வினோதினி உட்பட 9 மாணவிகளின் உயிரைப் பறித்த மணக்குள வினாயகர் பொறியியல் கல்லூரி கல்விக்கூடமா? கொலைக்கூடமா?

புதுவை மாநிலம் மதகடிப்பட்டில் உள்ள மணக்குள வினாயகர் பொறியியல் மற்றும் மருத்துவ கல்லூரியில் முதலாம் ஆண்டு எலக்ட்ரானிக்&எலக்ட்ரானிக்ஸ் துறையில் பொறியியல் பட்டம் படித்து வந்தார்  வினோதினி என்ற மாணவி.

பிப்ரவரி மாதம் 24-ம் தேதி திங்கள் கிழமை வினோதினி கல்லூரிக்கு சென்ற ஒரு சில மணி நேரத்திற்குள்ளேயே கல்லூரியிலிருந்து பெற்றோர்களுக்கு போன் வருகிறது. போனில், “உங்கள் பெண் மயக்கம் அடைந்து விட்டார். உடனே வாருங்கள்” என்று அழைப்பு. ஆனால் அங்கு போனால்,”ஆசிரியர் என்ற முறையில் கண்டித்ததற்காக அது 5-வது மாடியில் இருந்து விழுந்து தற்கொலை செய்து கொண்டது. பெண் இறந்து விட்டது” என்று நிர்வாகம் கூறியிருக்கிறது.

வினோதினியின் பெற்றோருடன் தொடர்புடைய சி.பி.ஐ. (எம்.எல்) கட்சியினரும், வினோதினியின் தந்தைக்கு ஆதரவான அம்பேத்கர் மறுமலர்ச்சி கழகம் என்கிற தலித் அமைப்பும் சென்று பார்த்த போது வினோதினி அவசர பிரிவில் காலையில் கல்லூரிக்கு கிளம்பி போகும்போது எப்படி சென்றாரோ அதே போல் பெட்டியில் படுக்க வைக்கப்பட்டு இருந்தது. ஆனால் உயிர் வினோதினியைவிட்டு பிரிந்திருந்தது. தலையில் சுவற்றில் மோதியதைப்போல சிறு ரத்த கசிவு, ஒரு பக்க தோள் பட்டையில் சிறு கீறல் மட்டுமே இருந்தது.

இதை கண்ட உறவினர்களும் ஜனநாயக சக்திகளும் “5-வது மாடியில் இருந்து விழுந்தது என்றால் உடல் சேதம் அதிகமாக இருந்திருக்கும், விழுந்த இடத்தில் எந்த தடயமும் இல்லை, வினோதினி விழுந்ததாக சொல்லப்பட்ட இடத்தில் மாணவர்கள் நடமாட்டம் அதிகம் உள்ள இடம், மேலும் அந்த இடம் செக்யூரிட்டி பாயிண்ட். இவர்களை யாரை கேட்டாலும் நாங்கள் பார்க்கவில்லை, எங்களுக்கு தெரியாது. இதைத்தான் சொல்லுகிறார்கள். எனவே  இது தற்கொலையில்லை, எனவே போலீசுக்கும், பெற்றோர்களுக்கும் தகவல் கொடுத்தது யார்? அவர்களை விசாரிக்க வேண்டும்” என்று கேட்டதற்கு நிர்வாகம் “தெரியாது” என்றார்கள்.

வினோதினி மரணத்திற்கு கல்லூரி நிர்வாகம் சொல்லும் காரணம்: ‘அந்த பெண் சரியாக படிப்பதில்லை, ரெக்கார்டு நோட்டில் அதுவே திருத்தி கையெழுத்து போட்டுக் கொண்டது. இதை கண்டித்ததற்காக அது 5-வது மாடியில் இருந்து விழுந்து தற்கொலை செய்து கொண்டது. இதற்கு கல்லூரி நிர்வாகம் எப்படி பொறுப்பேற்க முடியும்?’ என்பதுதான்.

ஆனால் வினோதினி ரெக்கார்டு நோட்டில் கையெழுத்து போட்டுக் கொண்டதாக கூறப்பட்ட அன்று (வெள்ளிக் கிழமை) வினோதினி தனி அறையில் ஒரு நாள் முழுவதும் அடைக்கப்பட்டு இருந்ததையும், சம்பந்தப்பட்ட ஆசிரியர்கள் ”நீ படிக்க லாயக்கு இல்லை, படுக்கத்தான் லாயக்கு” என ஆபாசமாக வசைபாடியதையும் கல்லூரி மாணவர்களே (பெயர் சொல்ல அஞ்சுகின்றனர்) கூறுகின்றனர். மேலும் ஆசிரியர்கள் வினோதினியிடம், “உனது பெற்றோரை அழைத்துவா” என்று சொல்லி இருக்கிறார்கள். வீட்டில் வினோதினி நடந்தது பற்றி சொல்லி இருக்கிறார். ஆனால், “பிறகு வருகிறோம். நீ கல்லூரிக்கு போ” என்று சொல்லவே விருப்பமில்லாமல் அவர் கல்லூரிக்கு போனதாக பெற்றோர்களே சொல்லுகிறார்கள்.

கல்லூரி நிர்வாகம் பிரச்சினை பெரிதாகி விடாமல் பஞ்சாயத்து செய்து தீர்க்கப் பார்த்தது. லிபரேஷன்  கட்சி பஞ்சாயத்திற்கு ஒத்துக் கொள்ளவில்லை, அம்பேத்கர் மறுமலர்ச்சி கழகம் ஒத்துக்கொண்டது. இதில் முரண்பட்டு லிபரேஷன் அங்கிருந்து வெளியேறி புதிய ஜனநாயக தொழிலாளர் முன்னணிக்கு தகவல் தெரிவித்தனர்.

இது தொடர்பாகபுஜதொமு சார்பாக கண்டன ஆர்ப்பாட்டத்திற்கு அனுமதி கேட்டு இருந்தோம். ஆனால் போலீஸ் புஜதொமுவுக்கு மட்டும் அனுமதி மறுக்கப்பட்டுள்ளது என்றனர். மற்ற அமைப்புகளுக்கு அனுமதி கொடுக்கப்பட்டதை சுட்டிக்காட்டி கேட்டதற்கு, “அவர்கள் யார் என்றும், நீங்கள் யார் என்றும் எங்களுக்கு தெரியும். எனவே உங்களுக்கு தரமுடியாது” என்று எஸ்.பி.  நேரில் மறுத்து விட்டார்.

மற்ற அமைப்பினருடன், மாணவர்களின் போராட்டத்தில் பங்கு பெற்று பு.ஜ.தொ.மு வின் சார்பாக தனியார்மய கல்வியை அம்பலப்படுத்தி பேசப்பட்டது. மற்றும் வினோதியின் இறுதி சவ ஊர்வலத்தில் கலந்து கொண்ட மாணவர்களை,  தனியார்மய கல்வி கொள்கையும், அது விளைவிக்கும் கோரவிளைவுகளையும் அம்பலப்படுத்தி முழக்கமிட செய்யலாம் என்று முயன்ற செய்தபோது,  எஸ்.எஃப்.ஐ(சிபிஎம்மின் மாணவர் இயக்கம்) “இப்படி வேண்டாம், மாணவர்கள் ஆட்டம் பாட்டம் என்றுதான் செய்வார்கள். அதை கட்டுப்படுத்தக்கூடாது” என்று மறுத்தனர். புதுச்சேரி மாணவர் கூட்டமைப்பு தலைவர் சாமிநாதனோ, “அப்படி விட முடியாது. முழக்கமிடுவதுதான் சரி, தோழர்கள் சொல்வதுதான் சரி” என்று கூற மாணவர்கள் முழக்கமிட்டார்கள்.

ஊர்வலம் நெடுகிலும் ஆயிரக்கணக்கான மக்கள் மத்தியில் பிரச்சாரம் கொண்டு செல்லப்பட்டது. இறுதி ஊர்வலத்தில் முன்னணியாக பு.ஜ.தொ.மு செஞ்சட்டை தோழர்கள் எழுச்சிமிக்க முழக்கமிட்டது மக்களையும், மாணவர்களையும் முழக்கமிட வைத்தது. எமது முழக்க பிரசுரத்தை கேட்டு வாங்கி படித்து வைத்துக் கொண்டார்கள். “வினோதினியின் உயிர் மட்டுமல்ல, இந்தியாவில் பல மாணவர்களின் உயிர் பறிப்புக்கும் காரணம், கட்டணம் என்ற பெயரில் பெற்றோர்களின் ரத்தத்தை உறிவதும் தனியார்மய கல்வி கொள்கைதான், இதை ஒழிக்காமல் விடிவில்லை” என்ற முழக்கம் கூடி இருந்த மாற்று கட்சிகளையும், பொது மக்களையும் ஈர்த்தது.

