வாக்களிப்பது கடமையா மடமையா – மக்கள் கருத்து

27

நாட்டின் 16-வது நாடாளுமன்றத் தேர்தல் நடைபெறவிருக்கும் நிலையில் பத்திரிகை, தொலைக்காட்சி, வானொலி என ஊடகங்கள் அனைத்தும் திரும்பிய திசை முழுவதும், ‘உங்கள் ஜனநாயகக் கடமையை ஆற்றுங்கள். வாக்களிக்க மறக்காதீர்கள்’ என்ற பிரச்சாரம் செய்து வருகின்றன. இந்நிலையில் கடந்த 65 ஆண்டுகளாக அந்த கடமையை தவறாமல் செய்துகொண்டிருக்கும் மக்களின் எண்ணவோட்டம் என்ன என்பதையும், இந்த இத்துப்போன ஜனநாயகத்தின் மீது மக்களுக்கு ஒட்டிக் கொண்டிருக்கும் அந்த கடைசித் துளி நம்பிக்கை எது என்பதையும் தெரிந்துகொள்ள விரும்பினோம்.

நாடாளுமன்றம்
‘’எதுக்காக ஓட்டுப் போடுறோம்னா கேக்குறேள்? நாம எல்லாம் இண்டியன்ஸ். தேர்தல் வரும்போது ஓட்டுப் போடனுமில்ல..”

அதன் பொருட்டு மாபெரும் கடமையான வாக்களிப்பதையே உரையாடலின் மையமான இழையாகக் கொண்டு சிலரிடம் பேச பார்க்க முடிவு செய்தோம். ’’எதுக்காக ஓட்டுப் போடுறீங்க?” – இதுதான் நாங்கள் கேட்க விரும்பிய கேள்வி. மக்கள் தரும் பதிலை வைத்து அவர்களது கடமையின் மகத்துவம் குறித்து மீண்டும் கேள்விகளை எழுப்பி விவாதிக்க திட்டமிட்டோம்.

ஆனால் நாம் எதிர்பாராத வகையில் மக்களுடனான இந்த உரையாடல்கள் அனைத்தும் ஒரே புள்ளியில் சந்தித்துக் கொண்டன.

நீங்கள் செல்ல வேண்டிய ஊருக்கான சரியான பேருந்தில் ஏற வேண்டும் என்றால், முதலில் நீங்கள் அமர்ந்திருக்கும் தவறான பேருந்தில் இருந்து இறங்க வேண்டும். அப்படி இறங்கியவர்களுக்கும், உள்ளே அமர்ந்திருப்பவர்களுக்கும் நடந்த உரையாடல் தொகுப்பு கீழே…

___________

சென்னையில் இருக்கும் மேற்கு மாம்பலம் அயோத்தியா மண்டபத்திற்கு நாங்கள் சென்றது ஒரு செவ்வாய்கிழமையின் மாலைப் பொழுதில். உள்ளே பஜனை சத்தம். வெளியே வாகன இரைச்சல். கோயிலின் வெளியே பக்கவாட்டு சிமெண்ட் கட்டையில் கொத்தாக ஏழெட்டு பார்ப்பனர்கள் வெற்றுடம்புடன் அமர்ந்திருந்தனர்.  சலசலவென்று பேச்சு சத்தம் ஒலித்தது. அவர்களுடன் பேசத் துவங்கிய முதல் வினாடியில் இருந்தே சுவாரஸ்யம் துவங்கி விட்டது.

‘’எதுக்காக ஓட்டுப் போடுறோம்னா கேக்குறேள்? நாம எல்லாம் இண்டியன்ஸ். தேர்தல் வரும்போது ஓட்டுப் போடனுமில்ல..”

“அதான்… எதுக்காக?”

‘’அது ஒரு அடையாளம் சார். நாம இந்த நாட்டு பிரஜைங்குறக்கான ஐடெண்டிட்டி. ஓட்டுக்கூட போடாம எப்படி நாம இந்த நாட்டு குடிமகன்னு சொல்றது?”

இன்னொருவர் குறுக்கிட்டார். “நாம ஓட்டுப்போட்டு ஒருத்தரை தேர்ந்தெடுத்து அனுப்புனாதானே பார்லிமெண்ட் நடக்கும்? அப்பதானே அவா எல்லாம் அரசாங்க திட்டத்தை மக்களண்ட கொண்டு போக முடியும்?”

‘’ஓ.. அப்போ நீங்க ஓட்டுப் போட்டு தேர்வு செய்யுற எம்.எல்.ஏ.வும், எம்.பி.யும் உங்க தொகுதிக்கு நல்லது பண்றாங்களா? திட்டங்களைக் கொண்டு வர்றாங்களா?”

‘’ம்க்கூம்… எவன் பண்றான்.. எல்லாம் பொறுக்கிப் பசங்களா இருக்கான். ஓட்டு வாங்கிட்டுப் போய் உட்கார்ந்துகிட்டு இந்தப் பக்கம் வர்றதே இல்லை. அதுக்காக நாம ஓட்டுப் போடாம இருக்க முடியாதில்லையோ? நம்ம கடமையை நாம செஞ்சுதானே ஆகனும்?”

அயோத்தியா மண்டபம்
அயோத்தியா மண்டபம்

‘’கடமையா..? சிலபேர் ஓட்டுப்போடுறது உரிமைன்னு சொல்றாங்களே… ”

‘’அது என்னமோ ஒரு மை… அதைவிடுங்க. ஓட்டுப் போடாம வீட்டுலயே உட்கார்ந்துண்டால் சாக்கடை சரியில்லை… ரோடு சரியில்லைன்னு புலம்புனா சரியாயிடுமோ என்ன?”

“ஓட்டுப்போட்டா மட்டும் எப்படி சரியாகும்?”

’’நாம தேர்ந்தெடுக்குற மக்கள் பிரதிநிதிகள்தான் அரசு திட்டங்களைக் கொண்டு வாரா”

‘’அதான் மக்கள் பிரதிநிதிகள் பொறுக்கிகளா இருக்காங்கன்னு நீங்களே சொல்றீங்களே… ஒருத்தர்விடாம எல்லா எம்.பி.யும், எம்.எல்.ஏ.வும் ஊழல்வாதிகளா இருக்காங்க. இதுல நீங்க ஓட்டுப்போட்டு எப்படி நல்லது நடக்கும்?”

‘’நல்லவங்களா தேர்ந்தெடுக்கனும் சார்..”

”யார் நல்லவன்னு எந்த அடிப்படையில் முடிவு செய்வீங்க?”

இது கொஞ்சம் சிக்கலான கேள்விதான் என்று நினைத்துவிட்டார் போல. கொஞ்ச நேரம் சிந்தித்தார். பிறகு சிரித்தார். அவரது உள்மனதை உணர்ந்து கொணடதைப் போல அருகில் இருந்தவர் பேசினார்.

