பிரெடரிக் எங்கெல்ஸ் : பாகம் – 3

பாகம் 2 : தத்துவஞானத்தை ஹெகலிடமிருந்து துவங்கிய எங்கெல்ஸ்

எங்கெல்சுக்கு முன்பே மிகப் பலர் பாட்டாளி வர்க்கத்தின் துன்ப துயரங்களை வர்ணித்து, அதற்கு உதவி புரிய வேண்டியதன் அவசியத்தை எடுத்துச் சொல்லியுள்ளனர். பாட்டாளி வர்க்கம் துன்ப துயரங்களை அனுபவிக்கும் வர்க்கம் மட்டுமல்ல, உண்மையிலே பாட்டாளி வர்க்கத்தின் வெட்கக் கேடான பொருளாதார நிலைமை தடுக்க முடியாத வகையில் அதை முன்தள்ளிச் செல்கிறது, தனது இறுதி விடுதலைக்காகப் போராடும்படி நிர்ப்பந்திக்கிறது என்று எங்கெல்ஸ்தான் முதன்முதலாகச் சொன்னவர். மேலும், போராடும் பாட்டாளி வர்க்கம் தன் கையையே தனக்குதவியாகக் கொள்ளும். தொழிலாளி வர்க்கத்தின் அரசியல் இயக்கம் தங்களது விமோசனம் சோசலிசத்தில் மட்டுமே உள்ளது என்று தொழிலாளர்கள் அறியும் நிலைக்குத் தவிர்க்க முடியாதபடி கொண்டுபோய்விடும்.

மறுபக்கத்தில், தொழிலாளி வர்க்கத்தின் அரசியல் போராட்டத்தின் இலட்சியமாக ஆகும் போதுதான் சோசலிசம் ஒரு சக்தியாக ஆகும். இங்கிலாந்தில் தொழிலாளி வர்க்கத்தின் நிலைமை பற்றிய எங்கெல்ஸ் நூலிலுள்ள பிரதான கருத்துக்கள் இவைதான். சிந்தனையுள்ள, போராடிக் கொண்டிருக்கிற பாட்டாளிகள் எல்லோரும் இந்தக் கருத்துக்களை இப்போது ஏற்றுக் கொண்டிருக்கிறார்கள். ஆனால் அந்தக் காலத்தில் அவை முழுக்க முழுக்கப் புதியனவாயிருந்தன. சிந்தனையைக் கவரும் நடையில் எழுதப்பட்ட இந்நூலில் இந்தக் கருத்துக்கள் வெளியிடப்பட்டன.

படிக்க :
♦ நூல் அறிமுகம் : மார்க்ஸின் மூலதனம் பற்றி … எங்கெல்ஸ்
♦ பாட்டாளி வர்க்கக் கட்சி குறித்து மார்க்ஸ் – எங்கெல்ஸ்

பிரிட்டிஷ் பாட்டாளி வர்க்கத்தின் துன்ப துயரங்களைப் பற்றிய முற்றிலும் உண்மையான, அதிர்ச்சி உண்டாக்கத்தக்க சித்திரங்கள் இந்நூலிலே நிறைந்துள்ளன. இந்த நூல் முதலாளித்துவ அமைப்பின் மீதும் முதலாளி வர்க்கத்தின் மீதும் மிகப் பயங்கரமான குற்றச்சாட்டாக விளங்கியது. மக்களின் மனத்தில் அது பசுமரத்தாணிபோல் பதிந்தது. எங்கெல்சின் நூல் நவீனகாலப் பாட்டாளி வர்க்கத்தின் நிலைமையைப் பற்றிய மிகச் சிறந்த சித்திரத்தை வழங்குகிறது என்று இதிலிருந்து எங்கும் மேற்கோள் காட்டத் தொடங்கினார்கள். உண்மையிலே பார்த்தால், 1845-ம் ஆண்டுக்கு முன்னரும் சரி, பின்னரும் சரி, தொழிலாளி வர்க்கத்தின் துன்பதுயரங்களைப் பற்றி இவ்வளவு வியக்கத்தக்க உண்மையான சித்திரம் வெளிவந்தது கிடையாது.

இங்கிலாந்துக்கு வந்த பிறகுதான் எங்கெல்ஸ் சோசலிஸ்டு ஆனார். அந்தக் காலத்தில் பிரிட்டிஷ் தொழிலாளர் இயக்கத்தின் தலைவர்களுடன் மான்செஸ்டரில் எங்கெல்ஸ் தொடர்பு கொண்டார்; பிரிட்டிஷ் சோசலிசப் பத்திரிகைகளில் எழுதத் துவங்கினார். 1844-ம் ஆண்டில், ஜெர்மனிக்குத் திரும்பிவரும் வழியில், பாரிஸ் நகரில் அவர் மார்க்சைச் சந்தித்துப் பழகினார். மார்க்சுடன் ஏற்கெனவே அவர் கடிதப் போக்குவரத்து வைத்துக் கொண்டிருந்தவர்தான். பாரிசில் பிரெஞ்சு சோசலிஸ்டுகளின், பிரெஞ்சு வாழ்க்கையின் செல்வாக்கின்கீழ் மார்க்சும் சோசலிஸ்டு ஆகிவிட்டார்.