ஊர்வலமாக சென்று கொண்டு இருக்கும்போதே பு.ஜ.தொ.மு மாநில தலைவர் தோழர் பழனிச்சாமிக்கு லேன்ட் லைனில் இருந்து போன் செய்து, “உங்களது அமைப்பு எதற்கு இதில் தலையிடுகிறது? நீங்கள் முன்னாடி கோஷம் போட்டுக் கொண்டு போறீங்க. அந்த பெண் தற்கொலை செய்து கொண்டதற்கு நிர்வாகம் என்ன செய்யும்? உண்மையை ஆராயாமல் நீங்கள் முடிவு எடுத்து இருக்கீங்க” என்று நிர்வாகத்தின் கையாள் ஒருவன் பேசினான். அதற்கு தோழர், “நாங்கள் ஆய்வு செய்துவிட்டுதான் முடிவு செய்து இருக்கிறோம், நீ யார்” என்று கேட்டதற்கு போனை துண்டித்து விட்டான்.

மாணவர் போராட்டங்களைத் தொடர்ந்து எர்னஸ்ட் பால், பவானி, கீதா, பிரியதர்ஷினி ஆகிய நான்கு பேராசிரியர்கள் தற்கொலைக்கு தூண்டியதாக 306 பிரிவின்படி வழக்கு பதியப்பட்டு சிறையில் அடைக்கப்பட்டுள்ளனர். இந்த நான்கு பேரில் இரு பெண் பேராசிரியர்கள் தமக்கு உடல்நிலை சரியில்லை என்று கூறி மருத்துவமனையில் சேர்ந்துள்ளனர்.

தொடர்ச்சியான மாணவர்களின் போராட்டம், புதிய ஜனநாயகத் தொழிலாளர் முன்னணி மற்றும் சி.பி.ஐ (எம்.எல்) –ன் சுவரொட்டி பிரச்சாரம் ஆகியவற்றை கண்டு ஆத்திரம் அடைந்த கல்லூரி முதலாளி சுகுமார், மருத்துவம் மற்றும் பொறியியல் கல்லூரி மாணவர்களை அழைத்து “போராட்டத்திற்கு செல்லக்கூடாது” என்றும், “அந்த மாணவி செய்த தவறுக்கு பொய்க் குற்றம் சாட்டி ஆசிரியர்களை கைது செய்தது தவறு. அவர்களை விடுதலை செய்ய வேண்டும்” என்றும் “நாம் கல்லூரியின் சார்பாக பேரணியாக சென்று கவர்னர் இடம் மனுக்கொடுக்க போகிறோம். அதற்கு அனைவரும் வரவேண்டும். இதுக்கு வரவில்லை என்றால் டிஸ்மிஸ் செய்வேன்”  என்று மாணவர்களையும், ஊழியர்கள், டாக்டர்கள், செக்யூரிட்டி என அனைவரையும் மிரட்டி 3,000 பேரை திரட்டி பேரணி நடத்தினார். இதை அக்கல்லூரி மாணவர்களே காரி உமிழ்ந்தார்கள்.

மேலும், சுகுமார், கல்லூரியை கண்டித்து போராட்டத்தில் ஈடுபட்ட அமைப்புகளை கண்டித்து சுவரொட்டியும் மற்றும் பத்திரிக்கையில் அறிக்கையும் கொடுத்துள்ளார். அதில் பு.ஜ.தொ.மு உட்பட போராட்டத்தில் ஈடுப்பட்ட அனைத்து அமைப்புகளையும் அமைப்பு பெயர்களை அறிவிக்காமல் தீய சக்திகள், தொழிற்சங்க அமைப்புகள், மாணவர் அமைப்புகள் என பொதுவாக பேசி இவர்கள் பணத்துக்காக இப்படி போராட்டம் செய்து மிரட்டுகிறார்கள். உடனடியாக இவர்கள் மீது நடவடிக்கை எடுக்க வேண்டும் என்று அறிக்கை விட்டுள்ளார். ஏதோ தான் யோக்கியனைப்போலவும், இவர்கள் மீது வீண் பழியை போடுவதை போலவும் பதறும் நிர்வாகத்தின் யோக்கியதை என்ன?

கல்லூரி முதலாளி கேசவன் துவக்கத்தில் சாராய வியாபாரியாக இருந்தவர். கல்வி தனியார் மயம் ஆரம்பமான பிறகு சாராய வியாபாரத்தை விட்டுவிட்டு கல்வி வியாபாரத்தில் இறங்குகிறார். இந்த மருத்துவக்கல்லூரி தவிர மயிலம் என்கிற பெயரில் ஒரு பொறியியல் கல்லூரியையும் நடத்தி வருகிறார். ஜானகிராமன் புதுவை முதல்வராக இருந்தபோது இந்த கல்வி வியாபாரி அரசு கொறடாவாக இருந்தார். இந்த காலகட்டத்தில் தான் நிறைய பணத்தை சுருட்டினார். கல்லூரி தவிர ரவுடிகளை வைத்து கட்டப்பஞ்சாயத்து செய்வது போன்ற பண்ணையார் வேலைகளையும் செய்து வந்தார். ஆனால் அனைத்து கட்சியையும் தனது பண பலத்தால் வளைத்து போடுவது, தனது பணபலம், அரசியல் பலம், போலிஸ் பலம், ரவுடிகளின் பலத்தால் தனது ஆளுமையை பெருக்கிக் கொள்வது. கோடி கோடியாய் சுருட்டுவது என்பதுதான் கேசவனின் அடித்தளம். கேசவன் இரண்டு ஆண்டுகளுக்கு முன்பு இறந்து போய்விட்டதால்  இன்றைக்கு கேசவனின் மச்சான் சுகுமார்தான் கல்லூரியின் சேர்மன்.

கல்லூரி கட்டப்பட்டதிலிருந்தே கல்லூரியில் சுகுமாரின் ஆதிக்கம் இருந்து வருகிறது. கல்லூரியில் நடக்கும் கொலைகளுக்கு சுகுமாரின் பங்களிப்பு அதிகம்.  மேலும் மதகடிப்பட்டு பகுதியிலே இயங்கும் மேல்நிலைப்பள்ளியின் பெற்றோர் சங்க தலைவராகவும் இருப்பவர் இந்த அயோக்கியர். இந்த பள்ளியில் மாணவர்கள் ஏதாவது தமது உரிமைகளுக்காக போராடினால் அதை தமது கூலிப் படையை வைத்து மிரட்டுவதும் உண்டு.

இங்கு கல்லூரி ஆரம்பித்த 14 ஆண்டுகளில் வினோதினி உட்பட 9 மாணவிகள் கல்லூரி வளாகத்திற்கு உள்ளேயே மர்மமான முறையில் இறந்துள்ளனர். இதில் வினோதினி தவிர மற்ற மாணவிகள் விடுதியில் தங்கி படித்தவர்கள் என்பதும் இதில் பலர் வெளி மாநில மாணவிகள் என்பதும் குறிப்பிடத்தக்கது.

2012-ம் ஆண்டு மே மாதம் 2-ம் தேதி திண்டுக்கல் மாவட்டத்தின் ஒட்டன்சத்திரத்தைச் சேர்ந்த முதலாமாண்டு மாணவி நிவேதிதாவும், மே 17-ம் தேதி திருப்பதி மாவட்டத்தைச் சேர்ந்த மூன்றாமாண்டு மாணவி பிரியதர்ஷினியும் கல்லூரி வளாகத்திலேயே தற்கொலை செய்து கொண்டதாக நிர்வாகம் அறிவித்து அவர்களது மரணத்தை மூடி மறைத்தது.

வினோதினி மட்டும் கல்லூரியில் இருந்த பக்கத்து நகரப்பகுதியில் இருப்பதால் வீட்டில் இருந்தே செல்பவர். வினோதினிக்கு முன்பு இறந்துபோன பல மாணவிகளின் மரணத்திற்கு பேராசிரியர்களின் பாலியல் கொடுமைகளும் காரணம் என்பது உரிய முறையில் விசாரிக்கப்படவில்லை. இதற்கு முன்பு இறந்த மாணவிகளைப் பற்றிய செய்திகள் செய்தித்தாள்களில் வெளியாகியிருக்கின்றன.

குறிப்பாக, வினோதினிக்கு முன்பு இறந்துபோன பிரியதர்ஷினியின் பெற்றோர்கள்தான் முதன்முதலில் பிரச்சனையை வெளியில் கொண்டு வந்தார்கள். அதுவும் சில வாரங்களிலேயே சரிக்கட்டப்பட்டது.

