Sunday, March 7, 2021
முகப்பு சமூகம் சாதி – மதம் ஜல்லிக்கட்டு : தமிழர் பாரம்பரியமா ? ஆதிக்கசாதி அடையாளமா ?

ஜல்லிக்கட்டு : தமிழர் பாரம்பரியமா ? ஆதிக்கசாதி அடையாளமா ?

-

(2008-ம் ஆண்டு ஜனவரி மாதம் உச்சநீதி மன்றம் ஜல்லிக் கட்டு நடத்துவதை தடை செய்து உத்தரவிட்டதைத் தொடர்ந்து மதுரை மாவட்டத்தில் அலங்காநல்லூர் உள்ளிட்ட கிராமங்களில் எதிர்ப்புகள் தெரிவிக்கப்பட்டதை ஒட்டி புதிய ஜனநாயகம் இதழில் வெளியான கட்டுரை)

ல்லிக்கட்டிற்கு அண்மையில் உச்சநீதி மன்றம் தடை விதித்ததும் தமிழர்கள் பொங்கியெழுந்து வீதிக்கு வந்து போராட்டம் நடத்தியதாகவும் பொது மக்கள் ஆத்திரமடைந்து கருப்புப் பொங்கலாக அறிவித்துப் பொங்கல் விழாக்களைப் புறக்கணித்து விட்டதாகவும் செய்தி ஊடகங்கள் பரபரப்பூட்டின. முரட்டுத்தனமான இந்த விளையாட்டில், மனிதர்கள் மாண்டு போகும் கவலையைவிட, காளை மாடுகள் மீது கரிசனம் கொண்டு, ஜல்லிக்கட்டுக்குத் தடைகோரி சென்ற ஆண்டு ஜூலையில் விலங்கு நல வாரியம் உச்சநீதி மன்றத்தில் முறையிட்டது. இந்த வழக்கில் நீலச்சிலுவை சங்கமும் (புளூ கிராஸ்) தன்னை இணைத்துக் கொண்டது.

ஜல்லிக்கட்டுக்கு தடைவழக்கை விசாரித்து வந்த உச்சநீதி மன்றம், பொங்கலுக்கு ஒரு வாரம் முன்பாக ஜல்லிக்கட்டுக்குத் தடை விதித்துத் தீர்ப்பு வழங்கியது. அந்தத் தீர்ப்பில், “ஜல்லிக்கட்டு போட்டியை அனுமதிக்க வேண்டும் என்று எந்தச் சட்டமும் கூறவில்லை” என்றும், “அதேநேரத்தில் ரேக்ளா எனப்படும் மாட்டு வண்டிப் பந்தயத்தை நடத்த எந்தத் தடையுமில்லை” என்றும் கூறியிருந்தது. உச்சநீதிமன்ற நீதிபதிகளிடம் “ரேக்ளா பந்தயத்தை மட்டும் எந்தச் சட்டம் அனுமதிக்கிறது?” என்று யாரும் கேட்கவில்லை.

ஜல்லிக்கட்டுக்குத் தடை வந்ததும் ஓட்டுக்கட்சிகள் அனைத்திற்கும் ‘தமிழன் வீரம்’ பற்றிய நினைப்பு வந்து, அறிக்கைகளால் பத்திரிகைகளை நிரப்பி விட்டன.

சி.பி.எம். கட்சியோ “முழுமையான காவல் பாதுகாப்பு ஏற்பாடுகளைச் செய்து ஜல்லிகட்டு நடத்த அனுமதிக்க வேண்டும்” எனக் கூறி, நிலப்பிரபுத்துவக் கலாச்சாரமான ஏறு தழுவுதலுக்கு ஆதரவாக வரிந்து கட்டியது. ஏகாதிபத்தியத்தைக் கட்டிக் காக்க நந்திகிராமம்! நிலப்பிரபுத்துவத்தைக் கட்டிக் காக்க அலங்காநல்லூர்! ஆனால், பெயர் மட்டுமோ ‘கம்யூனிஸ்ட்’ கட்சி!

