தமிழக மீனவர்கள் 5 பேருக்கு இலங்கையில் தூக்கு !

ராஜபக்சே, மோடி, சு.சாமியைக் கண்டித்து கண்டன ஆர்ப்பாட்டம்

தமிழக மீனவர்கள் 5 பேருக்கு இலங்கை நீதிமன்றம் தூக்குத் தண்டனை அளித்ததைக் கண்டித்து 3.11.2014 மாலை 4.30 மணி அளவில் மதுரை மாவட்ட ஆட்சியர் அலுவலகம் அருகில் மனித உரிமை பாதுகாப்பு மையம் மதுரை மாவட்டக் கிளை சார்பில் கண்டன ஆர்ப்பாட்டம் நடைபெற்றது.

ஆர்ப்பாட்டத்திற்கு HRPC-யின் துணைத் தலைவர் வழக்குரைஞர் தோழர் நடராஜன் தலைமை தாங்க, பல்வேறு அமைப்புகளைச் சார்ந்த தோழர்களும் கலந்து கொண்டனர்.

[படங்களைப் பெரிதாகப் பார்க்க அவற்றின் மீது சொடுக்கவும்]

ஆர்ப்பாட்டத்தில் கண்டன உரையாற்றிய சமநீதி வழக்கறிஞர்கள் சங்கத் தலைவர் வழக்குரைஞர் ராஜேந்திரன் ஆற்றிய உரையின் சுருக்கம்.

தமிழர்களுக்கு ஏராளமான பிரச்சனைகள் உள்ளன. இதில் இலங்கை நீதிமன்றம் வழங்கியுள்ள இந்தத் தீர்ப்பு நீதிமன்றமும் அரசும் கூட்டு சேர்ந்து சதி செய்துள்ளதாக சந்தேகிக்கிறேன். இதே தூக்குத் தண்டனையை எதிர்த்து, ஆயிரக்கணக்கான ராமேஸ்வரம் மீனவர்கள் உண்ணாவிரதப் போராட்டம் நடத்தினர். அவர்கள் மீது அரசு வழக்குப் பதிவு செய்துள்ளது. 600 மீனவர்களை சுட்டுக் கொன்ற இலங்கை மீது எந்த நடவடிக்கையும் இல்லை. ஆனால் அந்த அநியாயத்திற்கு எதிராகப் போராடியவர்கள் மீது வழக்கு. இலங்கை அரசுக்கும் இந்திய அரசுக்கும் என்ன வேறுபாடு உள்ளது. அனைவரும் சேர்ந்து போராடா விட்டால் தீர்வு கிடைக்காது.

தோழர் குருசாமி, வி.வி.மு. உசிலை

5 மீனவர்களுக்கு வழங்கப்பட்டுள்ள தீர்ப்பில் ஒரு திட்டமிட்ட சதி இருக்கிறது. போதை மருந்து கடத்தியதாகக் கூறுவது பொய். மீனவர்களை கடலுக்குள் நுழைய விடாமல் தடுக்க இப்படிப்பட்ட பொய்வழக்குகளை கையில் எடுத்துள்ளது, அரசு. மீனவர்களைக் கடலிலிருந்து அப்புறப்படுத்துவதில் இரண்டு அரசுகளும் குறியாகவே இருக்கின்றன. மீன் பிடிப்பதை தடுப்பது, ஆயுதம் கொண்டு தாக்குவது, படகுகளை சேதப்படுத்துவது, படுகொலை செய்வது, பொய்வழக்கு போடுவது என்று இலங்கை அரசின் அத்தனை நடவடிக்கைகளுக்கும் இந்திய அரசு உறுதுணையாகவே இருக்கிறது. சு.சாமியின் செயல்பாடுகள் அதைத் தான் சொல்கிறது. இதில் இந்திய கார்ப்பரேட் நிறுவனங்களின் நலனும் உள்ளடங்கி இருக்கிறது. இந்தியாவின் ஆதிக்கத்தை இலங்கையில் நிலைநாட்ட தமிழக மீனவர்களைப் பலியிடுகிறது இந்திய அரசு.

வழக்குரைஞர் வாஞ்சிநாதன், உதவிச் செயலர், HRPC

மீனவர்கள் பிரச்சனை என்பது கடந்த 35 ஆண்டுகளாக இருந்து கொண்டிருக்கிறது. இதனுடைய உண்மைத் தன்மை பற்றி பேச எந்த அரசியல் கட்சியும் முன் வருவதில்லை. வாக்கு வாங்கி அரசியல் தான் நடைபெற்றுக் கொண்டிருக்கிறது. இந்த வழக்கு என்பதே ஒரு பொய் வழக்கு. அதை மறைத்து விட்டு, இதற்கு எதிராகப் போராடினால் தவறு என்று சு.சாமி சொல்கிறார்.

இந்தத் தீர்ப்பின் மூலம், மீனவர்களை அச்சுறுத்தப் பார்க்கின்றனர். கடலிலிருந்து அப்புறப்படுத்தப் பார்க்கின்றனர். முன்பு விடுதலைப் புலிகளைக் காரணம் காட்டித் தாக்கினர். இன்று மீனவர்களது நிலையைக் காட்டித் தாக்குகின்றனர். ஆனால் இந்தியாவின் நிலையோ வேறாக இருக்கிறது. செங்கல்பட்டிலுள்ள அகதிகளில் ஒரு சிலரைப் பிடித்து, புலிகள் எனக் கூறி பொய் வழக்குப் போட்டு, விடுதலைப் புலிகள் இயக்கத்துக்கான தடையை நீட்டிக்கின்றனர்.

தமிழக மீனவர்களை எல்லை தாண்டிய குற்றவாளிகள் போல் சித்தரித்து துன்புறுத்துகின்றனர். ஆனால் பாகிஸ்தான், வங்க தேச மீனவர்கள் எல்லையைத் தாண்டினாலும் நாமும் விடுதலை செய்கிறோம். அவர்களும் இந்திய மீனவர்களை விடுதலை செய்கின்றனர். இலங்கை மட்டும் பொய் வழக்குப் போட்டு தூக்குத் தண்டனை கொடுக்கிறது. இதை ஏன் இந்திய அரசு கேள்வி கேட்பதில்லை.

