“தி இந்து” பத்திரிகையில் இணை ஆசிரியராக உள்ள ஸியாவுஸ் சலாம் (ZIYA US SALAM), “இந்து இந்தியாவில் முஸ்லிமாக இருப்பது” (Being Muslim in Hindu India) என்ற நூலை எழுதியுள்ளார். பா.ஜ.க – ஆர்.எஸ்.எஸ் ஆட்சிக்கு வந்தது முதல் இந்தியாவில் முஸ்லிம் மக்கள் இரண்டாம்தர குடிமக்களாக்கப்பட்டுவருவது குறித்தும், ராமன் கோவில் திறப்பு விழாவிற்கு முன்பு இந்துத்துவ வெறியர்களால் முஸ்லிம் மக்கள் எந்தளவிற்கு அச்சுறுத்தல்களுக்குள்ளாகிறார்கள் என்பது குறித்தும் ஸியாவுஸ் சலாம் பகிர்ந்த அனுபவத்தின் மொழியாக்கம்.

இந்துமதவெறியர்களை கொண்ட இந்தியாவில் ஒரு முஸ்லிமாக இருப்பது அந்நியமாகவும் மனசோர்வாகவும் இருக்கிறது. முஸ்லிம்கள் 20 கோடி பேர் இருக்கலாம். ஆனால், இன்றைய இந்தியாவில் முஸ்லிம்கள் காணாமலாக்கப்பட்டிருக்கிறார்கள். வட இந்தியாவின் சில பகுதிகளில் ஒரு முஸ்லிமாக இருப்பது பாதுகாப்பானது அல்ல.

1527 முதல் 1992 வரை இருந்த பாபர் மசூதி, இந்துத்துவ கரசேவகர்களால் சுக்குநூறாக்கப்பட்ட இடத்தில், இன்று (ஜன. 22) அயோத்தியில், ராமன் கோவில் கும்பாபிஷேகம் நடத்துவதாக அறிவிப்பு வெளியாகியுள்ளது. சமீப நாட்களில் கிராமங்கள் மற்றும் நகரங்களில் இதுதான் பேசுபொருளாக இருக்கிறது.

பாபர் மசூதி இடித்து நொறுக்கும் வரை போலீசும் அரசும் ஒதுங்கியே நின்று வேடிக்கைப் பார்த்தது. இதற்கு அடுத்தடுத்த நாட்களில் பல்வேறு இடங்களில் இந்துமதவெறியர்கள் கலவரத்தில் ஈடுபட்டனர். இக்கலவரத்தில் 2,000-க்கும் மேற்பட்ட முஸ்லிம் மக்கள் கொல்லப்பட்டனர். 2019-ஆம் ஆண்டு பாபர் மசூதி இடிக்கப்பட்டது “சட்டத்தின் ஆட்சியின் அதிர்ச்சிக்குரிய மீறல்” என்று உச்சநீதிமன்றம் தீர்ப்பளித்த போதிலும், நிலத்தை இந்து தரப்பினரிடம் ஒப்படைத்தது.

இன்று இடிக்கப்பட்ட பாபர் மசூதியின் மீது ராமனுக்கு பிரம்மாண்டமான கோவில் கட்டியெழுப்பப்படுகிறது. பாபர் மசூதி இருந்த இடத்தில்தான் ராமன் பிறந்தார் என்றும் 16 முதல் 19-ஆம் நூற்றாண்டு வரை இந்தியாவின் பெரும்பகுதியை முகலாயர்கள் ஆண்டபோது, இந்து கோவில்களை இடித்துவிட்டனர் என்றும் இந்துத்துவவாதிகள் நியாயவாதம் கற்பிக்கின்றனர்.

