2024 நாடாளுமன்றத் தேர்தல் நெருங்கிவிட்டது. தமிழ்நாட்டில் ஏப்ரல் 19 தேர்தல். மோடியின் பிரச்சாரப் பயணத்திற்கேற்ப பிற மாநிலங்களில் தேர்தல் பல கட்டங்களாகப் பிரித்து நடத்தப்படுகிறது. மேற்குவங்கம், உத்தரப்பிரதேசம், பீகார் உள்ளிட்ட மாநிலங்களில் 7 கட்டத் தேர்தல். மோடி-அமித்ஷா கும்பலின் தேர்தல் பிரச்சாரத்திற்கு சுமார் 75 நாட்கள் வாய்ப்புகள் வழங்கப்பட்டுள்ளன.

தேர்தலில் வெற்றி பெறுவதற்காக இந்துமுனைவாக்கக் கண்ணோட்டத்தில் பிரச்சாரம் செய்கிறது பா.ஜ.க. கும்பல். கோவை குண்டுவெடிப்பில் பலியானவர்களுக்கு அஞ்சலி செலுத்துகிறார் மோடி. எதிர்க்கட்சிகளை இந்து விரோதிகள் என்று பிரச்சாரம் செய்கிறார். தேர்தல் ஆணையமோ, இவை எவற்றையும் கண்டுகொள்ளாமல், மோடி வீட்டு ஏவலாளியைப் போல எஜமான விசுவாசத்தைக் காட்டி வருகிறது.

தேர்தல் பத்திரங்கள் வெளியீடு, தேர்தல் அதிகாரி நியமனம் முதலாக அனைத்து விசயங்களிலும் எல்லா மரபுகளையும் ஜனநாயக வழிமுறைகளையும் தூக்கியெறிந்துவிட்டது, மோடி-அமித்ஷா கும்பல். தேர்தலில் வெற்றிபெற வேண்டும், அதற்கு என்ன வேண்டுமானாலும் செய்யலாம், பேசலாம் என்பதுதான் அக்கும்பலின் ஒரே கொள்கை. சாம, தான, தண்ட, பேதம் எனும் பார்ப்பன சதிக் கோட்பாட்டையே தனது கொள்கையாக வைத்திருக்கும் இந்த கும்பல் எந்த கடைகோடிக்கும் செல்லும் என்பதற்கு இந்த தேர்தலை ஒட்டிய அந்த கும்பலின் அணுகுமுறைகளே சாட்சி.

எதிர்க்கட்சி கூட்டணியில் இருக்கும் சிறிய கட்சிகளுக்கு தேர்தல் சின்னம் ஒதுக்கியதில் செய்த அடாவடித்தனத்தைப் பாருங்கள். வி.சி.க., ம.தி.மு.க., நா.த.க-விற்கு ஒரு நீதி, ஜி.கே.வாசன் போன்ற பா.ஜ.க. கூட்டணி கட்சிகளுக்கு ஒரு நீதி. தேர்தல் கட்சிகளைக் கூட ஜனநாயகமாக அணுகத் தயாராக இல்லை.

தேர்தல் பத்திரங்கள் மூலமாக மட்டுமே பல்லாயிரம் கோடிகளைச் சுருட்டிய பா.ஜ.க. கும்பல், காங்கிரசு கட்சியின் வங்கிக் கணக்கை முடக்கியது; அதற்கு எதிராக நீதிமன்றத்திற்குச் சென்று போராடிய பின்னர், வருமான வரித்துறை மூலமாக காங்கிரசுக்கு நெருக்கடி கொடுத்தது.

எதிர்க்கட்சித் தலைவர்களை சுதந்திரமாகப் பிரச்சாரம் செய்யவும் அனுமதிக்கவில்லை. ஜார்க்கண்ட் முதல்வர் ஹேமந்த் சோரன் கைது; பாரதீய ராஷ்டிரிய சமிதியின் தலைவர் கவிதா கைது; ஆம் ஆத்மி கட்சியின் தலைவர், டெல்லி முதல்வர் அரவிந்த் கெஜ்ரிவால் கைது – இவ்வாறாக அமலாக்கத்துறையை ஏவி நாள்தோறும் எதிர்க்கட்சிகளை வேட்டையாடி வருகிறது.

இத்தனைக்கும் காரணம் என்ன?

தோல்வி பயம்!

ஆம், தோல்வி பயம் மோடி-அமித்ஷா கும்பலுக்குத் தொற்றிக் கொண்டது. இனி எந்த வகையிலும் தேர்தலில் வெற்றி பெற முடியாது என்பதை அக்கும்பல் நன்குணர்ந்துள்ளது.

படிக்க: ஐந்து மாநில சட்டமன்றத் தேர்தல்கள்: பாசிஸ்டுகளின் தோல்வி முகமும்! எதிர்க்கட்சிகளின் கேடுகெட்ட சந்தர்ப்பவாதமும்!

கடந்த பத்தாண்டுகளில் மோடி-அமித்ஷா கும்பல் மக்களுக்குக் கொடுத்த வாக்குறுதிகள் எதையும் நிறைவேற்றவில்லை. விவசாயிகள் வருவாயை இரட்டிப்பாக்குவோம், வங்கிக் கணக்கில் ரூ.15,00,000 நிதி போடுவோம்; இரண்டு கோடி வேலைவாய்ப்புகளை உருவாக்குவோம்; விவசாயிகளின் விளைப்பொருட்களுக்கு குறைந்தபட்ச ஆதாரவிலையை சட்டப்பூர்வ உரிமையாக்குவோம்; பெண் கல்வியை மேம்படுத்துவோம்; கருப்புப் பணத்தை ஒழித்துக் கட்டுவோம்… அப்பப்பா, மோடி-அமித்ஷா கும்பல் அவிழ்த்துவிட்ட இந்த வாக்குறுதிகள் அனைத்தும் பொய், பித்தலாட்டம் என்பதை மக்கள் தமது சொந்த அனுபவத்தில் இருந்து உணர்ந்துவிட்டனர்.

பாசிச பயங்கரவாதம்

மாறாக, மோடி-அமித்ஷா கும்பலின் பத்தாண்டு ஆட்சி செய்ததுதான் என்ன?

கடந்த பத்தாண்டுகால ஆட்சியில் நாட்டின் பொருளாதாரம் மிகவும் பின்னடைந்துள்ளது; சிறுதொழில்கள் நசிந்துள்ளன; விவசாயம், சிறு வணிகங்கள் மிகப்பெரிய அளவில் பாதிக்கப்பட்டுள்ளன; சீனாவில் இருந்து இரும்பு, மலிவுவிலைப் பொருட்கள் போன்றவற்றின் இறக்குமதியால் இந்திய தொழில்கள் பாதிக்கப்பட்டுள்ளன; ஜி.எஸ்.டி. வரிவிதிப்பின் மூலமாக தென்மாநிலங்களைச் சுரண்டி “பசு வளைய மாநிலங்கள்” என்றழைக்கப்படும் குஜராத், உத்தரப்பிரதேசம், மத்தியப்பிரதேசம், இராஜஸ்தான் போன்ற மாநிலங்களுக்கு மிகப்பெரிய அளவில் சலுகைகள் வழங்கப்படுகின்றன; நீட், தேசியக் கல்விக் கொள்கை, தேசிய நதிநீர் கொள்கை, குற்றவியல் சட்டத்திருத்தம், தொழிலாளர் நலச் சட்டங்கள் திருத்தம் போன்ற பல்வேறு மக்கள் விரோத சட்டங்கள், திட்டங்களால் மக்களின் பெரும்பகுதியினரின் வாழ்நிலைமை மேலும் மேலும் நெருக்கடிக்குள்ளாகியுள்ளது; வேலையின்மை அதிகரித்துள்ளது; விலையேற்றம் அதிகரித்துள்ளது.

அம்பானி, அதானி, வேதாந்தா உள்ளிட்ட கார்ப்பரேட் முதலாளிகளின் வளர்ச்சியையே நாட்டின் வளர்ச்சியாக சித்தரிக்கிறது மோடி கும்பல். இந்த கார்ப்பரேட் முதலாளிகளோ உலகப் பணக்காரர்களாக உயர்ந்து வருகின்றனர். மொத்தத்தில், மக்களின் இரத்தத்தில், அம்பானிகளுக்கான சொர்க்கத்தை உருவாக்குகிறது பாசிச மோடி கும்பல்.