பொதுவாகவே கல்லூரி நிர்வாகம் இந்த விசயத்தில் பேரம் பேசியோ அல்லது மிரட்டியோ பிரச்சனையை ’கப்சிப்’ ஆக்குவது வழக்கம். வினோதினி மரணத்திற்கு முன்பு இத்தனை கொலைகளுக்கும் காரணமான கல்லூரி நிர்வாகத்தின் மீது எந்தவிதமான வழக்கும் பதிவு செய்யப்படவில்லை, பிரச்சனையும் பெரிய அளவில் வெளியில் வரவில்லை. ஆனால் வினோதினி மரணத்தில் பிரச்சனை வெளியில் வந்தது, வழக்கு போட்டு 4 பேராசிரியர்கள் கைது செய்யப்பட்டு இருக்கிறார்கள். இதற்கு காரணம் பெற்றோர்கள் அடிபணியவில்லை என்பதுதான் உண்மை. மேலும் ஜனநாயக சக்திகள் மற்றும் மாணவர்களின் மறியல் போராட்டங்களும் காரணம்.

இந்த சமூகத்தில் யாருக்கு அநீதி நடந்தாலும் உழைக்கும் வர்க்கம் அணிதிரண்டு போராடினால் மட்டுமே குற்றவாளிகளை தண்டிக்க முடியும். தனியார்மயம், தராளமயம்,உலகமயம் ஆகிய கொள்கையின் விளைவாக நாடு முழுவதும் இப்படி எண்ணற்ற சமூக விரோதிகளையும், திடீர் பணக்கார அரசியல் ரவுடிகளையும் உருவாக்கி இருப்பதுதான் மிச்சம். இதனால் சாதாரண மக்கள் முதல் நடுத்தர மக்கள் வரையில் பயந்து ஒடுங்கி வாழ வேண்டிய அவல நிலைமைக்கு தள்ளப்பட்டுள்ளார்கள். மக்கள் விரோதிகள் துணிச்சலாக களமிறங்குகிற போது மக்களும் தங்களை பாதுகாத்துக்கொள்ள களம் காண வேண்டியுள்ளது.

மனித சமுதாயத்திற்கு அறிவை வளப்படுத்துவதற்கு உருவாக்கப்பட்ட கல்வி முதலாளித்துவத்தின் லாபவெறிக்கு தள்ளப்பட்டு அறிவை வளப்படுத்துவதற்கு பதிலாக அதிக மார்க், நல்ல ரிசல்ட் இதை காட்டி கல்லுரியை விரிவாக்குவது, பணத்தை குவிப்பது, பெற்றோர்களின் ஈரலை அறுப்பது, மாணவர்களின் எதார்த்த பூர்வமான உணர்வுகளையும், உணர்ச்சிகளையும் தடுத்து சமூகறிவற்ற முண்டங்களாகவும், அடிமைகளாகவும் மாற்றி வருகிறது. இதற்கு தனியார்மய கல்வி முறையே பொறுப்பாக நம்முன் நிற்கிறது. இக்கேடுகெட்ட கல்விமுறைக்கு எதிராக போராடுவதும், அனைவருக்கும் ஆரம்ப கல்வி முதல் ஆராய்ச்சி கல்வி வரை இலவசமாக பெறவும் போராட வேண்டிய கட்டாயம் இந்திய சமுதாயத்தின் மீது நிறுத்தப்பட்டுள்ளது. இதை நாம் உணராவிட்டால் இன்னும் பல வினோதினிகள் மடிந்து கொண்டுதான் இருப்பார்கள்….

[படங்களைப் பெரிதாகப் பார்க்க அவற்றின் மீது கிளிக் செய்யவும்]

இவண்:-
புதிய ஜனநாயகத் தொழிலாளர் முன்னணி – புதுச்சேரி.

மேலும் படிக்க

• Puducherry college girl allegedly commits suicide, relatives cry foul play 

2014, ஜனவரி 17,18,20 தேதிகளில்
சென்னை மாநகராட்சி மண்டல கல்வி அதிகாரிகளுடன்
புரட்சிகர மாணவர் – இளைஞர் முன்னணியும் இணைந்து நடத்திய….
சென்னை மாநகராட்சிப் பள்ளிகளின்

அடிப்படை வசதிகள் பற்றிய ஆய்வறிக்கை

மரியாதைக்குரிய மேயர் அவர்களுக்கு,

வணக்கம்.

ஏழை எளிய மாணவர்கள் அனைவருக்கும் கல்வி கிடைக்கவேண்டும். அதனை தருகின்ற அரசுப்பள்ளிகளை தரம் உயர்த்த வேண்டும் என்பதே எங்கள் நோக்கம். அதன் அடிப்படையில் இந்த கோரிக்கையை அரசிடமும் தொடர்ந்து வலியுறுத்தி வருகிறோம்.

”கண்ணுடைய ரென்பவர் கற்றோர் முகத்திரண்டு
புண்ணுடையர் கல்லா தவர் ” என்றார் வள்ளுவர்.

அப்படிப்பட்ட கல்வியைக் கொடுக்க வேண்டிய பள்ளிக்கூடங்கள் அனைத்து வகையிலும் சிறப்பானதாக இருக்க வேண்டும். அதிலும் மாநகராட்சிப் பள்ளிகள் முன் மாதிரிப் பள்ளிகளாக திகழ வேண்டிய அவசியம் உள்ளது. ஏனெனில் படிப்பு வாசனையே மறுக்கப்பட்டு ஆண்டாண்டு காலமாக ஒடுக்கப்பட்ட மக்களின் பிள்ளைகள் முதல் தலைமுறையாக படிப்பதற்காக வருகின்ற ஒரே இடமாக மாநகராட்சிப் பள்ளிகள் உள்ளன. எனவே இங்கு படிக்கும் பிள்ளைகளுக்கு அதிகப்படியான கூடுதல் கவனம் கொடுக்கப்பட வேண்டும். தரமான கல்வியை, அனைத்து வசதி வாய்ப்புகளும் உள்ள பள்ளிச் சூழலை பணம் படைத்தவர்களின் பிள்ளைகள் மட்டுமே பெறமுடியும் என்பதுதான் தற்போதைய நிலையாக உள்ளது. அதே வகையான கல்வியை ஏழை, எளிய மக்களின் பிள்ளைகளுக்கு வழங்குவதே மாநகராட்சி பள்ளிகளின் நோக்கமாக இருக்கவேண்டும். இந்த பணியை மேற்கொள்வதில் லாப நட்ட கணக்கை பார்க்காமல், தனது முதல் கடமையாகக் கொண்டு செயல்பட வேண்டும். அவ்வாறு இன்றி செலவு கணக்கு பார்க்கக்கூடாது என்கின்ற நியதி தாங்கள் அறிந்ததே.

மேலும் முதல் தலைமுறையாகப் படிக்க வருகின்ற ஒடுக்கப்பட்ட மக்களின் குழந்தைகள் தங்கள் வீடுகளில் தூய்மையை உணரக்கூட முடியாத அளவுக்கு அவர்களை வறுமை வாட்டுகிறது. ஆம், தாயும் தந்தையும் தினசரி வயிற்றுப் பிழைப்புக்கு கூலி வேலைக்கு சென்று அதில் தங்களின் பெரும் நேரத்தை கழிக்கின்றனர். அவர்களின் தங்குமிடமோ குப்பை மேடுகளாக காட்சியளித்து ‘சேரி’ என்று அழைக்கப்படுகின்றது. அப்பிள்ளைகளின் வீடுகளில், பகுதியில் கழிவறை இல்லை. ஆக யாருக்கு எந்த அத்தியாவசியமான ஒன்று தேவைப்படுகிறதோ அதைக் கொடுக்க வேண்டும் என்பது அரசின் தார்மீகக்கடமை. அந்த அடிப்படையில் மாநகரட்சிப்பள்ளிகள் சுகாதாரமாகவும், தூய்மையுடனும் இருக்கவேண்டும். ஆனால் நடைமுறையில் அது இல்லாமல் இருக்கிறது.

பள்ளிக்கு வரும் குழந்தைகளுக்கு படிப்பின் மீது ஆர்வத்தை ஏற்படுத்தும் வகையில் சூழலை அமைத்துத் தரவேண்டும். தனியார் பள்ளிகளில் இருப்பதுபோல மழலையர் பள்ளிகளில் நிறைய விளையாட்டுப் பொருட்கள் இருக்க வேண்டும். ஒவ்வொரு வகுப்பிற்கும் தனியாக பிள்ளைகளைப் பராமரிக்க ஊழியர்கள் (ஆயா) இருக்கவேண்டும்.

ஆர்வத்தை தூண்டும் சிறுகதைகள், பொது அறிவு புத்தகங்கள்கொண்ட நூலகங்கள் கண்டிப்பாக ஒவ்வொரு பள்ளியிலும் இருத்தல் வேண்டும். குழந்தைகளுக்கென தனியாக புத்தகங்கள் (children books) இருக்கவேண்டும்.

வெறும் படிப்பு மட்டும் என்று இல்லாமல் அவர்களின் தங்கும் இடத்தில் மறுக்கப்பட்ட விளையாட்டு பள்ளியில் முறைப்படி கொடுக்கப்பட வேண்டும். எல்லா வகையான விளையாட்டுக்களும் கற்றுத் தரப்படவேண்டும், அவற்றிற்கான விளையாட்டுப் பொருட்களும் ஏராளமாக இருக்க வேண்டும்.