இங்கே அவ்விரு நண்பர்களும் சேர்ந்து புனிதக் குடும்பம் அல்லது விமர்சன வகைப்பட்ட விமர்சனத்தின் விமர்சனம் என்று தலைப்பிட்ட ஒரு நூலை எழுதினார்கள். இங்கிலாந்தில் தொழிலாளி வர்க்கத்தின் நிலைமை என்ற நூல் வெளியாவதற்கு ஒரு வருடத்துக்கு முன்பே இது வெளிவந்தது. இதன் பெரும் பகுதியை மார்க்ஸ்தாம் எழுதினார். இந்நூலில் புரட்சிகரமான பொருள்முதல்வாத சோசலிசத்தின் அடிப்படைகள் – அதன் முதன்மையான கருத்துக்களை மேலே விளக்கிச் சொல்லியிருக்கிறோம் – சொற்பமான அடங்கியுள்ளன. ”புனிதக் குடும்பம்” என்பது தத்துவஞானிகளான பௌவர் சகோதரர்களையும், அவர்களைப் பின்பற்றியோரையும் குறிக்கும் கேலிப் பெயராகும்.

எல்லா வகையான யதார்த்தத்திற்கும் அப்பாற்பட்ட, கட்சிகளுக்கும் அரசியலுக்கும் அப்பாற்பட்ட ஒரு விமர்சனத்தை இந்தக் கனவான்கள் பிரச்சாரம் செய்தார்கள். எல்லாவிதமான நடைமுறை நடவடிக்கைகளையும் அது நிராகரித்தது; நம்மைச் சூழ்ந்துள்ள உலகையும், அதில் நடந்துவரும் நிகழ்ச்சிகளையும் பற்றி அந்த விமர்சனம் வெறுமே ”விமர்சன” கண்கொண்டு பார்ப்பதோடு நின்று விட்டது. இந்தக் கனவான்கள் – பௌவர் சகோதரர்கள் – பாட்டாளி வர்க்கம் விமர்சனப் பார்வையற்ற கும்பல் என்று இழிவுபடுத்தினார்கள். சுத்த அபத்தமான, தீங்கு விளைவிக்கக் கூடிய இந்தப் போக்கை மார்க்சும் எங்கெல்சும் தீவிரமாக எதிர்த்தார்கள்.

ஆளும் வர்க்கங்களாலும் அரசாலும் மிதித்து நசுக்கப்பட்டு வரும் தொழிலாளி என்ற அசல் மனிதப் பிறவியின் சார்பாக வீண் சிந்தனை அல்ல, மேம்பட்ட சமுதாய அமைப்பு முறைக்காகப் போராட்டம் நடத்த வேண்டும் என்று மார்க்சும் எங்கெல்சும் கோரினார்கள். இந்தப் போராட்டத்தை நடத்துவதில் அக்கறை கொண்டுள்ள சக்தியாக, இந்தப் போராட்டத்தை நடத்துவதற்குத் திறன் பெற்றுள்ள சக்தியாக, பாட்டாளி வர்க்கத்தை அவர்கள் கருதினார்கள் என்பதில் ஐயமில்லை. புனிதக் குடும்பம் வெளிவருவதற்கு முன்பே, மார்க்சும் ரூகேயும் நடத்திய Deutsch-Franzosische Jahrbicher என்ற பத்திரிகையில் அரசியல் பொருளாதாரம் பற்றிய விமர்சனவுரைக்கு ஒரு நகல் என்ற தொடரை எங்கெல்ஸ் வெளியிட்டார்.

அக்கட்டுரைகளில் தனிச்சொத்தின் ஆதிக்கத்தால் ஏற்பட்டுத் தீரும் விளைவுகள் என்ற முறையில், நவீன காலப் பொருளாதார அமைப்பு முறையின் முதன்மையான தோற்றங்களை சோசலிச நோக்குநிலையிலிருந்து பரிசீலித்தார். அரசியல் பொருளாதாரத்தைப் பயில்வதென்று மார்க்ஸ் முடிவு செய்ததற்கு அவர் எங்கெல்சுடன் தொடர்பு கொண்டிருந்தது ஒரு காரணம் என்பதில் சந்தேகமேயில்லை. அரசியல் பொருளாதாரம் என்ற விஞ்ஞானத் துறையில் மார்க்ஸ் அசல் புரட்சியையே உண்டாக்கிவிட்டார்.

