சமீபத்தில், கோவை பாரதியார் பல்கலைக்கழகத்தைச் சேர்ந்த பேராசிரியர்கள் செங்காந்தள் (Gloriosa superba) என்னும் தாவரத்தில் புற்றுநோய் செல்களை அழிக்கும் வேதிப்பொருள் இருப்பதாகக் கண்டறிந்து அதற்கு காப்புரிமம் பெற்றுள்ளனர்.

தமிழ்நாட்டின் மாநில மலரான செங்காந்தள் செடியின் கிழங்கு (tuber) பகுதியில் இருக்கும் கொல்கிசின் (Colchicine) எனப்படும் வேதியியல் மூலக்கூறு புற்றுநோய் செல்களை அழிக்கும் தன்மை கொண்டதாக கண்டறியப்பட்டுள்ளது. கடந்த ஜூலை 31 அன்று மத்திய அரசு இதற்கு காப்புரிமம் வழங்கியுள்ளது. இது மக்கள் பயன்பாட்டிற்கு கொண்டுவரப்பட 5 ஆண்டுகள் வரை ஆகலாம் என்று ஆய்வாளர்கள் தெரிவிக்கின்றனர்.

ஆனால், இதுபோன்ற உயிர் காக்கும் மருந்துகளின்  காப்புரிமம் கார்பரேட்களிடம் விற்கப்படும் போது, மருந்துகளின் விலையை  கார்பரேட்டுகள் தங்கள் லாபவெறிக்கு ஏற்றவாறு  உயர்த்தி  கொள்ளையடிக்கவே வழிவகுக்கும். இதனால் பாதிக்கப்படப் போவது பொருளாதாரத்தின் விளிம்பு நிலையில் வாழும் மக்களே. இவ்வளவு அறிவியல் முன்னேற்றம் அடைந்த பின்னரும் காசு இல்லாதவர்கள் நோயினால் இறந்து போகும் அவலம் இருக்கும் சமூகம் எவ்வாறு முன்னேறிய சமூகமாக இருக்க முடியும்?

தற்போது, கோவை ஆராய்ச்சியாளர்கள் கண்டுபடித்த புற்றுநோய் செல்களை அழிக்கும் திறன் கொண்டு மூலக்கூறு போன்ற பல மருந்துகளின் கண்டுபிடிப்புகளுக்கு அடிப்படையாக மக்களின் பாரம்பரிய மருத்துவம் இருந்திருக்கிறது.  இந்திய பாரம்பரிய மருத்துவ முறைகளான சித்த மருத்துவம், ஆயுர்வேத மருத்துவம் போன்ற மருத்துவ முறைகளில் இந்த செங்காந்தள் செடி பல்வேறு மருந்துகள் தயாரிக்கப் பயன்படுகிறது. அதன் அடிப்பையிலேயே இந்த தாவரத்தில் கொல்கிசின் இருப்பது கண்டறியப்பட்டுள்ளது.

எடுத்துக்காட்டாக, புற்றுநோய்க்கான மருந்துகளாக Vinblastine, Vincristine, Taxol, இருமலுக்கான மருந்தான வாசலின், வலிநிவாரணியான Morphine, மலேரியாவுக்கான Quinine போன்ற நூற்றுக்கணக்கான மருந்துகள் பாரம்பரிய மருத்துவத்தின் பங்களிப்பினால் கண்டறியப்பட்டவை.

சீன பாரம்பரிய மருத்துவத்தை அடிப்படையாக வைத்து மலேரியா நோயாளிகளை சாவில் இருந்து பாதுகாக்கும் அருமருந்தான ”Artemisinin” என்னும் மருந்து ”Artemisia annua” என்னும் தாவரத்தில் இருந்து கண்டறியப்பட்டதாகும். ஆனால் இப்படி உயிர்காக்கும் மருந்துகளை நவீன மருத்துவத்திற்கு அறிமுகம் செய்த பாரம்பரிய மருத்துவத்தின் நிலை இந்த நாட்டில் என்னவாக இருக்கிறது? குறிப்பாக, தமிழர்கள் வாழ்வியலோடு கலந்திருக்கும் சித்த மருத்துவத்தின் நிலை தமிழகத்தில் என்னவாக இருக்கிறது?

