2014 இல் மோடி பிரதமராக பதவி ஏற்றுக்கொண்ட சில மாதங்களில் ஆர்.எ.ஸ்.எஸ். பிரச்சாரக்கும் பாரதிய ஜனதா கட்சியின் தலைவருமான ராஜேஷ்வர் சிங், டிசம்பர் 31, 2021 உடன் இந்தியாவிலிருந்து முஸ்லிம்களும் கிறித்தவர்களும் துடைத்தெறியப்படுவார்கள் என்று பிரகடனம் செய்தார். அது உதிரி  சக்திகளின் வெறித்தனமான பேச்சு என்றும் பொருட்படுத்தத்தக்கது அல்ல என்றும் அன்று ஒதுக்கித் தள்ளப்பட்டது.

ஆனால், ஐந்து ஆண்டுகளுக்கு பிறகு, இன்று, மோடி அரசு அந்தப் பிரகடனத்தை உண்மையாக்கும் முயற்சியில் ஈடுபட்டிருக்கிறது. கடந்த டிசம்பர் மாதம் நாடாளுமன்றத்தில் நிறைவேற்றப்பட்ட குடியுரிமைச் சட்டத் திருத்தம், பாகிஸ்தான், வங்கதேசம், ஆப்கானிஸ்தான் ஆகிய நாடுகளில் இருந்து அகதிகளாக இந்தியாவுக்கு வருவதற்கு முஸ்லிம்களுக்கு மட்டும் அனுமதி மறுக்கிறது. இந்த நாடுகளைச் சேர்ந்த மற்ற சிறுபான்மை  மதத்தினர் அனைவருக்கும் அவர்கள் அங்கே மதரீதியாக துன்புறுத்தப்பட்டவர்கள் என்ற அடிப்படையில் இந்தியக் குடியுரிமை வழங்கப்படும் என்று இச்சட்டத் திருத்தம் கூறுகிறது. அதாவது, மேற்சொன்ன நாடுகளில் இஸ்லாமிய  மதத்தில் பிறந்த ஒருவர்  வேறு எந்த விதத்தில் துன்புறுத்தப்பட்டாலும், அவர் இந்தியாவுக்குள்  நுழையவோ குடியுரிமை பெறவோ முடியாது என்கிறது இந்த சட்டத் திருத்தம்.

1947-இல் நாட்டுப் பிரிவினையின்போது இந்தியாவிலிருந்து பாகிஸ்தான் பகுதிக்குக் குடிபெயர்ந்த முஸ்லிம்கள், முஜாகிர்கள் (வந்தேறிகள்) என்று பாகிஸ்தானில் இரண்டாம் தர குடிமக்களாகவே நடத்தப்பட்டு வருகிறார்கள். இதனை எதிர்த்து அங்கே போராடிவரும் “முத்தா ஹிதா குவாமி” இயக்கம் என்ற கட்சியின் தலைவர் அல்தாஃப் ஹுசேன், பாகிஸ்தான் அரசின் அடக்குமுறை காரணமாகத் தலைமறைவாக இருப்பவர். இவர் இந்தியாவில் அடைக்கலமும் குடியுரிமையும் கோரிய அடுத்த சில நாட்களில் இங்கே இந்த மசோதா நிறைவேற்றப் பட்டிருக்கிறது என்பதுதான் ஒரு விசித்திரம்! ஹூசேனுக்கு பிரிட்டன் குடியுரிமை வழங்கி விட்டது.  ஆனால், இந்திய அரசு அவருடைய கோரிக்கையை என்ன செய்தது என்று நமக்குத்  தெரியவில்லை.

படிக்க:
♦ சனாதன இந்தியாவா, புதிய ஜனநாயக இந்தியாவா ?
♦ கொரோனா தொற்று தமிழகத்தின் உண்மை நிலை என்ன ? | மக்கள் அதிகாரம்

“குடியுரிமைச் சட்ட திருத்தத்தைத் தேசியக் குடிமக்கள் பதிவேட்டுடன் இணைத்துத்தான் பார்க்க வேண்டும்” என்று ஏற்கனவே அமித் ஷா தெளிவாகப் பேசியிருக்கிறார். அதாவது, ஒரு இந்தியர் தேசியக் குடிமக்கள் பதிவேட்டில் தனது குடியுரிமையை நிரூபிக்க முடியவில்லையென்றால், திருத்தப்பட்ட குடியுரிமைச் சட்டத்தின் கீழ் இந்தியக் குடியுரிமை பெறுகின்ற வாய்ப்பு அவருக்கு உண்டு. ஆனால், முஸ்லிம்களுக்கு மட்டும் இது பொருந்தாது என்கிறது மோடி அரசின் சட்டத் திருத்தம். அதாவது, தேசியக் குடிமக்கள் பதிவேடும், குடியுரிமைச் சட்டத் திருத்தமும் முஸ்லிம்களை இரண்டாம்தரக் குடிமக்களாக்குகின்றன. இந்தியாவில் தற்போது வசித்து வருகின்ற முஸ்லிம்களைத் தவிர்த்த மற்றவர்கள் தேசியக் குடியுரிமைப் பதிவேட்டில் இடம் பெறுவதற்குத் தேவையான ஆவணங்களைக் காட்டத் தவறிய போதிலும், அவர்கள் குடியுரிமைச் சட்டத் திருத்தத்தின்படி இந்தியக் குடியுரிமை பெறுவதற்கான வாய்ப்பு உண்டு. இந்த வாய்ப்பு முஸ்லிம்களுக்குக் கிடையாது.

யாருக்கெல்லாம் தந்தையர் நாடாகவும்,  மதரீதியான புண்ணிய பூமியாகவும் இந்தியா இருக்கிறதோ, அவர்கள் மட்டும்தான் இந்தியக் குடிமக்களாக இருக்க முடியும். தந்தையர் நாடாக இந்தியா இருந்த போதிலும், புனித பூமி இந்தியாவுக்கு வெளியில் இருப்பதாக நம்புகிறவர்களை  (மெக்காவைப் புனித பூமியாகக் கருதும் இஸ்லாமியர்கள் மற்றும் ஜெருசலேமைப் புனித பூமியாகக் கருதும் கிறிஸ்தவர்கள்)  “உண்மையான இந்தியர்களாகக் கருதவியலாது” என்பது கோல்வால்கரின் கருத்து.

மதத்தின் அடிப்படையில் குடிமக்களைப் பாகுபடுத்தி, இஸ்லாமியர்களை இந்தியரல்லாதவர்கள் ஆக்குகின்ற கோல்வால்கரின் கருத்தையும், இந்து மகாசபா தலைவர் சாவர்க்கரின் கருத்தையும் நடைமுறைக்குக் கொண்டு வருகிறது மோடி அரசின் குடியுரிமைச் சட்டம். வேறு வார்த்தைகளில் சொல்வதென்றால், “செமிட்டிக் மதங்களான கிறிஸ்தவ, இஸ்லாமிய மதங்களைச் சேர்ந்தவர்கள் இந்தியர்களாக இருக்க முடியாது என்றும் அவர்கள் பெரும்பான்மை இந்து மதத்தினரின் தயவில் வாழ வேண்டும்” என்பதுதான் இதன் பொருள்.

நாம் அல்லது நமது தேசியத்தின் வரையறை என்ற தலைப்பில் கோல்வால்கர் கீழ்க்கண்டவாறு கூறுகிறார்: “இந்துஸ்தானில் (இந்தியாவில்) வசிக்கும் இந்துக்கள் அல்லாதவர்கள் இந்து கலாச்சாரத்திற்கும் மொழிக்கும் மாறிக்கொள்ள வேண்டும். இந்து மதத்தைப் புனிதமாகக் கருதவும் மதிக்கவும் கற்றுக் கொள்ளவேண்டும். இந்து இனத்தையும் அதன் கலாச்சாரத்தையும் போற்றிப் புகழ்வதைத் தவிர வேறு விதமாகச் சிந்திப்பதை நிறுத்த வேண்டும். இந்த மண்ணுக்கும் இதன் தொன்மையான பாரம்பரியத்துக்கும் எதிரான சகிப்பின்மையையும் நன்றி கெட்டத்தனத்தையும் கைவிட்டு, இவற்றின்பால் நேசத்தையும் பக்தியையும் வளர்த்துக் கொள்ள வேண்டும்.  சுருங்கக் கூறின், வெளிநாட்டுக்காரர்களாக நடந்து கொள்வதை அவர்கள் நிறுத்திக் கொள்ளவேண்டும். அல்லது அவர்கள் இந்து தேசத்துக்குக் கட்டுப்பட்டவர்களாக இங்கே தங்கியிருக்கலாம். மற்றபடி, அவர்கள் இங்கே எந்தவித சலுகைகளையும் கோர முடியாது. குடியுரிமையையும் கோர முடியாது. இதைத் தவிர வேறெந்த விதமான வாய்ப்பும் இவர்களுக்கு வழங்கப்படக்கூடாது. நாம் ஒரு புராதனமான தேசம். புராதனமான தேசங்கள் தமது நாட்டில் குடியேறிய அந்நிய இனத்தாரை எப்படி நடத்துகின்றனவோ, எப்படி நடத்த வேண்டுமோ அவ்வாறு நடத்துவோம்.”

அதேபோல, இந்துத்துவா என்ற சொல்லை உருவாக்கிய சாவர்க்கர், “யார் இந்து?” என்ற தலைப்பில் இவ்வாறு எழுதுகிறார்: சிந்து நதியில் தொடங்கி சமுத்திரங்கள் வரை பரவியிருக்கும் பாரத வர்ஷம் எனப்படும் இந்த மண்ணைத் தனது தந்தையர் நாடாகவும், தனது மதத்தின் தொட்டிலாகவும் புனித பூமியாகவும் கருதுபவனே இந்து. ஒரு பொது தேசம் (ராஷ்டிரம்), ஒரு பொது இனம் (ஜாதி), ஒரு பொது நாகரிகம் (கலாச்சாரம்) இவைதான் இந்துத்துவத்தின் அத்தியாவசியமான கூறுகள். இவற்றைச் சுருக்கமாக இப்படிச் சொல்லலாம். சிந்துஸ்தானம் என்பது எவனொருவனுக்கு பித்ரு பூமியாக (தந்தையர் நாடாக) மட்டுமின்றிப் புண்ணிய பூமியாகவும் இருக்கிறதோ, அவனே இந்து. இந்துத்துவ தேசத்தின் முதல் இரண்டு கூறுகளான தேசம், இனம் ஆகியவை தந்தையர் நாடு என்பதைக் குறிக்கின்றன. புண்ணிய பூமி என்பது கலாச்சாரத்தைக் குறிக்கிறது. எந்த மதச் சடங்குகளும் புனித நூல்களும் இந்த மண்ணைப் புனித மண்ணாக ஆக்குகின்றனவோ, அவையனைத்தையும்தான் கலாச்சாரம் என்கிற சொல்லால் குறிக்கிறோம்.

படிக்க:
♦ சி.ஏ.ஏ. எதிர்ப்புப் போராட்டம் : பல்லிளிக்கும் பொய் வழக்குகள் !
♦ இளம் வழக்கறிஞர்களுக்கு உதவித் தொகை ! வழக்கறிஞர்கள் கோரிக்கை வெற்றி !

பாகிஸ்தான் என்ற கோரிக்கையை ஜின்னா வைப்பதற்குச் சற்று முன்னரே, புண்ணிய பூமி என்ற அடிப்படையில் இந்தியாவைத் துண்டாடும் இந்தக் கருத்து முன்வைக்கப்பட்டு விட்டது. தங்களது புனித பூமி இந்தியாவுக்கு வெளியில் இருப்பதாகக் கருதுகிறவர்கள் இந்து தேசத்தின் அங்கமாக இருக்க முடியாது என்றால், மற்றவர்களெல்லாம் தனியொரு நாடாக அமைகிறார்களா? அப்படியானால், இந்தியாவுக்குள்ளேயே இரண்டு தேசங்கள் உள்ளனவா என்ற கேள்வி எழுகிறது என்கிறார் வரலாற்றாய்வாளர் ஆதித்ய முகர்ஜி.

இதற்கான விடை 1937-இல் இந்து மகாசபாவில் சாவர்க்கர் ஆற்றிய தலைமையுரையில் இருக்கிறது என ஆர்.எஸ்.எஸ்ஸும், பள்ளிப் பாடநூல்களும் மகாத்மா காந்தி கொலையும் என்ற தனது நூலில் குறிப்பிடுகிறார் முகர்ஜி. “இந்தியாவை ஒன்றுபட்ட ஒரு படித்தான தேசமாகக் கருத முடியாது. மாறாக, இந்து – முஸ்லிம் என்று இந்தியாவுக்குள் பிரதானமாக இரண்டு தேசங்கள் உள்ளன” என்று அந்த உரையில் கூறுகிறார் சாவர்க்கர். பண்பாட்டு ரீதியாகவும், மத ரீதியாகவும், தேசம் என்ற அடிப்படையிலும் இந்துக்களுக்கும் முஸ்லிம்களுக்கும் பல நூற்றாண்டுகளாக முரண்பாடு நிலவி வருவதாகக் கூறி, இரண்டு தேசங்கள் என்ற தனது கருத்தை நிறுவுகிறார், சாவர்க்கர். வேறு வார்த்தைகளில் கூறுவதாயின், இந்துக்களும் முஸ்லிம்களும் ஒரே தேசத்தில் வாழ முடியாது என்கிறார். இதே கருத்தைத்தான் குடியுரிமைச் சட்டத் திருத்தமும் வலியுறுத்துகிறது.

