கடந்த ஐம்பது ஆண்டுகளாக நக்சல்பாரி புரட்சிகர அரசியலுக்காக தன்னுடைய வாழ்வை அர்ப்பணித்துக் கொண்ட முதுபெரும் தோழர் சம்பத் என்கிற குமார் (70 வயது) புற்றுநோயால் பாதிக்கப்பட்டு, மருத்துவ சிகிச்சை பலனளிக்காத நிலையில், நவம்பர் 17 அன்று தான் சிந்திப்பதை நிறுத்திக்கொண்டார்.

மாநில அமைப்புக் கமிட்டி, இ.பொ.க.(மா-லெ)-வின் தலைமைக் குழு உறுப்பினர், “புரட்சிப் புயல்” சித்தாந்த இதழின் ஆசிரியர் மற்றும் “புதிய ஜனநாயகம்” இதழின் முன்னாள் ஆசிரியரான தோழர் சம்பத், தான் கல்லூரி மாணவராக இருந்த போதே நக்சல்பாரி அரசியலை ஏற்று கட்சியில் ஊழியராக செயல்படத் தொடங்கினார். உறவினர்கள், திருமணம் குறித்தெல்லாம் சிந்திக்காமல் கட்சி, தோழர்கள், கட்சி பணிகள் என்று மக்களுக்காகவே தன் வாழ்நாளை அர்ப்பணித்துக் கொண்டார். கம்யூனிச பண்புகளுக்கும் உணர்வுகளுக்கும் முன்மாதிரியாக திகழ்ந்தார்.

தோழரின் இளமை, சிந்தனை, ஆற்றல், வாழ்க்கை என அனைத்தும் மக்களுக்காகவே அர்ப்பணிக்கப்பட்டது போலவே, அவரின் இறப்பிற்கு பிறகும் அவரின் உடலும் இச்சமூகத்திற்கு அதிகபட்ச பயனளிப்பதாக இருக்கும் வகையில், தோழர் சம்பத்தின் உடல் ஓமந்தூரார் அரசு மருத்துவக் கல்லூரிக்கு தானமாக வழங்கப்பட்டுள்ளது.

தோழரின் இறுதி அஞ்சலி நிகழ்ச்சி நவம்பர் 18 அன்று அவர் வாழ்ந்த குரோம்பேட்டை லட்சுமிபுரத்தில் உள்ள இல்லத்தில், செஞ்சட்டை தோழர்கள் புடை சூழ நடைபெற்றது. முழக்கங்கள் விண்ணதிர, செங்கொடி ஏந்திய தோழர்களின் அணிவகுப்புடன் இறுதி ஊர்வலம் நடைபெற்றது. அதன் பிறகு தோழரின் உடல் ஆம்புலன்ஸ் வாகனம் மூலம் ஓமந்தூரார் அரசு மருத்துவனைக்கு கொண்டு செல்லப்பட்டது.

நவம்பர் 19-ஆம் தேதி அன்று காலை தோழர் சம்பத்தின் உடலை தானம் செய்வதற்கான அனைத்து நடைமுறைகளும் நிறைவுற்று ஓமந்தூரார் மருத்துவக் கல்லூரியிடம் ஒப்படைக்கப்பட்டது. இந்நிகழ்வில் மருத்துவக் கல்லூரியின் உடற்கூறியல் துறையின் தலைமை மருத்துவரும், நூற்றுக்கும் மேற்பட்ட மருத்துவ மாணவர்களும் ஒன்றிணைந்து தோழரின் உடலைப் பெற்றுக் கொண்டனர். தோழர் சம்பத்தின் உடலுக்கும், தோழரின் உடலை ஒப்படைக்க சென்ற மக்கள் அதிகாரக் கழகத் தோழர்களுக்கும் உரிய மரியாதை செலுத்தினர்.

“மருத்துவக் கல்லூரி மாணவர்களின் படிப்பிற்காக, ஆராய்ச்சிக்காக உடல் ஒப்படைக்கப்பட்டுள்ளதை நாங்கள் மதிக்கிறோம். எள்ளளவும் உடலை அவமதிக்க மாட்டோம்” என்று மருத்துவக் கல்லூரியைச் சார்ந்தவர்களும் தோழர்களும் கையை உயர்த்தி உறுதிமொழி ஏற்றனர். தோழரின் உடல் தானம் செய்யப்பட்டதற்கான சான்றிதழ் தோழர்களிடம் வழங்கப்பட்டது.