அதே நேரத்தில் டக்ளஸ் தேவானந்தா, நீதிமன்றத்தில் ஆராகத் தேவையில்லை என்று இந்திய நீதிமன்றம் கூறுகிறது. போபால் விஷவாயுப்படு கொலையின் நாயகன் ஆன்டர்சன்னுக்கும் இப்படியே கூறியது. இங்கே மீனவர்களுக்குப் பதிலாக பார்ப்பனர்கள் கொல்லப்பட்டிருந்தால் இந்த அரசு சும்மா இருந்திருக்குமா? மீனவர்கள் ஏழைகள். ஒடுக்கப்பட்ட சாதியைச் சேர்ந்தவர்கள், எனவேதான் அரசு வேடிக்கை பார்க்கிறது. மீனவர்களின் உரிமைகளைக் காக்க நாமே ஒரு போராட்டக் குழு அமைத்துப் போராட வேண்டிய தேவை எழுந்துள்ளது.

கதிரவன், மக்கள் கலை இலக்கியக் கழகம்

மீனவர்கள் போர்க்குணமிக்கப் போராட்டத்தை நடத்திக் கொண்டிருக்கின்றனர். போராட்டத்தின் ஊடே அவர்கள் தமிழக முதல்வர் ஓ.பன்னீரைப் பார்க்கின்றனர். தங்களது கோரிக்கைகளைச் சொல்கின்றனர். ஓ.பி.எஸ் ஒரு சிறைக்கைதி. இவர் எப்படி இவர்களது பிரச்சனையைத் தீர்ப்பார். வேண்டுமானால் கருணாநிதி, ஜெயலலிதா போல கடிதம் எழுதுவார். எல்லாக் கடிதங்களும் குப்பைக் கூடைக்குள் போனது போல இதுவும் போகும். அவ்வளவு தான். வைகோ முழங்குகிறார் “மோடி அரசே, நீங்கள் மீனவர் பிரச்சனையைத் தீர்க்கவில்லை என்றால் நீங்கள் அதன் எதிர் விளைவுகளை சந்திக்க வேண்டியது இருக்கும்”. என்ன எதிர் விளைவு. கூட்டணியில் சேரமாட்டேன். அவ்வளவு தானே?

கனவுகளில் சஞ்சரிக்கும் இந்த ஓட்டுப் பொறுக்கிகளின் ஒவ்வொரு சொல்லும் செயலும் ஓட்டுப் பொறுக்குவதில் தான் குறியாக இருக்கிறது. அதைத் தாண்டி அவர்களால் சிந்திக்க முடியவில்லை. பா.ஜ.க வின் கொள்கையே அகண்ட பாரதம் தான். அந்த அகண்ட பாரதத்திற்குள் இலங்கையும் வருகிறது. எனவே தான் ராஜபக்சேவுக்கு பாரத ரத்னா விருது வழங்கச் சொல்கிறார் சு.சாமி. மோடியும் ராஜபக்சேயும் ஒரு நாணயத்தின் இரண்டு பக்கங்கள் என்பதைப் புரிந்து கொள்ள வேண்டும். இருவருமே பாசிஸ்ட்கள். மீனவர்களின் படகுகளை விடாதே என்று சொல்லும் சு.சாமியைக் கண்டிக்காத தமிழிசை தூக்குத் தண்டனைக்கு எதிராக இலங்கையில் சிறந்த வக்கீலை நியமிக்கப் போவதாகச் சொல்கிறார். மீனவர்களுக்கு வழங்கப்பட்ட தூக்குத் தண்டனை என்பது தமிழகத்தின் மீது தொடுக்கப்பட்ட மறைமுக யுத்தம் என்பது அவருக்குப் புரியவில்லையா? ஓட்டுப் பொறுக்கிகள் பேசுவார்கள், ஆனால் எதுவும் நடக்காது, நாம் தான் போராட்டத்தை முன்னெடுத்துச் செல்ல வேண்டும்.

லயனல், மாவட்ட செயலர் HRPC

இலங்கையின் சட்டப்படி போதை மருந்து கடத்தலுக்குத் தூக்கு கிடையாது என்று சொல்லப்படுகிறது. ஆனால் பொய் வழக்குப் போட்டதோடு, சட்டத்தை மீறி தூக்கு தண்டனை வழங்கப்பட்டுள்ளது. இந்தியாவின் மௌனத்திற்குக் காரணம் இருக்கிறது. இந்தியாவின் மூலதன விரிவாக்கத்திற்கு இலங்கையைப் பயன்படுத்த இந்தியா நினைக்கிறது. சீனாவுக்கு எதிராகத் தெற்கு ஆசியாவில் தனது ஆதிக்கத்தை நிலைநாட்ட விரும்பும் அமெரிக்காவின் அடியாளாக மோடி அரசு செயல்படுகிறது. இலங்கையில் இந்திய முதலாளிகளின் முதலீடுகளைப் பாதுகாப்பதே மோடி அரசின் முதற் பணி ! எனவே இலங்கை என்ன செய்தாலும் இந்தியா கண்டு கொள்ளாமல் தனது மூலதனத்தை விரிவாக்கம் செய்வதிலேயே கவனமாக இருக்கிறது.

இந்த வழித் தடத்திலிருந்து பா.ஜ.க., காங்கிரஸ் உள்ளிட்ட எந்த அரசியல் கட்சியும் விலகிச் சொல்லாது. தூக்குத் தண்டனையைப் பொறுத்த அளவில் சட்டம் தன் கடமையைச் செய்யும் என்று ராஜபக்சே கூறுகிறார். மோடியும் அதைத்தான் சொல்கிறார். நாளை இலங்கை உச்ச நீதிமன்றத்தில் தண்டனை உறுதிச் செய்யப்பட்டால் அப்பொழுது சட்டம் தன் கடமையைச் செய்தது என்று தான் சொல்வார்கள். இந்தக் கூட்டுச் சதியில் சட்டம் என்ன செய்யும். தமிழிசையையும், பொன்னாரையும், எச்சி ராஜாவையும் பார்த்துப் பசுவதால் என்னபயன் விளையப்போகிறது? எல்லாத் துயரங்களுக்கும், பா.ஜ.கவும் காங்கிரசும் தான் காரணம் என்று இவர்களுக்குத் தெரியாதா?

சு.சாமி என்கிற ஒரு சர்வதேச அரசியல் தரகனை அருகில் வைத்துக் கொண்டு, மீனவர்கள் பிரச்சனையைத் தீர்த்து விடுவேன் என்று தமிழிசை பேசுவது நகைப்புக்குரியது. இது ஒரு அப்பட்டமான ஓட்டுப் பொறுக்கி அரசியல். சு.சாமியும், ராஜபக்சேயும் கை கோர்த்துக் கொண்டு தமிழக மீனவர்களுக்கு எதிராக செயல்படுவதை அனுமதிக்கிற பா.ஜ.க. மீனவர்கள் பிரச்சனையைத் தீர்த்து விடுமா?

