விவாதங்களுக்குப் பதில் உரை

பாகம் – 3

6 லெனின் நம்மை மக்களுக்குக் கற்றுக்கொடுக்க மட்டுமல்ல, அவர்களிடமிருந்து கற்றுக்கொள்ளவும் கூட போதித்தார். இதன் பொருள் என்ன?

இதன் பொருள், தலைவர்களாகிய நாம் நமது தலைகளை வீங்கவைத்துக் கொள்ளக்கூடாது. நாம் மத்தியக்குழுவின் அல்லது மக்கள் அரசுப்பணி அமைச்சகத்தின் உறுப்பினர்களாக உள்ளதால், நாம் முறையாக வழிகாட்டுவதற்கான எல்லா அறிவையும் பெற்று விட்டோம் என்று கருதக்கூடாது. நமது தரவரிசை மட்டுமே அறிவை யும், அனுபவத்தையும் கொடுத்து விடுவதில்லை. பட்டங்களும் இன்னும் குறைவாகவே அறிவை அளிக்கிறது.

இதன் பொருள், நமது அனுபவங்கள் மட்டுமே, தலைவர்களின் அனுபவங்கள் மட்டுமே முறையாக வழி நடத்துவதற்கு நமக்குப் போதுமானதல்ல. எனவே, இதைத்தொடர்ந்து மக்களின் அனுபவங்களை, கட்சி உறுப்பினர்களின் அனுபவங்களை உழைக்கும் வர்க்கத்தின் அனுபவங்களை, நமது அனுபவங்களோடும், தலைவர்களின் அனுபவங்களோடும் பின்னிணைப்பாக்கிக் கொள்ள வேண்டும்.

இதன் பொருள், ஒரு கணம்கூட நாம் மக்களுடனான நமது தொடர்புகளைத் தளர்த்திக்கொள்ளக்கூடாது என்பதாகும்.

மேலும் இறுதியாக, இதன் பொருள் நாம் கட்டாயம் கவனத்துடன் பெரும்திரளான மக்களின் குரல்களை, கட்சி அணியினர், உறுப்பினர்களின் குரல்களை, ‘சிறியவர்கள்’ என்று அழைக்கப்படுபவர்களின் குரல்களை, உழைக்கும் மக்களின் குரல்களைக் கேட்க வேண்டும்.

முறையாக வழி நடத்துவது என்றால் என்ன?

இதன் பொருள், அலுவலகத்தில் அமர்ந்து கொள்வதையும், செயற்குறிப்புரைகளை வழங்குவதையும் எக்காரணம் கொண்டும் குறிக்காது.

முறையாக வழிகாட்டுவது என்றால்:

முதலாவதாக, ஒரு பிரச்சினைக்கு ஒரு முறையான தீர்வைக் கண்டறிவது; ஆனால், பெரும் திரளானவர்களின் அனுபவங்களைக் கணக்கில் எடுத்துக் கொள்ளாமல் ஒரு முறையான தீர்வை கண்டறிவது சாத்தியமல்ல. ஏனெனில், பெரும் திரளானவர்கள்தான் நமது தலைமை எடுக்கும் முடிவுகளுடைய விளைவுகளை, அவர்கள்தான் சுமக்கிறார்கள்;

இரண்டாவதாக, சரியான தீர்வுகளை நடைமுறைப்படுத்துவதை ஏற்பாடு செய்வது பெரும் திரளானவர்களின் நேரடி உதவியின்றிச் செய்துவிட முடியாது.

மூன்றாவதாக, இந்தத் தீர்வை முழுமையாக நிறைவேற்றியதை சரிபார்க்கும் ஏற்பாட்டைச் செய்வது, பெரும் திரளானவர்களின் நேரடி உதவியின்றி செய்து விட முடியாது.

தலைவர்களாகிய நாம் விசயங்களையும், நிகழ்வுகளையும் மக்களையும் ஒரு பக்கம் இருந்து மட்டும் பார்க்கிறோம்; அதாவது மேலிருந்து மட்டுமே என்று நான் கூறுகிறேன். இதன் விளைவாக நமது கண்ணோட்டத்தின் களம் அதிகமான அல்லது குறைவான வரம்புக்கு உட்பட்டது. அதற்கு மாறாக, பெரும் திரளானவர்கள் விசயங்களையும், நிகழ்வுகளையும், மக்களையும் வேறு பக்கத்திலிருந்து, அதாவது கீழிருந்து பார்க்கிறார்கள் என்று நான் கூறுவேன். இதன் விளைவாக அவர்களது கண்ணோட்டத்தின் களம்கூட சில குறிப்பிட்ட அளவுக்கு வரம்புக்கு உட்பட்டது. ஒரு பிரச்சினைக்கு முறையான தீர்வைக் கண்டறிய இந்த இரண்டு அனுபவங்களும் இணைக்கப்பட வேண்டும். அதன்பிறகு மட்டும்தான் தலைமையானது சரியானதாக அமையும்.

இதன்பொருள் என்னவென்றால், பெரும் திரளானவர்களுக்குக் கற்பிப்பது மட்டுமல்ல, பெரும் திரளானவர்களிடமிருந்து கற்றுக் கொள்வதும் ஆகும்.

லெனினினுடைய ஆய்வுரையின் சரியான தன்மையை விளக்கிக் கூற இரண்டு எடுத்துக்காட்டுகள்:

இது பல ஆண்டுகளுக்கு முன் நடைபெற்றது. மத்தியக்குழுவின் உறுப்பினர்களாகிய நாம், டோனெட்ஸ் பள்ளத்தாக்கில் உள்ள சூழ்நிலைகளை மேம்படுத்தும் பிரச்சினை பற்றி விவாதித்துக் கொண்டிருந்தோம். கனரகத் தொழில்துறையின் மக்கள் அரசுப்பணி அமைச்சகம் முன்மொழிந்த நடவடிக்கைகள் வெளிப்படையாகவே திருப்தியற்றவைகளாக இருந்தன. மூன்று முறை நாம் அந்த முன்மொழிவுகளை கனரகத் தொழில்துறையின் மக்கள் அரசுப்பணி அமைச்சகத்துக்குத் திருப்பி அனுப்பினோம். மூன்று முறையும் வெவ்வேறு முன்மொழிவுகளை கனரகத் தொழில்துறையின் மக்கள் அரசுப்பணி அமைச்சகத்திலிருந்து நாம் பெற்றோம். ஆனால், அதற்குப் பிறகும் கூட அவற்றை திருப்திகரமானது என்று நம்மால் கருத முடியவில்லை. இறுதியாக நாம் டோனெட்ஸ் பள்ளத்தாக்கிலிருந்து பல தொழிலாளர்களையும், கீழ்நிலை வர்த்தகம் மற்றும் தொழிற்சங்க அலுவலர்களையும் அழைக்க முடிவு செய்தோம்.

இந்தத் தோழர்களோடு நாம் மூன்று நாட்கள் விசயங்களைப் பற்றி விவாதித்தோம். மேலும் மத்தியக்குழுவின் உறுப்பினர்களாகிய நாம் அனைவரும் இந்த சாதாரண தொழிலாளர்களால், இந்த ‘சிறிய மனிதர்’களால் மட்டுமே சரியான தீர்வை நமக்கு ஆலோசனையாகக் கூற முடிந்தது என்பதை ஒப்புக்கொண்டோம். டோனெட்ஸ் பள்ளத்தாக்கில் உள்ள  நிலக்கரி உற்பத்தியை அதிகரிப்பதற்கான நடவடிக்கைகள் பற்றிய மத்தியக்குழு மற்றும் மக்கள் அரசுப்பணி அமைச்சகத்தின் முடிவுகளை நீங்கள் நினைவில் கொண்டிருப்பீர்கள் என்பதில் சந்தேகம் இல்லை. நல்லது. மத்தியக்குழு மற்றும் மக்கள் அரசுப்பணி அமைச்சகத்தின் இந்த முடிவை சரியான மற்றும் குறிப்பிடத்தக்க ஒன்று எனவும், அது அணிகளிலிருந்த சாதாரண மக்களால் நமக்கு ஆலோசனையாக தரப்பட்டது எனவும் நமது அனைத்துத் தோழர்களும் ஒப்புக் கொண்டார்கள்.

