பால்மிரோ டோக்ளியாட்டி ஆற்றிய பாசிசம் குறித்த விரிவுரைகள் | பாகம் – 3

முன்னுரை

இங்கே பிரசுரிக்கப்பட்டுள்ள சொற்பொழிவுகள் பால்மிரோ – டோக்ளியாட்டி “எதிரிகள்” என்ற தலைப்பில் நிகழ்த்திய 15 பகுதிகளைக் கொண்ட உரையின் பிரதான பகுதியாகும். இது, 1935-ம் ஆண்டில் மாஸ்கோவில் உள்ள லெனின் பள்ளியின் இத்தாலியப் பிரிவில் நிகழ்த்தப்பட்டது. எட்டு உரைகளது மூலப் பிரதிகளின் நிழற்படப் பிரதிகளை மாஸ்கோவிலுள்ள மார்க்சிய – லெனினியக் கழகம் எர்னெஸ்டோ ரகியோனேரியிடம் அளித்தது. அவர்தான் தற்பொழுது டோக்ளியாட்டியின் தொகுப்பு நூல்களை எடிடோரி ரியூனிட்டிக்காக மேற்பார்வையிட்டுக் கொண்டிருக்கிறார். இது 1970-ம் ஆண்டில் முதன் முறையாக புத்தக வடிவில் தோன்றியது.

அதற்குப் பின் மேலும் மூன்று உரைகள் – பாசிசம் குறித்து ஒன்றும், இத்தாலிய கம்யூனிஸ்டுகளின் இதர “எதிரிகள்” (சோசலிஸ்டுகள் மற்றும் குடியரசுவாதிகள், அராஜகவாதிகள்) – குறித்து இரண்டும் கிடைக்கப்பெற்று இத்தாலியில் பதிப்பிக்கப்பட்டுள்ளன. தற்பொழுதைய தொகுப்பானது பாசிசம் குறித்தும், பாசிச அரசாங்கத்தின் பல்வேறு அம்சங்கள் குறித்துமான சொற்பொழிவுகளை மட்டுமே கொண்டுள்ளது. இந்தப் பொருள் குறித்து கம்யூனிஸ்டு அகிலத்தின் தத்துவார்த்த இதழுக்காக 1934-ம் ஆண்டில் டோக்ளியாட்டி எழுதிய ஒரு கட்டுரையும் பின் இணைப்பாக இதில் சேர்க்கப்பட்டுள்ளது.

இந்த அனைத்து உரைகளையும் விரிவாகக் குறிப்பெடுத்த மாணவரான கியுசெப்பே காடியின் குறிப்புகளிலிருந்து இந்த உரை தயாரிக்கப்பட்டுள்ளது. பின்னர் காடி, டோக்ளியாட்டியின் முதல் உரை குறித்த குறிப்பை அவருடைய ஒப்புதலைப் பெறுவதற்காக அவரிடம் அளித்தார். இந்தச் சொற்பொழிவுகள் அந்தப் பள்ளியில் பெரும் ஆர்வத்தைக் கிளர்த்தியதால் பள்ளியைச் சேர்ந்த இதர நாட்டு கட்சிகளின் ஆசிரியர்களும், மாணவர்களும் இதில் கலந்து கொண்டதாக மற்றொரு இத்தாலிய கம்யூனிஸ்டான ஸ்டீஃபனோ சியாப்பரெல்லி கூறுகிறார். தெள்ளத் தெளிவாக போதிக்கும் பாணியில் இந்த உரைகள் அமைந்திருக்கின்றன என்றால் இத்தாலிய மாணவர்களின் பின்னணியே அதற்குக் காரணம். கியுசெப்பே காடி கூறுவது போல “கிட்டத்தட்ட அனைத்து மாணவர்களும் தொழிலாளி – வர்க்க குடும்பத்திலிருந்து வந்தவர்கள், பாசிச சிறைகளிலிருந்து வெளி வந்தவர்கள், போதிய படிப்பு அனுபவம் இல்லாதவர்கள். இதனாலேயே எளிமையாகவும், சாத்தியமான அளவுக்கு அடி ஆரம்பத்திலிருந்தும் விளக்குவதற்கு டோக்ளியாட்டி தொடர்ந்து முயற்சித்தார். அதிகக் கவனம் செலுத்த வேண்டும் என்ற காரணத்திற்காகவே அவர் விளங்கும் முறையிலும், மெதுவாகவும் வகுப்புகளை நடத்தினார். இது என்னுடைய குறிப்பெடுக்கும் பணிக்கு மிகவும் உதவியாயிருந்தது.

இத்தாலிய பதிப்பில் தட்டச்சு தவறுகள், குறியீடுகள், இலக்கண முறைப்படி சில திருத்தங்கள் செய்தல் என்றளவுக்கு மட்டுமே மாற்றம் செய்யப்பட்டது. கோடிட்ட பகுதிகள் மூலக்குறிப்பில் அடிக்கோடிடப்பட்டுள்ளன. சொற்பொழிவுகளின் தலைப்புகளை இத்தாலியப் பதிப்பின் ஆசிரியர் எர்னெஸ்டோ ரகியோனேரி செய்துள்ளார். எண்ணிடப்பட்ட குறிப்புகள் யாவும் மொழியாக்கம் செய்தவரால் தரப்பட்டவையாகும்.”

– டேனியல் டிச்டர்.

உள்ளடக்கம்

விரிவுரை 1 : பாசிஸ்டு சர்வாதிகாரத்தின் அடிப்படை அம்சங்கள்
விரிவுரை 2 : பூர்ஷ்வாக்களின் புதுமாதிரியான கட்சி
விரிவுரை 3 : தேசிய பாசிஸ்டுக் கட்சி
விரிவுரை 4 : பாசிசத்தின் ராணுவ மற்றும் பிரச்சார அமைப்புகள்
விரிவுரை 5 : பாசிஸ்டுத் தொழிற்சங்கங்கள்
விரிவுரை 6 : டொபோலவோரோ
விரிவுரை 7 : கார்ப்பரேட்டிவிசம்
விரிவுரை 7 (தொடர்ச்சி) : கார்ப்பரேஷன்களின்பால் நமது கொள்கை
விரிவுரை  8 : கிராமப்புறங்களில் பாசிசத்தின் கொள்கை
பின் இணைப்பு
குறிப்புகள்

****

விரிவுரை 1 :

பாசிஸ்டு சர்வாதிகாரத்தின் அடிப்படை அம்சங்கள்

நமது பாடத்தை துவக்குவதற்கு முன்னர் “பகைவர்கள்” என்ற பதத்தைக் குறித்து சில வார்த்தைகள் சொல்ல விரும்புகிறேன். இந்தப் பதத்துக்கு உங்களில் சிலர் தவறான விளக்கத்தை அளிக்கக் கூடாதென்பதற்காக இதைச் சொல்கிறேன்; தவறான விளக்கமானது அரசியல் தவறுகளுக்கு இட்டுச் செல்லக்கூடும்.

“பகைவர்கள்” என்று பேசும்பொழுது பாசிச, சமூக-ஜனநாயக மற்றும் கத்தோலிக்க அமைப்புகளில் உறுப்பினர்களாக உள்ள வெகுஜனங்களை நாம் சிந்தையில் கொண்டிருக்கவில்லை. நமது பகைவர்கள் பாசிச, சமூக-ஜனநாயகம் மற்றும் கத்தோலிக்க அமைப்புகளேயாகும். ஆனால், அந்த அமைப்புகளில் உள்ள மக்கள் நமது எதிரிகள் அல்ல. அவர்கள் உழைக்கும் வெகுஜனங்கள். அவர்களை நம் பக்கம் ஈர்ப்பதற்கு நாம் ஒவ்வொரு முயற்சியையும் செய்ய வேண்டும்.

இனி நமது விஷயத்திற்கு வருவோம். பாசிசம். பாசிசம் என்றால் என்ன? அது குறித்துக் கொடுக்கப்பட்டுள்ள மிக முழுமையான விளக்கம் என்ன?

பாசிசம் குறித்த மிக முழுமையான விளக்கமானது கம்யூனிஸ்டு அகிலத்தின் விரிவான நிர்வாகக் குழுவின் 13-வது கூட்டத்தில் கொடுக்கப்பட்டது. அது பின்வருமாறு:

“பாசிசம் என்பது நிதி மூலதனத்தின் மிகவும் பிற்போக்கான, மிகவும் இனவெறி கொண்ட, மிக மோசமான ஏகாதிபத்தியவாதிகளின் அப்பட்டமான பயங்கரவாத சர்வாதிகாரமாகும்.”

பாசிசம் என்பது எப்பொழுதும் இந்த வழியில் விளக்கப்படுவதில்லை. மாறாக, வெவ்வேறு கட்டங்களில், வெவ்வேறு காலங்களில் பெரும்பாலும் தவறான விளக்கங்களே கொடுக்கப்பட்டுள்ளன. பல்வேறு காலகட்டங்களில் பாசிசம் குறித்து நாம் தந்துள்ள மாறுபட்ட விளக்கங்களை ஆராய்வது சுவையாக இருக்கும். (இந்தப் பணியை நீங்களும் மேற்கொள்ள வேண்டுமென்று உங்களுக்கு ஆலோசனை தருகிறேன்).