பாகிஸ்தானில் ஷியா பிரிவு மற்றும் அகமதியா பிரிவு முஸ்லிம்களுக்கு எதிராகப் பாரபட்சம் காட்டப்படுவது குறித்து ஊடகங்கள் ஏராளமான செய்திகளை வெளியிட்டிருக்கின்றன. இந்தச் சட்டத் திருத்தம் மேற்சொன்ன முஸ்லிம் மதப் பிரிவினருக்கு ஆதரவுக்கரம் நீட்ட மறுக்கிறது. அது மட்டுமல்ல, பிரிவினைக் காலத்தில் இந்தியப் பகுதியிலிருந்து பாகிஸ்தானுக்குச் சென்றவர்களும், அங்கே முஜாகிர்கள் (வந்தேறிகள்) என இரண்டாந்தரக் குடிமக்களாக நடத்தப்படுபவர்களும், அல்தாஃப் ஹுசேனின் தலைமையில் திரண்டிருப்பவர்களுமான ஏழை முஸ்லிம்கள் யாரேனும் மீண்டும் இந்தியாவுக்கே திரும்பிவிட விரும்பினால், அவர்களுக்கும் கதவைச் சாத்துகிறது இந்தச் சட்டத்திருத்தம்.

மதத்தின் அடிப்படையிலான தேசியம் என்பது பித்ரு பூமி (தந்தையர் நாடு) புண்ய பூமி என்கின்ற சாவர்க்கரின் கருத்துகளிலிருந்துதான் வருகிறது. இந்தச் சட்டத்திருத்தம் உதவுவதற்கானதேயொழிய, யாரையும் ஒதுக்குவதற்கானது அல்ல என்கிறார் அமித் ஷா. இதை நான் மறுக்கிறேன். குடியுரிமைச் சட்டத் திருத்தத்தை மட்டும் பார்த்தால், அதனால் ஆபத்தில்லை என்பது போலத் தோன்றும். ஆனால், அதனைத் தனியே பார்க்கவியலாது. தேசியக் குடிமக்கள் பதிவேட்டுடன் சேர்த்துப் பார்க்க வேண்டும். அதன் இலக்கு சமூகத்தில் ஒரு பிரிவினரை நாடற்றவர்களாக மாற்றுவதாகும். அசாமில் தேசிய மக்கள்தொகைப் பதிவேட்டின் முடிவுகள் அவர்கள் எதிர்பார்த்ததற்கு மாறாகப் போய்விட்டன. அவர்களுக்கு வேறு வழியில்லை. இந்துக்களின் குடியுரிமையை அங்கீகரிக்க வேண்டும். முஸ்லிம்களை நிராகரிக்க வேண்டும். அதனால்தான் ஏற்கனவே கிடப்பில் போட்டு வைத்திருந்த குடியுரிமைச் சட்டத் திருத்தத்தை புதுப்பித்துக் கொண்டு வந்திருக்கிறார்கள் என்கிறார் முகர்ஜி.

அசாமில் வாழும் பெங்காலி முஸ்லிம்களைக் கரையான்கள் என்று சாடினார்கள் பா.ஜ.க. தலைவர்கள். அந்தக் கரையான்கள் தேசிய மக்கள் தொகைப் பதிவேட்டில் இடம் பிடிக்க முடியாமல் மாட்டிக்கொள்வார்கள் என்று அவர்கள் எதிர்பார்த்தார்கள். ஆனால், அசாமில் நடைபெற்ற குடிமக்கள் கணக்கெடுப்பின் முடிவுகள் முற்றிலும் வேறுவிதமாக அமைந்து விட்டன. இந்தக் கணக்கெடுப்பால் துன்பத்துக்கு உள்ளாக்கப்பட்ட மக்கள் மத்தியிலிருந்து கரையான்களை மதரீதியாகப் பிரிக்கமுடியவில்லை. “குடியுரிமைச் சட்டத் திருத்தமும் குடிமக்கள் பதிவேடும் ஒரு அபாயகரமான சேர்க்கை. சமூகத்தில் வெறுப்பையும் பிளவையும் விதைக்கும் கோல்வால்கர் மற்றும் சாவர்க்கரின் சித்தாந்தத்தை இது நடைமுறைக்கு கொண்டு வருகிறது” என்கிறார் ஜாமியா மிலியா இஸ்லாமியா பல்கலைக்கழகத்தின் வரலாற்றாய்வாளர் ரிஸ்வான் குவைசர்.

கோல்வால்கரால் ஆட்சியைப் பிடிக்க முடியவில்லை என்பதுதான் ஒரே ஒரு வேறுபாடு. நாம் இந்த நாட்டை ஆளக்கூடிய காலம் ஒன்று வரும் என்று கூட அவர் நினைத்துப் பார்த்திருக்க வாய்ப்பில்லை. அது அவருடைய கற்பனைக்கு அப்பாற்பட்டதாக மட்டுமல்ல, நம் எல்லோருடைய கற்பனைக்கும் அப்பாற்பட்டதாகத்தான் இருந்தது. “1952-இல் இந்து மகாசபா சுறுசுறுப்பாக இயங்கி வந்த காலத்திலேயே, அதன் ஆகப் பெரும்பான்மையான வேட்பாளர்களால் தேர்தலில் வெற்றி பெற இயலவில்லை. பிந்தைய நாட்களிலும்கூட தேர்தலில் அவர்கள் தோல்வியைத்தான் தழுவினர். ஏனென்றால், இந்த வெறுப்பரசியலை அன்றைய இந்து சமூகம் அங்கீகரிக்கவில்லை. இன்றைய இந்து சமூகம் வெறுப்பரசியலை அங்கீகரிப்பதோடு நிற்கவில்லை, அதற்கு மேலேயும் சென்று விட்டது” எனக் குறிப்பிடும் ரிஸ்வான் குவைசர், இந்த சட்டத்தை முறியடிப்பதற்கான வழிகளை நாம் கண்டறிய வேண்டும். இல்லையேல், இந்தியா என்பது இந்துக்களுக்கு மட்டும்தான் என்ற சாவர்க்கர், கோல்வால்கரின் கனவு நனவாகிவிடும் என எச்சரிக்கிறார்.

கோல்வால்கர்: ஆர்.எஸ்.எஸ். -ஸும்  இந்தியாவும் என்ற நூலின் ஆசிரியரான ஜோதிர்மயா சர்மா இது தொடர்பாக ஒரு சம்பவத்தை சுட்டிக்காட்டுகிறார். 1954-இல் சிந்தி இனத்தவர் மத்தியில் பேசிய கோல்வால்கர், நாக்பூரில் அவர் எதிர்கொண்ட ஒரு சம்பவத்தைக் குறிப்பிட்டாராம். பிராமணர்களுக்கும் பிராமணரல்லாதாருக்கும் இடையிலான முரண்பாடுகள் குறித்த பிரச்சினைகளைப் பேசுவதற்கு அங்கே ஒரு கூட்டம் ஏற்பாடு செய்யப்பட்டிருந்ததாம். அந்தக் கூட்டத்துக்கு அவர் சென்றிருந்தாராம். இவர் உள்ளே நுழையும்போது அங்கே ஒரு முஸ்லிம் உரையாற்றிக் கொண்டிருந்தாராம். துணுக்குற்றுப்போன கோல்வால்கர், இந்தக் கூட்டத்திற்கு ஒரு முஸ்லிமை எப்படி அழைத்தீர்கள்? என்று கூட்ட ஏற்பாட்டாளர்களிடம் கேட்டாராம். அதற்கு அவர்கள், முஸ்லிம்களும் பார்ப்பனரல்லாதவர்கள்தானே என்று பதிலளித்தார்களாம். பிராமணர்களுக்கும் பிராமணரல்லாதவர்களுக்கும் இடையில் பிரச்சனைகள் இருக்கலாம். அது இந்து சமூகத்துக்குள் இருக்கும் பிரச்சனை. ஆனால், முஸ்லிம்கள் பிராமணர்களுக்கு மட்டும் எதிரிகள் அல்ல, மொத்த இந்து சமூகத்துக்குமே எதிரிகள். நீங்கள் எதை வேண்டுமானாலும் செய்யுங்கள். ஆனால், முஸ்லிம்களை மட்டும் விலக்கி வையுங்கள் என்று அவர்களுக்கு அறிவுரை கூறினாராம் கோல்வால்கர்.

அன்று கோல்வால்கர் எதைச் சொன்னாரோ அதைத்தான் குடியுரிமைச் சட்டத் திருத்தம் இன்று அமல்படுத்துகிறது.

(ஃபிரண்ட்லைன், ஜன.3, 2020 இதழில் ஜியா உஸ் சலாம் எழுதிய கட்டுரையின் தமிழாக்கம்)

மொழியாக்கம்: கதிரவன்

புதிய ஜனநாயகம், பிப்ரவரி 2020

மின்னூல்:

மின்னூலை வாங்க Add to cart பட்டனை அழுத்தவும். பின்னர் View cart அழுத்தி, உங்கள் கூடையில்(Cart), எண்ணிக்கையை(Quantity) சரிபார்த்துவிட்டு, Proceed to checkout-பட்டனை அழுத்தி, உங்கள் பெயர் மற்றும் தகவல்களை பதிவு செய்து Place order-ஐ அழுத்துங்கள். இந்தியாவில் வங்கி கணக்கு வைத்திருப்போர் Online Payments மூலமாகவும் வெளிநாட்டில் வங்கி கணக்கு வைத்திருப்போர் Paypal மூலமாகவும் தெரிவு செய்து பணத்தை செலுத்தலாம்.

பணம் அனுப்பிய பிறகு உங்களது மின்னஞ்சலுக்கு உடனேயே டவுண்லோடு இணைப்பு வரும். அதிலிருந்து நீங்கள் இரண்டு நாட்களுக்குள் டவுண்லோடு செய்யலாம்.

புதிய ஜனநாயகம் மாத இதழை நேரடியாகப் பெற விரும்புவோர் ஆண்டுச் சந்தா செலுத்தலாம் : உள்நாடு ரூ.180 மட்டும்!

தொடர்பு முகவரி
புதிய ஜனநாயகம் ,
110, இரண்டாம் தளம்,
63, என்.எஸ்.கே. சாலை, (அ.பெ.எண்: 2355)
கோடம்பாக்கம், சென்னை – 600024

தொலைபேசி: 94446 32561
மின்னஞ்சல் : puthiyajananayagam@gmail.com

புதிய ஜனநாயகத்தின் முந்தைய மின்னூல் வெளியீடுகள்

₹15.00Add to cart

₹15.00Add to cart

₹15.00Add to cart

விவசாய இடுபொருட்களுக்கான செலவைக் கட்டுப்படுத்த வேண்டும் என இந்திய விவசாயிகள் கோரி வரும் வேளையில், இந்த நிதியாண்டுக்கான வரவு-செலவு அறிக்கையில் உர மானியத்திற்கு ஒதுக்கப்பட்டிருக்கும் நிதி கடந்த ஆண்டை ஒப்பிடும்போது ஏறத்தாழ 9,000 கோடி ரூபாய் அளவிற்கு வெட்டப்பட்டிருக்கிறது. இதன் விளைவாக, வெட்டப்பட்ட அத்தொகையை இந்திய விவசாயிகள் தமது சொந்தக் காசிலிருந்து செலவழிக்க வேண்டிய நிலைக்குத் தள்ளப்பட்டிருக்கின்றனர்.

உர மானியத்தை வெட்டியதோடு திருப்தி கொள்ளாத மோடி அரசு, விதைகளுக்குச் சான்றளிப்பது, சந்தைப்படுத்துவது தொடர்பாக புதிய விதை மசோதா ஒன்றையும் தயாரித்து நாடாளுமன்றத்தின் ஒப்புதலைப் பெறுவதற்குத் தயாராகி வருகிறது. இம்மசோதா சட்டமானால், “குறைந்த விலையில் தரமான விதைகள்” என்ற விவசாயிகளின் உரிமை காலாவதியாகிவிடும்.

இந்திய அரசு காட் ஒப்பந்தத்தில் கையெழுத்திட்டு, உலக வர்த்தகக் கழகத்தில் இணைந்த பிறகு இந்திய விதைச் சந்தையை இந்தியச் சட்டங்கள் மட்டுமின்றி, பன்னாட்டு அளவில் ஏற்றுக்கொள்ளப்பட்ட ஒழுங்குமுறை விதிகளும் கட்டுப்படுத்தி வருகின்றன. இவற்றின் அடிப்படையில், 2001-ஆம் ஆண்டு இயற்றப்பட்ட “பயிரினங்களின் பாதுகாப்பு மற்றும் விவசாயிகளின் உரிமைச் சட்டம்”, பன்னாட்டு ஏகபோக நிறுவனங்களுக்குச் சாதகமான வணிகம் சார்ந்த அறிவுசார் சொத்துடமை உரிமைகள் மற்றும் புதிய பயிர் வகைகள் பாதுகாப்பு ஒழுங்கு விதிகள் ஆகியவற்றை மறுதலிக்காத அதேசமயம், இந்திய விவசாயிகளின் உரிமைகளையும் ஓரளவு பாதுகாப்பதாக அமைந்தது.

இந்திய விதைச் சந்தையின் மதிப்பு ஏறத்தாழ 15,000 கோடி ரூபாயாகும். இதில் 50 சதவீதத்தைத் தனியார் நிறுவனங்கள்தான் கைப்பற்றிக் கட்டுப்படுத்தி வருகின்றன. தனியார் நிறுவனங்களிலும், மான்சாண்டோ, டௌ கெமிக்கல்ஸ் உள்ளிட்ட நான்கு பன்னாட்டு ஏகபோக நிறுவனங்கள்தான் 34 சதவீத விதைச் சந்தையைக் கட்டுப்படுத்தி வருகின்றன.

“விதைகளின் விலைகளைக் கட்டுப்படுத்தும் விதிமுறைகளைத் தளர்த்த வேண்டும், விதைகளின் தரத்திற்குத் தாமே சான்றளித்துக் கொள்ளும் சுதந்திரம் வழங்கப்பட வேண்டும், விதைகளின் மூலக்கூறுகளைச் சுதந்திரமாக ஏற்றுமதி, இறக்குமதி செய்ய அனுமதிக்க வேண்டும், அறுவடை செய்யப்பட்ட தானியங்களைச் சேமித்து விதைகளாகப் பயன்படுத்தும் இந்திய விவசாயிகளின் உரிமையைக் கட்டுப்படுத்த வேண்டும்” என இப்பன்னாட்டு ஏகபோக நிறுவனங்கள் கோரி வந்ததை நிறைவேற்றித் தரும் விதமாக இப்புதிய மசோதா தயாரிக்கப்பட்டிருப்பதோடு, இந்திய விவசாயிகளின் மீது “இன்ஸ்பெக்டர் ராஜ்ஜியத்தை” ஏவிவிடும் அடிப்படைகளையும் கொண்டிருக்கிறது.