இலங்கையின் தர்மபாலாவின் 150வது பிறந்த தினத்தன்று, இந்தியா தபால் தலை வெளியிடுகிறது. தர்மபாலா யார்? தமிழர்களை ஒழித்துக்கட்டு என்று போதித்தவர். புத்த மதத்தைத் தவிர வேறு எந்த மதமும் இருக்கக் கூடாது. சிங்கள இனத்தைத் தவிர வேறு இனம் இலங்கையில் இருக்கக்கூடாது என்று கூறிய மதவெறி பிடித்தவர். அந்த மத வெறியருக்குத் தபால்தலை.

தர்மபாலாவை போற்றுகிற இவர்களுக்கு தமிழர்கள் என்றால் கசக்கிறது. ஏன் ஏனென்றால் தமிழ் மரபு என்பது பார்ப்பனிய எதிர்ப்பு மரபு. ஜெயலலிதா ஊழல் குற்றச் சாட்டில் ஜெயிலுக்குப் போனவுடன், ஆயிரக் கணக்கான அடிமைகள் மொட்டை போட்டனர், மண்சோறு சாப்பிட்டனர், உருண்டனர், புரண்டனர், கோயில்களில் எல்லாம் யாகங்கள் நடத்தினர். தமிழ்நாட்டையே சட்டவிரோதப் போராட்டங்களால் காவல்துறை உதவியுடன் ஸ்தம்பிக்கச் செய்தனர், இந்த அரசியல் பொறுக்கிகள். இப்போது அந்தத் தமிழர்கள் எங்கே போனார்கள். தூக்குத் தண்டனைக்கு எதிராக ஏன் போராட வரவில்லை. இந்த வாக்கு வங்கி அரசியல் எந்தத் தீர்வையும் கொண்டுவராது. தமிழர்களாகிய நாம் உழைக்கும் மக்கள் அனைவரையும் ஒன்று திரட்டி வீதியில் இறங்கிப் போராடுவதின் மூலம் மட்டுமே விடியலைக் கொண்டு வர முடியும்.

நடராஜன் து.தலைவர் HRPC

சர்வதேச அரங்கில் தூக்குத் தண்டனையை எதிர்த்த பல நாடுகளில் ஒன்று இலங்கை. ஆனால் ராஜபக்சே என்ற இந்த ரத்தக்காட்டேரி தமிழர்களின் ரத்தம் குடிக்கத் துடிக்கிறது. வீரவசனம் பேசிய அரசியல் கட்சிகள் எல்லாம் இன்று அடக்கி வாசிக்கின்றனர். தமிழக மீனவர்கள் 600 பேரை இலங்கை அரசு சுட்டுக் கொன்ற பின்பும் ஏன் இந்த மௌனம். பாட்டாளி வர்க்கச் சிந்தனையை உயர்த்திப் பிடித்துப் போராடுவதின் மூலமே மோடிக்கும் சு.சாமிக்கும் பாடம் கற்றுத் தர முடியும்.

ஆர்ப்பாட்டம் ! ஆர்ப்பாட்டம் !
அப்பாவி மீனவர்களுக்கு
அநீதியாக விதிக்கப்பட்ட
தூக்கை எதிர்த்து ஆர்ப்பாட்டம்!
HRPC ஆர்ப்பாட்டம் !

பொய் வழக்கு ! பொய் வழக்கு !
அப்பாவி மீனவர்கள் மீது
போதைப் பொருள் கடத்தியதாக
பொய் வழக்கு ! பொய் வழக்கு !

பதில் சொல்! பதில் சொல்!
மீனவர் பிரச்சனையை
உடனே தீர்ப்பேன்னென்ற
மோடி அரசே பதில் சொல்!
மக்களுக்கு பதில் சொல் !

சுட்டுக் கொலை ! சுட்டுக் கொலை !
அறுநூறு மீனவர்கள்
இதுவரை சுட்டுக் கொலை !
சின்ன நாடு இலங்கைக்கு
‘வல்லரசாகும்’ பெரிய நாடு
இந்திய மீனவர்களை
சுட்டுக் கொல்லும் தைரியம்
வந்ததெப்படி? வந்ததெப்படி?

தைரியம் எப்படியென்றால்
ராஜபட்சே அரசுக்கு
இந்திய அரசே துணை நிற்குது!

காங்கிரஸ் அரசோ ! பிஜேபி அரசோ
எல்லாமே ஒன்றுதான் !
தமிழ் மக்கள் விரோதிதான் !

ராஜபட்சேவுக்கு பாரத ரத்னா
கேட்குறார் சு.சாமி
பிஜேபியின் மூத்த தலைவர்
நடிக்குது ! நடிக்குது !
தமிழ் நாடு பிஜேபி
நடிக்குது ! நடிக்குது !

தேர்தலுக்கு முன்னால்
வாய் பிளக்கப் பேசுனாரு
பிரதமர் நரேந்திர மோடி !
ஆனா இப்பப் பேசல !
5 பேர் தூக்கிற்கு வாயே தெறக்கல !
வாயில் என்ன புற்று நோயா !
ஆரிய சிங்கள இனப்பற்றா !

பதில் சொல் ! பதில் சொல் !
மோடியே பதில் சொல் !
பிஜேபியே பதில் சொல் !

குஜராத் முதலாளிக்கு
சோமாலியா கடலிலே
பிரச்சனை வந்தபோது
கடற்படையை அனுப்பின !

ஆஸ்திரேலியா நாட்டிலே
பணக்கார மாணவர்களுக்கு
பிரச்சனை வந்தபோதுமத்திய அரசே துடித்தது !
சுப்ரீம் கோர்ட்டு பதறியது !

ஆனா இப்பப் பேசல !
மத்திய அரசு பேசல !
சுப்ரீம் கோர்ட்டும் பேசல !
மீனவர்கள் ஏழை என்பதால்
எவனுமே பேசல !

தைரியம் இருக்கா?
மோடிக்கு தைரியம் இருக்கா?
இலங்கை உடனான
தூதரக உறவுகளை
துண்டிக்கத் தைரியம் இருக்கா?

பொருளாதாரத் தடை விதிக்க
பிஜேபிக்குத் தைரியம் இருக்கா?
பிஜேபிக்கு ஆதரவாக
பிரச்சாரம் செய்த
வைகோவே – ராமதாசே
விஜயகாந்தே பதில் சொல் !