”அது கஷ்டம்தாங்க. யார் வேட்பாளர்னு இன்னைய வரைக்கும் தெரியலை. இனிமேதான் வேட்பாளரையே அறிவிப்பாங்க. அதுக்குப் பிறகு ஒவ்வொருத்தரையா ஆராய்ச்சி செஞ்சு யார் நல்லவங்கன்னு கண்டுபிடிச்சு ஓட்டுப்போட முடியுமா? எல்லாரும் நான் நல்லவன்னுதான் சொல்லிக்கிறான். அதை எல்லாம் ஒவ்வொண்ணா செக் பண்ணறது நடக்குற காரியமா?”

”ஒருவேளை முன்கூட்டியே வேட்பாளர்களை அறிவிச்சுட்டா, நல்ல வேட்பாளர் யாருன்னு கண்டுபிடிச்சிட முடியுமா? ஒரு கட்சியில யார் நல்லவன்னு பார்த்தா சீட் குடுக்குறாங்க? கிடையாது. சாதிக்காரன், பணக்காரனுக்குதான் சீட். அப்புறம் எப்படி நல்லவனை கண்டுபிடிச்சு ஓட்டுப் போடுறது?”

’’நீங்க சொல்றது உண்மைதான். எரியுற கொள்ளியில எந்த கொள்ளியை நல்ல கொள்ளின்னு சொல்றது?”

”சரி.. இவ்வளவு தூரம் பதில் சொல்றீங்க. எதுக்காக ஓட்டுப் போடுறீங்கன்னு இப்பவாச்சும் சொல்லுங்களேன்..”

“தெரியலை சார்!”

**********

சற்றுத் தள்ளி ஒரு பெரியவர் சம்மணிமிட்டு அமர்ந்திருந்தார். ”அவர்தான் மூத்தவர் அவர்கிட்டப் போய் கேளுங்க…” என்றார்கள். அவரிடம் சென்றோம்.

”நான் இதுவரைக்கும் ஏழெட்டு தடவை ஓட்டுப் போட்டிருக்கேன். இந்த தடவையும் போடுவேன்” என்றார்.

‘’உங்களைப் பார்த்தா எப்படியும் 80 வயசு இருக்கும் போலருக்கு. ஆனால் ஏழெட்டுத் தடவைதான் ஓட்டுப் போட்டிருக்குறதா சொல்றீங்களே..”

‘’அது என்னன்னா… ஓட்டுப் போடப் போகும்போது ஆட்டோவுல கூட்டிட்டுப் போறாங்க. திரும்பி வரும்போது அழைச்சுக்கிட்டு வர்றது இல்லை… அப்படியே விட்டுறாங்க. பூத் எங்கேயோ ரெண்டு, மூணு கிலோமீட்டர் தள்ளி இருக்கும். அங்கேருந்து வேகு,வேகுன்னு நடந்து வரணும். அதனால சில தேர்தல்ல விட்டுப்போச்சு, தப்பா எடுத்துக்காதேள்..”

‘’அது இருக்கட்டும். இத்தனை தேர்தல்ல ஓட்டுப்போட்டிருக்கீங்களே… எதுனா நல்லது நடந்திருக்கா?”

”என்னாத்த நடந்துச்சு… பூரா இலவசமா கொடுத்து மக்களை சோம்பேறியாக்கி வெச்சிருக்கா. காலையிலேயே எழுந்திரிச்சு மக்கள் எல்லாரும் அம்மா மெஸ்சுல ஒரு ரூபாய் இட்லி வாங்க நிக்கிறா.. இப்படி இருந்தா நாடு எப்படி உருப்படும்?”

“அது இருக்கட்டும். ஒவ்வொரு தேர்தல்ல ஓட்டுப் போடும்போதும் ஏதாவது ஒரு நம்பிக்கையிலதானே ஓட்டுப் போட்டிருப்பீங்க. இத்தனை வருஷ அனுபவத்துல சொல்லுங்க… உங்களோட நம்பிக்கை நிறைவேறி இருக்கா?”

“நாம நினைக்கிறது எல்லாம் நடக்கனும்னா நாமதான் எம்.பி., எம்.எல்.ஏ. ஆகனும். எதையோ நினைச்சு ஓட்டுப் போடுறோம். அதெல்லாம் நடக்கும்னு சொல்ல முடியுமா?”

“பின்ன ஓட்டுப் போடுறதால என்ன பிரயோஜனம்னு நினைக்கிறீங்க?”

“இந்தா ரோடு போட்டிருக்கான். லைட் போட்டிருக்கான். எல்லாரும் செல்போன் வெச்சிருக்கா. கொஞ்சம், முன்னபின்ன இருந்தாலும் நாடு முன்னேறியிருக்கிறது நிஜமில்லையோ என்ன?..”

“இந்த முன்னேற்றத்துக்கு தேர்தல்தான் காரணம்னு சொல்ல வர்றீங்களா?”

‘’ஆமா..”

‘’ஆனா இந்த தெருவிளக்கு போடுறது மாநகராட்சி வேலை. ரோடு போடுறது, குப்பை அள்ளுறதும் அவங்க வேலைதான். அதுக்குத் தனியா உள்ளாட்சித் தேர்தல்ல நாம ஓட்டுப் போடுறோம். அப்போ எம்.பி.க்கும், எம்.எல்.ஏ.வுக்கும் என்ன வேலை?”

“அவங்களும் ரோடு போட மாட்டாங்களா..? ஒருவேளை, மேம்பாலம் கட்டுவாளா இருக்கும். அதுலதான் கமிஷன் அதிகமாம்..”

“அப்போ எல்லாரும் கமிஷன் வாங்குறாங்கன்னு உங்களுக்குத் தெரியுது. தெரிஞ்சேதான் ஓட்டுப் போடுறீங்க.. இல்லையா?”

தேர்தல் பாதை திருடர் பாதை
தேர்தல் பாதை திருடர் பாதை

‘’ஆமா.. அதுக்கு நாம என்னப்பா பண்ண முடியும். நாம சாதாரண குடிமக்கள். நம்மண்ட என்ன அதிகாரம் இருக்கு?”

‘’இது மக்களாட்சி… இதுல மக்கள்தான் மன்னர்கள்னு சொல்றாங்களே..”

“எவன் சொன்னது.. சும்மா அடிச்சு விடுவானுங்க… மன்னராவது மயிராவது”

“நீங்க இப்படி சொல்றீங்க… ஆனா டி.வி., ரேடியோவைத் திறந்தா, ‘உங்ககிட்ட இருக்குறது விலைமதிப்பு இல்லாத ஓட்டு.. மறக்காமல் போட்டிருங்கன்னுல்ல சொல்றாங்க..?”

”அவன் சொல்லுவான்.. அவனுக்கென்ன”

“அப்போ நீங்க போடுற ஓட்டுக்கு ஒண்ணும் மதிப்பு இல்லேன்னு சொல்றீங்களா?”