தொழில்நுட்ப வல்லுனர்களைக் கொண்ட குழுவால் பள்ளிக்கட்டிடங்கள், கழிவறைகள், மின் வசதிகள் போன்றவை சோதிக்கப்பட வேண்டும். சோதித்ததன் விபரங்கள் பள்ளியின் அறிவிப்புப் பலகையில் இடம் பெற வேண்டும். அந்தக் குழுவினால் சான்றிதழ் அளிக்கப்படுவது என்பது பள்ளி செயல்படுவதற்கு அத்தியாவசியமான ஒன்றாக மாற்றப்பட வேண்டும். அக்குழு கூறுகின்ற குறைபாடுகளை சீர் செய்வதற்கு அதிகபட்சமாக 1 மாதத்தை மட்டுமே எடுத்துக்கொண்டு போர்க்கால அடிப்படையில் துரிதமாக வேலைகள் செய்யப்பட வேண்டும். அப்போதுதான் நமது குழந்தைகள் ஆரோக்கியமான மாணவர்களாக – அறிவுப்பூர்வமான மாணவர்களாக- சிறப்பான மாணவர்களாக இருக்க முடியும் என கல்வியாளர்கள் வலியுறுத்துகின்றனர்.

இதோடு மட்டுமல்லாமல், தமிழக அரசின் பள்ளிக்கல்வித் துறையே 22.10.2012 அன்று அரசாணை (நிலை) எண் 270 வாயிலாக ஆணை ஒன்றை வெளியிட்டுள்ளது. அதில் அரசு, அரசு உதவிபெறும் மற்றும் தனியார் பள்ளிகளில் இருக்க வேண்டிய குறைந்தபட்ச உட்கட்டமைப்பு வசதிகளைப் பற்றிய விவரங்களையும் அளித்துள்ளது என்பது தாங்கள் அறிந்ததே.

ஆனால் கோடம்பாக்கம் புலியூர் மேல்நிலைப்பள்ளி, அமைந்தகரை பெண்கள் மேல்நிலைப்பள்ளி ஆகிய பள்ளிகளில் அடிப்படை வசதிகளே முழுமையாக இல்லை. இதனை செய்துதரக் கோரி கடந்த அக்டோபர் மாதம் தங்களை சந்தித்து மனு கொடுத்திருந்தோம். ஆனால் மேற்கொண்டு அந்தப் பள்ளிகளில் கொடுத்த மனுவின் மீது எந்த நடவடிக்கையும் எடுக்கப்படவில்லை. இது தொடர்பாக இரண்டு முறை நினைவூட்டல் மனுவும் கொடுத்தோம். ஆனால் அதன் மீதும் எந்த நடவடிக்கையும் எடுக்கப்படவில்லை.

இந்த நிலையில்தான் கடந்த ஜனவரி மாதம் 10-ம் தேதி மணலி புதுநகர், சடையன்குப்பம் மாநகராட்சி நடுநிலைப் பள்ளியில் மேற்தளம் இடிந்து விழுந்து, இரண்டு மாணவர்கள் படுகாயமடைந்தனர். அதில் குறிப்பாக, ஆகாஷ் என்ற மாணவனுக்கு, தலையில் அடிபட்டு, படுகாயமடைந்துள்ளான். அருகில் எந்த அரசு மருத்துவமனையும் இல்லாததால், ஒரு தனியார் மருத்துவமனையில் சேர்த்து சிகிச்சை அளித்துள்ளனர். அம்மாணவனின் குடும்ப பின்னணி மிகவும் ஏழ்மையானது. விரிக்க பாய் கூட இல்லாத நிலையில்தான் அக் குடும்பத்தின் வாழ் நிலை உள்ளது. இந்த நிலையில், கடனை வாங்கித்தான் அம்மாணவனின் குடும்பத்தினர் சிகிச்சை பார்த்துள்ளனர். இதுவரை எந்த அதிகாரியும் வந்து பாதிக்கப்பட்ட மாணவர்களை பார்க்கவில்லை.

சடையன் குப்பம் பள்ளிக்கு நாங்கள் நேரில் சென்று பார்த்த போதுதான் அப்பள்ளியை மாணவர்கள் பயன்படுத்தவே முடியாத சூழ் நிலையில் இருப்பதை அறிந்து கொண்டோம். அந்தக்கட்டிடங்கள் மிகவும் சிதிலமடைந்து எந்த நேரமும் இடிந்து விழலாம் என்ற அபாயகரமான நிலைமையில் இருந்ததைப் பற்றி கவலைப்படாமல் பள்ளி நடத்தப்பட்டு கொண்டிருந்தது.

இந்த சூழலில்தான், கடந்த ஜனவரி மாதம் 13-ம் தேதி, பாதிக்கப்பட்ட மாணவர்களுக்கு நட்ட ஈடு வழங்க வேண்டும், அனைத்து மாநகராட்சி பள்ளிகளிலும், அடிப்படை வசதிகளை நிறைவேற்ற வேண்டும் என்ற கோரிக்கைகளை முன்வைத்து, சென்னை மாநகராட்சி அலுவலகத்தின் முன்பு, ஆர்ப்பாட்டம் நடத்தினோம். அதன் பிறகு தங்களை சந்தித்து பேசினோம்.

அவ்வாறு பேசியதில், மாநகராட்சி பள்ளிகளை தரம் உயர்த்த, ஆதாரபூர்வமாக தகவல்கள் தேவை. ஆகவே, 10 மண்டலங்களிலும் உள்ள மாநகராட்சி பள்ளிகளை, மாநகராட்சி அதிகாரிகளுடன் புரட்சிகர மாணவர் இளைஞர் முன்னணியும் சென்று கள ஆய்வு செய்து அறிக்கை சமர்ப்பிக்குமாறு கூறினீர்கள். அந்த அடிப்படையில் 10 மண்டலங்களிலும் அதிகாரிகள் ஒத்துழைப்பு அளித்த இரண்டு நாட்களில் மட்டும் 57 பள்ளிகளில் ஆய்வுகளை மேற்கொண்டோம்.

இந்த ஆய்வின் மூலம் சேகரித்த தகவல்களை கீழ்க்கண்ட வகையில் அறிக்கையாக தொகுத்துள்ளோம். இதன்படி பார்க்கும்போது, 22.10.2012 அன்று அரசாணை(நிலை)எண் 270 வாயிலாக ஆணை யில் உள்ளபடி எந்த ஒரு மாநகராட்சிப் பள்ளியும் செயல்படவில்லை என்பதே நிலைமையாக உள்ளது. அதன் அடிப்படையில் கீழ்காணும் விபரங்களை தங்களின் கவனத்திற்கு கொண்டு வருகின்றோம்.

I. குடிநீர்

22.10.2012 அன்றைய அரசாணை (நிலை) எண் 270 , குடிநீரை பற்றி சொல்லும் விதிகள்:

1. பாதுகாப்பான குடிநீர் தரப்பட வேண்டும், குடிநீர் சேமித்து வைக்கும் தொட்டிகள் தூய்மையான முறையில் இருத்தல் வேண்டும். எப்போது யாரால் எப்படி சுத்தம் செய்யப்பட்டது என்பதற்கான பதிவேடு பராமரிக்கப்பட வேண்டும். குடிநீர் உரிய முறையில் சுத்திகரிக்கப்பட்டு பாதுகாப்பான முறையில் விநியோகிக்கப்பட வேண்டும்.
2. மேலும் 20 மணவர்களுக்கு 1 குழாய் என்ற வீதத்தில் குடிநீர்க்குழாய்கள் ஏற்படுத்தப்பட்டிருத்தல் வேண்டும்
3. பாத்திரங்கள் கழுவ, கை, கால்கள் கழுவ 20 மாணவர்களுக்கு 1 குழாய் என்ற அளவில் தண்ணீர் வசதி ஏற்படுத்தப்பட்டிருத்தல் வேண்டும். தரை வழுக்கல் இன்றி அமைக்கப்பட்டு இருக்க வேண்டும்.

(பள்ளிகளில் குடிநீர் வசதி குறித்த தரவுகள் அட்டவணை 1-ல்)

ஆய்வுக்கு சென்ற அனைத்துப் பள்ளிகளிலும், அரசாணையில் குறிப்பிட்டுள்ளபடி, 20 பேருக்கு ஒரு குடிநீர் குழாய், 20 பேருக்கு கை கழுவ தனியே ஒரு குழாய் என்ற அடிப்படையில் எங்குமே இல்லை. மேலும் சில பள்ளிகளில், குடிநீர் வசதி இல்லாமல் வெளியில் இருந்தோ, வீட்டில் இருந்தோதான் தண்ணீர் எடுத்து வந்து குடிக்கின்றனர் அல்லது தண்ணீரையே குடிக்காமல் இருக்கின்றனர். இதற்கான காரணங்கள், ஒன்று தண்ணீர் இல்லாமல் இருப்பது. மற்றொன்று, இருந்தும் அசுத்தமாக இருப்பது ஆகியவைகளே. மேலும் பெரும்பாலான பள்ளிகளில் குடிநீர் சுத்திகரிக்கப்படுவதற்கான வசதிகள் இல்லாமல் இருப்பதை கண்டோம்.. சில பள்ளிகளில் குடிநீர் ஒரு நாளைக்கு இரண்டு அல்லது மூன்று முறைதான் வரும் என்ற நிலைமைதான் உள்ளது.