மக்கள் அதிகாரக் கழகத்தின் மாநிலப் பொதுச்செயலாளர் தோழர் வெற்றிவேல் செழியன், தோழர் சம்பத் ஐம்பதாண்டுகளாக மக்களுக்கு தன்னுடைய வாழ்வை அர்ப்பணித்துக் கொண்டது பற்றியும், அவர் இறந்தப் பிறகும் அவருடைய உடல் மக்களுக்கு பயன்பட வேண்டும் என்பதற்காக தானம் செய்யப்பட்டுள்ளது குறித்தும் மருத்துவக் கல்லூரி மாணவர்கள் மத்தியில் உரையாற்றினார்.

புதிய ஜனநாயகம் பத்திரிகையின் வெளியீட்டாளரான தோழர் இரா. சண்முகராசு, தோழர் சம்பத் தனது வாழ்க்கையை மகிழ்ச்சியுடனேயே இச்சமூகத்திற்கு அர்ப்பணித்துக் கொண்டதை போலவே, அவரது உடலும் சமூகத்திற்கு பயனளிக்கும் வகையில் மருத்துவ ஆராய்ச்சிக்காக மகிழ்ச்சியுடன் வழங்கப்படுகிறது என்பதை உணர்த்தும் வகையில், “இன்பத்திற்காக வாழ்ந்தோம்; இன்பத்திற்காகப் போர்க்களம் புகுந்தோம்; இன்பத்திற்காகவே இப்பொழுது இறந்து கொண்டிருக்கிறோம். ஆகவே, துன்பம் எங்கள் பெயரோடு என்றும் இணைக்கப்பட வேண்டாம்” என்ற தோழர் ஜூலியஸ் பூசிக்கின் புகழ்பெற்ற வாசகத்தை வாசித்துக் காட்டினார்.

இறுதியாக, செவ்வணக்கம் செலுத்தப்பட்டு தோழர் சம்பத்தின் உடல் மருத்துவக் கல்லூரியிடம் ஒப்படைக்கப்பட்டது.

நக்சல்பாரி புரட்சியாளர் தோழர் சம்பத்தின் உடல் மருத்துவ ஆராய்ச்சிக்காக வழங்கப்பட்டது மிகவும் முக்கியத்துவம் வாய்ந்ததும் முன்மாதிரியான நடவடிக்கையும் ஆகும். இது சமூக மாற்றத்தை விரும்பக்கூடிய, அதற்காக போராடிவருகின்ற சக தோழர்களிடம், தாங்களும் தங்கள் உடலை தானம் செய்ய வேண்டும் என்ற உணர்வை ஏற்படுத்தியுள்ளது.

தன் வாழ்நாள் முழுவதும் கம்யூனிசப் பண்புகளுக்கும் உணர்வுக்கும் முன்மாதிரியாக திகழ்ந்த தோழர் சம்பத் தன் மறைவுக்குப் பிறகும் சமூகத்திற்கு எவ்வாறு பயனளிப்பது என்பதற்கு முன்மாதிரியாக திகழ்கிறார்.

வினவு களச்செய்தியாளர்

சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube, Telegram, Instagram

மாநில அமைப்புக் கமிட்டி, இ.பொ.க.(மா-லெ)-வின் தலைமைக் குழு உறுப்பினர், “புரட்சிப் புயல்” சித்தாந்த இதழின் ஆசிரியர் மற்றும் “புதிய ஜனநாயகம்” இதழின் முன்னாள் ஆசிரியருமான நக்சல்பாரி புரட்சியாளர் தோழர் சம்பத் என்கிற குமார் (வயது 70), புற்றுநோயால் பாதிக்கப்பட்டு, மருத்துவ சிகிச்சை பலனளிக்காத நிலையில், 17.11.2025 அன்று மதியம் 2.15 மணிக்கு சென்னையில் உயிரிழந்தார்.

அவரது இறுதி அஞ்சலி நிகழ்ச்சி 18-ஆம் தேதி காலையில் 10 மணியளவில் அவர் வாழ்ந்த குரோம்பேட்டை லட்சுமிபுரத்தில் உள்ள இல்லத்தில் நடைபெற்றது. நிகழ்ச்சியில் கலந்துகொண்டு உரையாற்றிய தோழர்களின் உரைகளில் உள்ள சில முக்கியமான கருத்துகளை மட்டும் இக்கட்டுரையில் சுருக்கமாக பதிவிடுகிறோம்.