“ஏன் இல்லை… போன எம்.எல்.ஏ. எலெக்‌ஷன்ல 500 ரூபாய் தந்தான். இப்போ ஆயிரம் ரூபாய்ன்னு சொல்லிக்கிறாளே..”

”இதுதான் அந்த மதிப்பா.. ஆக இந்நாட்டு மன்னர்களோட விலை 500 ரூபாய். நீங்களே பணத்தை வாங்கிக்கிட்டு ஓட்டை விற்கிறீங்க.. நீங்க எப்படி அரசியல்வாதிகளை குற்றம் சொல்ல முடியும்?”

“சரி… அப்போ இனிமேல் பணம் குடுக்காதே.. நானா தேடிப்போய் கேட்குறேன்? அவனா வர்றான், அவனா கொடுக்குறான். அதுக்கு நான் என்ன பண்ண முடியும்?”

“எப்படிப் பார்த்தாலும் நீங்க பணம் வாங்குறது தப்புதானே”

”அதான் சொல்லிட்டேனேப்பா… இனிமே வேண்டாம். நீ நல்லவனா இருந்து ஒழுங்கா நல்லது பண்ணு. அதை செய்ய முடியலைன்னுதானே மக்களுக்கு லஞ்சம் தர்ற… நீ கொடுக்காதே… நானும் வாங்கலை..”

”சரி விடுங்க… உங்களுக்கும் வேண்டாம், எனக்கும் வேண்டாம். ஓட்டுப் போட்டு என்னத்த கண்டீங்க.. இதுக்கு மட்டும் பதில் சொல்லுங்க..”

“என்னத்த  சொல்லச் சொல்ற… ஓட்டுப் போடுறது எல்லாம் எதையும் எதிர்பார்க்காம செய்யுறது. பிள்ளைங்களை பெத்து வளர்க்குறோம். எதுக்கு? வயசான காலத்துல நம்மளை வெச்சு காப்பாத்துவாங்ககுற நம்பிக்கைதான். அப்படி இல்லாம விரட்டி விடவும் செய்யுறாங்க. அதுக்காக பிள்ளை பெத்துக்காம, பெத்த பிள்ளையை வளர்க்காம இருக்குறமா… அதுபோலதான்..”

இதற்கு என்ன பதில் சொல்வது என்று குழப்பமாக இருந்தது. வாக்களிப்பதையும், குழந்தை பெறுவதையும் ஒப்பிடுகிறார். இரண்டும் பிரதிபலன் எதிர்பாராமல் செய்ய வேண்டியது என்கிறார். ஓர் ஆத்ம திருப்தி போல அவர் அதை வர்ணித்தாலும், இத்தனை காலமாக வாக்களித்திருப்பதன் வாயிலாக அப்படி எந்த ஆத்ம திருப்தியையும் அவர் பெற்றிருக்கவில்லை என்பதை, அவரது பேச்சின் மூலமே உணர முடிகிறது. அவரால் எதற்கு வாக்களிக்கிறேன் என்பதை துல்லியமாக விவரிக்க முடியவில்லை அல்லது அத்தகைய துல்லியமான பதிலை பெறக்கூடிய கேள்வியை நாங்கள் கேட்க வில்லையோ?

இப்போது அவரது பேச்சை அசைபோடும்போது, வாக்களிப்பது அவருக்கு ஓர் ஆசுவாசமாக இருப்பதை புரிந்துகொள்ள முடிகிறது. ஓர் அரசியல்வாதி மீது, அரசியல் கட்சியின் மீது இருக்கும் கோபத்தை தணித்துக்கொள்வதற்கு அவருக்கு கிடைத்திருக்கும் வாய்ப்பாக தேர்தலை கருதுகிறார். ஒரு பொம்மையின் மீது ஐந்தாண்டுகளுக்கு ஒருமுறை கத்தியால் குத்துவதால் அவர் தன்னைத்தானே வீரன் என்று கருதிக்கொள்கிறார். அந்த வகையில் இந்த பொம்மை ஜனநாயகத்தின் அட்டக்கத்தி வீரர்களாக இருக்கிறார்கள், வாக்காளர் பெருங்குடி மக்கள்!

’ஓட்டு போடுறது ஜனநாயகக் கடமை சார்’ என்று ஆரம்பித்தவர்கள் ஐந்தாவது நிமிடத்தில், ‘ஓட்டுப் போடுறதால பைசாவுக்கு பிரயோஜனம் இல்லைங்க..’ என்றார்கள். வாக்களிக்காமல் இருப்பது தேசவிரோத செயல் என்று துவங்கியவர்கள், நாம் வாக்களித்து தேர்ந்தெடுப்பவர்கள் தேசவிரோதிகளாக இருப்பதை அவர்களின் சொந்த சொற்களில் வெளிப்படுத்தினார்கள்.

மொத்தத்தில் தேர்தல் குறித்தும், இந்த ஜனநாயகம் குறித்தும் மக்களின் மனதில் எஞ்சியிருக்கும் சித்திரம் என்பது, ஒரு வாழ்ந்து கெட்ட குடும்பத்தின் மீது கொண்ட பரிதாபத்தைப் போன்றுள்ளது. எனினும், ‘வேற என்ன சார் பண்ண முடியும்?’ என்ற ஒற்றைக் கேள்வியில் முட்டிமோதி தலைகவிழ்ந்துகொள்கிறார்கள் மக்கள். வேறு என்ன செய்வது என்பதை சிந்திக்கத்தான் வேண்டும். அதற்கு முன்பு, செய்து கொண்டிருப்பது தவறு என்று தெரிந்தபிறகு அதை நிறுத்துவது முக்கியம் அல்லவா?

–    வினவு செய்தியாளர்கள்.

சந்தா செலுத்துங்கள்

உங்களின் குரல், உங்களின் பங்களிப்பின்றி ஒலிக்க முடியுமா? வினவு தளத்திற்கு ஆதரவு தாருங்கள்.

27 மறுமொழிகள்

  1. ஜனநாயகம் சீர் கெட்டுப்போனால், அதனை சரி செய்ய முயல வேண்டுமே தவிர, அதனை விட்டு விலகி ஓடுவதும், சவடால் பேச்சாலும், எழுத்தாலும் “விமர்சனம்” என்ற பேரில் கிறுக்கினால் அது ஒரு மண்ணுக்கும் புரயோஜனப்படாது….. உலகின் மிகப்பெரிய ஜனநாயக நாட்டின் அமைப்பில் தவறு இருந்தால் அதை சரி செய்ய பல பத்தாண்டுகள் தேவைப்படும்… ஒரு தேர்தலிலோ அல்லது ஒரு கட்சியினாலோ இதை செய்ய முடியாது… சும்மா நக்சல்பாரி….பாரின்னு… கிளம்பினா, சோத்துக்கு வழியில்லாதவன் துப்பாக்கிய தூக்கிட்டு காட்டுக்குள்ள போயி ஜனநாயகத்த தேடி கடைசியில் இந்திய ராணுவத்திடமும், மாநில போலீஸிடமும் மண்டியிட்டு சரணடைந்த பல பேரில் ஒருவனாக வேண்டியது தான்… அறிவுரை சொல்ல முதலில் நமக்கு ஏதாவது அறிவு இருக்கனும்… சும்மா சாம்பிரானி போடக்கூடாது…. இந்த கட்டுரையின் மூலம் வினவின் நோக்கம், “நக்சல்பாரி” கும்பலுக்கு ஆள் பிடிப்பது போல் உள்ளது….நல்ல கட்டுரை ஆனால், தவறான உள்னோக்கு….