1845-லிருந்து 1847 வரை எங்கெல்ஸ் பிரஸ்ஸெல்சிலும் பாரிசிலும் வாழ்ந்தார். விஞ்ஞானப் பயிற்சியோடு கூடவே பிரஸ்ஸெல்ஸ், பாரிஸ் நகரங்களிலுள்ள ஜெர்மன் தொழிலாளர்களிடையே நடைமுறை நடவடிக்கைகளிலும் அவர் ஈடுபட்டிருந்தார். இங்கே இரகசியமாயிருந்த ஜெர்மன் கம்யூனிஸ்டுகளின் லீக்” என்ற நிறுவனத்துடன் மார்க்சும் எங்கெல்சும் தொடர்பு ஏற்படுத்திக் கொண்டனர். அவர்கள் வரையறுத்து விவரித்துள்ள சோசலிசத்தின் அடிப்படைக் கோட்பாடுகளை விளக்கும்படி அந்த லீக் அவர்களைப் பணித்தது. இவ்வழியேதான் மார்க்சும் எங்கெல்சும் எழுதிய கம்யூனிஸ்டுக் கட்சி அறிக்கை என்ற புகழ்பெற்ற நூல் 1848-ல் வெளிவந்தது. இந்தச் சிறு பிரசுரம் மிகப்பெரிய நூல் தொகுதிகளுக்குச் சமமானது. அதன் உணர்ச்சி நாகரிக உலகில் ஒழுங்கமைப்பு பெற்று அணிதிரண்டு போராடி வரும் பாட்டாளி வர்க்கம் முழுவதையும் இன்றைக்கும்கூட ஊக்குவித்து இயக்கிச் செல்கிறது.

(தொடரும்)

உட்கட்சிப் போராட்டம் || பாகம் – 5

பாகம் – 4

III. இயக்க மறுப்பியல் வகைப்பட்ட, மிதமிஞ்சிய உட்கட்சிப் போராட்டத்தின் பிரதிபலிப்புகள்

தோழர்களே!

இன்று உட்கட்சிப் போராட்டத்தில் காணப்படும் மூன்று திரிபுகளில் முதல் திரிபான தாராளவாதம் என்னும் திரிபை நான் விவாதிக்கப் போவதில்லை. இன்று கட்சிக்குள் தாராளவாதத் திரிபு அவ்வளவு பிரமாதமாகவில்லை என்றோ, அல்லது தாராளவாதத்தை எதிர்த்துச் சண்டையிடுவது முக்கியமானதல்ல என்றோ நான் நினைக்கவில்லை. தாராளவாதப் போக்கைப் பற்றியும் ஸ்தூலமான பிரச்சினைகளில் அதன் பிரதிபலிப்பை பற்றியும் நமது தோழர்கள் நன்கு தெளிந்திருக்கிறார்கள் என்று நான் எண்ணவில்லை என்றபோதிலும் – ஏன் பல தோழர்கள் இன்னும் முழுவதும் தெளிவுபடவில்லை என்று எண்ணியபோதிலும் நான் இன்று அந்த விசயத்தைப்பற்றி பேசப்போவதில்லை.

எனக்கு சந்தர்ப்பம் வாய்க்கும் பொழுது பிறிதொரு சமயம் பேசுகிறேன். இங்கு, தாராளவாதப் போக்கு கட்சிக்குள் சமீப காலத்தில் கொஞ்சம் வளர்ந்திருக்கிறது என்றும், சில இடங்களில் உட்கட்சிப் போராட்டத்தில் அது பிரதான போக்காக ஆகியிருக்கிறதென்றும், கட்சிக்குள் உட்கட்சிப் போராட்டம் போதிய அளவுக்கு வளர்க்கப்படவில்லை என்று மட்டும் சுட்டிக்காட்ட விரும்புகிறேன். இந்தக் காரணத்தினால் பல தவறான போக்குகளும் விரும்பத்தகாத வளர்ச்சிகளும் காலாகாலத்தில் திறம்பட திருத்தப்படவில்லை. கட்சிக் கட்டுப்பாடு மெள்ள மெள்ள தளரத் தொடங்கி விட்டது. இது வெகு மோசம்.

இது ஏனெனில், நமது கட்சி சமீபத்தில்தான் அதிக எண்ணிக்கையில் அறிவாளிகளையும், புதிய கட்சி அங்கத்தினர்களையும் கட்சிக்குள் எடுத்துக் கொண்டிருக்கிறது; இவர்கள் பூர்ஷ்வா தாராளவாதத்தில் ஊறிப் போனவர்கள்; சித்தாந்த ரீதியிலும், அரசியல், அமைப்பு ரீதியிலும் தொழிலாளி வர்க்கத்தின் உருக்குப் போன்ற கட்டுப்பாட்டில் புடம் போடப்பட்டவர்கள் அல்ல. இவர்கள் அதற்கிடையில் சென்ற காலத்தில் “இடதுசாரி” தவறுகள் செய்தவர்கள். மிதமிஞ்சிய உட்கட்சிப் போராட்டத்திற்கு நின்றவர்கள்.

இப்பொழுது நேரெதிர் முகமாகத் திரும்பி, வலதுசாரி தாராளவாதத்தை செய்திருக்கிறார்கள். நீண்டகால ஐக்கிய முன்னணி சூழ்நிலையில், கட்சிக்குள் பூர்ஷ்வா வர்க்கம் தனது செல்வாக்கை பிரயோகிப்பதற்கு சந்தர்ப்பம் அதிகரித்திருக்கிறது. கட்சிக்குள் ஒளிந்து கொண்டிருக்கும் எதிர்ப்புரட்சிக்காரர்கள், கட்சியில் தாராளவாதத்தை வளர்ப்பதற்கு எல்லா முறைகளையும் கையாண்டுள்ளார்கள். கட்சி உணர்வை உறுதிப்படுத்தும் வேலைக்கு நாம் நிகழ்த்தும் போராட்டத்தில் இந்த போக்கு பலமாக எதிர்க்கப்பட வேண்டும்.