படிக்க:
♦ கொரொனா ஊரடங்கு : 800 கிலோ மீட்டர் நடைபயணம் – தொழிலாளர் துயரம் !
♦ கொரோனா பெருந்தொற்று ஒரு நுழைவாயில் | அருந்ததி ராய்

விதை வர்த்தகத்தில் ஈடுபடும் நிறுவனங்கள், வியாபாரிகள் உள்ளிட்டோர் விவசாயிகள் என்ற வரையறைக்குள் வராதவாறு முந்தைய விதைச் சட்டத்தில் வரையறுக்கப்பட்டிருந்த விலக்கை இப்புதிய மசோதா விலக்கிக் கொண்டுவிட்ட அதேசமயம், கார்ப்பரேட் நிறுவனங்களையும் விவசாயிகள் என வரையறுப்பதற்கு ஏற்ப தொளதொளப்பான விளக்கத்தை அளித்திருக்கிறது. இதன்படி, விளைநிலங்களைச் சொந்தமாகக் கொண்டிருப்பவர்களையும் மைய மற்றும் மாநில அரசுகளால் வரையறுக்கப்படும் விவசாயம் தொடர்பான வேலைகளில் ஈடுபடுபவர்களையும் விவசாயிகள் என வரையறுக்கிறது புதிய மசோதா.

இந்த வரையறையின்படி விதை உற்பத்தியில் ஈடுபடும் பாயர், மான்சாண்டோ உள்ளிட்ட பன்னாட்டு ஏகபோக நிறுவனங்களும்கூட விவசாயிகள் எனக் கருதப்பட்டு, புதிய விதை மசோதாவில் சிறு, குறு விவசாயிகளுக்கு அளிக்கப்பட்டிருக்கும் சலுகைகள், விலக்குகளை இந்தப் பன்னாட்டு நிறுவனங்களும் அனுபவிப்பதற்கு ஏற்பாடு செய்யப்பட்டிருக்கிறது.

2002-ஆம் ஆண்டில் இயற்றப்பட்ட பயிரினங்களின் பாதுகாப்பு மற்றும் விவசாயிகளின் உரிமைச் சட்டத்தின்படி, ஏற்கெனவே பயன்பாட்டில் இருந்துவரும் விதைகளை மூலமாகக் கொண்டு அதனினும் மேம்பட்ட விதையைத் தனிநபரோ, நிறுவனமோ சந்தைப்படுத்தினால், அம்மேம்படுத்தப்பட்ட விதை விற்பனை வழியாகக் கிடைக்கும் இலாபத்தின் ஒரு பகுதியைத் தேசிய விதை வங்கிக்கு வழங்க வேண்டும் என்ற விதி இருந்தது. இப்புதிய மசோதாவில் அவ்விதி ரத்து செய்யப்பட்டுவிட்டது.

இதன் மூலம் கார்ப்பரேட் நிறுவனங்கள் இலாபம் முழுவதையும் அபகரித்துக் கொள்ள வழி ஏற்படுத்திக் கொடுக்கப்பட்டுள்ளதோடு, புதிய வீரியமிக்க, மேம்பட்ட விதைகளைத் தயாரிக்கும் நிறுவனங்கள், தாம் கண்டுபிடித்த விதைகள் எந்த மூல விதையிலிருந்து வந்தன என்பதையோ, அதில் விவசாயிகளின் பங்கு குறித்தோ குறிப்பிடத் தேவையில்லை எனச் சலுகை காட்டப்பட்டிருக்கிறது. இனி, பன்னாட்டு ஏகபோக விதை நிறுவனங்கள் இந்த சலுகையைப் பயன்படுத்திக்கொண்டு நமது நாட்டின் பாரம்பரிய விதைகள் அனைத்தையும் திருடிக்கொண்டு, அவற்றைப் புதிய மேம்படுத்தப்பட்ட விதைகளாகச் சந்தைப்படுத்தும் அயோக்கியத்தனத்தில் சட்டபூர்வமாக ஈடுபடக் கூடும்.

2001-ஆம் ஆண்டு சட்டப்படி, புதிய மேம்படுத்த விதைளை உருவாக்கும் நிறுவனங்கள் அவ்விதை மீது ஒரு குறிப்பிட்ட காலத்திற்குப் பிறகு உரிமை கோர முடியாது. ஆனால், புதிய விதை மசோதா அக்காலக்கெடுவை ரத்து செய்து, தனியார் நிறுவனங்கள் எத்துணை முறை வேண்டுமானாலும் தமது விதைகளுக்குத் திரும்பத்திரும்பச் சான்றிதழ் பெற்றுச் சந்தையில் விற்றுக்கொள்ள அனுமதித்திருக்கிறது. இதன் மூலம் விதை நிறுவனங்களின் நீண்ட கால ஏகபோக கொள்ளைக்குச் சட்டபூர்வ தகுதி அளிக்கப்பட்டிருக்கிறது.

2001 சட்டப்படி பயிர் செய்யும் பருவ காலங்களில் சந்தையில் விதைத் தட்டுப்பாடு ஏற்படுவதைத் தடுத்துப் போதுமான அளவு விதைகள் விற்பனை செய்யப்படுவதையும், அக்காலங்களில் விதைகளின் விலைகளை நிர்ணயம் செய்து கட்டுப்படுத்தும் அதிகாரமும் உறுதி செய்யப்பட்டிருந்தது. புதிய விதை மசோதாவில் இவை இரண்டுமே உறுதி செய்யப்படவில்லை. இதன் மூலம் கார்ப்பரேட் நிறுவனங்களும் வியாபாரிகளும் விதைகளைப் பதுக்கிக் கொள்ளவும், விதைகளின் விலைகளைச் செயற்கையாக ஊதிப் பெருக்கிக் கொள்ளவும் வழி ஏற்படுத்தித் தரப்பட்டிருக்கிறது.

அறுவடைக்குப் பின் விதைகளைச் சேமித்து வைத்து அடுத்த மகசூலுக்குப் பயன்படுத்திக் கொள்ளவும், அதனை விவசாயிகளுக்கு இடையே பரிமாறிக் கொள்ளவும் இப்புதிய மசோதா விவசாயிகளை அனுமதித்தாலும், விவசாயிகள் தமது விதைகளை விற்பனை செய்ய தடை விதிக்கிறது. விவசாயிகள் சான்று பெறாத விதைகளை விற்பனை செய்கிறார்களா என்பதைக் கண்காணிக்கவும் சோதனையிடவும் போலீசு அதிகாரிகளுக்கு நிகரான அதிகாரங்களுடன் கூடிய அமைப்பு உருவாக்கப்பட்டு, விதைகளின் மீதான விவசாயிகளின் சுதந்திரமும் உரிமையும் பறிக்கப்பட்டிருக்கிறது.

தரமற்ற விதைகளால் மகசூல் பாதிக்கப்பட்டு விவசாயிகள் நட்டமடையும்போது அவர்களைப் பாதுகாப்பதற்கு 2001-ஆம் ஆண்டு சட்டத்தில் ஏற்பாடுகள் இருந்தன. புதிய மசோதாவின்படி, இப்படிப்பட்ட பிரச்சினைகளில் அரசு நேரடியாக விவசாயிகளின் பக்கம் நிற்காது. மாறாக, விவசாயிகள் நுகர்வோர் நீதிமன்றங்களில் வழக்குத் தொடுத்து, தங்களுக்கு வழங்கப்பட்ட விதை தரமற்றது என நிரூபித்து நட்ட ஈடு பெற்றுக் கொள்ள வேண்டுமென என நட்டாற்றில் இறக்கிவிடப்பட்டுள்ளனர். மேலும், தரமற்ற விதைகளை விற்கும் நிறுவனங்களின் மீது விதிக்கப்படும் அபராதத்தை மிகக் குறைவாக நிர்ணயித்திருக்கும் இம்மசோதா, சான்று பெறாத விதைகளை விற்கும் விவசாயிகள் மீது கிரிமினல் வழக்குத் தொடுத்து ஒரு இலட்சம் வரை அபராதம் விதிக்கப் பரிந்துரைக்கிறது.

தரமான விதை, சான்றிதழ் பெற்ற விதை என்ற பெயரில் இந்தியப் பாரம்பரிய விவசாயத்தின் மீது பன்னாட்டு ஏகபோக விதை நிறுவனங்களின் கட்டுப்பாட்டை மென்மேலும் இறுக்குகிறது இம்மசோதா. விவசாயிகளின் வருமானத்தை இரட்டிப்பாக்கப் போவதாகத் தம்பட்டம் அடித்து வருகிறார், மோடி. ஆனால், அவரது அரசு கொண்டு வந்திருக்கும் இம்மசோதாவோ கார்ப்பரேட் விதை நிறுவனங்கள் இந்திய விவசாயிகளைக் கொள்ளையிடுவதற்கு வழி ஏற்படுத்தித் தருகிறது.

பரணிதரன்

புதிய ஜனநாயகம், பிப்ரவரி 2020

மின்னூல்:

மின்னூலை வாங்க Add to cart பட்டனை அழுத்தவும். பின்னர் View cart அழுத்தி, உங்கள் கூடையில்(Cart), எண்ணிக்கையை(Quantity) சரிபார்த்துவிட்டு, Proceed to checkout-பட்டனை அழுத்தி, உங்கள் பெயர் மற்றும் தகவல்களை பதிவு செய்து Place order-ஐ அழுத்துங்கள். இந்தியாவில் வங்கி கணக்கு வைத்திருப்போர் Online Payments மூலமாகவும் வெளிநாட்டில் வங்கி கணக்கு வைத்திருப்போர் Paypal மூலமாகவும் தெரிவு செய்து பணத்தை செலுத்தலாம்.

பணம் அனுப்பிய பிறகு உங்களது மின்னஞ்சலுக்கு உடனேயே டவுண்லோடு இணைப்பு வரும். அதிலிருந்து நீங்கள் இரண்டு நாட்களுக்குள் டவுண்லோடு செய்யலாம்.

புதிய ஜனநாயகம் மாத இதழை நேரடியாகப் பெற விரும்புவோர் ஆண்டுச் சந்தா செலுத்தலாம் : உள்நாடு ரூ.180 மட்டும்!

தொடர்பு முகவரி
புதிய ஜனநாயகம் ,
110, இரண்டாம் தளம்,
63, என்.எஸ்.கே. சாலை, (அ.பெ.எண்: 2355)
கோடம்பாக்கம், சென்னை – 600024

தொலைபேசி: 94446 32561
மின்னஞ்சல் : puthiyajananayagam@gmail.com

புதிய ஜனநாயகத்தின் முந்தைய மின்னூல் வெளியீடுகள்

₹15.00Add to cart

₹15.00Add to cart

₹15.00Add to cart

நரேந்திர மோடி அரசு கொண்டு வந்திருக்கும் குடியுரிமைத் திருத்தச் சட்டமும், அதற்கு எதிராக நாடெங்கும் பரவலாக நடைபெற்று வரும் மக்கள்திரள் போராட்டங்களும் ஒரு  மாபெரும் சமூகக் கொந்தளிப்பை முன்னறிவிக்கின்றன. இப்போராட்டங்களின் வளர்ச்சிப்போக்கு இந்திய அரசியலின் எதிர்காலத்தை தீர்மானிக்க வல்லதாக இருக்கும்.

மோடியும் அவரது ஆதரவாளர்களும் வெற்றி அடைந்தால், மதச்சார்பின்மை, ஜனநாயகம், அறிவியல் உணர்வு ஆகிய மதிப்பீடுகளெல்லாம் இந்தியாவில் பெயருக்குக்கூட இல்லாது ஒழிக்கப்படும். அதற்கு மாறாக, மக்கள்திரள் போராட்டங்கள் வெற்றியடைந்தால், அவ்வெற்றி புதிய இந்தியாவைப் படைப்பதற்கான வாசலைத் திறந்துவிடுவதாக அமையும்.

இந்தப் போராட்டத்தைத் தோற்கடிக்கப் பார்ப்பன பாசிசக் கும்பலும் அவர்களது அடிவருடிகளும் இரண்டு வழிகளில் முயலுகிறார்கள். ஒன்று, மிகக் கொடூரமான, மிருகத்தனமான அடக்குமுறை; மற்றொன்று, அவதூறுகளின் மூலமும் பொய் வழக்குகளின் மூலமும் போராட்டக்காரர்களைத் தனிமைப்படுத்துவது. எனினும், குடியுரிமைத் திருத்தச் சட்டத்தையும் அதனைத் தொடர்ந்து வரவுள்ள தேசிய மக்கள்தொகை பதிவேடு, தேசியக் குடிமக்கள் பதிவேடு ஆகியவற்றையும் எதிர்த்து நடைபெற்று வரும் போராட்டங்கள் இந்த இரட்டைத் தாக்குதல்களை எதிர்கொண்டு தொய்வின்றி நடந்துவருகின்றன.

• “இந்துக்களும் முசுலீம்களும் இணைந்துவிட்டால், நாஜியால் என்ன செய்துவிட முடியும்?”
• “பாசிசத்திலிருந்து விடுதலை!”
• “நாங்கள் குடியுரிமைக்கான சான்றுகளைத் தரமாட்டோம்; நாங்கள் அரசியலமைப்புச் சட்டத்தைக் காப்போம்!”
• “எனது குடியுரிமையை நிரூபிக்குமாறு கேட்க நீ யார்?”