படிக்க: மருத்துவ துறையில் வேத மரபுகளைத் திணிக்கும் மோடி அரசு!

சித்த மருத்துவத்தில் இதுபோன்ற ஆய்வுகள் நடத்தப்பட்டால் பல மருந்துகளை மக்கள் பயன்பாட்டிற்குக் கொண்டு வர முடியும். மக்களின் பாரம்பரிய மருத்துவ அறிவை நவீன அறிவியலின் துணைகொண்டு மக்களின் பயன்பாட்டிற்கு கொண்டுவர முடியும்.

ஆனால் சித்த மருத்துவத்துறை பார்ப்பனியத்தாலும் கார்பரேட்டுகளாலும் தொடர்ந்து நசுக்கப்பட்டு வருகிறது. டெங்கு, சிக்குன்குனியா நோய்த்தொற்றுக் காலத்தில் பயன்படுத்தப்பட்ட “நிலவேம்புக் குடிநீர்” மற்றும் கொரோனா நோய்த்தொற்றின் போது பயன்படுத்தப்பட்ட “கபசுரக்குடிநீர்” போன்ற மருந்துகள் மக்களின் நோய் எதிர்ப்பாற்றலை உயர்த்தும் அருமருந்தாக இருந்தது. இது சித்த மருத்துவத்தின் தரத்திற்கான நடப்புகாலச் சான்றுகளாகும். ஆனால், சித்த மருத்துவத்தில் புதிய ஆராய்ச்சிகளை செய்வது, புதிய மருந்துகளை கண்டு பிடித்து மக்கள் பயன்பாட்டிற்கு கொண்டுவருதெல்லாம் கானல் நீராகவே உள்ளது. ஏனெனில், திருநெல்வேலி பாளையங்கோட்டையில் 60 ஆண்டுகளாக இயங்கிவரும் பாரம்பரிய மிக்க சித்தா கல்லூரி, உயர்ந்த ஆய்வுகளுக்கான வசதி மட்டுமல்ல குறைந்தபட்ச அடிப்படை வசதி கூட இல்லாமல் இயங்கிவரும் நிலையில் எப்படி புதிய மருந்துகள் பற்றிய ஆராய்ச்சி பற்றிச் சிந்திக்க முடியும்?

இந்த பாளையங்கோட்டை அரசு சித்த மருத்துவக் கல்லூரி தற்காலிகமாகவே இங்கு கொண்டு வரப்பட்டது. ஆனால் வெறும் 4 ஏக்கர் நிலத்தில் போதுமான இடவசதி, கட்டமைப்பு வசதிகள் இல்லாமல் 60 ஆண்டுகளாக இயங்கிவருகிறது.

போதுமான பேராசிரியர்கள் இல்லாத நிலை, பழமையான விரிசல் விழுந்த கட்டிடங்களின் மேற்கூரை அவ்வப்போது பெயர்ந்து விழுவது, மாணவிகளுக்கான பாதுகாப்பற்ற விடுதி வசதி, அதிக கட்டணம் வசூலிப்பது, போதுமான கழிப்பறை வசதி இல்லாத நிலை, மாணவர்களுக்கான விடுதி வசதி இல்லாதது, குடிப்பதற்கும் மற்றத் தேவைகளுக்கும் போதுமான தண்ணீர் வசதி இல்லாதது போன்ற மாணவர்களின் மிக அடிப்படையான பிரச்சினைகள் கூட தீர்க்கப்படாமல் உள்ளது. இவற்றையெல்லாம் சரி செய்யச் சொல்லி வெவ்வேறு காலகட்டங்களில் மாணவர்கள் நிறைய போராட்டங்களை நடத்திய பின்னரும், இந்த பிரச்சினைகளையும் கல்லூரி நிர்வாகம் வெறும் ‘patch work’ மட்டும் செய்து மாணவர்களை ஏமாற்றி வருகிறது.