    • மிக்க நன்றி இந்தியன். நான் நெனச்சேன். நீங்க சொல்லீட்டிங்க. இவங்க மட்டும் தொழிற்சங்க தேர்தல்ல நிப்பாங்களாம்? இவங்களால வெற்றி பெற முடியாத மக்கள் தேர்தல்ல எவன் ஓட்டுப் போட்டாலும் தப்பாம்? அந்த தேர்தல் முறையையே குறை சொல்லுவாங்களாம்?

      ஒரு கம்பெனி தொழிற்சங்க தேர்தல்ல இவங்க வாங்குன ஓட்டு லிஸ்ட்:

      வினவு தொழிற்சங்கம் 210

      திமுக தொழிற்சங்கம் 150 + கம்யுனிஸ்ட் தொழிற்சங்கம் 178 = 328

      உங்கள புடிக்காதவங்க 118 பேர் அதிகமா இருக்காங்க?

      நீங்க எதுக்கு எலக்சன்ல நிக்குறிங்கனு நாம பின்னுட்டம் போட்டா அத கட் பன்னீருவாங்க.

      இவங் ஜனநாயகத்துக்கு இதான் எடுத்துக்காட்டு.

    • வினவு என்பது தனிநபரல்ல. மக்கள் கலை இலக்கியக் கழகம் என்ற புரட்சிகரப் பண்பாட்டு அமைப்பின் ஆதரவாளர்கள். இயக்கப் பணிகள் மற்றும் வாழ்க்கைப் பணிகளுக்கிடையே பல்வேறு அரசியல் பண்பாட்டுப் பிரச்சினைகள் குறித்த எமது கருத்துக்களைப் பகிர்ந்து கொள்வதே வினவின் நோக்கம்.

      தேசத்தால், நிறத்தால், இனத்தால் வேறுபட்ட உழைக்கும் வர்க்கத்தின் வாழ்க்கையை, போராட்டத்தை, எதிர்பார்ப்புகளை, ஏமாற்றங்களை, அவை குறித்த கருத்துகளை பரிமாறிக் கொள்வதன் மூலம் பொதுவானதோர் கனவை, இலட்சியத்தை நாம் உருவாக்கிக் கொள்ள முடியாதா? முடியும் என்றே நம்புகிறோம்.

  2. இந்திய பாராளுமன்ற அமைப்பினை ஒரு வெஸ்டர்ன் டாய்லெட் போல வரைந்த கார்ட்டூனிஸ்ட் நினைவுதான் வருகிறது.வயிறு சரியில்லாத போது ஜனநாயக கடமையை (மலம் கழித்தல்)ஆற்றிவிட்டு வந்தால் கொஞ்சம் சுகமாக இருக்கும்.இந்த அற்ப சுகம் கூட ஓட்டு போடும் ஜனநாயக ம(க)டமையை செய்யும் போது கிடைப்பதில்லை.

  3. இந்தப் பதிவோடு நமது வெளியீட்டில் வந்த பாடலை இணைத்தால் பொருத்தமாக இருக்கும்

  4. மக்களால் ஜனநாயக முறையில் தேர்ந்தேடுக்ககூடியவர்களிலேயே நல்ல நேர்மையான அரசியல்வாதிகளை தேர்ந்தெடுக்க முடியவில்லை. இதில் நக்சல்பாரிகளிடம் ஒட்டு மொத்த ஆட்சிபொறுப்பையும் ஒப்படைத்தால்??? பதவி வராத வரைக்கும் புரட்சி, பொதுநலம் பற்றி பேசுபவர்கள், பதவி கிடைத்தவுடன் மற்ற அரசியல்வாதிகளை போல சோரம் போக மாட்டார்கள் என்பது என்ன நிச்சயம்? அசாம் கண பரிஷத் என்ன ஆனது? நக்சல்பாரிகள் பதவி போதையில் சர்வாதிகாரிகளானால் என்ன ஆவது? தற்போதைய தேர்தல் முறையில் ஒரு அரசியல்வாதி தவறு செய்தால் குறைந்த பட்சம் அவர்களின் ஆட்சியை தூக்கியெறிந்து வேறு ஒரு ஆட்சியை பதவியில் அமர்த்த ஒரு வாய்ப்பு உண்டல்லவா? ஜனநாயகம் இல்லையென்றால் ஆட்சியில் தவறு செய்பவர்களை எப்படி தட்டி கேட்பது? முடியாட்சியாக இருந்தாலும், குடியாட்சியாக இருந்தாலும், ஆள்பவர்கள் நல்லவர்களாக, திறமையானவர்களாக இருந்தால் நல்லாட்சியே நடக்கும். ஒரு வேலை நக்சல்பாரிகளிடம் ஆட்சியை ஒப்படைத்த வேளையில் அவர்களுக்கு பதவிப்பித்து பிடித்து போய் ஆட்சியை விட மனமில்லை என்றால் நாடு என்ன ஆவது? நக்சல்பாரி ஆட்சியாளர் பசுந்தோல் போர்த்திய புலியாக இருந்து பின்னர் அவர் உண்மையில் நக்சல்பாரி வேடத்தில் இருக்கும் மோடி போன்ற சர்வாதிகாரியாக இருந்தால் என்ன ஆகும்? சர்வாதிகாரிகளை அவ்வளவு சுலபத்தில், ஜனநாயகத்தில் வீழ்த்துவது போல வீழ்த்த முடியுமா?

  5. ஆமாம்பா ஜனநாயகம் குப்பை, ஒத்துகிறோம். வேற என்ன ஆல்டெர்னேடிவ்? சும்மா புரட்சி புரட்சினு கூவுறிங்க.. என்ன மாதிரி புரட்சி நடக்கனும் அதுக்கு நீங்க என்ன செய்யறிங்க, நாங்க என்ன செய்யனும்? அதை பத்தி ஏதாவது எழுதினா பரவாயில்ல.. சும்மா வெறும் குறை மட்டும் சொல்லிகிட்டு இருந்தா என்ன பயன்?