இந்த பத்தாண்டுகளில் ஆர்.எஸ்.எஸ். என்னும் நச்சுப் பாம்பானது, நாட்டின் சமூக, அரசியல், பொருளாதாரம் என அனைத்துத் துறைகளிலும் அனைத்து இடங்களிலும் கிளை பரப்பியுள்ளது.

பெண்கள் மீது ஏவப்படும் பாலியல் வன்முறைகள், சமூகத்தை சீரழிக்கும் போதைக் கலாச்சாரம், கொலை, கொள்ளை, கட்டப் பஞ்சாயத்துகளில் ஈடுபடும் ரவுடி கும்பல் போன்ற பல்வேறு குற்றங்களின் பின்னணியில் கணிசமான அளவுக்கு ஆர்.எஸ்.எஸ். கும்பல் உள்ளது. பா.ஜ.க-வின் பல முன்னணி பிரமுகர்கள் கேடி கிரிமினல்களாக இருப்பதையும் அவர்களது குற்றச்செயல்கள் அம்பலத்திற்கு வந்து அவ்வப்போது கைது செய்யப்படுவதையும் நாம் பார்க்கிறோம். இதுபோன்ற குற்றப் படையினரைக் கொண்டுதான் மதக்கலவரங்களை அரங்கேற்றி வருகிறது ஆர்.எஸ்.எஸ். சங்கப் பரிவார கும்பல்.

டெல்லி, உத்தரப்பிரதேசம், அரியானா, மணிப்பூர், அசாம், திரிபுரா, கர்நாடகா, ஒரிசா, சத்தீஸ்கர், உத்தராகண்ட், குஜராத், மகாராஷ்டிரா என இந்தியாவில் பெரும்பாலான மாநிலங்களில் இஸ்லாமியர்கள், தலித்துகள், உழைக்கும் மக்கள் மீது ஆர்.எஸ்.எஸ். சங்கப் பரிவார கும்பலால் கலவரங்கள் கட்டவிழ்த்து விடப்பட்டுள்ளன.

தொழிலாளர்கள் உரிமை கேட்டுப் போராடினாலோ, விவசாயிகள் போராட்டங்கள் நடத்தினாலோ உள்ளூர் சமூக விரோதிகள், கார்ப்பரேட்டுகளுடன் சேர்ந்து கொண்டு மக்களை ஒடுக்குவதும் இந்த ஆர்.எஸ்.எஸ். சங்கப் பரிவார கும்பல்தான்.

ஆம். ஒரு வரியில் சொன்னால், மோடி-அமித்ஷா கும்பல் பத்தாண்டுகளில் அரங்கேற்றியிருப்பது, பாசிச பயங்கரவாதம்.

படிக்க: டெல்லி சலோ 2.0: பாசிசத்தை வீழ்த்தும் பாதை!

போராட்டக் களம்

இந்த பாசிச பயங்கரவாதம் தோல்வி முகம் தழுவியதற்கு காரணம் என்ன?

மோடி கும்பலின் பயங்கரவாத நடவடிக்கைகளாக மேலே விளக்கியிருப்பவை ஒரு சிறு பகுதிதான். நமது நாட்டின் உழைக்கும் மக்கள் மீது மோடி-அமித்ஷா கும்பலும் ஆர்.எஸ்.எஸ்.-பா.ஜ.க. சங்கப் பரிவாரக் கும்பலும் திணித்திருக்கும் பயங்கரவாதம் என்பது கொஞ்ச நஞ்சமல்ல.

தனியார்மயம்-தாராளமயம்-உலகமயம் என்னும் மறுகாலனியாக்கக் கொள்கைகளைக் கட்டற்ற முறையில் நடைமுறைப்படுத்த திட்டமிட்டிருந்த இந்த கும்பல், அதற்கெதிரான மக்கள் போராட்டங்கள் தீவிரமடையும் என்பதையும் உணராமல் இல்லை.

இப்போது மட்டுமல்ல, பிரிட்டிஷ் ஏகாதிபத்தியம் நமது நாட்டை அடிமைப்படுத்தி சூறையாடிய போது அது உருவாக்கிய ஒரு கொள்கை இருக்கிறது. அதுதான் பிரித்தாளும் சூழ்ச்சி. இந்துக்களையும் இஸ்லாமிய மக்களையும் பிளவுப்படுத்தி ஆட்சி செய்யும் முறையை பிரிட்டிஷ் ஏகாதிபத்தியம் உருவாக்கியது. அதற்கு உற்றத் துணையாக இருந்த அமைப்புதான் 1925-இல் தொடங்கப்பட்ட ஆர்.எஸ்.எஸ். என்றழைக்கப்படும் ராஷ்டிரிய சுயம் சேவக் சங்கம்.

இன்று, மறுகாலனியாக்கக் கொள்கைகளைத் தீவிரமாக நடைமுறைப்படுத்தும் போதும், அதே பிரித்தாளும் திட்டத்தை ஆர்.எஸ்.எஸ். கும்பல் நடைமுறைப்படுத்தி வருகிறது. அன்று, இஸ்லாமியர்களுக்கு எதிராக வன்முறையைத் தூண்டிய ஆர்.எஸ்.எஸ். இயக்கம், கிறிஸ்தவர்களான வெள்ளையர்களின் அடிமையாக இருந்தது. இன்றோ, கிறிஸ்தவர்கள், இஸ்லாமியர்கள், தலித் மக்கள், பழங்குடி மக்கள் என ஒவ்வொரு பகுதிக்கும் இடத்திற்கும் ஏற்ற வகையில், பிரித்தாளும் சூழ்ச்சியைக் கையாண்டு வருகிறது.

இந்தப் பிரித்தாளும் சூழ்ச்சிக்கு மக்கள் பலியாகாமல் இல்லை. “வளர்ச்சி நாயகன்” என்ற மோடியின் பிம்பத்தைப் பார்த்தும், இந்துமுனைவாக்கத்திற்கு பலியாகியும் வடமாநில மக்கள் மோடிக்கும் பா.ஜ.க-விற்கும் மீண்டும் மீண்டும் ஆதரவளிக்கவே செய்கின்றனர்.

அதேவேளையில், மக்கள் மோடி-அமித்ஷா கும்பலுக்கு எதிராக தொடர்ந்து குரல் கொடுத்துக் கொண்டுதான் இருந்தனர். பண மதிப்பிழப்பு நடவடிக்கையால் நூற்றுக்கணக்கான மக்கள் வங்கி வாசல்களில் வரிசையில் நின்றபடியே மரணமடைந்தனர். மகாராஷ்டிரா, தமிழ்நாடு போன்ற மாநிலங்களில் விவசாயிகளின் தற்கொலைகள் அதிகரித்தன. ஜி.எஸ்.டி. வரிவிதிப்பினால் சிறுதொழில்கள் நசிந்தன. கொரோனா திடீர் ஊரடங்கின் போது இலட்சக்கணக்கான மக்கள் உணவின்றி தவித்தனர். ஆக்ஸிஜன் இன்றி பல இலட்சக்கணக்கான மக்கள் இறந்தனர். இச்சூழல்களின் போதெல்லாம் வெவ்வேறு வகைகளில் மக்கள் தங்களது எதிர்ப்புகளைத் தெரிவித்து வந்தனர்.

அதேவேளையில், பா.ஜ.க-விற்கு எதிரான மக்கள் போராட்டங்களும் வளர்ந்து வந்தன.

தமிழ்நாட்டில் நடந்த ஜல்லிக்கட்டுப் போராட்டம் பா.ஜ.க-விற்கு எதிரான உறுதியான மக்கள் போராட்டமாகும். 2019-ஆம் ஆண்டு குடியுரிமை சட்டத் திருத்தம் கொண்டுவரப்பட்ட போது இஸ்லாமியப் பெண்கள் தொடங்கிய ஷாகின்பாக் போராட்டம் இந்தியாவே கிளர்ந்தெழுந்த முதல் போராட்டமாகும்.