இன்னொரு எடுத்துக்காட்டு. தோழர் நிகோலஸ்யென்கோவின் பிரச்சினையை நான் மனதில் கொண்டுள்ளேன். நிகோலஸ்யென்கோ யார்? அவர் கட்சியின் ஓர் அடிமட்ட உறுப்பினர். அந்தப்பெண் ஒரு சாதாரணமான ஒரு ‘சிறிய நபர்’. கீவ்-ல் (கீவ் – உக்ரெய்ன் தலைநகர்) உள்ள கட்சி அமைப்பில் எல்லாமுமே நன்றாக இல்லை என்பதற்கான சமிக்ஞைகளை ஓர் ஆண்டு முழுவதும் கொடுத்துக் கொண்டிருந்தார்; அந்தப் பெண் குடும்ப உணர்வை, தொழிலாளர்களிடம் பண்பற்ற குட்டி முதலாளித்துவ அணுகுமுறையை, சுயவிமர்சனம் ஒடுக்கப்படுவதை, டிராட்ஸ்கிய சீர்குலைவாளர்கள் செல்வாக்குப் பெற்றிருந்ததை அம்பலப்படுத்தினார். ஆனால், அந்தப் பெண் தொடர்ந்து ‘கேடு விளைக்கும் பூச்சி’ என புறந்தள்ளப்பட்டார். இறுதியாக அந்தப் பெண் தரும் தொல்லையில் இருந்து மீள, அவர்கள் அந்தப் பெண்ணை கட்சியில் இருந்து வெளியேற்றினார்கள். கீவ் அமைப்போ அல்லது உக்ரெய்ன் கம்யூனிஸ்ட் கட்சியின் மத்தியக்குழுவோ உண்மையை வெளிச்சத் துக்குக் கொண்டுவர அந்தப் பெண்ணுக்கு உதவவில்லை. கட்சி மத்தியக்குழுவின் தலையீடு மட்டுமே அந்த சிக்கலை அவிழ்க்க உதவியது.

மேலும் அந்தப் பிரச்சினை புலனாய்வு செய்யப்பட்ட பின் என்ன வெளிப்பட்டது? நிகோலஸ்யென்கோ சரியானவர் என்றும், கீவ் அமைப்பு தவறானது என்றும் வெளிப்பட்டது. இதுதான் துல்லியமாகத் தெரியவந்தது. ஆனாலும், நிகொலஸ்யென்கோ என்பவர் யார்? உண்மையில் அந்தப் பெண் மத்தியக் குழுவின் உறுப்பினர் அல்ல, அவர் ஒரு மக்கள் அரசுப்பணி அமைச்சர் அல்ல; அவர் கீவ் வட்டார அமைப்பின் செயலாளர் அல்ல; அவர் கட்சி மையத்தின் செயலாளரும் கூட அல்ல. அவர் கட்சியின் அடிமட்ட உறுப்பினர் மட்டுமே.

நீங்கள் காண்பதுபோல, சில நேரங்களில் சாதாரண மக்கள், சில உயர் நிறுவனங்களைவிட உண்மைக்கு மிக அருகில் தாம் இருப்பதை நிரூபிக்கிறார்கள்.

என்னால் இது போன்ற நூற்றுக்கணக்கான உதாரணங்களை எடுத்துக்காட்ட முடியும். இவ்வாறு, நீங்களே பாருங்கள், நமது அனுபவங்கள் மட்டுமே, தலைவர்களின் அனுபவங்கள் மட்டுமே நமது இலட்சியத்துக்கான தலைமைப் பண்புக்குப் போதுமானவை அல்ல. முறையாக வழி நடத்துவதற்குப் போதுமானதல்ல. முறையாக வழி நடத்துவதற்காக தலைவர்களின் அனுபவங்கள் கட்சி உறுப் பினர்களின் அனுபவங்களோடு, உழைக்கும் வர்க்கத்தின் அனுபவங்க ளோடு, உழைப்போரின் அனுபவங்களோடு, ‘சிறிய மனிதர்கள்’ என்று அழைக்கப்படுவோரின் அனுபவங்களோடு சேர்க்கப்பட வேண்டும்.

ஆனால் இதைச் செய்வதற்கு எப்போது சாத்தியப்படும்?

எப்போது தலைவர்கள் பெரும்திரளான மக்களோடு மிகவும் நெருக்கமாக இணைக்கப்படுகிறார்களோ, எப்போது அவர்கள் கட்சி உறுப்பினர்களோடு, உழைக்கும் வர்க்கத்தோடு விவசாயிகளோடு, உழைக்கும் அறிவுத்துறையினரோடு மிகவும் நெருக்கமாக இணைக்கப்படுகிறார்களோ அப்போது மட்டும்தான் இதைச் செயல்படுத்துவது சாத்தியமாகும்.

பெரும்திரள் மக்களுடனான தொடர்பு, இந்தத் தொடர்பை பலப்படுத்துதல், பெரும்திரளான மக்களின் குரல்களைக் கேட்கும் தயார்நிலை – இங்குதான் போல்ஷ்விக் தலைமையின் பலமும், வெல்லற்கரிய தன்மையும் படிந்திருக்கின்றன.

எவ்வளவு நீண்டகாலம் போல்ஷ்விக்குகள் பரந்த, பெரும் திரளான மக்களுடன் தங்கள் தொடர்புகளை வைத்திருக்கிறார்களோ, அவ்வளவு காலமும் அவர்கள் வெல்லற்கரியவர்களாக இருப்பார்கள் என்பதை நாம் ஒரு விதியாக எடுத்துக் கொள்ளலாம். மேலும் இதற்குமாறாக, எவ்வளவு சீக்கிரம் போல்ஷ்விக்குகள் மக்களிடமிருந்து தங்களைத் துண்டித்துக்கொள்கிறார்களோ, அவர்களது தொடர்புகளை இழந்துவிடுகிறார்களோ அவ்வளவு சீக்கிரம் அவர்கள் அதிகார வர்க்கத் துருவால் மூடப்பட்டு அவர்கள் தங்களது எல்லா வலிமைகளையும் இழந்து வெறும் கேலிக்கூத்தாகிவிடுவார்கள்.

கிரேக்கப் புராணத்தில் மிகவும் கொண்டாடப்பட்ட ஒரு கதாநாயகனாக அண்டாயெஸ் இருந்தான். அந்தப் பழங்கதை இவ்வாறு செல்கிறது: அண்டாயெஸ் கடல்களின் கடவுளான போஸெய்டன் மற்றும் பூமியின் தேவதையான கயீயாவின் மகன். அண்டாயெஸ் தன்னைப் பெற்றெடுத்த, பாலூட்டிய, வளர்த்தெடுத்த தனது தாயிடம் குறிப்பிடத்தக்க வகையில் இணைந்திருந்தவன். இந்த அண்டாயெஸ் வென்றடக்காத நாயகன் எவனும் இல்லை. அவன் வெல்லப்பட முடியாத நாயகனாகக் கருதப்பட்டான். அவனது வலிமை எங்கு படிந்திருந்தது? தனது பகைவனுக்கு எதிரான சண்டையில் ஒவ்வொரு முறையும் அவன் கடுமையாக அழுத்தப்படும்போது அவன், பூமியை, தன்னைப் பெற்றெடுத்துப் பாலூட்டிய தாயைத் தொட்டான். அது அவனுக்குப் புதிய சக்தியை அளித்தது.

ஆனால் அவனிடம் காயம்படத்தக்க ஒரு குறிப்பிட்ட இடம் இருந்தது. ஏதோ ஒரு வகையில் பூமியிலிருந்து பிரிக்கப்பட்டுவிடக் கூடிய ஆபத்து இருந்தது. அவனது பகைவர்கள் இதைக் கணக்கில் எடுத்துக்கொண்டு அதற்காக எதிர்பார்த்துக் கொண்டிருந்தார்கள். ஒருநாள் ஒரு பகைவன் இந்த பலவீனமான குறிப்பிட்ட இடத்தை அனுகூலமாக எடுத்துக் கொண்டு தோன்றினான், அண்டாயெஸ்ஸை வென்றடக்கினான். அவன்தான் ஹெர்குலஸ். எவ்வாறு ஹெர்குலஸ் அண்டாயெஸ்ஸை வென்றடக்கினான்? ஹெர்குலஸ் அண்டா யெஸ்ஸை பூமிக்கு மேலே தூக்கினான். அவனை தற்காலிகமாக பூமியிலிருந்து நீக்கினான், அவன் பூமியைத்தொடுவதிலிருந்து தடுத்தான், அவனைக் குரல்வளையை நெரித்துக் கொன்றான்.

படிக்க :
♦ சீர்குலைவுவாதிகளோடு தொடர்புடையவர்களைக் கையாளுவது எப்படி ? || தோழர் ஸ்டாலின்
♦ வினவு தளத்தின் அனைத்துப் பொறுப்புகளிலிருந்தும் காளியப்பன் நீக்கம் !

