டந்த வெள்ளிக்கிழமை, மத்திய பிரதேசத்தில் உள்ள தங்கள் வீடுகளுக்கு ரயிலில் செல்லலாம் என்ற நம்பிக்கையுடன் அவுரங்காபாத் ரயில் நிலையத்திற்கு செல்ல முயன்றபோது 16 இடம்பெயர் தொழிலாளர்கள் சரக்கு ரயில் மோதி கொல்லப்பட்டனர்.

சாலைகளில் சென்றால் காவல்துறையினரால் தாக்கப்படுவோம் என்கிற அச்சத்தில் ரயில்கள் ஓடவில்லை என்ற அறிவோடு அவர்கள் ரயில் பாதையில் நடந்து கொண்டிருந்தார்கள். பல மணி நேரம் நடந்த பிறகு, தொழிலாளர்கள் களைத்துப் போன நிலையில், அவர்கள் ஓய்வெடுக்க அமர்ந்து அப்படியே தூங்கியும் விட்டார்கள். அதிகாலை 5.20 மணியளவில் அந்த வழியாக வந்த ஒரு சரக்கு ரயில் தூங்கிக் கொண்டிருந்தவர்கள் மீது ஏறியது.

இவர்கள் அனைவரும் மகாராஷ்டிராவின் ஜல்னாவில் உள்ள ஒரு தனியார் எஃகு நிறுவனத்தில் பணிபுரிந்தவர்கள், மார்ச் 24 முதல் ஊரடங்கு தொடங்கியதிலிருந்து அவர்களது சம்பளம் பெறப்படவில்லை. அவநம்பிக்கையான சூழ்நிலையையும், அவர்கள் எப்போது மீண்டும் வேலை செய்ய முடியும் என்று தெரியாமலும், தங்கள் குடும்பங்களுடன் இருக்க வீடு திரும்ப விரும்பினர். வீடு திரும்ப ஒரு ரயிலைக் கண்டுபிடிக்கும் நம்பிக்கையில் நடக்க முடிவு செய்தனர்.

சனிக்கிழமை இரவு நடந்த மற்றொரு விபத்தில், மத்தியப் பிரதேசத்தின் நர்சிங்பூர் மாவட்டத்தில் 18 இடம்பெயர் தொழிலாளர்கள் பயணித்த லாரி கவிழ்ந்ததில் ஐந்து தொழிலாளர்கள் கொல்லப்பட்டனர் ; 13 பேர் காயமடைந்தனர். தெலுங்கானாவின் ஹைதராபாத் நகரத்திலிருந்து உத்தரபிரதேசத்தின் ஆக்ராவுக்கு மாம்பழங்களை ஏற்றிச் சென்ற லாரியில் அவர்கள் பயணித்துக் கொண்டிருந்தார்கள்.

கோவிட் – 19ஐத் தவிர ஊரடங்கு காலத்தில் மற்ற காரணங்களுக்காக உயிர்களை இழந்தவர்கள் இந்த இரண்டு விபத்துக்களில் கொல்லப்பட்ட தொழிலாளர்கள் மட்டுமல்ல…

படிக்க:
♦ இருண்டகாலத்தின் இரண்டாவது இன்னிங்ஸ் ! | அதிஷா
♦ விசாகப்பட்டிணம் விசவாயு கசிவு : கார்ப்பரேட் படுகொலை !

உண்மையில், ஆய்வாளர்கள் தேஜேஷ் ஜி.என்., கனிகா சர்மா மற்றும் அமன் ஆகியோரின் கூற்றுப்படி, சனிக்கிழமை வரை, நோய்த் தொற்று தவிர மற்ற காரணங்களால் ஊரடங்கு விதிக்கப்பட்டதிலிருந்து 378 பேர் இறந்துவிட்டனர். அவர்களில், 69 பேர் தங்கள் வீடுகளுக்கு நடந்து செல்லும் போது ரயில் அல்லது சாலை விபத்துக்களில் இறந்தவர்கள் – கிடைக்கக்கூடிய ஒரே பயண முறையான பொதுப் போக்குவரத்து பிரதமர் நரேந்திர மோடியின் அரசாங்கத்தால் நிறுத்தி வைக்கப்பட்டுள்ளது, இது முதல் ஊரடங்கு நடைமுறைக்கு வருவதற்கு நான்கு மணி நேரத்திற்கு முன்பு அறிவிக்கப்பட்டது.

