ந்தியாவின் நான்காவது தூண் உடனடி ஆபத்தில் உள்ளது. நாடு முழுவதும் பல செய்தித்தாள்கள் மூச்சுத் திணறிக் கொண்டிருக்கின்றன. சுருங்கிவரும் வாசகர்கள், விளம்பர வருவாய், உயரும் செலவுகள், நம்பகத்தன்மை குறைதல் மற்றும் டிஜிட்டல் மற்றும் சமூக ஊடகங்களின் தாக்குதல் ஆகியவை அவர்களின் நிதி ஆரோக்கியத்தில் பெரும் பாதிப்பை ஏற்படுத்தியுள்ளன. இந்திய வாசகர் கணக்கெடுப்பு சமீபத்தில் வெளிப்படுத்திய தகவல்கள், அவர்களின் எதிர்காலம் மிகவும் இருண்டதாக இருப்பதைக் காட்டுகிறது.

இதைக் கவனியுங்கள். நாட்டின் மிகப் பரவலாக விற்பனையாகும் செய்தித்தாள், டைனிக் ஜக்ரான், 2019 ஆம் ஆண்டின் மூன்றாம் காலாண்டில் சராசரியாக 1.75 கோடி வாசகர்களைக் கொண்டிருந்தது. இரண்டாவது காலாண்டில் இருந்து 3.6 சதவீதம் குறைந்தது, முதல் காலாண்டில் 13.6 சதவீதம் குறைந்தது. சராசரி வெளியீட்டு வாசகர்களின் எண்ணிக்கை முந்தைய நாள் செய்தித்தாளைப் படித்த வாசகர்களின் எண்ணிக்கையாகும், மொத்த வாசகர்களின் எண்ணிக்கை முந்தைய 30 நாட்களில் ஒரு முறையாவது செய்தித்தாள் படித்தவர்களின் எண்ணிக்கையாகும்.

இது மற்ற செய்தித்தாள்களிலும் இதே போன்ற நிலைமைதான் உள்ளது. ஐ.ஆர்.எஸ். தரவுகளின்படி, இந்துஸ்தானின் சராசரி வெளியீட்டு வாசகர்களின் எண்ணிக்கை கடந்த ஆண்டின் முதல் இரண்டு காலாண்டுகளில் 21 சதவீதம் சரிந்து 1.46 கோடியாக இருந்தது, அதே காலகட்டத்தில் அமர் உஜாலா 4.8 சதவீதம் குறைந்துது, மலையாள மனோரமா எட்டு சதவீதமும், ராஜஸ்தான் பத்ரிகா 10 சதவீதமும், ஈனாடு 21 சதவீதமும் குறைந்துள்ளது.

வாசகர்களின் எண்ணிக்கையில் சரிவு இருந்தபோதிலும், டைனிக் ஜாக்ரான் தினசரி இந்தியாவின் மிகவும் பரவலாகப் படிக்கப்படுகிறது. அதே நேரத்தில் மலையாள மனோரமா பிராந்திய தினசரிகளில் மிகவும் பரவலாகப் படிக்கப்படுகிறது, சராசரியாக 89.81 லட்சம் வாசகர்களைக் கொண்டுள்ளது.

நாட்டில் நான்கு செய்தித்தாள்கள் – டைனிக் பாஸ்கர், தினத்தந்தி, டைம்ஸ் ஆஃப் இந்தியா, லோக்மத் – மூன்றாம் காலாண்டில் அவர்களின் வாசகர்களின் எண்ணிக்கை ஓரளவு வளர்ச்சியைக் கண்டுள்ளன.. அதன் வாசகர்களின் எண்ணிக்கையில் 0.55% அதிகரித்து – மொத்தம் 58.21 லட்சம் பேர் – டைம்ஸ் ஆஃப் இந்தியா தினசரி மிகவும் பரவலாகப் படிக்கப்படும் ஆங்கில தினசரியாக உள்ளது.