உதாரணத்திற்கு, நான்காவது உலக காங்கிரசில் பாசிசம் குறித்து கிளாரா ஜெட்கின் ஒரு உரை நிகழ்த்தினார். அது முற்றிலும் பாசிசத்தின் குட்டி பூர்ஷுவா குணாம்சத்தை சுட்டிக்காட்டுவதையே இலக்காகக் கொண்டிருந்தது. போர்டிகா¹ உரையாற்றும் பொழுது பூர்ஷுவா ஜனநாயகத்திற்கும் பாசிச சர்வாதிகாரத்திற்குமிடையில் எவ்வித வித்தியாசமும் கிடையாது என்று வலியுறுத்தினார்; அரசாங்கத்தின் இவ்விருவகைப்பட்ட வடிவங்களுக்கிடையே ஒரு வகையான மாறி மாறிவரும் சுழற்சி இருப்பதாகக் கூறி அவை இரண்டும் ஒன்றுதான் என்பது போன்ற தோற்றத்தை உருவாக்கினார்.

இந்த உரைகள் இரண்டு அம்சங்களை இணைத்து, அவற்றினிடையே தொடர்பேற்படுத்தத் தவறிவிடுகின்றன. பூர்ஷுவா வர்க்கத்தின் சர்வாதிகாரம் மற்றும் குட்டி-பூர்ஷுவா வெகுஜன இயக்கம் என்பவையே அந்த இரண்டு அம்சங்கள்.

கோட்பாட்டு ரீதியிலான கண்ணோட்டத்தில் காணும் பொழுது இவ்விரு அம்சங்களுக்கிடையிலான இணைப்பை முற்றிலும் புரிந்து கொள்வது கடினமாக இருக்கிறது. இருந்தாலும், இந்த இணைப்பு புரிந்து கொள்ளப்பட வேண்டும். முதலாவது அம்சத்தை காண்பதோடு மட்டும் ஒருவர் நிறுத்திக் கொள்வாரேயானால், பாசிசத்தின் வரலாற்றுப்பூர்வ வளர்ச்சியின் பிரதான வழியையும், அதனுடைய வர்க்க உள்ளடக்கத்தையும் அவர் காண இயலாது என்பதோடு அதைக் காணத் தவறியும் விடுவார். இரண்டாவது அம்சத்தைக் காண்பதோடு மட்டும் ஒருவர் நிறுத்திக் கொள்வாரேயானால் அதனுடைய விளைவுகளை அவர் காணத் தவறிவிடுவார்.

சமூக ஜனநாயகம் செய்த தவறு இதுதான். சிறிது காலம் முன்னர் வரை, சமூக ஜனநாயகமானது பாசிசம் குறித்து நாம் கூறிய அனைத்தையும் மறுத்து, அதை மத்தியகால வடிவம் என்றும், முதலாளித்துவ சமூகத்தின் சீரழிவு என்றுமே கருதி வந்தது. உண்மையில் பாசிசம் கொண்டிருந்த குட்டி பூர்ஷுவா வெகுஜன தன்மையை முற்றிலும் அடிப்படையாகக் கொண்டே சமூக ஜனநாயகம் இத்தகைய நிர்ணயிப்புகளை மேற்கொண்டது.

ஆனால், வெகுஜன இயக்கம் ஒவ்வொரு நாட்டிலும் ஒரே மாதிரியாக இருக்காது. சர்வாதிகாரம் என்பதுகூட ஒவ்வொரு நாட்டிலும் ஒரே மாதிரியாக இருக்காது. அதனால்தான், சுலபமாக செய்யக்கூடிய ஒரு தவறு குறித்து நான் உங்களை முன்கூட்டியே எச்சரிக்க வேண்டும். இத்தாலிக்கு எது பொருந்துமோ அது இதர ஒவ்வொரு நாட்டிற்கும் பொருந்தும் என்றோ, பொருந்த வேண்டும் என்றோ நினைக்காதீர்கள். பாசிசமானது வெவ்வேறு நாடுகளில் வெவ்வேறு வடிவங்களை எடுக்கும். வெவ்வேறு நாடுகளின் வெகுஜனப் பகுதியினர் வெவ்வேறு வடிவங்களிலான அமைப்பைக் கொண்டிருக்கின்றனர். அத்துடன் எந்தக் கால கட்டத்தைக் குறித்து நாம் பேசுகிறோம் என்பதையும் நாம் நினைவில் கொண்டிருக்க வேண்டும். பாசிசமானது ஒரே நாட்டில் வெவ்வேறு சமயங்களில் வெவ்வேறு நோக்குளை, கோணங்களை மேற்கொள்கிறது. எனவே, இரண்டு அம்சங்களை நாம் ஆராய வேண்டும். நாம் ஏற்கனவே பாசிசம் குறித்த மிக முழுமையான விளக்கத்தைக் கண்டோம்: “பாசிசம் என்பது நிதி மூலதனத்தின் மிகவும் பிற்போக்கான, மிகவும் இனவெறி கொண்ட, மிக மோசமான ஏகாதிபத்தியவாதிகளின் அப்பட்டமான பயங்கரவாத சர்வாதிகாரமாகும்.”

படிக்க:
♦ மாட்டிறைச்சியின் பெயரால் காவி குண்டர் படையின் வெறியாட்டம் தொடங்கியது !
♦ தேர்தல் முடிவுகள் 2019 : மோடியின் வெற்றியா ? இந்தியாவின் வெற்றியா ?

இதன் பொருள் என்ன? இந்தக் கணத்தில், வரலாற்று வளர்ச்சியின் இந்த காலகட்டத்தில் நாம் ஏன் இந்த வடிவத்துடன் மோத நேரிடுகிறது? அதாவது, முதலாளித்துவ வர்க்கத்தின் மிகவும் பிற்போக்கான, மிகவும் இனவெறி கொண்ட பகுதிகளின் ஒளிவு மறைவற்ற சர்வாதிகாரத்துடன் ஏன் மோத நேரிடுகிறது?

ஒவ்வொருவரும் இந்தப் பிரச்சினை குறித்து தெளிவாக இல்லாததால் இது பற்றி பேச வேண்டியது அவசியமாகிறது. இத்தகைய விளக்கங்களால் மண்டை முழுவதும் நிரம்பியிருந்த ஒரு தோழரை நான் எதிர்கொள்ள நேரிட்டது; கிராம்ஷியின் கட்டுரைகளில் ஒன்றில் ஒவ்வொரு அரசும் ஒரு சர்வாதிகாரம்தான் என்று கூறப்பட்டிருப்பதைக் கண்டு அவர் வியப்படைந்தாராம்.

தெளிவாகக் கூறுவதென்றால் பூர்ஷுவா ஜனநாயகமும், சர்வாதிகாரமும் எதிரெதிரான நிலைகளில் நிறுத்தப்படக்கூடாது. ஒவ்வொரு ஜனநாயகமும் ஒரு சர்வாதிகாரம்தான்.

அடிக்குறிப்புகள் :