போல்ஷ்விக்குகள் கிரேக்கப் புராணக்கதையின் கதாநாயகன் அண்டாயெஸ் -ஐ நினைவுபடுத்துகிறார்கள் என்று நான் கருதுகிறேன். அவர்கள் அண்டாயெஸ் -ஐப் போலவே வலிமை மிக்கவர்கள். ஏனென்றால் தங்களைப் பெற்றெடுத்த, தங்களுக்குப் பாலூட்டிய, தங்களை வளர்த்தெடுத்த தாயுடன், அதாவது பெரும்திரளான மக்களுடன் தங்கள் தொடர்புகளைக் கொண்டிருக்கிறார்கள். எவ்வளவு காலம் தங்கள் தாயுடன் – அதாவது மக்களுடன் தொடர்புகளை அவர்கள் கொண்டிருக்கிறார்களோ அவ்வளவு காலமும் தாங்கள் வெல்லற்கரியவர்களாக விளங்கும் ஒவ்வொரு வாய்ப்பையும் அவர்கள் பெற்றுள்ளார்கள்.

இதுதான் போல்ஷ்விக் தலைமையின் வெல்லற்கரிய தன்மையின் திறவுகோல்.

(தொடரும்)

நூல் : ஜே.வி.ஸ்டாலின் தொகுப்பு நூல்கள் – தொகுதி -14
கிடைக்குமிடம் :
அலைகள் வெளியீட்டகம்
5/1 ஏ, இரண்டாவது தெரு, நடேசன் நகர், இராமாபுரம்,
சென்னை – 600 089
தொடர்புக்கு : 98417 75112

விவாதங்களுக்குப் பதில் உரை

பாகம் – 2

4 ஊழியர்களை சோதித்துப்பார்ப்பது, கடமைகளை நிறைவேற்றியதை சரி பார்ப்பது என்பதன் பொருள் என்ன?

ஊழியர்களை சோதித்துப் பார்ப்பது என்பது அவர்களது உறுதி மொழிகளையும், அறிவிப்புகளையும் கொண்டு அல்ல, அவர்களது வேலைகளின் முடிவுகளைக் கொண்டுதான்.

கடமைகளை நிறைவேற்றியதைச் சோதித்துப் பார்ப்பது என்பது வழக்கமாக அறிக்கைகளின் மூலம் சரிபார்ப்பதும் சோதிப்பதும் மட்டுமல்ல, முதன்மையாக வேலை செய்யும் இடத்தில் கிடைக்கும் சரியான முடிவுகளின் அடிப்படையில்தான்.

இத்தகைய சோதித்துப் பார்ப்பதும், சரிபார்ப்பதும் தேவைதானா? சந்தேகத்துக்கு இடமில்லாமல் இது தேவைப்படுகிறது. முதலாவதாக, இத்தகைய சோதித்துப் பார்ப்பதும், சரிபார்ப்பதும்தான் அந்தத் ஊழியரைப் பற்றி  நாம் அறிந்து கொள்ளவும், அவரது உண்மையான தகுதிகளை நாம் நிர்ணயிப்பதற்கும் தேவைப்படுகிறது. இரண்டாவதாக, இத்தகைய சோதனையிடலும், சரிபார்த்தலும் மட்டுமே இந்த நிர்வாக இயந்திரத்தின் நிறைகளையும், குறைபாடுகளையும் நிர்ணயிக்கத் தேவைப்படுகிறது. மூன்றாவதாக, இத்தகைய சோதனை யிடலும், சரிபார்த்தலும் மட்டுமே நிர்ணயிக்கப்பட்ட கடமைப் பொறுப்பின் நிறைகளையும், குறைபாடுகளையும் நிர்ணயிக்க நமக்குத் தேவைப்படுகிறது.

சில தோழர்கள் ஊழியர்களைச் சோதித்துப் பார்ப்பது மேலிருந்து மட்டுமே செய்யப்பட வேண்டும், அப்போது தங்கள் வேலைகளின் முடிவுகளால் வழிகாட்டப்பட்ட தலைவர்கள் அவர்களைச் சோதித்துப் பார்க்க முடியும் என்று கருதுகிறார்கள். ஊழியர்களைச் சோதித்துப் பார்ப்பதற்கும், கடமைகளை நிறைவேற்றியதைச் சரிபார்ப்பதற்கும் மேலிருந்து சோதித்துப் பார்ப்பது ஆற்றல் வாய்ந்த நடவடிக்கைகளில் ஒன்று என்பது உண்மைதான். ஆனால், மேலிருந்து சோதித்துப் பார்ப்பது சோதித்துப் பார்க்கும் ஒட்டுமொத்த செயல்பாடுகளையும் சாத்தியமற்றதாக்கி விடுகிறது. இங்கு இன்னொரு வகையான சோதித்துப்பார்க்கும் முறையும் உள்ளது. அதுதான் கீழிருந்து சோதித்துப்பார்ப்பது. மக்கள் தங்களுக்கு வழிகாட்டும் தலைவர்களைச் சோதித்துப் பார்க்கும்போது, அவர்களுடைய தவறுகளில் கவனம் செலுத்துகிறார்கள். அந்தத் தவறுகள் எவ்வாறு சரிசெய்யப்பட வேண்டும் என்பதையும் குறிப்பிடுகிறார்கள். இந்த வகையான சோதித்துப் பார்க்கும் முறை ஊழியர்களைச் சோதித்துப் பார்க்கும் ஆற்றல் வாய்ந்த வழிமுறைகளில் ஒன்றாகும்.

கட்சி உறுப்பினர் தனது தலைவர்களை, கட்சிச் செயல்பாடுகளில், கூட்டங்களில் மாநாடுகளில், கட்சிப் பேரவைகளில் அவர்களது அறிக்கைகளைக் கேட்டு, குறைபாடுகளை விமர்சனம் செய்து மற்றும் இறுதியாக, கட்சியின் தலைமை அமைப்புகளுக்கு அந்தத் தோழர் களைத் தேர்வுசெய்து அல்லது தேர்ந்தெடுக்காமல் இருப்பது ஆகியவற்றின் மூலம் சோதித்துப் பார்க்கிறார்கள். நமது கட்சியின் விதிகள் கோருவது போல ஜனநாயக மத்தியத்துவத்தை மிகக் கறாராகக் கடைப்பிடிப்பதால் நமது கட்சி அமைப்புகளுக்கான கடப்பாடாக உள்ள தேர்தலில் வேட்பாளர்களை முன்மொழியவும், ஆட்சேபிக்கவும் உள்ள உரிமை, இரகசிய வாக்குச்சீட்டு, விமர்சனம் மற்றும் சுய விமர்சன உரிமை – இவை எல்லாம் மற்றும் இவை போன்றவையுமான நடவடிக்கைகள் மற்ற பிறவற்றோடு சோதித்துப்பார்க்கவும் கட்சித்தலைவர்கள் கட்சி உறுப்பினர்களின் கட்டுப்பாட்டில் இருக்கவும் வேண்டும். இது கட்டாயம் செயல்படுத்தப்பட வேண்டும்.

கட்சி சாராத மக்கள் தங்களுடைய வர்த்தக, தொழிற்சங்க மற்றும் பிற தலைவர்களை, கட்சிசாராத நடவடிக்கைக் கூட்டங்களில், எல்லாவகையான மக்களின் மாநாடுகளில் தங்கள் தலைவர்களின் அறிக்கைகளைக் கேட்டு, அவற்றின் குறைபாடுகளை விமர்சனம் செய்து, அந்தக் குறைபாடுகளை எந்தவகையில் நிவர்த்தி செய்யலாம் என்பதைச் சுட்டிக்காட்டி சோதித்துப் பார்க்கிறார்கள்.

இறுதியாக, மக்கள் நாட்டின் தலைவர்களை, சோவியத் ஒன்றியத்தின் அரசு அமைப்புகளின் தேர்தல்களின்போது அனைவருக்குமான, சரிசமமான, நேரடி மற்றும் இரகசிய வாக்குரிமையின் மூலம் சோதித்துப் பார்க்கிறார்கள்.

இங்குள்ள கடமை என்னவென்றால், மேலிருந்து சோதித்துப் பார்ப்பதை, கீழிருந்து சோதித்துப் பார்ப்பதுடன் இணைப்பதுதான்.

5 தங்களது சொந்தத் தவறுகளிலிருந்து ஊழியர்களுக்குக் கற்பிப்பது என்பதன் பொருள் என்ன?