துணை நிற்போம்! துணை நிற்போம் !
ஏழை மீனவர்களுக்கு
தமிழக மக்கள் துணை நிற்போம் !
நம்ப மாட்டோம் ! நம்ப மாட்டோம் !
ஓட்டுப் பொறுக்கும் கட்சிகளை
நம்ப மாட்டோம் ! நம்ப மாட்டோம் !
கட்டியமைப்போம் ! கட்டியமைப்போம் !
மீனவர்களுக்கு ஆதரவாக
மக்களே போராட்டத்தை
கட்டியமைப்போம் !

தகவல் :
மனித உரிமைப் பாதுகாப்பு மையம்,
மதுரை

2014 பாராளுமன்ற தேர்தல் வரை மோடியின் அடையாளமாக காட்டப்பட்டது என்னவென்று நினைவிருக்கிறதா? வளர்ச்சியைத் தவிர்த்த வேறு எந்த சிந்தனையும் இல்லாதவர் அவர் என்பதாகவே மோடியின் பிம்பம் கட்டமைக்கப்பட்டது. அடிப்படைவாதத்தால் வளைக்க முடியாத மக்கள் கூட்டத்திடம் மோடியின் வளர்ச்சி முகத்துக்காக எங்கள் மற்ற பாவங்களை மன்னியுங்கள் என்ற தொனியில்கூட பிரச்சாரம் முன்னெடுக்கப்பட்டது.

ஆனால் இந்த திட்டத்தில் கொஞ்சமும் இணைக்க முடியாத ஒரு செயலாக அவரது படேல் பாசம் இருந்தது. உலகிலேயே பெரிய சிலையை படேலுக்கு வைக்கப்போகிறேன் என்றார், அதற்காக இரும்பு திரட்டப்போகிறேன் என்றார், படேலுக்காக எல்லோரும் மராத்தான் ஓடுங்கள் என்றார். இந்த ஒரு நடவடிக்கை மட்டும் அவரது அமெரிக்க பாணி பிரமோஷனுக்கு சற்றும் தொடர்பற்றதாக இருந்ததை அன்றைக்கு ஓங்கி ஒலித்த விளம்பர ஒலியில் நாம் கவனிக்கத் தவறிவிட்டோம். இன்றைக்கு ஒரு தீவிர ஆர்எஸ்எஸ்காரரான மோடி காங்கிரஸ் தலைவரான படேலை ஆராதிப்பதற்கான வரலாற்றுக் காரணங்களை முதலில் பரிசீலனை செய்யலாம்.

நாதுராம் கோட்சே தான் யாரையெல்லாம் சுதந்திரப் போராட்ட வீரர்களாக கருதுகிறேன் என்பதை தனது வாக்குமூலத்தில் இப்படி பட்டியலிடுகிறார். “ திலகர், என்.சி.கேல்கர், சி.ஆர்.தாஸ், மதிப்பிற்குரிய சர்தார் படேலின் சகோதரர் விதல்பாய் படேல், பண்டிட் மாளவியா, பாய் பரமானந்த் மற்றும் கடந்த பத்தாண்டுகளாக முக்கிய இந்துசபா தலைவர்கள் பிரதிநிதித்துவப்படுத்தும் பகுதியினருக்கே அதற்கான பெருமை போய்ச்சேர வேண்டும்.” (1993ல் கோபால் கோட்சே வெளியிட்ட நாதுராம் கோட்சேயின் வாக்குமூலமான – நான் ஏன் மகாத்மா காந்தியை கொலை செய்தேன் நூலில் இருந்து). படேலை அவர் குறிப்பிடும் விதத்தை கவனியுங்கள் “மதிப்பிற்குரிய சர்தார் படேல்” ஏனைய நாடறிந்த பெயர் எதையும் அவர் குறிப்பிட்டிருக்கவில்லை. சரி, ஆர்.எஸ்.எஸ்சின் படேல் பாசத்தைப் பார்த்தாயிற்று.

சர்தாரின் ஆர்.எஸ்.எஸ் காதலை கொஞ்சம் விரிவாக பார்க்கலாம்.

1947 டிசம்பர் 29-ம் தேதி பிரதமர் நேரு உள்துறை அமைச்சர் படேலுக்கு எழுதுகிறார் “ அஜ்மீரில் இருந்த 50 ஆயிரம் முஸ்லீம்களில் பத்தாயிரம் பேர் வெளியேறிவிட்டதாகவும் வெளியேற்றம் இன்னமும் தொடர்வதாகவும் அறிகிறேன். அங்கும் இதர பகுதிகளிலும் ஆர்.எஸ்.எஸ் தாக்கும் மனோபாவத்தில் உள்ளது. அவர்கள் விடுக்கும் மிரட்டல்கள் பலரையும் பயமுறுத்துகிறது”. இந்த கடிதத்துக்கு படேலிடமிருந்து முறையான பதிலில்லை. ஆகவே நேரு பஞ்சாயத்திற்காக காந்தியிடம் செல்கிறார். 1948 ஜனவரி 6-ம் தேதி காந்திக்கு அவர் குறிப்பொன்றை அனுப்புகிறார், நகல் படேலுக்கும் செல்கிறது. உள்ளடக்கம் இதுதான் “எனக்கும் சர்தாருக்கும் மனோபாவங்களில் வேறுபாடு உள்ளது என்பது மட்டுமல்ல, பொருளாதார மற்றும் மதவெறி விஷயங்களை எப்படி அணுகுவது என்பதிலும் வேறுபாடு உள்ளது.”

இதற்கான படேலில் பதில், ஆமா அதுக்கு என்ன இப்போ எனும் தோரணையில் இருந்தது. ஜனவரி 12-ம் தேதி அவரது பதில் குறிப்பு இப்படியிருந்தது ”மனோபாவம், பொருளாதார விஷயங்கள் மற்றும் இந்து முஸ்லீம் உறவுகளை பாதிக்கும் விஷயங்களிலும் வேறுபாடு உள்ளது என்பதில் மறுப்பு ஏதுமில்லை”.