இவையெல்லாம் போராட்டத்தில் எதிரொலிக்கும் முழக்கங்கள்.

மேற்கு வங்கத்தில் நடைபெற்ற மாணவர்களின் போராட்டத்தில் உரையாற்றிய ஒரு முஸ்லிம் மாணவன், “நான் இறக்கும் தருவாயில் மீண்டும் இங்கேயே பிறக்க அல்லாவிடம் வேண்டுவேன்” எனக் கூற, அதற்கு மற்றொரு மாணவன், “முஸ்லிம் மதத்தில் மறுபிறவி என்ற நம்பிக்கை கிடையாது” எனக் கிண்டல் செய்ய, அதற்கு அம்முஸ்லிம் மாணவன், இருக்கலாம்; “நான் பெங்காலியும்கூட” எனப் பதில் அளிக்க, அப்போராட்டக் களமே வெடிச்சிரிப்பில் மூழ்கியது.

மகாராஷ்டிராவில் மும்பய் நகரிலுள்ள கிராந்தி மைதானத்தில் நடைபெற்ற போராட்டத்தில் ஹிஜாப் உடை அணிந்து நெற்றியில் குங்குமமும் இட்டு வந்த இளம் பெண், “உங்களை எது அதிகமாகக் காயப்படுத்துகிறது? எனது ஹிஜாபா, அல்லது நான் ஹிஜாப் அணிந்து நெற்றியில் குங்குமம் இட்டிருப்பதா?” எனக் கேட்க, ஆர்ப்பாட்டக்காரர்கள் அனைவரும் அக்கேள்வியை எதிரொலித்தார்கள்.

குடியுரிமைத் திருத்தச் சட்டத்துக்கு எதிராக மதம் கடந்து உருவாகி வரும் இந்த ஒற்றுமையும், ஜனநாயக உணர்வும்தான் பார்ப்பன பாசிசக் கும்பலை அச்சங்கொள்ள வைக்கிறது. பணமதிப்பழிப்பு, ஜி.எஸ்.டி., பொருளாதார மந்தம், வேலையிழப்பு, விலைவாசி உயர்வு, தொழிலாளர் நலச் சட்டத் திருத்தம், 370 முடக்கம் ஆகிய தாக்குதல்களைச் சகித்துக்கொண்டதைப் போன்று, குடியுரிமைத் திருத்தச் சட்டம், தேசிய மக்கள்தொகை பதிவேடு, தேசியக் குடியுரிமை பதிவேடு  ஆகியவற்றையும் இந்திய மக்கள் பொறுத்துப் போவார்கள் என்ற அவர்களின் கனவு மண்கோட்டையாகச் சரிந்துவிட்டது.

படிக்க:
♦ இளம் வழக்கறிஞர்களுக்கு உதவித் தொகை ! வழக்கறிஞர்கள் கோரிக்கை வெற்றி !
♦ நிதி மூலதன ஆட்சி !

***

குடியுரிமைத் திருத்தச் சட்டம், தேசிய மக்கள்தொகை பதிவேடு, தேசியக் குடியுரிமை பதிவேடு என்ற இந்துத்துவ திரிசூலத்தை எதிர்த்து நிற்பதில் முஸ்லிம்கள் முன்னணியில் நின்றாலும், இப்போராட்டம் முஸ்லிம் மத அடையாளத்தை முன்னிறுத்தி நடத்தப்படவில்லை. அவர்கள் பச்சைக் கொடிக்குப் பதிலாக மூவர்ண தேசியக் கொடியைக் கையில் ஏந்தி வருகிறார்கள்.

“குடியுரிமைத் திருத்தச் சட்டத்திற்கு எதிராகப் போராட வேண்டாம்” எனக் கூறிய டெல்லி ஜும்மா மசூதி இமாம் அகமது புகாரியின் அறிவுரையைப் புறக்கணித்துவிட்டு, பழைய டெல்லியைச் சேர்ந்த முஸ்லிம்கள் உ.பி.யைச் சேர்ந்த தலித் தலைவர் சந்திரசேகர் ராவணன் தலைமையில் திரண்டு போராடினார்கள். “அல்லாஹு அக்பர்” என்ற முழக்கம் அப்போராட்டத்தில் கேட்கவில்லை. மாறாக, அரசியல் சாசனத்தின் முகவுரையை முழக்கமாக எழுப்பினார்கள்.

டெல்லியில் மட்டுமல்ல, இராஜஸ்தானில் உள்ள புகழ்பெற்ற அஜ்மீர் தர்கா திவான் சையத் சைனுல் ஹுசைன் சிஸ்டியின் அறிவுரையைப் புறக்கணித்துவிட்டு, இராஸ்தான் மாநில முதல்வர் அசோக் கெலாட் ஜெய்ப்பூரில் நடத்திய ஆர்ப்பாட்ட ஊர்வலத்தில் பிற மதத்தினரோடு கலந்துகொண்டார்கள்.

இந்த இந்துத்துவ திரிசூலத்தை எதிர்த்த போராட்டம் முஸ்லிம் மாணவர்கள் பெருவாரியாகப் பயிலும் அலிகர் முஸ்லிம் பல்கலைக்கழகம், ஜாமியா பல்கலைக்கழகம் ஆகியவற்றில் மட்டும் நடைபெறவில்லை. டெல்லி ஜவஹர்லால் நேரு பல்கலைக்கழகம், மேற்கு வங்கம் ஜாதவ்பூர் பல்கலைக்கழகம், சென்னை பல்கலைக்கழகம், உ.பி. பனாரஸ் இந்து பல்கலைக்கழகம், கான்பூர் இந்தியத் தொழில்நுட்பக் கழகம், பாண்டிச்சேரி பல்கலைக்கழகம் எனப் பல்வேறு பல்கலைக்கழகங்களிலும் நூற்றுக்கணக்கான கல்லூரிகளிலும் நடைபெற்றிருக்கிறது, நடைபெற்று வருகிறது. குறிப்பாக, டெல்லி ஜாமியா பல்கலைக்கழக மாணவர்கள் மீது டெல்லி போலீசு இந்து மதவெறியோடு நடத்திய தாக்குதல்தான் இப்போராட்டத்தை நாடு தழுவிய போராட்டமாக மாற்றியது.

மத வேறுபாடுகளைக் கடந்து, பல்வேறு வர்க்கங்கள் மற்றும் சமூகத் தட்டுக்களைச் சேர்ந்த பொதுமக்களை, குறிப்பாக, மாணவர்களை, இளைஞர்களைப் பெருவாரியாக ஈர்த்து, நாடெங்கும் பரவலாக நடைபெற்று வரும் போராட்டங்கள் இந்து மதவெறிக்கு எதிராக மதச்சார்பின்மையையும், பாசிசத்திற்குப் பதிலாக ஜனநாயகத்தையும் முன்வைக்கின்றன என்றால், இப்போராட்டத்தை ஒடுக்க முயலும் அரசின் அனைத்து நடவடிக்கைகளும் இந்து மதவெறியையும் அரசு பயங்கரவாதத்தையும் இணைத்துக் கொண்டுள்ளன.

அலிகர் முஸ்லிம் பல்கலைக்கழகம் மற்றும் டெல்லி ஜாமியா பல்கலைக்கழக மாணவர்கள் மீது நடத்தப்பட்ட கொடூரத் தாக்குதலும்; உ.பி. முஸ்லிம்கள் மீது யோகி ஆதித்யநாத் அரசு கட்டவிழ்த்துவிட்டு வரும் அடக்குமுறைகளும்; மோடி, அமித் ஷா தொடங்கி எச்ச.ராஜா வரையிலான பா.ஜ.க. தலைவர்கள் இப்போராட்டங்களைக் கொச்சைப்படுத்திக் கூறும் அவதூறுகளும் இந்த உண்மையை நிரூபிக்கின்றன.

***

உ.பி. முசுலீம்கள் மீது ஆதித்யநாத் அரசு நடத்திவரும் இந்து மதவெறி அரசு பயங்கரவாதக் கூட்டுத் தாக்குதலை, நரேந்திர மோடி குஜராத் முதல்வராக இருந்தபோது, அம்மாநிலத்தில் நடத்திய முஸ்லிம்படுகொலையோடு ஒப்பிட முடியும். “இந்துக்கள் தமது ஆத்திரத்தை வெளிப்படுத்துவதைத் தடுக்கக்கூடாது” என குஜராத் இனப்படுகொலையின்போது மோடி போலீசு அதிகாரிகளிடம் கூறினார் என்றால், “முசுலீம்களைப் பழிக்குப் பழித் தீர்த்துக்கொள்ள வேண்டும்” என இந்து மதவெறியைக் கக்கித் தாக்குதலை நடத்திவருகிறார், ஆதித்யநாத்.

குஜராத்தில் பஜ்ரங் தள் உள்ளிட்ட சங்கப் பரிவார அமைப்புகள் முசுலீம்கள் மீது நடத்திய தாக்குதலை குஜராத் போலீசு ஒதுங்கி நின்று வேடிக்கை பார்த்தது என்றால், உ.பி.யிலோ போலீசு நண்பர்கள் என்ற பெயரில் உருவாக்கப்பட்டிருக்கும் இந்து மதவெறி குண்டர் படையும் போலீசும் இணைந்து முசுலீம்கள் மீது தாக்குதலை நடத்திவருகின்றன. பா.ஜ.க.வைச் சேர்ந்த உள்ளூர் தலைவர்களும் அவர்களது கையாட்களும் போலீசு நடத்திய தாக்குதலின் தளபதியாகச் செயல்பட்டுள்ளனர். குறிப்பாக, முசாஃபர் நகரில் முசுலீம்கள் ஆர்ப்பாட்டம் நடத்தத் திட்டமிட்டிருந்த இடத்திற்கு பா.ஜ.க. நாடாளுமன்ற உறுப்பினரும் மைய இணை அமைச்சருமான சஞ்ஜீவ் பல்யான் வந்து போலீசைத் தூண்டிவிட்ட பிறகுதான் தடியடியும் துப்பாக்கிச் சூடும் நடந்ததாக அவ்வூரைச் சேர்ந்த முசுலீம்கள் குற்றஞ்சுமத்துகின்றனர்.

ஏழை முசுலீம்களைச் சுட்டுக் கொல்வதும், வசதியான முஸ்லிம் குடும்பங்களின் சொத்துக்களை அடித்து நொறுக்கிக் கொள்ளையிடுவதும்  உ.பி.யில் திட்டமிட்ட முறையில் அரங்கேற்றப்பட்டிருக்கிறது.

படிக்க:
♦ குடியுரிமைச் சட்டம் : மோடியின் ஹிட்லர் திட்டம் ! புதிய கலாச்சாரம் ஜனவரி 2020 வெளியீடு
♦ குளோரோகுயின் மாத்திரைகள் : அமெரிக்காவின் மிரட்டலும், 56 இஞ்ச்சும் !

***

ஃபெரோசாபாத் நகரில் நடத்தப்பட்ட துப்பாக்கிச் சூட்டில் கொல்லப்பட்டவர்களுள் ஒருவரான இருபத்தாறு வயதான ரஷீத் ஒப்பந்தத் தொழிலாளி; தனது கூலியை வாங்கிக் கொண்டு திரும்பும் வழியில் சுட்டுக் கொல்லப்பட்டார் ரஷீத். முப்பது வயதான ஹரூன் தனது எருதை விற்றுவிட்டுத் திரும்பும் வழியில் சுட்டுக் கொல்லப்பட்டார்.

முசாஃபர் நகரில் நடத்தப்பட்ட துப்பாக்கிச் சூட்டில் பலியான நூர் முகம்மதுவின் கூலியை நம்பித்தான் அவரது குடும்பமே காலத்தை ஓட்டிவருகிறது. இவர் போலீசின் துப்பாக்கிக்குப் பலியானரா அல்லது ஆர்.எஸ்.எஸ். குண்டர் படையின் துப்பாக்கிக் குண்டுக்குப் பலியானரா என்பது விவாதப் பொருளாகியிருக்கிறது.

துப்பாக்கியால் சுடப்பட்ட அனைவரும் சம்பவ இடத்திலேயே இறந்து போகவில்லை. காப்பாற்றுவதற்கு வாய்ப்பிருந்தும்கூட நூர் முகம்மதுவிற்கு முசாஃபர் நகர் அரசு மருத்துவமனையில் சிகிச்சை அளிக்க மருத்துவர்கள் மறுத்துவிட்டதால், அவரை மீரட் மருத்துவமனைக்கு எடுத்துச் செல்லும் வழியில் இறந்து போனார்.

குண்டடிபட்ட மீரட் நகரைச் சேர்ந்த முகம்மது மோசின், ஆசிப் உள்ளிட்ட மூன்று பேருக்கு அரசு மருத்துவமனையில் சிகிச்சை அளிக்க மறுக்கப்பட்டதால், அவர்கள் மூவரும் இரத்தப் போக்கு நிற்காமல் இறந்து போனார்கள்.

“குண்டடிபட்டு சிகிச்சைக்காக மருத்துவமனைக்கு வரும் முஸ்லிம்களுக்கு சிகிச்சை அளிக்கக்கூடாதென மேலிடத்திலிருந்து உத்தரவு வந்திருப்பதாக” வெளிப்படையாகவே தெரிவித்திருக்கிறார்கள் அரசு மருத்துவர்கள்.

கர்நாடகா மாநிலத்தில் மங்களூரு நகரில் நடந்த துப்பாக்கிச் சூட்டில் 49 வயதான அப்துல் ஜலீலும், 24 வயதான நௌஷினும் சம்பவ இடத்திலேயே பலியானார்கள். எனினும், ஆர்ப்பாட்டக்காரர்கள் குண்டடிபட்ட அந்த இருவரையும், உயிருக்குப் போராடிக்கொண்டிருந்த மற்றொரு முஸ்லிமையும், அரசு மருத்துவமனைக்கு எடுத்துச் சென்றால் சிகிச்சை அளிக்கமாட்டார்கள் என முன் அனுமானித்து, முஸ்லிம் மருத்துவர் நடத்தும் ஹைலாண்ட் மருத்துவமனைக்கு எடுத்துச் சென்றார்கள்.