மும்பை, டெல்லி மற்றும் கொல்கத்தாவின் பெரிய மூன்று சந்தைகளில், ஒவ்வொரு முன்னணி ஆங்கில நாளிதழும் அதன் வாசகர்களின் எண்ணிக்கையில் வீழ்ச்சியைக் கண்டுள்ளன. டைம்ஸ் ஆஃப் இந்தியா மும்பை சந்தையை 12.92 லட்சம் வாசகர்களுடன் தொடர்ந்து ஆட்சி செய்து வருகிறது. இது இரண்டாவது காலாண்டில் 13.17 லட்சமாக இருந்தது. அதன் நெருங்கிய போட்டியாளர் இந்துஸ்தான் டைம்ஸ், அதன் சராசரி வாசகர்களின் எண்ணிக்கை இரண்டாவது காலாண்டில் சுமார் 8.69 லட்சத்திலிருந்து மூன்றாவது காலாண்டில் 8.59 லட்சமாகக் குறைந்தது.

படிக்க :
தினமலர் | திருமணம் – பொது வாழ்க்கை | கொரோனா வைரஸ் | அர்ஜுன் ரெட்டி | சாதி மறுப்பு | கேள்வி – பதில் !
♦ இந்தியாவில் புற்றுநோயின் தாக்கம் : அதிர்ச்சியளிக்கும் ரிப்போர்ட் !

டெல்லியில், டைம்ஸ் ஆஃப் இந்தியா மற்றும் இந்துஸ்தான் டைம்ஸ் தலா மூன்று சதவீத வாசகர்களின் எண்ணிக்கையை முறையே 10.76 லட்சம் மற்றும் 9.28 லட்சமாகக் குறைத்துள்ளன. இருப்பினும், மும்பையைப் போலவே, அவர்கள் ஆங்கில சந்தையில் முதலிடத்தில் உள்ளனர்.

எனவே, இந்தியாவின் செய்தித்தாள் துறையில் இரங்கற்பா எழுதுவதற்கான நேரம் இதுதானா? ஊடக கருத்தாளராகவும் தொழில்முனைவோராகவும் மாறிய செய்தித்தாள் ஆசிரியர் பிரதியுமான் மகேஸ்வரி, இது மிக ஆரம்பம் என நம்புகிறார்.
“ஆனால் தற்போதுள்ள அச்சு துறையில் இருப்பவர்கள் செய்தி தளத்தில் நிலைத்திருக்க 360 கோணத்தில் பிரச்சினைகளை சீர் தூக்கிப் பார்க்க வேண்டும். முதலில் இது ஒரு வலுவான டிஜிட்டல் நிறுவனமாக, நிகழ்வுகள் மற்றும் ஈடுபாடுகளைச் செய்தல் மற்றும் தொலைக்காட்சிகளில், வானொலிகளில் உள்ளடக்க இணைப்புகள் மற்றும் செய்தி அடிப்படையிலான நிகழ்ச்சிகளுடன் இணைந்து செயல்பட வேண்டும்” என்று அவர் யோசனை கூறுகிறார்.

ஒரே இரவில் மூடப்படும் பத்திரிகைகள்!

ஹைதராபாத்தை தளமாகக் கொண்ட டெக்கான் க்ரானிகல் மற்றும் மும்பையை தளமாகக் கொண்ட டி.என்.ஏ ஆகியவை கடுமையாக பாதிக்கப்பட்டுள்ளன. பணப் பிரச்சினையில் சிக்கியுள்ள டெக்கான் க்ரானிகல் ஹோல்டிங்ஸ் லிமிடெட் டெக்கான் க்ரானிக்கல் மற்றும் ஏசியன் ஏஜ் பல பதிப்புகளை நிறுத்தியுள்ள நிலையில், டி.என்.ஏ அச்சு பதிப்பை இடைநிறுத்தியுள்ளது; ஒரே இரவில் பல பத்திரிகையாளர்கள் வேலையை இழந்துள்ளனர்.