மக்கள் அதிகாரக் கழகத்தின் மாநிலப் பொருளாளர் தோழர் அமிர்தா தனது தலைமை உரையில், “தோழர் சம்பத் தன் வாழ்நாளில் தான் ஏற்றுக்கொண்ட கொள்கைக்கு எந்த சமரசமும் இல்லாமல், அர்ப்பணிப்புடன் வாழ்ந்தவர். எந்தவொரு மார்க்சிய குழுக்களும் சொல்லக்கூடிய கருத்துகளை சரியான மா-லெ பார்வையில் உடனடியாக விமர்சிக்கக்கூடிய அரசியல் ஆளுமை கொண்டவர். சொந்த வாழ்க்கையில் எந்தப் பகட்டையும் விரும்பாமல் மிக எளிமையாக வாழ்ந்த தோழர்” என்று தோழரின் கம்யூனிச பண்புகள், அரசியல் ஆளுமை குறித்து பேசினார்.

திரைப்பட இயக்குநர் தோழர் லெனின் பாரதி, “ஐம்பதாண்டு காலம் மா-லெ அரசியலில் உறுதியாக அர்ப்பணிப்புடன் இருந்த தோழர். அவருடைய மறைவு என்பது வருத்தமானது. ஆனால் அவருடைய அர்ப்பணிப்பு உணர்வையும் மா-லெ அரசியலின் சிந்தனை தொடர்ச்சியையும் நாம் கைக்கொண்டு தொடர்ச்சியாக ஒடுக்கப்பட்ட உழைக்கும் மக்களுக்கு பணி செய்வோம்” என்று உறுதியேற்று தன்னுடைய உரையை சுருக்கமாக முடித்துக் கொண்டார்.

மக்கள் அதிகாரக் கழகத்தின் மாநில இணைச் செயலாளர் தோழர் குருசாமி தன்னுடைய உரையில், “புரட்சிகர அமைப்புகளில் பல பேர் பயணிக்கிறார்கள்; பலர் பாதியிலேயே சென்று விடுகிறார்கள். இந்த தோழர் இறுதிவரை எந்தவித சலனமுமில்லாமல் நீடித்து நிற்பதற்கு அவரிடம் கம்யூனிசப் பண்புகள் நிறைந்திருந்தன. அமைப்பு பிளவுப்பட்ட போதுகூட, தோழர் எந்த சஞ்சலமும் இல்லாமல், தன்னுடன் பழகியவர்கள் என்று முக்கியத்துவம் கொடுக்காமல் கொள்கைக்காக நின்று அமைப்பை பாதுகாத்தவர்.

நான் கற்ற மா-லெ கருத்துகளில் அதிகமாக அவரிடம் இருந்து கற்றுக்கொண்டது. ஏனென்றால் கற்றுக்கொடுக்கும் சிறந்த ஆசிரியருக்குரிய பண்பைப் பெற்றவர்.

மார்க்சிய கருத்துகளை இழிவுப்படுத்துவது, இனிமேல் மார்க்சியமே செல்லாது என்று பேசுவது; மார்க்சியம் காலாவதியாகிவிட்டது என்று பேசுபவர்களை எள்ளிநகையாடி மார்க்சியத்தை நிலைநாட்டிய சிறந்த தோழர்” என்று தோழர் சம்பத்துடனான தன்னுடைய புரட்சிகர பயணத்தை பகிர்ந்துகொண்டார்.

பு.ஜ.தொ.மு., மாநில ஒருங்கிணைப்புக்குழு தோழர் சுந்தர், தன்னுடைய உரையில், தோழர் சம்பத் ஒரு கம்யூனிஸ்ட் எப்படியெல்லாம் இருக்க வேண்டும் என்று தன்னுடைய வாழ்நாளில் வாழ்ந்து காட்டியது குறித்தும் சர்வதேச அரசியல் நிலைமைகளை மிக எளிதாக விளக்குவது குறித்தும் பேசினார்.