நாதுராம் கோட்சேவுக்கு பத்திரிகை நடத்த ஆயிரக்கணக்கில் பணம் கொடுத்தவர் சாவர்க்கர். ஜனவரி 20, 1948-ம் தேதி காந்தியைக் கொல்ல முயன்றதற்காக கைது செய்யப்பட்ட மதன்லால் பாவா இரண்டு முக்கியமான தகவல்களை சொல்கிறார். இந்த கொலை முயற்சிக்கு முன்பு தான் சாவர்க்கர் சதனில் சாவர்க்கரை சந்திதத்தாகவும், தன்னுடன் ஆறுபேர் கொண்ட கோஷ்டியும் இச்சதியில் பங்கேற்றதாகவும் அதில் ஒருவர் ராஷ்ட்ரீய அல்லது அக்ரானி மராட்டா எனும் பெயர் கொண்ட மராத்தி பத்திரிக்கையின் ஆசிரியர் எனவும் குறிப்பிடுகிறார். அந்த ஆசிரியர்தான் ஜனவரி 30, 1948-ம் தேதி காந்தியை கொன்ற நாதுராம் கோட்சே.

பிப்ரவரி 20ல் (1948) நேரு படேலுக்கு மிக முக்கியமான கடிதமொன்றை எழுதுகிறார். கேரா எனும் அதிகாரியின் குறிப்பை மேற்கோள் காட்டும் அக்கடிதம் இப்படி இருக்கிறது “ ஜனவரி 20-ம் தேதி நடக்காமல் போனதை போலீசின் அலட்சியத்தை பயன்படுத்தி இப்போது நிறைவேற்றிக்கொண்டார்கள். அவர்கள் பற்றிய விவரங்களும் அவர்களது கூட்டாளிகளது பெயர்களும் போலீஸ் வசம் இருந்தன. அவர்கள் 20ம் தேதி மும்பை திரும்பி மீண்டும் 28 அல்லது 29ல் டெல்லி வந்திருக்கிறார்கள். ஒரு சாதாரண சோதனையில்கூட அவர்களை கண்டு பிடித்திருக்க முடியும். இது அலட்சியமல்ல, அரசு அதிகாரத்தைப் பராமரிப்பதில் மோசமான விருப்பமின்மையோடு இருந்திருக்கிறது”.

இதனை இன்னும் தீவிரமான அலட்சியத்தோடு அணுகுகிறார் படேல். இது தீவிர உணர்ச்சி தந்த அழுத்தத்தில் எழுதப்பட்ட குறிப்பு என பதிலளித்து விசயத்தை 21 பிப்ரவரியிலேயே முடிக்கிறார் படேல். காந்தி கொலைச்சதியை தீவிரமாக விசாரிப்பதாக பாவனை செய்யக்கூட அவர் தயாராக இல்லை என்பது படேலின் பதிலில் தெளிவாக வெளிப்படுகிறது.

இவ்விடயத்தை இன்னும் ஒருமுறை படேலுக்கு அதே பிப்ரவரி 26 அன்று நினைவூட்டுகிறார் நேரு. “பாபுவின் படுகொலை குறித்த விசாரணையில் உண்மையை கண்டுபிடிப்பதில் உண்மையான முயற்சி இல்லாததாகப் படுகிறது. இக்கொலை ஒரு தனிப்பட்ட வேலையல்ல, மாறாக பிரதானமாக ஆர்.எஸ்.எஸ் ஆல் நடத்தப்பட்ட ஒரு விரிவான இயக்கத்தின் ஒரு பகுதி என்றே நான் மேலும் மேலும் கருதுகிறேன். டில்லி போலீசாரில் பலர் ஆர்.எஸ்.எஸ் அனுதாபிகளாக இருப்பது மேலும் ஆபத்தானதாக உள்ளது.”

இத்தனை தீவிரமான நினைவூட்டலுக்குப் பிறகும் படேலின் காவி மூளை ஆர்.எஸ்.எஸ்ஸுக்கு உடனடி ஊழியம் செய்கிறது. மறுநாளே படேல் இப்படி தீர்ப்பளிக்கிறார் “குற்றவாளிகள் வாக்குமூலத்தில் இருந்து இதில் ஆர்.எஸ்.எஸ் பங்கேற்கவில்லை என தெரிகிறது. பலரும் நினைப்பதுபோல இதன் பின்னால் பெரிய சதி ஏதுமில்லை (27.02.1948 கடிதம்)”.

ஆனால் இவ்வழக்கின் தீர்ப்புக்கு பெரிய ஆதாரமாக கொள்ளப்பட்ட திகம்பர் பட்கே எனும் ஆர்.எஸ்.எஸ்சின் ஆயுத வினியோகஸ்தரின் வாக்குமூலம் கோட்சே சம்பவத்திற்கு முன்பு சாவர்கரிடம் ஆசி பெற்றதாக சொல்கிறது (1948 ஜனவரி 14 மற்றும் 17 தேதிகளில்). இரண்டாம் சந்திப்பில் வெற்றியோடு திரும்பிவாருங்கள் என அவர்கள் தோளில் கைபோட்டுக்கொண்டு ஆசீர்வதித்ததாக குறிப்பிடுகிறார் பட்கே. சாதாரண தையற்காரரான கோட்சேவுக்கு எப்படி ஆயுதம் வாங்கவும் பம்பாய்க்கும் டெல்லிக்கும் விமானத்தில் பறக்கவும் பணம் வந்த்து என்பது பற்றி விசாரணை செய்யப்படவில்லை.

சாவர்கரை தப்பிக்க வைக்க கோட்சே இச்சதியை தான் மட்டுமே செய்ததாக ஒப்புக்கொள்கிறார். மற்ற குற்றவாளிகள் தண்டிக்கப்பட்ட பிறகு, பட்கேயின் வாக்குமூலத்தைக்கொண்டு மட்டும் சாவர்கரை தண்டிக்க முடியாது என சொல்லி அவரை மட்டும் விடுவிக்கிறார் நீதிபதி ஆத்மாசரண். அப்போது நீதிமன்றத்திலேயே சாவர்க்கர் காலில் விழுந்து ஆசி பெறுகிறார்கள் மற்ற குற்றவாளிகள். சதியில் பங்கேற்காதவர் காலில் சதிகாரர்கள் விழுந்திருக்கிறார்கள்.. இந்து தர்மம்தான் எத்தனை மகத்தானது!!! தேசத்தலைவர் என சொல்லப்பட்டவரின் கொலைவழக்கில் பிரதான குற்றவாளியொருவர் விடுவிக்கப்பட்ட பிறகு அரசு அப்பீலுக்கு போகவில்லை. மேலோட்டமான பார்வையிலேயே இவ்வழக்கில் ஆர்.எஸ்.எஸ்சின் பங்கை நம்மால் தெரிந்துகொள்ள முடியும், அதனை மறைப்பதில் படேலுக்கு இருந்த அக்கறையையும் நம்மால் உணர இயலும். படேலின் காவி பாசத்தை இன்னும் நெருக்கமாக பார்க்கவும் ஆதாரமிருக்கிறது.

