ஃபேஸ்புக் விளம்பரங்கள் வெளியிடப்படுவதில், பிரமோட் செய்யப்படுவதில் உள்ள வெளிப்படைத் தன்மையை உறுதிப்படுத்த ஒவ்வொரு மாதமும் ஒவ்வொரு வாரமும் யார், யார் எந்தப் பிரதேசத்திலிருந்து விளம்பரங்களை அளித்தார்கள், எவ்வளவு ரூபாய்களுக்கு அளித்தார்கள் என்ற தகவல்களை வெளியிட ஆரம்பித்துள்ளது.
இந்தத் தகவல்கள் தேடக்கூடிய வகையிலான தகவல் தொகுப்பாக பயனாளர்களுக்குக் கிடைக்கிறது. 2019 பிப்ரவரி முதல் மார்ச் 2, 2019 வரையில் விளம்பரம் கொடுத்தவர்களின் பட்டியல் இப்போது வெளியிடப்பட்டிருக்கிறது.

எதிர்பார்த்ததைப் போலவே அதிகம் விளம்பரம் செய்திருப்பது பாரதீய ஜனதாக் கட்சி, அதன் ஆதரவு ஃபேஸ்புக் பக்கங்கள் ஆகியவைதான். ஆனால், அதிர்ச்சி தரும் தகவல் என்னவென்றால், இந்திய அரசும் மக்களின் வரிப் பணத்தை பெருமளவில் இந்த விளம்பரங்களில் வாரியிறைத்திருக்கிறது. இந்த விளம்பரங்களில் பெரும்பாலானவை பிரதமரின் புகழ்பாடுபவை.

படிக்க:
பாசிசத்தின் இயற்கைக் கூட்டாளிதான் பாஜக | தோழர் மருதையன் உரை | காணொளி
பொள்ளாச்சி பாலியல் வன்முறையை எதிர்க்கும் ஃபேஸ்புக் பதிவுகள் !

பிப்ரவரி முதல் மார்ச் வரை 4,13,88,087 ரூபாய் இந்தியாவிலிருந்து ஃபேஸ்புக்கில் செலவிடப்பட்டுள்ளது. அதில் முதலிடத்தில் இருப்பது பாரத் கி மன் கி பாத் என்ற பா.ஜ.க. ஆதரவு பக்கம்தான். மொத்தமே 3 லட்சத்து பத்தாயிரம் ஃபாலோயர்களைக் கொண்ட இந்தப் பக்கம், ஒரு கோடியே 19 லட்சத்து சொச்சம் ரூபாய்களை விளம்பரத்திற்காக அள்ளியிறைத்திருக்கிறது. மொத்தம் ஆயிரத்து ஐநூறு விளம்பரங்கள்!! இந்த பாரத் கி மன் கி பாத் ஃபேஸ்புக் பக்கத்தின் உள்ள இணைய தள முகவரியை அழுத்தி யார் எனப் பார்த்தால், அது பாரதீய ஜனதாக் கட்சிக்குச் சொந்தமானதாக இருக்கிறது.

இரண்டாவது இடத்தில் இருப்பது NationwithNaMo. மொத்தம் 66 லட்ச ரூபாயை விளம்பரங்களுக்குச் செலவழித்திருக்கிறார்கள். இதுவும் பா.ஜ.க.வின் இணையதளம்தான்.

மூன்றாவது இடத்தில் இருப்பது MygovIndia. இது இந்திய அரசுக்குச் சொந்தமான ஃபேஸ்புக் பக்கம். ஒரு மாதத்தில் 34 லட்சத்து 40 ஆயிரம் ரூபாயை விளம்பரங்களுக்கு வாரி இறைத்திருக்கிறார்கள். எல்லாம் நம் வரிப்பணம்தான். விளம்பரங்களில் எல்லாம் நரேந்திர மோதியின் சாதனைதான். ஒரு கட்டத்தில் ஒன்பது விளம்பரங்களுக்கு சுமார் 9 லட்சம் செலவிடப்பட்டிருக்கிறது. கீழே ஸ்க்ரீன் ஷாட் இருக்கும் விளம்பரத்திற்கு மட்டும் 1 முதல் 2 லட்ச ரூபாய் செலவழித்திருக்கிறார்கள்.

ஒட்டுமொத்தமாகப் பார்த்தால், ஒட்டுமொத்தமாக இந்தியாவிலிருந்து அளிக்கப்பட்ட விளம்பரத்தில் அதிகமாக செலவழித்த அரசியல் கட்சி பா.ஜ.கதான். 96 சதவீதம்!! காங்கிரஸ் வெறும் மூன்று சதவீதம்தான்.
போக்குவரத்துத் துறை அமைச்சர் விஜயபாஸ்கர், கே.சி. பழனிச்சாமி போன்றவர்கள் தலா 20 ஆயிரம் ரூபாயை செலவழித்திருக்கிறார்கள்.

திராவிட நாஜி இன வெறியர்கள் ஒரு பைசாவைக்கூட ஃபேஸ்புக்கில் செலவழிக்கவில்லை.

முகநூலில் : Muralidharan Kasi Viswanathan

சந்தா செலுத்துங்கள்

ஊடகத் துறையில் நிறுவன விளம்பரங்கள் இன்றி மக்கள் நலனுக்காக போராடும் வினவு தளத்திற்கு தோள் கொடுங்கள்!

1 மறுமொழி

  1. சுய மோகி, விளம்பரத்தால் மூளைச் சலவை செய்ய நினைக்கிறான்… மக்களின் பலவீனங்கள் மீது ஆட்சிக்கட்டிலை அழுந்தப் பதித்திருக்கிறான். புரட்டித் தள்ளாதவரை ஐயா ஹாய்யா…ரங்கநாதர்தான். புரட்டித் தள்ளியபின் அது 56 இஞ்சு தோக்கிற கல்லுதான்.

விவாதியுங்கள்

உங்கள் மறுமொழியை பதிவு செய்க
உங்கள் பெயரைப் பதிவு செய்க