மண்டலம் – 7 ஆயிரம் விளக்கு உயர்நிலைப் பள்ளியில் பள்ளிக்கு வரும் குடிநீர் லைனில் இருந்து அருகில் உள்ள தனியார் நிறுவனங்கள் இன்னொரு லைன் போட்டு தண்ணீர் எடுத்துள்ளனர். இதன் காரணமாக பள்ளிக்கு தண்ணீர் வரத்து அறவே இல்லை. இதனை உடனே சீர் செய்ய வேண்டும்.

ஒரு நாளைக்கு 5 லிட்டர் தண்ணீர் குடிக்க வேண்டும் என்ற இயற்கை விதியின் அடிப்படையில் மாணவர்களால் குடிநீர் குடிக்க முடியாமல் போகிறது. இதன் மூலம் அவர்களின் உடல்நிலை பாதிக்கப்படுவது மட்டுமின்றி, கல்வி கற்கும் மனநிலையும் பாதிக்கப்படுகிறது என்று கருதுகிறோம். எனவே அரசாணையில் குறிப்பிட்டுள்ளபடி, குடிநீருக்கான வசதிகளை ஏற்படுத்திக் கொடுப்பதன் மூலம்தான் கல்வி கற்கும் சூழலை மேம்படுத்த முடியும் என்று கோருகிறோம்.

II. கழிவறை

பள்ளிக்கல்வி (எக்ஸ்.2)த் துறை அரசாணை நிலை எண்.270

1. 20 மாணவர்களுக்கு 1 சிறு நீர் கழிப்பறை மற்றும் 50 மாணவர்களுக்கு 1 மலக்கழிப்பறை என்ற அளவில், புதிய அளவில், போதிய இடைவெளியில் கழிப்பறைகள் காற்றோட்டம் / போதிய வெளிச்சத்துடன் பாதுகாப்புடன் அமைக்கப்பட்டிருத்தல் வேண்டும். இவை அன்றாடம் தூய்மையாகப் பேணப்பட வேண்டும். கிருமி நாசினி தெளித்து ஆரோக்கியமான முரையில் பயன்படுத்தப்பட வேண்டும். குறிப்பாக வகுப்பறையை ஒட்டியே கடைசியாக அமைக்கப்பட வேண்டும். தனியே மைதானத்திலோ அல்லது ஆள் நடமாட்டம் இல்லாத பகுதியிலோ அமைதல் கூடாது. கட்டிட உறுதி / உரிமச் சான்றுகள் கழிப்பறைகளுக்கும் அவசியம்.
2. கழிப்பறைகள் தண்ணீர் குழாய் வசதியுடன் கூடியதாக இருத்தல் வேண்டும்
3. தண்ணீர்த்தொட்டிகள் மாணாக்கர்களால் திறக்க முடியாதபடி மூடப்பட்டு இருக்க வேண்டும். மழலையர் மற்றும் தொடக்க நிலை வகுப்பு குழந்தைகள், நடத்தாட்டிகள் உதவியுடன் கழிவறைக்கு சென்று வர ஏற்பாடுகள் செய்துதர வேண்டும்.

(பள்ளிகளில் கழிவறை வசதி குறித்த தரவுகள் அட்டவணை 2-ல்)

ஆய்வுக்கு சென்ற அனைத்துப் பள்ளிகளிலும், அரசாணைப்படி 50 பேருக்கு ஒரு கழிவறை, 20 பேருக்கு ஒரு சிறுநீர் கழிப்பிடம் என்ற அடிப்படையில் கழிவறை வசதி இல்லை. எல்லா பள்ளிகளிலும் துப்புரவுப் பணியாளர்கள் அதற்கென்று நிரந்தரமாக இல்லாததால், தொடர்ச்சியாக பராமரிக்காமல் கழிவறைகள் அசுத்தமடைந்துள்ளன. மாத சம்பளம் ரூ.350/- அல்லது ஒப்பந்த அடிப்படையில் குறைவான சம்பளத்தில் நியமிக்கப்பட்டுள்ள ஊழியர்களே உள்ளனர். இதனால் முறையான பராமரிப்பு இல்லாமல் பல பள்ளிகளில் கழிவறைகள் இழுத்து மூடப்பட்டுள்ளன. சில பள்ளிகளில் கதவு இல்லாமல் உள்ளது. தண்ணீர் பற்றாக்குறை முக்கியமாக உள்ளது. அதே போல் மாற்றுத்திறனாளிகளுக்கான கழிப்பறை வசதியும் இல்லை.

பெண்களுக்கு பிரத்தியேகமான கழிப்பறை வசதியும் இல்லை. குறிப்பாக பெண்களுக்கான கழிவறைகள், SANITARY NAPKIN DESTROYER, வசதிகள் கொண்ட GIRLS FRIENDLY TOILET என்ற முறையில் இருக்க வேண்டும். ஆனால் இந்த முறையில் பெண்கள் கழிவறைகள் அமைக்கப்படவில்லை. விதிவிலக்காக அமைந்தகரை பெண்கள் மேல்நிலைப்பள்ளியில் (மண்டலம் – 5) இவ்வசதி இருந்தும் பராமரிப்பில்லாமல் உள்ளது.

குறிப்பிட்ட நேர இடைவெளியில் உடலில் உருவாகும் கழிவுகளை வெளியேற்றுவது மிகவும் அவசியம். ஆனால் அதற்கான வசதிகள் இல்லாதபோது, மாணவர்களுக்கு சிந்தனை ரீதியாகவும், உடல் ரீதியாகவும் பிரச்சினைகள் ஏற்படும். குறிப்பாக, பெண்கள் 94% பேர் இதனாலேயே மேல்நிலை பள்ளி படிப்பை நிறுத்திவிடுவதாக ஒரு ஆய்வறிக்கை கூறுகிறது.

எனவே ஒவ்வொரு பள்ளியிலும் மாணவர்களின் எண்ணிக்கைக்கு ஏற்ப கழிவறைகளை கட்டித்தரவும் SANITARY NAPKIN DESTROYER வசதிகள் கொண்ட GIRLS FRIENDLY TOILET ஆகியவற்றை செய்து தரவும் பள்ளிகளுக்கு நிரந்தரமான துப்புரவுப் பணியாளர்கள், தேவையான தண்ணீர் வசதி ஆகியவற்றை உடனே செய்து கொடுக்க வேண்டும் என கோருகிறோம்.

III. ஆசிரியர்கள்

பெரும்பாலான பள்ளிகளில் மாணவர்களின் எண்ணிக்கைக்கு போதுமான, அதாவது வகுப்பறைக்கு ஒரு ஆசிரியர் என்ற அளவில் ஆசிரியர்கள் இல்லை. மாணவர்களுக்கு ஏற்ப ஆசிரியர் எண்ணிக்கை இருக்கும்போதுதான் மாணவர்களை தரமானவர்களாக உருவாக்க முடியும் என்பது தாங்கள் அறிந்ததே. பெரும்பாலான அரசுப்பள்ளி மாணவர்களின் பெற்றோர்கள் உதிரித் தொழிலாளிகளாக வேலை செய்பவர்கள். அவர்களுக்கு தங்கள் பிள்ளைகளை கவனித்துக் கற்றுக் கொடுக்க போதுமான நேரம் இருக்காது. எனவே ஆசிரியர்கள் எடுக்கும் கவனம், அக்கறையின் மூலம் மட்டுமே மாணவர்களின் கல்வித்தரம் உயர முடியும். மாணவர் எண்ணிக்கை அதிகமாக உள்ளது என்று காரணம் காட்டி 60 மாணவர்களுக்கு 1 ஆசிரியர் என்ற நிலை சில பள்ளிகளில் உள்ளது.