மே 10-ஆம் தேதி வரையான கணக்குப்படி,

  • நிதி நெருக்கடி மற்றும் பட்டினியால் இறந்தவர்கள் 47 பேர் நடந்ததாலும்,
  • வரிசையில் நின்றதாலும் களைத்து இறந்தவர்கள் 26 பேர்,
  • போலீசு அராஜகத்தாலும் அரசு வன்முறையாலும் கொல்லப்பட்டவர்கள் 12 பேர்
  • முதியோர் அல்லது நோயாளிகளுக்கு போதிய மருத்துவ கவனிப்பின்மையால் உயிரிழந்தோர் 40 பேர்
  • தொற்று அச்சம், தனிமை, ஊரடங்கால் சுதந்திரமாக இயங்க முடியாததால் தற்கொலை செய்துகொண்டவர்கள் 83 பேர்.
  • மதுவை நிறுத்தியதால், மது பழக்கம் தொடர்பான மரணங்கள் மற்றும் தற்கொலைகள் 46
  • நடப்பதாலும், இடம்பெயர்வதாலும் சாலை அல்லது ரயில் விபத்துகளில் இறந்தவர்கள் 74 பேர்.
  • ஊரடங்கு தொடர்புடைய குற்றங்களால் (மதம் அல்லாத) நிகழ்ந்த மரணங்கள் 14.
  • காரணம் கண்டுபிடிக்கமுடியாத உயிரிழப்புகள் 41.

செய்தி ஊடகங்களில் வந்த தகவல்களைத் தொகுத்து, குழுவால் ஒன்றிணைக்கப்பட்ட தரவுத்தளம், ‘சுயாதீன அறிஞர்கள் மற்றும் மாணவர் சார்ந்த தன்னார்வலர்கள் நடவடிக்கை சார்ந்த ஆய்வு, சமூக-பொருளாதார உரிமைகள் மற்றும் தொடர்புடைய சிக்கல்களில் ஆர்வமுள்ளவர்கள்’ என்ற குழுவினரால் உருவாக்கப்பட்டுள்ளது. இந்தத் தரவுகள் தங்கள் வீடுகளுக்கு திரும்பிச் செல்லும்போது சாலை விபத்துக்கள், பட்டினி கிடத்தல், மருத்துவ பராமரிப்பு மறுப்பு, போலீசின் மிருகத்தனம், சோர்வு, தற்கொலைகள் போன்ற காரணங்களுக்காக ஏராளமான மக்கள் இறந்துவிட்டனர் என்பதைக் காட்டுகின்றன.

“ஊரடங்கு தொடங்கப்பட்ட உடனேயே, இறப்புகள் பற்றிய பல செய்திகளைப் பார்க்கத் தொடங்கினோம். வீட்டிற்கு திரும்பிச் செல்லும்போது மக்கள் இறக்கின்றனர், சுகாதாரப் பாதுகாப்பு மறுக்கப்பட்டதால் பெண்கள் இறக்கின்றனர். இந்த மரணங்கள் மிகவும் வேதனையளித்தன” என்கிறார் அமெரிக்காவின் அட்லாண்டாவில் உள்ள எமோரி பல்கலைக்கழகத்தில் சமூகவியலில் பி.எச்டி படித்து வரும் கனிகா சர்மா.

அவர்களின் தொகுப்பின்படி, அவுரங்காபாத்தில் குடியேறிய 16 தொழிலாளர்களின் மரணமே, அதிக எண்ணிக்கையிலான மக்கள் கொல்லப்பட்ட ஒற்றை நிகழ்வு. ஊரடங்கு பிறப்பிக்கப்பட்ட மார்ச் 28 க்குப் பிறகு, வீடு திரும்பிய 8 குடியேறிகள் கர்நாடகாவின் ராய்ச்சூரில் சாலை விபத்தில் கொல்லப்பட்டனர்.