முஸ்லிம்களுக்காக பேச இந்திய அரசில் யாரும் இல்லை. 1947-ஆம் ஆண்டு ‘சுதந்திரத்திற்கு’ பின்னர், முதல்முறையாக முஸ்லிம் அமைச்சரவை அமைச்சரோ அல்லது ஒரு பாராளுமன்ற உறுப்பினரோ கூட ஆளும் கட்சியில் இல்லை. இந்தியாவின் 28 மாநிலங்களில் ஒரு முஸ்லிம் முதல்வர்கூட இல்லை. அயோத்தி அமைந்துள்ள உ.பி-யில் காவி உடை அணிந்து இந்து சாமியார் ஆட்சி செய்கிறார். தனது சமூக ஊடகத்தில் முஸ்லிம் பண்டிகைகளுக்கு வாழ்த்துகள்கூட தெரிவிக்காதவர் அவர்.

படிக்க: ராமன் கோவில் திறப்பு: பாபர் மசூதி இடிப்பை நினைவுகூரும் முஸ்லீம்கள்!

சமீப காலமாக, உத்தரப் பிரதேசம், உத்தரகாண்ட், ஹரியானா, மத்தியப் பிரதேசம் ஆகிய வட மற்றும் மத்திய இந்திய மாநிலங்களில் முஸ்லிம்களிடையே புதிய பயம் தொற்றியுள்ளது. எங்கும் காவியில் அலையும் ராம பத்கர்களின் முகங்களில் ஆவேசமும் காணக்கிடக்கிறது.

டெல்லியில் வரலாற்று சிறப்புமிக்க ஜமா மசூதியில் இருந்து சில அடி தூரத்தில், கட்டா மசூதியின் வழியாக காவி உடை அணிந்து, ஜெய்ஸ்ரீராம் என கோஷமிட்டவாறு, மோட்டார் பைக், டிரக்குகள், ஜீப்களில் பேரணி செல்கின்றனர். வெற்றிக் களிப்புடன் கூடிய இக்கூச்சலில் மதிய தொழுகை சீர்குலைகிறது.

கான் சந்தையில் நான் சென்றுகொண்டிருந்தபோது, காவி பந்தலில் ராம பக்தி பாடல் ஒலித்து கொண்டிருந்தது. இதனால், இதற்கு அருகாமையிலுள்ள பண்டாரா சாலையில் இருக்கும் மசூதிக்கு முஸ்லிம்கள் வருவது குறைந்துவிட்டது, வீடுகளில் இருந்தே தொழுகை நடத்தி வருகிறார்கள்.

இது போன்றுதான் மற்ற இடங்களிலும், குறிப்பாக இந்துத்துவவாதிகள் அதிகமுள்ள வட இந்தியாவிலுள்ள நகரங்கள், கிராமங்களில் முஸ்லிம்கள் வீட்டுக்குள்ளேயே இருக்கும் நிலைக்கு தள்ளப்பட்டிருக்கிறார்கள். உத்தரகாண்டின் டேராடூனில், பழைய கடிகார கோபுரத்தின் மேலிருந்து கீழாக ராமன் படம் தொங்கவிடப்பட்டுள்ளது. அதே உத்தரகாண்டில், புரோலா எனும் பகுதியில் முஸ்லிம் கடைகளுக்கு வெளியே முஸ்லிம் கடைகள் என அடையாளங்காணும் விதமாக “X” என்ற குறியீடு இந்துத்துவவாதிகளால் வரையப்பட்டிருக்கிறது. இதனால் அச்சமடைந்த முஸ்லிம் மக்கள் பலர் அவ்விடங்களை விட்டு வெளியேறினர்.

படிக்க: பாபர் மசூதிக்கு அடியில் ராமர் கோயில் இருந்ததா? | மீள்பதிவு

மேற்கு உத்தரப் பிரதேசத்தின் மீரட்டில், ஜனவரி மாத தொடக்கத்தில் சிறு வணிகர்கள் உள்ளிட்ட பலர் தங்களது ரயில் முன்பதிவுகளை ரத்து செய்து, பயணத்தை நிறுத்திவிட்டனர். திருமணங்கள் உள்ளிட்ட நிகழ்ச்சிகளை ஒத்திவைத்தனர்.