கட்சியின் தவறுகளை உளச்சான்றுகளுக்கு கட்டுப்பட்டு அம்பலப்படுத்துதல், இத்தகைய தவறுகள் எழுவதற்கான காரணங்களை ஆய்வு செய்தல், இந்தத் தவறுகளை நிவர்த்தி செய்வதற்கான வழிகளைச் சுட்டிக்காட்டுதல் ஆகியவை கட்சி ஊழியர்களை முறையாகப் பயிற்றுவிப்பதற்கும், கற்றுத் தருவதற்கும், உழைக்கும் வர்க்கத்துக்கும், உழைக்கும் மக்களுக்கும் முறையாகப் பயிற்றுவிப்பதற்கும், கற்றுத் தருவதற்குமான உறுதியான வழிமுறைகளில் ஒன்று என லெனின் நமக்குக் கற்பித்தார். லெனின் கூறுகிறார்:

• “ஓர் அரசியல் கட்சியானது தனது சொந்தத் தவறுகளை நோக்கிக்கொண்டுள்ள மனப்பாங்குதான் அந்தக் கட்சியின் பொறுப்புமிக்க தன்மை பற்றிய மிகவும் முக்கியமானதும், உறுதியானதுமான – மேலும் அது தனது வர்க்கத்துக்கும், உழைக்கும் மக்களுக்குமான கடமைகளை எவ்வாறு நிறைவேற்றுகிறது என்பதற்குமான அளவுகோலாகும். தவறுகளை வெளிப்படையாக ஒத்துக் கொள்வது, அதற்கான காரணங்களை வெளிப்படுத்துவது, அத்தகைய தவறுகள் ஏற்படக் காரணமான சூழ்நிலைகளைப் பகுப்பாய்வு செய்வது, அவற்றை சரிப்படுத்து வதற்கான வழிமுறைகளைக் கவனமாக ஆய்வுசெய்வது – இவை தான் ஒரு பொறுப்புமிக்க கட்சியின் அடையாளங்கள்; இது, அதன் கடமைகளைச் செய்வதை அர்த்தப்படுத்துகிறது, இது, வர்க்கத்துக்கும், அதன் பின் மக்களுக்கும் கற்பிப்பதையும், பயிற்சி அளிப்பதையும் அர்த்தப்படுத்துகிறது.” இதன் பொருள், நம்மிடையே அடிக்கடி நிகழ்வதுபோல், தங்களுடைய தவறுகளை குறைத்துக்காட்டி, மாயத்தோற்றத்தை உருவாக்குவது அல்ல, தங்களுடைய தவறுகளை ஒப்புக்கொள்வதிலிருந்து நெளிவுசுளிவாக இருப்பது அல்ல. ஆனால், நேர்மையாகவும், வெளிப்படையாகவும் தங்கள் தவறுகளை ஒப்புக்கொள்வதும், இந்தத் தவறுகள் எவ்வாறு திருத்தப்படலாம் என்பதற்கான வழியை நேர்மையாகவும், வெளிப்படையாகவும் சுட்டிக்காட்டுவதும், தங்கள் தவறுகளை நேர்மையாகவும், வெளிப்படையாகவும் திருத்திக் கொள்வதும்தான் போல்ஷ்விக்குகளின் கடமை.”

நமது தோழர்களில் பலர் இதை மகிழ்வுடன் செய்வதற்கு ஒப்புக்கொள்வார்கள் என்று என்னால் கூறமுடியாது. ஆனால், போல்ஷ்விக்குகள், அவர்கள் உண்மையிலேயே போல்ஷ்விக்குகளாக இருக்க விரும்பினால், தங்கள் தவறுகளை வெளிப்படையாக ஒப்புக்கொள்வதற்கான, அதற்கான காரணங்களைக் கூறுவதற்கான, எந்தவகையில் அவை திருத்தப்படலாம் என்பதைச் சுட்டிக்காட்டுவதற்கான தைரியத்தைக் கட்டாயம் பெற்றிருக்க வேண்டும். மற்றும் அந்தவகையில் கட்சி அணிகளுக்கு முறையான பயிற்சியையும், முறையான அரசியல் கல்வியையும் தருவதற்கு கட்சிக்கு உதவ வேண்டும். ஏனென்றால் இந்த ஒருவழியில் மட்டுமே, வெளிப்படையான மற்றும் நேர்மையான சுயவிமர்சன சூழலில் மட்டும்தான் உண்மையான போல்ஷ்விக் ஊழியர்களுக்கு, உண்மையான  போல்ஷ்விக் தலைவர்களுக்கு கற்றுத்தருவது சாத்தியமாகும்.

லெனினின் கோட்பாட்டின் சரியான தன்மையை விளக்க இரண்டு எடுத்துக்காட்டுகள்:

உதாரணத்துக்கு, கூட்டுப்பண்ணைக் கட்டமைப்பில் உள்ள நமது தவறுகளை எடுத்துக்கொள்ளுங்கள். 1930இல் மிகவும் சிக்கலான பிரச்சினையாக இருந்து வந்த விவசாயத்தை, கூட்டுப்பண்ணைக் கட்டமைப்புக்குள் மூன்று அல்லது நான்கு மாதங்களுக்குள் மாற்றுவதைத் தங்களால் நிறைவேற்ற முடியும் என்று நமது கட்சித்தோழர்கள் நினைத்ததையும், அப்போது கட்சியின் மத்தியக்குழு மிகவும் அதீத ஆர்வம் கொண்ட இந்தத் தோழர்களை கட்டுப்படுத்துவது தனது கடமை என்று கண்டறிந்ததையும் நீங்கள் நினைவில் கொண்டிருப்பீர்கள் என்பதில் சந்தேகம் இல்லை. அது நமது கட்சி வாழ்வில் மிகவும் ஆபத்தான காலகட்டங்களில் ஒன்று.

நமது கட்சித் தோழர்கள் கூட்டுப் பண்ணையை விருப்பார்ந்த இயல்பில் கட்டமைக்க வேண்டும் என்பதையும், நிர்வாக அழுத்தத்தின் காரண மாக விவசாயக் கூட்டுப்பண்ணை பாதைக்கு மாற்றப்படக் கூடாது என்பதையும் மறந்துவிட்டதுதான் தவறாகிப்போனது. கூட்டுப் பண்ணைக் கட்டமைப்புக்குத் தேவையானது சில மாதங்கள் அல்ல, மிகவும் கவனமாகவும், ஆழ்ந்து சிந்தித்த வேலைகளையும் கொண்ட ஆண்டுகள் தேவைப்படும் என்பதையும் அவர்கள் மறந்துவிட்டார்கள். இதைப்பற்றி அவர்கள் மறந்து விட்டார்கள். மேலும், தங்களது தவறுகளை ஒப்புக்கொள்ளவும் மறுத்துவிட்டார்கள்.

தோழர்களுக்கு மத்தியக்குழு, வெற்றியில் தலைசுற்றி மயங்குவது பற்றிய குறிப்பையும், மாவட்டங்களில் உள்ள தோழர்களுக்கு, உண்மையான சூழ் நிலைகளைப் புறக்கணித்து மக்களுக்கு முன்னே தீவிரமாக சென்றுவிட வேண்டாம் என்று அளித்த எச்சரிக்கையும் நமது தோழர்களால் வெறுப்புணர்வுடனேயே பார்க்கப்பட்டன என்பதை நீங்கள் நினைவில் வைத்திருப்பீர்கள் என்பதில் சந்தேகம் இல்லை. ஆனால், இது மத்தியக்குழுவை இந்த நீரோட்டத்துக்கு எதிராகச் செல்வதிலிருந்தும், நமது கட்சித்தோழர்களை சரியான பாதைக்கு திருப்புவதிலிருந்தும் தடுக்கவில்லை. நல்லதுதானே? நமது கட்சித் தோழர்களை சரியான பாதைக்கு திருப்பியதன் மூலம் கட்சி தனது நோக்கத்தை நிறைவேற்றி விட்டது என்பது ஒவ்வொருவருக்கும் இப்போது தெளிவாகியிருக்கும். இப்போது நாம் கூட்டுப்பண்ணை கட்டுமானத்துக்காக, கூட்டுப் பண்ணை தலைமைக்காக பல்லாயிரக்கணக்கான அற்புதமான விவசாய ஊழியர்களைப் பெற்றுள்ளோம். இந்த அணியினர் 1930-ன் தவறுகளிலிருந்து கற்பிக்கப்பட்டவர்கள், பயிற்சி அளிக்கப்பட்டவர்கள். ஆனால், கட்சி அப்போது தனது தவறுகளை உணர்ந்து கொள்ளாமல் இருந்திருந்தால், அவற்றை அது உரியகாலத்தில் திருத்தியிருக்காமல் இருந்திருந்தால், இன்று நாம் பெற்றிருக்கும் இந்த ஊழியர்களைப் பெற்றிருக்க முடியாது.