மூன்று வேளாண் சட்டங்களை மோடி கும்பல் கொண்டுவந்த போது, டெல்லியை முற்றுகையிட்டு பஞ்சாப், அரியானா, இராஜஸ்தான், உ.பி. மாநில விவசாயிகள் தொடங்கிய போராட்டம், ஓராண்டுக்கும் மேலாக நீடித்தது; பல நூறு விவசாயிகள் தங்களது இன்னுயிரைத் தியாகம் செய்தனர்; இப்போராட்டம் உலகம் முழுவதும் கோடிக்கணக்கான மக்களின் ஆதரவைப் பெற்றது. ஆம், மோடி-அமித்ஷா கும்பலைப் பணியவைத்த முதல் நாடுதழுவிய போராட்டம் இதுவே.

இதோ இன்றும் தொடர்கிறது, மோடி-அமித்ஷா கும்பலுக்கெதிரான மக்கள் போராட்டங்கள்.

குறைந்தபட்ச ஆதாரவிலையை சட்டமாக்கக்கோரி டெல்லியை முற்றுகையிட்டு விவசாயிகள் போராடி வருகின்றனர்; மகாராஷ்டிராவில் மராத்தா சாதியினர் இடஒதுக்கீடு கேட்டு போராடி வருகின்றனர்; காஷ்மீரைப் பிரித்தபோது லடாக் மக்களுக்கு பழங்குடி அந்தஸ்தும் மாநில அந்தஸ்தும் வழங்குவதாக சொன்ன மோடி-அமித்ஷா கும்பலின் பொய்யை நம்பி ஏமாந்த லடாக் மக்கள் 21 நாட்களுக்கும் மேலாகப் போராடி வருகின்றனர்.

ஆம், மக்களின் போராட்ட அலை, இந்துமுனைவாக்கத்தை மழுங்கடிக்க வைத்துள்ளது. அதனால்தான், தோல்வி பயத்தில் இருக்கும் பாசிசக் கும்பல், அனைத்து ஜனநாயக, சட்ட வழிமுறைகள் மீதும் நம்பிக்கையிழந்து, வெறிப்பிடித்து எதிர்க்கட்சிகளை வேட்டையாடி வருகிறது.

படிக்க: பாசிச பா.ஜ.க-வை தேர்தலில் வீழ்த்துவது எப்படி? || சிறுநூல் – PDF வடிவில்!

எதிர்க்கட்சிகளின் வெற்றியின் அடிப்படை

மக்கள் போராட்டங்கள்தான் எதிர்க்கட்சிகளையும் வெற்றிப்பெற வைத்துள்ளது.

தமிழ்நாட்டில் 2014-ஆம் ஆண்டில் நடந்தது என்ன?

2ஜி அலைக்கற்றை ஊழல் என்ற ஒரு பொய்யைப் பரப்பி ஆ.ராசா, கனிமொழி கைது செய்து சிறையில் வைக்கப்பட்டிருந்தனர். தி.மு.க. மீது ஊழல் முத்திரை குத்தப்பட்டிருந்தது. தமிழ்நாட்டின் அனைத்து நாடாளுமன்றத் தொகுதிகளிலும் தி.மு.க. மிக மோசமான தோல்வியைத் தழுவியது.

ஆனால், 2019-இல் நடந்ததென்ன?

கொங்குவேளாளர் சாதி அடித்தளத்தைக் கொண்ட அ.தி.மு.க-வும், வன்னிய சாதி அடிப்படையைக் கொண்ட பா.ம.க-வும் பா.ஜ.க-வுடன் கூட்டணி வைத்தன. இத்துடன், தே.மு.தி.க. போன்ற கட்சிகளும் இணைந்து நின்றன. ஆனால், தி.மு.க. கூட்டணி பெருவாரியான வாக்கு வித்தியாசத்தில் பெரும்பாலான தொகுதிகளில் வெற்றி பெற்றது!

இதற்கு என்ன காரணம்? தி.மு.க. ஊழல் கட்சி அல்ல என்று மக்கள் கருதிவிட்டார்களா? தி.மு.க-வுடன் கூட்டணி வைத்துள்ள கட்சிகள் எல்லாம் பாசிச எதிர்ப்புக் கட்சிகள் என்று மக்கள் நம்பிவிட்டார்களா? இல்லை.

தமிழ்நாட்டு மக்களிடம் எழுந்த மோடி எதிர்ப்பலைதான், தி.மு.க. கூட்டணியை வெற்றி பெறவைத்தது. அப்போது மட்டுமல்ல, 2021 சட்டமன்றத் தேர்தலிலும் மோடி எதிர்ப்பலைதான் முதன்மையான பங்காற்றியது.

மோடி எதிர்ப்பலை என்பது மோடி என்ற தனிமனிதருக்கு எதிரான எதிர்ப்பலை அல்ல. ஆர்.எஸ்.எஸ். சங்கப் பரிவார கும்பலின் இந்துராஷ்டிர வெறி அரசியலுக்கும் பா.ஜ.க. அரசின் கார்ப்பரேட் ஆதரவு, மக்கள் விரோதத் திட்டங்களுக்கும் எதிரான அலையாகும்.

ஆகையால், மக்கள் போராட்டங்களே எதிர்க்கட்சிகளை வாழவைக்கிறது.

மக்களின் விழிப்புணர்வு

மக்களின் விழிப்புணர்வு வளர்ந்துள்ளது. தேர்தல் தேதி அறிவிக்கப்படும் வரை தமிழ்நாட்டில் நடந்த மக்கள் போராட்டங்களைக் கவனியுங்கள்.

அரசு ஊழியர்கள், ஆசிரியர்கள், போக்குவரத்துத் தொழிலாளர்கள், மாற்றுத் திறனாளிகள் என பல்வேறு பிரிவினர் தி.மு.க. அரசு கொடுத்த தேர்தல் வாக்குறுதிகளை நிறைவேற்றக் கோரி போராடினர்.

இப்போது தேர்தல் தேதி அறிவிக்கப்பட்ட பிறகு கூட தமிழ்நாட்டில் நிலைமை என்ன?

மேல்மா சிப்காட்டிற்கு எதிராக அங்கிருக்கும் விவசாயிகள் போராடி வருகின்றனர்; பரந்தூர் விமான நிலையத்திற்கு எங்களது விளைநிலங்களை ஒருபோதும் கொடுக்க மாட்டோம் என அம்மக்கள் போராடி வருகின்றனர். காட்டுப்பள்ளி அதானி துறைமுகம் அமைக்கப்படுவதற்கெதிராக மீனவ கிராம மக்கள் போராடி வருகின்றனர். இவை மட்டுமின்றி, தமிழ்நாட்டின் பல மாவட்டங்களில் தங்களது நீண்டகால கோரிக்கைகளை நிறைவேற்றப்படாததை எதிர்த்து மக்கள் போராடி வருகின்றனர்.

ஆம், பாசிச மோடி கும்பலை ஆட்சியில் இருந்து அகற்ற வேண்டும் என்பது மக்களின் உணர்வாகும். அதேவேளையில், எதிர்க்கட்சிகள் மேற்கொள்ளும் கார்ப்பரேட் ஆதரவு, மக்கள் விரோத நடவடிக்கைகள் காரணமாக, எதிர்க்கட்சிகள் மீதும் மக்கள் நம்பிக்கையிழந்துள்ளனர். அதன் விளைவுதான், தமிழ்நாடு முழுவதும் ஆங்காங்கே நடைபெற்று வருகின்ற தேர்தல் புறக்கணிப்புப் போராட்டங்களாகும்.

மக்கள் இந்த அரசியல் அமைப்பின் மீது நம்பிக்கை இழந்துள்ளனர். அதற்கு காரணம், பா.ஜ.க. மட்டுமல்ல, எதிர்க்கட்சிகளும்தான்.

ஆர்.எஸ்.எஸ்.-பா.ஜ.க. சங்கப் பரிவார கும்பலுக்கு ஜனநாயகம் மீதும் சமத்துவத்தின் மீதும் தீராத வெறுப்பு இருப்பதை மக்கள் நன்கறிவர். இதனால்தான், அக்கும்பல் முன்வைக்கும் இந்துராஷ்டிரம் தங்களுக்கு வேண்டாம் என்று மக்கள் கருதுகின்றனர்.