குருகிராம், நொய்டா உள்ளிட்ட உயர்தர நகரங்களில் இந்து பண்டிக்கை கொண்டாட்டம் உள்ளிட்ட இந்துத்துவவாதிகளின் நடவடிக்கைகளால் முஸ்லிம்கள் தங்கள் வீடுகளிலேயே முடங்கி போயுள்ளனர். இந்நகரங்களில் அதிகாலையில் காலை வணக்கம் என்ற சொல்லாடலுக்கு பதிலாக ஜெய் ஸ்ரீராம் என்பது வழக்கமாகிவிட்டது.

இதற்கிடையில், முஸ்லிம்கள் மாட்டிறைச்சி உண்ணுகிறார்கள் என்றும் முஸ்லிம் பாகிஸ்தானியரின் அடையாளத்தில் இருப்பதாகவும் முஸ்லிம் மாணவர்கள் கேலிக்குள்ளாக்கப்படுகின்றனர். “ஒரு இந்திய முஸ்லிம் இந்தியனே அல்ல” என்பதுதான் மோடியின் இந்தியாவில் உள்ள இளம்பிஞ்சுகளின் மனதில் விதைக்கப்பட்டிருக்கிறது.

கோவில் கும்பாபிஷேகத்தைப் பற்றிய செய்தியை சேகரிக்க அயோத்திக்கு சென்ற முஸ்லிம் பெண் பத்திர்கையாளர் ஒருவர், இந்துக்கள் போல பொட்டு வைத்திருக்க வேண்டிய கட்டாயத்திற்கு தள்ளப்பட்டதாகவும், கோவில் திறப்பு விழாவிற்கு முன்பு அங்கிருந்து தான் திரும்பிவிட நினைப்பதாகவும் கூறினார். அந்நிய உணர்வு, பயம் என்பது ஒரு முஸ்லிமுடன் நிரந்தரமாக பின்னிபிணைந்திருக்கிறது. முஸ்லிம் தனிமையில் இருப்பதை உணர்கிறான்.

2014 இல் மோடியும் இந்துத்துவவாதிகளும் ஆட்சிக்கு வந்ததில் இருந்து இந்திய முஸ்லிம்கள் அச்சுறுத்தலுக்குள்ளாகி வருகின்றனர். இன்று ராமன் கோவில் திறப்பு விழாவிற்கு பிறகு இந்த நிலை மேலும் மோசமாகிவிடுமோ என்ற அச்சம் அதிகமாக உள்ளது.

மொழிபெயர்ப்பு: ஆதினி

சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube

இந்து மதவெறியர்களால் பாபர் மசூதி இடிக்கப்பட்டு ஆண்டுகள் பல ஓடிவிட்டன. இருந்தும் அன்று முஸ்லிம் மக்கள் மத்தியில் தோற்றுவிக்கப்பட்ட பயபீதி இன்று முன்பைக் காட்டிலும் மேலோங்கியுள்ளது. ஜனவரி 22 ஆம் தேதி, ராமன் கோவில் திறப்பு விழாவின் போது, “பயணத்தை தவிர்த்து வீட்டிற்குள்ளேயே இருப்பது” என்ற மனநிலைக்கு அயோத்தியைச் சுற்றியுள்ள பகுதியில் வாழும் பெரும்பாலான முஸ்லிம் மக்கள் வந்திருக்கின்றனர். ஆனால், முஸ்லிம்கள் மீதான வெறுப்பு என்பது அந்த ஒருநாளில் கரைந்து போகக்கூடிய விஷயம் அல்ல. ராமன் கோவில் திறப்பு விழாவிற்கு பிறகு, இன்னும் மூர்க்கமாகவும் கொடூரமாகவும் முஸ்லிம் மக்கள்மீது மதவெறி தாக்குதல்கள் கட்டவிழ்த்துவிடப்படும். இதுகுறித்து அயோத்தியில் தற்போது வசித்துவரும் முஸ்லிம் மக்களின் மனநிலை என்ன என்பதை அவர்களின் அனுபவங்கள் வாயிலாகக் காண்போம்.