உதாரணமாக, சில தோழர்கள் திருப்பிக் குற்றஞ் சாட்டப்படுவர் என்பதற்காக பயந்து கொண்டு மற்ற தோழர்களின் குறைகளைப் பற்றி ஒன்றும் சொல்லாமல் இருந்து விடுகிறார்கள். ஒருவருடைய தவறை ஒருவர் மறைத்து வைக்கும் பொருட்டு தங்கள் நெருங்கிய நண்பர்களின் குற்றங்களை சுட்டிக் காட்ட மாட்டார்கள்; ஒருவரைப் பற்றி நேருக்கு நேர் பேச மாட்டார்கள்; ஆனால் அவருக்குத் தெரியாமல் பிறரிடம் பொறுப்பில்லாத முறையில் பலதும் பேசுவார்கள். பொறுப்பற்ற முறையில் விமர்சிப்பது, முணுமுணுப்பது, வம்பளப்பது முதலான போக்குகள் கட்சிக்குள் நிறைய இருந்து வருகிறது.

மேலும் சமீப காலத்தில் கட்சிக்குள் இன்னுமொரு மிக மோசமான போக்கு தலை தூக்கியிருக்கிறது. ஒரு குறிப்பிட்ட கோஷ்டியைச் சேர்ந்த நபர்கள், தங்கள் குறைபாடுகளையும், குற்றங்களையும் கட்சிக்கோ அல்லது அவர்களுக்கு மேலுள்ளவர்களிடத்திலோ மற்றவர்கள் புகார் செய்வார்கள் என்று அஞ்சுகிறார்கள். அவர்களுக்கு விரோதமாக மற்றவர்கள் குற்றச்சாட்டுகள் கொண்டுவந்துவிடுவார்களோ என்று குலை நடுங்கிக்கொண்டிருக்கின்றனர். ஒருபுறத்தில் அவர்களுக்கே தெரிந்திருக்கும் அதே தவறுகளை அவர்களால் செய்யாமலிருக்க முடியவில்லை ; மறுபுறத்தில் அவர்கள் குற்றங்குறைகளைப் பற்றி கட்சிக்கு, அவர்களுக்கு மேலுள்ளவர்களுக்கு மற்ற தோழர்கள் தெரிவிப்பதையோ, கூட்டங்களில் விமர்சனம் செய்வதையோ தடுக்க முயற்சி செய்கின்றனர். அவர்கள் சில தவறான, முறையற்ற காரியங்களைச் செய்திருக்கிறார்கள். பிழைகள் செய்திருக்கிறார்கள்; குற்றங்குறைகளைத் திருத்திக் கொள்ளும் பொருட்டு அவற்றை வெளிப்படுத்துவதற்கு இஷ்டமில்லை! தங்கள் வியாதியை மறைத்துக் கொள்ளுகிறார்கள்; தங்கள் வியாதியை குணப்படுத்த தயக்கம் காட்டுகின்றனர்; தங்கள் தவறுகளை வெளிப்படுத்துவதின் மூலம்தான் அத்தகைய குற்றங்களைத் திருத்த முடியும் என்ற உண்மையை அவர்கள் உணரவில்லை . அவர்கள் தங்கள் குற்றங்களை பூலோகத்திலுள்ள பொக்கிஷங்களைக் காட்டிலும் அதிக மதிப்புள்ளது போல, மேல் பூச்சுப்பூசி, மூடிமறைக்கப் பார்க்கின்றனர்.

இக்காரணத்தினால் தங்கள் குற்றங்களை மற்றவர்கள் சரியாகப் பார்க்காமல் தடை செய்வது மட்டுமல்ல, அவர்களுக்கு வாய்ப்பூட்டு போடவும் முயலுகின்றனர். கட்சிக்கோ அல்லது அவர்களுக்கு மேலுள்ளவர்களுக்கோ தங்கள் தவறுகளைப் பற்றி புகார் செய்யவிடாமல் தடை போடுகின்றனர்; முற்றிலும் முறையான அமைப்பு வழிகள் மூலம் கட்சிக்குள் விமர்சனம் செய்யவும், எடுத்துப் பேசவும் மற்றவர்களுக்குள்ள உரிமையை இவ்வாறு இழக்கச் செய்கின்றனர். “மேலுள்ளவர்களுக்கு நீ புகார் செய்வாயாகில் பின் நீ கவலைப்பட வேண்டி வரும்; சரியான உதை கொடுப்பேன். ஜாக்கிரதை! ஏ! அடி தாங்கி” என்று மற்ற தோழர்களை பயமுறுத்துகிறார்கள். மேலுள்ளவர்களுக்கு இவர்களது குற்றங்களைப் பற்றி புகார் செய்து பேசிய தோழர்களை ஒரேயடியாக வெறுக்கின்றனர். அதை எண்ணி மனம் நோகின்றனர். பழிக்கு பழி வாங்க வேண்டுமென்று சிந்திக்கின்றனர். இவையெல்லாம் கட்சி அங்கத்தினரின் உணர்வை அறவே இழந்து நிற்கும் நிலையின் தீய அறிகுறிகளாகும். கட்சிக்குள் தாங்கள் தீய காரியங்களை செய்யும் பொருட்டு கட்சியின் தலைமைக் கமிட்டிகளுக்கும் சாமானிய கட்சி அங்கத்தினர்களுக்கும் உள்ள இணைப்பைத் துண்டிக்க முயலுகின்றனர். கட்சியிலிருந்து இந்தப்போக்கு கண்டிப்பாக விலக்கப்பட வேண்டும்.