  6. விடுதலை புலிகள் தலைவர் பிரபாகரனின் ஆட்சித்திறன் பற்றி அனைவரும் பாராட்ட கேட்டுள்ளேன். அதே சமயம் அவரை எதிர்த்தவர்கள் நிலை என்ன ஆனது? சர்வாதிகாரத்தின் தோல்வி இங்கு தான் ஆரம்பமாகிறது? நான் ஈழ விடுதலைக்கு எதிரானவன் அல்ல. அதே சமயம் விடுதலை புலிகளின் சில தவறான முடிவுகளினால் (சில அரசியல் முடிவுகள், சில போர் முடிவுகள்) ஈழம் தோல்வியடையும் நிலை வந்தது. எல்லோரையும் குறை சொல்வது சுலபம் (அரவிந்த் கேஜ்ரிவால் அதைத்தானே செய்கிறார்). நீங்கள் சொல்லும் நக்சல் பாரி மாற்று முறை மேல் எனக்கு இன்னும் நம்பிக்கை வரவில்லை. முதலில் நீங்கள் உங்கள் பலத்தை தேர்தல் மூலம் காட்டி மக்களிடம் உங்களது கருத்துக்கள் சென்றடையும் வகையில் குறைந்த பட்சம் உள்ளாட்சி தேர்தல் வார்டு கவுன்சிலர் அளவில் தேர்வாகுங்கள். ம.க.இ.க. பெயரில் இப்படி ஒவ்வொரு செங்கல்லாக (கவுன்சிலர்) ஒரு சிறிய கோட்டையை நீங்கள் விரும்பினால் உருவாக்கலாம். மக்களுக்கு நன்மை செய்யும் ஒரு ஆட்சியாளரை மக்கள் ஏன் வீழ்த்தப்போகிறார்கள்??? சிறு துளி, பெருவெள்ளம். நீங்கள் உருவாக்க நினைக்கும் புரட்சியை ஜனநாயகமுரையின் மூலமே உருவாக்கலாமே? ம.க.இ.க பெயரிலேயே அரசியல் கட்சி ஆகுங்களேன். என் ஓட்டை உங்களுக்கே போடுகிறேன். உங்களின் மேல் எனக்கு நம்பிக்கை உள்ளது. ஆனால் உங்களின் மேல் உங்களுக்கு நம்பிக்கை உள்ளதா?

  7. தற்போதைய நிலையில் காங்கிரஸ், பாஜக, கம்யு, திமுக, அதிமுக, மதிமுக, தேமுதிக, பாமக, மற்றும் பல சிறிய கட்சிகள் அனைத்தின் மேலும் மக்களுக்கு நம்பிக்கை இல்லாத வேளையில் ம.க.இ.க ஏன் ஒரு புரட்சியை ஜனநாயக முறையில் உருவாக்க கூடாது? நீங்களும் நல்லாட்சியை கொடுக்க மாட்டீர்கள்? நல்ல மனிதர்களை தேர்தலில் நிறுத்த மாட்டீர்கள், பின்பு எல்லா அரசியல் கட்சிகளையும் குறை சொல்லி என்ன ஆகா போகிறது?

  8. மதுக் கடைகளை நடத்தும் தமிழகத்திற்க்கு
    நடமாடும் மதுக்கடைதான் எதிர்க்கட்சித் தலைவராக முடியும்,

    தர்மபுரி மரக்காணம் எரியும் தமிழகத்திற்க்கு
    குஜராத்தான் வழி காட்ட முடியும்……

    சிறுவனை வாயில் சுடும் தமிழகதிற்க்கு
    சிசுவை நெருப்பிட்டு கொல்பவனே காந்தியாவான்,
    பெரியாரை ஒழித்துக் கட்ட
    அவரின் வாரிசே செருப்பு தருவான்………

    நர வேட்டை நாகரீகமாக போற்றப்படும்
    இந்தியாவிற்க்கு நலிந்தவரின் மரண ஓலம்தான் தேசிய கீதமாகும்

    ஒடுக்கப்பட்டோரின் பிணக் குவியல்தான் வெற்றிக்கான மேடையாகும்
    அதிகார தாகம் தணிக்க அநாதைகளின் இரத்தம்தான் அருமருந்தாகும்

    மதவாத தீ அழித்தாலும் தானும் அழிந்தே தீரும்,
    நல்லிணக்க ஜோதி அணைத்தாலும் ஜொலித்துக்கொண்டே இருக்கும்…… இது இந்திய தேசயவாதி அஸ்லம் கான்

  9. புரட்சி என்பது யாருக்கும் எதிரானது அல்ல.
    தனி ஒரு மனிதனுக்கு உணவில்லை எனில் ஜகத்தினை அழித்திடுவோம் என்ற பாரதியின் வரிகளை மெய்பிப்பது,
    ஏழ்மையினால் ஒருவன் அறிவைப் பெற முடியவில்லை எனில் நாம் எல்லோரும் நாணி வெட்கப்பட வேண்டும் என்று உரைத்த பாரதிதாசனின் வார்த்தைக்கு உயிர் கொடுப்பது,
    இங்கு எல்லோரும் சமம்,இல்லை என்போரே இங்கு இல்லை என்பது…
    இதுவெல்லாம் புரட்சியின் சித்தாந்தம் இது,மேற்கூறியவெல்லாம் இங்குண்டெனில் புரட்சியவாதி இங்கு தோன்றவேமாட்டான்.அது நாம் காணும் ஜனநாயகப்பாதையில் இல்லையென்றால் அது மாற்றப்பட்டே ஆகவேண்டும்.
    தோழமையோடு சிந்தியுங்கள்,நம் பின் சந்ததிக்கு நாம் என்ன செய்யப் போகிறோம் என்பதில் இல்லை ஆனந்தம்,நாம் எத்தகைய பாதையில் சென்று கொண்டிருக்கிறோம் என்பதை சிந்தித்து அதில் உள்ள தவற்றை மற்றுவதிலேதான் ஆனந்தம் என்பதை நாம் உணர்ந்தோம் என்றாலே மேற் கேட்கப் பட்ட கேள்விகளுக்கு விடை கிடைத்து விடும்.
    எல்லோரையும் இங்கு நம்மால் திருப்திபடுத்த முடியாது,ஆனால் எல்லோருக்காகவும் நாம் வாழ்வேண்டும் என்று நினைப்பதை எந்த சக்தியாலும் தடுத்து நிறுத்த முடியாது.

  10. ஓட்டை, உடைசல், பேரீச்சம்பழ ரகமாயினும் தற்சமயம் இருக்கும் வண்டி இது ஒன்றே. இதையும் ஒழித்துவிட்டு என் செய்வது? நீர் பரிந்துரைக்கும் பென்ஸ் காரின் ஒரு வரைபடத்தை கூட கண்ணில் காட்டாமல், இருக்கும் வண்டியை நொட்டை சொல்வதால் ஒரு பயனும் இல்லை.

    • பாபுபகத்,
      உங்களது கருத்து 11 கொள்கையளவில் எனக்கு ஈர்ப்பு தருகிறது.

      பல காலம் வாழ்ந்து பழகியதில், தற்போதுள்ள இப்போதுள்ள சமூக நடைமுறை பற்றி ஓரளவு புரிகிறது. ஆனால், கருத்து 11 கூறும் மாற்று சமூக வாழ்வுமுறை, சட்டதிட்டங்கள் எப்படி இருக்கும் என்பது தெளிவில்லை.

      என்னை ஒட்டு போடாதே என கூறுபவரிடம் தெளிவாக, கூர்மையாக, முழுமையாக பேசும்படி கேட்க எனக்கு உரிமையுண்டு என கருதுகிறேன்.

      // வீட்டிற்குள்ளேயே இருந்து கொண்டு வேக்கியானம் பேசாதீர்கள்

      எனது தராதரம் இங்கே முக்கிய விஷயமில்லை.

      • கேட்கக் கூடிய விதம் என்று ஒன்று உண்டு நண்பா.தெளிவு கட்டாயம் கிடைக்கும்.நன்றி.

  11. ம.க.இ.க நக்சல்பாரி கம்யூனிஸ்ட்களான நாங்கள் தேர்தல்கள் வேண்டாம் என்று கூறவில்லை,இந்த போலி ஜனநாயக தேர்தல்கள் தான் வேண்டாம் என்கிறோம். தேர்ந்தெடுக்கப்படும் மக்கள் பிரதிநிதிகள் சட்டத்தை இயற்றவும் அதை நடைமுறை படுத்தவும் அதிகாரம் வேண்டும் என்கிறோம். தேர்ந்தெடுக்கப்படும் பிரதிநிதிகள் தவறு இழைதால் திருப்பி அழைக்க மக்களுக்கு அதிகாரம் வேண்டும்.
    இதை நடைமுறைபுடுத்த தனி சொத்து உடைமை முறை ஒழிக்கப்பட வேண்டும்
    இதற்கு புரட்சி வேண்டும்.
    புரட்சிக்கு மக்கள் படை வேண்டும்,
    மக்கள் படை கட்ட மக்களுக்கு அரசியல் பயிற்சி வேண்டும்,
    மாவோவின் வார்த்தைகளில்,

    அரசியல் பயிற்சி என்பது மிகப்பெரிய இரத்தம் சிந்தாப் போராட்டம்,

    புரட்சி என்பது மிகசிறிய இரத்தம் சிந்தும் போராட்டம்.

  12. சிவகுமார், உங்களுடைய புரட்சி வெற்றி பெற வேண்டுமென்றால் மக்களின் ஆதரவு மிக முக்கியம். மக்கள் எப்போது ஆதரவு தெரிவிப்பார்கள்? உங்களால் அவர்களின் நடைமுறை வாழ்க்கைக்கு ஒரு நல்லது நடக்கும் என்று நம்பினால் தானாக உங்களை ஆதரிக்க போகிறார்கள். தப்போ, சரியோ, கேஜ்ரிவால் எப்படி திடீர் முதல்வரானார்? மக்கள் அவரை நம்பினார். சரி தானே. தனி மனிதராக அவர் ஒரு கட்சியை ஆரம்பித்து மக்களை நம்ப வைத்து ஆட்சியை பிடித்தாரல்லவா? அந்த பாதையை, இரத்தம் சிந்தாத பாதையை ஏன் நீங்கள், ஆதாவது ம.க.இ.க தேர்ந்தெடுக்க கூடாது? ஆக்கபூர்வமான தீர்வுக்கு நாங்கள் ஆதாவது எம்மை போன்ற பொதுமக்கள் என்றைக்குமே எதிரிகள் கிடையாது. செயலில் உங்கள் தீவிரத்தை காட்டுங்களேன். குறைந்த பட்சம், உள்ளாட்சி தேர்தல் அளவில் நீங்கள் முதலில் தேர்தலில் பங்கெடுத்து உங்கள் ஊர், உங்கள் தெரு, உங்கள் நகர் பிரச்சினைகளை தீர்த்து வையுங்கள். தானாக மக்கள் ஆதரவு உங்களுக்கு குவியும். சும்மா, எல்லோரையும் குறை கூறினால் மட்டும் மக்கள் உங்களை ஆதரிக்க மாட்டார்கள். அவர்களின் குறைகளை நீங்கள் நீக்குவீர்கள் என்று அவர்கள் நம்ப வேண்டும். உங்களால் மக்கள் பிரச்சினைகளை தீர்க்க முடியுமா? உங்களின் மேல் உங்களுக்கு நம்பிக்கை இருக்கிறதா? அந்த நம்பிக்கை, தைரியம் இருந்தால், போட்டிக்குள் இறங்குங்கள். போட்டியில் இறங்காமல் வாய் சவடால் விடுவது சரியாக படவில்லை. மக்களின் ஆதரவு இல்லாமல் எந்த புரட்சியும் வெற்றி பெற்றதாக சரித்திரம் இல்லை.

  13. வினவு, ம.க.இ.க. விற்கு ஒரு வேண்டுகோள்:
    தேர்தல் முறையல்லாத ஒரு புரட்சி முறை ஆட்சி தேவை என நீங்கள் கூறுகிறீர்கள். சரி. நாட்டை கெடுக்கும் இந்த அரசியல் சீரழிவிற்கு உங்கள் ஆக்கபூர்வமான தீர்வு தான் என்ன? புரட்சி, போராட்டம், மக்கள் படை, நக்சல்பாரி படை ஆகிய வார்த்தைகளை தாண்டி, சாதாரண பாமர மக்களுக்கும் புரியும் வகையில் உங்களது தீர்வு என்ன என்பதை அறிய ஆவலாக இருக்கிறேன். ஊழல்வாதிகளை அரசியலில் ஊடுருவாமல் செய்ய வேண்டும். அதற்கு என்ன வகையான தீர்வை காண்கிறீர்கள்? இதற்கு சர்வாதிகார பலம் கொண்ட கம்யுனிஸ்ட் ஆட்சி தான் தீர்வு என நீங்கள் கருதினால், அதனை எளிய வார்த்தைகளில், எங்களுக்கு எல்லாம் புரிய கூடிய வகையில் நீங்கள் ஒரு கட்டுரை வெளியிடுங்கள். உங்கள் பதிலுக்கு ஆவலாக காத்திருக்கிறேன்.