தற்போது ராமன் கோவில் திறப்பு விழா குறித்தும் 1992 இல் பாபர் மசூதி இடிக்கப்பட்டது குறித்தும் நினைவு கூர்கிறார் இரண்டு குழந்தைகளின் தாயான சபா காலித்.

“டிசம்பர் 6, 1992 அன்று லக்னோவில் உள்ள எங்களது வீட்டிற்கு 100 கி.மீ. தொலைவில் உள்ள பாபர் மசூதி இடிக்கப்பட்ட செய்தியை மரண பீதியுடன் கேட்டோம். அன்று எனக்கு வயது 10.

இந்து குடும்பங்கள் சூழ்ந்திருக்க நாங்கள் மட்டும்தான் முஸ்லிம். ஆனால், இதற்கு முன்பு இதுபோல் ஒருபோதும் யோசித்து பார்த்ததில்லை. ’யாரும் வீட்டை விட்டு வெளியே வரவேண்டாம்’ என தாத்தா கூறினார். நாங்கள் எலிகளை போல அமைதியாக பல நாட்கள் வீட்டிற்குள்ளேயே முடங்கி கிடந்தோம்.

கலவரத்தில் முஸ்லிம்கள் கொல்லப்படுவது, ரயில்கள் தீவைத்து எரிக்கப்படுவது என அடுத்தடுத்து வந்த செய்திகளால் நாங்கள் பீதியுற்றோம். இதை இப்போது நினைவு கூரும்போதே என் உடல் நடுங்குகிறது. இதற்கு முன்பு நாங்கள் எங்கள் உயிருக்கு ஒருபோதும் பயந்ததில்லை. அந்த உணர்வை விவரிக்க முடியாது. நல்வாய்ப்பாக, நாங்கள் வசித்து வந்த பகுதியில் இந்துமத வெறி ஊட்டப்பட்டவர்கள் யாரும் இல்லை. இருந்தும் நாங்கள் அந்நியப்படுத்தப்பட்டோம்” என்கிறார் சபா காலித்.

30 வருடங்களுக்கு பிறகு தற்போதும் முஸ்லிம் இந்துக்கள் சேர்ந்து வாழும் பகுதியில்தான் சபா காலித் வசித்து வருகிறார். சபா காலித்தின் வீட்டின் கதவில் குரான் வசனம் எழுதப்பட்டிருப்பதை பார்த்தும், ராமன் பாடலை பாடியபடியே, அயோத்தியில் ராமன் கோவில் கட்ட காவிக்கொடியுடன் கதவை தட்டி நன்கொடை கேட்டுள்ளனர்.

“எனது இரண்டு குழந்தைகளும் சிறுவர்களாக இருப்பதால், பயபீதியை ஏற்படுத்தக்கூடாது என பாபர் மசூதி இடிப்பு பற்றி அவர்களுக்கு சொல்லவில்லை. ஆனாலும் வெளி உலகம் அவர்களுக்கு கற்பித்துவிடுகிறது. அவர்கள் பள்ளிக்கூடத்தில் நடக்கும் ஒவ்வொரு நிகழ்வும் இந்துமதம் சார்ந்ததாகவே இருக்கிறது. இரண்டு ஆண்டுகளுக்கு முன்பு எனது 12 வயது மகனின் வகுப்பு மாணவன் ஒருவன், தன் பெற்றோர் இந்துக்களுடன் மட்டுமே நட்பு கொள்ள சொன்னதாக கூறினான். அதேபோல, என் 8 வயது மகன் வகுப்பில் படிக்கும் மாணவி ஒருவர், ’நான் இந்து நீ முஸ்லீம். இரண்டு பேரும் எதிரிகள்’ என்று அவனிடம் கூறியிருக்கிறாள்.