இதனால், சி.சி.ஐ.எம்-ஆல் (Central Council of Indian Medicine) குறிப்பிடப்பட்ட கட்டமைப்பு தகுதிகளை பூர்த்தி செய்யாததால் முதலாம் ஆண்டு மாணவர்கள் சேர்க்கைக்குத் தடை விதிக்கப்பட்டு, ஒவ்வொரு ஆண்டும் தற்காலிக அனுமதி பெற்று மாணவர் சேர்கையை நடத்தி வருகிறது. சமீபத்தில் என்.சி.ஐ.எஸ்.எம் (National Commission for Indian System of Medicine) வெளியிட்ட விதிகளின்படி எந்த விதிக்கும் பொருந்தாமல் தகுதியற்ற கல்லூரியாக செயல்பட்டு வருகிறது.

படிக்க: மூன்று அரசு மருத்துவக் கல்லூரிகளில் மாணவர் சேர்க்கைக்கான அங்கீகாரம் ரத்து! | பு.மா.இ.மு கண்டனம்

பரந்து விரிந்த மூலிகை தோட்டங்கள், நவீன ஆய்வகங்கள், விலங்குகளிடம் மருந்துகளைப் பரிசோதிப்பதற்கான ஆய்வகங்கள், பாதுகாப்பான விடுதி வசதி, அனைத்து பிரிவுகளையும் உள்ளடக்கிய நவீன வசதிகளுடன் கூடிய மருத்துவமனை, மாணவர்களுக்குத் தேவையான உள்கட்டமைப்பு வசதிகள் போன்றவற்றைக் கொண்டுவந்தால் மட்டுமே அந்த கல்லூரியின்‌ மாணவர்கள் சித்த மருத்துவத்தில் சிறந்து விளங்குவதோடு மக்களுக்கும் பயனுள்ள கண்டுபிடிப்புகளைச் செய்வார்கள்.

ஆனால் இந்த வசதிகளை ஏற்படுத்த போதுமான இடவசதி பாளையங்கோட்டையில் கிடையாது.

உயர்நீதிமன்ற மதுரை கிளை 2016-ஆம் ஆண்டில் வழங்கிய உத்தரவில் இக்கல்லூரியை பல்கலைக்கழகமாக தரம் உயர்த்தி, செட்டிகுளத்தில் பயன்பாடின்றி இருந்த மனோன்மணீயம் சுந்தரனார் பல்கலைக்கழகத்திற்குச் சொந்தமான இடத்தில் புதிய கல்லூரியை கட்டிக்கொள்ளுமாறு கூறியிருந்தது. ஆனால் அரசோ, கல்லூரி நிர்வாகமோ எந்த நடவடிக்கையும் எடுக்காமல், சுமார் 7 ஆண்டுகளாக கிடப்பில் போட்டு சித்த மருத்துவத்தின் வளர்ச்சிக்கு முட்டுக்கட்டை போட்டு வருகிறது.

சித்த மருத்துவத்துறையைச் சேர்ந்த பல்வேறு பேராசிரியர்கள், ஆர்வலர்கள், மருத்துவர்கள், மாணவர்கள், அரசியல் இயக்கங்களின் நீண்ட போராட்டங்களின் பலனாக தமிழக அரசு கடந்த மார்ச் மாதம் நடந்த பட்ஜெட் கூட்டத்தொடரில் பாளையங்கோட்டை அரசு சித்த மருத்துவக் கல்லூரியின் மேம்பாட்டிற்காக ₹40 கோடியை ஒதுக்கியது. ஆனால் கல்லூரி நிர்வாகம் உயர்நீதிமன்ற மதுரை கிளை உத்தரவிட்ட இடத்திற்கு கல்லூரியை மாற்றாமல், கட்டமைப்பு வசதிகளை மேம்படுத்தாமல் இழுத்தடித்து வருகிறது. இதனால், சித்த மருத்துவ கல்லூரியின் மேம்பாட்டிற்காக அரசு ஒதுக்கிய நிதியை திரும்ப ஒப்படைக்கப்படும் நிலை ஏற்பட்டு உள்ளது.