பா.ம.க.வின் இராமதாசு, “தமிழர்களுக்கும் தமிழ்நாட்டிற்கும் அழியாத சில அடையாளங்கள் இருக்கின்றன. அந்த அடையாளங்களை அழித்து விட அனுமதிக்கக் கூடாது” என்று சீறினார். தமிழனின் நீரும் நிலமும், உழவும் நெசவும் பன்னாட்டு ஏகபோக நிறுவனங்களால் நாசமாக்கப்பட்டு, அவற்றின் அடையாளங்கள் அழிக்கப்பட்டு வரும் நிலையில், ஜல்லிக்கட்டுதான் தமிழனின் அழியாத அடையாளமாக இந்த மருத்துவருக்குத் தெரிகிறது.

ஓட்டுக்கட்சிகளும் ஊடகங்களும் உசுப்பேற்றியதும், ஜல்லிக்கட்டு போட்டியை ஆண்டுதோறும் நடத்திவரும் மதுரை அலங்காநல்லூர், பாலமேடு வட்டார மக்கள், உச்சநீதி மன்றத் தடையைத் துச்சமாக மதித்து இவ்வாண்டும் ஜல்லிக்கட்டை நடத்தப் போவதாக அறிவித்தனர். “காவிரி ஆற்று நீர் சிக்கலில் கர்நாடகமும், முல்லைப் பெரியாறு தாவாவில் கேரளமும் உச்சநீதி மன்றத் தீர்ப்பை மதிக்காத போது, நாங்கள் மட்டும் ஏன் தீர்ப்பை மதிக்க வேண்டும்?” என்று நியாயவாதம் பேசினர்.

“அலங்காநல்லூர் வட்டாரத்தில் கருப்புக் கொடி ஏற்றினர். ரேசன் அட்டை, வாக்காளர் அடையாள அட்டைகளை அரசிடம் திருப்பிக் கொடுக்கப் போவதாக சுவரொட்டி ஒட்டியுள்ளனர். கருப்புப் பட்டை அணிந்து தொடர் உண்ணாவிரதம் இருந்தனர். மூன்று நாட்களாகக் கடைகள் அடைக்கப்பட்டன” என்றெல்லாம் ‘குமுறி எழுந்த தமிழர்களின் கோபாவேசத்தை’ ஊடகங்கள் வர்ணித்தன.

ஜல்லிக்கட்டுக்கு தடைஓட்டுக் கட்சிகளும் ஊடகங்களும் ஊதிப் பெருக்குவது போல, ஜல்லிக்கட்டு என்பது ஒட்டுமொத்த தமிழர்களின் அடையாளமல்ல. தென்மாவட்ட ஆதிக்க சாதியினரின் சாதித் திமிரைப் பறைசாற்றும் ஓர் ஆதிக்கப் பண்பாட்டுச் சின்னம்தான். இது ஒட்டுமொத்தத் தமிழர்களின் அடையாளம் என்றால், ஏறு தழுவுதலில் தேவர் சாதிக்காரன் வளர்த்த காளையை அடக்கும் உரிமை தாழ்த்தப்பட்டோருக்கு ஏன் இல்லை? வாடிவாசல் முன் திரண்டு நிற்கும் இளைஞர்கள், சாதி அடையாளத்தைக் குறிக்கும் மஞ்சள் நிறச் சீருடையை அணிவது ஏன்? தாழ்த்தப்பட்டோர் தாங்களாகவே தனியாக ஜல்லிக்கட்டு நடத்தினால் இவர்கள் ஏற்றுக் கொள்வார்களா? ஜல்லிக்கட்டுக்குத் தடை விதிக்காமல் தொடர்ந்து நடத்தக்கோரி நீதிமன்றம் சென்றவர்களில் பலரும் தேவர் சாதித் தலைவர்களாகவே உள்ளனரே, அது ஏன்?

“யார் தடுத்தாலும் நாங்கள் ஜல்லிக்கட்டை நடத்தியே தீருவோம்; ஜல்லிக்கட்டு என்பது வீரத்தின் அடையாளம்” என்று மீசையை முறுக்குபவரோ ஜல்லிக்கட்டு பாதுகாப்புக் கழகம் எனும் லெட்டர்பேடு தேவர்சாதி அமைப்பின் தலைவரான செந்தில் தொண்டைமான். இன்னொருவர், அமைச்சர் சுப. தங்கவேலனின் பேரனும், தேவர் சாதிய அடையாளத்துடன் தனக்குத்தானே கட்அவுட் வைத்துக் கொள்ளும் கருப்புப் பண சினிமா நடிகனும், ‘தமிழர் வீரவிளையாட்டுப் பாதுகாப்புக் குழு’வின் தலைவருமான ஜே.கே. ரித்தீஸ். ஜல்லிக்கட்டை நடத்தாவிட்டால், ‘தெய்வக் குற்றம்’ ஏற்பட்டுவிடும் என்று கூறி, தடையை மீறி சிவகங்கை மாவட்டம் எம்.சூரக்குடியில் ஜல்லிக்கட்டு போட்டியை நடத்தியதற்காகக் கைது செய்யப்பட்ட நாட்டாமைகளும் தேவர் சாதிக்காரர்களே.