( படங்களைப் பெரிதாகப் பார்க்க அவற்றின் மீது அழுத்தவும் )

டி.சி.எச்.எல் சமீபத்தில் கேரளா மற்றும் பெங்களூரில் டெக்கான் க்ரானிகல் பதிப்புகளையும், மும்பை மற்றும் கொல்கத்தாவில் ஏசியன் பதிப்புகளையும் மூடியது. நிதி நெருக்கடி ஆழமடைவதால், ஹைதராபாத், விஜயவாடா, சென்னை மற்றும் கரீம்நகர் ஆகிய பதிப்புகள் மட்டும் லாபகரமாக உள்ளதால் அவற்றை தக்க வைத்துக் கொள்ள நிறுவனம் நினைப்பதாக டி.சி.எச்.எல் வட்டாரங்கள் தெரிவிக்கின்றன.

அவற்றின் பதிப்புகள் மூடப்பட்ட பின்னர், டி.சி.எச்.எல் ஊழியர்கள் தேசிய நிறுவன சட்ட தீர்ப்பாயத்தை அணுகினர். பணியகங்களை மூடிவிட்டு ஊழியர்களை இடம் மாற்றுவதற்கான முடிவு சட்டவிரோதமானது என்று புகார் கூறினர். இப்போதைக்கு அவர்களுக்கு தங்குமிட உத்தரவு கிடைத்துள்ளது.

டி.சி.எச்.எல் அதன் கடன்களை வழங்கத் தவறியதால் 2017 ஆம் ஆண்டில் திவாலானதாக அறிவிக்கப்பட்டது. பின்னர், இது திவாலான நிலை மற்றும் திவால்நிலைக் குறியீட்டின் கீழ் நடவடிக்கைகள் மூலம் சென்றது. ஜூன் 2019-ல், கொல்கத்தாவை தளமாகக் கொண்ட ஸ்ரே மல்டிபிள் அசெட் இன்வெஸ்ட்மென்ட்ஸ் டிரஸ்டின் விஷன் இந்தியா ஃபண்ட் நிறுவனம் கையகப்படுத்த என்.சி.எல்.டி ஒப்புதல் அளித்தது. டி.சி.எச்.எல் நிறுவனத்தில் ரூ. 408 கோடியை முதலீடு செய்ய ஸ்ரே முன்மொழிந்தது, அதன் கடன் வட்டி உட்பட ரூ. 8,180 கோடியாக இருந்தது. சுவாரஸ்யமாக, ஸ்ரே இன்னும் பொறுப்பேற்கவில்லை.

டி.சி.எச்.எல் இன் பெரும்பாலான ஊழியர்களுக்கு ஐந்து-ஆறு மாதங்களுக்கு சம்பளம் நிலுவையில் உள்ளது. என்.சி.எல்.டி.யின் தங்கும் உத்தரவு எங்களுக்கு ஒரு ஆசுவாசத்தைக் கொடுத்துள்ளதாக ஒரு டெக்கான் க்ரானிகில் பத்திரிகையாளர் கூறுகிறார். மும்பை மற்றும் கேரள அலுவலகங்களில் இருந்து அதிகமான ஊழியர்கள் சட்டப் போரில் சேர வாய்ப்புள்ளது. “ஸ்ரே மல்டிபிள் அசெட் இன்வெஸ்ட்மென்ட்ஸ் டிரஸ்டின் விஷன் இந்தியா ஃபண்ட், டி.சி.எச்.எல். ஐ கையகப்படுத்த திட்டமிடப்பட்டுள்ளது, இதுவரையில் பொறுப்பேற்கவில்லை. எனவே, நிறுவனத்தின் கட்டமைப்பில் மாற்றங்கள் செய்யப்படுவது சட்டவிரோதமானது. ”

படிக்க :
காஷ்மீர் 100-ம் நாள் இணையம் தடை | பத்திரிகையாளர் போராட்டம் !
♦ பாஜகவை விமர்சித்த ராகுல் பஜாஜ் மீது சமூக ஊடகங்களில் காவி ட்ரோல் படை தாக்குதல் !

