பாசிச மோடி கும்பலை பணியவைக்கும்வரை விவசாயிகள் போராட்டம் ஓயாது

விவசாய விளைப்பொருட்களுக்கான குறைந்தபட்ச ஆதார விலை, விவசாய கடன் தள்ளுபடி, விவசாயிகளுக்கு ஓய்வூதியம், மின்சார சட்டத்திருத்த மசோதாவை ரத்து செய்யவேண்டும் உள்ளிட்ட பல்வேறு கோரிக்கைகளை முன்வைத்து ஹரியானா எல்லையில் லட்சகணக்கான விவசாயிகள் போராட்டம் நடத்தி வருகின்றனர். போராடும் விவசாயிகள் மீது மோடி அரசால் கொடூரமான அடக்குமுறைகள் செலுத்தப்பட்டாலும் அதனையெல்லாம் மீறி விவசாயிகள் டெல்லியை நோக்கி முன்னேறுவதில் முனைப்பு காட்டி வருகின்றனர்.

இந்நிலையில், டெல்லியில் நடக்கும் விவசாயிகள் போராட்டம் தொடர்பான செய்திகளை ஒரு நாள் மட்டுமே ஊடகங்கள் வெளியிட்டன. நேற்று (14.02.2024) நடந்த போராட்டச் செய்திகளை, பா.ஜ.க. பினாமி செய்தித்தாள்கள் (Godi Media) அனைத்தும் பத்தோடு பதினொன்றாக பின்தள்ளிவிட்டன.

படிக்க: விவசாயிகள் போராட்டமும் எதிர்க்கட்சிகளின் சந்தர்ப்பவாதமும்

கடந்த பிப்ரவரி 13-ஆம் தேதி கோரிக்கைகளை நிறைவேற்றகோரி பஞ்சாபின் பல பகுதிகளிலிருந்து விவசாயிகளின் டிராக்டர் பேரணி தொடங்கியது. அன்றிலிருந்து இன்று வரை விவசாயிகள் மீது கொடூரமான ஒடுக்குமுறைகளைச் செலுத்தி வருகிறது மோடி அரசு. ஹரியானா மாநிலத்தின் 15 மாவட்டங்களில் 144 தடை உத்தரவு பிறப்பிக்கப்பட்டுள்ளது; இணைய சேவை துண்டிக்கப்பட்டுள்ளது; விவசாயிகளை ஒடுக்க துணை ராணுவப் படையினரும் ஹரியானா மாநில போலிசும் குவிக்கப்பட்டுள்ளனர். கண்ணீர் புகைகுண்டுகளை வீசுவது, தண்ணீர் பீரங்கிகளை கொண்டு தாக்குவது, துப்பாக்கிச்சூடு நடத்துவது என விவசாயிகள் மீது அடக்குமுறைகள் செலுத்தப்பட்டு வருகிறது. விவசாயிகளை தடுத்து நிறுத்த முள்வேலி அமைப்பது, தடுப்பு சுவர்கள் அமைப்பது, ஆணிகளை புதைப்பது போன்ற காட்டுமிராண்டித்தனமான முறைகளையும் கையாண்டு வருகிறது பாசிச மோடி அரசு.

இந்நிலையில், போராட்டத்தின் நான்காவது நாளான இன்று விவசாயிகளுடன் பேச்சுவார்த்தை நடத்த அழைப்பு விடுத்துள்ளது பாசிச மோடி அரசு. மத்திய அமைச்சர்கள் அர்ஜூன் முண்டா, பியூஷ் கோயல் மற்றும் நித்யானந்த் ராய் ஆகியோருடன் இந்த பேச்சுவார்த்தை சந்திப்பு நடைபெறவுள்ளது.

ஏற்கனவே விவசாயிகளுடன் இரண்டுமுறை பேச்சுவார்த்தை நடத்தப்பட்டு அது தோல்வியடைந்த நிலையில் தற்போது மூன்றாவது முறையாக பேச்சுவார்த்தைக்கு அழைப்பு விடுக்கப்பட்டுள்ளது. ஏற்கனவே, முந்தைய பேச்சுவார்த்தைகள் நடத்தப்பட்ட இக்காலகட்டத்தில் விவசாயிகளின் அதிகாரப்பூர்வ சமூகவலைதள கணக்குகளை முடக்கும் வேலையை மோடி அரசு மேற்கொண்டது ஊடகங்களில் அம்பலமாகியிருந்தது. தற்போது, ஒருபுறத்தில் போராடும் விவசாயிகளை கடுமையாக ஒடுக்கிகொண்டே மற்றொருபுறத்தில் பேச்சுவார்த்தைக்கு அழைத்துள்ள மோடி அரசின் இந்த நயவஞ்கத்தை விவசாயிகள் புரிந்து கொண்டு போராட்டத்தில் உறுதியாக நிற்கின்றனர்.