ஜல்லிக்கட்டு என்பதை தேவர் ஜெயந்திக்கு இணையான சாதிய ஆணவச் சின்னமாகத்தான் தேவர் சாதியினர் பார்க்கின்றனர். ஜல்லிக்கட்டினைப் பாரம்பரியமாக நடத்திவரும் இந்த ஆதிக்க சாதியினர், வன்கொடுமைத் தடுப்புச் சட்டம் எங்களைப் பாதிக்கின்றது என்று கூடப் பேரணி நடத்தியிருக்கின்றனர். காளைகளிடம் மட்டும்தானா இவர்கள் விளையாடியிருக்கின்றனர்? மேலவளவு முருகேசனின் தலையைச் சீவி, சாதிவெறியோடு மீசையை முறுக்கி கோரத் தண்டவமும் ஆடியிருக்கின்றனர். இருப்பினும், தேவர் சாதியினரின் குல தெய்வமான முத்துராமலிங்கத் தேவருக்கு நூற்றாண்டு விழா கொண்டாடச் சொன்ன ‘சேரிப்புயல்’ தொல். திருமா இதுவும் போதாதென்று, “ஜல்லிக்கட்டுக்கு விதிக்கப்பட்ட தடையானது, இந்த விளையாட்டைப் பாரம்பரியமாக நடத்திவரும் மக்களை இழிவுபடுத்துவதாக உள்ளது” என்று வேதனைப்படுகிறார்.

ஓட்டுக்காக இக்கட்சிகள் இருவிழி சிவந்து கனற்பொறி தெறிக்க பத்திரிக்கைகளில் அறிக்கைகளை வெளியிடுவது ஒருபுறமிருக்க, 400 ஆண்டுகளாக இவ்வீர விளையாட்டு பாரம்பரியமாக நடந்து வருவதாக தமிழக அரசே உச்சநீதி மன்றத்தில் தெரிவித்திருக்கிறது.

ஏறு தழுவுதல் மட்டும்தான் பாரம்பரியமாக வந்ததா? சாதிதீண்டாமை, வலங்கை இடங்கை வெறியாட்டங்கள் கூடப் பாரம்பரியமாக வந்தவைதான். அதற்காக அவற்றையெல்லாம் ஆதரிக்க முடியுமா? பாரம்பரியமாக நீடித்துவந்த பொட்டுக் கட்டுதலைச் சட்டம் போட்டுத் தடுக்க முற்பட்டபோது, பார்ப்பனஆதிக்க சாதியினர் பதறியதைப் போலத்தான் இருக்கிறது, சாதிவெறியை மறைத்துக் கொண்டு ‘தமிழன் வீரம்’, ‘பாரம்பரியம்’ எனப் பூசி மெழுகிடும் வாதமெல்லாம்.

பா.ஜ.க.வின் இல.கணேசன், அகண்ட பாரதத்திலிருந்து இறங்கி வந்து ‘தமிழரின் பாரம்பரியம்’ பற்றி அங்கலாய்க்கிறார். ஜல்லிக்கட்டுக்குத் தடை விதிக்கப்பட்டதை எதிர்த்து சிவசேனா குண்டர்களோ மதுரையில் ரயில் மறியல் செய்கின்றனர். அதேசமயம், தடை கோரி வழக்கு போட்ட விலங்குநல வாரியத்தை, பா.ஜ.க.வோ, சிவசேனாவோ எதிர்க்கவில்லை. ஏனெனில், இதே விலங்கு நல வாரியம்தான் ‘கோசாலை’களை (பசு பாதுகாப்பு மையம்) நவீனப்படுத்த நிதியுதவி செய்கிறது. பசுவதை கூடாது என்று சீறும் இந்த இந்துவெறிக் கட்சியினர்தான், காளைகளின் கண்களில் எலுமிச்சை சாறையும் மிளகாய்ப் பொடியையும் தூவி நடத்தப்படும் காளை வதை ‘பாரம்பரிய’ ஜல்லிக்கட்டுக்காக வரிந்து கட்டுகின்றன.