14 ஆண்டுகளுக்குப் பிறகு மும்பை மற்றும் அகமதாபாத்தில் டி.என்.ஏ அச்சு பதிப்புகளை மூடியபோது, அது நூற்றுக்கும் மேற்பட்ட பத்திரிகையாளர்களை வேலையில்லாமல் செய்தது. அவர்களில் பெரும்பாலானோர் இன்னும் வேலை தேட முடியாமல் தவிக்கின்றனர். ஆனால், டி.என்.ஏ அச்சகத்தின் தொழிலாளர்கள் மும்பையில் உள்ள தொழிலாளர் ஆணையத்திடம் சாதகமான தீர்ப்பைப் பெற்றுள்ளனர்.

புனேவில் உள்ள இந்தியன் எக்ஸ்பிரஸ் மற்றும் கேரளாவின் நியூ இந்தியன் எக்ஸ்பிரஸ் ஆகியவற்றின் முன்னாள் ஆசிரியர் வினோத் மேத்யூ கூறுகையில், இது டி.என்.ஏ மற்றும் டெக்கான் குரோனிக்கிள் மட்டுமல்ல, எல்லோரும் சிரமப்படுகிறார்கள். தொழிலில் அதிர்வு ஏற்கனவே தொடங்கிவிட்டது. தெற்கில், விளம்பர வருவாய் குறைந்துவிட்டது. பல செய்தித்தாள்கள் பண நெருக்கடியை எதிர்கொள்கின்றன, சம்பளத்தை தாமதப்படுத்துகின்றன என்கிறார்.

நொறுங்கும் தொழில்

கடந்த ஆண்டு பட்ஜெட்டில் செய்தித்தாள் மீது 10 சதவீத இறக்குமதி வரி விதிக்கப்பட்டது, இது ஜூலை 2019 இல் வழங்கப்பட்டது. ஏற்கனவே போராடி வரும் செய்தித்தாள்களுக்கு இது பெரும் அடியாகும். இந்திய செய்தித்தாள் சங்கத்தின் பலமுறை கோரிக்கை விட்டதைத் தொடர்ந்து, கடந்த வாரம் வெளியிடப்பட்ட இந்த ஆண்டு பட்ஜெட்டில் வரி ஐந்து சதவீதமாக குறைக்கப்பட்டுள்ளது. இருப்பினும், தொழில்துறையில் பலர் இது சற்று தாமதமானது என்று நம்புகிறார்கள். உள்நாட்டு செய்தித்தாள் உற்பத்தியாளர்களைப் பாதுகாப்பது தனது அரசாங்கத்தின் கடமை என்று கூறினாலும் பல மாதங்களாக, நிதியமைச்சர் நிர்மலா சீதாராமன் வரியைத் திரும்பப் பெற மறுத்துவிட்டார்.

இந்தியாவில் ஆண்டுக்கு 2.5 மில்லியன் டன் செய்தித்தாள் அச்சு தாள்கள் தேவை இருந்தபோதும் நிர்மலா சீதாராமன் கண்டுகொள்ளவில்லை. ஆனால், உள்நாட்டு ஆலைகள் ஒரு மில்லியன் டன் மட்டுமே உற்பத்தி செய்ய முடியும். மேலும், இது உள்நாட்டு செய்தித்தாளின் தரம் இறக்குமதி செய்யப்பட்ட வகைகளை விட கணிசமாக தரம் குறைவாக இருந்தது. சிறிய மற்றும் நடுத்தர செய்தித்தாள்கள் பெரும் இழப்பை சந்திக்க நேரிடும் என்றும் இறக்குமதி வரி திரும்பப் பெறப்படாவிட்டால் அவற்றில் பல மூடப்பட வேண்டிய கட்டாயம் ஏற்படும் என்றும் இவர்கள் கணித்திருந்தார்கள்.