படிக்க :
♦ மார்க்ஸ், எங்கெல்ஸ், லெனின் சகாப்தத்தில் கட்சி நடத்திய போராட்டங்கள் !
♦ வர்க்கப் போராட்டத்தின் பிரதிபிம்பமே உட்கட்சிப் போராட்டம்

மற்ற கட்சி அங்கத்தினர்கள் தவறுகள் செய்தாலும் அல்லது கட்சிக்கு பாதகமான காரியம் ஏதும் செய்தாலும் சரி, கட்சி அங்கத்தினர் அதை காண நேர்ந்தால் கட்சிக்கும் அவர்களுக்கு மேலுள்ளவர்களுக்கும் அறிக்கை சமர்ப்பிக்க வேண்டும். இத்தகைய அறிக்கை கொடுக்காமலிருப்பது தவறு; அறிக்கை கொடுப்பது முற்றிலும் சரியானது.

கட்சிக்கோ அல்லது மேலுள்ளவர்களுக்கோ மற்றவர்கள் அறிக்கை கொடுப்பதை தடுப்பது என்பது சட்ட திட்டங்களுக்கு முற்றிலும் விரோதமானது; கட்சியில் என்றுமே அனுமதிக்கப்படமாட்டாது. இத்தகைய அறிக்கைகள் கிடைத்தால், மேல் கமிட்டிகள், என்ன நடந்தது என்பதை நுட்பமாகத் துருவி ஆராய்ந்து, வழக்கை வெகு கவனமாக விசாரிக்க வேண்டும்; சம்பவத்தைப் பற்றிய ஒருதலைப்பட்சமான தகவலை வைத்துக் கொண்டு அவசரப்பட்டு தீர்ப்பு செய்யாமலிருக்க வேண்டும்.

இன்று கட்சிக்குள் சித்தாந்த ரீதியான போராட்டம் முறையாகத் துவக்கப்பட வேண்டும் என்று நாங்கள் ஏற்கெனவே முடிவு செய்துள்ளோம். அதனால் நாம் தாராளவாதத்தை எதிர்க்க வேண்டும். குறிப்பாக பெரும் தாராளவாதத் தவறுகள் இழைக்கப்பட்ட சில கட்சி உறுப்புகளில், அத்தகைய தவறுகளைத் திருத்திக் கொள்வதற்கு, உண்மைச் சம்பவங்களை அடிப்படையாகக் கொண்டு தாராளவாதத்திற்கு எதிராக நாம் ஸ்தூலமான போராட்டம் நடத்த வேண்டும்.

பல வருஷங்களுக்கு முன்பு தாராளவாதத்தைக் கண்டித்து தோழர் மாசேதுங் ஒரு கட்டுரை எழுதினார்; அதில் கட்சிக்குள் காணப்படும் பதினேழுவிதமான தாராளவாதப் பிழைகளை விவரித்துள்ளார். இன்றைக்கும் அவரது கட்டுரை பொருந்தும்; அதை நீங்கள் வெகு கவனமாக படிக்க வேண்டும். அந்தக் கட்டுரையின்படி தாராளவாதத்தை எதிர்த்துப் போராடவும், திருத்திக் கொள்ளவும் முயல வேண்டும். அதே சமயத்தில் கட்சி கட்டுவது பற்றிய வகுப்பிலும் தாராளவாதம் பற்றி பூரண விவாதம் நடத்தப்படும். அதனால்தான் இன்று அந்த விசயத்தை நான் எடுத்துக் கொள்ளவில்லை; நான் பேசப்போவது இரண்டாவது, மூன்றாவது திரிபுகளாகும்; ஏனெனில் இந்த இரண்டு திரிபுகளையும் கட்சிக்குள் யாருமே இதுவரை முறைப்படுத்தி விவாதித்ததில்லை.

(தொடரும்)

உட்கட்சிப் போராட்டம் || பாகம் – 4

பாகம் – 3

நமது உட்கட்சிப் போராட்டம், கோட்பாடு பற்றிய போராட்டம்; இந்தக் கோட்பாட்டுக்கு அல்லது அந்த கோட்பாட்டுக்கு நிகழ்த்தும் போராட்டம்; இந்த போராட்டத்தின் அல்லது அந்த போராட்டத்தின் இலட்சியத்தை வரையறுத்துக் கூறும் போராட்டம். இலட்சியத்திற்கு இட்டுச் செல்ல இந்த அல்லது அந்த போராட்ட வடிவத்தை தேர்ந்தெடுப்பதற்கான போராட்டம் என்று நமது தோழர்கள் புரிந்து கொள்ளவில்லை.