  14. தேர்தல் புறக்கணிப்பு என்பது நடைமுறையில் சாத்தியமில்லாததாகி வருகிறது. தேர்தலை புறக்கணிப்பதற்கு கூட தேர்தலில் பங்கேற்பு முன்நிபந்தனையாகிறது. முதலில், தேர்தலில் ஓட்டுப் போட்டுப் பழகிய மக்களின் நன்மதிப்பை பெற வேண்டியது அதற்கு அவசியம். உதாரணமாக, குஜராத்தில், இந்து மதவெறி கும்பல் தேர்தலைப் புறக்கணிக்கும் ஒரு கோரிக்கை விடுத்தால் அவர்களால், வெற்றிகரமாக செயல்படுத்த முடியும். இந்து மதவெறிக்கு வீழ்ந்த மக்கள் பெரும்பான்மை எண்ணிக்கையில் குஜராத்தில் உள்ளதை நாமறிவோம். தேர்தலில் நிற்காத ஆர்.எஸ்.எஸின் பணியும், தேர்தலில் பங்கெடுக்கும் பா.ஜ.க செயல்பாடுகளும் ஒன்றின் குறையை இன்னொன்று அழகாக பூர்த்தி செய்கிறது. எந்த தோல்வியும் அவர்களை அசைப்பதில்லை. நமக்கு, தே.மு.தி.க பா.ஜ.க உறவு ஏற்பட்ட உடனே நெஞ்சு பதைக்க ஆரம்பிக்கிறது. நமக்கிருக்கும் சிறிய பலத்தில் ஒரு பந்த் நடத்த இன்று இயலுமா? அதை விட பன்மடங்கு சிரமம் இந்த தேர்தலை புறக்கணிக்க மக்கள் நம்முடன் வருவார்கள் என்று எதிர்பார்ப்பதும்.

    இந்த தேர்தலில் பா.ஜ.கவின் வெற்றியை தடுக்கும் வழி தான் என்ன? தேர்தல் வெற்றி என்பது ஒரு பெரிய அங்கீகாரம்.டாதன் முக்கியத்துவத்தை நாம் உணராமல் இருக்கிறோம். ஒரு பத்து சதவீத வாக்குகள் பெறுவது என்பது சாதாரண விசயமல்ல. தமிழகத்தில் பா.ஜ.க என்ற நெத்திலி, மீனாகி, கோர சுறாவாக மாறி வருகிறது. கரையில் இருந்து கொண்டு சிறு தூண்டிலைப் போட்டுக் காத்திருக்கிறோம். ஹெமிங்வேயின் Old Man and the Sea யின் கிழவனைப் போன்ற உறுதியும், நெஞ்சுரமும் நம்மிடம் இருக்கிறது. எனினும் இந்த தேர்தல் கடலில் பா.ஜ.க என்ற கோர சுறாவை அடக்க சென்றால் கெட்டுப் போய்விடுவோமோ என்று அஞ்சுகிறோம். தேர்தல் புறக்கணிப்பு கொள்கையில் ஊன்றி நின்று குமரியில் பா.ஜ.கவை தடுப்பது எப்படி? விஜயகாந்த், அர்விந்த கேஜ்ரிவால் போன்ற நபர்கள் கூட மக்களின் நம்பிக்கையை பெற முடிகிறது.

    இந்த தேர்தல் வழியாக பெரிய மாற்றத்தை எதிர்பார்த்து இந்த கருத்தை முன்வைக்கவில்லை. சமூக மாற்றம் நோக்கிய பயணத்திற்கு தேர்தல் பங்கேற்பை எப்படி பயன்படுத்திக் கொள்வது என்றாவது சிந்திக்கலாமே. இங்கே கருத்துரைத்திருக்கும் தோழர் ஒருவர் சட்டமியற்றும் அதிகாரம் மட்டும் தான் இருக்கிறது; அதை அமுலாக்கும் உரிமை இல்லை என்றிருக்கிறார். சட்டம் இய்ற்றும் மக்கள் பிரதிநிதியாக வந்து விட்டால், மக்களை திரட்டி அந்த மறுக்கப்பட்டிருக்கும் உரிமைக்காக போராடுவது சுலபமல்லவா? உதாரணமாக, இன்று பல கோடிகள் அளிக்கப்படும் எம்.பிக்கள் நிதியிலிருந்து ஒரு திட்டத்தை செயலாக்க மாவட்ட ஆட்சித்தலைவரின் அனுமதி வேண்டும் என்று இருக்கிறது. நமது மகஇக மக்கள் பிரதிநிதி தோழர் விரும்பும் திட்டத்துக்கு நாம் பயப்படுவது போல மாவட்ட ஆட்சித் தலைவர் முட்டுக்கட்டை போடுகிறார் என்று வைத்துக் கொள்வோம். மக்கள் நம்மீது நம்பிக்கை வைத்து இணைந்து நிற்க முன்வருவார்கள்.

    தேர்தல் புறக்கணிப்பு என்பது அநாவசிய பயத்தை மக்களிடம் ஏற்படுத்துகிறது. நம்மை கட்டம் கட்டி ஒதுக்க அவர்களால் எளிதில் முடிகிறது. நக்சலைட்கள் என்று ஒதுக்கி வைக்கிறார்கள். ‘ஆப்’ கட்சியின் பாத்திரம் இந்த தேர்தல் அரசியலில் என்னவாகவும் இருக்கட்டும். அது மக்களிடம் பெற்றிருக்கும் ஆதரவு என்பது முக்கியமானது. மக்களுக்கு புதிய ஒரு அரசியல் கட்சி ஒன்றின் மீது வருகின்ற இயல்பான நாட்டம் கம்யூனிஸ்ட் கட்சிக்கு இன்றில்லை. பா.ஜ.கவின் செல்வாக்கு பல ஆண்டுகளுக்கு இருக்கும் என்பதை மறுக்க முடியாது. ஒரு கட்சி அதன் நிறைவு செறிவு நிலையை அடைந்த பின்னும் செல்வாக்கை இழக்காமல் இருப்பது பா.ஜ.க மட்டுமே. ம.க.இ.க தோழர்களால் மட்டுமே பா.ஜ.க.வை எதிர்த்து வீழ்த்த முடியும். ஆனால், உங்களுக்கே தேர்தல் புறக்கணிப்பு என்ற கொள்கையின் அபத்தம் புரியவில்லை என்றால் அது மிகப்பெரிய சோகமே. ஃபாஸிஸத்துக்கு பணிவேற்பை மக்கள் வழங்கி அதற்கு பழகிக் கொள்ளும் நாள் வெகு தொலைவில் இல்லை என்பது மட்டும் புரிகிறது.

  15. தேர்ந்தெடுக்கப்படும் மக்கள் பிரதிநிதிகள் சட்டத்தை இயற்றவும் அதை நடைமுறை படுத்தவும் அதிகாரம் வேண்டும் என்கிறோம்.

    Yes they already have that power

    தேர்ந்தெடுக்கப்படும் பிரதிநிதிகள் தவறு இழைதால் திருப்பி அழைக்க மக்களுக்கு அதிகாரம் வேண்டும்

    They will be removed by voting in just 5 years. Think of Fidel castro/Kim making mistake, How will you remove him?

    இதை நடைமுறைபுடுத்த

    It is already implemented , I am sorry you cant understand it

    தனி சொத்து உடைமை முறை ஒழிக்கப்பட வேண்டும்

    Why cant you visit or atleast ask the people in that system?
    When China told noboby owns nothing but everybody owns others work,Farmers stopped working. result great famine…

    Why cant you learn from the grave mistakes?