1. அமாடியோ போர்டிகா (1889-1971) பார்லிமெண்டரி முறைக்கு ஒரேயடியாக அவர் எதிர்ப்புத் தெரிவித்ததையும் தேர்தல்களைப் பகிஷ்கரிக்க வேண்டுமென்ற அவர் வாதத்தையும், இடதுசாரி கம்யூனிஸம், ஒரு சிறுபிள்ளைக் கோளாறு என்ற நூலில் லெனின் கடுமையாக விமர்சித்தார். இத்தாலிய சோஷலிஸ்டுக் கட்சியில் இருந்த கம்யூனிஸ்டுப் பிரிவுக்கு தலைமை தாங்கியவர். அந்தப் பிரிவை சோஷலிஸ்டுக் கட்சியிலிருந்து வெளியில் கொண்டு வந்து 1921 ஜனவரியில் இத்தாலியக் கம்யூனிஸ்டுக் கட்சியை  ஸ்தாபித்தார். இத்தாலிய சோஷலிசத்தின் மிகவும் மோசமான பாரம்பரியத்திலிருந்து ஆரோக்கியமான முறையில் மாறி, உறுதியான கட்சிக் கட்டுப்பாடு,  ஸ்தாபனம் என்ற லெனினிய கோட்பாட்டை அவர் தலைமையில் இத்தாலிய கம்யூனிஸ்டுக் கட்சி வலியுறுத்தியது. இது விஷயங்களில் இத்தாலியக் கம்யூனிஸ்டுகளின் அக்கறை சில சமயங்களில் அளவுக்கு அதிகமாக இருந்ததால், இறுதியில் அவர்களது ஸ்தூலமான அரசியல் செயல்பாடு பாதிக்கப்பட்டது. மேலும், போர்டிகாவின் இடதுசாரிப் போக்கும் யாந்திரிகமாக கொச்சைப்படுத்தும் போக்கும், பாசிசம் பற்றியும் ரோம் படையெடுப்பை  அடுத்து ஏற்பட்ட கணிசமான மாற்றத்தையும் ஆழமான பரிசீலனை செய்வதிலிருந்து கட்சியைத் தடுத்தன. 1922 நவம்பரில், கம்யூனிஸ்டு அகிலத்தின் நாலாவது உலகக் காங்கிரஸில், ரோம் படையெடுப்பு  நிகழ்ந்த சில வாரங்களுக்குள்ளேயே, பூர்ஷுவா பிற்போக்கின் வரலாற்றில் பாசிசம் ஒரு குணாம்சரீதியான வளர்ச்சியல்ல என்றும், பாசிசம் அதிகாரத்தை கைப்பற்றியது பாட்டாளி வர்க்கத்தின் கடமையை சுலபமாக்குகிறது என்றும் உறுதிபடக் கூறினார். 1923 பிப்ரவரியில் போர்டிகா இத்தாலியில் கைது செய்யப்பட்டார். இதையடுத்து, அவரது அரசியலில் அதிருப்தி அடைந்து வந்த அகிலம் ஐந்து பேர்கள் கொண்ட ஒரு புதிய நிர்வாகக் குழுவை நியமித்தது. அதே ஆண்டு சிறையிலிருந்து குற்றமற்றவர் என்று விடுதலை செய்யப்பட்டதும் இத்தாலியக் கம்யூனிஸ்டுக் கட்சியின் புதிய “மைய”த் தலைமையில் சேர்த்துக் கொள்வது என்ற அகிலத்தின் திட்டத்தினை போர்டிகா ஏற்க மறுத்தார். அதுவரையிலும் பின்னணியில் இருந்தவரும் அநேகமாகப் போர்டிகாவின் கொள்கைகளை ஏற்றுக் கொண்டவருமான அண்டோனியோ கிராம்ஷி, படிப்படியாக கம்யூனிஸ்டுக் கட்சியின் புதிய தலைவர்களது உள்வட்ட மையத்தை 1924 மத்தியில் அமைத்தார். முடிவில் 1930-ல் கட்சியிலிருந்து போர்டிகா வெளியேற்றப்பட்டார். இத்தாலியக் கம்யூனிஸ்டுக் கட்சியின் தோற்றம், போர்டிகாவிலிருந்து கிராம்ஷிக்கு மாற்றம், போர்டிகா, கிராம்ஷி டோக்ளியாட்டியும் மற்றவர்களும் முதலாவது உலக யுத்தத்தைத் தொடர்ந்து தீர்மானமான ஆண்டுகளில் எடுத்த நிலை ஆகியவை  குறித்தும் வரலாற்று ரீதியான சம்பவங்கள் பற்றியும் சிறையிலிருந்து அன்டோனியோ கிராம்ஷி எழுதிய குறிப்புப் புத்தகங்களிலிருந்து சில பகுதிகள் என்ற நூலுக்கான முன்னுரையில் காணலாம். இதை மொழிபெயர்த்து வெளியிட்ட பதிப்பாசிரியர்கள் குவின்டின் கோயரும் ஜியோப்ரே நோவல் சுமித்தும் ஆவர் (இண்டர்நேஷனல் பப்ளிஷர்ஸ், நியூயார்க், 1971).

(தொடரும்)

பால்மிரோ டோக்ளியாட்டி
ஆற்றிய பாசிசம் குறித்த விரிவுரைகள்
தமிழில் : ரா. ரங்கசாமி
பக்கங்கள் : 233
விலை : ரூ. 50.00
வெளியீடு : நியூ செஞ்சுரி புக் ஹவுஸ்

முந்தைய பகுதிகள் : பால்மிரோ டோக்ளியாட்டி ஆற்றிய பாசிசம் குறித்த விரிவுரைகள் !

பால்மிரோ டோக்ளியாட்டி ஆற்றிய பாசிசம் குறித்த விரிவுரைகள் | பாகம் – 2

முன்னுரை ( தொடர்ச்சி…)

டோக்ளியாட்டி சொற்பொழிவாற்றிய வருடங்களில் அமெரிக்காவிலிருந்த சோசலிஸ்டுக் கட்சி, அக்கட்சியினுள் ஊடுருவி, பெருமளவில் தலைமையைக் கைப்பற்றியிருந்த டிராட்ஸ்கியவாதிகளின் செல்வாக்கு காரணமாக, எவ்வகையான பாசிச – எதிர்ப்பு இயக்கத்திலும் பங்கேற்க மறுத்தது.

இப்போது நமது கடமை பாசிசத்திற்கெதிராக ஒரு பரந்துபட்ட ஒற்றுமையைக் காட்டுவதல்ல, மாறாக “வர்க்கத்திற்கெதிராக வர்க்கம்” என்னும் போராட்டத்தை நடத்துவதே நமது பணி என்னும் இடதுசாரி வாய்ச்சவடால் மூலம் பாசிசத்திற்கெதிரான போராட்டத்தில் தான் சேர மறுத்ததை மூடிமறைத்தது. எதிர்பார்க்கப்பட்டதுபோல், ஆளும் வர்க்கமானது இத்தகைய வார்த்தை ஜாலங்களைப் பற்றி கவலைப்படவில்லை; ஏனென்றால் ஏகபோக மூலதனம், தன்னுடைய அப்பட்டமான சர்வாதிகாரத்தை நிலைநிறுத்தும் முயற்சிகளிலிருந்து அதைத் தடுக்கக்கூடிய திறனைப் பெற்றிருக்கக் கூடிய சக்திகளைப் பிளவுபடுத்துவதில் இத்தகைய இடதுசாரி வார்த்தை ஜாலமும் ஒரு அம்சமாகும்.

“வர்க்கத்திற்கெதிராக வர்க்கம்” என்பதானது, தொழிலாளி வர்க்கத்தின் நலனுக்கான ஒரு கொள்கை அல்ல. அது முதலாளித்துவ வர்க்கத்தின் நலன்களுக்குத் தீங்கானதும் அல்ல. அது வெற்றுவேட்டு வார்த்தை ஜாலமே தவிர வேறன்று. ஆனால், அது சீர்குலைவுத்தன்மை வாய்ந்தது.

பாசிசம் என்பது “ஏகபோக மூலதனத்தின் மிகவும் பிற்போக்கான பகுதிகளின் அப்பட்டமான சர்வாதிகாரம்” என்ற சரியான கம்யூனிஸ்டு நிர்ணயிப்பும் விளக்கமும் பாசிச – எதிர்ப்புக் கூட்டணி அமைப்பதற்கான அடித்தளத்தை அளித்தன. தொடர்ச்சியான ஆய்வுகள். பிறகு கூட்டு விவாதங்கள் போன்றவை ஒரு சுற்று முழுமையடைந்ததன் விளைவாக ஒரு விஞ்ஞானப்பூர்வமான சரியான நிர்ணயிப்பு தோன்றியது. 1935-ம் ஆண்டில் நடைபெற்ற கம்யூனிஸ்டு அகிலத்தின் ஏழாவது உலக காங்கிரசுக்கு அளித்த தன்னுடைய வரலாற்றுச் சிறப்புமிக்க அறிக்கையில் ஜார்ஜ் டிமிட்ரோவ், பாசிசம் என்பது “நிதி மூலதனத்தின் மிகவும் பிற்போக்கான, மிகவும் இனவெறி கொண்ட மிக மோசமான ஏகாதிபத்திய சக்திகளின் அப்பட்டமான பயங்கரவாத சர்வாதிகாரமாகும்” என்று விளக்கம் அளித்தார்.

அமெரிக்காவிலுள்ள நமக்கு மிக முக்கியமான வரலாற்றுப் படிப்பினையாக இருக்கக் கூடியது எதுவென்றால் நம்மிடையே இன்று காணப்படுகின்ற சில அம்சங்கள் பாசிசத்தின் வளர்ச்சிக்குத் தளமாக மாறக்கூடிய அபாயம் குறித்து ஒரு விழிப்புணர்வை ஏற்படுத்த வேண்டுமென்பதேயாகும்.

இங்குச் சில சிறிய பாசிச குழுக்கள் இருந்து வருவதைப் பற்றி நாம் கவலைப்பட வேண்டியதில்லை. இதைவிட பாசிசத்திற்கு ஒரு வெகுஜன அடித்தளத்தை அமைத்துக் கொடுப்பதற்காக அரசியல் மற்றும் தத்துவார்த்த தயாரிப்பு தற்போது நடைபெற்று வருவதைப் பற்றிதான் நாம் மிகவும் கவலைப்பட வேண்டும். இத்தாலி மற்றும் ஜெர்மனியின் படிப்பினைகளிலிருந்து தெளிவாகத் தெரிவது எதுவென்றால் அங்கெல்லாம் தத்துவார்த்த அரசியல் சூழ்நிலைமை என்பது முதலாளித்துவத்தின் பொதுவான தத்துவார்த்த சக்திகளால்தான் உருவாக்கப்படுகிறது என்பதாகும். “பிற்போக்குத்தனம் நோக்கிய போக்கு” பாசிசத்திற்கான இத்தகைய தத்துவார்த்த தயாரிப்புகளில் பிரதிபலிக்கின்றது.

“நடுத்தரவர்க்கத்தினராகிய நாம் பெரிய அரசாங்கத்தாலும் பெரும் தொழிலாளர்களாலும் மற்றும் பெரும் முதலாளிகளாலும் வரி விதிக்கப்பட்டு கசக்கிப் பிழியப்படுகின்றோம்.” இனவெறி கொண்ட அலபாமா ஆளுநர் ஜார்ஜ் வாலஸ், அதிதீவிர பிற்போக்குவாதியும் அலபாமாவின் முன்னாள் ஆளுநருமான ரோனால்ட் ரீகன் மற்றும் இதரர்களால் முழங்கப்படும் இத்தகைய கோஷங்கள் நடுத்தர வர்க்கத்தினரின் செவிகளில் தேனாகப் பாய்கின்றன. “பெரும் முதலாளிகள்” என்ற வார்த்தைகள் வெறும் ஒப்புக்காகச் சொல்லப்பட்டவை, தூண்டில் இரை. அவை, தொழிலாளி வர்க்கம் மற்றும் தொழிற் சங்கங்களுக்கெதிராக ஒரு சூழ்நிலையை உருவாக்குவதற்கான அவர்களுடைய முயற்சிகளுக்கு ஒரு மூடு திரை. “பெரிய அரசாங்கம்” என்று அவர்கள் குறிப்பிடுவது பொதுமக்கள் எந்தவொரு செல்வாக்கையும் பிரயோகிக்கக்கூடிய ஆட்சி அமைப்பையே ஆகும். இத்தாலியைப் போன்று அமெரிக்க பாசிசம் என்பதும் பெரும் முதலாளிகளின் அப்பட்டமான சர்வாதிகாரமாகத்தானிருக்கும்.

பாசிசம் என்பது “நிதி மூலதனத்தின் மிகவும் பிற்போக்கான, மிகவும் இனவெறி கொண்ட மிக மோசமான ஏகாதிபத்திய சக்திகளின் அப்பட்டமான பயங்கரவாத சர்வாதிகாரமாகும்”
– டிமிட்ரோவ்.

“பிரித்தாள்வது” என்பது ஒரு சிறுபான்மையினர், பெரும்பான்மையோரை அடக்கி ஆண்டு சுரண்டும் அதிகாரத்தின் மிகவும் அடிப்படையான அம்சமாகும். அது முதலாளித்துவ ஆட்சியின் துவக்கத்திலிருந்தே ஒரு அம்சமாக இருந்து வருகிறது. வரலாறு முழுவதிலும் திட்டவட்டமான சூழ்நிலைமைகளைப் பொருத்து அதனுடைய பயன்பாடும் வடிவங்களும் மாறிக்கொண்டிருக்கின்றன. பெரும் முதலாளித்துவ நாடுகளில் கம்யூனிச எதிர்ப்பு, பேரரசு இனவாதம், வெள்ளை நிறத்தவர் மேலாதிக்கம் மற்றும் யூத-எதிர்ப்பு என்பவை “பிரித்தாளும்” பிரதான கருவிகளாக உள்ளன. அரசியல் மற்றும் சித்தாந்தத் துறைகளில் இந்தக் கருவியானது கம்யூனிஸ எதிர்ப்பு என்னும் வடிவத்தில் இருந்து வந்துள்ளது, இருந்தும் வருகின்றது.

பாசிசமானது, முதலாளித்துவத்தின் இத்தகைய தத்துவார்த்தக் கருவிகளை எடுத்துக்கொண்டு அவற்றைப் பெரும் ஆயுதங்களாக ஆக்கியுள்ளது. ஜெர்மனியில் இட்லரின் பாசிசம், கம்யூனிச எதிர்ப்பையும் யூத-எதிர்ப்பையும் தன்னுடைய பிரதான அரசியல், தத்துவார்த்தக் கருவிகளாக ஆக்கிக் கொண்டுள்ளது. இத்தாலிய பாசிசமானது கம்யூனிச எதிர்ப்பையும் இனவெறியையும் அதனுடைய பிரதான கருவிகளாகப் பயன்படுத்தி வருகிறது. எத்தியோப்பிய கிராமங்கள் மற்றும் நகரங்கள் மீது இத்தாலிய விமானங்களின் மிருகத்தனமான குண்டு வீச்சுத் தாக்குதலோடு சேர்த்து மிகவும் வன்முறைப்பட்ட இழிவான இனவெறிப் பிரச்சாரமும் தொடர்ந்து வந்தது.

இன்று பெரும் முதலாளிகள் “பிரித்தாள்வதற்காக” இனவெறியைப் பயன்படுத்துவதால், அமெரிக்காவிலுள்ள நாம், அந்த இனவெறியைப் “பிரித்தாளும் தத்துவார்த்த விஷயமாகவே” காணவேண்டும். அதே சமயம் பாசிசம் தனது வளர்ச்சிக்குப் பயன்படுத்திக் கொள்ளக் கூடிய மிகவும் ஆபத்தான சாதனமாகவும் அதைக் காண வேண்டும். அமெரிக்காவில் பாசிசத்திற்கான பாதையைத் தடுப்பதில் நாம் உண்மையிலேயே அக்கறை கொண்டிருந்தால், இனவெறியை ஒழித்துக்கட்ட போராட வேண்டும் என்ற அடிப்படையான படிப்பினையை நாம் பெற வேண்டும்.

பாஸ்டனில் கருப்பு இன மக்களது வீடுகள் மீது தாக்குதல் தொடுக்கும் கும்பல்கள் இனவெறி கழிசடைப் பேர்வழிகளே. ஆனால், அவர்கள் ஒரு பாசிச இயக்கத்தின் உட்கருவுமாக இருக்கிறார்கள். இதனால்தான் அவர்கள் கறுப்பு இன அமெரிக்கர்களின் வீடுகளைத் தாக்குவதை விடுத்து தொழிற்சங்கங்களைத் தாக்கி வருகின்றனர்.

இந்தக் கண்ணோட்டத்தில் பார்க்கும் பொழுது, யூத எதிர்ப்புச் சக்திகள் கண்ணுக்குத் தென்படவில்லை என்பதை வைத்து நாம் தவறான முடிவுக்கு இட்டுச் செல்லப்படக்கூடாது. யூத எதிர்ப்பு என்பது அமெரிக்க அரங்கில் உயிரோடுள்ள விஷக்கிருமியாக இருந்து வருகிறது. பாசிச அபாயத்தை எதிர்த்துப் போராடுவதென்பது யூத எதிர்ப்பையும் எதிர்த்துப் போராடுவதாகும்.

பாசிச அபாயம் அதிகரிப்பதைத் தொடர்ந்து கம்யூனிச-எதிர்ப்பு, இனவெறி, பேரரசு இனவாதம் மற்றும் யூத எதிர்ப்பு போன்ற இயக்கங்களும் பிரச்சாரங்களும் அதிகரிக்கும்.

முதலாளித்துவமானது அது தொழிலாளி வர்க்கத்தைச் சுரண்டுவதால் மட்டுமே வாழ முடிகிறது என்ற உண்மையை மூடிமறைக்கவே எப்பொழுதும் முயற்சிக்கிறது. பாசிசம் இந்த மூடிமறைத்தலை ஒருபடி முன்னெடுத்துச் செல்கிறது. பாசிசத்திற்கு முன்னர் முதலாளித்துவத்தின் பாதுகாவலர்கள் “வர்க்கக் கூட்டு” பற்றி பேசி வந்தனர். பாசிசம் அதிகாரத்திலிருக்கும்பொழுது அவர்கள் “வர்க்க முரண்பாட்டை ஒழித்துக்கட்டி விடுவது” என்று பேசினர். ஒரு முதலாளித்துவ அரசாங்கத்தின் பிரச்சாரத்திற்கு இதுதான் அடிப்படை. சொல்லப்போனால் இது வெறும் வார்த்தை ஜாலம் என்பதுடன் பொருளற்றதுமாகும். ஏனென்றால் முதலாளித்துவம் இருக்கும் வரை வர்க்க முரண்பாடும் வர்க்கப் போராட்டமும் இருந்தே தீரும். பாசிச அபாயத்தின் இந்தக் கட்டுக்கோப்பிற்குள் மீனி மற்றும் ஏ.எப்.எல் – சி.ஐ.ஓ தலைமையின் வர்க்கக் கூட்டுக் கொள்கைகள் ஒரு கூடுதல் பரிமாணத்தை எடுக்கின்றன.

இவ்வாறு, பாசிச அபாயத்திற்கெதிரான போராட்டமென்பது இன்று வர்க்கக் கூட்டு கொள்கைகளுக்கெதிரான போராட்டத்தையே குறிக்கிறது. வர்க்கக் கூட்டு வேண்டுமென்று கூறுகின்ற தொழிற்சங்கத் தலைவர்களுக்குக்கூட டோக்ளியாட்டியின் சொற்பொழிவுகளில் ஒரு மிகவும் அடிப்படையான படிப்பினை உள்ளது. பாசிசமானது ஒருமுறை வேரூன்றிவிட்டால் அது வர்க்கக்கூட்டுக் கொள்கைகளைக் கொண்டுள்ள சங்கங்கள் உள்ளிட்டு அனைத்துத் தொழிற்சங்கங்களையும் நாசம் செய்துவிடும். அவைகளிருந்த இடத்தில் பாசிஸ்டுகள் தங்களுடைய சொந்த பாசிச தொழிலாளர் முன்னணி அமைப்புகளை உருவாக்குவார்கள்.

ஜெர்மனியிலும் இத்தாலியிலும் பாசிசத்திற்கெதிரான போராட்ட படிப்பினைகளைப் படிக்கும்பொழுதும் அமெரிக்காவில் முதலாளித்துவத்தின் பிரச்சினைகள் சம்பந்தமாகத் தோன்றும் பல புதிய “தீர்வுகளின்” தொலைதூரத்திய தாத்பரியங்களைக் காண்பதும் அவசியமாகிறது. “திட்டமிடுதல்” என்பது ஒரு கோட்பாடு என்ற முறையில் தான்தோன்றித்தனமான தன்னிச்சைப் போக்கை தலைமுழுகிவிட்டது. இந்த நோக்கங்கள் யாவும் வர்க்கக் கூட்டு என்ற “திட்ட” அடிப்படையிலானதாகும். ”பொருளாதாரத் திட்டமிடுதல்” என்பது ஏகபோக மூலதனத்தின் சேவைக்காக உள்ளது. அது சுரண்டல் மற்றும் பெரும் ஆதாயங்களுக்கான “திட்டமிடல்” ஆகும். பாசிசமும் “திட்டமிடுதல்” குறித்துப் பெரிதாகப் பேசுகிறது என்பதுடன் பெரும் முதலாளிகளின் நலனுக்காக அது திட்டமிடுகிறது.

“பிரித்தாள்வது” என்பது ஒரு சிறுபான்மையினர், பெரும்பான்மையோரை அடக்கி ஆண்டு சுரண்டும் அதிகாரத்தின் மிகவும் அடிப்படையான அம்சமாகும். அது முதலாளித்துவ ஆட்சியின் துவக்கத்திலிருந்தே ஒரு அம்சமாக இருந்து வருகிறது.

போர்த்துக்கல், இந்தியா மற்றும் இதர பல நாடுகளில் சமூக ஜனநாயகம் எதிர்மறையான பங்காற்றியுள்ள நிலைமையில் பாசிசம் தோன்றுவதற்கு முன்னரும் தோன்றியிருந்த சமயத்திலும் சோசலிஸ்டு கட்சியினுடைய தலைமை கடைபிடித்த கொள்கைகள் குறித்து டோக்ளியாட்டியின் விவாதமானது மிகுந்த முக்கியத்துவம் பெறுகிறது. இத்தாலியிலும் அதைப் போன்றே ஜெர்மனியிலும் பாசிசத்தை அதிகாரத்தில் ஏற்றுவதற்கான தயாரிப்பில் சமூக ஜனநாயகம் ஒரு காரணமாக இருந்துள்ளது. அதற்கான தயாரிப்புகளிலும் அது ஈடுபட்டிருந்தது. இதனால், டோக்ளியாட்டியினுடைய குறிப்புகளைப் படியெடுத்தவர் சமூக ஜனநாயகத்தின் பங்கைக் குறித்து அவர் விவாதித்த சில பகுதிகளை நீக்கியது துரதிருஷ்டவசமானதே.

பாசிசமானது முதலாளித்துவத்தின் முரண்பாடுகளை வெற்றிகொள்ள முடியவில்லை. பல காலம் வரை அது அவற்றை மூடிமறைத்திருந்தது. ஆனால், ஏதாவதொரு வழியில் அவை தொடர்ந்து தலைதூக்க ஆரம்பித்தன. இவ்வாறு பாசிசத்திற்கெதிரான போராட்டங்களுக்குப் புதிய வாய்ப்புகள் தோன்றின. போராட்டத்திற்கான சாத்தியப்பாட்டை முரண்பாடுகள் திறந்துவிட்டன. ஆனால் பாசிசத்தின் தோல்வியானது அணி திரட்டப்பட்ட வெகுஜன போராட்டத்தின் விளைவாக மட்டுமே வரமுடியும்.

“முடிவாக” டோக்ளியாட்டி கூறுகிறார் :

“பாசிஸ்டுகளால் ஒழுங்கமைக்கப்பட்டு அணி திரட்டப்பட்டு அவர்களின் செல்வாக்குக்கு உட்பட்ட மக்கள் ஒருநாள் காலையில் தாங்களாகவே பாசிசத்திலிருந்து விலகி, பாட்டாளி வர்க்கப் புரட்சியில் கலந்து கொள்ள நம்மிடம் வந்துவிடுவார்கள் என்று யாரும் நினைக்கக் கூடாது. அந்த மக்கள் வெளியே வருவதற்கு நாம் முயற்சி செய்ய வேண்டும். நமது பக்கம் அவர்கள் வந்து சேருவதற்கு ஏற்பாடு செய்ய வேண்டும்.”

படிக்க:
♦ கார்ப்பரேட் – காவி பாசிசம் ! மோடி ஆட்சியின் ஐந்தாண்டு தொகுப்பு ! அச்சுநூலை ஆன்லைனில் வாங்கலாம்
♦  காவியும் கார்ப்பரேட்டும்தான் என் கண்கள் ! வெற்றி உரையில் மோடி பெருமிதம் !

பாசிசத்திற்கெதிரான போராட்டத்தில் கடைப்பிடிக்கப்பட வேண்டிய பல அடிப்படையான கொள்கைகள் குறித்து டோக்ளியாட்டி பல நிர்ணயிப்புகளை உருவாக்கியுள்ளார். “கோட்பாடு குறித்த சரியான நிலைப்பாட்டிற்கும்” சக்திகளின் உறவு குறித்த ஒரு சரியான மதிப்பீட்டிற்கும், “நடைமுறைக் கொள்கைப் பிரச்சினைகளில் சரியான தீர்வுகளுக்கும்” அவர் மிகுந்த முக்கியத்துவம் அளிக்கிறார். “நடைமுறைக் கொள்கைப் பிரச்சினை”களுக்கான சரியான தீர்வுகளுக்கு அடிப்படையாக “சரியான கோட்பாட்டு நிலைப்பாட்டை” மேற்கொள்ள வேண்டும் என்று அவர் அழுத்தமாகக் கூறுவதானது சந்தர்ப்பவாத நிலைப்பாடுகளில் தவறி விழுவதற்கு எதிரான எச்சரிக்கையாகும்.

உலக அனுபவம் என்ற பெட்டகத்தில் இருந்து குவிக்கப்பட்டிருக்கும் ஏராளமான சான்றாதாரங்களின் அடிப்படையில் டோக்ளியாட்டி பின்வரும் முடிவுகளுக்கு வருகிறார் :

• பாசிசம் என்பது முதலாளித்துவ நாடுகளில் ஒரு அபாயமாக உள்ளது. ஆனால், அது தவிர்க்க முடியாததொரு வளர்ச்சிக் கட்டமல்ல.

• பாசிசமானது, முதலாளித்துவத்தின் பிரச்சினைகளையும் முரண்பாடுகளையும் அடிப்படையில் தீர்க்க முடியாது. இதனால் அடிப்படையான வர்க்க முரண்பாடும் வர்க்கப் போராட்டமும் தொடரும்.

• பாசிசம் அதிகாரத்திலிருக்கும் பொழுது, மிக மோசமான நிலைமைகளிலும் கூட ஒரு வெகுஜன இயக்கத்தை உருவாக்கி பாசிசத்தைத் தோற்கடிப்பதற்குப் போராடுவது சாத்தியமே.

• பாசிசமானது தன்னுடைய சொந்த உள் முரண்பாடுகளால் நொறுங்கி விழுந்துவிடாது. ஆனால், அதை தோல்வியுறச் செய்ய அந்த முரண்பாடுகளைப் பயன்படுத்திக் கொள்ள முடியும்.