கொரோனா வைரஸ் அல்லாத இறப்புகளில் (83) இதுவரை அதிக எண்ணிக்கையிலான தற்கொலைகள் தொற்று பயம், மதுவை நிறுத்தியதற்கான அறிகுறிகள் மற்றும் வேலை இழப்பு போன்ற காரணங்களுக்காக நிகழ்ந்தன. பட்டினி, மருத்துவ கவனிப்பு மறுப்பு மற்றும் வீட்டிற்கு நடந்து செல்லும்போது அல்லது ரேஷன் அல்லது பணத்திற்காக வரிசையில் நிற்கும்போது ஏராளமான மக்கள் இறந்துள்ளனர்.

தகவல்களை ஒன்றாக இணைக்க, ஆராய்ச்சியாளர்கள் கன்னடம், மராத்தி, ஒடியா, தெலுங்கு, பெங்காலி, இந்தி மற்றும் ஆங்கிலம் உள்ளிட்ட பல்வேறு மொழிகளில் கூகிள் அலர்ட்களை அமைத்துள்ளனர். “நாங்கள் கூகிள் தேடல்களைச் செய்கிறோம், மேலும் மக்கள் எங்களுக்கு செய்திகளை அனுப்புகிறார்கள். நாங்கள் அவற்றை சரிபார்க்கிறோம், அவற்றை மொழிபெயர்க்க தன்னார்வலர்கள் எங்களுக்கு உதவுகிறார்கள்” என்கிறார் கனிகா.

‘நம்பகமான’ செய்தி ஆதாரங்களால் அறிவிக்கப்பட்ட இறப்புகளை மட்டுமே ஆய்வாளர்கள் கணக்கில் எடுத்துக்கொள்கிறார்கள். “இதில் வரம்புகள் உள்ளன. நாங்கள் நேரடியாக சரிபார்க்க முடியாது. நாங்கள் நிறைய இறப்புகளை கணக்கில் கொள்ளவில்லை. உள்ளூர் ஊடக செய்திகள் எங்களை அடையவில்லை. மேலும், நிறைய இறப்புகள் பதிவு செய்யப்படவில்லை” என்று அவர் கூறினார்.

தமிழ்நாட்டில் ஒரு பேருந்து நிறுத்தத்திற்கு அருகில் வசித்து வந்த, உணவுக்காக பயணிகளை நம்பியிருந்த 80 வயது நபர் ஊரடங்கு விதிக்கப்பட்ட பின்னர், பயணிகள் யாரும் இல்லை என்பதால் இறந்தார். முதல் முறையாக ஊரடங்கு நீட்டிக்கப்பட்ட பின்னர் வீட்டிற்கு புறப்பட்ட பெற்றோருடன் 100 கிலோமீட்டர் தூரம் நடந்து 12 வயது சிறுமி சோர்வு காரணமாக இறந்தார்.

சர்மாவின் கூற்றுப்படி, தரவுகளிலிருந்து வெளிவந்த ஒரு தெளிவான முறை என்னவென்றால், இறப்பவர்கள் விளிம்பு நிலையில் வாழ்கிறார்கள். “இவர்கள் தொழிலாள வர்க்கத்தைச் சேர்ந்தவர்கள். இவர்கள் புலம்பெயர்ந்தோர் மற்றும் தொழிலாளர்களாக உள்ளனர். பதிவான மரணங்களில் பெண்களைவிட அதிகமான ஆண்கள் அதிகமாக உள்ளதை நாங்கள் கண்டோம், ஏனெனில் ஆண்கள் வேலைக்குச் செல்கிறார்கள்” என்று அவர் கூறினார்.

ஏராளமான பெண்கள் தற்கொலை செய்து கொண்டதையும் பார்க்க முடிகிறது. உதாரணமாக, பெற்றோரின் வீட்டிற்கு செல்ல முடியவில்லை என்ற காரணத்தால்…
“இவை அந்த பெண்கள் புண்படுத்தக்கூடிய உறவுகளில் இருந்ததால் விளைந்த நிகழ்வுகளாக இருக்கலாம்” என கனிகா யூகிக்கிறார்.