இன்னொரு உதாரணம், தொழில்துறைக் கட்டுமானத்தின் தளத்திலிருந்து எடுக்கப்பட்டது. நான் ஷக்டி சீர்குலைவு காலத்தின் நமது தவறுகளை எனது மனதில் கொண்டிருக்கிறேன். நமது தவறுகளாக இருந்தவை: தொழில்துறையில் நமது ஊழியர்களின் தொழில்நுட்ப பிற்போக்குத்தன்மையை நாம் முழுதும் அறிந்திருக்கவில்லை. நாம் இந்தப் பிற்போக்குத்தன்மையை நீக்கிக்கொள்ளவில்லை. நம்மிடம் வெறுப்புணர்வு கொண்டுள்ள நிபுணர்களின் உதவியோடு விரிவான சோசலிசத் தொழில்துறைக் கட்டமைப்பை நம்மால் வளர்க்க முடியும் என்று நாம் நினைத்தோம்.

முதலாளித்துவ நிபுணர்களோடு இணைக்கப்பட்டிருந்த மோசமான மக்கள் அரசுப்பணி அமைச்சர்கள் என்ற பாத்திரத்தை நமது வர்த்தக ஊழியர்களுக்கு தண்டனையாக்கி விட்டோம். அந்த நேரத்தில் நமது வர்த்தக ஊழியர்கள் தங்களது தவறுகளை எவ்வளவு மனமின்றி ஒத்துக் கொண்டார்கள் என்பதை, எவ்வளவு விருப்பமின்றி தங்களது தொழில்நுட்ப பிற்பட்ட தன்மையை ஒப்புக்கொண்டார்கள் என்பதை, மேலும் எவ்வளவு மெதுவாக, ‘தொழில் நுட்பத்தில் தேர்ச்சி கொள் என்ற முழக்கத்தை அவர்கள் தங்களுக்குள் உள்வாங்கிக்கொண்டார்கள் என்பதை நீங்கள் அறிவீர்கள். அது நல்லதுதானே? ‘தொழில் நுட்பத்தில் தேர்ச்சிகொள்’ என்ற முழக்கம் நல்ல பயனைத் தந்தது, நல்ல விளைவுகளை உருவாக்கியது என்பதை உண்மைகள் காட்டுகின்றன.

இப்போது நாம் அற்புதமான பல நூற்றுக்கணக்கான, பல ஆயிரக்கணக்கான போல்ஷ்விக் வர்த்தக ஊழியர்களைப் பெற்றுள் ளோம், அவர்கள் ஏற்கெனவே தொழில்நுட்பங்களில் தேர்ச்சி பெற்றவர்கள். நமது தொழில்துறையை முன்னெடுத்துச் செல்பவர்கள். ஆனால், தங்களுடைய தொழில்நுட்ப பிற்பட்ட தன்மையை ஒப்புக்கொள்ளாத வர்த்தக ஊழியர்களின் பிடிவாதத்தன்மைக்கு நமது கட்சி பலியாகியிருக்குமானால், அவர்களுடைய தவறுகளை நமது கட்சி அவ்வப்போது உணர்ந்து கொள்ளாமல் இருந்திருக்குமானால், மேலும் அவர்களது தவறுகளை உரிய காலத்தில் திருத்தாமல் இருந் திருக்குமானால் இப்போது இத்தகைய ஊழியர்களை நாம் பெற்றிருக்க முடியாது.

சிலதோழர்கள், நமது தவறுகளைப்பற்றி வெளிப்படையாகப் பேசுவது உகந்ததல்ல, வெளிப்படையாக நமது தவறுகளை ஒப்புக் கொள்வது நமது பலவீனம் என்று நமது எதிரிகளால் உய்த்துணரப்பட்டுவிடும். மேலும் அது, அவர்களால் பயன்படுத்திக் கொள்ளப் படும், என்று கூறுகிறார்கள். அது முட்டாள்தனம், தோழர்களே. நெறியற்ற முட்டாள்தனம். அதற்கு மாறாக நமது தவறுகளை வெளிப்படையாக ஒப்புக்கொள்வதும், அந்தத் தவறுகளை மிகவும் நேர்மையாக திருத்திக்கொள்வதும் மட்டும்தான் நமது கட்சியைப் பலப்படுத்தும், நமது கட்சியின் நன்மதிப்பை தொழிலாளர்கள், விவசாயிகள், உழைக்கும் அறிவுத்துறையினர் பார்வையில் உயர்த்தும், நமது அரசின் வலிமையையும், ஆற்றலையும் அதிகப்படுத்தும். மேலும் அதுதான் முக்கிய விசயம். தொழிலாளர்களும், விவசாயி களும், உழைக்கும் அறிவுத்துறையினரும் நம்மோடு இருந்தால், எஞ்சியுள்ள அனைத்தும் வந்தே தீரும்.

படிக்க :
♦ மூவர் கும்பலின் வலது விலகலை எதிர்ப்போம் || தோழர் ஸ்டாலின்
♦ ‘புரட்சிகர’ சதிகாரர்களின் ரிஷி மூலம் !

வேறுசில தோழர்கள், ‘நமது தவறுகளை வெளிப்படையாக ஒத்துக்கொள்வது நமது ஊழியர்களுக்குப் பயிற்சி அளிப்பதற்கும், பலப்படுத்துவதற்கும் வழியமைக்காது, ஆனால், அவர்கள் பலவீனம் அடையவும், தொல்லைப்படவும் செய்துவிடும். எனவே நாம் கட்டாயம் அதை ‘விட்டுவைத்து’ நமது அணியினர் மீது கவனம் செலுத்த வேண்டும். நாம் கட்டாயம் அவர்களது சுய மதிப்பையும், மன அமைதியையும் பாதுகாக்க வேண்டும்’ என்று கூறுகிறார்கள். ஆகையால் அவர்கள் நமது தோழர்களின் தவறுகள் மீது நெளிவு சுளிவாக இருக்கவேண்டும், விமர்சனத்தை தளர்த்தவேண்டும், இன்னும் சிறப்பாக இந்தத் தவறுகளைப் புறக்கணிக்க வேண்டும் என்று முன்மொழிகிறார்கள். இத்தகைய போக்கு யாரை இவர்கள் விட்டு வைக்கவும்’, ‘கவனம் செலுத்தவும்’ வேண்டும் என்கிறார்களோ அந்த ஊழியர்களுக்கு நாம் செய்யும் தீவிரமான தவறு மட்டுமல்ல, உச்சகட்ட ஆபத்துமாகும்.

எல்லாவற்றுக்கும் மேலாக, ஆபத்தான தாகும். அவர்களது தவறுகளை நெளிவுசுளிவாக மூடிமறைப்பதன் மூலம் அந்த ஊழியர்களைப் பாதுகாப்பதும்’, ‘கவனம் செலுத்துவதும்’ என்பதன் பொருள் இந்த அதே ஊழியர்களை மிக உறுதியாகக் கொல்வதாகும். நாம் 1930-களின் தவறுகளை அம்பலப்படுத்தி இருக்காவிட்டால், இந்தத் தவறுகளைப்பற்றி அவர்களுக்குக் கற்றுத் தந்திருக்காவிட்டால் தொழிற்துறை போல்ஷ்விக்குகளை நாம் உறுதியாகக் கொன்றிருப்போம். ஷக்டி சீர்குலைவு காலகட்டத்தில் நமது தோழர்களின் தவறுகளை நாம் அம்பலப்படுத்தியிருக்கா விட்டால், இந்தத் தவறுகள் பற்றி நமது தொழில்துறை ஊழியர்களுக்கு கற்றுத் தந்திருக்காவிட்டால், நாம் உறுதியாகத் தொழில்துறை போல்ஷ்விக் ஊழியர்களைக் கொன்றிருப்போம். நமது தோழர்களின் தவறுகளை நெளிவுசுளிவாக மூடிமறைத்து அவர்களைப் பாதுகாக்கவும், சுயமதிப்பைக் காப்பாற்றவும் யார் எப்பொழுது முயற்சித்தாலும், அந்த ஊழியர்களையும், அவர்களது சுயமதிப்பையும் கொல்கிறார்கள். அவர்களது தவறுகளை மூடிமறைப்பதன் மூலம் அவர்கள் புதிய இன்னும் அபாயகரமான தவறுகளைச் செய்ய உதவுகிறார்கள். அவை ஒட்டு மொத்த ஊழியர்களையும் உடைந்து போகவும், அவர்களது சுயமதிப்பும், மன அமைதியும் குறைந்து போகவே வழிவகுக்கும்.