சில இடங்களில் மாணவர் எண்ணிக்கை குறைவாக உள்ளது, எனவே தற்போது உள்ள ஆசிரியர்களே போதுமானதாக உள்ளதாக தலைமை ஆசிரியர்கள் கூறுகின்றனர். vவகுப்புக்கு ஒரு ஆசிரியர் என்பது இல்லாமல், மொத்த மாணவர் எண்ணிக்கையிலிருந்து ஆசிரியர் எண்ணிக்கையை கணக்கிடுகின்றனர். உதாரணமாக k c கார்டன் நடுநிலைப் பள்ளியில் 8 வகுப்புக்கள் உள்ளன. அங்கு மாணவர் எண்ணிக்கை 37 மட்டும் உள்ளது. இதனை காரணமாக காட்டி இருந்த 4 ஆசிரியர்களிலிருந்து ஒரு ஆசிரியரை குறைத்துள்ளனர். உண்மையில் மாணவர் எண்ணிக்கை குறைந்தால் அதற்கான காரணத்தை கண்டறிந்து, மாணவர்கள் எண்ணிக்கையை உயர்த்தும் முயற்சியைத்தான் மேற்கொள்ளவேண்டும். அதை விடுத்து ஆசிரியர்களை குறைப்பது பிரச்சினையை தீர்க்காது. மாறாக பற்றாக்குறையின் காரணமாக ஆசிரியர்கள் கூடுதல் பணிச்சுமைக்கு ஆளாவதே நேரிடுகிறது. இதனால் மாணவர்களை நெருக்கமாக இருந்து கவனிக்க முடியாமல் போவதால், மாணவர்களின் கல்வித்தரமும் தாழ்ந்துபோகிறது.

மேலும் உள்ள மிகமிக முக்கியமான பிரச்சினை எல்லா பள்ளிகளிலும் எழுத்தர், அலுவலக உதவியாளர் போன்ற பணிகளுக்கு தனியான அலுவலர்கள் இல்லை. இந்த வேலைகளையும் ஆசிரியர்களே செய்ய வேண்டியுள்ளதால் அவர்களின் பணிச்சுமை அதிகரிக்கின்றது. இதனால் மாணவர்களுக்கு அவர்கள் கொடுக்கும் கவனம் குறைகின்றது. எனவே இத்தகைய பணிகளுக்கு பணியாளார்கள் உடனடியாக நியமிக்கப்படவேண்டும்.

சில பள்ளிகளில் ஆசிரியர்கள் பணி நிரந்தரம் இல்லாமல் வேலை செய்து வருகின்றனர். உதாரணத்திற்கு, சென்னை பெண்கள் மேல்நிலைப்பள்ளி, 678, புத்தா தெரு, கொருக்குப்பேட்டையில் உள்ள பள்ளியில் PTA மூலமாக வேலை பார்க்கும் 6 ஆசிரியர்கள் பணி நிரந்தரம் செய்யப்படாமல் உள்ளனர்.

இசை, ஓவியம், தொழில் பயிற்சி போன்ற துணைப்பாடங்கள் எல்லா பள்ளிகளிலும் இல்லை. இருக்கும் ஒரு சில பள்ளிகளிலும் அந்த பாடங்களுக்கான நிரந்தரமான ஆசிரியர்கள் இல்லை.

அதே போல உடற்பயிற்சி, கம்ப்யூட்டர் சயின்ஸ், போன்றவற்றிற்கு நிரந்தரமான ஆசிரியர்கள் இல்லாமல் வாரத்திற்கு மூன்று அரைநாட்கள் ஒப்பந்த அடிப்படையில் நியமிக்கப்பட்டவர்கள் மூலம் பாடங்கள் எடுக்கப்படுகின்றன.

அதே போல், நூலகர் என்று தனியே எந்த பள்ளியிலும் இல்லை, அந்த பணியையும் இருக்கும் ஆசிரியர்களை வைத்துதான் நிறைவேற்றுகிறார்கள். இதனால், அந்த ஆசிரியர் தனக்கென உள்ள பாடத்துக்கு முழுமையாக நேரம் ஒதுக்கும் வாய்ப்பில்லாமல் போகிறது. அதேபோல நூலகங்களும் முறையாக இயங்குவது இல்லை எனவே, உடற்பயிற்சி, கம்ப்யூட்டர் சயின்ஸ், நூலகர் போன்றவற்றிற்கு நிரந்தரமாக ஆசிரியர்கள் நியமிக்கப் படவேண்டும்.

ஆசிரியர்கள் முழுக்க முழுக்க மாணவர்களின் தரத்தை உயர்த்த நேரத்தை ஒதுக்கும்பொழுதுதான் நல்ல மாணவர்களை உருவாக்க முடியும் என்பது தாங்கள் அறிந்ததே. ஆசிரியர்கள் பற்றாக்குறை இல்லாமல், கல்வி தரத்தை உயர்த்தும் போதுதான் மாணவர் சேர்க்கையை உறுதிப்படுத்த முடியும்.

எனவே, அரசாணைப்படி 30 மாணவர்களுக்கு ஒரு ஆசிரியர் என்ற அடிப்படையிலும், மாணவர் எண்ணிக்கை குறைவாக இருந்தாலும் வகுப்புக்களின் எண்ணிக்கைக்கேற்ற ஆசிரியர்களையும் நியமனம் செய்ய வேண்டும். ஓவியம், இசை போன்ற துணைப்பாடங்களுக்கான ஆசிரியர்களையும் உடனடியாக நியமிக்க வேண்டும். எழுத்தர், அலுவலக உதவியாளர் போன்ற பணிகளில் எல்லாப் பள்ளிகளிலும் நிரந்தர ஊழியர்களை நியமிக்க வேண்டும். ஒப்பந்த அடிப்படையில் வேலை செய்யும் ஆசிரியர்களை பணி நிரந்தரம் செய்ய வேண்டும் என்று கோருகிறோம்.

(பள்ளிகளில் ஆசிரியர்கள் எண்ணிக்கை குறித்த தரவுகள் அட்டவணை 3-ல்)

IV. அடிப்படை பணியாளர்கள்

1. துப்புரவுப் பணியாளர்கள் ;

துப்புரவுப் பணியாளர்களில் இரு வகையானவர்கள் உள்ளனர். மாநகராட்சி மூலமாக மாதம் ரூ 335.00 ஊதியம் பெறுபவர்கள், ஒப்பந்த அடிப்படையில் மாதம் ரூ 1500.00 ஊதியம் பெறுபவர்கள். ஒரு நாளைக்கு கழிவறைகளை மூன்று முறை தூய்மைப்படுத்த வேண்டியது அவசியம். ஆனால் பெரும்பாலான பள்ளிகளில் பணியாளர்கள் இல்லாததால் துப்புரவுப் பணி எப்போதாவதுதான் மேற்கொள்ளப்படுகிறது. இதனால் பள்ளியின் தூய்மை பாதிக்கப்படுகின்றது.

அதுமட்டும் இல்லாமல், வகுப்பறை மற்றும் வளாகங்களை தூய்மைப்படுத்தவதற்கு பணியாளர்கள் இல்லாததால், வளாகங்கள் புதர்கள் மண்டி காட்சியளிக்கின்றன.

மேலும் துப்புரவுப் பணியாளர்களுக்கு வழங்கப்படும் ஊதியம் ரூ. 350 என்பது மிகவும் குறைவாக உள்ளது. இது அவர்களின் வாழ்க்கைத் தேவைகளுக்கு போதுமானதாக இல்லை. எனவே துப்புரவு பணியில் அவர்களால் நிரந்தரமாக ஈடுபட முடியாமல் போகிறது.எனவே மாநகராட்சியே நிரந்தரமான துப்புரவுப் பணியாளர்களை நியமித்து, அவர்களுக்குப் போதுமான ஊதியத்தை வழங்க வேண்டும். இதன் மூலமே பள்ளியை தூய்மையாக வைத்துக் கொள்வது சாத்தியம் என கருதுகிறோம்.

2. காவலர்கள்

பெரும்பாலான பள்ளிகளில் பகல், இரவு நேர காவலர்கள் இல்லை. அப்படியே இருந்தாலும், ஒப்பந்த அடிப்படையில் ரூ.1500 சம்பளத்திற்கு வேலை செய்பவர்களாக உள்ளனர். இந்த ஊதியம் போதுமானதாக இல்லை. எனவே இவ்வேலையில் நிரந்தரமாக யாரும் இருப்பது இல்லை. இவ்வாறு காவலர்கள் இல்லாமல் இருப்பதால் இரவு நேரங்களில் பள்ளி வளாகத்தில் மது அருந்துவது, பொருட்களை சேதாரப்படுத்துவது என்பது பெரும்பாலான பள்ளிகளில் நடைபெறுகிறது. இது பள்ளியில் பாதுகாப்பற்ற சூழலையும், அச்சத்தையும் ஏற்படுத்துவதாக உள்ளது. குறிப்பாக 731, திருவொற்றியூர் நெடுஞ்சாலை, சென்னை மேல்நிலைப்பள்ளியில் வெளியாட்களின் பிரச்சினை அதிகமாக உள்ளது.

எனவே, எல்லாப் பள்ளிகளுக்கும் மாநகராட்சியே நிரந்தரமாக பகல், இரவு நேர காவலர்களை நியமித்து, அவர்களுக்குப் போதுமான ஊதியம் வழங்க வேண்டும் என கோருகிறோம்.

