Saturday, August 20, 2022
முகப்பு கலை கவிதை அட உங்களைத்தான் சொல்வது கேட்கிறதா?

அட உங்களைத்தான் சொல்வது கேட்கிறதா?

-

தொலைக்காட்சி ”நாதஸ்வரத்தை”
தொடரும் பெண்ணே,
உலகமயம் உன் நிம்மதிக்கு
சங்கூதும் சத்தம் உனக்குக் கேட்கிறதா?

”செல்லமே”
ரொம்ப நாளைக்கு ஓடாது,
வெறித்துப் பார்த்து, பார்த்து
உனக்கு கண் ஆபரேசன்
ராடன் ராதிகாவுக்கு கலெக்சன்,                                                    ‘
முண்டமே’ என பெண்களை
வெட்டிச் சிதைக்கும் முதலாளித்துவ
உண்மை நிகழ்ச்சிகளை
கொஞ்சம் திரும்பிப்பார்!

சுய உதவிக்குழுக்கள்
நம் போராட்ட உணர்வை அரிக்கும்
முதலாளித்துவப் புழுக்கள்.
வங்கிக் கடனை தூக்கி எறி,
உன் வர்க்க கடனை தீர்ப்பதற்கு பார்….

காணுமிடமெல்லாம் கைத்தோலுரியும்
பெண்களின் உழைப்பு – உங்கள்
கண்கள் உறுத்தலையோ?

ஆணென்று மீசை முறுக்கும்
அன்பான உழைப்போரே,
உன்னையொத்த பெண்களின் கூலியுழைப்பு
உனக்கும் சேர்த்து
விடுதலையை வேண்டும் குரல்
உன் செவிகளுக்கு கேட்கலையோ?

பங்களாக்களின் பத்துப்பாத்திரத்தில்
வெளுக்கும் துணிகளில், தரைகளில்
உரிந்து பளிச்சிடுகிறது
பெண்ணின் தோல்!
பெட்ரோல் பங்குகளில்
பிழியப்பட்டு வழிகிறது
பெண்ணின் வியர்வை!

பன்னாட்டுக் கம்பெனி
கோக் – பெப்சி பாட்டில்களில்
கழுவப்படுகிறது
பெண்ணின் ரத்தம்!

கட்டிட வேலையில், அரிசி ஆலையில்
கான்வென்ட் பள்ளியில், கணினித் துறையில்
ஒவ்வொரு பணியிலும் உருவப்படுகிறது
பெண்ணின் நரம்புகள்!

பணிச் சுரண்டல், பாலியல் சுரண்டல்
காதல் சுரண்டல், குடும்பச் சுரண்டல்… என
பெண்ணைச் சுரண்டி
தின்னும் முதலாளித்துவம்தான், அதன் சிந்தனைதான்

உன்னையும் சுரண்டுகிறது என்பதை உணர்வாயா ஆண்மகனே!

பெண்களை உரசுவதையே
பெரும் சாதனையாய்க் கருதும் நண்பா!
உன்னை மொத்தமும் வாட்டுகிற,
முதலாளித்துவத்தோடு உரச ‘தில்’ இருந்தால்
வா, பெண்கள் அமைப்புப் பக்கம்!

சொந்த வர்க்கத்தை,
மனைவியாய், மகளாய், சகோதரியாய்
வேலைக்காரியாய்
சுரண்டி சுகம் கண்டது போதும்,
‘ஆம்பிளை’ சிங்கங்களே! தயங்காமல்
உழைக்கும் வர்க்கமாய் ஒன்று சேர்ந்து
போராட வாரும்…..!

____________________________________________________

துரை. சண்முகம்

____________________________________________________

வினவுடன் இணையுங்கள்

தொடர்புடைய பதிவுகள்

  1. சமூகத்தின் அடுக்குகளில் கீழ்மட்டத்தில் இருக்கும் பெண் இனம் மெல்ல மெல்ல தலையுர்த்தும் நிகழ்வு தொடர்ந்தால்தான் தலைகீழ் மாற்றம் ஏற்படும்..! அதற்கான முயற்சிகளுக்கு பாசாங்குத்தனமின்றி ஒத்துழைப்போம்..! நன்றி!

விவாதியுங்கள்

உங்கள் மறுமொழியை பதிவு செய்க
உங்கள் பெயரைப் பதிவு செய்க