இந்த ஒரு காரணத்துக்காகவே, மங்களூரு போலீசு அந்த மருத்துவமனைக்குள் அத்துமீறி நுழைந்து உள்நோயாளிகளைத் தாக்க முயன்றதோடு, கண்ணீர்ப் புகை குண்டுகளையும் மருத்துவமனை வளாகத்தில் வீசியது. போர்ச் சூழலில்கூட மருத்துவமனைகளைத் தாக்கக்கூடாதென்ற சர்வதேச நியதியைக் காலில் போட்டு மிதித்திருக்கிறது, மங்களூரு போலீசு.

முசாஃபர் நகரில் ஆர்ப்பாட்டம் நடந்த அன்றைய இரவில் தெரு விளக்குகளை அணைத்துவிட்டு, உள்ளூர் ஆர்.எஸ்.எஸ். கும்பலின் துணையோடு, அவர்கள் அடையாளம் காட்டிய முஸ்லிம் வீடுகளுக்குள் எல்லாம் புகுந்த போலீசு அவ்வீடுகளில் இருந்த பொருட்களையெல்லாம் அடித்து நொறுக்கி, பணம் நகைகளைத் திருடிச் சென்றிருக்கிறது.

தனது பேத்திகளின் திருமணத்திற்காக எடுத்து வைத்திருந்த ஐந்து இலட்ச ரூபாய் பெறுமான நகைகளை “போலீசு திருடிச் சென்றுவிட்டதாக”க் குற்றஞ்சுமத்துகிறார், முசாஃபர் நகரைச் சேர்ந்த ஹமீத் ஹசன்.

மீரட் நகரில் தெற்கு சிவில் லைன்ஸ் பகுதியில் செல்ஃபோன் / கணினி விற்பனை நிலையம் நடத்திவரும் நசீர் கான், ஆஸிஃப் ஆகிய இருவரும், “ஆர்.எஸ்.எஸ். கும்பல் தமது கடையிலிருந்து ஏழு இலட்சம் ரூபாய் பெறுமான மின்னணுப் பொருட்களை அடித்து நொறுக்கியும் திருடியும் சென்றுவிட்டதாக” போலீசில் புகார் அளித்துள்ளனர்.

உ.பி. மாநில போலீசு அறிவிக்கப்படாத ஆர்.எஸ்.எஸ். அடியாள் படை என்பது ஏற்கெனவே அம்பலமான ஒன்று. தற்பொழுது, யோகியின் ஆட்சியில் அவ்வரசுப் படை மிகவும் வெளிப்படையாகவே ஆர்.எஸ்.எஸ். விசுவாசியாக மாறி, முஸ்லிம்களை வேட்டையாடியிருக்கிறது.

மீரட் நகரின் காவல்துறை கண்காணிப்பாளர் அகிலேஷ் என்.சிங், ஆர்.எஸ்.எஸ். இந்து மதவெறியனுக்கே சவால் விடும் வகையில், உ.பி. முசுலீம்களை பாகிஸ்தானுக்கு ஓடுமாறு பேசி, அம்மதவெறிப் பேச்சை சமூக வலைத்தளங்களில் ஒளிப்படமாகவும் வெளியிட்டிருக்கிறார்.

முஸ்லிம்களின் வீடுகளுக்குள் புகுந்த உ.பி. மாநில போலீசார், “இனி இந்த வீடெல்லாம் எங்களுக்குத்தான் சொந்தம். குடியுரிமைச் சட்டம் உங்களை பாகிஸ்தானுக்குத் துரத்திவிடும்” எனக் கூறியிருக்கிறார்கள்.

முஸ்லிம் இளைஞர்களுக்கு ஆத்திரமூட்டி, அவர்களை வன்முறையில் இறங்க வைக்க வேண்டும் என்பதற்காகவே, மதரீதியான கொச்சையான அவதூறுகளை உ.பி. மாநில போலீசு ஆர்ப்பாட்டத்தின்போது சரளமாகப் பயன்படுத்தியிருக்கிறது. குறிப்பாக, முஸ்லிம்களின் சுன்னத் மதச் சடங்கைக் கேலி செய்யும் வகையில், முக்கா துலுக்கன் என வார்த்தைக்கு வார்த்தை கூறி முஸ்லிம்களை அவமானப்படுத்தியிருக்கிறது.

மங்களூரு நகரில் முஸ்லிம்கள் மீது துப்பாக்கிச் சூடு நடத்திய காவல்துறை ஆய்வாளர் சாந்தாராம் குந்தர், “இத்துணை முறை சுட்ட பிறகும் ஒருத்தன்கூட சாகவில்லையே” என வன்மத்தோடு சக போலீசுக்காரர்களிடம் அங்கலாய்த்துக் கொண்டிருக்கிறார்.

மைய அரசின் துணை நிதியமைச்சர் அனுராக் தாக்குர், “துரோகிகளைச் சுட்டுக் கொல்ல வேண்டும்” என்றும்; பா.ஜ.க. நாடாளுமன்ற உறுப்பினரான பர்வேஷ் வர்மா, “முஸ்லிம்கள் இந்துக்களின் வீடு புகுந்து நமது மகளை, சகோதரிகளைப் பாலியல் பலாத்காரம் செய்வார்கள்” என்றும்; மேற்கு வங்க மாநில பா.ஜ.க. தலைவர் திலிப் கோஷ், “எமது அரசு ஆர்ப்பாட்டக்காரர்களை நாயைப் போல சுட்டுக் கொன்றது” என்றும் விஷமத்தனமாகப் பேசியிருப்பதெல்லாம், முஸ்லிம்களை வன்முறையில் இறங்கச் செய்து, அவர்களைத் தனிமைப்படுத்திவிட வேண்டும் என்ற தீய நோக்கம் கொண்டவையாகும்.

நியாயப்படியும், சட்டப்படியும் பார்த்தால், குடியுரிமைத் திருத்தச் சட்டத்திற்கு எதிராக அமைதியான முறையில் ஆர்ப்பாட்டம் நடத்த முயன்ற கர்நாடகா மற்றும் உ.பி. மாநில முஸ்லிம்கள் மீதும் அலிகர் மற்றும் ஜாமியா பல்கலைக்கழக மாணவர்கள் மீதும் இந்து மதவெறியோடு அரசு பயங்கரவாத வன்முறையை ஏவிவிட்ட உ.பி., கர்நாடகா மற்றும் டெல்லி போலீசு மீதும்; அவ்வரசுப் படையை வழிநடத்திச் சென்ற ஆர்.எஸ்.எஸ்.  பா.ஜ.க. தலைவர்கள் மீதும்தான் கிரிமினல் வழக்குகள் பதிவு செய்திருக்க வேண்டும்.

ஆனால், அதற்கு எதிராக, குடியுரிமைத் திருத்தச் சட்டத்திற்குச் சட்டப்படி எதிர்ப்பு தெரிவிக்க முயன்ற முஸ்லிம்கள், மனித உரிமை ஆர்வலர்கள், தன்னார்வத் தொண்டர்கள், மாணவர்கள் ஆகியோர் மீது பிணையில் வெளிவரமுடியாதபடி பொய்வழக்குகளைப் போட்டுச் சிறையில் அடைத்திருக்கிறது, பார்ப்பன பாசிசக் கும்பல். இதன் மூலம் போராடிய முஸ்லிம்களை வன்முறையாளர்களாகச் சித்திரிக்கும் சதியை அரங்கேற்றியிருக்கிறது.

***

தமிழகத்தில் சல்லிக்கட்டுக்கு ஆதரவாக ஓர் எழுச்சி உருவானதைப் போன்றே, ஒரு வெகுமக்கள் எழுச்சி நாடு தழுவிய அளவில் குடியுரிமைத் திருத்தச் சட்டம், தேசிய மக்கள்தொகை பதிவேடு, தேசியக் குடியுரிமை பதிவேடு ஆகியவற்றுக்கு எதிராக உருவாகியிருக்கிறது. இந்த மூன்றும் ஆர்.எஸ்.எஸ்.  இந்து ராஷ்டிரக் கனவை நிறைவேற்றிக் கொடுக்கும் முன்னெடுப்பு என்பதை உணர்ந்து இந்த எழுச்சி நடைபெற்று வருவதுதான் இதனின் தனிச்சிறப்பு.

இப்போராட்டத்திற்குப் பல்வேறு எதிர்க்கட்சிகளும் புரட்சிகர ஜனநாயக சக்திகளும் முஸ்லிம் அமைப்புகளும் ஆதரவளித்தாலும், இந்த மக்கள் எழுச்சி எதிர்க்கட்சிகள் உள்ளிட்டு எந்தவொரு தனிப்பட்ட அமைப்பின் தலைமையிலும் நடைபெறவில்லை என்பதைப் பல்கலைக்கழக- மாணவர்களின் போராட்டங்களும் டெல்லி ஷாஹீன் பாக் போராட்டம், கொல்கத்தா சர்க்கஸ் பார்க் போராட்டம் ஆகியவையும் உணர்த்துகின்றன.

போராட்டங்கள் தன்னெழுச்சியாகவும், துண்டு துண்டாகவும் நடைபெறுகின்றன; ஒருங்கிணைப்பு இல்லை என்பதையெல்லாம் பலவீனமாகக் கருதிக் கவலை கொள்வதைக் காட்டிலும், தேர்தல் அரசியல் கட்சிகளின் செயலின்மைக்கும், தேர்தல் அரசியலுக்கு வெளியே மாற்று அரசியல் தலைமை எதுவும் உருவாகாத வெறுமை நிலைக்கும் இடையில், இவற்றையெல்லாம் ஒதுக்கித் தள்ளிவிட்டும் முந்திக்கொண்டும் செல்லும் மக்களின் உணர்வு நிலையை எண்ணி மகிழ்ச்சியடைவதே பொருத்தமாக இருக்கும்.

1917 மார்ச்சில் ரசியப் பெண்கள் ரொட்டிக்காகவும் சமாதானத்திற்காகவும் நடத்திய போராட்டம் அக்டோபர் புரட்சியின் தொடக்கப் புள்ளியாக அமைந்தது.

பார்ப்பன பாசிஸ்டுகளை இந்திய சமூக, அரசியல் அரங்கிலிருந்து தூக்கியெறிய வேண்டும் என விருப்பங்கொண்டுள்ள புரட்சிகர, ஜனநாயக சக்திகள் களத்தில் நிற்கிறார்கள். “என்னை எதிர்த்து நிற்கும் தலைவன் யார்?” என்று காங்கிரசுக்கும் பிற எதிர்க்கட்சிகளுக்கும் சவால் விட்ட மோடி, தன்னை எதிர்த்து நிற்கும் இலட்சக்கணக்கான இளைஞர்களை, மாணவர்களை, தாய்மார்களைக் கண்டு திகைத்து நிற்கிறார். புதிய தலைமைகளை இந்தப் போராட்டம் நிச்சயம் உருவாக்கித் தரும்.

புதிய ஜனநாயகம், பிப்ரவரி 2020 

பிப்ரவரி மாத புதிய ஜனநாயகம் இதழில் வெளியான இக்கட்டுரையை தாமதமாக ஏப்ப்ரல் மாதத்தில் வெளியிடுவதற்கு வருந்துகிறோம்.

மின்னூல்:

மின்னூலை வாங்க Add to cart பட்டனை அழுத்தவும். பின்னர் View cart அழுத்தி, உங்கள் கூடையில்(Cart), எண்ணிக்கையை(Quantity) சரிபார்த்துவிட்டு, Proceed to checkout-பட்டனை அழுத்தி, உங்கள் பெயர் மற்றும் தகவல்களை பதிவு செய்து Place order-ஐ அழுத்துங்கள். இந்தியாவில் வங்கி கணக்கு வைத்திருப்போர் Online Payments மூலமாகவும் வெளிநாட்டில் வங்கி கணக்கு வைத்திருப்போர் Paypal மூலமாகவும் தெரிவு செய்து பணத்தை செலுத்தலாம்.

பணம் அனுப்பிய பிறகு உங்களது மின்னஞ்சலுக்கு உடனேயே டவுண்லோடு இணைப்பு வரும். அதிலிருந்து நீங்கள் இரண்டு நாட்களுக்குள் டவுண்லோடு செய்யலாம்.

புதிய ஜனநாயகம் மாத இதழை நேரடியாகப் பெற விரும்புவோர் ஆண்டுச் சந்தா செலுத்தலாம் : உள்நாடு ரூ.180 மட்டும்!

தொடர்பு முகவரி
புதிய ஜனநாயகம் ,
110, இரண்டாம் தளம்,
63, என்.எஸ்.கே. சாலை, (அ.பெ.எண்: 2355)
கோடம்பாக்கம், சென்னை – 600024

தொலைபேசி: 94446 32561
மின்னஞ்சல் : puthiyajananayagam@gmail.com

புதிய ஜனநாயகத்தின் முந்தைய மின்னூல் வெளியீடுகள்

₹15.00Add to cart

₹15.00Add to cart

₹15.00Add to cart

உ.பி. மாநிலத்தில் குடியுரிமைத் திருத்தச் சட்டத்திற்கு எதிராக நடந்துவரும் போராட்டங்களைத் தொடர்ந்து 1,240 பேர் கிரிமினல் குற்றச்சாட்டுக்களின் கீழ் கைது செய்யப்பட்டனர்; 5,558 பேர் தடுப்புக் காவல் சட்டத்தின் கீழ் சிறையில் அடைக்கப்பட்டனர்; 370 கிரிமினல் வழக்குகள் பதியப்பட்டன; பொதுச் சொத்துக்களைச் சேதப்படுத்திய குற்றச்சாட்டின் கீழ் 498 பேருக்கு தண்டம் விதித்தோ அல்லது அவர்களின் சொத்துக்களைப் பறிமுதல் செய்வது தொடர்பாகவோ நோட்டீஸ் அனுப்பப்பட்டிருக்கிறது.