 டோக்ளியாட்டி இந்தச் சொற்பொழிவுகளில் கம்யூனிஸ்டு அகிலத்தின் குழுக்கள் 1934 -ம் ஆண்டுவரை பெறப்பட்ட முடிவுகளையும், அனுபவங்களையும் பிரதிபலித்தார். 1935-ம் ஆண்டில் கம்யூனிஸ்டு அகிலமானது வரலாற்றுப் பிரசித்தி பெற்ற ஏழாவது உலக மாநாட்டைக் கூட்டியது. கைதியாக இருந்து இட்லருடைய பாசிசத்திற்கு சவால்விட்ட வீரஞ்செறிந்த கம்யூனிஸ்டுத் தலைவரான ஜார்ஜ் டிமிட்ரோவ், காங்கிரசுக்கு சமர்ப்பித்த பிரதான அறிக்கையில் அந்நாள் வரையிலான அனைத்து அனுபவங்களையும் முடிவுகளையும் கொடுத்திருந்தார். “பாசிசத்திற்கெதிரான ஒற்றுமை” – என்ற அறைகூவல் அகிலத்தின் ஏழாவது காங்கிரசிலிருந்து வெளிப்பட்டது.

டோக்ளியாட்டியின் இந்தச் சொற்பொழிவுகள் ஏழாவது உலக காங்கிரசிற்கான கூட்டுத் தயாரிப்புகளில் ஒரு முக்கியமான அம்சமாக இருந்தன. உலகம் முழுவதிலுமுள்ள கம்யூனிஸ்டு இயக்கமானது தனது பணியின் காரணமாக பாசிசத்திற்கெதிரான போராட்டத்தில் தன்னுடைய முன்னணிப் படைப் பாத்திரத்தைப் பூர்த்தி செய்ய முடிந்தது. கம்யூனிஸ்டுக் கட்சிகளும், பாசிச-எதிர்ப்பு ஒற்றுமை என்ற அதனுடைய கொள்கைகளும்தாம் பாசிச சவாலை முறியடித்து பாசிச-எதிர்ப்புக்கு வெகுஜன அடித்தளத்தை உருவாக்கித் தந்தன.

இத்தகைய சொற்பொழிவுகள் சோவியத் யூனியனில் நிகழ்த்தப்பட்டது வரலாற்று விபத்து அல்ல. ஒரு புரட்சிகர தொழிலாளி வர்க்க சோசலிச அரசான சோவியத் யூனியன்தான் பாசிசத்திற்கான பாதையைத் தடுத்து நிறுத்திய மைய சக்தியாகும். இரண்டாவது உலக யுத்தத்தில் பாசிச சக்திகளை இராணுவ ரீதியாக தோற்கடித்ததில் சோவியத் யூனியன் பிரதான சக்தியாக திகழ்ந்ததும் வரலாற்று விபத்து அல்ல. சோவியத் யூனியனும் இதர சோசலிச நாடுகளும் இன்று உலக ஏகாதிபத்திய பாதைக்கு பிரதான தடைக்கல்லாகவும், பாசிசத்திற்கெதிரான போராட்டத்தில் பிரதான தளமாகவும் இருப்பதும் வரலாற்றின் விபத்து அல்ல.

இந்த நூலிலுள்ள சொற்பொழிவுகள் வரலாற்றுப் படிப்பினைகள் மட்டுமல்ல. அவை மார்க்சிய – லெனினியத்தைப் பயன்படுத்துவதற்கான படிப்பினைகளும் ஆகும். அவை, அனைத்துப் பிரச்சினைகளுக்கும் தொழிலாளி வர்க்க அணுகுமுறைக்கான படிப்பினைகள் ஆகும்.

 22 ஆகஸ்டு 1975

கஸ் ஹால்,
பொதுச் செயலாளர்,
அமெரிக்க கம்யூனிஸ்டுக் கட்சி.

(தொடரும்)

பால்மிரோ டோக்ளியாட்டி
ஆற்றிய பாசிசம் குறித்த விரிவுரைகள்
தமிழில் : ரா. ரங்கசாமி
பக்கங்கள் : 233
விலை : ரூ. 50.00
வெளியீடு : நியூ செஞ்சுரி புக் ஹவுஸ்

முந்தைய பகுதிகள் : பால்மிரோ டோக்ளியாட்டி ஆற்றிய பாசிசம் குறித்த விரிவுரைகள் !

தமிழில் பாசிசம் என்ற சொல் குறித்து பொதுவில் “சர்வாதிகாரம்” என்று மட்டும் புரிந்து கொள்கிறோம். ஆனால் பாசிசம் என்பது ஒரு நாட்டின் குறிப்பிட்ட பொருளாதார நெருக்கடியிலிருந்து தவிர்க்கவியலாமல் எழுகிறது. பாசிசத்தின் அடிப்படையாக முதலாளித்துவத்தின் நெருக்கடி இருந்தாலும், வடிவத்தில் அது ஒவ்வொரு நாட்டிற்கேற்ற அவதாரத்தை எடுத்துக் கொள்ளும். இந்தியாவில் அது தற்போது பார்ப்பனிய பாசிச அல்லது காவி கார்ப்பரேட் பாசிச அபாயமாக எழுந்து வருகிறது.

பிரக்யா சிங் தாக்கூர், ஆனந்த்குமார் ஹெக்டே, கிரிராஜ் கிஷோர், சாக்ஷி மகாராஜ் போன்ற பாஜகவின் நாடறிந்த மதவெறியர்கள் பாராளுமன்ற உறுப்பினர்களாக பதவியேற்பதும், பாஜகவின் வெற்றியைத் தொடர்ந்து இந்தியப் பங்கு சந்தை துள்ளிக் குதிப்பதும் வேறு வேறு அல்ல! முதலாளித்துவ ஜனநாயகம் தனது கட்டுமானத்தைக் கலைத்து போலியான ஜனநாயக வேடத்தை அம்மணமாக்கி நேரடியாக போராடும் மக்களை ஒடுக்குவதில் முனைந்து நிற்கிறது. அதே நேரம் இன்னொரு பிரிவு மக்களை தனது காலாட்படையாக திரட்டிக் கொள்கிறது. காவி கார்ப்பரேட் பாசிச அபாயம் என்பதை ஆழமாக புரிந்து கொள்ள இந்த தொடர் நமக்கு உதவும். தொடர்ந்து படியுங்கள்!

பால்மிரோ டோக்ளியாட்டி – அறிமுகக் குறிப்பு :

இத்தாலியில் முசோலினியின் பாசிச ஆட்சிக் காலகட்டத்தில் (1922 – 1943) கடுமையான ஒடுக்குமுறைக்கு உள்ளான அமைப்புகளில் ஒன்று இத்தாலிய கம்யூனிஸ்ட் கட்சி. இத்தாலி கம்யூனிஸ்ட் கட்சியின் நிறுவனர்களில் ஒருவர் பால்மிரோ டோக்ளியாட்டி.

இத்தாலிய கம்யூனிஸ்ட் கட்சியின் சார்பில் கம்யூனிஸ்ட் அகிலத்தின் உறுப்பினராகப் பணிபுரிந்த 1934 – 1938 காலகட்டத்தைத் தவிர்த்து, இவர் இத்தாலிய கம்யூனிஸ்ட் கட்சியின் செயலாளராகப் பதவி வகித்தார். பாசிச ஆட்சியின் வீழ்ச்சிக்குப் பிறகு அமைக்கப்பட்ட அரசாங்கத்தில், 1944 – 1945 காலகட்டத்தில் இத்தாலியின் துணைப் பிரதமராகவும், 1945 -1946 காலகட்டத்தில் இத்தாலியின் நீதித்துறை அமைச்சராகவும் பதவி வகித்தார்.

1935-ம் ஆண்டு சோவியத் ரசியாவில் உள்ள லெனின் பள்ளியின் இத்தாலியப் பிரிவில் பால்மிரோ டோக்ளியாட்டி ”எதிரிகள்” என்ற தலைப்பில் ஆற்றிய உரையின் பிரதான பகுதியை “Lectures on Fascism” என்ற பெயரில் அமெரிக்கக் கம்யூனிஸ்ட் கட்சி 1976-ம் ஆண்டு ஆங்கிலத்தில் வெளியிட்டது. நியூ யார்க்கைச் சேர்ந்த சர்வதேச வெளியீட்டகம் இந்நூலை வெளியிட்டது. கடந்த 1998-ம் ஆண்டு செப்டெம்பரில் நடைபெற்ற இந்திய கம்யூனிஸ்ட் கட்சியின் 17-வது அகில இந்திய மாநாட்டுச் சிறப்பிதழாக இந்நூல் தமிழில் வெளியிடப்பட்டது. இதனை NCBH வெளியீட்டகம் வெளியிட்டது. இனி நூலுக்குள் செல்லலாம்.