இவை ஒருபுறமிருக்க, உச்சநீதி மன்றத்துக்கு காளைகள் மீது திடீர்க் கரிசனை ஏன்? “இது காட்டுமிராண்டித்தனமான விளையாட்டு; இதனால் பலருக்குப் படுகாயங்களும் ஒரு சிலர் பலியாவதும் நடக்கிறது” என்று அது நியாயவாதம் பேசுகிறது. ஜல்லிக்கட்டு காட்டுமிராண்டித்தனமானது என்றால், அதைவிடக் காட்டுமிராண்டித்தனமான சாதியும் தீண்டாமையும் தலைவிரித்தாடுவதைத் தடுக்க நீதிமன்றம் நடவடிக்கை எடுக்காதது ஏன்? பாசிச ஜெயா ஆடுகோழி வெட்டத் தடை விதித்து கிராமக் கோயில்களைப் பார்ப்பனமயமாக்க முயற்சித்தார் என்றால், நீதிமன்றமோ ஜல்லிக்கட்டு போட்டியை உலகமயமாக்கலுக்கு ஏற்ப மறுவார்ப்பு செய்ய முயற்சிக்கிறது. அதனால்தான் முதலில் தடை விதித்துவிட்டு பின்னர் எட்டுக் கட்டுப்பாடுகளை விதித்து, ஜல்லிக்கட்டை நடத்த அனுமதித்துள்ளது.

“ஜல்லிக்கட்டை மனிதத்தன்மை கொண்டதாகவும், நாகரீகமான முறையில் நடத்தப்படும் நிகழ்ச்சியாகவும் மாற்றப்பட வேண்டும்” என்று உத்தரவில் குறிப்பிடப்பட்டுள்ள வாசகம், நீதிமன்றத்திற்கு வேறு உள்நோக்கம் இருப்பதை உணர்த்துகிறது. இதற்கேற்ப மதுரை மாவட்ட ஆட்சியரும், “ஜல்லிக் கட்டை முறைப்படுத்தி நடத்திட அரசு விரைவில் அவசரச் சட்டம் பிறப்பிக்கவுள்ளதாக” அறிவித்துள்ளார்.

இந்த அவசரச் சட்டம் எவ்வாறு இருக்கும்? உலகமயமாக்கலுக்கு ஏற்ப ஜல்லிக்கட்டு போட்டியை மாற்றியமைக்கும் வகையிலே இருக்கும். “இந்த நிகழ்ச்சியை உங்களுக்கு வழங்குபவர்கள் கோக்” என தொலைக்காட்சிகளில் வரும் விளம்பரம் போல, இனி அலங்காநல்லூர் ஜல்லிக் கட்டை வழங்குவது பெப்சி, டாடா என்று மாற்றப்படலாம். “சென்னை சங்கமம்” போல, ‘நாட்டுப்புறக் கலை மற்றும் விளையாட்டுக்களை’ப் பாதுகாத்து வளர்த்திட ஃபோர்டு பவுண்டேசன், பில்கேட்ஸ் பவுண்டேசன் என அனைத்து ஏகாதிபத்திய நிறுவனங்களும் தரகு முதலாளிகளும் தயாராகவே உள்ளனர். இதனால்தான் நீதிமன்றம் ஜல்லிக்கட்டை ஒழுங்குபடுத்தி ‘மனிதத்தன்மை நாகரிகம்’ கொண்டதாக மாற்றச் சொல்கிறது.

இதன்படி, இனி வாடிவாசல் “பெப்சி” வாசலாகலாம். “நைக்” பனியன் அணிந்த ஜல்லிக்கட்டு வீரர்கள், “கோக்”கைப் புரவலராகக் கொண்ட மாட்டையும், ரிலையன்ஸ் பிரஷ் வளர்த்த மாட்டையும் அடக்கும் வீர விளையாட்டை தொலைக்காட்சிகள் ஒளிபரப்பலாம்.