3. பிளம்பர், எலக்ட்ரீசியன்

எந்தப்பள்ளியிலும், முறையாக ப்ளம்பர், எலக்ட்ரீசியன்கள் இல்லை. பிரச்சினை ஏற்படும்போது. மண்டல அலுவலகத்திற்கு சொன்னாலும் முறையாக வருவதில்லை. சில வந்தாலும் உடனடியாக வருவதில்லை. இதனால் வெளியிலிருந்து ஆட்களை வரவைத்து பள்ளி நிர்வாகமே சரி செய்ய வேண்டியுள்ளது.

இதனால் மோட்டார் பழுதடையும்போது எலக்ட்ரீசியன் வருவதற்கு தாமதம் ஆவதால், கழிவறைக்கு தண்ணீர் பயன்படுத்த முடிவதில்லை. குறிப்பாக, சென்னை பெண்கள் மேல்நிலைப்பள்ளி, 678, புத்தா தெரு, கொருக்குப்பேட்டையில் உள்ள பள்ளி இப்பிரச்சினையில் அதிகமாக பாதிக்கப்பட்டுள்ளது. சென்னை நடுநிலைப்பள்ளி, ஆர்.ஆர்.புரம். கொருக்குப்பேட்டை (மண்டலம் 1) யில் மின்வயர்கள் அறுந்து ஆபத்தான நிலையில் உள்ளன. ஆனால் எலக்ட்ரீசியன் பிரச்சினையால் பராமரிப்பில்லாமல் அப்படியே உள்ளது.

V. கட்டுமான வசதி

வகுப்பறைகளைப் பொறுத்தவரை, நிறைய பள்ளிகளில் 50க்கும் மேற்பட்ட மாணவர்களுக்கு ஒரு வகுப்பறை என்ற நிலை உள்ளது. அதனால் இட நெருக்கடியான சூழலிலேயே மாணவர்கள் கல்வியினை கற்கும் நிலை உள்ளது. சில பள்ளிகளில் தற்போது மாணவர்களின் எண்ணிக்கை குறைந்து இருப்பதால், வகுப்பறைகள் போதுமானதாக இருக்கிறது. மாணவர்கள் முழுமையாக சேரும்போது வகுப்பறைகள் போதாது.

1. விளையாட்டு

பள்ளிக்கல்வி (எக்ஸ்.2)த் துறை அரசாணை நிலை எண்.270

வளாகம் / வகுப்பறை
பள்ளிகளில் விளையாட்டு மைதானங்கள் மற்றும் காலி இடங்களில் கூர்மையான பொருட்கள் துருப்படித்த ஆணிகள், கம்பு போன்றவைகள் அகற்றப்பட்டு மாணவர்களின் பாதுகாப்பு உறுதி செய்யப்பட வேண்டும். விளையாட்டுக்கருவிகள் உடைந்த நிலையில் ஒட்டப்பட்டதாகவும் துருப்பிடித்தும் திருகு கழன்ற நிலையில் உயவு இன்றி இருப்பின் உடனுக்குடன் மாற்றப்பட வேண்டும். வகுப்புத்துவக்கத்தில் உடற்கல்வி ஆசிரியர் விளையாட்டுக் கருவிகளை சரியாக உள்ளதா? என சரிபார்த்தப் பிறகே விளையாட அனுமதிக்க வேண்டும். எக்காரணத்தினை முன்னிட்டும் வில் விளையாட்டு ஆசிரியர் துணை இன்றி விளையாடக்கூடாது. வீர விளையாட்டுக்கள் பள்ளி நிலையில் அவசியம் இல்லை. பாடத்திட்டத்தில் வரையறுக்கப்பட்ட விளையாட்டுக்களை விளையாடும் சமயம் தகுந்த பாதுகாப்பு / முதலுதவி வசதியுடன் மாணவர்கள் குறுக்கும் நெடுக்குமாகப் போகாதபடி எச்சரிக்கையுடன் பார்த்து கவனமாக விளையாட வேண்டும்.

ஆனால் நாங்கள் ஆய்வுக்கு சென்ற பள்ளிகளில் பெரும்பாலானவைகளில் விளையாட்டு மைதானம் கிடையாது. அப்படி விளையாட்டு மைதானம் இருக்கும் பள்ளிகளிலும் விளையாட்டு உபகரணங்கள் குறைவாக இருக்கிறது அல்லது இல்லை. அப்படி இருந்தும் சில பள்ளிகளில் மாணவர்கள் விளையாட்டு போட்டிகளில் சிறந்து விளங்குகின்றனர். (சென்னை பெண்கள் மேல்நிலைப்பள்ளி, 678, புத்தா தெரு, கொருக்குப்பேட்டையில் உள்ள பள்ளி) வசதிகள் ஏற்படுத்தி கொடுத்தால் இன்னும் சிறப்பாக செய்வர்.

அதேபோல் எந்தப்பள்ளியிலும் PET ஆசிரியர்கள் நிரந்தரமாக இல்லை. குறிப்பிட்ட நேரத்தில் மட்டும் வந்து விட்டு செல்வது என்ற அடிப்படையிலேயே உள்ளது. PET ஆசிரியர்கள் நிரந்தரமாக இல்லாமல் மாணவர்களை விளையாட்டுக்களில் தகுதியுடையவர்களாக ஆக்க முடியாது. மேலும் உடல்நலமே அவர்களின் கல்விச் சூழலை மேம்படுத்தவும் உதவும் என்பது தாங்கள் அறிந்ததே.

எனவே, அரசாணை விதிப்படி, விளையாட்டு மைதானம், விளையாட்டு உபகரணங்கள், நிரந்தர PET ஆசிரியர் உள்ளிட்ட வசதிகளை எல்லா மாநகராட்சி பள்ளிகளிலும் நிறைவேற்றித் தர நடவடிக்கை எடுக்குமாறு கோருகிறோம்.

2. சத்துணவு

மாணவர்களுக்கு போதுமான சாப்பாடு தட்டுக்கள், தட்டுக்களை வைக்க அலமாரி வசதி, சத்துணவுக்கு தேவையான கேஸ், சத்துணவு அறைக்கே தண்ணீர் குழாய் வசதி , சத்துணவு அறையில் மேம்படுத்தப்பட்ட கட்டுமான வசதி போன்றவை எல்லா மாநகராட்சி அரசுப்பள்ளிகளிலும் இல்லை. இவற்றை நிறைவேற்றித் தர நடவடிக்கை எடுக்க கோருகிறோம்.

அதேபோல் அனைத்து ஆரம்ப பள்ளிகளிலும் ஆயா பணிகளுக்கு என ஆட்கள் எங்கும் இல்லை. (குறிப்பாக, சென்னை நடுநிலைப்பள்ளி, அரங்கநாதபுரம்) இது குழந்தைகளின் பாதுகாப்புக்கு மிகுந்த அவசியம் என கருதுகிறோம். எனவே எல்லா ஆரம்ப பள்ளிகளிலும் ஆயா பணிக்கு ஆட்களை மாநகராட்சியிலிருந்து நியமிக்க கோருகிறோம்.

3. ஆய்வகம்

பெரும்பாலான பள்ளிகளில் ஆய்வகங்கள் பெயரளவுக்கே உள்ளன.

ஆய்வகம் மாணவர்கள் மொத்தமாக ஒரே சமயத்தில் ஆய்வு செய்யும் அளவில் இருக்காது. ஷிஃப்ட் முறையில் மாணவர்கள் ஆய்வு செய்கின்றனர். இதனால் ஒரே நேரத்தில் எல்லா மாணவர்களுக்கும் ஆசிரியர் பயிற்சி கொடுப்பதற்கு முடிவதில்லை. நேரமும் விரயமாகிறது. எனவே பரப்பளவு பெரியதாக ஆய்வகங்கள் அமைக்கப்பட வேண்டும்.

ஆய்வகத்தில் ப்ளக் பாயிண்ட் (மின்வசதி) மற்றும் தண்ணீர் ஆகியவை ஆய்வு செய்யும் மேடைக்கு அருகிலேயே இருக்க வேண்டும் என்று விதி இருந்தாலும் அவ்வாறு மின்சாரம் தண்ணீர் வசதிகள் இல்லை. அதேபோல் ஆய்வகங்களில் முதலுதவி பெட்டி இல்லை. தீயணைப்பான் போன்ற பாதுகாப்பு உபகரணங்கள் முழுமையாக இல்லை. மேற்கண்ட வசதிகளை ஏற்படுத்தி தரவேண்டும் என கோருகிறோம்.

முக்கியமாக, Lab Assistant என்பவர் இல்லை. இதை கவனத்தில் கொண்டு எல்லா மாநகராட்சி பள்ளிகளிலும் மாநகராட்சி மூலமாக நிரந்தரமாக Lab Assistant நியமிக்க வேண்டும் என கோருகிறோம்.