****

பால்மிரோ டோக்ளியாட்டி ஆற்றிய பாசிசம் குறித்த விரிவுரைகள் | பாகம் – 1

முன்னுரை:

பால்மிரோ டோக்ளியாட்டியின் இத்தகைய உரைகளை வெளியிடுவதன் மூலம் இண்டர்நேஷனல் பப்ளிஷர்ஸ் பிற்போக்கு சக்திகளுக்கும் பாசிச சக்திகளுக்குமெதிரான போராட்டத்திற்கு ஒரு முக்கியமான பங்களிப்பைச் செய்துள்ளனர். வரலாற்றுக் கண்ணோட்டத்திலிருந்து காணும்பொழுது சிலருக்கு இது ஆர்வத்தைத் தூண்டும் புத்தகமாக இருக்கக்கூடும். ஆனால், அமெரிக்காவிலுள்ள மக்களுக்கு இத்தகைய சொற்பொழிவுகள் நாம் படித்துப் பயன்படுத்தப்பட வேண்டிய வரலாற்றுப் படிப்பினைகளாக இருக்கும்.

கோட்பாடு, அரசியல் மற்றும் தத்துவார்த்த சிந்தனை என்ற வடிவத்தில் வைத்துக் காணும் பொழுது அனுபவம் என்ற முக்கிய அம்சத்திற்கு மாற்று எதுவும் இருக்க முடியாது.

அனுபவம் அதிகரிக்கும் பொழுது அதிலிருந்து பெறப்படும் முடிவுகளும் படிப்பினைகளும் ஆழமானதாகும், விளக்கமானதாகவும் இருக்கும். ஒருவருடைய நேரடி பங்கேற்பும் அனுபவங்களும் வெகுஜனங்களின் பொதுவான அனுபவம் என்ற இழையில் ஊடும் பாவுமாக இருக்கும்பொழுது சிந்தனைகள் மேலும் தெளிவாக இருக்கும். ஒவ்வொரு நாட்டின் தொழிலாளி வர்க்கத்தின் மற்றும் மக்களின் அனுபவக் குவியல் மிகுந்த முக்கியத்துவமுடையதாகும். ஆனால், அதிலிருந்தே பொதுமைப்படுத்தப்பட்ட கோட்பாடு, நீண்ட கால மற்றும் உடனடி நடைமுறைக் கொள்கை, முடிவுகளுக்கு வருவதற்குப் போதுமானதாக இருக்காது. முடிவுகள் என்பவை பல நாடுகளின் அனுபவங்களை பரிசோதித்து, மதிப்பீடு செய்யப்படும் பொழுது மட்டுமே அவை ஏற்றுக் கொள்ளப்பட்ட பாடங்களாக விளங்கும்.

பொதுமைப்படுத்தப்பட்ட முடிவுகளைப் பெறுவது. கோட்பாட்டை மேலும் வளர்ப்பது போன்றவை இன்றியமையாத ஒரு கூட்டு நிகழ்வுப் போக்காகும்.

இந்த அம்சமானது டோக்ளியாட்டியின் பாடங்கள் ஒவ்வொன்றிலும் தெளிவாகவும் கூர்மையாகவும் தனிச்சிறப்புடனும் விளங்குகிறது. இத்தாலியில் 12 வருடங்களாகப் பாசிசத்திற்கெதிராக நடைபெற்ற போராட்ட அனுபவங்களிலிருந்து இவற்றைக் கூறுகிறார். இந்தப் “பாடங்கள்” மேலும் விரிவாக இருப்பதற்குக் காரணம் இந்தப் போராட்டத்தில் அவருக்கு இருந்த நேரடி அனுபவத்தையும் அவர் இவற்றில் சேர்த்திருப்பதுதான்.

ஆனால், டோக்ளியாட்டி மற்றொரு பரந்துபட்ட அனுபவக் குவியலையும் பயன்படுத்தியிருக்கிறார். தொடர்ச்சியான விவாதங்களிலும், பாசிசத்திற்கெதிரான போராட்டத்தில் உலக முழுமையிலிருந்து கிடைக்கும் அனுபவங்களை ஆராய்வதிலும் மிகுந்த செயலூக்கத்துடன் பங்கேற்றவர் அவர். இத்தகைய விவாதங்கள் கம்யூனிஸ்டு அகிலத்தின் குழுக்களில் தொடர்ந்து நடந்தன. கம்யூனிஸ்டு அகிலம் என்பது உலகின் ஒவ்வொரு மூலையிலுமிருந்து கிட்டும் அனுபவங்களும் ஒவ்வொரு நாட்டின் அனுபவங்களும் பொதுமைப்படுத்தப்படும் ஒரு மையமாகும். டோக்ளியாட்டி, அவருடைய சொற்பொழிவுகளை நிகழ்த்தும் நேரத்தில் இட்லரின் பாசிசம் அதிகாரத்திற்கு வந்து இரண்டு வருடங்களாகி விட்டன. எனவே இட்லருடைய பாசிசத்திற்கெதிரான போராட்டத்தில் ஜெர்மன் மக்களும், ஜெர்மன் கம்யூனிஸ்டுகளும் பெற்ற அனுபவங்களை அவர் விசேஷமாகப் பயன்படுத்திக் கொண்டது முற்றிலும் இயல்பானதே. கம்யூனிஸ்டு அகிலத்தின் குழுக்களில் உள்ளவர்கள் தொழிலாளி வர்க்க அரசியல் கட்சிகளிலிருந்து வந்தவர்கள். தம்முடைய செயல்பாட்டையும், நிர்ணயிப்புகளையும் மார்க்சியம் – லெனினியம் என்ற புரட்சிகர விஞ்ஞானத்தின் அடிப்படையில் அமைத்துக் கொண்டுள்ள கட்சிகளைப் பிரதிநிதித்துவப்படுத்துபவர்கள். ஆகையால் கம்யூனிஸ்டு அகிலத்தின் குழுக்கள், அனைத்துப் பிரச்சினைகளையும் தொழிலாளி வர்க்க மற்றும் மார்க்சிய – லெனினிய கண்ணோட்டத்தில் அணுகின. இந்த அணுகுமுறையானது டோக்ளியாட்டியின் சொற்பொழிவுகள் முழுவதிலும் உருக்குக் கம்பியாக ஊடுருவிச் செல்லுகிறது.

ஏகபோக மூலதனத்தின் சவால் தன்மை காரணமாக அமெரிக்காவிலுள்ள நாம் இத்தகைய சொற்பொழிவுகள் சுவையான வரலாறே தவிர குறிப்பாக நமக்குச் சம்பந்தப்பட்டதல்ல என்று மெத்தனமாகப் படிக்கும் போக்கிற்கு இடமளிக்கக் கூடாது. உண்மை என்னவென்றால், பாசிசத்திற்கு எதிரான போராட்டப் படிப்பினைகள் வேறெந்த மக்களையும்விட நமக்குத்தான் அதிகம் தேவைப்படுகின்றன. ஏனென்றால், வேறெந்த மக்களையும்விட அமெரிக்காவிலுள்ள நாம் பாசிச அபாயத்தை ஒரு தொடர்ச்சியான சவாலாக சந்திக்க வேண்டியுள்ளது. இந்த அபாயத்தை தற்பொழுது நாம் சந்தித்துக் கொண்டிருக்கிறோம்; அது மட்டுமல்ல, ஏகபோக முதலாளித்துவம் நம்மீது ஆதிக்கம் செலுத்திக் கொண்டிருக்கும் காலம் வரை பாசிசத்திற்கெதிராக போராடும்படி நாம் நிர்ப்பந்திக்கப்பட்டே தீருவோம். மிக அதிகபட்ச இலாபங்களை அடையும் தனது பாதையில் இதர வடிவங்களில் அமைந்த ஆட்சி தடைக்கற்களாக மாறும்பொழுது ஏகபோக முதலாளித்துவம் பாசிசத்தை ஆதரிக்க சற்றும் தயங்காது.

ஆனால், டோக்ளியாட்டி விவரித்து திட்டவட்டமாகக் கூறுவதுபோல வரலாற்றின் படிப்பினைகளை நாம் கற்றோமானால், “அது இங்கே நடக்காது” என்று தீர்மானிப்பதற்கான போராட்டத்தில் மக்களோடு நாமும் ஒரு முக்கியமான அம்சமாக இருப்போம்.

நாம் முதன் முதலாகக் கற்றுக் கொள்ள வேண்டிய படிப்பினையானது முதலாளித்துவத்தின் உள் கட்டமைப்புதான் ஜனநாயக  –  விரோதப் போக்கிற்கு வழி பிறக்கச் செய்கிறது என்பதும், அந்தப் போக்குதான் பாசிசத்தை நோக்கிச் செல்லும் இயக்கங்களுக்குத் தீனி போடுகிறது என்பதுமாகும். முதலாளித்துவத்தின் நெருக்கடி மற்றும் சரிவு காலகட்டத்தில் “பிற்போக்கான கொள்கைகளை நோக்கிச் செல்லும் போக்கு முதலாளித்துவத்தில்” தலைதூக்கும் என்று டோக்ளியாட்டி கூறுகிறார். ஏகபோக முதலாளித்துவம், அதனுடைய பொதுவான நெருக்கடி காலகட்டத்தில் மிக உச்சபட்ச தொழில் இலாபமடையும் கொள்கைகளை பின்பற்ற முடியாது. இத்தகைய கொள்கைகளுக்கெதிராக மக்கள் தலையிடும்படியான மிகக் குறைந்தபட்ச சாத்தியப்பாட்டை ஜனநாயக அமைப்புகள் ஏற்படுத்தினால்கூட ஏகபோக முதலாளித்துவம் அத்தகைய அமைப்புகளை ஒழித்துக்கட்டுவதில் இறங்கும். அது, ஜனநாயக ஆட்சிக்குப் பதிலாகப் பிற்போக்கான இராணுவ ஆட்சிகளைக் கொண்டு வருவதற்கு முற்படும். பாசிசம் என்பது இத்தகைய பெரும் தொழில் வர்த்தக சர்வாதிகாரங்களின் மிகவும் கொடூரமான, நாசகரமான, வளர்ச்சியடைந்த வடிவமேயாகும்.