இவை மிகைப்படுத்தல்கள் அல்ல. ஏற்கெனவே “சென்னை சங்கமம்” நிகழ்ச்சிகள் நடந்த விதத்தைப் பார்த்தாலே இதனைப் புரிந்து கொள்ள முடியும். சென்னை சங்கமம் நிகழ்ச்சிகளை பன்னாட்டு தரகு முதலாளித்துவ நிறுவனங்கள் தத்தெடுத்துக் கொள்ள, இந்நாட்டுப்புறக் கலை நிகழ்ச்சிகளில் தமிழர்களின் பாரம்பரிய உணவுகள் விற்கப்பட்டதைப் போல, கடைசியில் தமிழர்களின் ‘பாரம்பரிய’ ஜல்லிக்கட்டும் உலகமயமாக்கலுக்கு ஏற்ப மறுவார்ப்பு செய்யப்பட்டு வருகிறது.

· இரணியன்

தமிழர்களின் பாரம்பரிய வீரவிளையாட்டு : ஜல்லிக்கட்டா? மஞ்சு விரட்டா?

மிழகத்தில் கி.மு 1500 காலத்தில் (அதாவது, இன்றைக்கு 3500 ஆண்டுகளுக்கு முன்பு) “மஞ்சு விரட்டு” அல்லது “எருது கட்டுதல்” என்ற வீர விளையாட்டே பாரம்பரியமாக நிலவியது. பொங்கல் விழாக்களின் போது காளைகள் நெடுஞ்சாலைகளில் அவிழ்த்து விடப்பட்டு, கிராமத்து இளைஞர்கள் அவற்றை விரட்டிக் கொண்டு ஓடுவர். சாலையின் இருமருங்கிலும் மக்கள் திரண்டு ஆரவாரிப்பர். அப்பந்தயத்தில் முதலில் வந்து வெற்றிபெறும் வீரருக்குப் பரிசளிக்கப்படும். இதில் மாடுகளுக்கோ மனிதர்களுக்கோ காயமேற்படாது.

மஞ்சு விரட்டு சான்று
நீலகிரி மாவட்டம் கோத்தகிரி அருகில் உள்ள கருக்கியூர் குன்றில் ஏறத்தாழ 3,500 ஆண்டுகளுக்கு முந்தைய ஓவியத்தில் காணப்படும் மஞ்சு விரட்டு காட்சி : மஞ்சு விரட்டு அல்லது எருது கட்டுதலே தமிழர்களின் பாரம்பரிய விளையாட்டு என்பதற்கான சான்று.

நீண்ட நெடுங்காலமாக தமிழர்களின் பாரம்பரியமாக நிலவி வந்த “மஞ்சு விரட்டு”, ஏறத்தாழ 500 ஆண்டுகளுக்கு முன்பு நாயக்க மன்னர்களின் ஆட்சிக் காலத்தில் மாட்டை அடக்கும் ஜல்லிக்கட்டாக மாறியது. நாயக்கர் ஆட்சியில் படிப்படியாக ஜமீன்தாரி முறை உருவாகி வந்தது. ஜமீன்தார்கள் தமது ஆதிக்கத்தையும் செல்வாக்கையும் பறைசாற்றும் அடையாளமாக உருவாக்கியதுதான் ஜல்லிக்கட்டு. ஜமீன்தார்களே ஜல்லிக்கட்டு காளைகளை வளர்த்து, அதை யாராலும் அடக்க முடியாது என்று வீரப் பெருமை பேசினர். மாடுகளின் கொம்புகளில் தங்கக் காசுகளைப் பையில் போட்டுக் கட்டி, அதை அடக்குவோருக்கு அப்பரிசுத் தொகை வழங்கப்படுவதாக அறிவித்தனர். ஜமீன்தார்களின் ஆதிக்கம், சாதி ஆதிக்கமாகவும்; காளையை அடக்கும் வீரம், தாழ்த்தப்பட்ட சாதியினரை ஒடுக்கும் வீரமாகவும் வேர் விட்டது.