(தொடரும்)

நூல் : ஜே.வி.ஸ்டாலின் தொகுப்பு நூல்கள் – தொகுதி -14
கிடைக்குமிடம் :
அலைகள் வெளியீட்டகம்
5/1 ஏ, இரண்டாவது தெரு, நடேசன் நகர், இராமாபுரம்,
சென்னை – 600 089
தொடர்புக்கு : 98417 75112

விவாதங்களுக்குப் பதில் உரை

பாகம் – 1

5 மார்ச், 1937

தோழர்களே,

எனது அறிக்கையில் நாம் விவாதித்துக் கொண்டிருக்கும் பொருளின் முக்கியமான பிரச்சினைகளை நான் பகிர்ந்திருக்கிறேன். இந்த விவாதங்கள் நம்மிடையே இப்போது முழுமையான தெளிவை ஏற்படுத்தியிருப்பதைக் காட்டுகின்றன. அதாவது நம் கடமைகளைப் புரிந்துகொண்டிருக்கிறோம், நமது வேலைகளில் உள்ள குறைபாடுகளை அகற்றத் தயாராக உள்ளோம். ஆனால் இந்த விவாதங்கள், நமது அமைப்பு சார்ந்த மற்றும் அரசியல் நடைமுறைகள் சார்ந்த பல்வேறு உறுதியான பிரச்சினைகள் இங்கே உள்ளன. அவற்றின் மீது இன்னும் முழுமையான மற்றும் தெளிவான புரிதல்கள் இல்லை என்றும் காட்டுகின்றன. அத்தகைய ஏழு பிரச்சினைகளை நான் கணக்கிட்டுள் ளேன்.

இந்தப் பிரச்சினைகள் பற்றி சில வார்த்தைகள் பேச என்னை அனுமதியுங்கள்.

1 பொருளாதார செயல்பாடுகளால் அதிகமாக உள்வாங்கப்பட்டு, பொருளாதார வெற்றிகளால் எடுத்துச் செல்லப்பட நம்மை நாமே அனுமதித்துக் கொள்ளும்போது, கட்சியின் அரசியல் பிரச்சினைகள் குறைத்து மதிப்பிடப்படுவதும், மறக்கப்படுவதும் ஒரு முட்டுச் சந்துக்கு இட்டுச்செல்கின்றன என்பதை ஒவ்வொருவரும் புரிந்து கொண்டுள்ளார்கள், உணர்கிறார்கள் என்பதை நாம் கட்டாயம் அனுமானித்தாக வேண்டும். இதன் விளைவாக கட்சி ஊழியர்களின் கவனம் கட்சியின் அரசியல் பிரச்சினைகளின் திசையில் கட்டாயம் திரும்ப வேண்டும். அதனால் பொருளாதார வெற்றிகள் கட்சியின் அரசியல் வேலைகளோடு இணைந்து பக்கம் பக்கமாக முன்செல்லும்.

கட்சியின் அரசியல் வேலையை வலுப்படுத்தும் கடமைப் பொறுப்பும், சிறிய பொருளாதாரச் செயல்பாடுகளிலிருந்து கட்சி அமைப்புகளை விடுவிக்கும் கடமைப் பொறுப்பும் நடைமுறையில் எவ்வாறு மேற்கொள்ளப்படும்? விவாதங்களிலிருந்து தெரியவருவது போல் சில தோழர்கள் பொருளாதார வேலைகளை இப்போது முழுவதுமாக கைவிட வேண்டும் என்று தவறான முடிவை வரைவதற்கு கருத்து கொண்டுவிட்டார்கள். எல்லா நிகழ்வுகளிலும் அங்கே குரல்கள் எழுகின்றன. அவை கூறுவது: ‘நல்லது. இப்போது கடவுளுக்கு நன்றி. நாம் பொருளாதார விவகாரங்களிலிருந்து விடுவிக்கப்பட்டு விடுவோம், இப்போது நம்மால் நமது கவனத்தை கட்சி வேலைகளுக்கு அர்ப்பணிக்க முடியும்.’ இந்த முடிவு சரியானதுதானா? இல்லை. அது சரியானதல்ல.

படிக்க :
♦ கட்சித் தலைமை பற்றிய பிரச்சினைகள் || தோழர் ஸ்டாலின்
♦ புரட்சிக்குப் போதுமானதாக கட்சி நிறுவனம் இருக்க வேண்டும் ! | லெனின்

நமது தோழர்கள் பொருளாதார வெற்றிகளால் இழுத்துச் செல்லப்பட்டபோது அவர்கள் அரசியலைக் கைவிட்டார்கள். இது இறுதி எல்லைக்குக் கொண்டு சென்றது. அதற்காக நாம் கடுமையான விலை தர வேண்டியதாயிற்று. இப்போது சில தோழர்கள் கட்சியின் அரசியல் வேலைகளை வலுப்படுத்தும் வேலையில் ஈடுபடுத்திக்கொள்ளும் போது பொருளாதார வேலைகளைக் கைவிட நினைப்பது இன்னொரு இறுதி எல்லைக்குச் செல்வதாகும். இதற்காக நாம் குறைவாக அல்ல, கடுமையான விலையைத் தரவேண்டியிருக்கும். அரசியல், பொருளாதாரத்திலிருந்து பிரிக்கப்பட முடியாதது. நம்மால் அரசியலைக் கைவிட முடிந்ததைவிட இனி மேலும் பொருளாதாரத்தைக் கைவிட முடியாது. ஆய்வுகளின் வசதிக்காக மக்கள் வழக்கமாக ஆராய்ச்சிமுறைகளின்படி பொருளாதாரத்தின் பிரச்சினைகளை அரசியல் பிரச்சினைகளிலிருந்து பிரிக்கிறார்கள். ஆனால் இது ஆராய்ச்சி வழிமுறைகளுக்காக மட்டுமே செய்யப்படுகிறது.

உண்மை வாழ்வில் எப்படியிருந்தாலும், நடைமுறையில் அரசியல், பொருளாதாரத்திலிருந்து பிரிக்கப்பட முடியாதது. அவை ஒன்றாகவே நிகழ்கின்றன, ஒன்றாகவே செயல்படுகின்றன. மேலும் நமது நடைமுறை வேலைகளில் யார் ஒருவர் பொருளாதாரத்தை அரசியலிலிருந்து பிரிக்க நினைக்கிறாரோ, அரசியல் வேலையைக் கைவிட்டு பொருளாதாரத்தை வலுப்படுத்த நினைக்கிறாரோ அல்லது அதற்குமாறாக, பொருளாதார வேலைகளைக் கைவிட்டு அரசியல் வேலையை வலுப்படுத்த நினைக்கிறாரோ, அவர் தவிர்க்க முடியாமல் தன்னை முட்டுச்சந்துக்குள் காண்பார்.

சின்னஞ்சிறு பொருளாதார நடவடிக்கைகளிலிருந்து கட்சியை விடுவிப்பது மற்றும் கட்சியின் அரசியல் வேலையை அதிகரிப்பது என்ற நகல் தீர்மானத்தின் பொருள் நாம் பொருளாதார வேலைகளையும், பொருளாதாரத் தலைமையையும் கைவிட்டுவிட வேண்டும் என்பதல்ல. ஆனால் இனிமேலும் வெறுமனே நமது கட்சி அமைப்புகளை வர்த்தக அமைப்புகளுக்கு மாற்றாக வைக்க அனுமதிக்கக் கூடாது; குறிப்பாக நிலம் சார்ந்த துறைகளில் மற்றும் தனிப்பட்ட பொறுப்புகளை அவர்களிடமிருந்து எடுத்துவிட வேண்டும். அதைத் தொடர்ந்து வர்த்தக அமைப்புகளை வழிநடத்தும் போல்ஷ்விக் வழிமுறைகளை நாம் கற்றுக் கொள்ள வேண்டும். அவை இந்த அமைப்புகளுக்கு திட்டமிட்டபடி முழு நிறைவாக உதவும், திட்டமிட்டபடி முழு நிறைவாக அவற்றைப் பலப்படுத்தும். இந்த அமைப்புகளின் தலைவர்கள் மூலமாக அல்ல, அவற்றின் செயல்படு முறை மூலமாக இந்த வர்த்தக அமைப்புகளை பொருளாதாரத்துக்கு வழிகாட்ட முறையாக வலப்படுத்தும் முறையாக உதவிடும் போல்சவிக் வழிமுறையை நாம் கற்க வேண்டும்.

