நடிகரும் இயக்குநருமான நந்திதா தாஸ் இயக்கத்தில் எழுத்தாளர் சதக் அசன் மண்டோவின் வாழ்க்கையை அடிப்படையாகக் கொண்டு வெளியான படம் ‘மண்டோ’.

பிரிட்டீஷ் ஆட்சியின் ஒன்றுபட்ட இந்தியாவில் பிறந்த சதக் அசன் மண்டோ, மத அடிப்படையில் நாடுகள் பிரிவதை எதிர்த்தார். தன்னுடைய படைப்புகளில் மதங்களின் அடிப்படையில் பாகிஸ்தான், இந்தியா என நாடுகள் பிரிந்தபோது ஏற்பட்ட படுகொலைகள், அது ஏற்படுத்திய உளவியல் அழுத்தங்களை பதிவு செய்தவர் மண்டோ. பிரிவினைக்குப் பிறகு பாகிஸ்தானில் வசித்த மண்டோ, மத அடிப்படைவாதிகளால் கடும் விமர்சனத்துக்கு ஆளானவர்.

மாண்டோவின் வாழ்க்கையின் சில முக்கியமான சம்பவங்களை வைத்து நந்திதா தாஸ் இயக்கிய ‘மண்டோ’ படம் இந்தியாவில் வெளியானது, விமர்சன ரீதியாக வரவேற்பையும் பெற்றது. நவாசுதீன் சித்திக் மற்றும் ரசிகா துகால் முதன்மை கதாபாத்திரங்களில் நடித்துள்ளனர். மண்டோ மும்பையில் வசித்த நாட்களைப் பதிவு செய்வதோடு, பிரிவினையின் போது பாகிஸ்தானுக்கு சென்றதையும் இந்தப்படம் பேசுகிறது.

ஆனால், பாகிஸ்தானில் மண்டோ படம் வெளியிட அனுமதிக்கப்படவில்லை. இதுகுறித்து நந்திதா தாஸ் அளித்த பேட்டி ஒன்றியில், “பிரிவினைக்கு எதிரான கருத்துக்கள், ஆட்சேபனைக்குரிய காட்சிகள் பாகிஸ்தானின் சமூக கட்டுப்பாடுகளுக்கு எதிராக உள்ளதாகக் கூறி பாகிஸ்தான் சென்ஸார்போர்டு மண்டோ படத்தை வெளியிட அனுமதிக்கவில்லை” என தெரிவித்திருந்தார். மேலும், “கேட்க வேண்டிய குரல்களை ஒடுக்குவது எங்கு நடந்தாலும் ஆபத்தானதே” எனவும் விமர்சித்திருந்தார்.

படிக்க:
♦ நூல் அறிமுகம் : தேசப்பிரிவினைக்கு காரணம் யார் ?
♦ இந்தியா குறித்து பாகிஸ்தான் மக்கள் என்ன நினைக்கிறார்கள் ?

இதுகுறித்து தனது ட்விட்டர் பதிவில், “பாகிஸ்தானில் மண்டோ படம் வெளியாகதது வருத்தம் அளிக்கிறது” என நந்திதா தாஸ் தெரிவித்திருந்தார். இந்தப் பதிவுக்கு பதிலளித்திருக்கும் பாகிஸ்தானின் தகவல் மற்றும் ஒளிபரப்பு துறை அமைச்சர் ஃபவாத் சவுத்ரி, “பாகிஸ்தானில் இந்தப் படத்தை வெளியிட முயற்சிக்கிறேன். கமர்ஷியல் தன்மை குறைவாக மண்டோ படத்தை அவருடைய நாட்டில் வெளியிட நிச்சயம் எவராவது முன்வருவார் என நம்புகிறேன்” என எழுதியுள்ளார்.

மண்டோ படம் வெளியாவது குறித்து பாகிஸ்தானின் சென்ஸார் போர்டின் தலைவர் தன்யால் கிலானி, ‘மண்டோ படத்துக்கு சென்ஸார் போர்டு சான்றிதழ் இன்னும் தரப்படவில்லை. பாகிஸ்தானில் வெளியிட விரும்பும் விநியோகஸ்தர்கள், சென்ஸார்போர்டு அனுமதி கேட்டு விண்ணப்பிக்கலாம்’ என தெரிவித்துள்ளார்.

இதனிடைய மண்டோ படத்தை வெளியிட கோரி செயல்பாட்டாளர்கள், பத்திரிகையாளர்கள், மண்டோவின் மகள்கள் உள்ளிட்ட பலர் இணைந்து கையெழுத்திட்ட கடிதம் ஒன்றை பாகிஸ்தான் பிரதமர் இம்ரான் கானுக்கு அனுப்பி வைத்துள்ளனர்.

ஒடுக்குமுறைக்கும் மதவாத அடிப்படைவாதத்துக்கும் பெயர் பெற்ற பாகிஸ்தான், எதிர்க் கருத்துக்களை ஏற்றுக்கொள்ள தயாராகி வருகிறது. ஜனநாயக நாடாக சொல்லிக் கொண்ட இந்தியா இந்துத்துவாதிகளில் கையில் சிக்கி, எதிர்க்கருத்துக்களை சொல்லவே கூடாது என அடிப்படைவாதத்துக்கு தயாராகி வருகிறது.

தமிழாக்கம்: கலைமதி
நன்றி: ஸ்க்ரால்

விவாதியுங்கள்

உங்கள் மறுமொழியை பதிவு செய்க
உங்கள் பெயரைப் பதிவு செய்க