COVID-19 பயத்தால் மருத்துவமனைகள் மற்றும் மருத்துவர்கள் சிகிச்சை மறுக்கப்படுவது மற்றொரு வகையான மரணங்களுக்குக் காரணம். தெலுங்கானாவில் ஒரு கர்ப்பிணிப் பெண் ஆறு மருத்துவமனைகளால் திருப்பி விடப்பட்டதாக ஏப்ரல் மாதம் டைம்ஸ் ஆஃப் இந்தியா செய்தி வெளியிட்டுள்ளது. அவர் COVID-19 க்கு பரிசோதிக்கப்பட்டு, முடிவுகள் எதிர்மறையாக வந்த பின்னரே அரசாங்க மகப்பேறு மருத்துவமனையில் அனுமதிக்கப்பட்டார். தாமதம் காரணமாக, குழந்தை சிக்கல்களுடன் பிறந்து இறந்தது. ஒரு நாள் கழித்து, அந்தப் பெண்ணும் இறந்தார்.

இதேபோன்ற மற்றொரு நிகழ்வில், ஜம்மு-காஷ்மீரின் அனந்த்நாக் மாவட்டத்தில் இரட்டைக் கர்ப்பிணிப் பெண் ஒருவர் சரியான நேரத்தில் மருத்துவ வசதி மறுக்கப்பட்டதால் இறந்தார். உள்ளூர் நிர்வாகத்தால் ‘சிவப்பு மண்டலம்’ என வகைப்படுத்தப்பட்ட ஒரு பகுதியில் வசிப்பவர், அவருக்கு சிகிச்சையளிக்க மருத்துவர்கள் தயங்கினர்.

ஊரடங்கின் விளைவாக நிகழ்ந்த அனைத்து மரணங்களும் தங்களுடைய தொகுப்பில் இல்லை என ஆய்வாளர்கள் சுட்டிக்காட்டுகின்றனர்.

“இந்த மரணங்கள் குறைத்து மதிப்பிடப்பட்டவை என்பதை அடிக்கோடிட்டுக் காட்ட வேண்டும்: இறப்புகளில் ஒரு பகுதியே ஊடகங்களில் பதிவாகியுள்ளன, உள்ளூர் ஊடகங்களிலும் பதிவான சில மரணங்களை நாங்கள் தவறவிட்டிருக்கலாம்” என அவர்கள் கூறுகின்றனர்.

வினவு செய்திப் பிரிவு
செய்தி கட்டுரை: கபீர் அகர்வால்
கலைமதி

நன்றி : த வயர்

சந்தா செலுத்துங்கள்

இணையத்தில் உழைக்கும் மக்களின் குரலாக பதினோரு ஆண்டுகளாக போராடும் வினவுடன் கை கோருங்கள். ஆதரியுங்கள்

1 மறுமொழி

  1. இந்த வட இந்திய மக்களில் பெரும்பான்மையினர் மோடிக்கு தான் இரண்டு முறையும் வாக்களித்தனர். அதன் பலனை அனுபவிக்கிறார்கள். உங்களுக்கு என்ன? தமிழ்நாடு, கேரளா ஆகியன பாஜகவுக்கு வாக்கு அளிக்காததால் பாதிப்பு அடைந்துள்ளன. அதை பார்க்கும்போது இவர்களும் பாதிப்படைவதில் தவறு ஏதும் இல்லை. தங்களுடைய ஊரில் மோடிக்கு ஓட்டு போட்டுவிட்டு தமிழகத்தில் வந்து வேலை செய்கிறோம் என்னும் பெயரில் சட்டவிரோதமான செயல்பாடுகளில் ஈடுபட்டு வருகிறார்கள்.

விவாதியுங்கள்

உங்கள் மறுமொழியை பதிவு செய்க
உங்கள் பெயரைப் பதிவு செய்க