நாம் வர்த்தக அமைப்புகளுக்கும், முதன்மையாக நிலம் சார்ந்த அமைப்புகளுக்கும் சிறந்த நபர்களைத் தரவேண்டும். இந்த அமைப்புகளில் உள்ள அலுவலர் பணியிடங்களை சிறந்தவகையான புதிய தொழிலாளர்களைக் கொண்டு நிரப்பவேண்டும். அவர்கள் தங்களிடம் ஒப்படைக்கப்பட்ட கடமைகளை நிறைவேற்றக் கூடியவர்களாக இருக்க வேண்டும். இதைச் செய்து முடித்த பிறகு மட்டும்தான் நாம் கட்சி அமைப்புகளை சிறிய பொருளாதார விசயங்களிலிருந்து முற்றிலும் விடுவிப்பது பற்றி கணக்கிடலாம். உண்மையில் இது ஒரு கருத்தூன்றிச் செய்யப்படவேண்டிய விசயம். மேலும் அதற்கு ஒரு குறிப்பிட்ட நேரமும் தேவைப்படும். ஆனால் இதைச் செய்து முடிக்கும் வரை கட்சி அமைப்புகள் ஒரு குறுகிய காலத்துக்கு மிக நெருக்கமாக இருந்து உழவு, விதைப்பு, அறுவடை முதலான எல்லாச் செயல்களையும் தொடர வேண்டியிருக்கும்.

2 சீர்குலைவாளர்கள், திசைதிருப்புவோர், உளவாளிகள் முதலானவர்கள் பற்றி இரண்டு வார்த்தைகள் : இன்றைய நாள் சீர்குலைவாளர்கள் மற்றும் திசைதிருப்புவோர், அவர்கள் எத்தனை மாறுவேடமிட்டு வந்தாலும் டிராட்ஸ்கியர்களோ அல்லது புகாரினியர்களோ, தொழிலாளர் இயக்கத்தில் ஓர் அரசியல் போக்காக இருந்ததிலிருந்து மிக முன்பே நீங்கி, அவர்கள் தொழில்முறை சீர்குலைவாளர்களாக, திசைதிருப்புவோராக, உளவாளிகளாக மற்றும் கொலைகாரர்களாக மாறிவிட்டார்கள் என இப்போது ஒவ்வொருவரும் தெளிவாகி விட்டார்கள் என்று நான் கருதுகிறேன். உண்மையில் இந்தக் கனவான்கள் ஈவிரக்கமின்றி அடித்து நொறுக்கப்பட்டு, உழைக்கும் வர்க்கத்தின் எதிரிகள், நமது நாட்டுக்குத் துரோகம் செய்தவர்கள் என்ற முறையில் வேருடன் பிடுங்கி எறியப்பட வேண்டும். இது, தெளிவானதும், எந்தவொரு கூடுதல் விளக்கங்களும் தேவைப்படாததாகும்.

ஆனால், கேள்விகள் எழுகின்றன : ‘ஜப்பானிய – ஜெர்மானிய டிராட்ஸ்கிய கையாட்களை அடித்துத் துவைத்து வேருடன் பிடுங்கி எறியும் கடமையை எவ்வாறு நடைமுறையில் நிறைவேற்றுவது?

உண்மையான டிராட்ஸ்கியர்களை மட்டுமல்ல, ஆனால் யார் சில நேரங்களில் அல்லது மற்ற நேரங்களில் டிராட்ஸ்கியத்தின் திசையில் ஊசலாடி, அதன்பின் நீண்டகாலத்துக்கு முன்பே டிராட்ஸ்கியத்தைக் கைவிட்டார்களோ அவர்களையும், யார் உண்மையில் டிராட்ஸ்கிய சீர்குலைவு கையாட்களோ அவர்களை மட்டுமின்றி, சில நேரங்களில் சில ட்ராட்ஸ்கியர்கள் நடந்து சென்ற வீதிவழியே ஒரேநேரத்தில் நடந்து சென்றவர்களையும் கூட அடித்து நொறுக்கி வேருடன் கலைய வேண்டும் என்று அர்த்தமா? எல்லா நிகழ்வுகளிலும் இந்தக் கூட்டுக் கூட்டத்தில் இத்தகைய குரல்கள் கேட்டன. இந்தத் தீர்மானத்துக்கான இத்தகைய விளக்கம் சரிதானா? இல்லை. அதைச் சரியானதாகக் கருதமுடியாது. மற்ற எல்லாவற்றிலும் போலவே, இந்த விசயத்திலும் ஒரு தனிப்பட்ட வேறுபாடு கண்டறியும் அணுகுமுறை தேவை. உங்களால் ஒவ்வொன்றையும் அதே அளவுகோலால் அளவிட முடியாது. அத்தகைய ஒட்டு மொத்த அணுகுமுறை உண்மையான ட்ராட்ஸ்கிய சீர்குலைவாளர்கள் மற்றும் உளவாளிகளுக்கு எதிரான போராட்டத்துக்கு ஊறு விளைவித்துவிடும்.

நமது பொறுப்புமிக்க தோழர்களிடையே ஒரு குறிப்பிட்ட எண்ணிக்கையிலான முன்னாள் டிராட்ஸ்கியர்கள் இருக்கிறார்கள். அவர்கள் நீண்டகாலத்துக்கு முன்பே டிராட்ஸ்கியத்தைக் கை விட்டவர்கள். டிராட்ஸ்கியத்தை எதிர்த்து, டிராட்ஸ்கியத்தின்பால் ஒருபோதும் அலைபாயாத மதிப்புக்குரிய நமது தோழர்களைவிட, குறைவாக அல்ல, உண்மையில் மிகக்கடுமையாகப் போராடுகிறார்கள். அத்தகைய தோழர்கள் மீது ஒரு களங்கத்தை இப்போது சுமத்துவது முட்டாள்தனமாகும்.

நமது தோழர்களிடையே சித்தாந்த ரீதியாக டிராட்ஸ்கியத்தை எதிர்ப்போர், டிராட்ஸ்கியர்களிடம் தனிப்பட்ட தொடர்புகளை மேற்கொண்டு வந்தார்கள். அதை அவர்கள் டிராட்ஸ்கியத்தின்  நடைமுறை அம்சங்கள் அவர்களுக்குத் தெளிவான உடனேயே அந்தத் தொடர்புகளை விட்டுவிடத் தயங்கவில்லை. உண்மையில் அவர்கள் தனிப்பட்ட டிராட்ஸ்கியர்களுடனான தங்களது தனிப்பட்ட நட்புத் தொடர்புகளை உடனடியாக காலம் தாழ்த்தாமல் முறித்துக் கொண்டிருந்தால் மிகவும் நல்லது. ஆனால், இத்தகைய தோழர்களை டிராட்ஸ்கியர்களோடு சேர்ப்பது முட்டாள்தனமாகும்.

படிக்க :
♦ பாஜகவில் குஷ்பு : காங்கிரசில் ஒடுக்கப்பட்டதால் கட்சி தாவினாரா ?
♦ ‘புரட்சிகர’ சதிகாரர்களின் ரிஷி மூலம் !

3 சரியான நபர்களைத் தேர்ந்தெடுப்பது மற்றும் அவர்களை சரியான இடங்களில் வைப்பது என்பதன் பொருள் என்ன?

முதலாவதாக இதன்பொருள், அரசியல் கொள்கைக்கேற்ப ஊழியர்களைத் தேர்வு செய்தல், அதாவது, அவர்கள் அரசியல் நம்பிக்கை வைக்க பொருத்தமானவர்களா? இரண்டாவதாக, வர்த்தகக் கொள்கைக்கேற்ப, அதாவது அவர்கள் அத்தகைய, உறுதியான வேலைகளுக்குப் பொருந்துகிறார்களா? என்று பார்ப்பது.

இதன் பொருள், வர்த்தக அணுகுமுறை ஒரு மிகக்குறுகிய வர்த்தக அணுகுமுறையாக மாற்றப்பட்டு விடக்கூடாது. ஒரு ஊழியரின் வர்த்தகத் தகுதிகளைப் பற்றி தாங்களாகவே சிலர் ஆர்வம் கொள்ளும் போதிலும், அவர்கள் தாங்களாகவே அந்த ஊழியரின் அரசியல் முகத்தோற்றம் பற்றி ஆர்வம் காட்டுவதில்லை.