தமிழ்த்தேச மக்கள் முன்னணியைச் சார்ந்த தோழர் செந்தில் தன்னுடைய உரையில், “மக்கள் திரள் வழியை முன்வைத்து மா-லெ அமைப்புகளை சி.பி.எம் கட்சியுடன் போட்டிபோடக் கூடிய வகையில் நிறுவனமயப்பட்ட மாபெரும் இயக்கமாக வளர்த்தெடுத்ததில் தோழர் சம்பத்திற்கு மிகப்பெரிய பங்கிருக்கும். தோழர் மறையும் காலத்தில் நாடு மிகப்பெரிய இருள் சூழந்த நிலையில் இருக்கிறது. இந்த கெடுவாய்ப்பான தருணத்தில்தான் நாம் மிகவும் ஈகம் நிறைந்த, அனுபவம் மிகுந்த தோழர்களை இழந்து கொண்டிருக்கிறோம்” என்று பதிவு செய்தார்.

புரட்சிகர மாணவர்-இளைஞர் முன்னணியைச் சார்ந்த தோழர் தீரன் தன்னுடைய உரையில், “இந்த மரணத்தை தோழர் எதிர்கொண்டதை நாங்கள் கண்கூட பார்த்தோம். “இடையறாத போராட்டம்தான் தோழர் எல்லாம், ஒரு கட்டத்தை தாண்டி வந்துவிட்டோம். தொடர்ந்து போராடுங்கள், புரட்சிக்காக.. நான் இல்லையென்றாலும் பரவாயில்லை நீங்க போராடுங்க” என்ற வார்த்தைகள் அவர் கடைசியாக கூறியவை. எங்களுக்கெல்லாம் இந்திய கம்யூனிஸ்ட் கட்சி வரலாறு எடுத்த தோழர், மிகச் சிறந்த ஆசிரியர். அவர் கூறியபடி எல்லா சந்தர்ப்பவாத போக்குகளுக்கு எதிராகவும் பு.மா.இ.மு. செயல்படும்” என்று உறுதியேற்றார்.

மக்கள் கலை இலக்கியக் கழகத்தின் மாநில ஒருங்கிணைப்பாளர் தோழர் இராமலிங்கம் தன்னுடைய உரையில், தோழர் சம்பத்தின் மார்க்சியத்தை எளிதாக விளக்குவது, அரசியல் கூர்மை, இளம்தோழர்களை வளர்க்க வேண்டும் என்ற நோக்கம் குறித்தும் பேசினார்.

பு.ஐ.தொ.மு. மாநில ஒருங்கிணைப்பாளர் தோழர் ஆ.கா.சிவா தன்னுடைய உரையில், “மார்க்சிய-லெனினியவாதியாக இருப்பதற்கான அடிப்படைகளை நான் அவரிடம் இருந்து கற்றுகொண்டேன். சித்தாந்த நூல்களை  இயந்திரகதியாக புரிந்துகொள்ளாமல் அறிவியல்பூர்வமாக எப்படி புரிந்துகொள்ள வேண்டும் என்பதை விளக்கியவர்” என்று தோழருடனான புரட்சிகர பயணத்தை பகிர்ந்து கொண்டார்.

மக்கள் அதிகாரக் கழகத்தின் மேற்கு மாவட்ட செயலாளர் தோழர் சிவகாமு தன்னுடைய உரையில், தோழர் சம்பத் உடனான தன்னுடைய அமைப்பு அனுபவங்களையும், தன்னுடைய மனதில் நிற்கும் வகையில் தோழர் சம்பத் விளக்கும் திறன் குறித்தும் பகிர்ந்து கொண்டார்.

தோழர் சம்பத்தின் இறுதி நாட்களில் அவருடன் உடனிருந்த, கழக வழக்கறிஞர் அணி தோழர் ஓவியா, தோழரின் கம்யூனிசப் பண்புகள், மக்களுடன் எளிதாகப் பழகும் பண்புகள், உழைக்கும் மக்கள் மீதான பற்று குறித்து தன்னுடைய கருத்துகளை பகிர்ந்து கொண்டார்.