அவ்வமைப்பை படேல் தடை செய்தார் என்பது உண்மையென்றாலும், அது அதன் தலைவர்களை சிறைவைத்து பாதுகாக்கவே என கருத எல்லா நியாயங்களும் இருக்கிறது. அப்போது மக்கள் இந்து அடிப்படைவாதிகள் மீது கடும்கோபத்தில் இருந்திருக்கிறார்கள். காந்தி கொல்லப்பட்ட அன்று சாவர்கர் வீட்டை தாக்கியவர்கள் 500 பேர். அப்போது படுக்கையறையில் ஒடுங்கி ஒளிந்துகொண்டிருந்தார் ”வீர” சாவர்க்கர். வாய்ப்பிருந்தும் கோட்சேயை முன்பே கைது செய்யாத காவல்துறை இப்போது மட்டும் சரியான நேரத்தில் சாவர்கரை காப்பாற்றியது.

ஆர்.எஸ்.எஸ்சின் மீதான தடையை விலக்கிக்கொள்ளச் சொல்லி கோல்வால்கர் நேருவுக்கு கடிதம் அனுப்புகிறார். கம்யூனிச எதிர்ப்பில் அரசுக்கு உதவுவதாக ஆஃபரும் கொடுக்கிறார். அவர்களை தேசவிரோத அமைப்பென குறிப்பிட்ட நேரு, இதுபற்றி முடிவெடுக்க வேண்டியது படேலின் உள்துறைதான் என பதிலளிக்கிறார். வேண்டுகோள் கடிதம் படேலுக்கு போகிறது. இரும்பு மனிதர் கருணையோடு பதிலளிக்கிறார் “ காங்கிரசில் சேருவதன் மூலம் நீங்கள் உங்களது தேசபக்த முயற்சியை மேற்கொள்ள வேண்டும் (11.09.1948 தேதியிட்ட கடிதம்)”. பிறகு இன்னொரு ஆலோசனை வழங்குகிறார், ஆர்.எஸ்.எஸ் தமக்கென ஒரு அமைப்புச்சட்டத்தை உருவாக்கிக்கொள்ளவேண்டும் என்பதே அது. அந்த கட்டளையை 1949 ஜூனில் நிறைவேற்றுகிறது ஆர்.எஸ்.எஸ். அதையே காரணமாக வைத்து அவர்கள் மீதான தடையை விலக்கிக்கொள்கிறார் படேல்.

இந்து மகாசபையின் தலைவராக இருந்த சியாமா பிரசாத் முகர்ஜி மே 4 1948ல் படேலுக்கு ஒரு கடிதம் எழுதுகிறார் ”அவரது (சாவர்க்கர்) அரசியல் கோட்பாடுகளுக்காகவே அவர் விசாரிக்கப்பட்டார் என்று பின்னாளில் பேச்சு எழும்படி எதுவும் நிகழாதவாறு பார்த்துக்கொள்வீர்கள் என்பதில் எனக்கு எந்த சந்தேகமுமில்லை”.

இதற்கு மே 6 ல் பதிலளிக்கிறார் படேல் “சாவர்க்கரை குற்றவாளிப் பட்டியலில் சேர்ப்பதைப் பொறுத்தவரை சட்டம் மற்றும் நீதிமுறைமை எனும் கோணத்தில் மட்டுமே பார்க்கவேண்டுமேயொழிய அரசியல் காரணங்களை இதில் இழுக்கக்கூடாது என அதிகாரிகளிடம் சொல்லியிருக்கிறேன்”.

வல்லபாய் படேலுக்கு இருந்த காவிப்பற்றையும் காவி காலிகள் படேலுக்கு எத்தனை தூரம் நன்றிக்கடன்பட்டவர்கள் என்பதையும் அறிய இருக்கும் எண்ணற்ற ஆதாரங்களில் மிகச்சிறு பாகம்தான் நாம் இதுவரை விவாதித்தது. காவிகளின் இன்றைய அசுர வளர்ச்சிக்காக படேல் ஆற்றிய சேவை அளப்பரியது. அதற்காவே பாஜக அவரைக் கொண்டாடுகிறது.

ஆனால்…

ஒப்பிட முடியாத ஒரு விளம்பர மோகியான மோடிக்கு படேல் மீது இத்தனை நன்றியுணர்ச்சி வர வாய்ப்பேயில்லை. ஏனெனில் நார்சிசம் என்பது நன்றியுணர்வின் பரம விரோதி. ஆகவே மோடியின் இந்த படேல் பாசத்திற்கு வேறொரு காரணம் இருந்தே ஆகவேண்டும்.

தான் கவனிக்கப்படவேண்டும் எனும் தேவைக்கும் தனது பாத்திரம் என்ன என்பதில் இருக்கும் குழப்பத்துக்கும் இடையேயான முரண்பாடுதான் வளர் இளம்பருவத்தவரின் மனோநிலை என்கிறார்கள் உளவியில் அறிஞர்கள். எப்படியேனும் அடுத்தவர் கவனத்தை பெறவேண்டும் எனும் தணியாத தாகம் இளையோருக்கு இருக்கும். ஆனால் எப்படி அதனை செய்வது என்பது அவர்களுக்கு தெரியாது. தங்களது சரியான பாத்திரம் இச்சமூகத்தில் எது என்பதை அவர்களால் கண்டுபிடிக்க முடியாது. ஆகவே தன்னை வசீகரித்த ஒரு ஆளுமையின் நகலாக தன்னை காட்டிக்கொள்வதன் மூலம் தன்னை அடையாளப்படுத்திக்கொள்வார்கள். அதனால்தான் ரசிகர் மன்றங்கள் பெரும்பாலும் விடலைப் பையன்களால் நிரம்பியிருக்கின்றன. பெரும்பாலானவர்களுக்கு இந்த சிக்கல் சில காலத்தில் சரியாகிவிடும், ஆனால் சிலருக்கு இது ஆயுளுக்கும் தொடரலாம். இன்னமும் எம்ஜிஆராக வேடமிடும் சிலரைப்போல.

எனினும் இதை ஒரு சமூகவியல் பார்வையிலும் பார்க்க வேண்டியுள்ளது. தனக்கு கீழ் அதிகாரம் செல்லுபடியாகும் சமூக அடிப்படையையும், சித்தாந்தத்தையும் கொண்டிருப்போருக்கு இது சற்று வேறு தளத்திலும் செயல்படுகிறது. குறிப்பிட்ட அதிகாரம் தரும் போதையிலும், திளைப்பிலும் மூழ்கியிருப்போர் தன்னைப் பற்றிய சுய மதிப்பீட்டை மிகையாகவும் செய்து கொள்கிறார்கள். அதன்படி இந்த உலகை உய்விக்க வந்த அதீத மனிதர்களாகவும் கருதிக் கொள்கிறார்கள். இதில் அகநிலை, புறநிலை என்று பிரிக்கமுடியாத படி அவர்களது சமூக அதிகாரத்திற்கான இருப்பு பங்காற்றுகிறது.

மோடிக்கு இருப்பதும் இதையொத்த பிரச்சனைதான். அவருக்கு தான் எப்போது கவனிக்கப்பட்டுக்கொண்டே இருக்க வேண்டும் எனும் விருப்பம் இருக்கிறது. இந்த நார்சிச பண்புடன் மோடியை மீட்பராக முன்னிறுத்தும்ஆளும் வர்க்கத்தின் விளம்பர நடவடிக்கைகளும் கணிசமாக கூட்டிவிடுகின்றது. ஒரு வகையில் ஆளும் வர்க்கத்தின் அடியாள் தன்னை கடவுளாக நினைத்துக் கொண்டாலும் அந்த வர்க்கத்திற்கு கவலை இல்லை. வேலை நடந்தால் சரி என்பதால் அவர்கள் இதை பெரிது படுத்த மாட்டார்கள்.

ஆகவே தன்னைத்தானே மீட்பராக கருதிக் கொள்ளும் மோடியிடம் இவை தொடர்பான சில குழப்பங்கள் இருக்கவே செய்யும். முக்கியமாக அவர் அப்படி குழப்பம் என்று உணர வேண்டியதில்லை. இதை மோடியின் பல்வேறு நடவடிக்கைகளின் வாயிலாக அறியலாம். அவர் அம்மா இன்னமும் ஆட்டோவில் பயணிக்கிறார், இதன்மூலம் அவர் எளிமையானவராகவும் அரசுப் பண விசயத்தில் கறாரானவராகவும் காட்டிக்கொள்ள முற்படுகிறார். ஆனால் ஒரு எளிமையை விரும்புபவன் கனவிலும் செய்யத் தயங்குகிற ஆடைஅலங்காரங்களையும் ஒப்பனையையும் அரசுப்பணத்தில் செய்துகொள்பவராக அவர் இருக்கிறார் (அவரது ஆடைகள், கடிகாரம் ஆகியவை லட்சங்களை விழுங்கியவை. பேனாகூட ஆயிரங்களில் விலை கொண்டது)

ஒரு பட்டிக்காட்டு பெண்ணை மனைவியாக அறிவிக்க மறுக்கும் மோடியின் பற்றற்ற துறவி முகம் அதே போன்ற பட்டிக்காட்டு பெண்மணியான அவரது அம்மாவிடம் பணிவு காட்டும் வீட்டுக்கடங்கிய பையனாக தோற்றம் காட்டுகிறது. ஒரு மேட்டுக்குடி தலைவர் தாயை நிலவுடமை பண்பின் அடிப்படையில் அணுகும் போது தாரத்தை முதலாளித்துவ நோக்கில் அணுகுவார் என்பது இந்தியாவுக்கு உள்ள விசேடமான பண்பு.

வானுக்கு கீழ் உள்ள எல்லா விவகாரத்திற்கும் கருத்து சொல்லும் அறிவாளியாக அவர் தன்னை காட்டிக்கொள்ள மெனக்கெடுகிறார். அதற்காக இருநூறுபேர் கொண்ட குழுவும் அவர் வசம் இருந்தது. குப்பை வாருவது முதல் குளோபல் வார்மிங்வரை சகலத்தையும் மேடையில் பேசுகிறார். ஆனால் தனது பேச்சாற்றலை நிரூபிக்க இன்னொரு வழியான பிரஸ்மீட்டை அறவே ஒதுக்குகிறார்.

பிற நாட்டு தலைவர்களுடன்கூட இந்தியில்தான் பேசுவேன் என அறிவிக்கிறார். அடுத்த சில நாட்களில் இஸ்ரோ நிகழ்ச்சியொன்றில் இருபது நிமிடம் ஆங்கிலத்தில் மனப்பாடம் செய்து பேசுகிறார். தனது ஆஃப்பாயில் ஆங்கில ஞானம் பற்றிய தாழ்வு மனோபாவம் ஹிந்தி பற்றாக காட்டப்பட்டது. எப்படியேனும் ஆங்கிலம் பேசிவிடவேண்டுமெனும் ஆர்வம் இஸ்ரோவில் வெளிப்படுகிறது.

தனது அடையாளம் பற்றிய விருப்பத்துக்கும் யதார்த்தத்துக்கும் இடையேயான பாரிய வேறுபாடு அவரை அலைகழிக்கிறது. இதை நிரப்ப ஆளும் வர்க்க ஊடகங்கள் எவ்வளவுதான் மெனக்கெட்டாலும் ஒரு கோமாளி பாசிஸ்ட்டின் முகத்தை அப்படி எளிதாக மறைத்து விட முடியாது. அதனால் வெளியில் பார்க்கும் பார்வைகளும் விமரிசனங்களும் மோடியை கிண்டல் செய்வது தெரியாமல் போகாது.

ஆகவே வசீகரமான இன்னொரு ஆளுமையோடு தன்னைப் பொருத்திக் கொள்வதன் வாயிலாக தமக்கொரு நிரந்த அடையாளத்தை உருவாக்கிவிடமுடியும் என அவர் கருதுகிறார். காந்தி, நேரு, சுபாஷ் சந்திரபோஸ் போன்ற பிரபலங்களோடு அவரைப் பொருத்திக்கொள்ள இயலாது. கருத்து முரண்பாடு ஒருபக்கமென்றாலும் அவர்களுடனான ஒப்பீடு கொஞ்சமும் அடிப்படையற்றது என்பது அரைநாளுக்குள் அம்பலப்பட்டுவிடும். சாவர்க்கர், கோல்வால்கர் போன்றவர்களின் வழித்தோன்றலாக காட்டிக்கொள்ளலாம், அவர்களை பெரும்பாலான பாஜக உறுப்பினர்களுக்குகூட யாரென்று தெரியாது.