இந்த உண்மைகளை தொல் ஓவிய வரலாற்றாளரான காந்திராஜனும், சென்னை கவின்கலைக் கல்லூரி முதல்வரான பேராசிரியர் சந்திரசேகரனும் வெளிக் கொணர்ந்துள்ளனர். நீலகிரி மாவட்டம் கோத்தகிரி அருகிலுள்ள கருக்கியூர் குன்றில் ஏறத்தாழ 3500 ஆண்டுகளுக்கு முந்தைய ஓவியத்தில் காணப்படும் மஞ்சு விரட்டு காட்சியையும், மதுரை திண்டுக்கல்லுக்கிடையே கல்லூத்து மேட்டுப்பட்டியிலுள்ள தொன்மை வாய்ந்த குகை ஓவியத்தையும் ஆதாரமாகக் காட்டி, மஞ்சு விரட்டுதான் தமிழர்களின் பாரம்பரிய வீரவிளையாட்டாகத் திகழ்ந்ததை வரலாற்று அறிவியல் முறைப்படி நிரூபித்துள்ளனர்.
______________________________

புதிய ஜனநாயகம், பிப்ரவரி 2008
______________________________

  1. //தாழ்த்தப்பட்டோர் தாங்களாகவே தனியாக ஜல்லிக்கட்டு நடத்தினால் இவர்கள் ஏற்றுக் கொள்வார்களா?//

    தடையும் விதிக்கவில்லை .யாரும் தடுக்கவும் இல்லை
    ஏன் அலங்கநல்லூரில்தான் நடத்துவேன் என்று அடம் பிடிக்கிறீர்கள்.
    கடலூரில்,கோயம்புத்தூரில் மற்றும் சென்னையில் உங்கள் ஜல்லிகட்டை அவிழ்த்து விட வேன்டியதுதானே.
    யார் தடுக்கிறார்கள்.

  2. இப்ப பரவாயில்லைங்க சார் முன்னாடி தென் மாவட்டங்களில் ஒவ்வொறு ஊரிலயும் ஜல்லிக்கட்டு நடத்துவானுக கூடவே இலவச இணைப்பா சாதிக்கலவரமும் வரும் பிடிக்காதவன போட்டுத்தள்ளனுமுனா சல்லிக்கட்ட சாக்கா வச்சு போட்டுத்தள்ளிடுவானுக மாட்டு மேல பலிய போட்டுட்டு ஒதுங்கிடுவானுக ,இதனாலயே நிறைய ஊருல ஜல்லிக்கட்டு நடத்த விடாம போலிஸே தடை பண்ணிருச்சு.அலங்காநல்லூர்,பாலமேடுனு 2 அல்லது 3 ஊருல ஆதிக்க சாதிக்காரர்கள் மட்டும் இத விடாம பிடிச்சு தொங்கிட்டு இருக்கங்க இது எப்பிடி தமிழர் பாரம்பரியம் ஆகும் //ஜல்லிக்கட்டு என்பதை தேவர் ஜெயந்திக்கு இணையான சாதிய ஆணவச் சின்னமாகத்தான் தேவர் சாதியினர் பார்க்கின்றனர். ஜல்லிக்கட்டினைப் பாரம்பரியமாக நடத்திவரும் இந்த ஆதிக்க சாதியினர், வன்கொடுமைத் தடுப்புச் சட்டம் எங்களைப் பாதிக்கின்றது என்று கூடப் பேரணி நடத்தியிருக்கின்றனர். காளைகளிடம் மட்டும்தானா இவர்கள் விளையாடியிருக்கின்றனர்? மேலவளவு முருகேசனின் தலையைச் சீவி, சாதிவெறியோடு மீசையை முறுக்கி கோரத் தண்டவமும் ஆடியிருக்கின்றனர். இருப்பினும், தேவர் சாதியினரின் குல தெய்வமான முத்துராமலிங்கத் தேவருக்கு நூற்றாண்டு விழா கொண்டாடச் சொன்ன ‘சேரிப்புயல்’ தொல். திருமா இதுவும் போதாதென்று, “ஜல்லிக்கட்டுக்கு விதிக்கப்பட்ட தடையானது, இந்த விளையாட்டைப் பாரம்பரியமாக நடத்திவரும் மக்களை இழிவுபடுத்துவதாக உள்ளது” என்று வேதனைப்படுகிறார்.//தொல் திருமா ஏன் தேவையே இல்லாம வேதனைப்படுறார் அரிப்பு எடுக்கிறவன் சொறிஞ்சுக்கிறான் எதுக்கு இவர் அவிங்களுக்கு சொரிஞ்சு விடுதாறுனு தெரியல ,திருமாவின் தம்பிகளைத்தான் கேக்கனும்

  3. வினவு தமிழர்களுக்கு எதிரான இணையம் என்பதற்கு இந்தக் கட்டுரை மற்றொரு எடுத்துக்காட்டாக அமைகிறது.