ஆனால், “அரசியல் சாசனத்தைப் பாதுகாப்போம், ஜனநாயகத்தைப் பாதுகாப்போம்” என்று முழங்கும் எதிர்க்கட்சிகள்தான், இந்த அரசியல் அமைப்பின் மீது மக்கள் நம்பிக்கை இழப்பதற்குக் காரணமாக இருக்கிறார்கள். இந்த நிலைமை மாறாமல், பா.ஜ.க-வை தேர்தலில் வீழ்த்துவதால் எந்தப் பயனும் இல்லை என்று மக்கள் கருதுகின்றனர். அதன் விளைவுதான், தேர்தல் புறக்கணிப்புப் போராட்டங்கள்.

படிக்க: தேவை, பாசிச எதிர்ப்பு ஜனநாயகக் குடியரசு || வெளியீடு

மக்கள் மாற்றத்தை விரும்புகின்றனர். மோடி-அமித்ஷா கும்பல் கொண்டுவந்த அத்தனை சட்டத் திட்டங்களும் நடைமுறையில் இருக்கும் என்றால், எதிர்க்கட்சிகள் வெற்றி பெற்று என்ன பயன் என்பதுதான் மக்களின் கேள்வி.

மக்களுக்குத் தேவை, அரசியல்-பொருளாதார மாற்றுத் திட்டமாகும். அதுதான், பாசிச எதிர்ப்பு ஜனநாயகக் குடியரசாகும்.

ஆம், வைரஸ் நோய்க்கிருமி தொற்றிலிருந்து மக்களைக் காப்பற்ற ஆண்டிபயாட்டிக் மருந்துகளைப் பயன்படுத்துவதைப் போல, பாசிச எதிர்ப்பு ஜனநாயகக் குடியரசுதான் பாசிசம் வளர்வதற்கான அடிப்படைகளைத் தகர்க்கும்.

குறைந்தபட்ச ஆதாரவிலை, எட்டுமணி நேர வேலை, பணிப்பாதுகாப்பு, அனைவருக்கும் இலவசக் கட்டாயக் கல்வி, பெண்களுக்கு எதிரான பாலியல் குற்றங்களில் இருந்து பாதுகாப்பு, இயற்கை சுற்றுச்சூழல் பாதுகாப்பு, விவசாயிகள், பழங்குடியினர் தங்களது வாழ்விடத்திலேயே வாழ்வதற்கான உத்தரவாதம் என அனைத்து வகையிலும் மக்களின் உரிமைகளை இந்த பாசிச எதிர்ப்பு ஜனநாயகக் குடியரசுதான் பாதுகாக்கும்.

இந்த மாற்றுக் கொள்கைதான், பா.ஜ.க-வைத் தேர்தலிலும் வீழ்த்தும்! அதனால்தான், மக்கள் போராட்டக் களத்தில் நிற்கிறார்கள்.

பாசிசக் கும்பலால் எதிர்க்கட்சிகள் தேர்தல் களத்தில் இருந்து விரட்டியடிக்கப்படுவதைத் தடுக்க எதிர்க்கட்சிகளும் இப்போது போராட்டக் களத்திற்கு வந்துள்ளார்கள்.

தேர்தல் உரிமைகளை நிலைநாட்டிக் கொள்வதற்கான மார்ச் 31 டெல்லியில் நடக்கும் “இந்தியா கூட்டணி”யின் போராட்டம், மக்கள் உரிமைகளுக்கான போராட்டங்களுடன் கைகோர்க்கட்டும். இதன்மூலம் தான் தேர்தல் வெற்றியை மட்டுமல்ல, பாசிசத்திற்கு எதிரான வெற்றியையும் சாதிக்க முடியும்!

வெற்றிவேல் செழியன்

(புதிய ஜனநாயகம் – ஏப்ரல் 2024 | மின்னிதழ்)

சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube

தேர்தல் நிதிப்பத்திர முறையானது வெளிப்படைத்தன்மையற்று இருப்பதால், அரசியல் சாசனத்திற்கு எதிரானது என்றுக் கூறி அம்முறையை ரத்து செய்து உத்தரவிட்டிருக்கிறது உச்ச நீதிமன்றம். மேலும், 2019 ஏப்ரல் முதல் 2024 பிப்ரவரி 15 வரையிலான நன்கொடையாளர்கள் – நிதி வாங்கிய கட்சிகளின் விவரங்களைத் தேர்தல் ஆணையத்திடம் ஒப்படைக்கவும் பாரத ஸ்டேட் வங்கிக்கு உத்தரவிட்டது. இதன் பிறகு, தேர்தல் நிதிப் பத்திரங்கள் மூலம் மற்ற கட்சிகளை விட பா.ஜ.க. அதிகமான நன்கொடை பெற்றிருப்பதும், மிரட்டிப் பணம் வசூலித்திருப்பதும் பேசுபொருளாகியுள்ளன. பா.ஜ.க. தனது இந்துராஷ்டிர நோக்கத்திற்கான அடித்தளத்தை உருவாக்கும் முயற்சியின் ஒரு பகுதியாக இத்திட்டத்தை எவ்வாறு வடிவமைத்தது, செயல்படுத்தியது என்பதைப் பரிசீலிப்பதன் மூலமே அதன் முழுப் பரிமாணத்தையும் புரிந்து கொள்ள முடியும்.

தேர்தல் நிதிப்பத்திரங்களும் நன்கொடைகளும்:

தேர்தல் நிதிப்பத்திரங்கள் 2018-ஆம் ஆண்டு முதலே நடைமுறையில் இருந்து வந்த நிலையில், 2019 ஏப்ரல் முதல் தற்போது வரையிலான விவரங்களை வெளியிட்டால் போதுமானது என உச்ச நீதிமன்றம் உத்தரவிட்டது. இதன்படி, தேர்தல் ஆணையத்தில் ஸ்டேட் வங்கி அளித்த விவரங்களில் இருந்து, தேர்தல் பத்திரங்கள் மூலம் அரசியல் கட்சிகள் திரட்டிய தொகை ரூ.12,769.1 கோடி என்று மதிப்பிடப்படுகிறது. ஆனால், பிசினஸ் டுடே இணையதளம் வெளியிட்டுள்ள செய்தியில் “மார்ச் 2018 முதல் ஜனவரி 2024 வரை தேர்தல் பத்திரங்கள் விற்பனை மூலம் கிடைத்த மொத்த நிதி ரூ.16,518.11 கோடி என ஜனநாயக சீர்திருத்தங்களுக்கான சங்கம் (ADR) தெரிவித்துள்ளது” என்று கூறியுள்ளது.

இந்தியன் எக்ஸ்பிரஸ் இணையதளம் கூறும் விவரங்களின் படி 2018 முதல் 2024 வரையிலான காலத்தில், தேர்தல் பத்திரம் மூலம் நன்கொடை திரட்டுவதில் முதல் ஐந்து இடங்களைப் பிடித்த கட்சிகள்: பா.ஜ.க. – ரூ.8,451.41 கோடிகள், காங்கிரஸ் – ரூ.1,950.90 கோடிகள், திரிணாமுல் காங்கிரஸ் – ரூ.1,707.81 கோடிகள், பாரதீய ராஷ்ட்ரிய சமிதி – ரூ.1,407.30 கோடிகள், பிஜூ ஜனதா தளம் – ரூ.1,010.5 கோடிகள்.

2019 ஏப்ரல் முதல் கணக்கீடு செய்தாலும் 47.7% நிதியை அதாவது 6,060 கோடி ரூபாயை பா.ஜ.க. வசூலித்திருக்கிறது. எப்படிப் பார்த்தாலும் இதுவரை அளிக்கப்பட்ட நன்கொடைகளில் சரிபாதிக்கும் அதிகமாக பா.ஜ.க. மட்டும் பெற்றுள்ளது. மற்ற கட்சிகளை விட பா.ஜ.க.வுக்கு அதிக நன்கொடை கொடுக்கப்பட்டு வருவது குறித்த புள்ளி விவரங்கள் எல்லாம் ஏற்கெனவே ஓரளவு அறியப்பட்டவை தான். எனினும், தற்போது ஸ்டேட் வங்கி வெளியிட்ட விவரங்களில் இருந்து அரசியல் கட்சிகளிடையே காரசாரமான விவாதங்கள், விமர்சனங்கள் முன்வைக்கப்பட்டு வருகின்றன.