  16. தேர்தல் எதற்கு என்ற கேள்வியை கேட்ட நீங்கள், சுய பரிசோதனையாக உங்கள் இயக்கத்தாரிடம் communism எதற்கு என்ற கேள்வியையும் கேளுங்கள் – செம காமெடியான பதில்கள் வரும்.
    ஜனநாயகத்தின் பக்கம் கட்டுரையிலேயே சில பதில்கள் உள்ளன – ஆனால் அதை பூசி மொழுகி எழுதியிருக்கிறீர்கள்.

  17. சேகுவாராவின் வெற்றி பொலிவியாவில் ஏன் சாத்தியப்படவில்லை? காரணம் அந்த மக்களிடம் அந்த அளவுக்கு விழிப்புணர்வு இல்லை. அதுவும் இந்தியாவில் விழிப்புணர்வு மட்டும் அல்ல சாதி, மதம்,மொழி, ஏழை, பணக்காரன் என்று ஏகப்பட்ட பிரிவினைகள். இந்த பிரிவினைகளை தூபம் போடும் அரசியல் கட்சிகள் ஆகவே இங்கே இதற்கு சாத்தியம் இல்லை.

  18. புரட்சினா என்ன விளக்கமா சொல்லுங்க யாருக்கும் ஓட்டு போட பிடிக்கல எல்லாறும் எமாதுறாங்கனு ,இவனுகள சரி பன்ன முடியாது ஆனா இதுக்கு என்ன தீர்வுனு நீங்க சொல்லுங்க எப்பிடி நம்ம ஜனனாயகத்த சரி பண்றது ஓட்டு போடாம இருந்தா எல்லாம் சரி ஆயிடுமா இப்ப இருக்குற ஜனனாயக்த்துல உள்ள குறைகள் என்ன இத எப்பிடி மாத்துனா மக்களுக்கு உண்மையான அதிகாரம் கிடைக்கும் இத பத்தி விளக்கமா எழுதுங்க அத விட்டுட்டு ஓட்டு போடாதனா யாரு கேட்பா ,அரசியல் வாதிகட்ட இருந்து கிடைக்குற 1000 ருபா மக்களுக்கு லாபமா தெரியுது அரசியல் வாதிக்கு பணம் செலவு பன்னா பதவி அதிகாரம் பணம் லாபமா கிடைக்குது அரசியல் பிஸினஸ் ஆயிருச்சு அதனாலதான் ஒவ்வொறு கட்சிக்காடரனும் இன்டர்வியு வச்சு செலவு செய்ய வக்கு உள்ளவான பாத்து சீட் தரான் இந்த நடைமுறைய மாத்த வினவு ஏதாவது தீர்வு இருந்தா சொல்லுங்க ,ஒட்டு போடாதனு சொல்லுறதுக்கு பதிலா மக்கள் ட உண்மையான ஜனனாயகம் எதுனு சொல்லி விளக்குங்க கண்டிப்பா நல்லது நடக்கும்

  19. பி.ஜோசப்பின் கருத்து முற்றிலும் சரி. மக்களின் புலம்பல்களை கட்டுரையில் பதிவு செய்யலாம், கட்டுரையையே புலம்பலாக முடிப்பது கூடாது !

    ” விடுதலை புலிகள் தலைவர் பிரபாகரனின் ஆட்சித்திறன் பற்றி அனைவரும் பாராட்ட கேட்டுள்ளேன். அதே சமயம் அவரை எதிர்த்தவர்கள் நிலை என்ன ஆனது? சர்வாதிகாரத்தின் தோல்வி இங்கு தான் ஆரம்பமாகிறது? நான் ஈழ விடுதலைக்கு எதிரானவன் அல்ல. அதே சமயம் விடுதலை புலிகளின் சில தவறான முடிவுகளினால் (சில அரசியல் முடிவுகள், சில போர் முடிவுகள்) ஈழம் தோல்வியடையும் நிலை வந்தது. எல்லோரையும் குறை சொல்வது சுலபம் (அரவிந்த் கேஜ்ரிவால் அதைத்தானே செய்கிறார்). நீங்கள் சொல்லும் நக்சல் பாரி மாற்று முறை மேல் எனக்கு இன்னும் நம்பிக்கை வரவில்லை. முதலில் நீங்கள் உங்கள் பலத்தை தேர்தல் மூலம் காட்டி மக்களிடம் உங்களது கருத்துக்கள் சென்றடையும் வகையில் குறைந்த பட்சம் உள்ளாட்சி தேர்தல் வார்டு கவுன்சிலர் அளவில் தேர்வாகுங்கள். ம.க.இ.க. பெயரில் இப்படி ஒவ்வொரு செங்கல்லாக (கவுன்சிலர்) ஒரு சிறிய கோட்டையை நீங்கள் விரும்பினால் உருவாக்கலாம். மக்களுக்கு நன்மை செய்யும் ஒரு ஆட்சியாளரை மக்கள் ஏன் வீழ்த்தப்போகிறார்கள்??? சிறு துளி, பெருவெள்ளம். நீங்கள் உருவாக்க நினைக்கும் புரட்சியை ஜனநாயகமுரையின் மூலமே உருவாக்கலாமே? ”

    மிக தைரியமாக உண்மையை உடைத்துள்ளார் கற்றது கையளவு !

    எத்தனை குறைகள் இருந்தாலும், அழுகிப்போன அரசியல்வாதிகள் ஆட்சி செய்தாலும், கடைநிலை குடிமகனும் ஆட்சி தேர்வில் பங்குபெறும் ஜனநாயகம் உயர்வானதுதான். அரசியல் சாக்கடை என்று சுலபமாக சொல்லிவீட்டு சுகமாய் தூங்கும் அறிவு ஜீவிகள் தொடங்கி, மாற்றம் தேவை என தொடங்கி, கடந்த கால புரட்சிகனவுகளில் மிதப்பதை தவிர ஆக்கப்பூர்வமான ஜனநாயக முயற்சிகளில் ஈடுபடாத உங்களை போன்றவர்கள் வரை அனைவரும் முயற்சித்தால் நிச்சயம் இந்திய அரசியல் சுத்தமாகும்.

  20. தேனி மாவட்டம் கம்பத்தில்
    இன்று திரைத்துறையைச் சேர்ந்த லியாகத் அலிகானும் இப்ராஹீம் ராவுத்தரும் ADMK வுக்கு ஓட்டு கேட்டு வருகிறார்களாம் . அவங்க சொல்லுற கட்சிக்கு ஓட்டு போடணும் ஏன்னா
    1 . முல்லை பெரியார் பிரச்சனக்கி நம்மோட போராடுனாங்க –
    2 . நெல்லு நாத்தெல்லாம் கருகுனப்ப தண்ணி திரந்துவிடச்சொல்லி குரல் குடுத்தாங்க
    இன்னும் நெறைய சொல்லலாம் . எனவே வாக்காளப் பெருமக்களே இவங்க சொல்லுற கட்சிக்கி தவறாம ஓட்டுப் போடுங்க

விவாதியுங்கள்

உங்கள் மறுமொழியை பதிவு செய்க
உங்கள் பெயரைப் பதிவு செய்க