இதன் பொருள், ஒரு ஊழியரின் அரசியல் முகத்தோற்றத்தில் தாங்களாகவே ஆர்வம் கொள்ளும்போது, அவர்கள் அந்த ஊழியரின் வர்த்தகத் தகுதிகளில் தாங்களாகவே ஆர்வம் கொள்வதில்லை. அதாவது அரசியல் அணுகுமுறை மட்டுமே தனிப்பட்ட ஒற்றை அணுகுமுறையாக மாற்றப்பட்டுவிடக் கூடாது.

நமது தோழர்களால் போல்ஷ்விக் விதிகள் பின்பற்றப்படுகின்றன என்று கூற முடியுமா? கெடுவாய்ப்பாக இவ்வாறு கூற முடியாது. இந்தக் கூட்டுக்கூட்டத்தில் இதற்கான மேற்கோள்கள் காட்டப்பட்டன. ஆனால், இதைப் பற்றிய எல்லா விசயங்களும் கூறப்படவில்லை. இதன் புள்ளி என்னவென்றால், முயற்சிசெய்து பரிசோதிக்கப்பட்ட இந்த விதி அடிக்கடி நமது நடைமுறை வேலைகளில் மிகவும் படுமோசமான முறையில் மீறப்படுகிறது. தொழிலாளர்கள் புறநிலையான காரணங்களுக்காகப் பெரும்பாலாகத் தேர்ந்தெடுக்கப்படுவதில்லை, அதற்கு மாறாக முறையற்ற, அகநிலையாக அற்பவாத, குட்டிமுதலாளித்துவக் காரணங்களுக்காகத் தேர்ந்தெடுக்கப்படுகிறார்கள். அடிக்கடி அறிமுகமானவர், நண்பர், நகரத்தில் உடன் இருப்பவர், தனிப்பட்ட அர்ப்பணிப்பு உணர்வுள்ள நபர்கள், தங்கள் தலைமையைப் போற்றிப் புகழும் கலையில் தேர்ச்சி பெற்றவர்கள்தான் அவர்களுடைய அரசியல் மற்றும் தொழில் வர்த்தகப் பொருத்தம் பாராது நியமிக்கப்படுகிறார்கள்.

இயல்பாகவே, பொறுப்புமிக்க ஊழியர்கள் குழுவின் வழிகாட்டலுக்குப் பதிலாக, நாம் ஒரு சிறு குடும்பத்தின் நெருங்கிய நண்பர்களை ஒரு பரஸ்பர உதவி கட்டமைப்பை பெற்றிருக்கிறோம். அந்தக் குடும்பத்தின் உறுப்பினர்கள் சமாதானமாக வாழ முயற்சிக்கிறார்கள். ஒருவரை ஒருவர் தாக்க முயல்வதில்லை. பொது இடங்களில் தங்கள் குறைகளை பேசத் தயங்குகிறார்கள், ஒருவரையொருவர் புகழ்ந்து கொள்கிறார்கள். நேரத்துக்கு நேரம் வெற்றிகளைப் பற்றிய சலிப்பூட்டுகிற, எரிச்சல்தரும் அறிக்கைகளை மையத்துக்கு அனுப்புகிறார்கள்.

இத்தகைய ஒரு குடும்ப சூழ்நிலையில் வேலையில் உள்ள குறைபாடு பற்றி விமர்சிக்கவோ அல்லது வேலைக்குத் தலைமையேற்பவர்களின் சுயவிமர்சனத்துக்கோ இடமில்லை என்பதைப் புரிந்துகொள்வது சிரமமானதாக இல்லை .

நிச்சயமாக இத்தகைய ஒரு குடும்ப சூழ்நிலை அடிவருடிகளை உருவாக்குவதற்கு ஆதரவான சூழ்நிலை, சுயமரியாதை உணர்வை இழந்த நபர்களை உருவாக்குவதற்குச் சாதகமாக உள்ளது. எனவே இதற்கும் போல்ஷ்வியத்துக்கும் எந்தச் சம்பந்தமும் இல்லை.

உதாரணத்துக்கு தோழர்கள் மிர்ஸோயன் மற்றும் வைனோ – வை எடுத்துக் கொள்ளுங்கள். முதலாமவர் கஜகஸ்தான் ஆட்சிப்பகுதி கட்சியின் முதன்மைச் செயலாளர். இரண்டாமவர் யாரோஸ்லாவ்ல் வட்டாரக் கட்சி அமைப்பின் செயலாளர். இந்த நபர்கள் நம்மிடையே மிக மோசமானவர்கள் அல்ல. ஆனால் அவர்கள் ஊழியர்களை எவ்வாறு தேர்வு செய்தார்கள்? முதலாமவர் தான் முன்பு வேலை செய்த அஜர்பைஜான் முதல் உரால்ஸ் வரை 30 முதல் 40 வரையான எண்ணிக்கையில் தனது சொந்த ஆட்களைத் தன்னுடன் அஜர்பைஜானுக்குக் கொண்டு சென்றார். அவர்களை கஜகஸ்தானில் பொறுப்புமிக்க பதவிகளில் அமர்த்தினார். இரண்டாமவர் தான் முன்பு வேலை செய்த டோனெட்ஸ்லிருந்து 12-க்கும் மேற்பட்ட தனது சொந்த ‘ ஆட்களை யாரோஸ்லாவ்லுக்குக் கொண்டு சென்றார். பொறுப்புமிக்க பதவிகளில் அமர்த்தினார்.

மேலும் தோழர் மிர்ஸோயன் தனது சொந்த பரஸ்பர உதவி கட்டமைப்பைப் பெற்றுக் கொண்டார். அத்துடன் தோழர் வைனோவும் கூட தனது சொந்த பரஸ்பர உதவிக் குழுவை வைத்துள்ளார். போல்ஷ்விக் வழிமுறைகளில் நபர்களைத் தேர்ந்தெடுக்கவும், பணியில் அமர்த்தவும் வழிகாட்டப்பட்டிருந்தால் அவர்கள் ஊழியர்களை உள்ளூர் மக்களிலிருந்தே தேர்ந்தெடுத்திருக்க மாட்டார்களா? நிச்சயமாக அவர்கள் தேர்ந்தெடுத்திருப்பார்கள். அப்படியானால் அவர்கள் இவ்வாறு ஏன் செய்யவில்லை?

ஏனென்றால் ஊழியர்களைத் தேர்ந்தெடுக்கும் போல்ஷ்விக் வழிமுறை, அற்பவாத குட்டிமுதலாளித்துவ அணுகுமுறையை நடைமுறைக்கு ஒவ்வாததாக்கிவிடுகிறது. தொழிலாளர்களை குடும்ப உறவு மற்றும் சொந்த நிறுவனங்களிலிருந்து தேர்ந்தெடுக்கும் சாத்தியத்தை நடைமுறைக்கு ஒவ்வாததாக்கிவிடுகிறது. மேலும் தனிப்பட்டமுறையில் தங்களுக்கு அர்ப்பணித்துக்கொண்ட ஊழியர்களைத் தேர்ந்தெடுக்கும்போது, இந்தத் தோழர்கள் ஒரு குறிப்பிட்ட அளவுக்கு உள்ளூர் மக்களிடம் இருந்து சுதந்திரமாக, கட்சியின் மத்தியக்குழுவிலிருந்து சுதந்திரமாகத் தங்களை ஆக்கிக்கொள்ள வெளிப்படையாகவே விரும்புகிறார்கள். தோழர்கள் மிர்ஸோயனும், வைனோவும் சில சூழ்நிலைகள் காரணமாகவோ அல்லது மற்ற காரணங்களாலோ அவர்கள் இப்போதைய வேலை இடத்திலிருந்து வேறு இடங்களுக்கு மாற்றப்படுகிறார்கள் என்று வைத்துக் கொள்வோம், அத்தகைய ஒரு நிகழ்வில் தங்கள் ‘சீடர்களை’ என்ன செய்வார்கள்? அவர்கள் வேலைசெய்யச் செல்லும் புதிய இடங்களுக்கே அவர்களை மீண்டும் கொண்டு செல்வார்களா?

இத்தகைய ஒரு நகைப்புக்கிடமான நிலைக்குத்தான் நபர்களை முறையாகத் தேர்ந்தெடுத்துப் பணியில் அமர்த்துவது என்ற போல்ஷ்விக் வழிமுறை மீறப்படுவது கொண்டு செல்கிறது.

(தொடரும்)

நூல் : ஜே.வி.ஸ்டாலின் தொகுப்பு நூல்கள் – தொகுதி -14
கிடைக்குமிடம் :
அலைகள் வெளியீட்டகம்
5/1 ஏ, இரண்டாவது தெரு, நடேசன் நகர், இராமாபுரம்,
சென்னை – 600 089
தொடர்புக்கு : 98417 75112