கட்சிகளின் இந்த விவாதங்கள், விமர்சனங்களில் தேர்தல் நிதிப்பத்திரம் மூலம் பெறப்பட்ட நன்கொடைகள், கட்சிகளின் ஒட்டுமொத்த வருமானத்தில் ஒரு பகுதி தான் என்பதைப் பற்றி எவரும் பேசுவதில்லை. காரணம், தேர்தல் நிதிப்பத்திரங்கள் அல்லாத வகையிலும் ஏறக்குறைய இதே  அளவுக்கான தொகையை அரசியல் கட்சிகள் திரட்டி வருகின்றன. இதுவும் கூட தேர்தல் ஆணையத்திடம் அவை காட்டும் கணக்கில் உள்ளவைதான். மற்றபடி, கணக்கில் வராதவை எத்தனை ஆயிரம் கோடிகள் என்பதை அக்கட்சிகள் மட்டுமே அறியும். ஏனென்றால், 2019 நாடாளுமன்றத் தேர்தலில் மட்டும் ரூ.55,000 – ரூ.60,000 கோடிகள் செலவிடப்பட்டதாக ஜனநாயக சீர்திருத்தங்களுக்கான சங்கம் மதிப்பிட்டுள்ளது. இந்தக் கணக்குகளை வைத்துப் பார்க்கும் போது, தேர்தல் நிதிப்பத்திரங்கள் மூலம் இதுவரை அனைத்து தேசிய, மாநிலக் கட்சிகளும் திரட்டிய தொகையான ரூ.16,518 கோடிகள் என்பது மிகச்சிறியதே.

பொதுவாகவே, எந்தவொரு நிறுவனத்திற்கு அரசாங்க ஒப்பந்தம் ஒதுக்கப்பட்டாலும் குறைந்தது 40 சதவிகித கமிஷனைக் கட்சிகளுக்குக் கொடுக்க வேண்டும் என்பதே எழுதப்படாத விதியாக இருக்கிறது. தமிழகத்தில் ஜெயலலிதாவின் ஆட்சி 40 சதவிகித கமிஷன் ஆட்சி, கர்நாடகாவில் பா.ஜ.க ஆட்சி 40 சதவிகித கமிஷன் ஆட்சி என்று அப்பட்டமாக அம்பலமாகியதெல்லாம் நாமறிந்ததே. எனவே, பல இலட்சம் கோடி ரூபாய்கள் மதிப்புள்ள ஒப்பந்தங்களைக் கொடுத்துவிட்டு சில நூறு, ஆயிரம் கோடி ரூபாய்களுடன் பா.ஜ.க.வும் பிற கட்சிகளும் திருப்தி அடைந்து விடும் என நம்புவது முட்டாள்தனம். பா.ஜ.க. உருவாக்கிய தேர்தல் பத்திரங்களின் இலக்கு வெறும் நன்கொடை மட்டுமல்ல என்பதில் இருந்தே அவற்றை நாம் மதிப்பீடு செய்ய வேண்டும்.

படிக்க: தேர்தல் நிதிப் பத்திரங்கள்: பா.ஜ.க.வின் பாசிச வழிகளில் ஒன்று!

தேர்தல் நிதிப்பத்திரங்களுக்கு முன்பு

தேர்தல் நிதிப்பத்திரம் அறிமுகப்படுத்துவதற்கு முன்பும் அரசியல் கட்சிகள் கார்ப்பரேட்டுகளிடமிருந்து நன்கொடை வாங்கிக் கொண்டிருந்தன. ஆனால்,  தனிநபரிடமிருந்து ரூ.20,000-க்கும் மேல் நன்கொடை பெற்றால் கணக்குக் காட்ட வேண்டும்; வெளிநாட்டு நிறுவனங்களிடமிருந்து நிதி பெற முடியாது; நிறுவனங்கள் தமது லாபத்தில் 7.5 சதவிகிதம் மட்டுமே கட்சிகளுக்கு நன்கொடையாகத் தர முடியும் போன்ற பெயரளவிற்கான கட்டுப்பாடுகள் இருந்தன. அவற்றையெல்லாம் மீறி கார்ப்பரேட்டுகளிடம் அரசியல் கட்சிகள் பணம் வாங்குவதும், அதை எதிர்த்து சமூக செயல்பாட்டாளர்களும் குடிமை அமைப்புகளும் வழக்கு தொடுப்பதும் நடந்து வந்தன.

கடந்த 2004-ஆம் ஆண்டிலிருந்து  காங்கிரசும், பா.ஜ.க.வும் வேதாந்தா நிறுவனத்திடமிருந்து பல கோடிகளை நன்கொடையாகப் பெற்றன. அப்போது வேதாந்தா வெளிநாட்டு நிறுவனமாக வரையறுக்கப்பட்டிருந்தது. இதுகுறித்து, ஜனநாயக சீர்திருத்தங்களுக்கான சங்கம் டெல்லி உயர்நீதிமன்றத்தில் பொதுநல மனு தாக்கல்  செய்தது. இதை விசாரித்த நீதிமன்றம், அந்நன்கொடைகள் வெளிநாட்டு நிதிதான் என்றும், அவ்வாறு நிதிபெற்ற கட்சிகள் மீது ஆறு மாதங்களுக்குள் நடவடிக்கை எடுக்க வேண்டும் என்று 2014 மார்ச் மாதத்தில் ஒன்றிய உள்துறை அமைச்சகத்திற்கும் தேர்தல் ஆணையத்திற்கும் உத்தரவிட்டது. இந்தத் தீர்ப்பைக் காங்கிரசும், பா.ஜ.க-வும் கிடப்பில் போட்டன.

1976 ஆகஸ்ட் 5-க்குப் பிறகு வாங்கிய எந்த நன்கொடையும் சட்டவிரோதமானது அல்ல என்று 2018-ஆம் ஆண்டில் நாடாளுமன்றத்தில் விவாதங்களின்றி, வெளிநாட்டு நன்கொடைகள் ஒழுங்கமைப்புச் சட்டத்தை முன் தேதியிட்டு திருத்தியது பா.ஜ.க.. இத்திருத்தத்தின் மூலம் காங்கிரசும், பா.ஜ.க.வும் வேதாந்தாவிடம் பெற்ற நன்கொடைகள் சட்டப்பூர்வமாக்கப்பட்டன. இவ்வாறு, சட்டத்திருத்தத்தின் மூலம் ஊழலை சட்டப்பூர்வமாக்க வாய்ப்பிருக்கும் போது புதிதாக தேர்தல் நிதிப்பத்திரம் எதற்கு? என்ற கேள்வி எழாமல் இல்லை.

தேர்தல் நிதிப்பத்திரம் என்ற ஆயுதம்

காங்கிரசால் தனியார்மய-தாராளமய-உலகமயம் என்ற மறுகாலனியாக்கக் கொள்கைகளைத் தீவிரமாக நடைமுறைப்படுத்த முடியவில்லை என்பதிலிருந்தே,  ‘குஜராத் மாடல்’  ‘வளர்ச்சி நாயகன்’ என மோடியின் பிம்பம் ஊதிப் பெருக்கப்பட்டு, 2014 நாடாளுமன்றத் தேர்தலில் பா.ஜ.க. ஆட்சிக்கு வந்தது. இக்காலகட்டமானது அரசியல்-பொருளாதார ரீதியாக ஒரு மாறுதலைக் குறிக்கக் கூடியதாகும்.

மறுகாலனியாக்கக் கொள்கைகளைத் தீவிரப்படுத்துவதற்கு ஏற்ப அரசுக் கட்டுமானங்களில் மாற்றம் செய்வது; பெயரளவிலான ஜனநாயகம் – நாடாளுமன்ற முறை ஆகியவற்றை முடிவுக்குக் கொண்டு வருவது; அம்பானி-அதானி கும்பலின் ஏகபோகத்திற்கான இந்துராஷ்டிரம் என்ற பாசிச சர்வாதிகாரத்தை நிறுவுவதே மோடி அரசின் நோக்கமாகும். மறுகாலனியாக்கத்தின் அரசு வடிவமாக ஆணையங்களும் நிதி ஆயோக் போன்றவையும் கொண்டு வரப்பட்டன. துறைசார் அமைச்சர்களின் அதிகாரம் பறிக்கப்பட்டு, அனைத்து முடிவுகளையும் எடுக்கும் இடமாக பிரதமர் அலுவலகம் மாற்றப்பட்டது. அரசுச் செயலர்கள், ஆணையங்கள், ரிசர்வ் வங்கி உள்ளிட்ட அரசுக் கட்டுமானங்களிலும் அமலாக்கத்துறை, ஒன்றிய புலனாய்வுத்துறை, வருமான வரித்துறை ஆகியவற்றில் தேர்வுகள் மூலமாகவும், நேரடி நியமனங்கள் மூலமாகவும் ஆகப்பெரும்பான்மையாக ஆர்.எஸ்.எஸ் சங்கிகள் – ஆதரவு சக்திகள் நிரப்பப்பட்டனர்.