“எனது குழந்தைகள் இந்த நாட்டில் வெறுப்பை எதிர்கொள்வதை நான் விரும்பவில்லை. அவர்கள் எங்களைப் போலவே குழந்தை பருவத்தை அனுபவிக்க வேண்டும் என்று விரும்புகிறேன். ஒருவர் வலியில் துடித்துக்கொண்டிருக்கும்போது மற்றொருவர் கொண்டாடுவது என்ன மனநிலை. நாங்கள் இந்த நாட்டில் நம்பிக்கையற்றவர்களாகவும் ஏமாற்றப்பட்டவர்களாகவும் உணர்கிறோம். இரண்டாம் தர குடிமக்களை போலக்கூட நாங்கள் நடத்தப்படவில்லை” என்கிறார் சபா காலித்.

***

வெளிநாட்டில் கல்வியாளராக இருக்கும் ஒருவர், இந்தியாவில் இருக்கும் தனது பெற்றோரை சந்திக்க ஜனவரி வரவிருந்தார். ஆனால், “கோவில் திறப்பு விழாவில் என்ன நிகழுமோ” என்ற அச்சத்தில் பயணத்தை பிப்ரவரிக்கு தள்ளிவைத்துவிட்டார்.

பெயர் சொல்ல விரும்பாத இவருக்கு பாபர் மசூதி இடித்தபோது வயது 9. பாபர் மசூதி இடிப்பு குறித்து பெரிதும் கவலைப்படாத இவர், பள்ளிக்கூடத்தில் முஸ்லிம்கள் ஏன் மசூதியை விட்டுக்கொடுக்கவில்லை அவர்கள் வன்முறைகளில் ஈடுபடுகிறார்கள் என பல தொந்தரவுக்குள்ளாகியிருக்கிறார்.

2002 ஆம் ஆண்டு குஜராத்தில் மதவெறி கலவரம் குறித்து செய்தி கேட்டுகொண்டிருந்த போது, “முஸ்லிம்களை கொல்ல வேண்டும்” என்று ஆவேசத்தில் கத்தியிருக்கிறான். “நான் அங்கு இருந்ததை அந்த மாணவன் கவனிக்கவில்லை” என்கிறார் அவர்.

”போலிசாலும் நீதிமன்றத்தால் முஸ்லிம்கள் குறிப்பாக ஏழை முஸ்லிம்கள் மோசமான முறையில் நடத்தப்படுகிறார்கள். என் மகள் வளரும் போது இந்திய முஸ்லிம் குறித்து நான் என்ன சொல்வது” என கவலையடைகிறார்.

***

பாபர் மசூதி இடிக்கப்பட்டபோது வழக்கறிஞர் அஷ்மா இஸ்ஸாத் என்பவருக்கு ஒன்பது வயது. “அன்று நடந்த நிகழ்வு இன்றும் நினைவில் இருக்கிறது. அன்று மக்கள் கடுமையான தலைவரை பற்றி பேசிவந்தனர். அவர்தான் அத்வானி” என்று தனது ஆதங்கத்தை வெளிப்படுத்துகிறார் ஆஷ்மா.

டிசம்பர் 6, 1992 அன்று நடந்தது குறித்து மட்டுமல்ல, ராமன் கோவில் கட்டப்படுவதும் திறப்பு விழா கொண்டாடப்படுவதைக் கண்டும் அச்ச உணர்வை வெளிப்படுத்துகிறார், ஆஷ்மா. உ.பி. உயர்நீதிமன்றத்தில் மனித உரிமை வழக்கறிஞராக இருந்தாலும் அவரால் எதுவும் செய்யமுடியவில்லை. இதர முஸ்லிம் குடும்பத்தை போலத்தான் பயத்தில் உறைந்துள்ளார்.

“வெளிநாட்டில் வேலை கிடைத்தால் இந்தியாவை விட்டு வெளியேறுவோம் என தினமும் எண்ணுகிறேன். இப்படி சொல்ல வேதனையாகத்தான் இருக்கிறது. ஆனால் இதுதான் உண்மை” என்கிறார் கணத்த இதயத்துடன்.

ஆதினி

சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube