நியூயார்க் நகரிலிருந்து வடக்கு நோக்கி ஒரு மணிநேர பயணத்தில் ஆண்டனி மான்சினெலி பணிபுரியும் முடி திருத்தும் கடை ஒன்று அமைந்துள்ளது. மான்சினெலி நண்பகல் 12 மணிக்குத் தொடங்கி இரவு 8 மணி வரையில் முடிவெட்டும் பணியை மேற்கொள்கிறார். இடையில் தனது மொபைலை நோண்டுவதோ ஓய்வெடுப்பதோ கிடையாது. அதில் என்ன சிறப்பு இருக்கிறது? தொடர்ந்து சோர்வுறாமல் பணி செய்யும் அவருக்கு வயது 107.

இத்தாலியின் நேப்பில்ஸ் நகரத்திற்கு அருகே 1911-ம் ஆண்டு பிறந்த மான்சினெலி, தனது 8-ம் வயதில் தனது குடும்பத்தினருடன் அமெரிக்காவிற்கு புலம் பெயர்ந்தார். தனது 11 வயதில் அருகில் உள்ள முடிதிருத்தகத்திற்கு பகுதி நேர பணியாளராகச் சென்றவர், 12-ம் வயதில் பள்ளிக் கல்வியை நிறுத்திவிட்டு முழுநேர முடி திருத்தகராகப் பணிபுரியத் தொடங்கினார் மான்சினெலி. அன்று ஒருமுறை முடிவெட்ட 25 செண்டுகள் பெற்ற மான்சினெலியின் இன்றைய சம்பளம், நபர் ஒன்றுக்கு 19 அமெரிக்க டாலர்கள் (சுமார் 1330 ரூபாய்).

“வேறு யாரையும் நான் என் முடியைத் தொடக் கூட விடமாட்டேன்”, என்கிறார் நியூயார்க்கைச் சேர்ந்த 56 வயதான ஜான் ஓ ரூர்க். இவர் மான்சினெலியின் தொடர்ச்சியான வாடிக்கையாளர். “கிட்டத்தட்ட நூறு ஆண்டுகளாக முடிவெட்டிக் கொண்டிருக்கிறார் மான்சினெலி” என்கிறார் ஓ’ ரூர்க்.

சுமார் 97 ஆண்டுகளாக முடி வெட்டிக் கொண்டிருக்கும் மான்சினெலி, முழுநேரமாகப் பணி புரிகிறார். பணி நேரமான 8 மணிநேரம் முழுவதும் தொடர்ந்து நின்று கொண்டே பணிபுரிகிறார்.

கட்டுக்கோப்பான உடல், தலை நிறைய முடி, வாய் நிறைய பற்கள், கண்ணாடி இல்லாத கண்கள் என மான்சினெலி தன்னைத் தானே ஆரோக்கியமாக பராமரித்து வருகிறார்.

இவரது 96-ம் வயதிலேயே உலகின் வயதான முடி திருத்தகர் என கின்னஸ் சாதனையில் இடம்பெற்றார். அதனைத் தொடந்து பலரும் அவரைத் தொடர்பு கொண்டு வாழ்த்துக்களை தெரிவித்தனர்.

அந்த முடி திருத்தகத்தின் உரிமையாளரான ஜேன் டினெஸ்ஸா, அவரது ஆரோக்கியத்தையும், வேலைத்திறனையும் வெகுவாக பாராட்டுகிறார். “அவர் ஒரு போதும் உடல்நலனின்றி காணப்பட்டதில்லை. ஒரு 20 வயது நபரை விட அதிகமாக முடி வெட்டுவார். இளைஞர்கள் பணி நேரத்திலும் செல்போனைப் பயன்படுத்துவார்கள். ஆனால் மான்சினெலி வேலையே கண்ணாக இருப்பார்,” என்கிறார்

இந்த வயதிலும் ஆரோக்கியமாக அயராது பணிபுரிவதன் இரகசியம் குறித்து மான்சினெனிலியிடம் கேட்கப்பட்ட போது, “ஸ்பகெத்தி பாஸ்தா”-வையே உணவாக எடுத்துக் கொள்கிறேன். அதனால் உடல் பருமன் ஆவதைத் தடுத்துக் கொள்கிறேன். நான் பிறர் வற்புறுத்துவதால்தான் மருத்துவரைச் சென்று பார்க்கிறேன். அங்கும் எனக்கு எந்த வலிகளும் இல்லை, எந்தப் பிரச்சினையும் இல்லை என்றே கூறுவேன்” என்று கூறுகிறார், மான்சினெலி.

107 வயதிலும், மான்சினெலி தனது பணிகளைத் தானே மேற்கொள்கிறார். தினமும் காலையில் 14 ஆண்டுகளுக்கு முன்னர் இறந்த தனது மனைவி கார்மெல்லாவின் கல்லறைக்குச் சென்றுவிட்டே பணிக்கு செல்கிறார். தனது வாகனத்தைத் தானே ஓட்டுவதில் தொடங்கி, தனது உணவுகளை தானே சமைத்துக் கொள்வது, தனது பில்களைத் தானே கட்டுவது, தனது துணிகளைத் தாமே துவைப்பது, தனது வீட்டுத் தோட்ட வேலைகளை தாமே மேற்கொள்வது என தனது வேலைகளைத் தானே செய்வதில் விடாப்பிடியான குணம் கொண்டவராக இருக்கிறார்.

”எப்போதுமே, தாம் வெட்டிய முடிகளைப் பிறரை பெருக்க விடமாட்டார். பல்வேறு சமயங்களில், தனது முடியைக் கூட தானே வெட்டிக் கொள்வார்” என்கிறார் மான்சினெலியின் மகன், பாப் மான்சினெலி.

முடி திருத்தகத்திற்கு வரும் பலரும், “நான் என்ன மருந்து எடுத்துக் கொள்ள வேண்டும்?, நான் என்ன உணவு எடுத்துக் கொள்ள வேண்டும்? வயது குறைக்கும் க்ரீம் என்ன உபயோகிக்க வேண்டும்?” என மான்சினெலியைத் துளைத்துக் கேள்வி கேட்கின்றனர். ஆனால் இவை எதுவும் இன்றியே அவர் துடிப்புடன் செயல்படுகிறார்” என்கிறார் ஜேன் டினேஸ்ஸா.

படிக்க:
நூல் அறிமுகம் : எங்கள் ஒரு நாள் குடும்ப வாழ்க்கை – ஜென்னி மார்க்ஸ்
அமெரிக்காவை நோக்கி ஹோண்டுராஸ் தொழிலாளிகள் நெடும் பயணம்

பல பத்தாண்டுகளில் மாறிவிட்ட சிகை அலங்கார முடி வெட்டுகளுக்கு தன்னை பழக்கப்படுத்திக் கொண்டிருக்கிறார் மான்சினெலி. பல வாடிக்கையாளர்கள் இவரிடம் 50 ஆண்டுகளுக்கும் மேலாக முடி வெட்டிக் கொண்டிருக்கின்றனர். “எனக்கு சில வாடிக்கையாளர்கள் உண்டு. நான் அவர்களது அப்பா, தாத்தா, கொள்ளுத்தாத்தா என 4 தலைமுறையினருக்கு முடி வெட்டியிருக்கிறேன்” என்கிறார் மான்சினெலி.

வினவு செய்திப் பிரிவு

தனது தொழில் தன்னை எப்போதும் பரபரப்பாகவும் உற்சாகமாகவும் வைத்திருப்பதுதான் 107 வயதிலும் தனது பணியை விடாமல் தொடர்வதற்கான ஒரே காரணம் என்கிறார் மான்சினெலி.

உழைப்பையே துன்பமாகவும், தன்னைப் பராமறித்துக் கொள்வதையே மாபெரும் தியாகமாகவும் கருதுகின்ற இருபத்தியோராம் நூற்றாண்டு நடுத்தர வர்க்கம் இந்தப் பெரியவரின் உழைப்பை பார்க்க வேண்டும். விரும்பிச் செய்கின்ற உழைப்பு, சக மனிதர்களுக்கு சேவை செய்கின்றஉழைப்புக்கு ஒருபோதும் சலிப்போ, விரக்தியோ வருவதில்லை என்பதை தோழர்களும் கற்றுக் கொள்ள வேண்டியிருக்கிறது.

செய்தி ஆதாரம்:
The world’s oldest barber is 107 and still cutting hair full time

சந்தா செலுத்துங்கள்

அச்சுறுத்தும் அதிகார வர்க்கத்தை அச்சமின்றி எதிர்க்கும் வினவு தளம் உங்கள் ஆதரவின்றி போராட இயலுமா? ஆதரியுங்கள்.

விவாதியுங்கள்

உங்கள் மறுமொழியை பதிவு செய்க
உங்கள் பெயரைப் பதிவு செய்க