இந்த நிகழ்ச்சிப்போக்கின் ஓர் அங்கமாகவே தேர்தல் நிதிப்பத்திரமும் கொண்டு வரப்பட்டது.  அதுவும் மாநிலங்களவையில் பெரும்பான்மை இல்லாததால், குறுக்குவழியில், விவாதங்களைத் தடுக்கும் விதமாக பணமசோதாவாக 2017-ஆம் ஆண்டு பட்ஜெட்டில் தேர்தல் நிதிப்பத்திரம் அறிவிக்கப்பட்டது. அதன்பிறகு, மக்கள் பிரதிநிதித்துவச் சட்டம், வருமான வரிச் சட்டம் மற்றும் நிறுவனங்கள் சட்டம் ஆகியவற்றில் திருத்தங்கள் மேற்கொள்ளப்பட்டு 2018-ஆம் ஆண்டு தேர்தல் நிதிப்பத்திரம் நடைமுறைக்கு வந்தது. தொடக்கத்தில் தேர்தல் ஆணையமும், இந்திய ரிசர்வ் வங்கியும் இப்பத்திரத் திட்டத்தை எதிர்த்ததும் குறிப்பிடத்தக்கது.

தேர்தல் நிதிப்பத்திரத்தின் மூலம், 1 சதவிகித வாக்குகளைப் பெற்றுள்ள அங்கீகரிக்கப்பட்ட அரசியல் கட்சிகள் மட்டுமே நன்கொடை பெற முடியும். இந்தக் கட்டுப்பாடு சிறிய கட்சிகளை படிப்படியாக ஒழித்துக்கட்டும் நோக்கம் கொண்டது. யார் வேண்டுமானாலும் உச்சவரம்பின்றி நிதி கொடுக்கலாம், அதை பொதுவெளியில் சொல்லத் தேவையில்லை; அரசியல் கட்சிகளும் இவற்றை தேர்தல் ஆணையத்திற்கு கணக்குக் காட்டத் தேவையில்லை என்பதன் மூலம் கட்டற்ற வகையில் கார்ப்பரேட்டுகள் மூலம் பணம் பெறும் ஊழலுக்கான சட்டப்பூர்வ ஏற்பாட்டை செய்தது பா.ஜ.க.. இதன் மூலம் வெளிப்படைத்தன்மை ஏற்பட்டு, கருப்புபணப் புழக்கம் ஒழிந்து, நாட்டின் அரசியல் நிதி அமைப்பு முறை தூய்மைப்படும் எனக் கூறியது, மோடி அரசு. ஆனால், தனக்கு சாதகமான கார்ப்பரேட்டுகளிடம் பணம் வாங்குவதை மறைப்பதற்கு மட்டுமல்ல, எதிர்த்தரப்பிலுள்ள முதலாளிகளையும் மிரட்டி வசூல்வேட்டை நடத்துவதற்கான ஆயுதம்தான் தேர்தல் நிதிப்பத்திரம் என்பதை மோடி கும்பல் நடைமுறையில் நிரூபித்திருக்கிறது.

படிக்க: தேர்தல் நிதிப்பத்திரம்: ‘தேர்தல் ஜனநாயகத்திற்கு’ வெட்டப்பட்ட சவக்குழி! 

பாசிசக் கும்பலின்  “வசூல் ஏஜெண்டுகள்”

அமலாக்கத்துறை, ஒன்றிய புலனாய்வுத்துறை, வருமான வரித்துறை ஆகிய அமைப்புகளைத் தமது ஏவல் படையாகப் பயன்படுத்தி வருகிறது பாசிசக் கும்பல். கடந்த காலங்களில் காங்கிரஸ் கட்சி ஆட்சியில் இருக்கும் போது, சி.பி.ஐ. உள்ளிட்ட அமைப்புகளை தனது அரசியல் ஆதாயத்திற்காக ஏவியிருந்தாலும், தற்போது தன்மைரீதியான மாற்றம் ஏற்பட்டிருக்கிறது.

தேர்தல் நிதிப்பத்திரங்கள் குறித்த விவரங்கள் வெளியான பிறகு, இந்த ‘தன்னிச்சையான’ விசாரணை அமைப்புகள் மோடி அரசின் வசூல் ஏஜெண்டுகளாக மாறியிருப்பது அம்பலமாகியிருக்கிறது. பொருளாதார ரீதியாக, பா.ஜ.க.வுக்கு நிதி கொடுக்காத கார்ப்பரேட் நிறுவனங்கள் மீது தனது அடியாட்களான இவ்விசாரணை அமைப்புகளை ஏவிவிட்டு, பணம் பறித்திருக்கிறது மோடி அரசு.

கார்ப்பரேட் நிறுவனங்களில் ரெய்டுகள் நடத்தியிருப்பதும், அதன்பிறகு அந்நிறுவனங்கள் தேர்தல் நிதிப்பத்திரங்கள் வாங்கியிருப்பதும், அவற்றில் பெரும்பாலானவை பா.ஜ.க.விற்கு அளிக்கப்பட்டவை என்பதும் பல்வேறு முதலாளித்துவ ஊடகங்களில் புள்ளிவிவரங்களுடன் ஆதாரப்பூர்வமாக அம்பலாகியிருக்கின்றன. அதன்படி, ஏப்ரல் 2019 முதல் ஜனவரி 2024 வரை வெளியிடப்பட்டுள்ள இப்பத்திர விவரத்தில் முதலிடத்தில் உள்ள லாட்டரி மார்ட்டினின் ஃப்யூச்சர் கேமிங் & ஹோட்டல் சர்வீசஸ், மேகா பொறியியல் & உள்கட்டுமான நிறுவனம், ஹெட்டிரோ பார்மா குழுமம் உள்ளிட்ட 41 நிறுவனங்களில் விசாரணை அமைப்புகள் மூலம் ‘ரெய்டு’கள் நடத்தி ரூ.2,471 கோடிகளை பா.ஜ.க.வுக்காக மோடி அரசு வசூலித்திருப்பது வெட்ட வெளிச்சமாகியிருக்கிறது.

தற்போது கூட, வருமான வரித்துறை மூலம் பல ஆண்டுகளுக்கு முந்தைய வருமான வரிக் கணக்குகளை மறு ஆய்வு செய்திருப்பதாக கூறி பல நூறுகோடி ரூபாய்களை கட்டச் சொல்லி, காங்கிரஸ் கட்சியின் வங்கிக் கணக்குகளை முடக்கி தொடர்ச்சியாக நெருக்கடி அளித்து வருகிறது. ஹேமந்த் சோரன், அரவிந்த் கெஜ்ரிவால் உள்ளிட்ட எதிர்க்கட்சி முதல்வர்களைக் கைது செய்வதற்கு அமலாக்கத்துறையைப் பயன்படுத்தி வருகிறது. இத்தனை பிரச்சினைகள் இருந்தாலும், இந்தத் தேர்தல் நிதிப்பத்திரங்கள் மூலம் எதிர்க்கட்சிகளும் ஆதாயம் அடைந்தனர், ஆனால் அவை தற்காலிகமானவை.

படிக்க: தேர்தல் நிதிப்பத்திரம் – கருப்புப் பணத்தை சுருட்ட பா.ஜ.க-வின் புதிய அஸ்திரம் !