கொலை, கொலை முயற்சி, தீ வைத்தல், பொதுச் சொத்துக்களைச் சேதப்படுத்துதல், அரசு ஊழியர்களைப் பணி செய்யவிடாமல் தடுத்தல் உள்ளிட்டுப் பல்வேறு கடுமையான கிரிமினல் குற்றச்சாட்டுக்களின் கீழ் கைது செய்யப்பட்டுள்ளவர்களின் மீது வழக்குகள்  பதிவு செய்யப்பட்டுள்ளன.

முஸ்லிம் சமூகத்தைச் சேர்ந்தவர்கள் மட்டுமின்றி, காங்கிரசு கட்சியைச் சேர்ந்த சதாஃப் ஜாபர், ஓய்வுபெற்ற ஐ.பி.எஸ். அதிகாரி எஸ்.ஆர்.தாரபுரி, தலித் விரிவுரையாளர் பவன் ராவ், மூத்த வழக்குரைஞர் முகம்மது ஷோயிப், அவரது உதவியாளர் ராஜீவ் யாதவ் உள்ளிட்டுப் பல்வேறு மனித உரிமை ஆர்வலர்களும், தன்னார்வத் தொண்டர்களும் கைது செய்யப்பட்டுச் சிறையில் அடைக்கப்பட்டனர்.

இந்த வழக்குகள் அனைத்துமே பொய் வழக்குகள், குடியுரிமைத் திருத்தச் சட்டத்திற்கு எதிராகக் குரல் கொடுக்கும், போராட முன்வரும் அனைவரையும் வன்முறையாளர்களாகப் பழி சுமத்திச் சிறையில் அடைத்துச் சித்திரவதை செய்ய வேண்டும் என்ற நோக்கத்தோடு தொடுக்கப்பட்டவை என்பது முதல் கட்ட நீதிமன்ற விசாரணையிலேயே அம்பலமாகி வருகிறது.

எடுத்துக்காட்டாக, நாகினா என்ற ஊரில் நடந்த போராட்டத்தையடுத்து 83 பேர் கைது செய்யப்பட்டு, அவர்கள் மீது, போலீசார் மேல் துப்பாக்கிச் சூடு நடத்தியது, அரசு மற்றும் தனியார் சொத்துக்களைச் சேதப்படுத்தியது உள்ளிட்ட வழக்குகள் தொடுக்கப்பட்டன.

கைது செய்யப்பட்ட 83 பேரில் 48 பேருக்குப் பிணை வழங்கியிருக்கும் பிஜ்னோர் மாவட்டக் குற்றவியல் நீதிமன்றம், தனது உத்தரவில், ஆர்ப்பாட்டக்காரர்கள் தரப்பிலிருந்து போலீசை நோக்கிச் சுட்டதாகக் கூறப்படும் குற்றச்சாட்டிற்கு எவ்விதமான ஆதாரத்தையும் அரசு தரப்பு தரவில்லை. ஆர்ப்பாட்டம் நடந்த இடத்திலிருந்து ஆயுதங்கள் கைப்பற்றப்பட்டதற்கான ஆதாரம் எதுவுமில்லை. ஆர்ப்பாட்டக்காரர்கள் தீ வைப்பு உள்ளிட்ட வன்முறையில் ஈடுபட்டதற்கான ஆதாரம் எதையும் அரசு தரப்பு காட்டவில்லை. இந்த ஆர்ப்பாட்டத்தின்போது 13 போலீசார் கடுமையாகக் காயமடைந்ததாக அரசு தரப்பு கூறினாலும், அவர்களுள் 12 பேருக்கு சாதாரண சிராய்ப்புகள் மட்டும்தான் ஏற்பட்டிருக்கிறது எனக் குறிப்பிட்டு யோகி ஆதித்யநாத் அரசின் புளுகு மூட்டையை அம்பலப்படுத்தியிருக்கிறது.

படிக்க:
♦ நிதி ஆயோக் பரிந்துரை : மாவட்டத் தலைமை அரசு மருத்துவமனைகள் தனியார்மயம் !
♦ கொரோனா தொற்று தமிழகத்தின் உண்மை நிலை என்ன ? | மக்கள் அதிகாரம்

இது போல ராம்புர் நகரில் நடந்த ஆர்ப்பாட்டத்தின் போது 34 பேர் கைது செய்யப்பட்டு அவர்கள் அனைவர் மீதும் கொலை, கொலை முயற்சி, கொள்ளை ஆகிய கிரிமினல் குற்றச்சாட்டுக்களைச் சுமத்தியிருந்தது, போலீசு. இந்த வழக்கு விசாரணைக்கு வந்தபோது, குற்றஞ்சுமத்தப்பட்ட 34 பேரில் 26 பேர் மீதான குற்றச்சாட்டுக்களை போலீசே கைவிட்டுவிட்டது.

முசாஃபர் நகரில் நடந்த ஆர்ப்பாட்டத்தின்போது வன்முறையில் ஈடுபட்டதாகக் குற்றஞ்சுமத்தப்பட்டு கைது செய்யப்பட்ட காங்கிரசு கட்சியைச் சேர்ந்த சதாஃப் ஜாபர், ஓய்வுபெற்ற ஐ.பி.எஸ். அதிகாரி தாரபுரி ஆகிய இருவரின் பிணை மனுக்கள் லக்னோ நீதிமன்றத்தில் விசாரணைக்கு வந்தபோது, அவர்கள் மீதான குற்றச்சாட்டுக்களுக்கு ஆதாரங்கள் இல்லை என போலீசே ஒப்புக்கொண்டு குற்றச்சாட்டுக்களைக் கைவிட்டுவிட்டது.

சுடலை

புதிய ஜனநாயகம் பிப்ரவரி 2020

மின்னூல்:

மின்னூலை வாங்க Add to cart பட்டனை அழுத்தவும். பின்னர் View cart அழுத்தி, உங்கள் கூடையில்(Cart), எண்ணிக்கையை(Quantity) சரிபார்த்துவிட்டு, Proceed to checkout-பட்டனை அழுத்தி, உங்கள் பெயர் மற்றும் தகவல்களை பதிவு செய்து Place order-ஐ அழுத்துங்கள். இந்தியாவில் வங்கி கணக்கு வைத்திருப்போர் Online Payments மூலமாகவும் வெளிநாட்டில் வங்கி கணக்கு வைத்திருப்போர் Paypal மூலமாகவும் தெரிவு செய்து பணத்தை செலுத்தலாம்.

பணம் அனுப்பிய பிறகு உங்களது மின்னஞ்சலுக்கு உடனேயே டவுண்லோடு இணைப்பு வரும். அதிலிருந்து நீங்கள் இரண்டு நாட்களுக்குள் டவுண்லோடு செய்யலாம்.

புதிய ஜனநாயகம் மாத இதழை நேரடியாகப் பெற விரும்புவோர் ஆண்டுச் சந்தா செலுத்தலாம் : உள்நாடு ரூ.180 மட்டும்!

தொடர்பு முகவரி
புதிய ஜனநாயகம் ,
110, இரண்டாம் தளம்,
63, என்.எஸ்.கே. சாலை, (அ.பெ.எண்: 2355)
கோடம்பாக்கம், சென்னை – 600024

தொலைபேசி: 94446 32561
மின்னஞ்சல் : puthiyajananayagam@gmail.com

புதிய ஜனநாயகத்தின் முந்தைய மின்னூல் வெளியீடுகள்

₹15.00Add to cart

₹15.00Add to cart

₹15.00Add to cart

பொருளாதார மந்தத்தால் இந்திய மக்கள் அனுபவித்து வரும் வேதனைகளை, நெருக்கடிகளைக் கண்டு கொள்ளாத மோடி அரசு, இந்த மந்தத்தால் கார்ப்பரேட் முதலாளி வர்க்கத்திற்கு நேர்ந்துவிட்ட நெருக்கடிகளைக் களையக் கிடைத்த வாய்ப்பாக பட்ஜெட்டையும் பயன்படுத்திக் கொண்டிருக்கிறது. பெருநிறுவன வரிச் சீர்திருத்தங்களின் மூலமும், பொதுச் சொத்துக்களைத் தனியார்மயமாக்குவதன் மூலமும், பொதுமக்களுக்குப் பயன் அளிக்கக்கூடிய மானியங்களுக்கும் சமூக நலத் திட்டங்களுக்கும் அதிக நிதி ஒதுக்கீடு செய்ய மறுத்திருப்பதன் மூலமும் நிதி மூலதனக் கும்பலின் மனதைக் குளிரவைத்து, தம்மை கார்ப்பரேட் முதலாளி வர்க்கத்தின் தாசாதி தாசனாக, மற்ற ஆளும் வர்க்கக் கட்சிகளை விஞ்சிய முதலாளித்துவ சேவகனாகக் காட்டிக்கொண்டுவிட்டது.

பொருளாதார மந்தம் எனக் கூறப்படும் இந்த நிகழ்ச்சிப் போக்கின் உண்மையான பொருள் வேலையிழப்பு, ஆட்குறைப்பு, வேலையின்மை, கூலிவெட்டு ஆகியவைதான். இந்தப் பொருளில் மட்டும்தான் சாமானிய உழைக்கும் மக்கள் இந்த நெருக்கடியின் தீவிரத்தை உணர்ந்துகொள்ள வேண்டும்.

வேலையிழப்பும், வேலையின்மையும், கூலி வெட்டும் இந்திய உழைக்கும் வர்க்கத்தைத் தாக்கிய அதேவேளையில், கடந்த நவம்பர் மாதம் தொடங்கியே அத்தியாவசிய உணவுப் பொருட்களின் விலை உயர்வும் அவர்களைத் தாக்கியது. இது இந்திய உழைக்கும் மக்களின் மீது இறங்கியிருக்கும் இரட்டைத் தாக்குதல்.

இதனை மந்த வீக்கம் எனப் பொருளாதார நிபுணர்கள் குறிப்பிடுகிறார்கள். அடித்தட்டு உழைக்கும் வர்க்கம் எந்தளவிற்கு வயிற்றைச் சுருக்கிக் கொள்கிறதோ அந்தளவிற்கு மட்டுமே அன்றாட வாழ்க்கையை ஓட்ட முடியும் என்பதுதான் மந்த வீக்கம் எனப்படுவதன் பொருள்.

ஓரிரு மாதங்களுக்கு முன்பாக வெங்காய விலை உயர்வைக் கட்டுப்படுத்தக் கோரி நாடே குமுறிக் கொண்டிருந்த வேளையில், “நான் வெங்காயமும் பூண்டும் அதிகம் சாப்பிடுவதில்லை. வெங்காயம் அதிகம் பயன்படுத்தாத குடும்பத்திலிருந்து வந்தவள் நான்” என நாடாளுமன்ற விவாதத்தின்போதே பார்ப்பன சாதித் திமிரோடு பதில் அளித்தார் நிதியமைச்சர் நிர்மலா சீதாராமன்.

இது அவரது தனிப்பட்ட கருத்து மட்டுமல்ல, மோடி அரசின் மனோநிலையே இதுதான். அதனைப் பிரதிபலிக்கும் விதமாக, உணவு மானியத்தையும் அத்தியாவசிய உணவுப் பொருள் சட்டத்தையும் கைவிட வேண்டுமென பட்ஜெட்டுக்கு முன்பாக வெளியிடப்பட்ட பொருளாதார ஆய்வறிக்கை ஆலோசனை கூறியிருக்கிறது.

கடந்த நவம்பர், டிசம்பர் மாதங்களில் மட்டும் காய்கறி 60 சதவீதமும், பருப்பு வகைகள் 15 சதவீதமும், முட்டை 8.79 சதவீதமும், மீன், இறைச்சி உள்ளிட்டவை 9.57 சதவீதமும் விலை உயர்ந்துள்ளன. இந்த அத்தியாவசிய உணவுப் பொருட்களின் விலை உயர்வைக் கட்டுப்படுத்தாத மோடி அரசு, உணவுப் பொருள் பதுக்கலையும் கள்ளச் சந்தை வியாபாரத்தையும் தடுக்கும் நோக்கில் உருவாக்கப்பட்ட அத்தியாவசிய உணவுப் பொருள் சட்டத்தைக் கைகழுவிவிட விரும்புகிறது.

உணவு மானியத்தைக் கைவிடுவது என்பது நகர்ப்புற, கிராமப்புற ஏழைகளின் வயிற்றில் அடிப்பதற்கு ஒப்பானது என்பதோடு, உணவுப் பொருட்களை உற்பத்தி செய்யும் விவசாயிகளின் வாழ்க்கையை, வருமானத்தைச் சந்தை சூதாடிகளின் கையில் ஒப்படைப்பதாகும்.

இப்படிப்பட்ட “நல்லெண்ணம்” கொண்ட மோடி அரசிடமிருந்து உழைக்கும் மக்கள் “அச்சே தின்” – நல்ல காலம் எதையும் சிறிதளவும் எதிர்பார்க்க முடியாது.

அதனை நிரூபிக்கும் விதத்தில்தான், மந்த வீக்கத்தால் ஓர் அரைப்பட்டினி நிலையை இந்திய உழைக்கும் வர்க்கம் எதிர்கொண்டிருக்கும் இந்தப் பாரதூரமான நிலையில்கூட, ரேஷன் பொருட்களுக்குத் தரப்படும் உணவு மானியத்தையும், விவசாயிகளுக்குத் தரப்படும் இடுபொருட்களுக்கான மானியத்தையும், ஊரக வேலைவாய்ப்புத் திட்டம், ஊட்டச்சத்துத் திட்டம் உள்ளிட்ட பல்வேறு சமூக நலத் திட்டங்களுக்கு ஒதுக்கப்படும் நிதியையும் அதிகரித்துக் கொடுக்க மறுத்திருக்கிறது மோடி அரசு.