மக்களின் பாரம்பரிய மருத்துவ அறிவு, சமூகத்தின் அடிப்படை சுகாதாரம், நோய்த் தடுப்பு, விரிவான மருத்துவ சேவைகள், மருத்துவப் படிப்பு போன்றவை எல்லாம் ஒன்றோடொன்று பிணைந்தது.  மருத்துவர்களின் நலன், மருத்துவத் துறையின் முன்னேற்றும், மக்கள் நலன் இவையெல்லாம் வெவ்வேறு அல்ல. ஆனால், அரசு மக்களின் பாரம்பரிய மருத்துவத்தைக் கைவிடும் போது, அவை பழமைவாத சக்திகளால் நாசம் செய்யப்படுவது மட்டுமன்றி வெகுமக்களின் உயிர்காக்கும் மருத்துவ சேவைகள் லாபவெறி பிடித்த கார்ப்பரேட்களிடம் சென்றுவிடும் அபாயமும் உருவாகிறது. எனவே, மக்களும் மாணவர்களும் களப் போராட்டங்களின் மூலம் சித்த மருத்துவத்திற்கான தடைகளை உடைத்தெறிந்து அதை அனைத்து மக்களுக்கானதாக மாற்ற வேண்டும்.

சித்தன்

ஊழலில் உலக சாதனை படைக்கிறது ஆர்.எஸ்.எஸ் – பிஜேபி!
சுரண்டலில் கொழுக்கிறது அம்பானி – அதானி கார்ப்பரேட்கள்!

♦ ஆர்.எஸ்.எஸ்-பா.ஜ.க; மோடி-அமித்ஷா ஆட்சியில் கடந்த 2016-ஆம் ஆண்டு அமலான ஜி.எஸ்.டி. (GST) வரி மூலம் வசூலான சுமார் 50 லட்சம் கோடிக்கும் அதிகமான தொகை என்ன ஆனது?

♦ கச்சா எண்ணெய் விலை சர்வதேச அரங்கில் படுபாதாள அளவிற்கு குறைந்த நிலையிலும் வரிகளை உயர்த்தி பெட்ரோல்-டீசல் விலையுயர்வு மூலம் அடித்த கொள்ளை 30 லட்சம் கோடி எங்கே போனது?

♦ மொத்த விலைவாசி உயர்வின் மூலம் கார்ப்பரேட் நிறுவனங்கள் அடித்த கொள்ளையை கணக்கிடப்போவது யார்?

படிக்க : அமுல் விரிவாக்கத்துக்குப் பின்னே அம்பானியின் ஏகபோக விருப்பம்!

♦ கடந்த பத்து ஆண்டுகளில் கார்ப்பரேட்களுக்கு கடன் தள்ளுபடி 15 லட்சம் கோடி, இதனால் பொதுத்துறை வங்கிகளின் லாபம் மாயமானதைக் கேட்கப்போவது யார்?

♦ வங்கி கணக்கில் மினிமம் பேலன்ஸ் இல்லாதது, ATM பயன்பாட்டுக்கு கட்டணம், SMS அனுப்ப கட்டணம் எனப் பொதுமக்களிடம் அடித்த கொள்ளை 35 ஆயிரம் கோடி என்கிறது ஒரு புள்ளி விவரம்!

♦ அறிவிப்பில்லாமல் ரயில்வே-வில் கட்டண உயர்வு, முதியோர் பயண கட்டண சலுகை பறிப்பு, தரம் குறைந்த கொள்முதல் என மக்களிடம் பிடுங்கும் பல்லாயிரம் கோடி எங்கே செல்கிறது?