4. மருத்துவ வசதி

பள்ளிக்கல்வி (எக்ஸ்.2)த் துறை அரசாணை நிலை எண்.270
vi) பள்ளிகளில் மாணவர்கள் எண்ணிக்கை 1500க்கு மேல் இருப்பின் முறையான முழு நேர மருத்துவ சேவை வசதிகள் இருக்க வேண்டும்.

இந்த ஆணையின்படி நாங்கள் சென்ற எந்த ஒரு பள்ளியிலும் மருத்துவ சேவை இல்லை. ஆகவே 1500 மாணவர்களுக்கு மேல் உள்ள பள்ளிகளில் முழு மருத்துவ சேவையை உடனே தொடங்க வேண்டும் என்று கேட்டுக்கொள்கிறோம்.

சிதிலமடைந்து உடனடிக் கவனம் தேவைப்படும் பள்ளிகள்

1. மணலி புதுநகர் சடையன்குப்பம் மாநகராட்சி நடுநிலைப்பள்ளியில் (மண்டலம் 1), கட்டிடம் மிக அபாயகரமான நிலைமையில் உள்ளது. மேற்கூரை எப்போது வேண்டுமானாலும் இடிந்து விழும் நிலையில் உள்ளது.
2. சென்னை நடுநிலைப்பள்ளி, அரங்கநாதபுரம், கொருக்குப்பேட்டை, செ- 21 ல் (மண்டலம் 1) உள்ள பள்ளியின் கட்டிடமும் அபாயகரமான நிலைமையில் உள்ளது. எப்போது வேண்டுமானாலும் இடிந்து விழலாம். இருக்கும் ஒரே வகுப்பறையில் 65 மாணவர்கள் உள்ளனர். இரண்டு இடங்களில் மேற்தளம் பெயர்ந்துள்ளது. மழை பெய்தால் தண்ணீர் கணுக்கால் அளவு வகுப்பறைக்குள் தேங்கி விடுகிறது. ஜன்னல் இல்லாமல் உள்ளது. பள்ளியின் சுற்றுச்சுவர் இடிந்து விழுந்துள்ளது. பெஞ்சுகள் உடைந்துள்ளன. பல வருடங்களாக பெயிண்ட் அடிக்காமல் கட்டிடங்கள் பழுதடைந்துக் காணப்படுகின்றன.
3. அதேபோல் CPS RR நகர் (மண்டலம் 1) பள்ளியில் சுற்றுச் சுவர் சேதமடைந்ந்துள்ளது. வராண்டாவில் உள்ள விளக்குகள் உடைந்துள்ளன. மின்சார வயர்கள் பராமரிப்பில்லாமல் ஆபத்தான நிலைமையில் தொங்கிக் கொண்டுள்ளன. சுற்றுப்புறத்தில் குப்பை கொட்டும் இடம் உள்ளதால், மாசுபட்ட சூழலுக்கு நடுவில்தான் மாணவர்கள் படிக்கின்றனர்.
4. திருவல்லிக்கேணி (மண்டலம் 6 ) ல் உள்ள சில பள்ளிகளிலும் மேற்கண்ட நிலைமைதான் உள்ளது
5. மண்டலம் 1 ல் (திருவொற்றியூர்) சென்னை நடுநிலைப்பள்ளி, கார்ணேசன் நகர், கொருக்குப்பேட்டை, செ – 21. இப்பள்ளியில் பள்ளிக் கட்டிடம் பல ஆண்டுகளுக்கு முன்னர் இடிக்கப்பட்டது. ஏறக்குறைய ஒன்றரை ஆண்டுகளாக கட்டுமானப் பணிகள் முடிக்கப்படாமல் அப்படியே உள்ளது. கட்டிடத்தில் தண்ணீர் தேங்கி உள்ளது. இது மாணவர்களுக்கு தொற்றுநோய் ஏற்படுத்தும் வகையில் அபாயமாக உள்ளது.

மேலும் அரசின் இலவச பொருட்கள் தரும் இடமாக பயன்படுத்துவது, ஆதார் அட்டை கொடுக்கப் பயன்படுத்துவது என்பது அனைத்துப் பள்ளிகளிலும் நடக்கிறது. இதனால் பள்ளிகளில் வகுப்பறை பற்றாக்குறை ஏற்பட்டுள்ளது. இதனை தவிர்த்து அரசின் இலவச பொருட்களை மண்டல அலுவலகத்திலேயே கொடுப்பதற்கு ஏற்பாடுகள் செய்தல் வேண்டும்.

மேற்கண்ட விபரங்களின் அடிப்படையில் பள்ளியின் கட்டுமான வசதியானது பெரும்பாலும் மோசமான நிலைமையில் உள்ளது. இவற்றைக் கணக்கில் கொண்டு, அரசாணை எண் 270 விதிப்படி, கட்டுமான வசதிகளை ஏற்படுத்த நடவடிக்கை மேற்கொள்ளுமாறு கேட்டுக் கொள்கிறோம்.

தொகுப்பாக,

அடிப்படை வசதிகள் இல்லாமல், கல்வி கற்கும் சூழல் பாதிக்கப்பட்டதே, அரசுப்பள்ளிகளை பொதுமக்கள் புறக்கணிப்பதற்கு முக்கியமான காரணமாகும் என்பது இந்த ஆய்வில் இருந்து தெளிவாகத் தெரிகிறது. அப்படி இருந்தாலும், அரசுப்பள்ளி ஆசிரியர்களின் தனிப்பட்ட கடும் முயற்சி, மாணவர்கள் மீதான ஆசிரியர்களது அக்கறை ஆகியவை மூலமே அரசுப்பள்ளிகள் சில இடங்களில் சிறந்து விளங்குவதும், மொத்தமாக காப்பாற்றப்பட்டும் வருகின்றன எனத் தெரிகின்றன. பல பள்ளிகளில் மாணவர் தேர்ச்சி விகிதத்தை அதிகரிக்க ஆசிரியர்கள் தங்களால் இயன்ற அளவு முயற்சி எடுத்து சாதித்துள்ளனர். ஆகவே, பள்ளிக்கல்வி (எக்ஸ்.2)த் துறை அரசாணை நிலை எண்.270 விதிப்படி அடிப்படை வசதிகளை செய்து கொடுத்தால்தான் சென்னைப் பள்ளிகளில் கல்வி கற்கும் சூழல் உருவாகும். அதன் மூலம் சென்னைப் பள்ளிகள் எனும் மாநகராட்சிப் பள்ளிகள் தரமான பள்ளிகளாக, மக்களின் நம்பிக்கையைப் பெறமுடியும். ஏழை மாண்வர்களுக்கும் தரமானக் கல்வி கிடைக்கும். சென்னைப் பள்ளிகளில் மாணவர் எண்ணிக்கையை உயர்த்த அரசு – தனியார் கூட்டு ஒப்பந்தம் ( PPP ) மூலம் கல்வி கொடுக்கும் பணியை தனியாரிடம் ஒப்படைக்கப் போவதாக கடந்த மாநகராட்சி மன்றக்கூட்டத்தில் அறிவித்துள்ளீர்கள். இது ஏழை மாணவர்களுக்கு கல்வியை எட்டாக்கனியாக்கும் என்பதற்கு ஏற்கனவே பல உதாரணங்கள் உள்ளன. தனியாரைப் பொறுத்த வரையில் லாப நோக்கம் மட்டுமே இருக்கும். தமிழகம் முழுவதுமுள்ள தனியார்பள்ளிகளில் வெளிப்படையாக நடைபெற்றுவரும் கட்டணக்கொள்ளைகளும், அதற்கெதிரான பெற்றோர்களின் போராட்டங்களும் இதற்கு சாட்சியாக உள்ளன. எனவே, சென்னைப் பள்ளிகளை அரசு – தனியார் கூட்டு ஒப்பந்தம் ( PPP ) மூலம் பராமரிக்க எடுத்துள்ள முடிவை கைவிட்டு, அனைத்து சென்னைப்பள்ளிகளிலும் போதுமான, இந்த ஆய்வறிக்கையில் குறிப்பிட்டுள்ளவாறு அடிப்படை வசதிகளை செய்துகொடுக்க தேவையான நிதியை ஒதுக்கி சென்னைப் பள்ளிகளின் தரத்தை உயர்தித்தர ஆவண செய்யுமாறு கேட்டுக்கொள்கின்றோம்.

நன்றி!

பள்ளிகளில் திரட்டப்பட்ட குடிநீர் வசதி, கழிவறைகள், ஆசிரியர்கள் பற்றிய தரவுகளின் அட்டவணைகள்

[அட்டவணைகளை பெரிதாகப் பார்க்க படத்தின் மீது கிளிக் செய்யவும்]

இப்படிக்கு,
(செயலர்)
புரட்சிகர மாணவர் – இளைஞர் முன்னணி, சென்னை.
நாள் : 28.2.2014
இடம் : சென்னை.

[பள்ளிகளின் புகைப்படங்கள் இணையத்திலிருந்து எடுக்கப்பட்டவை]