எதிர்க்கட்சிகள்: ஆதாயங்களும் விமர்சனங்களும்

தேர்தல் நிதிப்பத்திரங்கள் மூலமாக பா.ஜ.க. சரிபாதி நன்கொடைகளைப் பெற்றது என்றால், மீதமுள்ள சுமார் ரூ.8,000 கோடிகளை பிற கட்சிகள் அனைத்தும் சேர்ந்து வாங்கியிருக்கின்றன. கடந்த பத்தாண்டுகளில் பலமுறை ஒன்றிய அரசின் அமலாக்கத்துறை, வருமான வரித்துறையின் சோதனைகளுக்கு ஆளான லாட்டரி மார்ட்டின் குழுமம், பா.ஜ.க.வுக்கு ரூ.100 கோடி மட்டுமே நன்கொடை கொடுத்துள்ளது. லாட்டரிக்கு சட்டப்பூர்வ அனுமதியுள்ள மேற்கு வங்கத்தில் ஆளும் கட்சியான திரிணாமுல் காங்கிரசுக்கு ரூ.500 கோடிக்கும் அதிகமாக நன்கொடை கொடுத்துள்ளது. சிக்கிம் மாநிலத்திலும் ஆளுங்கட்சிக்கு ரூ.11 கோடி கொடுத்துள்ளது. ஆனால், லாட்டரிக்குத் தடைவிதிக்கப்பட்டுள்ள தமிழ்நாட்டில், ஆளுங்கட்சியான தி.மு.க-வுக்கு ரூ.500 கோடிக்கும் அதிகமாக நன்கொடை கொடுத்திருக்கிறது. இதேபோல லாட்டரிக்குத் தடை விதிக்கப்பட்டுள்ள ஆந்திராவின் ஒய்.எஸ்.ஆர். காங்கிரசுக்கு ரூ.149 கோடிகளைக் கொடுத்திருக்கிறது. வெளிப்படையாக எந்த ஆதாயமும் இல்லாமல் இத்தனை கோடி ரூபாய்களை ஏன் கொடுக்க வேண்டும்? தமிழ்நாட்டில் சட்டவிரோதமாக லாட்டரி விநியோகம் நடந்து வருகிறது என்றால், ஆந்திராவிலோ, நிதி நெருக்கடி காரணமாக லாட்டரி மற்றும் சூதாட்டத்திற்கு அனுமதி கொடுப்பது குறித்து 2021-2022 காலகட்டத்தில் ஒரு குழு அமைத்து ஆய்வு செய்யப்பட்டது என்பதை இணைப்புப் புள்ளிகளாக நாம் எடுத்துக்கொள்ள வேண்டும்.

2018-ஆம் ஆண்டில் ஸ்டெர்லைட் ஆலைக்காக துப்பாக்கிச்சூடு நடந்து, வேதாந்தா நிறுவனம் அம்பலப்பட்டு நிற்கும் நிலையிலும் கூட, அதனிடமிருந்து பா.ஜ.க.வை விட அதிக தேர்தல் நன்கொடையை காங்கிரஸ் பெற்றிருக்கிறது. இது மட்டுமின்றி ரியல் எஸ்டேட் மற்றும் கட்டுமான நிறுவனங்கள், மருந்து தயாரிப்பு நிறுவனங்களும் எதிர்க்கட்சிகளுக்கு கோடிக்கணக்கில் தேர்தல் நிதிப்பத்திரங்கள் மூலம் நன்கொடை அளித்துள்ள விவரங்கள் அம்பலமாகியுள்ளன. கார்ப்பரேட் – அரசியல் கட்சி இடையிலான கள்ளக்கூட்டின் வடிவமாக, தேர்தல் நிதிப்பத்திரங்களை பா.ஜ.க. தனக்கு சாதகமாக உருவாக்கினாலும் எதிர்க்கட்சிகளும் குறிப்பிட்ட அளவுக்குப் பயனடைந்துள்ளன.

ஆனால், “தேர்தல் பத்திரங்கள் என்ற பெயரில் உலகின் மிகப்பெரிய மிரட்டி பணம் பறிக்கும் (ஹஃப்தா வசூலி) கும்பலை நடத்தியவர் நரேந்திர மோடி”  என்று ராகுல் காந்தி கடுமையாக விமர்சித்திருந்தார். இதற்கு பதில் சொன்ன அமித் ஷா, “காந்தியும் ரூ.1,600 கோடி பெற்றார். அந்த ‘ஹஃப்தா வசூலி’ எங்கிருந்து கிடைத்தது என்பதை அவர் விளக்க வேண்டும். இது வெளிப்படையான நன்கொடை என்று நாங்கள் கூறுகிறோம், ஆனால் அவர் அதை வசூலி என்று சொன்னால், அவர் விவரங்களை அளிக்க வேண்டும்”என்று சி.என்.என். நியூஸ் 18 நடத்திய உச்சிமாநாட்டில் பேசினார்.

பா.ஜ.க. விசாரணை அமைப்புகளை ஏவி மிரட்டிப் பணம் பறிக்கிறது என்று விமர்சித்தார் மு.க.ஸ்டாலின். பா.ஜ.க. மாநிலத்தலைவர் அண்ணாமலையோ, ஒரு மாநிலக் கட்சி எதற்கு தேர்தல் நிதிப்பத்திரம் மூலம் ரூ.656 கோடி நிதி பெற வேண்டும் என்று கேள்வியெழுப்பினார். பாசிசக் கும்பலின் இக்கேள்விகளுக்கு எதிர்க்கட்சிகளிடம் பதில் இல்லை.

எதிர்க்கட்சிகளுக்கு பா.ஜ.க. கார்ப்பரேட்டுகளிடம் நிதி வாங்குவது பிரச்சினை இல்லை. மாறாக தங்களது எஜமானர்களான ஆளும் வர்க்கத்தின் மற்றொரு பிரிவு கார்ப்பரேட்டுகளை விசாரணை அமைப்புகள் மூலம் மிரட்டி பா.ஜ.க. பணம் பறித்திருப்பதே பிரச்சினை. இவ்வாறு விசாரணை அமைப்புகளை ஏவி பா.ஜ.க. பணம் பறிப்பதால், தங்களுடைய உரிமை பறிக்கப்படுவதையே ஜனநாயகம் பறிக்கப்படுவதாகக் கூப்பாடு போடுகின்றன எதிர்க்கட்சிகள். எனவேதான் “தேர்தல் நிதிப்பத்திரங்கள் திட்டம் அரசியலமைப்பிற்கு எதிரானது என்று உச்சநீதிமன்றம் சரியாக கூறியுள்ளது. உச்ச நீதிமன்றத்தின் இந்தத் தீர்ப்பு வெளிப்படையான தேர்தல் நடைமுறையை உறுதி செய்யும். இந்தத் தீர்ப்பு அனைத்து அரசியல் கட்சிகளுக்கு ஜனநாயகத்தையும், சமநிலையையும் மீட்டெடுத்துள்ளது. இந்த தீர்ப்பு தேர்தல் அமைப்பின் மீதான சாமானியர்களின் நம்பிக்கையையும் உறுதி செய்துள்ளது” என்று கூறியிருக்கிறார் மு.க.ஸ்டாலின்.

மற்றபடி, கார்ப்பரேட்டுகள் நாட்டைக் கொள்ளையிடுவதும், மக்கள் வாழ்வைச் சூறையாடுவதும், வரி ஏய்ப்பு செய்வதும், இவற்றுக்காக அரசியல் கட்சிகளுக்கு நன்கொடை என்ற பெயரில் ஊழல்படுத்துவதும் இவர்களுக்குப் பிரச்சினை இல்லை. பா.ஜ.க.வுக்கு மட்டும் ஆதாயம் தருவதாக இல்லாமல் அனைவரும் இவ்வாறு ஊழல் செய்வதற்குப் பொருத்தமான கட்டமைப்பு வேண்டும் என்பது தான் இவர்களது கோரிக்கை.

படிக்க: காலாவதியான தேர்தல் பத்திரங்கள் : விதிகளைத் தளர்த்திய நிதியமைச்சகம் !

தேர்தல் நிதிப்பத்திரம்: நாட்டிற்கும், மக்களுக்கும் எதிரானது!