அவ்வப்போதைய கொள்கை விசயத்தில், பூரணமாக நடைமுறைத் தன்மை கொண்ட பிரச்சினைகளில் கட்சிக்குள் இருக்கும், நம்முடன் மாறுபட்ட கருத்துக் கொண்டவர்களுடன் நாம் ஒப்பந்தத்திற்கு வரமுடியும்; வரவும் வேண்டும் என்று இந்தத் தோழர்கள் புரிந்து கொள்ளவில்லை. கோட்பாடு சம்பந்தப்பட்ட  – பிரச்சினைகளில், நமது போராட்டங்களின் இலட்சியத்தை வரையறுத்துக் கூறும் பிரச்சினைகளில், அத்தகைய இலட்சியத்தை அடைவதற்கு முடிவு கட்ட வேண்டிய போராட்ட வடிவ விசயத்தில், கட்சிக்குள் தங்களுடன் மாறுபட்ட கருத்துக்கள் கொண்டவர்களை எதிர்த்து வளைந்து கொடுக்காமல் போராட வேண்டும் என்றும், ஆனால் வழக்கிலிருந்து வருகின்ற கொள்கைப் பிரச்சினைகளிலும், பூரணமாக செயல்முறைத் தன்மை படைத்த பிரச்சினைகளிலும், அவை பொறுத்தமட்டில் கோட்பாடு சம்பந்தப்பட்ட மாறுபாடு எழாதமட்டிலும் கட்சிக்குள் அவ்விசயங்களில் தங்களுடன் மாறுபட்ட கருத்துக்கள் கொண்டவர்களுடன் விட்டுக் கொடுக்காமல் போராடுவதற்கு பதிலாக அவர்களுடன் ஒத்துப் போக வேண்டும் என்றும் அவர்களுக்கு தெரியவில்லை; புரியவுமில்லை.

லெனின், ஸ்டாலின் கட்சியில் குறிப்பாக இதுதான் பரம்பரையான வேலைமுறை; ஆயினும் நமது தோழர்கள் பலர் இதை இன்னும் கற்றுக் கொள்ளவில்லை. ஒத்துப் போகவேண்டிய பிரச்சினைகளில் விடாப்பிடியாகப் போராட்டம் நடத்துகின்றனர்; இதன் விளைவாக அவர்கள் சண்டை போடாத பிரச்சினையே கிடையாது; அவர்கள் சண்டை போடாத நேரம் கிடையாது; அவர்கள் சண்டை போடாத ஆள் கிடையாது. அவர்களுடன் மாறுபட்டவர்கள் அனைவரையும் எதிர்த்துப் போராடினார்கள்; எல்லோரையும் ஒரேவிதமாக எதிர்த்தார்கள்; எதிலும் விட்டுக் கொடுப்பதில்லை; எப்பேர்ப்பட்ட நிலைமையானாலும் சமரசம் செய்து கொள்ள மாட்டார்கள்; எவ்வித மாறுபாடானாலும் அதை விரோதமானதாகவே பாவித்தார்கள்; எதிர்ப்பதுதான் எல்லாம் என்று நம்பினார்கள்; அவர்களுடைய வரையறையற்ற தன்மை இதில்தான் அடங்கியிருக்கிறது.

கோட்பாடு என்றால் என்ன? எந்த பிரச்சினைகள் கோட்பாடு சம்பந்தப்பட்டவை? கட்சியின் போர்த்தந்திர, செயல்தந்திரக் கொள்கைகள் என்ன என்பதை பல தோழர்கள் புரிந்து கொள்ளவில்லை. கோட்பாடு, போர்த்தந்திரத் திட்டம், செயல்தந்திரக் கொள்கை சம்பந்தப்பட்ட மாறுபாடுகளை உள்வாங்கிக் கொண்டு எப்படி போராட்டத்தை நடத்துவது என்பதும் அவர்களுக்குத் தெரியவில்லை; தத்துவத்தில் அவர்களுடைய பயிற்சி மிகவும் குறைவாக இருந்தது; அரசியல் அனுபவமும் குறைவே. பெரிய அளவு முக்கியத்துவம் கொண்ட பிரச்சினைகளை அவர்களால் இன்னும் உள்வாங்கிக் கொண்டு, அந்த பிரச்சினைகள் மீது போராட்டம் நடத்த முடியவில்லை.

ஆயினும் உட்கட்சிப் போராட்டம் இருந்தாக வேண்டும். முக்கியமான பிரச்சினைகள் பற்றி போராட்டம், வாக்குவாதம் நடத்தாமலிருப்பதும் சம்பந்தப்பட்ட கோட்பாட்டின் அடிப்படையிலும்; கண்ணோட்டத்திலும் பிரச்சினைகளை கிளப்பாமலிருப்பதும் தவறு என்ற விசயத்தை மட்டும், ஒரே வறட்டுத்தனமாக மனப்பாடம் செய்து கொண்டு அதோடு அவர்கள் போராட விரும்பினார்கள். அவர்களுக்கு தனிப்பட்ட சம்பவங்கள், தனிப்பட்ட பிரச்சினைகள் மட்டுமே அவர்கள் கண்ணில் படுவதினாலும், மாறுபட்ட கருத்துக்கள் கொண்டவர்களுடன் கட்சிக்குள் அர்த்தமற்ற, கோட்பாடற்ற போராட்டங்கள், வாக்கு வாதங்கள் நடத்துவதினாலும் தோழர்கள் மத்தியில் வேற்றுமை, பரஸ்பரப் பூசல், அமைப்பு பிளவுகள் முதலியன ஏற்பட நேருகிறது. இத்தகைய தீய போக்குகள் நமது உட்கட்சிப் போராட்டத்தில் இருந்தன.