தோழர் டோக்ளியாட்டியின் சொற்பொழிவுகள் வாட்டர்கேட் சம்பவம் சம்பந்தப்பட்ட நிகழ்ச்சிப் போக்குகளுக்கு ஒரு புதிய பரிமாணத்தை அளிக்கின்றன. ஏனென்றால் நிக்சனுடைய நிர்வாகமும் வாட்டர்கேட் சம்பவமும் ஒரு பாசிச கட்டமைப்பு உருவாவதற்கு இட்டுச்செல்லக்கூடிய ஓர் அமைப்பைத் தோற்றுவிக்கத் திட்டமிட்ட சதி நடந்திருப்பதை அம்பலப்படுத்துகின்றன.

இந்த நிகழ்ச்சிப் போக்கானது நிக்சனிலிருந்து தொடங்கவில்லை. இதற்கு முன்பாகவே இந்த வடிவமைப்பானது மிகவும் நன்கு திட்டமிடப்பட்டிருந்தது. அரசியல், இராணுவ மற்றும் பொருளாதார சக்தியானது நிர்வாகப் பிரிவின் கரங்களில் படிப்படியாகக் குவிக்கப்பட்டு வந்தது. இந்த நிர்வாகப் பிரிவானது பெரு முதலாளித்துவ முதலைகள் தவிர வேறு எவராலும் அணுக முடியாதது. அமெரிக்க காங்கிரசும் ஜனாதிபதியினுடைய அமைச்சரவையும்கூட மெல்ல மெல்லப் புறக்கணிக்கப்படலாயின. எஃப்பிஐயும் சிஐஏயும் சர்வாதிகார ஆட்சியின் கருவிகளாயின; இவை ஜெர்மனி மற்றும் இத்தாலிய பாசிசத்தின் கையேடுகளில் கூறப்பட்டிருப்பவற்றை ஆதாரமாகக் கொண்டு செயல்படலாயின. பெருமுதலாளித்துவ பிற்போக்குக் கொள்கைகளை எதிர்ப்பவர்கள் அனைவரையும் பெரும் எண்ணிக்கையில் கைது செய்வதற்காக நிக்சன் நிர்வாகம் நிர்வாக உத்தரவுகளைத் தயாரித்திருந்தது. எந்தவொரு பிரச்சினையிலும் எதிர்த்து ஒரு வார்த்தை கூறினாலும் கூட இப்படி எதிர்ப்பவர்களின் பெயர்களும் அவர்களின் வாழ்க்கை விபரங்களும் மிகப் பெருமளவில் கணிப்பொறியில் பதிவு செய்யப்பட்டு நிக்சன் நிர்வாகத்திற்குக் கிடைத்திருப்பது போன்று இட்லருக்கும் முசோலினிக்கும் கூட கிடைத்திருக்கவில்லை எனலாம். இத்தகைய பெயர் பட்டியல்கள் இன்றும் போர்டு நிர்வாகத்திடம் இருப்பதைக் காணலாம். இத்தகைய “பிற்போக்கான பாதை” பாசிசத்திற்கான அடித்தளத்தை அமைத்துக் கொடுத்தது.

டோக்ளியாட்டி சுட்டிக்காட்டியுள்ள படிப்பினைகள் நமக்கு மிகுந்த முக்கியத்துவமுடையவையாகும். ஏனென்றால் வாட்டர்கேட் சம்பவம் நிக்சனை அம்பலப்படுத்தி அவரை ராஜினாமா செய்யும்படி நிர்ப்பந்தித்ததானது இத்தகைய பிற்போக்கு சக்திகளுக்கு ஒரு பெரும் அடியாகும். ஆனாலும் அது ஏகபோக முதலாளித்துவத்தின் “உள்ளார்ந்த பிற்போக்குத்தனத்துக்கு” ஒரு முடிவு கட்டவில்லை. “இந்தப் பிற்போக்குத்தனம்” இன்னும் உயிரோடுதான் உள்ளது.

பாசிசமானது எப்பொழுதும் பொய்யான மற்றும் வாய்ச்சவடால் வடிவங்களிலேயே செயல்பட்டுக் கொண்டிருக்கின்றது. அதிலும் குறிப்பாக பாசிசம் என்பது ஏகபோக மூலதனத்தின் மிகவும் பிற்போக்கான பகுதியின் அப்பட்டமான சர்வாதிகாரம் என்பதை அது மூடிமறைக்கவே முயற்சிக்கிறது.

பின்னோக்கிக் காணும் பொழுது, பாசிசம் என்பதற்கான விளக்கம் குறித்து இதற்கு முன்னர் நடைபெற்ற எத்தனை எத்தனையோ விவாதங்களும், வாதப் பிரதிவாதங்களும் தற்பொழுது அருவமானதாகவே தோன்றுகின்றன.

அதற்குக் காரணம் பாசிசத்தின் அடிப்படை இயல்பு தற்பொழுது எல்லோருக்கும் நன்கு தெரிந்துவிட்டதேயாகும். கம்யூனிஸ்டு வட்டாரங்களில் நடத்தப்பட்ட விவாதமானது இதர இடதுசாரி – மிதவாதி வட்டாரங்கள் கொண்டிருந்த தவறான கருத்துக்களைக் குறித்த விவாதமாகவே இருந்தது. இந்தக் கருத்துக்களில் பெரும்பாலானவை வார்த்தை ஜாலங்களின் தாக்கத்தைப் பிரதிபலித்தன என்பதுடன் பாசிசம் பரப்பிய பொய்ம்மையை மூடிமறைப்பதாகவும் இருந்தன.

பாசிசம் என்பது “ஒரு நடுத்தரவர்க்க குட்டி பூர்ஷ்வா இயக்கம்” என்ற தவறான கூற்றை அம்பலப்படுத்துவது அவசியமாகும். குட்டி பூர்ஷ்வா பகுதியானது பாசிசத்தின் வெகுஜன அடித்தளமாக இருந்தது, இருந்து வருகிறது என்ற அம்சத்தைக் கூறவேண்டியது அவசியம். ஆனால் பாசிசத்தின் அரசியல் சாராம்சம் என்பது அதுவல்ல.

படிக்க:
♦ காவியும் கார்ப்பரேட்டும்தான் என் கண்கள் ! வெற்றி உரையில் மோடி பெருமிதம் !
♦ பாஜக வெற்றி : பாசிஸ்டுகளை முறியடிக்க குறுக்கு வழி ஏதும் இல்லை !

டிராட்ஸ்கியவாதிகள் இந்தப் பிரச்சினைகளை குழப்புவதற்கு முயற்சிக்கிறார்கள்; “போனபார்ட்டிச இயக்கம்” என்று பாசிசத்தை அழைப்பதன் மூலம், பாசிசத்தின் வர்க்க வேர்களை மறைக்க எத்தனிக்கிறார்கள். வலதுசாரி சோசலிஸ்டுகளோ, பாசிசத்தில் சில சாதகமான அம்சங்களைக் கண்டுபிடித்து அவற்றைப் பரப்ப முயற்சிக்கிறார்கள்.

பாசிசம் என்பது ஏகபோக மூலதனத்தின் மேல்தட்டு வட்டாரங்களின் மிகவும் பிற்போக்கான பகுதியினருடைய அப்பட்டமான, மிகக் கொடூரமான சர்வாதிகாரம் என்று விளக்க வேண்டியது அவசியமாகும்: அவ்வாறு செய்தால்தான் உண்மையான பகைவனைத் திட்டவட்டமாக சுட்டிக்காட்டி அவனுக்கெதிரான போராட்டத்தை நடத்துவது சாத்தியமாகும். அதன்பிறகே பாசிசத்திற்கெதிராகப் பரந்துபட்ட இயக்கத்தை அணிதிரட்டுவது சாத்தியமாகும்.

(தொடரும்)

பால்மிரோ டோக்ளியாட்டி
ஆற்றிய பாசிசம் குறித்த விரிவுரைகள்
தமிழில் : ரா. ரங்கசாமி
பக்கங்கள் : 233
விலை : ரூ. 50.00
வெளியீடு : நியூ செஞ்சுரி புக் ஹவுஸ்