள்

ஸ்க்ரிப்டை மாற்றுங்கள் ஜி
ஒரு அன்னியர் உங்களை விமர்சிப்பதால்
உங்களுக்கு கோபம்வருவதை
நான் நம்பவில்லை
விமானங்கள் ஓடிக்கொண்டிருந்தவரை
நீங்கள் அன்னியர்களுடன்தான்
உரையாடிக்கொண்டிருந்தீர்கள்
அவர்களுடன்தான்
எப்போதும் செல்ஃபி எடுத்துக்கொண்டீர்கள்
அவர்களிடம்தான் போர் விமானங்கள் வாங்கினீர்கள்
அவர்களிடம்தான் குண்டூசிகள்
இறக்குமதி செய்ய
ஒப்பந்தங்கள் போட்டீர்கள்
அன்னிய முதலீடுகளோடு ஒட்டிக்கொண்டு
கொஞ்சம் அன்னியக் கருத்துக்களும்
வந்துவிடுகின்றன
சிந்திக்கும் மனிதர்கள்
எல்லாவற்றிற்கும் கருத்துக்கள்
கூறவே செய்கிறார்கள்
சிந்தனையற்ற தேசபக்தி
புண்படுவதை நம்மால் புரிந்துகொள்ள முடிகிறது

இறையாண்மை என்பது
அதிகாரத்தில் இருந்தல்ல
நீதியிலிருந்தே பிறக்கிறது
உங்களிடம் நீதியைத்தவிர
எல்லாமே இருக்கிறது

ஸ்க்ரிப்டை மாற்றுங்கள் ஜி
தேச பக்திக்கூவலால்
உங்கள் எல்லாகுற்றங்களையும்
மறைக்க இயலாது
அந்த நாடகத்தை அதிகமாகவே
நிகழ்த்திவிட்டீர்கள்
ஒரு உண்மையான ஆபத்து
தேசத்திற்கு வந்தால்கூட
யாரும் நம்பமுடியாதபடி
அதைக் கேலிக்கூத்தாக்கிவிட்டீர்கள்

ஸ்க்ரிப்டை மாற்றுங்கள் ஜி
போரடிக்கிறது
பயங்கரமாக தலை வலிக்கிறது

நன்றி : மனுஷ்ய புத்திரன்

disclaimer

2 மறுமொழிகள்

  1. தாங்கள் முதலிலல் தங்கள் தாய் தந்தையர் வைத்த பெயரை வைத்து எழுதுங்கள். ஊரை ஏமாற்றி தங்களை தமிழனாகக்காடௌடி மக்களை ஏமாற்றுவதை இனியாவது நிறுத்தலாமே

விவாதியுங்கள்

உங்கள் மறுமொழியை பதிவு செய்க
உங்கள் பெயரைப் பதிவு செய்க