    வாழ்த்துக்கள்.

    இவர்கள் ரஷ்யa, சீன மக்களுக்காக இதுபோன்ற இணையங்களை நடத்தினால் நன்றாக இருக்கும்.

  4. ஜல்லிக்கட்டு ஆதிக்க சாதியின் அடையாளம் என்றால் பறை அடிப்பது அடிமை சாதியின் அடையாளம் என்று எடுத்துக் கொள்ளலாமா?

  5. ஜல்லிக்கட்டு தேவர் சாதியினரின் ஆதிக்கத்தை காட்டுவதாக உள்ளது என்பதில் உடன்பாடு இல்லை. சாதிய தீண்டாமையை ஜல்லிக்கட்டுடன் முடிச்சு போடுவதில் அர்த்தம் இல்லை. திண்டுக்கல்லில் பெரும்பாலான கிராமங்களிலும் இவ்விளையாட்டு நடத்தப் படுகின்றது (இங்கு தேவர் சாதியர் அல்ல என்பதைக் கவனிக்கவும் ). இதில், காளையை விரட்டுபவர் எந்த சாதி, என பார்ப்பதற்கு நேரம் இல்லை. ஒரு வேலை அவ்வாலிபர் எந்தப் பெண்ணையாவது கிண்டல் செய்து தர்ம அடி வாங்கினால்தான் உண்டு. ஆகவே, இதில் சாதிக் கற்பிதம் செய்வதை விட , பாரம்பரியங்களைக் காக்கும் நிகழ்வாகவே கருதுதல் அவசியம். சாதியப் பிரச்சனைகளை பேச வேறு களம் உண்டு. இது அல்ல. வினவு கட்டுரைகள் பல நல்ல கருத்துக்களைப் பேசினாலும், இக்கட்டுரை அணுகும் விதம் சரி அல்ல.

  6. மாடுகளை கொடுமைப் படுத்தும் ஜல்லிகட்டை தடை செய்தவர்கள் ஏன் வ்யானைகளை கோவில் திருவிழாவில் பயன் படுத்துவதை தடை செய்ய வில்லை. யானைகளை பழக்குவது மிகுந்த சித்திரவதை. மதம் பிடித்து பலரை கொல்கிறது. இந்த பாகுபாட்டில் அரசியல் இல்லையா?

  7. இதற்கு என்ன அர்தம். தமிழ் நாட்டில் ரேக்ளா பந்தயம் நடத்த அனுமதி உள்ளதா? இல்லைய? சற்று விளக்கமா கூரவும்.

    ஜல்லிக்கட்டுக்குத் தடை விதித்துத் தீர்ப்பு வழங்கியது. அந்தத் தீர்ப்பில், “ஜல்லிக்கட்டு போட்டியை அனுமதிக்க வேண்டும் என்று எந்தச் சட்டமும் கூறவில்லை” என்றும், “அதேநேரத்தில் ரேக்ளா எனப்படும் மாட்டு வண்டிப் பந்தயத்தை நடத்த எந்தத் தடையுமில்லை” என்றும் கூறியிருந்தது. உச்சநீதிமன்ற நீதிபதிகளிடம் “ரேக்ளா பந்தயத்தை மட்டும் எந்தச் சட்டம் அனுமதிக்கிறது?” என்று யாரும் கேட்கவில்லை.