“செய்தித்தாள் மற்றும் பத்திரிகைகளின் வெளியீட்டாளர்கள் குறைந்த விளம்பர வருவாய் மற்றும் அதிக செயல்பாட்டு செலவுகள் போன்றவை உள்ளிட்ட பல காரணங்களால் ஏற்கனவே கடுமையான துயரங்களுக்கு ஆளாகியிருக்கின்றனர். புழக்கத்தில் வருவாய் தொடர்ந்து வீழ்ச்சியடைந்து வருகிறது, டிஜிட்டல் மீடியாவின் தாக்குதலுக்கு நன்றி” என இந்திய செய்தித்தாள் சங்கம் ஒரு அறிக்கையில் தெரிவித்துள்ளது .

செய்தித்தாள்கள் மற்றும் பத்திரிகைகளை மூடுவது நூற்றுக்கணக்கான நிருபர்கள், ஆசிரியர்கள் மற்றும் வடிவமைப்பு கலைஞர்களைத் தவிர, பிற ஊழியர்களை வேலையிலிருந்து வெளியேற்றுகிறது. பொருளாதார மந்தநிலை மீட்புக்கான அறிகுறிகளைக் காட்டாத நிலையில், பெரும்பாலான பெரிய விளம்பரதாரர்கள் தங்கள் விளம்பர செலவினங்களைக் குறைத்து விஷயங்களை மோசமாக்கியுள்ளனர். “பொருளாதார மந்தநிலை முக்கிய குற்றவாளி. சந்தை மிகவும் மோசமாக உள்ளது. செய்தித்தாள்கள் மட்டுமல்ல, டிவி சேனல்களும்கூட மோசமாக பாதிக்கப்படுகின்றன” என்று மும்பையில் ஒரு ஊடக நிர்வாகி கூறுகிறார்.

படிக்க :
ஆஸ்திரேலிய அரசுக்கு எதிராக செய்திகளை ‘இருட்டடிப்பு’ செய்த பத்திரிகைகள் !
♦ நாட்டில் வன்முறைச் சூழலை உருவாக்கியிருக்கிறது பாஜக : மோடிக்கு பெண்கள் கடிதம் !

செய்தித்தாள்கள் இன்னும் சில்லறை விற்பனையாளர்கள் மற்றும் ரியல் எஸ்டேட் விளம்பரங்களை ஈர்க்கின்றன என்றாலும், “அச்சு ஊடகங்கள் நிலையான சரிவில் உள்ளன” என்று மேலும் அவர் கூறினார்.

டெக்கான் க்ரானிகலில் தனது வேலையை இழந்த ஒரு மூத்த ஆசிரியர் கூறுகையில், “பத்திரிகையாளர்களுக்கு, குறிப்பாக அனுபவம் வாய்ந்த கைகளுக்கு இன்று குறைவான வேலைகளே உள்ளன. சாலையில் பலரைப் பார்ப்பது வருத்தமளிக்கிறது” என்கிறார் அவர்.

“மறுபுறம், நாடெங்கிலும் உள்ள ஏராளமான பத்திரிகை பள்ளிகள் பத்திரிகையாளர்களாக விரும்புகிறவர்களை தேடிக்கொண்டிருக்கின்றன, மேலும் நுழைவு நிலை சம்பளமும் குறைந்து வருகிறது.”

பல ஊடக நிறுவனங்கள் ஆட்சேர்ப்பை முடக்கியுள்ளன அல்லது “விலையுயர்ந்த” அனுபவம் வாய்ந்த ஊழியர்களுக்கு பதிலாக குறைவான சம்பளம் பெறும் அனுபவம் குறைந்தவர்களை வேலைக்கு அமர்த்தியுள்ளன.

அச்சு ஊடகங்களின் சூரிய அஸ்தமனத்தை இந்தியா எவ்வளவு காலம் தாமதப்படுத்த முடியும்? இதுதான் தற்போது கேட்கப்பட வேண்டிய பொருத்தமான கேள்வி.

வினவு செய்திப் பிரிவு
கட்டுரை: ஆண்டோ டி. ஜோசப்
தமிழாக்கம் : 
கலைமதி
நன்றி :  நியூஸ் லாண்ட்ரி. 

விவாதியுங்கள்

உங்கள் மறுமொழியை பதிவு செய்க
உங்கள் பெயரைப் பதிவு செய்க