தேர்தல் நிதிப்பத்திரத்தின் மூலம் கார்ப்பரேட்டுகளிடமிருந்து கட்சிகள் பெற்ற நிதி விவரப் பட்டியல் வெளியான அதேநேரத்தில், இதற்கு கைமாறாக அரசுத் திட்டங்களுக்கான ஒப்பந்தங்களையும், சாதகமான சூழலியல் சட்டத் திருத்தங்களையும் கார்ப்பரேட்டுகள் சாதித்துக் கொண்டதும் அம்பலமாகியுள்ளது. ஆனால் இவையெல்லாம் விவாதப் பொருளாகவில்லை.  “பா.ஜ.க.விற்கு நிதி வழங்கிய 33 நிறுவனங்கள், மொத்தமாக 172 முக்கிய திட்டங்களுக்கான ஒப்பந்தங்களையும், திட்டத்திற்கான அனுமதியையும் பெற்றிருக்கின்றன. இவ்வாறு ஒப்புதல் அளிக்கப்பட்ட திட்டங்களின் மதிப்பீடு ரூ.3.7 லட்சம் கோடியாகும். ஆனால், கார்ப்பரேட்டுகள் கொடுத்த நிதி வெறும் ரூ.1,751 கோடி” என்கிறார் பிரசாந்த் பூஷன்.

இப்பத்திரத்தின் மூலம் 35 மருந்து நிறுவனங்கள் பல்வேறு கட்சிகளுக்கு சுமார் ரு.1,000 கோடி நிதியளித்திருக்கின்றன. இவற்றில், ஹெட்டிரோ (கொரோனா மருந்து ரெம்டெசிவிர்), டோரண்ட் (டெப்லாட்-150, லோசார்-எச், லோபாமைடு), சைடஸ் ஹெல்த்கேர்,  க்ளென்மார்க், சிப்லா (ஆர்.சி. இருமல் மருந்து, சிப்ரெமி), ஐ.பி.சி.ஏ. லெபாரர்ட்டிஸ் (லாரியாகோ) உள்ளிட்ட 7 நிறுவனங்களின் மருந்துகள் தரமற்றவை என்று மகாராஷ்டிர உணவு மற்றும் மருந்து நிர்வாக அமைச்சகத்தால் கண்டறியப்பட்டிருக்கிறது.

இந்த மருந்துகளெல்லாம், வயிற்றுப்போக்கு, இதய நோய், இரத்த அழுத்தம், பாக்டீரியா தொற்று, சளி, இருமல் போன்றவற்றிற்காக மக்கள் சாதாரணமாகப் பயன்படுத்துபவையே. இந்நிறுவனங்கள் தங்களின் லாபவெறிக்காக தரமற்ற மருந்துகளைத் தயாரித்து, இந்தியா மற்றும் உலக நாடுகளின் அப்பாவி மக்களை படுகொலை செய்கின்றன. பிற நாடுகளில் இந்திய இருமல் மருந்துகள் மற்றும் கண் களிம்புகளால் மரணங்களும், நோய்த் தொற்றுகளும் ஏற்பட்டதும், அமெரிக்க அரசும் இந்திய மருந்துகள் தரமற்றவை என்று குற்றஞ்சாட்டியதும் குறிப்பிடத்தக்கது.

மேலும், பா.ஜ.க.விற்கும், ஒடிசாவின் பிஜூ ஜனதா தளம் கட்சிக்கும் நிதிப்பத்திரங்கள் வழங்கியதில் சுரங்க நிறுவனங்கள் முன்னிலை வகிக்கின்றன. குறிப்பாக, பகாசுர வேதாந்தா நிறுவனத்தின் கொள்ளை லாபத்திற்காக, கொரோனா ஊரடங்கு காலத்திலும், அதன் பிறகும் சுரங்கங்களின் உற்பத்தியை 50 சதவிகிதம் கூடுதலாக அதிகரித்துக் கொள்ள அனுமதித்திருக்கிறது மோடி அரசு. ராஜஸ்தானில் எண்ணெய் மற்றும் எரிவாயு எடுப்பதற்கு மக்களின் கருத்துகள் தேவையில்லை என சுற்றுச்சூழல் விதி மாற்றப்பட்டிருக்கிறது. ரித்விக் தத்தா போன்ற சூழலியல் செயல்பாட்டாளர்களை ஒடுக்குவதற்கு சி.பி.ஜ. பயன்படுத்தப்பட்டிருக்கிறது. இந்த சேவைக்காக பா.ஜ.க.விற்கு, கடந்த 2016 முதல் 2020 வரை இந்திய மதிப்பில் சுமார் ரூ.40 கோடி கொடுத்திருக்கிறது வேதாந்தா நிறுவனம்.

எனவே, இந்நிதிப்பத்திரத்தை ஒரு ஊழல் என்று மட்டும் சொல்லமுடியாது.  தனது அதிகாரத்தைக் கொண்டு, இந்திய நாட்டின் இயற்கை- மனித வளங்களைக் கார்ப்பரேட்டுகள் கொள்ளையடிப்பதற்கேற்ப அரசு இயந்திரத்தை மறுகட்டமைப்பு செய்திருக்கிறது பாசிசமோடி அரசு. தேர்தல் நிதிப்பத்திரமானது, கார்ப்பரேட்டுகள்-அரசியல் கட்சிகள்-அரசு இயந்திரம் ஆகியவற்றின் கள்ளக்கூட்டிற்கு ஏற்படுத்தப்பட்ட சட்டப்பூர்வ ஏற்பாடேயாகும். குறிப்பாக, பா.ஜ.க.வின் இந்துராஷ்டிர நோக்கத்திற்கான பாசிசக் கருவியாகும். அந்த வகையில் தேர்தல் நிதிப்பத்திரங்கள் ஒட்டுமொத்த நாட்டிற்கும், மக்களுக்கும் எதிரானவையாகும். இதுகுறித்து உச்சநீதிமன்றத்திற்குக் கவலையில்லை, தேர்தல் நிதிப்பத்திரத்தில் வெளிப்படைத் தன்மையில்லாததுதான் பிரச்சினையாக இருக்கிறது. எனவேதான்  வெளிப்படைத்தன்மையில்லாத இந்நிதிப்பத்திர முறையை அரசியல் சாசனத்துக்கு எதிரானது என்று உத்தரவிட்டிருக்கிறது உச்சநீதிமன்றம். ஆனால், ஃபிக்கி, சி.ஐ.ஐ, அசோசெம் போன்ற கார்ப்பரேட் முதலாளிகளது சங்கங்களோ, அரசியல் கட்சிகளுக்கான தேர்தல் நன்கொடையில் வெளிப்படைத் தன்மை இருப்பது தங்களுக்கு ஆபத்தானது என்று கூக்குரலிடுகின்றனர்.

எனவே, தேர்தல்  நிதிப்பத்திரத்திற்கு பதிலாக வேறு புது வழிகள் கண்டுபிடிக்கப்படலாம்.  இப்பத்திரங்கள் இருக்கும் போதே பல வழிகளில், அரசியல் கட்சிகள் கார்ப்பரேட்டுகளிடமிருந்து நிதி பெறுகின்றன. அதற்காகவே பல சட்டத்திருத்தங்கள் மேற்கொள்ளப்பட்டிருக்கின்றன. ஆகவே, கார்ப்பரேட்டுகளுக்கு சேவை செய்வதற்காகவே உருவாக்கப்பட்ட இந்த அரசுக்கட்டமைப்பிற்குள்ளேயே அரசியல் கட்சிகள்-கார்ப்பரேட்டுகளின் கள்ளக்கூட்டை ஒழிக்க முடியாது.  அதுவும் அம்பானி-அதானிகளின் ஏகபோகத்திற்காக அரசுக்கட்டுமானம் முழுவதும் பாசிசமயமாகி வரும் சூழலில், இந்த அரசுக் கட்டமைப்பானது, மக்களுக்கு மட்டுமல்ல எதிர்க்கட்சிகளுக்கும், அவர்களை ஆதரிக்கும் கார்ப்பரேட்டுகளின் ஒரு பிரிவுக்குமே எதிரானதாக மாறியிருக்கிறது. எனவே, எதிர்க்கட்சிகள் மக்களின் கோரிக்கைகளுக்கு செவி கொடுப்பதும், மக்களுடன் இணைந்து மக்களுக்கு ஜனநாயக உரிமையை வழங்குகிற – அரசே தேர்தலை நடத்துகிற ஒரு பாசிச எதிர்ப்பு ஜனநாயகக் குடியரசிற்காக போராட வேண்டியதும் அவசியமாகும்.

அப்பு

(புதிய ஜனநாயகம் – ஏப்ரல் 2024 | மின்னிதழ்)

சமூக வலைத்தளங்களில் வினவை பின்தொடருங்கள்:
WhatsApp, X (Twitter), Facebook, YouTube