இந்த தரவுகளோடு ஒப்பிடுகையில் மோடி தன்னை படேலோடு அடையாளப்படுத்திக்கொள்வது கொஞ்சம் செல்லுபடியாகக்கூடிய உத்தியாக இருக்கிறது. படேலை பெரும்பாலானவர்களுக்கு தெரியும், ஆனால் பெரிதாக எதுவும் தெரியாது. ஆகவே அம்பலப்படுவோமென்ற ஆபத்து இல்லை. இருவருக்கும் கொள்கை வேறுபாடு எதுவுமில்லை. எதற்கென்றே தெரியாமல் அவருக்கு அளிக்கப்பட்ட இரும்பு மனிதர் எனும் பட்டம் மோடியை பெரிதும் வசீகரிக்கிறது, மோடி தன்னைப்பற்றி கட்டமைக்க விரும்புகிற பிம்பத்துக்கு அந்த அடைமொழி மிக நெருக்கமானதாக இருக்கிறது.. மூவாயிரம் கோடியை செலவு செய்வதற்கு இதைவிட வேறு காரணம் தேவையில்லை இல்லையா??

ஒரு உண்மைச் சம்பவம் இதனை புரிந்துகொள்ள உதவலாம். தங்கள் தேவாலயத்துக்கு சேவை செய்ய வந்திருந்த சகோதரிகளின் வழியனுப்பு நிகழ்வில் அந்த ஆலயத்தின் பாதிரியார் இப்படி பேசுகிறார் “கடந்த இருவார காலமாக இந்த சகோதரிகள் ஆற்றிய பணிகள் சிறப்பானது. அவர்கள் பொறுப்புணர்வும் அன்பும் நம் மனதைவிட்டு என்றைக்கும் அகலாது. எனது தனிப்பட்ட முயற்சியின் காரணமாகவே இவர்கள் இங்கே சேவையாற்ற வந்திருக்கிறார்கள். ஆகவே சகோதர சகோதரிகளே நாம் நன்றி சொல்வோம், பிரார்த்திப்போம்…” இதில் நன்றியும் பிரார்த்தனையும் யாருக்கு என உங்களால் கண்டுபிடிக்க முடிகிறதா?

இதே கதைதான் படேல் சிலை விவகாரத்திலும் நடக்கிறது. இதுவரை யாரும் படேலை கண்டுகொள்ளவில்லை எனும் மோடியின் செய்தியில் அந்த பெருமைக்கு சொந்தக்காரன் நான் என்னும் சுயபுராணம் இருக்கிறது. படேலுக்கு மூவாயிரம் கோடியில் சிலைவைக்கும் மோடி எனும் பெருமைதான் பேசப்படுமே ஒழிய அங்கே படேலின் பெயர் ஒரு கருவிதான். ஒவ்வொரு விளம்பரப் பிரியனுக்கும் தன்னைப்பற்றி பெருமை பேசுவதற்கான காரணங்களை உருவாக்கும் கடமையிருக்கிறது. ஊரான் வீட்டு காசென்றால் அதற்கான பட்ஜெட் மூவாயிரம் கோடியானால் என்ன முன்னூறானால் என்ன??

மோடிக்கு இப்போதிருக்கும் பிரபல்யம் போதாதா? இன்னும் அவர் தன்னை விளம்பரப்படுத்திக்கொள்ள என்ன தேவையிருக்கிறது என அப்பாவிகள் சிலர் கேட்கலாம். அவர்களுக்காக இந்த தகவலை சொல்ல வேண்டியிருக்கிறது. உங்கள் ஆளுமையை தீர்மானிப்பது நீங்கள் எப்படிப்பட்டவர் எனும் யதார்த்தமல்ல, உங்களை நீங்கள் யாராக உணர்கிறீர்கள் என்பதும், நீங்கள் யாராக உணர வேண்டும் என உங்களை இயக்கும் சமூகச் சூழல் என்னவாக விரும்புகிறது – இரண்டும் சேர்ந்த சிந்தனைதான் உங்கள் ஆளுமையை தீர்மானிக்கிறது. ஒருவரைப் பற்றிய மிகையான துதிபாடல்களும் மதிப்பீடுகளும் அவரை மகிழ்ச்சிக்குள்ளாக்கும் அதே வேளையில் அவருடைய உண்மையான தகுதிகளையும் அவருக்கு நினைவூட்டிக்கொண்டே இருக்கிறது.

இத்தகைய முரண்பாட்டிற்குள் சிக்கிக்கொள்ளாத ஒரு பாராட்டை அல்லது அடையாளத்தைப் பெறும் வெறி அவர்களை செலுத்திக் கொண்டே இருக்கும். உலகத்தையே அச்சுறுத்திய ஹிட்லருக்கு தான் ஒரு சைவ உணவுக்காரன் எனும் பெருமிதம் மிக அதீதமாக இருந்தது. காரணம் அது ஒன்றுதான் அவர் முழுமையாக சொந்தம் கொண்டாட முடிந்த தனித்தன்மை. பொருளியல் உலகிலிருந்து வரும் பேட்டரி ரீசார்ஜ்ஜோடு இத்தகைய ஆன்மீக ரீசார்ஜ்ஜுகளும் பாசிஸ்டுகளுக்கு தேவைப்படுகிறது.

அப்படித்தான் மோடி தனது தனித்தன்மையே தேடுகிறார். அதில் அவரது சொந்த விருப்பம் என்ன, சொல்லிக் கொடுக்கப்பட்ட யோசனைகள் என்ன என்று பிரித்து பார்க்க வேண்டியதில்லை. சமயத்தில் இரண்டும் வேறு வேறு தேவைகளைக் கொண்டிருந்தாலும் விளைவு சமூகத்தை கட்டுப்படுத்தும் நடவடிக்கைக்கு பயன்படும் என்பதே. இப்படித்தான் மோடி தனது பிம்பத்தை சேதாரமில்லாமல் உப்ப வைக்க முனைகிறார். அதில் ஒன்றுதான் படேல் சிலை. இதில் காங்கிரசுக்கு மாற்றாக பாஜக நிறுவிக் கொள்ளும் முயற்சியோடு படேலின் இந்துத்துவ சார்பையும் சங்க பரிவாரங்கள் பயன்படுத்திக் கொள்ளும். மோடிக்கு உலகில் மிக உயர்ந்த ‘சிலை’ நிறுவிய தலைவர் எனும் புகழ். அதற்கு நமது பணம் மூவாயிரம் கோடியை எடுத்துக் கொள்கிறார்கள்.  இறுதியில் மோடியின் நோக்கமும், மோடியை முன்னிறுத்திய முதலாளிகளின் நோக்கமும் இதுதானே?

– இசையவன்