♦ கார்ப்பரேட்களுக்கு 30 முதல் 22 சதவிகிதம் வரை வரிகுறைப்பு மூலம் கடந்த 5 ஆண்டுகளில் மட்டும் வருவாய் இழப்பு சுமார் 8 லட்சம் கோடி!

♦ தனியார்மயம் என்ற பெயரில் கல்வி, மருத்துவம் போன்ற சேவைத் துறைகளிலும், BSNL, வங்கி, இன்சூரன்ஸ் உள்ளிட்ட பொதுத்துறைகளிலும் கனிம வள சூறையாடல் மூலமும் கொள்ளை அடிக்கப்பட்டது பல லட்சம் கோடி!

♦ நாடாளுமன்றத்தில் அமளிதுமளி செய்து மக்களின் கவனத்தை திசை திருப்பிவிட்டு செய்யப்பட்ட நூற்றுகணக்கான சட்ட திருத்தங்கள் பற்றி பேசப்போவது யார்?

♦ மோடியின் ஆட்சியில் அதானி உலக பணக்காரர் வரிசையில் 312-வது இடத்திலிருந்து 2-வது இடத்திற்குத் தாவியது எப்படி? கடைசி இரண்டு ஆண்டுகளில் மட்டும் 18 லட்சம் கோடி ரூபாய் பங்குச்சந்தையில் பரிவர்த்தனை எப்படி? இந்த விசயத்தில் அமலாக்கத்துறை ரெய்டு செல்லாதது ஏன்?

♦ நாடு முழுவதும் பல லட்சம் கோடிக்கு நடக்கும் போதைப்பொருள். கடத்தலையும் கிரிமினல் கும்பலையும் தேசிய புலனாய்வு முகமை (NIA) சுற்றி வளைக்காதது ஏன்?

♦ மோடி அரசின் 9 ஆண்டு பட்ஜெட்டின் வரவு-செலவு, திட்டங்களை ஆய்வு செய்தால் சில நூறு லட்சம் கோடிகள் கார்ப்பரேட்டுகளுக்கு சென்றுள்ளது என்பதை அறிய முடியும்!

♦ உலக மக்கள் தொகையில் 142.8 கோடியுடன் முதலிடம் பிடித்த இந்தியாவில் பட்டினியிலும் முதலிடம் பிடித்து, துடித்துக்கொண்டு இருப்பவர்களின் எண்ணிக்கை 22 கோடி!

படிக்க : மோடியின் கிரீஸ் பயணம்: எல்லாம் அதானிக்காக!

♦ படித்த இளைஞர்கள் சுரண்டல், ஊழலில் உலக சாதனை படைக்கும் இந்த ஆர்.எஸ்.எஸ்-பா.ஜ.க பாசிஸ்டுகளை கேள்விக்குள்ளாக்கி பொதுமக்களுக்குப் புரிய வைத்தால் தான் இந்த மண்ணில் இனி வாழ முடியும்!

♦ முதலாளித்துவ சுரண்டலை உள்ளடக்கிய நாடாளுமன்ற ஜனநாயக ஆட்சிமுறை லஞ்சம், ஊழல், சொத்துக்குவிப்பு, கடத்தல், பொதுச்சொத்து சூறையாடல், கலவரம் என அனைத்து கேடுகளையும் உள்ளடக்கியது!

♦ ஊழலில் உடைபடும் ஆர்.எஸ்.எஸ்-பா.ஜ.க-மோடி பிம்பத்துடன் சேர்த்து கார்ப்பரேட் கொள்ளைகளை உள்ளடக்கிய பிரிட்டன் முதலாளிகள் வகுத்தளித்த போலி ஜனநாயக நாடாளுமன்ற ஆட்சிமுறையையும் அம்பலப்படுத்துவோம்!

இனியன்