***

கடந்த நாற்பத்தைந்து ஆண்டுகளில் இல்லாத அளவிற்கு வேலைவாய்ப்பின்மை அதிகரித்திருப்பதைத் தேசிய மாதிரி புள்ளிவிவர ஆய்வு நிறுவனம் வெளியிட்ட அறிக்கையே அம்பலப்படுத்துகிறது. இந்தப் பாரதூரமான வேலைவாய்ப்பின்மையை எதிர்கொள்வதற்கு மகாத்மா காந்தி தேசிய ஊரக வேலைவாய்ப்பு உறுதித் திட்டத்திற்கு அதிக நிதி ஒதுக்கீடு செய்ய வேண்டும் என முதலாளித்துவ நிபுணர்கள் பலரும் பட்ஜெட்டுக்கு முன்பிருந்தே மோடி அரசிற்குச் சுட்டிக் காட்டி வந்தனர். இந்தத் திட்டத்திற்குக் குறைந்தபட்சமாக 76,000 கோடி ரூபாய் அளவிற்கு நிதி ஒதுக்க வேண்டும் என அவர்கள் கூறி வந்த நிலையில், மோடி அரசோ இந்த பட்ஜெட்டில், கடந்த பட்ஜெட்டில் ஒதுக்கப்பட்ட நிதியைக்கூட (71,000 கோடி ரூபாய்) ஒதுக்காமல், 10,000 கோடி ரூபாயை வெட்டிவிட்டு 61,500 கோடி ரூபாய் மட்டுமே ஒதுக்கியிருக்கிறது.

கடந்த மூன்றாண்டுகளில் இல்லாத அளவிற்கு உணவுப் பொருட்களின் விலைகள் ஏறியிருக்கும் நிலையில் உணவு, எரிபொருள் ஆகியவற்றுக்கு ஒதுக்கப்பட்டுள்ள நிதி, கடந்த பட்ஜெட்டைவிட 0.24 சதவீதம் மட்டுமே கூட்டி வழங்கப்பட்டிருக்கிறது.

இடுபொருட்களுக்கான விலையைக் கட்டுப்படுத்த வேண்டும் என விவசாயிகள் கோரிவரும் வேளையில் உரத்திற்கு வழங்கப்பட்டிருக்கும் மானியத் தொகை கடந்த பட்ஜெட்டை ஒப்பிடும்போது (79,997 கோடி ரூபாய்) 8,500 கோடி ரூபாய் வெட்டப்பட்டு, 71,309 கோடி ரூபாய் மட்டுமே ஒதுக்கப்பட்டிருக்கிறது.

வயதுக்கு ஏற்ற உடல் வளர்ச்சியின்றி நோஞ்சான் குழந்தைகளின் தலைநகராக இந்தியா உருவாகியிருக்கும் சூழலில், ஒருங்கிணைந்த குழந்தைகள் மேம்பாட்டு சேவைக்கான நிதி 27 ஆயிரம் கோடி ரூபாயிலிருந்து 22 ஆயிரம் கோடியாகவும்; மதிய உணவுத் திட்டத்துக்கான நிதி 11 ஆயிரம் கோடியிலிருந்து 9 ஆயிரம் கோடி ரூபாயாகவும் குறைக்கப்பட்டிருக்கிறது.

குறைவாக ஒதுக்கப்பட்டிருக்கும் இந்த நிதியையும் மோடி அரசு முழுமையாகச் செலவு செய்யும் என்பதற்கும் எந்த உத்தரவாதமும் கிடையாது. கடந்த ஆண்டு பட்ஜெட்டில் பல்வேறு திட்டங்களுக்கு ஒதுக்கப்பட்ட 27.86 இலட்சம் கோடி ரூபாய் நிதியில் 9.66 இலட்சம் கோடி ரூபாய் செலவு செய்யப்படவில்லை. அதற்கு முந்தைய ஆண்டில் செலவழிக்கப்படாத தொகை 7.83 இலட்சம் கோடி ரூபாய். இப்படிச் சதித்தனமாக மிச்சம் பிடிக்கப்படும் நிதி, பற்றாக்குறையை ஈடுகட்டப் பயன்படுத்தப்படுகிறது.

***

பொதுமக்கள் விடயத்தில் பற்றாக்குறை என மூக்கைச் சிந்தி வரும் மோடி அரசு, கார்ப்பரேட் முதலாளிகளுக்குத் தள்ளுபடியோ சலுகையோ வழங்கும்போது எந்தக் கணக்கு வழக்கும் பார்ப்பதில்லை. பட்ஜெட்டுக்கு முன்பாகவே கார்ப்பரேட் முதலாளி வர்க்கத்திற்கு 1.50 இலட்சம் கோடி ரூபாய் அளவிற்கு வருமான வரித் தள்ளுபடியை அறிவித்திருந்த மோடி அரசு, அதுவும் போதாதென்று இந்த பட்ஜெட்டில் 25,000 கோடி ரூபாய் அளவிற்கு பங்கு ஈவு வரியைத் தள்ளுபடி செய்திருக்கிறது. ஏகாதிபத்திய அரசுகள் இந்தியாவின் அடிக்கட்டுமானத் திட்டங்களில் முதலீடு செய்தால், அம்மூதலீடு ஈட்டும் இலாபத்தின் மீதான வரி மற்றும் பங்கு ஈவு வரிகளைத் தள்ளுபடி செய்திருக்கிறது.

வருமான வரி ஏய்ப்பு வழக்குகளை கிரிமினல் சட்டங்களின் கீழ் விசாரித்துத் தண்டிப்பதற்குப் பதிலாக அவ்வழக்குகளை சிவில் வழக்குகளாக நடத்தும் அறிவிப்பு வெளியிடப்பட்டிருக்கிறது. மேலும், முதலாளி வர்க்கத்தினர் மீது வரி ஏய்ப்பு வழக்குகளைத் தொடுப்பதற்குப் பதிலாக, அவர்களுக்கு வரி வசூலில் ஈடுபடும் நிறுவனங்களின் மீது நம்பிக்கையை ஏற்படுத்தும் முகமாக, பொது மன்னிப்புத் திட்டம் அறிவிக்கப்பட்டிருக்கிறது. இதன்படி, சர்ச்சைக்கு உள்ளாகியிருக்கும் வரித் தொகையைச் சம்பந்தப்பட்ட வணிக நிறுவனங்கள் மார்ச் 31, 2020 செலுத்த முன்வந்தால், அவ்வரித் தொகை மீதான வட்டி, அபராதத் தொகை மட்டுமின்றி, அந்நிறுவனங்களின் மீதான வழக்குகளும் கைவிடப்படும். வாய்ப்பு கிடைத்தால், இந்தியாவை வரியில்லாத சொர்க்க பூமியாக அறிவிக்கவும் நரேந்திர மோடி தயங்க மாட்டார் போலும்!

நரேந்திர மோடி இரண்டாம் முறையாகப் பதவியேற்ற இந்த ஆறேழு மாதங்களுக்குள்ளாகவே கார்ப்பரேட் முதலாளிகளுக்கு இரண்டு இலட்சம் கோடி ரூபாய்க்கும் மேலான வரித் தள்ளுபடிகள், சலுகைகளை வாரிக் கொடுத்திருக்கிறார். மேலும், 2019 நிதியாண்டில் கார்ப்பரேட் நிறுவனங்களிடமிருந்து வசூலிக்க வேண்டிய வருமான வரியில் இரண்டு இலட்சம் கோடி ரூபாய் வரை துண்டு விழும் என்றும் எதிர்பார்க்கப்படுகிறது.  இதனால் அரசிற்கு ஏற்படவுள்ள இழப்பை ஈடுகட்ட ஏற்கெனவே ரிசர்வ் வங்கியிடமிருந்து 1.75 இலட்சம் கோடி ரூபாயைப் பிடுங்கிக் கொண்டுவிட்டது மைய அரசு. மேலும், இந்த பட்ஜெட்டில் இரண்டு இலட்சம் கோடி ரூபாய் பெறுமான பொதுத்துறை நிறுவனப் பங்குகளைத் தனியாருக்கு விற்கும் முடிவும் அறிவிக்கப்பட்டிருக்கிறது.

குறிப்பாக, கடந்த ஆண்டில் மட்டும் 48,436 கோடி ரூபாயை மதிப்பீட்டு உபரியாக ஈட்டியிருக்கும், 31.11 இலட்சம் கோடி ரூபாய் பெறுமான சொத்துக்களை நிர்வகித்து வரும் ஆயுள் காப்பீட்டுக் கழகத்தின் பங்குகளைத் தனியாருக்கு விற்கும் முடிவு நிதி மூலதனக் கும்பலுக்கு அளிக்கப்பட்டிருக்கும் கறி விருந்து என்றுதான் சொல்ல முடியும்.

***

நிதிப் பற்றாக்குறையைக் கட்டுப்படுத்த வேண்டும் என்பது சர்வதேச நிதி மூலதன நிறுவனங்களின் கட்டளை. இக்கட்டளையை நிறைவேற்றும் முகமாக நிதிப் பொறுப்பு மற்றும் பட்ஜெட் மேலாண்மைச் சட்டம் என்றொரு சட்டத்தையே உருவாக்கி வைத்திருக்கிறது, இந்திய அரசு.

பற்றாக்குறையைக் கட்டுப்படுத்தி வரம்பிற்குள் வைப்பது என்பதன் பொருள் கார்ப்பரேட் முதலாளிமார்களுக்கும் சலுகை அளிக்கக்கூடாது என்பதல்ல. மாறாக, பொதுமக்களுக்கு அளிக்கப்படும் மானியத்தைப் படிப்படியாக வெட்டி முற்றிலுமாக நிறுத்திவிட வேண்டும் என்பதுதான்.

பா.ஜ.க.விற்கு முந்தைய அரசுகளும் இந்தக் கட்டளைக்கு அடிபணிந்துதான் பட்ஜெட்டைத் தயாரித்தார்கள் என்றாலும், பார்ப்பன பாசிஸ்டுகளைப் பொருத்தவரை, பொதுமக்களுக்கு மானியம் வழங்குவது, மானிய விலையில், கட்டணத்தில் சேவைகளை வழங்குவதையெல்லாம் அடியோடு நிறுத்த வேண்டும் என்பதுதான் அவர்களது இலட்சியமும்கூட.

பொதுமக்களுக்கு வழங்கப்படும் மானியங்களைத் தண்டச் செலவு என்றும் இலவசங்கள் மக்களைச் சோம்பேறிகளாக்குகிறது என்றும் இழிவுபடுத்தி வரும் இக்கும்பல், முதலாளிகளுக்கு அளிக்கப்படும் மானியங்களையெல்லாம் வளர்ச்சிக்கான தூண்டுகோல்கள் (stimulus packages) என நாமகரணம் சூட்டிப் புனிதப்படுத்துகிறார்கள்.

சமையல் எரிவாயுவுக்கும் உரத்திற்கும் தரப்படும் மானியங்களை வங்கிக் கணக்கில் செலுத்தும் நடைமுறையெல்லாம் மானியங்களை வெட்டும் நோக்கில்தான் கொண்டுவரப்பட்டிருக்கிறதே ஒழிய, முறைகேடுகளைத் தடுக்கும் நோக்கில் கொண்டு வரப்படவில்லை. தண்ணீரை விலைக்கு வாங்கப் பழக்கப்படுத்திவிட்டதைப் போல, இவற்றையும் சந்தை விலைக்கு வாங்கும் மனநிலைக்கு மக்களைத் தள்ளிவிடும் சூது நிறைந்தது இந்த நடைமுறை.

இந்த அடிப்படையில்தான் இந்த நிதியாண்டுக்கான பட்ஜெட் தயாரிக்கப்பட்டிருக்கிறது. பொருளாதார நெருக்கடியால் யார் குடி அழிந்தாலும் நிதி மூலதனக் கும்பலின், கார்ப்பரேட் முதலாளி வர்க்கத்தின் இலாபம் சரிந்துவிடக் கூடாது என்பதற்காகவே பொது மக்களுக்கான மானியங்கள் வெட்டப்பட்டிருக்கின்றன; வரித் தள்ளுபடிகளும் வரி சீர்திருத்தங்களும் அறிவிக்கப்பட்டிருக்கின்றன. இலாபமீட்டக்கூடிய பொதுத்துறை நிறுவனங்கள் நிதி மூலதனக் கும்பலின் ஆதிக்கத்துக்கும் கொள்ளைக்கும் திறந்துவிடப்பட்டிருக்கின்றன.

“அனைவருடனும் அனைவருக்குமான வளர்ச்சி” எனத் தேனொழுகப் பேசி அதிகாரத்தைக் கைப்பற்றிய நரேந்திர மோடியின் ஆட்சியில் வலுத்தவர் மென்மேலும் கொழுத்ததைத்தான் கண்டோம். உண்மையில் நரேந்திர மோடி அரசு, நிதி மூலதனக் கும்பல் மற்றும் கார்ப்பரேட் முதலாளிகளுக்கான அரசு. மக்களுக்குப் புரியும் மொழியில் சொல்வதென்றால், ராகுல் காந்தி பயன்படுத்திய வார்த்தைகளைத்தான் திரும்பக் கூற வேண்டும் – “சூட்-பூட் கி சர்க்கார்!”

– புதிய ஜனநாயகம் பிப்ரவரி 2020

பிப்ரவரி மாதம் வெளியான புதிய ஜனநாயகம் இதழில் வெளியான இக்கட்டுரையை தாமதமாக ஏப்ரல் மாதத்தில் வெளியிடுவதற்கு வருந்துகிறோம்.

மின்னூல்:

மின்னூலை வாங்க Add to cart பட்டனை அழுத்தவும். பின்னர் View cart அழுத்தி, உங்கள் கூடையில்(Cart), எண்ணிக்கையை(Quantity) சரிபார்த்துவிட்டு, Proceed to checkout-பட்டனை அழுத்தி, உங்கள் பெயர் மற்றும் தகவல்களை பதிவு செய்து Place order-ஐ அழுத்துங்கள். இந்தியாவில் வங்கி கணக்கு வைத்திருப்போர் Online Payments மூலமாகவும் வெளிநாட்டில் வங்கி கணக்கு வைத்திருப்போர் Paypal மூலமாகவும் தெரிவு செய்து பணத்தை செலுத்தலாம்.