முற்போக்கு இளைஞர் முன்னணியின் தோழர் ஞானம், “தமிழகத்தில் மா-லெ கட்சியின் பாதை தனிநபர் அழித்தொழிப்பை நோக்கி சென்ற நேரத்தில், மேற்கு பிராந்தியக் குழுதான் தனிநபர் அழித்தொழிப்பு வறட்டுத்தனமான நடவடிக்கை, இதற்கும் கம்யூனிஸ்ட் கட்சிக்கும் சம்மந்தம் கிடையாது. கம்யூனிஸ்ட் கட்சி என்றால் திட்டம், செயல்தந்திரம், அமைப்பு கோட்பாடுகளை எல்லாம் உருவாக்க வேண்டும் என்ற அடிப்படையில் அதனை தீர்ப்பதற்கான நடவடிக்கைகளில் 1970-72 காலகட்டங்களிலேயே மேற்கு பிராந்தியக் குழு ஈடுபட்டது.

1978 காலத்தில் மேற்கு பிராந்தியக் குழு மாநில அமைப்புக் கமிட்டி என்று உருவான காலக்கட்டத்தில் தான் தோழர் சம்பத் இந்த அமைப்பில் இணைகிறார். மக்களை அதிகாரத்திற்காக அணிதிரட்டி அவர்களை புரட்சிகரப் போராட்டங்களில் பங்கெடுக்க வைத்து அதன் தொடர்ச்சியாக ஆயுதப் போராட்டங்களை கட்டியமைக்க வேண்டும் என்ற அடிப்படையில் உருவான மாநில அமைப்புக் கமிட்டியில் தோழர் சம்பத் மிகப்பெரும் பங்காற்றினார் என்பதை அறிய முடிகிறது” என்று தன்னுடைய உரையில் மா.அ.க.வில் தோழர் சம்பத்தின் பங்களிப்பு குறித்து பதிவு செய்தார். மேலும், சித்தாந்த போராட்டம் நடத்தி ஒன்றுபட்ட மா-லெ கட்சியை கட்டுவதற்கான அழைப்பு கொடுத்தார்.

மக்கள் அதிகாரக் கழகத்தின் மாநிலப் பொதுச்செயலாளர் தோழர் வெற்றிவேல் செழியன், “அமைப்பு பிளவுகளின் கலைப்புவாதிகளும் அராஜவாதிகளும் அமைப்பை ஒழித்துக் கட்டுவதற்கான முயற்சிகளில் ஈடுபட்ட போது, எல்லாவிதமான தனிநபர் கண்ணோட்டத்தையும் ஒழித்துக்கட்டி சரியான அரசியலில் உறுதியாக நின்றவர். ஆசானாக நின்று புதிய வடிவத்தை முன்னிறுத்தி துரோகிகளை எல்லாம் திரைகிழித்து ஒரு வழிகாட்டியாக நின்றவர்தான் தோழர் சம்பத் தத்துவார்த்த ரீதியில் சரியான திசைவழியில் கொண்டுசென்றவர்” என்று தோழர் சம்பத்தின் கலைப்புவாதிகள், அராஜகவாதிகளுக்கு எதிரான போராட்டம் குறித்து பேசினார்.

தோழர்களின் உரைகளுக்கு இடையே மக்கள் கலை இலக்கிய கழகத்தின் சிவப்பு அலை கலைக்குழு சார்பாக, “கஷ்டஜூவிகள் நாங்கள் கம்யூனிஸ்டுகள்”, “தோழரே வா” என்ற இரு பாடல்கள் பாடப்பட்டன.

இறுதியாக, “நக்சல்பாரி புரட்சியாளர் மூத்த தோழர் சம்பத்துக்கு செவ்வணக்கம்!, மார்க்சிய-லெனினிய-மாவோ சிந்தனை வெல்லட்டும்!, பாட்டாளி வர்க்க விடுதலைக்காக தியாகிகளே, உங்கள் தியாகத்தை மறக்க மாட்டோம், கம்யூனிச செஞ்சுடரை அணையவிடோம், உழைப்பாளர் உள்ளத்தில் உதித்தெழுந்த செங்கொடியை தாழவிடோம், அராஜகவாதத்தையும் கலைப்புவாதத்தையும் திரைகிழிப்போம், மார்க்சிய-லெனினிய-மாவோ சிந்தனையை உயர்த்திப் பிடிப்போம்” ஆகிய முழக்கங்களுடன் நிகழ்ச்சி நிறைவுற்றது. இதனைத் தொடர்ந்து தோழரின் இறுதி ஊர்வலம் நடைபெற்றது.

வினவு களச்செய்தியாளர்

சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube, Telegram, Instagram