  8. ரேக்ளா எனப்படும் மாட்டுவண்டிப் பந்தயம் இன்னமும் நடத்தப்படுகின்றது.. இதனையும் சாதி ஆதிக்கக் குறியீடாகவே பார்க்க வேண்டும். கொடியங்குளம் அருகே உள்ள மணியாச்சி மைனர் ஆன பாண்டியனின் மாட்டுவண்டி ஓடும்போது 80, 90களில் அவர்கள் (பாண்டியன்வாள்) ஆடிய ஆட்டம் எல்லாம் இன்னமும் நினைவில் உள்ளது..கொடியங்குளம் உருவாக்கிய தீதான் அவர்களின் வாலை சுருட்ட வைத்தது..திருப்பி அடிப்பார்கள் என்ற அச்சம் உருவான பின்னர்தான் மாட்டு வண்டி பந்தயம் தாழ்த்தப்பட்டோரும் கலந்துகொள்ளும் நிலைக்கு வந்தது…அது மாதிரியான எழுச்சிகள் மதுரை வட்டாரத்தில் நடக்கவில்லை…எனவே வழக்கம் போல மூக்குக்கும் வாய்க்கும் நடுவே கருப்பான ஒரு விசயத்தின் மூலம் நாங்க மோண்ட பரம்பரைன்னு வடிவேல் மாதிரி கெத்து காட்டும் பேர்வழிகள் கையில் வாடிவாசல் உள்ளது…சல்லி என்பது சேர சோழ பாண்டியர்களின் நாணயமா? தமழினவாதிகள் குறிப்பிடும் ‘வந்தேறி’களின் நாணயமா? சல்லிகளை கொம்புகள் மத்தியில் ராசராசனோ ராசேந்திரனோ கட்டச் சொல்லி இருக்க முடியாது…இதற்கு நாணயமான பதில் கிடைக்குமா, வந்தேறிகளை மோப்பம் பிடித்து வெறுப்பேற்றுவோரிடம்?

  9. இது வினவு தளமா இல்ல பீட்டா தளமா. ஒரு பக்கத்தில் இருந்தே பார்க்கப்பட்ட வழக்கமான வெட்டிப் பதிவு. கொவில்களில் யானைகள், போலீசில் நாய்கள், வீடுகளில் நாய்கள், பூனைகள், பறவைகள் இதெல்லாம் உங்களுக்கு நியாயமா?. ஆனால் ஜல்லிக்கட்டு ? இதில் உங்கள் வழக்கமான சாதிகொடுமை பார்வை.
    பசுக்களுக்கு ஊசிபோட்டு கருத்தரிக்க வைப்பது ரொம்ப நியாயமோ. அப்படியானால் மனிதரும் உறவுவைத்துக்கொள்ளாமல் தத்தம் மனைவியருக்கு ஊசியின் மூலம் குழந்தையை பெற்றுக்கொள்ளலாமா? இது வன்முறை, அடக்குமுறை. விலங்குகளின் இயல்பான உறவுவேட்கையை இதற்குமேலும் கொச்சைப்படுத்த முடியுமா? அதைத்தான் பீட்டா செய்கிறது. ஊக்குவிக்கிறது. நம் பசுக்களுக்கு ஊசி போட்டு கொள்ளை லாபம் பார்க்கிறது. நம் பாரம்பரிய மாடுகளின் இனத்தை அழிக்கிறது. தமிழ் அழிய, தமிழரை அழிக்க பண்பாட்டை, மொழி, கலாச்சாரம் இவற்றின் கூறுகளை மாற்றிப்போட்டாலே போதுமே. இயற்கைக்கு மனித இனம் தேவையில்லை ஆனால் மற்ற உயிரினங்கள் தேவை. மற்ற உயிரினங்களை அழித்துவிட்டு மனிதன் நீண்ட நாட்கள் உயிர்வாழ முடியாது. அந்த உயிரினங்களில் முக்கியமானது மாடுகள். மாடுகள் அழிந்தால் மண் அழியும். விவசாயம் அழியும். மனிதன் அழிவான். இந்தியாவை அழிக்க மாடுகளை அழித்தால் போதும். அணுகுண்டுகள் தேவையில்லை. அதுதான் இப்போது நடந்துகொண்டிருக்கிறது.
    உலக தாராளமயமாக்கலை எதிர்த்து பேசும் வினவு, நம் இனம் அழிய நேரடியாக ஒத்தூதுகிறதா ஜாதிய அடக்குமுறை என்ற காரணம் காட்டி. பண்டைய தமிழரில் ஜாதி இல்லை. தொழில்களே இருந்தன.
    டவுட்: வினவும் ஒரு இல்லுமினாட்டியோ?
    விஜயன்

விவாதியுங்கள்

உங்கள் மறுமொழியை பதிவு செய்க
உங்கள் பெயரைப் பதிவு செய்க