மேலே குறிப்பிட்டது சீனக் கம்யூனிஸ்ட் கட்சியின் உட்கட்சிப் போராட்டத்தில் உள்ள ஒருவகை திரிபு; சீனக் கம்யூனிஸ்ட் கட்சியில் காணும் படு மோசமான திரிபு; (இத்தகைய திரிபு மற்ற நாட்டுக் கட்சிகளில் காணப்பட்ட போதிலும்) வரம்பின்றி, அளவுக்கு மிஞ்சி அதிதீவிரமாக நடத்தப்படும், மற்றொரு கோடிக்கு இழுத்தும் செல்லும் – அதாவது உட்கட்சிப் போராட்டத்திலும், கட்சி அமைப்பு விசயத்திலும் “இடதுசாரி” சந்தர்ப்பவாதத்திற்கு இட்டுச் செல்லும் – உட்கட்சிப் போராட்டமாக அமையும் (அது கட்சிக்குள் ஜனநாயகத்தை மறுக்கிறது. கோட்பாடு சம்பந்தமான விசயங்களில் ஒற்றுமையின் அடிப்படையில் உட்கட்சி சமாதானத்தை நிராகரிக்கிறது, தொழிற்சங்கங்களின், மற்ற பொதுமக்கள் அமைப்புகளின் ஓரளவு சுயேச்சையையும் மறுக்கிறது; கட்சி அங்கத்தினர்களின் தனிப்பட்ட குண சிறப்பு, முன்கை எடுக்கும் குணம், ஆக்கல் திறமை முதலியன மறுக்கப்படுகிறது.) இந்தத் திரிபு சீனக் கட்சியின் விசேஷ சுற்றுச் சார்பினாலும் நிலைமையினாலும் எழுந்துள்ளது.

பல சீனத்தோழர்கள் தோழர் லெனின், அக்டோபர் புரட்சிக்குப் பின் தோன்றிய “இடதுசாரி” சந்தர்ப்பவாதத்தை எதிர்த்து நிகழ்த்திய கோட்பாடுள்ள போராட்டத்தை கவனிக்கவில்லை என்ற விசயத்தைக் குறிப்பிட விரும்புகிறேன். அக்டோபர் புரட்சியைத் தொடர்ந்து ரஷ்யக் கட்சியில் “இடதுசாரி ” கம்யூனிஸ்டு கோஷ்டி தோன்றிற்று. இந்த கோஷ்டி பிரெஸ்ட் – லிட்டோவ்ஸ்க் சமாதான உடன்படிக்கையை, எதிர்த்தது; பின்னர் தொழிற்சங்க விசயத்திலும் தகராறு இருந்தது. அக்டோபர் புரட்சிக்கு முன்பு “இடதுசாரி” தோற்றத்துடன் ஆட்ஸேவிஸ்டுகள் கோஷ்டி ஒன்று போல்ஷ்விக் கட்சிக்குள் இருந்து வந்தது. ஆனால் இந்த கோஷ்டி விரைவில் தோற்கடிக்கப்பட்டது; பிரெஸ்ட் – லிட்டோவ்ஸ்க் சமாதான உடன்படிக்கை ஏற்பட்ட சமயத்தில் “இடதுசாரி” கம்யூனிசத்தினால் சிருஷ்டிக்கப்பட்ட நிலைமையைப் போன்று அன்று நிலைமை அவ்வளவு மோசமாகப் போய்விடவில்லை; ஆனால் “இடதுசாரி” கம்யூனிசத்தையும் லெனின் கொஞ்ச காலத்தில் தோற்கடிக்கத்தான் செய்தார்.

ஆனால் “இடதுசாரி” கம்யூனிசம் மீண்டும் மேலைய ஐரோப்பிய நாடுகளில் தலைதூக்கிற்று. “சமரசமில்லை ” என்ற கோஷத்தைக் கிளப்பிற்று; பார்லிமெண்டுகளில் பங்கு எடுத்துக் கொள்வதை எதிர்த்தது; எல்லாவிதமான சட்டப்பூர்வமான போராட்டங்களையும் எதிர்த்தது; சமூக ஜனநாயகக் கட்சிகளின் “இடதுசாரி” பகுதிகளுடன் அவசியமான ஒப்பந்தங்கள் செய்து கொள்வதை எதிர்த்தது; இந்த சூழ்நிலையில்தான், 1920ம் வருடம் ஏப்ரல் மாதத்தில் இத்தகைய போக்குகளைத் திருத்துவதற்கு “இடதுசாரி கம்யூனிசம்; இளம்பிள்ளைக் கோளாறு“ என்ற புத்தகத்தை லெனின் எழுதினார்.

அக்டோபர் புரட்சியின் வெற்றிக்குப் பிறகு, தொழிலாளி வர்க்கம் அதிகாரத்தைக் கைப்பற்ற முடியும் என்பதில் இதற்கு முன்னர் நம்பிக்கை இல்லாதவர்கள் கண்முன் உண்மையான யதார்த்தம் நின்றது. இந்த விசயம் வலதுசாரி சந்தர்ப்பவாதத்திற்கு மரண அடி கொடுத்தது.

இந்த சூழ்நிலையில்தான் “இடதுசாரி” சந்தர்ப்பவாதம் பிறந்தது; இதன் வாதமென்னவெனில் புரட்சி சுற்றி வளைத்த பாதைகள் வழியே போக வேண்டியதில்லை; வெற்றி நினைத்த மாத்திரத்தில் கைகூடும் என்பதேயாகும்.

சீனக் கம்யூனிஸ்ட் கட்சியிலும் இத்தகைய கருத்துக்கள் நிலவின; சில கால கட்டங்களில் கட்சியில் மேலோங்கி நின்ற கருத்துக்களாகவும் விளங்கி வந்துள்ளன. அத்தகைய தவறுகள் செய்பவர்கள், “இடதுசாரி கம்யூனிசம்; இளம் பிள்ளைக் கோளாறு” எனும் லெனின் எழுதிய முக்கிய நூலை அறவே அலட்சியம் செய்தார்கள். அரசியல் ரீதியில் வளைந்து நெளிந்து போவதையும் காத்திருப்பதையும் எதிர்க்கிறார்கள். முன்னணியிலுள்ள ஒரு சிறுபான்மையினர், பரந்த பொதுமக்கள் இன்னும் இவர்கள் அடைந்த நிலைமையை எட்டிப் பிடிக்கவில்லை என்ற விஷயத்தை பொருட்படுத்தாமல் வீரச் செயல் வாதமுறையில் முன்னேறித் தாக்கும் தாக்குதலை தொடுக்கலாம் என்று அவர்கள் ஒரே சாதனையாக சாதித்தார்கள், இதை மற்றவர்கள் எதிர்த்ததால் அவர்களை “வலதுசாரி சந்தர்ப்பவாதத்தில் ” மூழ்கிக் கிடப்பதாக குற்றஞ்சாட்டினார்கள்.

அமைப்பு விசயங்களில் எழும் வலதுசாரி, “இடதுசாரி” திரிபுகள், அரசியல் பிரச்சினைகளிலுள்ள வலதுசாரி, “இடதுசாரி” திரிபுகளிலிருந்து தோன்றுகிறது; சீனக் கம்யூனிஸ்ட் கட்சி சில கால கட்டங்களில் வலதுசாரி, “இடதுசாரி” அரசியல் தவறுகள் செய்திருப்பதினால், அமைப்பு விசயத்திலும் கட்சி அதே தவறுகளைச் செய்திருக்கிறது. குறிப்பாக உள்நாட்டு யுத்த காலகட்டத்தில், நமது “இடதுசாரி வீரச்செயல்”வாதத் தவறுகளுக்குக் காரணமாயிருந்த அம்சம் அமைப்பு விசயத்தில் மிதமிஞ்சிய ஆவேசத்துடன் நிகழ்ந்த உட்கட்சிப் போராட்டமேயாகும்.

ஆதலின் சீனக் கம்யூனிஸ்ட் உட்கட்சி போராட்ட விசயத்தில் மூன்று விதமான திரிபுகள் உள்ளன. இந்த முறையில் அவர்களை தொகுப்பது தவறில்லையென்றும் சொல்லலாம். முதலாவது, கட்சிக்குள் தாராளவாதம் சமரசவாதமும்; இரண்டாவது இயந்திரகதியான மிதமிஞ்சிய உட்கட்சிப் போராட்டமும், அமைப்பு விசயத்திலும் உட்கட்சிப் போராட்டம் பற்றியும் “இடதுசாரி” சந்தர்ப்பவாதம்; மூன்றாவது, கட்சிக்குள் கோட்பாடற்ற தகராறுகளும் போராட்டங்களும்.

இந்த மூன்று திரிபுகளுக்கு இடையே உள்ளடக்கத்தில் ரொம்ப வித்தியாசம் ஒன்றுமில்லை; ஏனெனில் கட்சிக்குள் கோட்பாடற்ற தகராறுகள், போராட்டங்கள், மிதமிஞ்சிய போராட்டங்கள், தாராளவாதம் எதுவுமே மார்க்சிஸ்ட் – லெனினிஸ்ட் முறையாகாது. இவையெல்லாம் மார்க்சிய லெனினியத்திற்கு எதிர்ப்பை பிரதிபலிப்பனவேயாகும். அவற்றின் வெளித் தோற்றத்தை வைத்துத்தான் மேலே கூறிய மூன்றுவிதமாக அவை பிரிக்கப்படுகின்றன.

கம்யூனிஸ்ட் கட்சி இத்தகைய விசேசச் சூழ்நிலையில்தான் உருவாக்கப்பட்டது; அதன் உட்கட்சிப் போராட்டத்தில் எழுந்துள்ள திரிபுகளும் இத்தகைய விசேச சூழ்நிலையில்தான் எழுந்துள்ளன.

(தொடரும்)