பணம் அனுப்பிய பிறகு உங்களது மின்னஞ்சலுக்கு உடனேயே டவுண்லோடு இணைப்பு வரும். அதிலிருந்து நீங்கள் இரண்டு நாட்களுக்குள் டவுண்லோடு செய்யலாம்.

புதிய ஜனநாயகம் மாத இதழை நேரடியாகப் பெற விரும்புவோர் ஆண்டுச் சந்தா செலுத்தலாம் : உள்நாடு ரூ.180 மட்டும்!

தொடர்பு முகவரி
புதிய ஜனநாயகம் ,
110, இரண்டாம் தளம்,
63, என்.எஸ்.கே. சாலை, (அ.பெ.எண்: 2355)
கோடம்பாக்கம், சென்னை – 600024

தொலைபேசி: 94446 32561
மின்னஞ்சல் : puthiyajananayagam@gmail.com

புதிய ஜனநாயகத்தின் முந்தைய மின்னூல் வெளியீடுகள்

₹15.00Add to cart

₹15.00Add to cart

₹15.00Add to cart

“இந்தியாவில் மருத்துவக் கல்வியின் தேவையையும் மருத்துவர்களின் பற்றாக்குறையையும் ஈடுகட்டும் அளவிற்கு மைய, மாநில அரசுகளிடம் போதிய நிதி ஆதாரம் இல்லாததால், அரசு – தனியார் கூட்டு (PPP) அடிப்படையில் மாவட்டத் தலைமை அரசு மருத்துவமனைகளைத் தனியாரிடம் ஒப்படைத்து, அதன் அடிப்படையில் மருத்துவக் கல்லூரிகளைத் தொடங்க தனியாரை அனுமதிக்கலாம்” என கடந்த ஜனவரி மாதத்தில் நிதி ஆயோக் பரிந்துரைத்தது. இந்த அபாயகரமான பரிந்துரைக்குக் கடும் எதிர்ப்பு எழுந்த பின்னும் அது பற்றியெல்லாம் அக்கறை கொள்ளாமல், நிதி ஆயோக்கின் பரிந்துரையை பட்ஜெட் அறிவிப்பாகவும் வெளியிட்டிருக்கிறது, மோடி அரசு.

இப்பரிந்துரையை உடனடியாக அமலுக்குக் கொண்டுவர வேண்டும் என்ற நோக்கில், இத்திட்டத்தைச் செயல்படுத்த முன்வரும் மாநில அரசுகளுக்கு மாவட்டத் தலைமை அரசு மருத்துவமனைகளுடன் இணைந்த மருத்துவக் கல்லூரிகளை அமைக்க மைய அரசு நிதியுதவியும் அளிக்கும் என்ற தூண்டிலையும் போட்டிருக்கிறது, மைய அரசு.

தனியாரிடம் ஒப்படைக்கப்படும் அம்மருத்துவமனைகளில் கட்டணமில்லா இலவச சிகிச்சை மற்றும் கட்டணத்துடன் கூடிய சிகிச்சை என இரண்டுவிதமான சிகிச்சைகள் வழங்கப்படுமென்றும், கட்டணத்துடன் கூடிய சிகிச்சையின் மூலம் கிடைக்கும் வருமானத்தைக் கொண்டு அம்மருத்துவமனைகளைத் தனியார் நிர்வகிப்பார்கள் என்றும் நிதி ஆயோக் பரிந்துரைத்திருக்கிறது.

இதுவொருபுறமிருக்க, மாநிலப் பட்டியலில் உள்ள பொது சுகாதாரத் துறையைப் பொதுப் பட்டியலுக்குக் கொண்டு செல்லவும் மைய அரசு திட்டமிடுவதாகச் செய்திகள் வெளியாகியிருக்கின்றன. இது மாநில அரசுகளின் உரிமையைப் பறிக்கும் சதி என்பதோடு, மாநில அரசுகளின் எதிர்ப்பையும் மீறி மருத்துவத் துறையில் தனியார்மயத் திட்டங்களை நிறைவேற்றவும் இந்த மாற்றம் மைய அரசிற்குப் பயன்படும்.

***

கிராமப்புற மற்றும் நகர்ப்புற சுகாதார நிலையங்கள், வட்டார மருத்துவமனைகள், மாவட்ட மருத்துவமனைகள், மருத்துவக் கல்லூரி மருத்துவமனைகள் எனக் கீழிருந்து மேலாக உருவாக்கப்பட்டுள்ள வலைப்பின்னலைக் கொண்டுதான் தமிழகத்தில் சுகாதாரத் துறை இயங்கிவருகிறது.

இந்தியாவில் கேரளாவைத் தவிர்த்து, மற்ற பிற மாநிலங்களோடு ஒப்பிடும்போது தமிழகத்தில் பொது சுகாதாரமும் நோய்த்தடுப்பு சிகிச்சைகளும் சேவைகளும் குறிப்பிடத்தக்க அளவிற்குப் பொதுமக்களுக்குக் கிடைத்துவருவதற்கு கடந்த ஐம்பது ஆண்டுகளில் மக்களின் வரிப் பணத்தைக் கொண்டு உருவாக்கப்பட்ட இந்தக் கட்டமைப்புதான் அடிப்படை ஆதாரமாக உள்ளது. இவ்வலைப் பின்னலின் ஒரு முக்கிய ஆதாரத்தைப் பிடுங்கித் தனியாருக்குத் தாரை வார்ப்பதன் மூலம் இந்தக் கட்டமைப்பையே சிறுகச்சிறுக வீழ்த்தத் திட்டமிடுகிறது, நிதி ஆயோக்.

மாவட்டத் தலைமை அரசு மருத்துவமனைகள் தனியாரிடம் ஒப்படைக்கப்பட்டால், கிராமப்புற, சிறு நகர்ப்புற பகுதிகளைச் சேர்ந்த ஏழைகள் இலவச சிகிச்சை கிடைக்க வழியின்றிக் கட்டண சிகிச்சை என்ற வலைக்குள் தள்ளப்படுவார்கள். இந்த அபாயத்தை உணர்ந்துதான் சென்னையைச் சேர்ந்த புகழ்பெற்ற இரத்தநாள அறுவை சிகிச்சை நிபுணரும் சென்னை மருத்துவக் கல்லூரி ஓய்வுபெற்ற பேராசிரியருமான அமலோற்பவநாதன், மாவட்ட மருத்துவமனைகளைத் தனியார் நிர்வகிப்பது பேரழிவுக்கு வழிவகுக்கும் எனத் தனது எதிர்ப்பைப் பகிரங்கமாகப் பதிவு செய்திருக்கிறார்.

படிக்க:
♦ எழுகிறது புதிய இந்தியா ! புதிய ஜனநாயகம் பிப்ரவரி 2020 இதழ் !
♦ குளோரோகுயின் மாத்திரைகள் : அமெரிக்காவின் மிரட்டலும், 56 இஞ்ச்சும் !

அரசு மருத்துவமனைகளில் எக்ஸ் – ரே, ஸ்கேன் உள்ளிட்ட சில ஆய்வக சேவைகளைக் கட்டணச் சேவைகளாக மாற்றி, அவற்றைத் தனியாரிடம் ஒப்படைத்திருப்பது; கீழ்மட்ட ஊழியர்களை அவுட் சோர்சிங் என்ற முறையில் தனியார்மயபடுத்தியிருப்பது; மிக முக்கியமாக, அனைத்து வகை அறுவைச் சிகிச்சைகளுக்கும் மருத்துவக் காப்பீடைக் கட்டாயமாக்கியிருப்பது என்ற வகைகளில் தனியார்மயம் ஏற்கெனவே இந்தக் கட்டமைப்பை அரிக்கத் தொடங்கிவிட்டது. இதனின் அடுத்த கட்டமாக, மருத்துவமனை நிர்வாகத்தையே தனியாரிடம் ஒப்படைக்கும் முடிவை எதிர்ப்புகளையும் மீறி அடாவடித்தனமாக எடுத்திருக்கிறது, மைய அரசு.

இத்தீமை 2017 -ஆம் ஆண்டிலேயே சோதனை அடிப்படையில் நடைமுறைக்கு வந்துவிட்டதாகக் கூறுகிறார், சமூக சமத்துவத்திற்கான மருத்துவர்கள் சங்கத்தின் பொதுச்செயலாளர் மருத்துவர் ரவீந்திரநாத். “சித்தூரிலுள்ள மாவட்ட மருத்துவமனையை அப்போல்லோ மருத்துவமனை நிர்வாகம் கைப்பற்றிக் கொண்டுவிட்டது” எனச் சுட்டிக்காட்டும் அவர், “நாடு முழுவதும் உள்ள 1,50,000 துணை சுகாதார நிலையங்களை,  நல மற்றும் சுகாதார மையங்கள் என பெயர் மாற்றி, அவற்றை கார்ப்பரேட் சமூக பங்களிப்பு திட்டத்தின் மூலம் கார்ப்பரேட் நிறுவனங்களின் வசம் ஒப்படைக்கவும்; ஓர் ஆரம்ப சுகாதார நிலையத்தை நடத்து (Run a PHC) என்ற திட்டத்தின் மூலம் அதனை  கார்ப்பரேட் நிறுவனங்களிடம் ஒப்படைக்கவும்” நிதி ஆயோக் சதியாலோசனைகளை வைத்திருப்பதாக எச்சரிக்கிறார்.

அரசு மருத்துவமனைகளைத் தனியாரிடம் ஒப்படைத்தால் சிகிச்சையின் தரம் மேம்படும் என்பதற்கு எந்த உத்தரவாதமும் இல்லை என்பதை குஜராத் மாநில அனுபவம் உணர்த்துகிறது. மகாராஷ்டிரா மாநில அரசு மருத்துவமனைகளில் கட்டண சிகிச்சை அறிமுகப்படுத்தியதன் விளைவாக அம்மாநில அரசு மருத்துவமனைகளில் தனியாருக்கு நிகராகக் கட்டணக் கொள்ளை நடைபெறுவதாகக் குற்றஞ்சாட்டுகிறார், டைம்ஸ் ஆஃப் இந்தியா நாளிதழின் பத்திரிக்கையாளர் ரேமா ரங்கராஜன்.

அரசு மருத்துவமனைகளில் வழங்கப்படும் சேவைகளின் தரத்தை உயர்த்தக் கோரிப் போராடுவதுதான் பொது மக்களுக்கு நன்மை பயக்கும் தீர்வாக அமையுமே தவிர, குறைபாடுகளைக் காட்டியோ, வேறு காரணங்களை முன்வைத்தோ அவற்றைத் தனியார்மயமாக்குவது, கட்டண முறைகளை அறிமுகப்படுத்துவது ஆகியவை கண்ணை விற்று ஓவியம் வாங்கும் மூடத்தனத்திற்கு ஒப்பானது.

“அரசாங்கம் எதற்குத் தொழிற்சாலைகளை நடத்த வேண்டும்?” எனக் கேட்டுப் பொதுத்துறை நிறுவனங்களைத் தனியாரிடம் விற்றார்கள். அடுத்ததாக, நட்டம், நிர்வாகச் சீர்கேடுகளைக் காட்டிப் பொதுத்துறை வங்கிகளின் பங்குகளைத் தனியாருக்கு விற்றார்கள். இப்பொழுது எல்.ஐ.சி.யின் மீது கைவைக்கத் துணிந்திருக்கும் ஆளுங்கும்பல், மாவட்டத் தலைமை அரசு மருத்துவமனைகளைத் தனியாருக்குத் தாரை வார்க்கும் முடிவையும் அறிவித்திருக்கிறது. முந்தைய அரசுகள் ஆட்டை, மாட்டைக் கடித்தால், மோடி அரசோ மனுசனையும் கடிக்கத் துணிகிறது. இதனை அனுமதித்தால், ஏழைகளுக்குச் சிகிச்சையும் பொது சுகாதாரமும் இனி எட்டாக்கனிதான்.

பூங்குழலி

புதிய ஜனநாயகம் பிப்ரவரி 2020

மின்னூல்:

மின்னூலை வாங்க Add to cart பட்டனை அழுத்தவும். பின்னர் View cart அழுத்தி, உங்கள் கூடையில்(Cart), எண்ணிக்கையை(Quantity) சரிபார்த்துவிட்டு, Proceed to checkout-பட்டனை அழுத்தி, உங்கள் பெயர் மற்றும் தகவல்களை பதிவு செய்து Place order-ஐ அழுத்துங்கள். இந்தியாவில் வங்கி கணக்கு வைத்திருப்போர் Online Payments மூலமாகவும் வெளிநாட்டில் வங்கி கணக்கு வைத்திருப்போர் Paypal மூலமாகவும் தெரிவு செய்து பணத்தை செலுத்தலாம்.

பணம் அனுப்பிய பிறகு உங்களது மின்னஞ்சலுக்கு உடனேயே டவுண்லோடு இணைப்பு வரும். அதிலிருந்து நீங்கள் இரண்டு நாட்களுக்குள் டவுண்லோடு செய்யலாம்.

புதிய ஜனநாயகம் மாத இதழை நேரடியாகப் பெற விரும்புவோர் ஆண்டுச் சந்தா செலுத்தலாம் : உள்நாடு ரூ.180 மட்டும்!

தொடர்பு முகவரி
புதிய ஜனநாயகம் ,
110, இரண்டாம் தளம்,
63, என்.எஸ்.கே. சாலை, (அ.பெ.எண்: 2355)
கோடம்பாக்கம், சென்னை – 600024

தொலைபேசி: 94446 32561
மின்னஞ்சல் : puthiyajananayagam@gmail.com

புதிய ஜனநாயகத்தின் முந்தைய மின்னூல் வெளியீடுகள்

₹15.00Add to cart

₹15.00Add to cart

₹15.00Add to cart