இதுகுறித்து கருத்து தெரிவித்துள்ள எஸ்.கே.எம். (என்.பி) விவசாய சங்கத்தின் மூத்த தலைவர் ஜக்ஜித் சிங் “நாங்கள் ஹரியானாவுடனான மாநிலங்களுக்கு இடையேயான எல்லைகளில் அமைதியாக முகாமிட்டுள்ளோம். அரசாங்கம் முதலில் ஒரு சாதகமான சூழலை உருவாக்க வேண்டும் என்று நாங்கள் எதிர்பார்க்கிறோம் என்றாலும், கூட்டத்திற்கு நாங்கள் தயங்கவில்லை என்பதை மையத்திற்கு தெரிவித்தோம். ஒருபுறம் ஹரியானா அரசு கண்ணீர்ப்புகை மற்றும் தண்ணீர் பீரங்கிகளை பிரயோகித்து, மறுபுறம் பேச்சு வார்த்தை நடத்துகிறது”” என்ற பா.ஜ.க அரசின் நாடகத்தை அம்பலப்படுத்தியுள்ளார்.

இந்நிலையில், அம்பாலா அருகே ஹரியானாவின் ஷம்பு கிராமம் மற்றும் பஞ்சாபின் எல்லையான கானௌரி-ஜிண்ட் ஆகிய பகுதிகளை விவசாயிகள் அடைந்தபோது, பா.ஜ.க. ஆளும் ஹரியானாவிற்குள் நுழைய விடாமல் விவசாயிகள் தடுத்து நிறுத்தப்பட்டுள்ளனர். விவசாயிகள் எல்லையில் உள்ள பல தடுப்புகளை உடைக்க முயன்றபோது விவசாயிகள் மீது டிரோன்களை கொண்டு தாக்குதல் நடத்தப்பட்டது. இதனால் 60-க்கும் மேற்பட்ட விவசாயிகள் படுகாயம் அடைந்தனர். இது போராடும் விவசாயிகளை ஒடுக்க இனவெறி இஸ்ரேல் அரசால் மேற்கொள்ளப்படும் வழிமுறை என்பது ஆங்கில செய்தி ஊடகங்களில் செய்திகள் வெளியாகி மோடி அரசின் கோரமுகம் அம்பலப்பட்டுப்போனது.

படிக்க : பிப்.13: டெல்லி விவசாயிகள் போராட்டத்தை ஆதரிப்போம்! | தோழர் வெற்றிவேல்செழியன்

2020-ஆம் ஆண்டு மூன்று வேளாண் சட்டங்களுக்கு எதிராக விவசாயிகள் போராடியபோதும் இத்தகைய தாக்குதல்கள் தொடுக்கப்பட்டன. ஆனால், அதனையெல்லாம் கடந்து விவசாயிகள் மோடி அரசை பணியவைத்தனர். குறைந்தபட்ச ஆதார விலை என்ற விவசாயிகளின் வாழ்வாதார கோரிக்கையானது, பாசிச எதிர்ப்பு ஜனநாயக குடியரசுக்கான கோரிக்கைகளில் முக்கியத்துவம் வாய்ந்தது. இது இந்த அரசியல் அமைப்பு சட்டத்தால் நிறைவேற்றப்படாது என்பதே இத்தனை ஆண்டுகால அனுபவமாக உள்ளது. எனவே, விவசாயிகளின் ஜனநாயகப்பூர்வமான இக்கோரிக்கை மாற்று ஜனநாயக கட்டமைப்பின் தேவையை மக்களுக்கு உணர்த்துகிறது.

எனவே, மோடி அரசின் இந்த ஒடுக்குமுறைகள் எல்லாம் விவசாயிகளை தடுத்துவிட போவதில்லை. நாளுக்கு நாள் போராடும் விவசாயிகளின் எண்ணிக்கையும் போராட்டத்தின் வீரியமும் அதிகரித்துகொண்டு தான் சென்று கொண்டிருக்கிறது. இந்தியாவில் பல மாநிலங்களில் விவசாயிகள், உழைக்கும் மக்கள், மாணவர்கள் மத்தியில் விவசாயிகள் போராட்டத்திற்கான ஆதரவு அதிகரித்து வருகிறது. ஆளும் பாசிச மோடி அரசை அடிபணிய வைக்கும் வரை இந்த போராட்டம் ஓயப்போவதில்லை என்பது திண்ணம்.

சோபியா

சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube