ஜெயங்கொண்டம் மக்கள் அதிகாரம்  தோழர் கதிரவன்  என்ற கொளஞ்சியை தேசதுரோக வழக்கில் கைது செய்துள்ளது போலீசு.

கடலூர், சீர்காழி பகுதிகளில் பெட்ரோ கெமிக்கல் மண்டலத்தை முழுமையாக அமல்படுத்தும் வேலைகளில் ஈடுபட்டு வருகிறது மத்திய அரசு.  இத்திட்டத்திற்கு எதிராக அப்பகுதி விவசாயிகளும், பொதுமக்களும், ஜனநாயக சக்திகளும் போராடி வருகின்றனர்.

கடலூர், ஜெயங்கொண்டம் பகுதியில் இப்பிரச்சினையைக் கையில் எடுத்துப் போராட அனைத்துக் கட்சிகளையும் ஒருங்கிணைத்து ஒரு போராட்ட முன்னணியை ஏற்படுத்த முயற்சி மேற்கொள்ளப்பட்டது. அந்த அடிப்படையில் கடந்த 20/06/2018 அன்று மக்கள் அதிகாரம், சி.பி.எம்., சி.பி.ஐ., ஒ.வி.மு.,  ஆகிய அமைப்புகளின் பிரதிநிதிகள் ஒருங்கிணைப்புக் கமிட்டி உருவாக்குவது பற்றி கூடிப் பேசியுள்ளனர். அதில் மஃப்டியில் கலந்து  கொண்ட போலீசு, அந்நிகழ்வுக்குப் பிறகு ஒருங்கிணைப்புக் கமிட்டியைச் சேர்ந்த பிரதிநிதிகளிடம் இப்போராட்டக் கூட்டமைப்பில் இருந்து மக்கள் அதிகாரத்தை வெளியேற்றுமாறு மிரட்டியிருக்கிறது. அதற்கு அவர்கள் மறுத்துள்ளனர்.

இதனால் ஆத்திரமடைந்த போலீசு, மக்கள் அதிகாரம் ஜெயங்கொண்டம் பகுதியைச் சேர்ந்த தோழர் கொளஞ்சி என்ற கதிரவனைக் கைது செய்ய அவரது வீட்டிற்குச் சென்றுள்ளது. அச்சமயத்தில் அவர் அங்கு இல்லாததால், அவரது வீட்டில் உள்ள பொருட்களை எல்லாம் கலைத்துப் போட்டு, அங்கிருந்த பிரசுரங்களை வீசியெறிந்து அவ்விடத்தையே களேபரமாக்கியது. அங்கு கூடிய ஊர் மக்கள், இதற்கு கடும் எதிர்ப்புத் தெரிவித்ததால் அங்கிருந்து ஓடியது போலீசு.

இந்நிலையில், கடந்த 22/06/2018 அன்று மதியம் தனது வீட்டில் குழந்தைகளுடன் சாப்பிட்டுக் கொண்டிருந்த தோழர் கொளஞ்சியை, 10-க்கும் மேற்பட்ட போலீசு சூழந்து கொண்டு சாப்பிட்டு முடிக்கக்கூட விடாமல், கையோடு இழுத்துச் சென்றுள்ளது.

எதிர்த்துக் கேட்ட ஊர்க்காரர்களையும், உறவினர்களையும் மிரட்டி விட்டுச் சென்றிருக்கிறது போலீசு. “ஓ.என்.ஜி.சி.-க்கு எதிராக நோட்டீசு கொடுத்தார், இந்திய இறையாண்மைக்கு எதிராகப் பேசினார்” எனக் கூறி அவர்மீது, இந்திய தண்டனைச் சட்டம் 153 A, 124 A, ஆகிய பிரிவுகளின் கீழ் வழக்குப் பதிவு செய்து சிறையில் அடைத்துள்ளது மோடி – எடப்பாடிகளின் எடுபிடி போலீசு.

மண்ணின் விடுதலைக்காக போராடுபவன் தேசதுரோகி என்றால், அதை மீண்டும் மீண்டும் செய்வோம். தொடரும் அரசு அடக்குமுறைகளுக்கு எதிராக கரம் கோப்போம்!

தகவல்: மக்கள் அதிகாரம், தமிழ்நாடு.

சந்தா செலுத்துங்கள்

உங்களின் குரல், உங்களின் பங்களிப்பின்றி ஒலிக்க முடியுமா? வினவு தளத்திற்கு ஆதரவு தாருங்கள்.

விவாதியுங்கள்

உங்கள் மறுமொழியை பதிவு செய்க
உங்கள் பெயரைப் பதிவு செய்க